المشاركة الأصلية كتبت بواسطة محمد الجــــذع
[poem=font="simplified Arabic,6,white,bold,normal" Bkcolor="transparent" Bkimage="backgrounds/21.gif" Border="groove,6,crimson" Type=2 Line=0 Align=center Use=sp Num="0,black"]
البارحه مـن جـور الايـام ونيـت=ونـة مريـضٍ دخـلـوه العنـايـه
ونين "حـيٍ" ذاكـرٍ غالـيٍ "ميـت"=سافـر عـن الدنيـا ولاهـو بجايـه
أهـلّ دمعـي واعقبـه بالتناهـيـت=واجرّ صوتي مـن خـلاي بخلايـه
يااااحسرتي في داخل العيـن خفّيـت=دمعة فـراقٍ كتمهـا اعظـم جنايـه
لامن ذكرت امي عن الناس صديـت=واخفيت دمعي عن جميـع اخويايـه
وان صرت انا لحالي من الدمع هلّيت=شـيٍ يبيّـح كـل مـافـي خفـايـه
ياليت دمعي يرجـع الميـت ياليـت=كـان ازعـج العالـم بكثـرة بكايـه
ياياه في (يـوم الثلـوث) استخفّيـت=يـوم انهـم لفّـوك وسـط العبايـه
فالمغسلـه حبيـت راسك..وحبيـت=رجـلٍ خطاهـا مامشـت للغـوايـه
والله عليـم بحالتـي يـوم صلـيـت=عليك..واشتلتـك وكــلٍ ورايــه
عـزالله انـي يـوم شلتـك تمنيـت=انـي بدلـك وتاخـذيـن الكفـايـه
يايـاه مـن عقبـك ترانـي تردّيـت=سـواة "عـودٍ" دخـلـوه الرعـايـه
واللي خلق فـي عيشتـي ماتهنيـت=المـوت قدمـي والمصايـب قفايـه
اليوم صرت اخاف حتى من البيـت=واخـاف منـي لانظـرت المرايـه
أبي السموحه كان في حقك اخطيـت=أنا مقصّـر واعتـرف فـي خطايـه
نعـم مقصّـر مهمـا يايـاه سويـت=حتى لـو ان رضـاك غايـة منايـه
ياياه حيّـه بـس انـا اللـي توفيـت=وسحبت من "بيـر الليالـي" رشايـه
راحـت حياتـك كلبوهـا تشاتـيـت=مـن البـدايـه مؤلـمـه للنهـايـه
تخفين عنا السقـم والعيـن ماتبيـت=حتى كتبتي مـن مرضـك الوصايـه
"العـام" لاشفتـك تـراي اسفهليـت="واليـوم" مايلمـس لسانـي جمايـه
وشلون ابنسى دعوتك كـل ماجيـت=بعز المرض تدعيـن لـي بالهدايـه
ماياخـذك بالله لــوم الطواعـيـت=يامربـيـه والله ونـعـم الربـايـه
ياساجـده لله خـمـس المواقـيـت=هذا على فراقك هـو اكبـر عزايـه
يايـاه عقبـك مـن ليالـيّ ملـيـت=جسـمٍ بليـا روح والفـكـر تـايـه
"ان قمت" ذكّرني بك البيت واغضيت="وان نمت" لين انك مع الحلـم جايـه
الله واكبر كل ماصبحـت وامسيـت=مافي الزمن راحـه ولاهـو بغايـه
وانـا كثـر مافـي حياتـي تمنيـت=أغلا امنياتـي تجلـس امـي معايـه
ماغير اصوّت من شقا الوقت تصويت=وارفع لحرب الهـم تسعيـن رايـه
العـام لاجيتـك تقولـيـن حيـيـت=واليا طلبتـك قلتـي ابشـر ضنايـه
واليوم انـا ارفـع لقمتـي لاتغديـت=واليـا ذكرتـك حوّلـت مـن يدايـه
الله يبيحـك مافـي المـوت تفويـت=اليا وصـل مافـي وصولـه عبايـه
العمـر لحضـه والمنايـا تشاويـت=وكـلٍ علـى ماقيـل يقنـع بـرايـه
وان كان ودك تعرفي ويـش سويـت=انا على خبـرك واصـارع شقايـه
الشكوى لله رحت واجهدت وازريت=لكـن عسـى الله مايخيّـب رجايـه
عساك فالفردوس ياحسنـة الصيـت=في روضةٍ خضـرا بـدار الكفايـه
الله يبيحـك كـل ماجيـت والقيـت=نظره على قبـرك ورشّـش سمايـه
(ودعتك الله) وادعي الله مـن البيـت=انـه علـى فرقـاك يجبـر عزايـه
[/poem]
