الف(ن) اشب النار واركـي دلالـي
واولف بيوت الشعـر مـن خيالـي
لو ان شعري صاير(ن) راس مالـي
عزي لمن صار الشعـر راس مالـه
,
والبا بديت القاف مـن حيـث لاادري
قافن حبكته بيـن عقلـي وصـدري
ياخذني الهاجوس وآسـج واسـري
واحل قيـد الفكـر واطلـق عقالـه
,
والتا تموت الفكره احيـان واحيـان
تحيا على ايدين الفرايـح والاحـزان
ولافيه نار(ن) دون ضو(ن) ودخـان
والهرج تغنـي قلتـه عـن طوالـه
,
والثـا ثنيـت اركابـهـا للتـحـدي
ماهمني مـن يسـرع ومـن يهـدي
جيتك علـى ضـو الخيـال امتقـدي
ولا كل من قرب لـه الحمـل شالـه
,
والجيم جيت وكل رجـل(ن) بعرفـه
يمشي على منهـاج فكـره وحرفـه
اللي يحـز البـال ممنـوع صرفـه
العـرف مكسـب والجهالـه جهالـه
,
والحا حمام الـورق غنـا وغنيـت
وياوجد حالي كل ماقلـت لـي بيـت
وياليت تنفع كـل مـن قـال ياليـت
ماكـان عينـي تسهـر فكـل لالـه
,
والخـا خفوقـي بيـن لجـه ولجـه
اتقول طايربـه مـع الوقـت عجـه
والبال غـادي بيـن سجـه وسجـه
وكـل علـى ماقيـل يشكـي لحالـه
,
والـدال دون ياقلـم قبـل اهــون
واطبـع يـاراع الطابعـه بالملـون
مقصودي اللي مـن خيالـي تكـون
لا القلـب ريحتـه ولا البـال دالـه
,
والذال ذنبي ياعرب داعجـت عيـن
اللي بلتنـي بالمحبـه مـن اسنيـن
من وين ماهب الهوى قلت من ويـن
القـى مـع ادروب المحبـه سهالـه
,
والرا رحابـة خاطـري مااسعفتنـي
من يوم طاعـت ظلمهـا واتركتنـي
من دون سبـه روحـت واهجرتنـي
انا اشهـد ان الحـب مابـه عدالـه
,
والزا زواني مازوى عنتـر وقيـس
وفاضت دموعي فوق بيض القراطيس
واركت على صدري كبار الهواجيـس
واللي بكا مافيـه حـي(ن) وعالـه
,
والسين سم الهجـر سمـم عروقـي
في عالم العشـاق ضاعـت حقوقـي
ياكيف آسوي كل ماهـاض شوقـي
لابــارك الله فالجـفـا والبطـالـه
,
والشين شاب الـراس والعمـر تـوه
والقوت غطت ظلمتـه فـوق ضـوه
ياقـوة الله مابـقـى لــي قــوه
وش في يدي غير القلـم والرسالـه
,
والصاد صحت وقلت واشيب عينـي
هـذا جـزى حبـي وهـذا حنينـي
واتـل قلبـي تـل حبـل المتيـنـي
تل الرشا من فـوق ظهـر المحالـه
,
الظـاد ظلـي ياجروحـي بروحـي
ولااحدن من العربان يسمع ويوحـي
خليك فـي قلبـي مدامـك جروحـي
وكلن علـى ليـلاه يشـرب دلالـه
,
والطـا طواحيـن الليالـي مريـعـه
وكم دمعت(ن) من فوق خدي سريعه
وان كان ماطاعـك زمانـك تطيعـه
وياحظ من هـذا الزمـان استوالـه
,
والعين عايش ميـر مانـي بعايـش
والقلب من بيـن المعاليـق غايـش
والرجل تمشي فوق رووس الهوايش
ولااحدن مسـوي فالمشقـى جمالـه
,
والغيـن غنـي ياطيـور الغصايـن
وانـا معـك بجـر زيـن اللحايـن
واللـي يقولـه رب الاكـوان كايـن
ترى القـدر واقـع ولابـه محالـه
,
والفا فلانه من يـودي لهـا القـول
تكفون يااهل الطيب ابا دز مرسـول
قولو لها لو يقفـي الوقـت ويطـول
إن الـغـلا لازال حـتـى الثمـالـه
,
والقاف قولو يمكـن القـول يجـدي
لازال حلمي يااريـش العيـن وردي
وإني من الهجـران مفطـور كبـدي
صاحبـك يبكيلـك ولا احـدن بكالـه
,
والكـاف كفـو دمعهـا لـو تباكـت
ثم اسندوهـا ياعـرب لـو تراكـت
ثم احفظو لي هرجهـا لـو تحاكـت
اكيد تنشدكـم عـن احمـد وحالـه
,
واللام لوموها علـى حالـي شـوي
يمكن يحرك في قسـا قلبهـا شـي
ويمكن يحـن الحـي للميـت الحـي
وعقب البطـا تلفـي علينـا رحالـه
,
والميم موق اعيونهـا لـو نسانـي
اكيـد مالـي عقبهـا حـب ثـانـي
قولـو لهـا هـذي مقولـة لسانـي
هـذا شعـور القلـب وهـذا مقالـه
,
والنون نون العين شـاف التهاويـل
كله سبايـب مـن تسهرنـي الليـل
بنت الشيوخ اللـي هدبهـا مظاليـل
خلت جنـوب القلـب يبكـي شمالـه
,
والها هجوسـي كـل ساعـه تغنـي
واللي جهلني ينشـد الشعـر عنـي
شاعر وحظي سابق(ن) صغر سنـي
شربت من جال الشعـر ليـن جالـه
,
والواو ولفت القصيـده وانـا أحمـد
من لابت(ن) وقت المواقيف تصمـد
وعدونـا بالسيـف والرمـح يخمـد
حنا هـل الطـالات واهـل الشكالـه
,
واليا يا رب اطلبك عفـوك ورحمـاك
وانت الذي ماخـاب منهـو ترجـاك
يارب انا عبدك وانا تحـت رجـواك
وانت الكريـم الحـق رب الجلالـه
