قصتي يوم بغيت يغمن علّيه ...حقيقيه !!!
هذا يا شباب اكيد تسألون عن غيبتي هالايام اللي راحت ......
(( يا ابن الحلال الا ما صدقوا تفارقهم ))
الموهم ....
هذا يا شباب ويا بناتات ....
دق علي واحد من الشباب وقال ابيك توصلني للعمل لان سيارته في الصناعيه
مدري قلب عليها مدري منسرقه المهم انه ما عنده سياره ...
وانا اللي انقز من قدام جهازي واروح وامره في بيتهم ويركب معي ...
هو وظيفته عسكري ويداوم في حدا مجمعات بالرياض ...
المهم ومشددين الحراسه هاك الليله ...
وانا اللي اجي مدرعم على بالي انه مثل اول ما احد يم احد الا يوم اقبلت عليهم والا اشوف
الدوريه يوم حركت ما هيب دوريه الا عربه عسكريه ومعهم جيب وعليه رشاش ار بي جي
مدري عيار ابو خمسين وطردي وراي يحسبوني ارهابي ويوم ما وقفت (( بهالاثناء كنت مفهي
ولا ادري وش السالفه )) وهم اللي يطلقون علي طلقه تخريعيه ...
وهو اللي ينقز لهم خويي مع الجام ويطلع القبعه العسكريه (( علشان يعرفون انه خويهم )) وهم
اللي ينتفونه ومن حمد ربكم انه جت بالقبعه ...
انا قمت اتراعد وجتني ام الركب و اقوم اتذكر ذنوب جداني مو بس ذنوبي ووجهي غدى كنه
فنيله النصر (( يع )) وحالتي حاله ...
خويي كان يدخن وهو اللي يرمي زيقارته مع الجام ... طبعا هم شافوا الشرار وهم يسّكون
العافيه (( يعني ذلوا )) وهم اللي يتصلون على الدوريات وانواع الطرد وانا للحين مدري شقصتهم (( طارديني قبل سنه واحسب معمم علي )) خويي كلم خوياه بالمجمع بجواله وقالهم لا تطردون السياره الشبح العنابي (( موديل 98 شاريه من امير - نظيف - ما سيم وما انحد والبيع لاعلى سعر - للاتصال يرجي مراسلتنا على العنوان بالمنتدى )) - نرجع لموضوعنا ...
المهم يوم كلمهم وهم اللي اشوى يوخرون عنا لما وصلناهم وانا من الفرحه اغمن عليّه وهم ينقلون للمستشفى وصابتني دوخه وحكة ظهر وودي بس احك صرتي (( صايره كنها قصعه جربوع من الحلا طبعا ))
وبعد جاني الظابط حقهم واعتذر مني علشان ما اشكيهم ...
تدرون وش القهر بالسالفه ......
ان بعد هالخرعه وهالمطارد واني بغيت اروح غلطه تدرون وش القهر .... القهر ان خويي طلع
استلامه مو ذيك الليله لا كان ثاني يوم ...
واتصل بي بعد ما نزلته وقال تعال رجعني الضابط يقولي بكره قلت له يا بيي توكل على الله
ما كثر الله الا اليموزين ....
هذي قصتي باختصار ........
همسه :
اللهم اجعل هذا البلد آمن وسائر بلاد العالمين ....
:برافو: :برافو: :اموه:
