سلطان الحب روايه روووماااانسيه سعوديه

أبطال القصة :
عائلة أبو عبدا لله وتتكون من :
محمد أبو عبدالله وزوجته نوره أم عبدالله وأولادهم وهم بالترتيب:نجوى متزوجة زوجها اسمه صلاح معلمه مادة أحياء وعيالها سحر وعماد
عبدالله عمره 26 موظف حكومي--- هند عمرها23توها متخرجة من الجامعة قسم فنيه
خالد أخر سنه في الجامعة قسم كيمياء --- سارة ثانوية عامه --- سوسن ثالث متوسط

عائلة سعود السامي :عايله غنية جدا ومعروفه
الجد سعود السامي تاجر معروف
أبنائه:
1-عبدالعزيز زوجته رجاء أبنائهم
سلطان خريج جامعة كاليفورنيا ماجستير إدارة أعمال29 سنه أعزب موظف في شركات أبوه
فهد23 يدرس في نفس الجامعة قسم هندسه
ناصر22 سنه خريج ثانوي +دبلوم حاسب موظف في شركات أبوه
ريم ثانوية عامه

2-عبدالله وزوجته فوزيه أبنائهم
فيصل خريج قانون موظف في شركات العايله 27 سنه
طارق 23سنه طالب في الجامعة قسم محاسبه
منى أول سنه في الجامعة قسم اقتصاد مالي
أروى 11سنه

3-عبد اللطيف متوفى هو وزوجته أبنائهم
نواف 23 سنه يدرس مع فهد في أمريكا
هيفاء ثاني ثانوي

4-فهد وزوجته منيرة بناتهم
اصايل 24 سنه مخطوبه مدرسه تدبير منزلي
العنود أول سنه جامعه قسم تربيه خاصة

4- حنان وزوجها سلمان أبنائهم
وجود ثاني متوسط
وليد وياسر توأم6 سنوات

5- جواهر وزوجها عادل أبنائهم: الهنوف 7سنوات و مشاري 5 سنوات


بالاضافه إلى أشخاص آخرين سيتم التطرق لهم في سياق القصة



أترككم مع أجزاء القصه

الجزء الأول

-مشاعل "يتصل بك"
قامت سارة من النوم وردت على طول وهي خايفه:
-الو
مشاعل:هاه بشري
سارة: وش السالفة؟
مشاعل:كم نسبتك؟
سارة بخوف: طلعت النتايج
مشاعل وهي شوي وتطلع من السماعة:يا بردك ياختي النتايج طالعه من الساعة 8 وأنتي لين الحين تشخرين
سارة تناظر الساعة ولقتها10.30
سارة: طيب كم نسبتك؟
مشاعل: 91,21
سارة :زين مبروك انك ما نزلتي تحت ال 90
مشاعل : وش هالتناحه اللي فيك فزي روحي شوفي نسبتك وقولي لي
سارة: خلاص بروح أشوف نتيجتي وأدق عليك
دورت سارة اللاب توب ومالقته في مكانه نزلت تحت لقت أمها وهند جالسين يتفرجون على موديلات في النت
هند:سويره قايمه الحين بيموت من الجن ألف
أم عبدا لله: سارة وش فيك؟
سارة : مافيني شي بس النتايج طلعت يلا بشوف نتيجتي
أم عبدا لله :لاتخافين إن شاء الله نسبتك زينه
هند: كم رقم جلوسك علشان أطلعها
سارة: قومي أنا بطلعها
هند:قلبك قوي أخاف تدوخين علينا
سارة طنشت ومسكت الجهاز وقامت تدور نتيجتها ومالقت شي
مشاعل اتصلت تتطمن لان سارة طولت
مشاعل: بشري
سارة: قاعدة أدور مالقيت شي أنتي وين لقيتيها
مشاعل: توها مانزلت في النت أرسلي رقم سجلك المدني على جوال الوزارة ويرسلون لك نسبتك..
سارةk شوي وأدق عليك باي
مشاعل :باي
سارة أرسلت رقمها وعلى طول جاها الرد
سارة: يمه ردوا
أم عبد الله:زين افتحيها خلينا نشوف كم جبتي
سارة :خايفه
هند:أشوف أنا
رن التليفون وراحت هند ترد وسارة وهي ترجف فتحت الرسالة وعلى طول شافت نسبتها وكانت95.55 وعلى طول جلست على الأرض وهي تصيح وتقول لأمها 95 أمها قامت تصيح وهند وهي في الصالة: هاه سويره كم؟ أمي سارة على الخط تسال
أم عبد الله:95
هند: كذاااااااااابه
سارة وهي تصيح: والله العظيم95 وبعد برسل رسالة ثانيه علشان أتأكد
هند: خلصت مكالمتها مع جدتها بسرعة وراحت عند سارة:
اخس يالدافوره ومزعجتنا ونسبتي بتنزل ل80 وترى أمي سارة تقول العشاء عندها اليوم بمناسبة نجاح سارة
أم عبد الله :قولي ماشاء الله
عبد الله اللي كان داخل البيت وسامع الصيحة:بشروا نجحت سويره
سارة: إيه نجحت الحمد لله أنت بس قل كم النسبة
عبد الله: كم؟
هند: هالدافوره95.55
عبد الله: سويره تغشين من ورانا
سارة: وليش إن شاء الله
عبدا لله: ماهقيت انك يالداجه تجيبين هالنسبه أنا ما أشوفك تذاكرين يعني وشلون جبتيها
سارة: كلن يرى الناس بعين طبعه مومهم تشوفني أذاكر المهم أن فيه هنا عقل وتأشر على راسها
عبد الله: والله ماضنيت إن عندك عقل وإلا معقولة سويره المصرقعه تجيب نسبه أعلى من نسبنا كلنا حتى هنيد حمارة المذاكرة ماجابت هالنسبه بس لاتفرحين خلينا نشوف الشهاده أول
هند: وجع إن شاء الله هذا وأنا قدامك تقول حماره بعدين لاتقارن بيننا حنا علمي وهي أدبي
سارة بعصبيه: هي أنت وإياه الثانوية العامة مافيها علمي وأدبي حبيبتي هالسنه الاسئله كانت موت ويكفي حطوا عنها برنامج في التلفزيون أسئلة النحو والجغرافيا ما احد عرف يحلها حتى المدرسات ما عرفوا ولا تهون أسئلة التوحيد والانجليزي ولا تقللون من قدرات غيركم لو سمحتوا
أم عبد الله : خلاص عاد البنت نجحت وتستاهل لاتطولون السالفة وهي قصيره
عبدا لله: علشان أمي أدبي قاعدة تدافع عن سويره

*****************************************
في بيت عبد العزيز السامي ريم تدق على أبوها
أبو سلطان: الو
ريم: هلا يبه وشلونك
أبو سلطان: خير ريوم فيكم شي
ريم: افا يبه يعني ما أكلمك إلا وفيني شي
أبو سلطان:لا بس مو بالعادة
ريم: لا يبه بس حبيت أبشرك إني نجحت وجبت نسبه زينه
ابوسلطان: زين مبروك
ريم: الله يبارك فيك
أبو سلطان: اجل وأنا أبوك أنا عندي شغل مع السلامة
ريم بزعل : مع السلامة
ريم بعد ماسكرت راحت لغرفتها وهي متضايقة لان محد اهتم بنجاحها واتصلت على هيفاء بنت عمها وقالت لها الخدامه هيفاء نايمه ودقت على منى وطلعت نايمه بعد وهي ماعندها صديقات وبدت تصيح وتواسي عمرها وقامت تغسل وجهها وجلست في سريرها شوي ورن جوالها
ريم بدون ماتشوف من اللي داق: الو
سلطان: هلا ريم نايمه؟
ريم: لا
سلطان: هاه طلعت نتيجتك؟
ريم : إيه طلعت
سلطان: هاه كم نسبتك؟
ريم:94
سلطان: مبروك بس ليش زعلانه؟
ريم: يعني تتوقع ليش أكيد من اهلك اللي ما يحسون ولا يهتمون ولا كأن عندهم بنت بثالث ثانوي
سلطان:ليش أمي وينها
ريم: نايمه ما بعد قامت
سلطان :بشرتي أبوي
ريم: إيه بس ولاعبرني ولا اهتم
سلطان: خلاص ريوم, اليوم أنا بفضي عمري لك وأي مكان تبينه بوديك وش تبين بعد
ريم وهي مو مصدقه اللي يقوله سلطان: جد والله
سلطان: من متى امزح معك
ريم تذكرت إن اليوم الأربعاء واليوم جمعتهم عند جدهم سعود
ريم:خسارة سلطان اليوم الاجتماع في بيت أبوي سعود
سلطان: موب لازم نحضر اليوم
ريم: لا اليوم بالذات أبوي سعود محرص أننا نحضر
سلطان: ليش ؟
ريم :علشان أحفاده ناجحين ويبي يحتفل فينا
سلطان : والله من زين الاحفاد عاد
ريم : نعم وش قصدك
سلطان: ولا شي, خلاص نخلي طلعتنا بكره
ريم وهي مبسوطة : الله لايحرمني منك يالغالي والله محد عبرني الا أنت
سلطان: خلاص عاد يكفي بربره أنا عندي شغل مع السلامة
ريم :مع السلامة
سكرت السماعة ريم وهي فرحانة لان فيه احد عطاها وجه ولو أنها ماتوقعت إن سلطان الثقيل والرزين والمتوحش على قولها هو اللي يعطيها وجه



**********************************************
دخل أبو عبد الله ومعه خالد وكانوا جايين من السوق يشترون أغراض البيت
خالد: أعوذ بالله احد يتقضى من صباح الله خير لا و في الحر الله يهديك يبه والله هالماقضي اموت واعرف وين تروح
عبدالله : تروح لبطنك يامال الضعفه يزط ليل ونهار ويقول وين تروح
خالد : علبالي ما اكل انت آفة البيت
سارة : بس عاد انت وإياه , يبه بارك لي نجحت و جبت نسبه حلوه
أبو عبد الله : بشري كم جبتي
خالد: أكيد في الثمانين يعني هالكمخه كم بتجيب لا وهذا إذا كانت مجتهدة
سارة شوي وتحترق :محد كمخه غيرك يالدلخ حبيبي تحسب محد بيجيب نسبه أعلى منك ياابو89
عبد الله:الله يعينك وش خلاك تحكي بلشت عمرك معها هذي بدون شي لسانها طويل وشلون إذا صارت ناجحة وجابيه نسبه
خالد باستهزاء: ليش الأخت جايبه100
أبو عبد الله:بس عاد أنت وإياه كم نسبتك ياساره
سارة تناظر خالد بتكبر وتأشر بيدها علشان تقهره اقل من ال100باربع نسب ونص
خالد باستغراب:95.50
سارة:95.55 مو50
أبو عبدا لله: مبروك تستاهلين
خالد : اخاف59
سارة بعصبيه: خير طايحه من عينك وش قالوا لك غبية وإلا دلخه أنت وإياه وإياها من قمت ما سمعت إلا تحطيم يعني علشان ما أذاكر كثير على بالكم غبية, لاحبيبي يكون في معلومك المذاكرة وتقطيع الكتب مخليتها لأمثالكم اللي مايفهمون بسرعة ويا ليت جت بنتيجة تسوى, يا بابا أنا ادري أنكم تشوفون نتايجي أول دايم اقل منكم واللي كانت في نظركم شينه بس لاتحسبونه غباء هذا اسمه تطنيش وبمزاجي يعني الأوقات اللي أبي أجيب فيها درجات اعرف شلون أجيب وبأقل مجهود بعد وعن أذنك يبه وأنتي يمه بروح اكلم مشاعل قبل لا أكمل نومتي ورانا سهره في بيت أمي سارة الليلة وطلعت لغرفتها
خالد: عمى كلتني في بطنها أم لسان
أبو عبدا لله: تستاهلون بدل ما تباركون لأختكم تقومون تتطنزون عليها وتحطمونها
أم عبد الله: صدقت والله الأول يقول تغشين والثانية تستهتر بالأدبي والثالث عاد كلامه مثل وجهه صدق ما عندكم أسلوب
عبدا لله اللي حس أنهم شرشحوا سارة بزيادة: ماكان قصدنا بس حنا ما نشوفها تذاكر
أبو عبد الله: حرام عليك واللي سوته في عمرها هالسنه شوي, والله خفت يجيها شي من قلة الأكل والنوم إلى هاللحين ووجهها أشهب من التعب وهم الامتحانات
هند: يبه بس هالشهرين اللي شدت على عمرها
أم عبد الله: ليش مستحقرين أختكم أنا يوم رحت اسأل عنها المدرسات كلهم قالوا بنتك ذكيه ولو تشد على عمرها تجيب نسبه عاليه بس هي مزاجيه على قولهم
أبو عبد الله: حرام عليكم خربتوا فرحتها وإذا ما راضيتوها اليوم ترى ماني محاكيكم
خالد: أي صدقت مسكينة مسخرناها مسخره بروح أشوفها

سارة في غرفتها تكلم مشاعل
سارة: الله يبارك فيك يا قلبي ماتقصرين والله كان ودي تكون نسبنا زي بعض بس ماتدرين عن منال
مشاعل :لا جابت مثلي 91 حاف بدون فواصل
سارة زين مافينا احد تحت ال90 على الأقل ندخل جامعه وحده
خالد دخل على سارة : سارة سكري التليفون بكلمك
سارة تناظره بتكبر وتلف وجهها : إيه مشاعل وباقي البنات كم جابوا؟
خالد: لو سمحتي يا أخت ممكن أحاكيك شوي
سارة بتكبر تهز رأسها بالنفي
خالد: آسف على اللي قلته لك
سارة مطنشه وتحاكي مشاعل : وش كنتي تقولين آسفه ماكنت معك فيه قلق عندي هنا
مشاعل : أقول سارونه وش بتسوين في هالاجازه؟
سارة: الحمدلله والشكر يعني وش بسوي أكيد زي العادة بروح اقعد في بيت أمي سارة وإذا أهلي بيسافرون بروح معهم
مشاعل: وبتخلين بيتكم وتقعدين طول الصيف في بيت أمك سارة بالله ما تملين ولا تطفشين
سارة تناظر خالد اللي واقف قدامها باستهتار: عاد بيتنا حلاته أمي وأبوي وإلا الباقين أشباه الاودام مايسوون شي بعدين بيت أمي سارة يشرح الصدر
خالد بعد ماسمع كلام سارة عصب وطلع من غرفتها
مشاعل : مو لو أنها ساكنه عندكم أحسن؟
سارة: والله هي تقول ما ارتاح إلا في بيتي وعماني وعيالهم مايخلونها كل يوم يزورها واحد منهم
مشاعل: زين أنا بخليك الحين بروح أشوف أمي تناديني
سارة: يلا اجل مع السلامة
مشاعل :مع السلامة
سارة سكرت على نفسها الغرفة ورتبت اغراضها علشان تروح بيت جدتها وبعد ما خلصت نامت


**********************************************


في بيت سعود السامي واللي كان جامع عياله و بناته بمناسبة نجاح أحفاده

كانوا كلهم جالسين في الصالة الرجال والحريم اللي كانوا متغطين وأكثر السوالف مشتركه
وجود بنت حنان راحت عند جدها: مشكور يبه عسى عمرك طويل تعيش وتحتفل بأحفادك
طارق : هي أنتي من لعب عليك وقال إن العزيمة لك
وجود ويدها على خصرها : اجل لمن لك أنت ووجهك
ناصر: للبنات الكبار ريوم اللي خلصت الثانوي والعنود ومنى اللي خلصوا أول سنه في الجامعة
فهد: وهيفاء اللي راحت ثالث ثانوي
هيفاء تحاكي ريم: بعد عمري فهود مانساني
ريم : انطمي عاد خلينا نشوف شكلها بتصير هوشه
نواف : ما بقى إلا البزران يالله يابنات المتوسطة ضفي وجهك
وجود : تكفى أنت وإياه من زينكم مالت عليكم اصلا انتوا من كلمكم يالشييف
ناصر : أقول انطمي بس وروحي تغطي أنتي ماتستحين مثل باقي البنات
وجود : مالك دخل اصلا توني صغيره
ناصر: كبر البقرة وتقول توني صغيره
وجود: بقره في عينك على الأقل أحسن منك ياالبغل
طارق: وش فيه البغل الحين طلع وع حبيبتي اصلا البغل يونس البزران في الحدايق يركبون عليه يوسعون صدورهم ويأخذون لفه في الحديقة ياما ركبتيه وأنتي صغيره الحين كبر راسك عليه
ناصر وهو بادي يعصب : انطم عاد بالبعير
فيصل : والله جبتها صح يا ناصر مع هالبراطم كنه بعير
طارق : على هونك يا الدُب القطبي
نواف : وش الحكمه من الدُب القطبي ليش ما قلت الدب بلحالها
طارق : ما ادري والله بس يمكن نفس نظرة الكآبه اللي في وجيههم
عادل : ما شاء الله فطين وش دراك ان الدُب القطبي مكتئب والله انه فالها متكي وعايش في ذا البراد وموسع صدره موب حنا اللي نكرف في هالشموس
سلطان : الحمد لله والشكر اجل الدُب القطبي فالها انت طبيعي والا شارب شي
عادل : والله لو انك تكرف في هالشموس مثلنا كان تمينت انك دُب قطبي
طارق : لا, لاتقول حمستني اعيش هالتجربه
فيصل : هاهاها ما يمديك يالبعير رح بس خل هالشموس ترضخ فيك في هالبران وانا موسع صدري واتزلج عالجليد
ناصر : افا تراضها علي توسع صدرك وانا اخوك شقيقك قاعد احوس على قطرة مويه
فيصل : احد قالك صر بعير كان صرت دُب على اخوك
فهد : هي انتوا محششين اليوم
فيصل : لا تونا ما بعد حششنا
عادل : إذا حششتوا علموني
طارق : بتحشش معنا؟
عادل : لا والله باوديكم للقسم لعلي اخذ ترقيه بسببكم
ناصر : ما يهبى الا أنت تودي عيال عمي للقسم وانا موجود
طارق : ذيبان يا ولد عمي
ناصر : لا تنسانا من الحشيش
طارق : ابشر كم قطعه تبي؟
سلطان : بس عاد انت وإياه لأمردغكم بذا العقال اللي على رأسي
فيصل : تكلم هادم اللذات يا اخي حنا داخلين جو لا تطير هالكم قطعه من روسنا
سلطان : لو يسمعكم احد يصدق انكم تحششون
طارق يبي يطفر سلطان : ومن قالك اننا ما نحشش
سلطان : الحمد لله والشكر بس اشك في عقولكم والله

أبو عبدالعزيز : بس عاد ياعيال كل ماجيتوا تهاوشتوا وأنتي ياحنان روحي للخدامات خلهم يجيبون لنا شي بارد نشربه دبلت كبودنا هالقهوه والشاهي في ذا الحر
حنان: ابشر يبه أنا اللي بخدمك بنفسي بس وش تبي تشرب؟
أبو عبد العزيز: أي شي بارد
سألت حنان الرجال والحريم عن اللي يبون يشربونه ووصلت عند الشباب اللي كانت وجود تتهاوش معهم
حنان: هاه شباب وش تشربون؟
ناصر : عسل يا عسل
وجود: عنك يمه روحي ارتاحي أنا بجيب لهم اللي يبون
وراحت عند ناصر : هاه وش تشرب؟
ناصر : حليب يابقره
وجود:ضف وجهك , وأنت طويرق وش تبي؟
طارق: حليب بس خلفات مو بقر خبرك محاكيك بعير
وجود:مالت عليكم والله نقوتكم فيصل وسلطان هم اللي ينوخذ رأيهم وإلا انتوا لوتمتون ماجبت لكم شي
ريم تحاكي هيفاء: شوفي الكلبه وجيد ما لقت إلا فيصل هين بأطب في بطنها
هيفاء : قالت سلطان بعد
ريم: إيه سلطان تخاف منه بس فيصل لا ,تستهبل أم راس يبيلها تكفيخ
راحت وجود عند سلطان اللي كانوا يحترمونه لأنه هو الكبير والعاقل والرزين في العايله وأكثرهم غموض
وجود: لو سمحت سلطان وش تبي تشرب؟
سلطان : أي شي بارد
وجود: وأنت فيصل
فيصل اللي يحب يقهر ريم لأنه عارف أنها تحبه : والله ياوجود كل شي يجي منك حلو على قلبي
ريم شوي وتغتال فيصل
منى: ريوم هدي شوي تراه يدري انك تحبينه ويتغلى وإلا هو اصلا يموت فيك بس تعرفين حركات الشباب

*******************************
بيت أم محمد( الجدة سارة)
في مجلس الحريم كانوا الحريم الكبار في جهة والبنات في جهة ثانيه طبعا أم محمد ماعندها بنات بس أربع أولاد وكلهم متزوجين وعندهم عيال
أسماء بنت عم سارة: سارة تعالي معي شوي برى أبيك في سالفة
سارة طلعت مع أسماء :خير أسماء
أسماء وش رأيك نروح فوق في غرفتك أحسن
سارة والله من البثاره في ذا الادميه : يلا
دخلت سارة الغرفة هي و أسماء اللي سكرت الباب وطلعت جوالها ودقت رقم
أسماء: آلو هلا لحظه شوي ومدت الجوال لسارة
سارة: وش السالفة؟
أسماء: هذا صالح يبي يبارك لك في النجاح
سارة خذت الجوال بعصبيه وسكرت بدون ما تكلم
أسماء: ليه؟
سارة: وش اللي ليه خير إن شاء الله من متى نكلم رجال غرب علينا ومو محارمنا
أسماء: هذا مو غريب هذا ولد عمك ويبي يبارك لك
سارة: واذا هو ولد عمي عادي اكلمه واكلم كل عيال عماني
أسماء : بس هذا غير وأنتي تعرفين
سارة: أسماء هالسالفه شيليها من راسك صالح زيه زي اخوي عبد الله وخالد فاهمه وإلا لا وان عدتي هالسالفه ماراح يصير لك خير
أسماء: سارة حرام عليك والله صالح يحبك ويموت عليك ويتمنى يسمع منك كلمه وحده بس
سارة عصبت: وانا ما أحبه ما أحبه عجزت وانا أقولك انتوا ما تفهمون
أسماء: وليش عاد والله انه ينحب وتراه ناوي يخطبك من عمي
سارة خلاص وصلت لحد ماتقدر تتحمل كلام أسماء لأنها عارفه لو احد خطبها من أبوها وأبوها شاف انه كفو ماراح يرفضه وما راح يشاورها
سارة : أسماء افهميني الله يخليك أنا ما أبي أتزوج قبل لااخلص الجامعة وصالح أنا اعزه مثل اخواني وماني متخيلته زوج لي فا الله يوفقك قولي لصالح لا يستعجل ويخطبني خليه يصبر فتره على الأقل لين نتخرج ما تدرين يمكن ربي يهديني
أسماء: يعني اذا انتظر لين ما تخلصين الجامعه بتوافقين عليه
سارة اللي اضطرت تكذب لأنها عارفه أن ولد عمها يبيها ولو بالغصب: اذا ربك أراد باوافق بس خليني اخلص الجامعه أول بس والله لو خطبني قبل لا اخلص ماراح اخذه لو تنطبق السماء على الأرض
جت سوسن يالله يا بنات أمي سارة تقول انزلوا تعشوا نزلت سارة وأمل وتعشوا
***********************
راحت وجود للمطبخ وقالت للخدامات يجيبون العصير ورجعت للبنات
جواهر اللي راحت لبنات أخوها : هاه بنات أشوف عيونكم ماطاحت من على الشباب
اصايل : لاياعمتي لاتعمميين ترى فيه المخطوبه بيننا
جواهر : غثيتينا عاد ندري انك مخطوبه أنا اقصد الباقين
العنود: وش تبين عاد ياعمتي تبينا نسكر عيوننا بعدين من زينهم هالشباب كل واحد اشين من الثاني
جواهر :لا والله يحصلون لك أنتي ووجهك . بس أبي اعرف من السنعه اللي فيكم
البنات بصوت واحد: كلنا سنعات
جواهر:لاوالله مافيكم احد سنع إلا اللي بتجيب الرأس الكبير
وجود: أي راس
جواهر:انطمي أنتي بلا بزران أنا أحاكي الكبار,من فيكم بتطيح سلطان على وجهه وتجيب رأسه وتخليه يأخذها
اصايل : الحمد لله أنا سنعه انخطبت وارتحت
منى : افا يا عمتي عاد مالقيتي الاهالسليطين نجيب رأسه آسفه أنا مانيب سنعه
هيفاء : وأنا أخته من الرضاعة
ريم : وأنا أخته الصدقيه
كلهم ناظروا العنود
العنود: هي انتوا وش تناظرون لو تمتون ما نيب محاوله ما لقيتوا الا سلطان الموت اهون ,أصلا اللي بتجيب رأسه مابعد جابتها أمها أقول خلو السناعه لكم أنا ما أبيها
طبعا وجود مسويه نفسها حرمه : خلاص أنا أجيب رأسه
جواهر : مابقى الاهي انطقي بس لا اعلم عليك امك
وجود : تتحدون اوريكم
طبعا اروى طبعها تشيل الكلام راحت وقالت لاخوها فيصل اللي مات من الضحك بعد ما هاوشها وهزئها بس عجبته السالفة وقال للشباب طبعا سلطان ضحك على البزر وجود وكان مستعد لحركات البثاره اللي بتسويها والشباب ناوين يشرشحونها جت وجود وجلست عند سلطان والكل ساكت ومسوي نفسه مشغول بشي بس يبون يسمعون
وجود: وش أخبارك سلطان؟
سلطان وهو ماسك نفسه تمام, وش تبين؟
وجود بخوف : ما أبي شي بس بسولف فيها شي
سلطان:لا مافيها شي بس روحي سولفي مع البنات
وجود : سولفت معهم والحين ابي اسولف معك
سلطان : يلا سولفي
وجود وهي ما تدري وش تقول من الخوف من سلطان اللي الكل يهابه: أنت تعرف تتكلم انجليزي صح
سلطان: إيه اعرف
وجود: زين ممكن تعلمني ودي أتعلم
سلطان: آسف وقتي ما يسمح لي بعدين معاهد اللغات وش كثرها سجلي في واحد منها وتعلمي
وجود: طيب أكيد أنت تعرف للرياضيات
سلطان ياصبر أيوب : إيه اعرف ليش؟
وجود : ابغاك تدرسني
فهد : هي أنتي أم رأس مسويه دافوره ترانا عطله
وجود: مالك دخل أنا أحاكيه ما حاكيتك
سلطان : صادق فهد ترانا عطله
وجود: إيه علشان اذا بدت الدراسة أصير عارفه المنهج يقولون رياضيات ثالث متوسط صعبه
سلطان اللي بدا يعصب: أقول روحي دوري مدرسة ابتدائي وإلا متوسط تدرسك تخصصي ماجستير إدارة أعمال تبيني أتفرغ لتدريس بنت في ثالث متوسط
الشباب كلهم ضحكوا على وجود اللي عصبت
وجود : سلطان سكتهم يضحكون علي
سلطان : أقول تراني كبر أبوك قولي عمي سلطان فاهمه
طلعت وجود معصبه وتحاكي نفسها هين ياسلطان إن ما خليتك أنت اللي تترجاني علشان أكلمك ما أكون وجود وذيك الساعة أنا اللي أبطنشك

حنان راحت عند الشباب : من اللي زعل بنيتي فيكم
سلطان: أنا
حنان: وليش وش سوت عاد, حرام عليكم
سلطان : ياحليلها طموحه تبي تجيب راسي وأتزوجها
حنان وهي تضحك : هذي الساعة المباركة على الأقل تفكني منها
سلطان : تخسي ما بقى إلا هي آخذ وحده أربيها بعدين تراك مدلعتها مره
حنان : توها صغيره
ناصر : أي صغيره بعدين متى بتغطونها وش كبرها تقولين بقره
حنان : دامها وش كبرها ليش ما احد منكم ياخذها
الشباب كلهم : وع
حنان : حرام عليكم بنتي ملكة جمال بس غثيثه شوي الله يصلحها و اذا تزوجت بتعقل
سلطان : أنتي تبين تبليشينا في بنتك ماله منها
حنان : أنت خلك برى الموضوع مستحيل أزوجك إياها
سلطان : عاد أنا بموت واخذها مالت عليها
حنان : لا مو قصدي بس أنت ماتصلح لها أنت عاقل وراكد مالها غير احد هالمراجيج نواف والا ناصر وإلا طارق
نواف : وليش فيصل وفهد برى القائمة على بالك أنهم عقال
حنان وهي تناظر فهد وفيصل بنظرات لها معنى: لا مو عقال بس هم دارين ليش
طبعا فيصل يحب ريم وفهد يحب هيفاء وما احد يعرف إلا البنات بس وحنان شاكه في الموضوع
طارق : من الحين أقولك لاتخططين علي تراني محجوز
نواف : لمين ؟
ناصر : لناقة أبوي سعود
طارق : كل تبن بس
ناصر : توك تقول بعير بعدين احمد ربك بنزوجك ازين ناقه
طارق : ياأخي ليش انت تغث أنا لي ساعه اشبك مع فصيل علشان اروح معه للقطب المتجمد وأنت كل شوي تذكرني أني بعير
فيصل : لاتحاول مانيب ما آخذك لو تحب الثريا ما نستقبل بعارين ما بقى الا هي وش بيقولون عني الدببه اخوه بعير ناوي تقص وجهي
ناصر : خلاص طروق خذ واسطه من ملك الغابه سليطين
سلطان : آسف ما احب الواسطات
طارق : هين يا سليطين وأنا ناوي اعرفك على ذيك اللبوه السنعه اللي تقول للقمر قم وانا أجلس محلك
سلطان : من جدك؟
طارق : آفا عليك وش اوصف وش اخلي جمال وبياض وشعر وعيون لا وراعية مطبخ بعد
نواف : هذي مواصفات لبوه
سلطان : وش دخلك كمل طروق ماعليك منه
فهد : ابشر بالترقيه يا عادل كل ما لهم ويزيدون واحد

جاء الجد سعود: يالله ياعيال قوموا تعشوا وخلوا عنكم الحكي الزايد
والكل قاموا يتعشون

******************************************

بعد العشاء الكل راح لبيته وسارة قعدت عند جدتها
أم محمد : سارة وانا أمك وش فيك ضايق صدرك عسى ما أنتي تعبانه
سارة: لا يمه بس تعرفين بعد الامتحانات تعب وقلة نوم وإرهاق
أم محمد: اجل يمه روحي ارتاحي ونومي وبكره إن شاء الله نقعد ونسولف مع بعض

راحت سارة لغرفتها وعلى طول اتصلت على مشاعل وقالت لها السالفة
مشاعل: بالله ولد عمك مايستحي على وجهه ما عنده كرامه وحده ما تبيه إلا بالغصب يبيك تحبينه
سارة: المصيبة أخاف يخطبني وانا عارفه أبوي بيوافق على طول خصوصآ للابن المثالي على قول خالد
مشاعل : لا تخافين أكيد مو موافق إلا بموافقتك
سارة: أنتي ما تعرفين أبوي من عقب نجوى أختي يوم ترفض كل اللي خطبوها لين ماتخلص دراسة وتتوظف, خلاص حرم انه يشاور البنت على قوله بغت تعنس وصل عمرها28 يوم تتزوج وهند مسكينة أول ما انخطبت وافق بدون ما يأخذ رأيها يقول الكفو ماينرد
مشاعل : إيه بس أنتي غير ودلوعته و ولد عمك بعد توه صغير وطالب يعني مابعد كون نفسه
سارة: أي مو علشانه صويلح الحقنه أكيد بيوافق أبوي معجب فيه يقول يدرس ويشتغل مع أبوه بنفس الوقت وأخلاقه زينه
مشاعل: قولي آمين يخطبك واحد سنع ويجيك عى ذاك الخيل الابيض ويأخذك قبل ما يخطبك صويلح ويوافق أبوك
ساره : وش شريط الفيديو اللي شايفته قبل شوي؟
مشاعل بغباء : أنا قعدت شوي مع بزران عمتي حطيت لهم سالي بعدين سندريلا
ساره : بعذرك تقولين خيل أبيض . فيه أحد يركب خيول الحين
مشاعل : خلاص ولا يهمك يجيك إن شاء الله في جمس ملكي
ساره : تخسين تجيبين لي سواق مافيه شباب يسوقون جموس أنا أبي Bmw
مشاعل : اللي تبين أهم شي تفتكين من علة صويلح
سارة: تصدقين أنا ما أبي أتزوج توني صغيره أبي ادرس وأتخرج
مشاعل : طيب أنتي اهدي الحين وان شاء الله ربي بيفرج همك وروحي صلي ركعتين وادعي ربك وخلي الباقي على رب العالمين
سارة : يلا اجل ما اطول عليك أكلمك بعدين
مشاعل: يلا مع السلامة
سارة: مع السلامة

وش بيصير مع ساره وولد عمها؟ وهل وجود بتقدر على سلطان؟ !!!


الجزء الثاني

في بيت أبو بدر

أبو بدر وأم بدر جالسين في الصاله

دخل بدر ومشاري
بدر : السلام عليكم
أبو بدر وأم بدر : وعليكم السلام
مشاري : هاه يبه وش سويت كلمت ابو أصايل
بدر وهو يضحك : يا حليله أخوي مستعجل
مشاري : وأنت وش حارك
بدر: لا احتريت ولا شي حتى ألمسني علشان تعرف اني بارد
مشاري : هاهاها بايخه ما تضحك دمك ثقيل
بدر : صب عليه مويه علشان تخففه
أبو بدر : بس عاد أنت وإياه هذا كبركم وتتناقرون متى بتعقلون
بدر : قل لولدك اللي مسوي رجال وغاثنا يبي يعرس وعقله لين الحين ما كبر
مشاري : احلف عاد تراك أكبر مني لاتنسى
بدر : بس الحمد لله عارف لنفسي وعارف اني ما بعد عقلت
أم بدر : وما أدري متى بتعقل وبتتزوج اللي اصغر منك تزوجوا وانت وصلت للثلاثين وأنت عزابي
بدر بملل : يا الله يمه انا كم مره قلت لك شيلي هالفكره من رأسك عرس ما نيب معرس
أبو بدر: لين متى يعني؟
بدر : يبه خلاص قفل على الموضوع الله يخليك
أبو بدر : بدر اسمعني وأنا أبوك لا أنت أول ولا آخر واحد فيه سكر تبي تحرم عمرك من العرس والعيال علشانك مريض
بدر : يبه خلاص مليت وأنا أقولكم ما أبي أجيب عيال واعذبهم يكفي اللي شفته من هالسكر يوم كنت صغير
(بدر مريض بالسكر من يوم كان عمره اربع سنوات )
مشاري : يا أخي انت ليش موسوس السكر وراثه ما قلنا شي بس ترى مو كل واحد فيه سكر لازم يجي عياله سكر والدليل انت امي وابوي ما فيهم شي وانت فيك من يوم كنت صغير
بدر : خلاص طيب حفظت هالكلام ما ودكم تغيرون الموضوع
مشاري : لا ما ودنا وبعدين وش فيها إذا جبت عيال وكان فيهم سكر يا أخي خل حلاوتهم تزيد
بدر : يا ثقل دمك بس وحب يغير الموضوع : هاه يبه دقيت على أبو أصايل والا لا
أبو بدر: أيه دقيت وحددنا الملاك يوم الجمعه الجايه
مشاري : يوه يا بعدها
بدر : أركد لا تفشلنا
مشاري : يا أخي أنت ما تبي تفرح ولاتبي غيرك يفرح والله انك نذل
بدر : افرح بس اثقل شوي خلك راكد وش بيقولون عنك الناس ما صدقت بنتهم توافق
مشاري : أيه والله ما صدقت
بدر : ما منك فايده مرجوج
أم بدر: عاد عسى يمدي البنات يتجهزون قبل الملاك
ابو بدر: الملاك ما فيه حريم بس عزيمة غداء للرجال وأنتوا بتروحون للشبكه اللي بعدها بأسبوع
مشاري بصدمه : يعني ما نيب شايف أصايل يوم الجمعه
أبو بدر : وأنا وش دراني
مشاري : كان سألت أبوها
أبو بدر: الحمد لله والشكر انت صاحي تبيني اقول لأبوها بنتكم بتخلي ولدي يشوفها والا لا
بدر: يا اخي فشلتنا كأنك بزر
مشاري : لا تلومني أول مره أعرس



**************************************************
يوم الجمعه بعد صلاة الظهر – بيت فهد السامي –

أصايل دخلت لغرفة العنود وارتاعت : عنيده قومي جعلك القام اللي يلقط قلبك يالخايسه الساعه1.30
العنود وهي مغمضه : أصايلوه اذلفي وصكي الباب خليني انام
أصايل : نام عليك بعير يالدوبه قومي نسيتي أن اليوم ملكتي
العنود وهي تغطي وجهها باللحاف : وإذا صار انتي اللي بتتملكين موب انا
أصايل راحت وسحبت اللحاف : عنود قومي لا تستهبلين بنات عمي تحت وانتي لين الحين خامده
العنود : محد قالك أعزميهم
أصايل : احمدي ربك ما عزمت الا البنات أجل لو أني عازمه عماتي وحريم عماني
العنود : أقول اقضبي الباب وانقلعي ترى ما نمت الا الساعه تسع
أبو أصايل وهو بينزل تحت : انتوا لين الحين ما نزلتوا مع امكم
أصايل : يبه العنود ما تبي تنزل
أبو أصايل : العنود و وجع ليش ما تبين تنزلين
العنود فزت بسرعه : كذابه يبه
أبو أصايل : يلا بسرعه وش تحترين
العنود تناظر أختها بحقد : إن شاء الله يبه
وطلعت من الغرفه وهي معصبه ولحقتها أصايل
أصايل : هي أنتي
العنود بعصبيه : وش تبين؟
أصايل : بتنزلين ببجامتك
العنود : كيفي مالك دخل ونزلت ودخلت المجلس اللي فيه بنات عمها
العنود بدون نفس : السلام عليكم وراحت بسرعه وانسدحت على الكنب وغطت وجهها بالخداديه
منى : هي انتي وين عايشه سلمي زي الناس
العنود : منوه كلي تراب وانطمي ما نيب ناقصتك
ريم : أنا من شفتها نازله بهالبيجامه وأنا غاسله يدي
العنود كانت لابسه بيجامه لونها رمادي بنطلونها برمودا والبلوزه كت عليها صورة قلب أحمر كبير
أصايل : لا تواخذونها هذي إذا فيها النوم ما تعرف امها من ابوها ولاتحارشونها ترى بتسوي لنا فضيحه
أصايل ناداها أبوها وطلعت ووقعت على الموافقه ورجعت للمجلس وهي مستحيه
البنات قاموا يباركون لها
العنود رفعت المخده وهي فيها النوم : مبروك ورجعت غطت وجهها
هيفاء : الحمد لله والشكر هالانسانه مريضه
العنود : هييف احترمي نفسك لا اتوطي في بطنك
جت أم أصايل وباركت لبنتها وجلست في المجلس مع البنات ودخل أبو أصايل وهومستعجل
أبو أصايل : هاه السفره جاهزه؟
أم أصايل : أي جاهزه خلهم يقلطون
أبو أصايل : الله يعطيك العافيه وطلع
في مجلس الرجال الكل قاموا يباركون لمشاري وبعد ما جلسوا شوي دخل ابو أصايل
أبو أصايل : تفضلوا على الغداء الله يحييكم
قام الجد سعود وابوبدر ومشاري و باقي الرجال وبدر جلس شوي يبي المجلس يفضى علشان يدق ابرة السكر
أبو أصايل : تفضل يا بدر
بدر بإحراج : شوي ياعم بس بأدق أبرة السكر
أبو أصايل حس انه أحرجه وطلع يغسل علشان يتغدى مع الرجاجيل
أبو أصايل راح للمغاسل وما لقى عليها مناديل وعصب ودخل على الحريم وهومعصب : الحين ما تقولون لي ليش ما حطيتوا مناديل على المغاسل , المخزن مليان توني جايب ثلاث كراتين وش بيقولون عنا حمولة أختك
أم أصايل وهي متفشله : يا خزياه نسينا بأروح اجيب
أبو أصايل شاف العنود نايمه : عنيده جعلك النعاس قومي عن امك حد ما تتسدحين كنك نفاس
العنود قامت بسرعه وهي متفشله : إن شاء الله يبه
البنات يناظرون بعض وهم يضحكون على العنود اللي تتحلطم
العنود راحت للمخزن وجابت دستة مناديل وهي معصبه وراحت عندالمغاسل وش قالوا لهم خدامه
بدر طلع أبرته بعد ما فضى المجلس ودق عمره وهو يكلم نفسه: ياربي متى بأرتاح من هالهم يارب اشفيني من عندك
وطلع علشان يغسل ويتغدى مع الرجال وانصدم من المنظر اللي شافه
بنت متربعه على الأرض وهي تفكك كراتين المناديل وتحاكي عمرها بصوت عالي:
استغفر الله احد يتملك في ذا القوايل والشموس الحمد لله والشكر بس, شكلهم بيجيبون ضبان وبعارين بدال العيال أصلا أصايلوه الفيله خذت مشاري الجراده أكيد عيالهم بيجون تُحف الله لايبلانا , بس ما اكون عنيده أن ما طينت عيشتهم معاريس الغفله
بدر مسك نفسه لايضحك وهو يسمع كلامها : وش تبي ذي جالسه هنا !!
العنود جت تفك واحد من الكراتين وانكسر ظفرها وعصبت وسحبت الشباصه من شعرها اللي لافته وانهد الشلال الاسود وغطى كل ظهرها وجزء منه لمس الارض
بدر يكلم نفسه وهو مستغرب : ماشاء الله هذا شعر والا باروكه!!
العنود بعصبيه وهي بنص عين من النعاس تحاول تفك الكرتون بالشباصه علشان ما تتكسر باقي أظافرها وطارت الشباصه بعيد ووصلت عند رجل بدر وهي مومنتبهه كملت فك المناديل وهي تتطنز على عمرها : والله من الحوله اللي في هالكشره الله يشفيني ويعافي المسلمين مما ابتلاني!!
فكت العنود الكراتين ومن العجز مغطت عمرها وهي جالسه علشان تأخذ شباصتها وتحاكي الشباصه (الله لا يبلانا ) تعالي يا مال الكسر جاني مصع في كتوفي بسبتك وشافت الجزمه الرجاليه السوداء و شالت الكراتين علشان تقوم بدون ما تشوف الرجال : خلاص يبه هذي المناديل وجبتها لاينقدون عليك نسباك السنعين ورفعت رأسها وانصدمت صدمة عمرها
بدر حس بتيار كهرب نفض جسمه يوم شاف وجهها على كلامها توقع بيشوف وحده شينه بس اللي قامت كانت ملاك عيون وسيعه وسود ورموش طويله بشره بيضاء وخشم طويل وشفايف ورديه وجسم نحيف وشلال أسود مثل الحرير يغطي ظهرها
العنود واقفه وهي مومصدقه اللي تشوفه وقامت تغمض وتفتح بعيونها على بالها تحلم لين الحين , بدر مسك نفسه لا يذوب مع حركة رموشها
العنود ارتبكت يوم شافت الرجال الطويل والوسيم اللي واقف قدامها وكان أسمر خشمه طويل وعريض وعيونه سود ونظراته حاده والسكسوكه المحدده والوجه العريض و بصوت عالي وبدون تفكير : معقوله أبوي رجع شباب !!
بدر ما قدر يمسك نفسه وضحك بصوت عالي
العنود بخوف وهي تتذكر انها كانت قاعده على الارض عند باب الحمام : يمه, انت آدمي والا جني من وين طلعت؟
بدر ابتسم و بصوت هادي : بسم الله عليك الرحمن الرحيم لا تخافين آدمي والله العظيم, وطلعت من مجلس الرجال وأشر على المجلس
العنود استوعبت الموضوع وطاحت المناديل من يدها وحطت رجلها ودخلت بسرعه للصاله وسكرت الباب اللي يفصل قسم الرجال عن باقي البيت وتسندت على الباب وهي حاطه يدها على قلبها اللي يدق بسرعه جنونيه وتفكر : من ذا الرجال يا خزياه وش بيقول الحين
بدر رفع كراتين المناديل وحطها على المغسله ماشاء الله وش هالملاك معقوله فيه بنات بهالجمال لاوتقول حولا وش خلت للشيون اكيد هذي تصير بنت أبو أصايل بس أي وحده فيهم؟ أنا أصلاً ما اعرف كم عدد بناته بس بسأل امي والا مشاري , وهز رأسه وهو يكمل: استغفر الله انا وش فيني قاعد أخربط واهذر وإذا عرفت وش بيصير يعني ؟ اعقل يا بدر أنت وين والزواج وهالحركات وين. أنت اللي مثلك المفروض ما يفكر في الزواج أبداً وتذكر نوبات السكر اللي تجيه يوم كان صغير وكيف كانوا الطلاب يضحكون عليه من كثر ما يدوخ ويسمونه الخكري وقعد يدعي ربه : يا رب ريحني من اللي أنا فيه يا رب ودخل على الغداء وهو متنكد
مرت ريم وهي رايحه للمطبخ وشافت العنود متسنده على الباب وهي شوي وتدوخ وحالتها حاله وشعرها طايح على وجهها
ريم : وش فيك عنيده؟
العنود بصوت متقطع : ما فيني شي
ريم : عنيده علي هالحركات وش فيك عمي مهاوشك؟
العنود : لا
ريم : عنيده قولي وش فيك ترى بأنادي أمك
العنود : ريوم شفت واحد
ريم باستهبال : واحد والا اثنين
العنود : ريوم بلا استهبال أقولك طلعت في وجه واحد من الرجاجيل
ريم بصدمه : كذااااااااابه
العنود : والله العظيم
ريم : من هو؟
منى وهيفاء كانوا طالعين من المجلس وسمعوا آخر كلامهم وراحوا للعنود وهم يركضون
منى : من هو عنوده ؟
العنود : من هو اللي من هو؟
منى : اللي هو!!
هيفاء : تستهبلون انتوا وش السالفه؟
ريم : انطموا أنتوا العنود من هو الرجال ؟
العنود : ما أدري والله واحد طويل وأسمر
ريم : يمكن سلطان أخوي
العنود : لا موب أخوك جاهلني عن سليطين
منى : أجل فيصل
العنود : من زين اخوانكم
هيفاء : ليش هالرجال حلو
العنود : يهبل الا قولي يجنن يخبل يطير العقل ملك جمال
منى : وين شفتييه ؟ وهو شافك؟
العنود تذكرت الموقف وهي فيها الصيحه : شفته عند المغاسل قبل شوي و هو ماشافني وبس الا قزني قز
هيفاء وعيونها بتطلع : شافك بهاللبس
العنود وهي تناظر نفسها وشافت بيجامتها وشهقت بصوت عالي وحطت يدها على رأسها : ضاع مستقبلك يا عنيده يا بنت السامي يا خزياه
ريم : عنيده وش اللي صار علمينا
نزلت أصايل من فوق وهي كاشخه و مو منتبه لحالة البنات لأنها بتقعد بعد الغداء مع مشاري: هاه بنات شكلي حلو
أصايل طويله وجسمها حلو وشعرها أسود يوصل لنص ظهرها و بشرتها حنطيه وعيونها حلوه مثل العنود وملامحها ناعمه وكانت لابسه فستان أسود مشجر بالاحمر ضيق و كت ويوصل لنص الساق وفيه حزام جلد أسود عريض تحت الصدر وشعرها كيرلي وحاطه ورده حمراء فوق أذنها ومكياجها أحمر ولابسه صندل أسود
العنود غمزت للبنات علشان ما يقولون شي لأصايل
منى : تهبلين قمر ما شاء الله
أصايل : والله
ريم : لا تخافين بيطير عقل مشاري إذا شافك
دخل ابو اصايل : أصايل وأنا ابوك يلا امشي خلني أدخلك على مشاري اشغلنا وهو يسأل عنك أصايل استحت واحمر وجهها والبنات قاموا يضحكون
اصايل : إن شاء الله يبه وراحت للمجلس مع أبوها
دخلت أصايل وهي مطمنه رأسها من الحياء
مشاري بصوت واطي : هلا والله بالزين كله
ابو أصايل سمعه و عطاه ذيك النظره اللي خلته يسكت
أبو أصايل : أنا بأروح عند الرجاجيل نتقهوى الشاهي الحقني بعد شوي علشان تتقهوى معنا وطلع وصك الباب
مشاري : النفس عافت الشاهي والقهوه بعد شوفة الغالين
أصايل استحت وحمدت ربها أن ابوها طلع
مشاري : كيفك يا أصايل؟
أصايل بصوت واطي : بخير , أنت كيفك؟
مشاري : دامك تحت نظري فأنا بألف خير
مشاري شاف وجهها احمر وحب يهبل بها زياده : اموت على اللي يستحون ياناس
أصايل تبي تصرف الموضوع : كيف الوالده والاهل
مشاري : بخير والوالده تقول سلم لي على أصايل وبوسها بالنيابه
أصايل انصدمت و طيرت عيونها وهي تناظر مشاري
مشاري وهو ماسك نفسه : وش فيك الوالده اللي تقول
أصايل : قل لها سلامها وصل الله يسلمها
مشاري يستهبل : والبوسه
أصايل وهي معصبه يستخف دمه هو وجهه : عيب وش هالكلام وين عايشين فيه
مشاري أوف عصبت : أمزح معك
أصايل : ما أحب هالمزح لو سمحت
مشاري : تامرين امر يالغاليه
أصايل : تسلم ياقلبي
مشاري وهو مو مصدق : نعم وش قلتي ما سمعت
أصايل : قلت تسلم
مشاري : و الكلمه اللي بعدها
أصايل وهي تضحك : ما قلت شي بعدها
مشاري يناظرها وهو مكشر : متأكده
أصايل بثقه : أيه متأكده
مشاري طلع من جيبه علبه مستطيله وعطاها أصايل : هذي هديه بسيطه وإن شاء الله تعجبك
أصايل فتحت العلبه ولقت فيها تعليقه اسواره الماس مبرومه وفيها أحجار زمرد صغيره
أصايل : مشكورالله يعطيك العافيه ليش كلفت على عمرك
مشاري : ما فيها كلافه , اهم شي اعجبتك؟
أصايل : أيه ماشاء الله عليك ذوقك مره حلو وقامت من المجلس
مشاري : وين تو الناس
أصايل : شوي وارجع
البنات مسكوا العنود وراحوا فوق لغرفتها
منى : يلا تكلمي وش السالفه
العنود : والله كنت قاعده على الارض أفكك كراتين المناديل ورفعت رأسي ولقيت هالاطخم واقف وما بيني وبينه الا كم خطوه
منى : ياشيخه على هاللبس بيحسبك الشغاله
العنود : احلفي بس قد شفتي شغاله قاعده تدعي وتسب في العالم
ريم بخوف : عنيده وش دعيتي وش قلتي عسى ما فشلتينا
العنود وهي شوي وتصيح : فشلتكم وبس الا قولي وش الفضيحه اللي سويتها وقالت لهم عن كل الكلام اللي قالته وهي تحت
البنات قاموا يضحكون
العنود بعصبيه : سلامات قاعده أنكت عليكم أنا
منى : والله انك خبله تسبين في أختك وتقولين عنها فيله ورجلها جراده قدامه أفرضي أنه واحد من جماعة مشاري
العنود : لا والله وإذا سبيتهم ؟ ترى سبيت نفسي بعد وقلت حولا
ريم وهي تضحك : أنتي جاده والا تستهبلين
العنود : وحده فيها النوم فاتحه عين ومغمضه الثانيه تبينها تستهبل
منى : والرجال وش بيدريه ان فيك النوم
هيفاء وهي ميته من الضحك : كل شي كوم وأبوي رجع شباب كوم ثاني
والبنات انفجروا من الضحك مره ثانيه والعنود ضحكت معهم هالمره
منى : بالله وش سوا يوم قلتي هالكلمه
العنود : آه يا قلبي ضحك ذيك الضحكه اللي تنسي الواحد الدنيا وما فيها
ريم وهي تضحك : لا وتسألينه أنت آدمي والاجني
العنود : وش دراني عقدتي الجن وسوالفهم وخفت لايكون جني تعرفين قاعده ومتربعه عند الحمام واسب واهاوش وما عندي أحد قلت يمكن طلع لي احد منهم
ريم بتفكير : بس من هو هالرجال ؟ متأكده انه موب من عيال عماني
العنود : أيه متاكده ميه في الميه
هيفاء : ولا هو من خوالك
العنود : لا موب من خوالي
منى : أكيد من أهل مشاري
ريم : يمكن واحد من أخوانه
العنود بتفكير : لا ما أظن أخوان مشاري اثنين بدر أكبر منه وعمره في الثلاثين وهذا شكله اصغر من الثلاثين وعبدالرحمن آخر سنه في العسكريه وتعرفين طلاب العسكريه يجون نحاف وشهبان وهذا جسمه مليان ووجه ينور وشكله أكبر من أنه طالب
هيفاء : يمكن من عمانه والا عيال عمه
ريم : خلي أصايل تسئل مشاري
العنود : لا تكفون ما أبي أصايل تدري عن الموضوع
هيفاء : ليش؟
العنود : أول شي بتعطيني محاضره بعنوان كيف تمسكين لسانك بعدين هي ما تخبي شي عن امي وحتى لو علمتها وش بتقول لمشاري ؟ بتقول اسئل جماعتك من اللي شاف أختي وهي تحش فيكم
ريم : معك حق بس وشلون بنعرف
العنود : ما أدري هو دخل علي والرجاجيل يتغدون وهذا يدل على شيئين يا أنه ما قلط معهم أو أنه تغدى بسرعه وطلع
منى : عاد ما لقيتي الا الرجاجيل نسألهم
ريم : اسمعوا أنا بأمسك أخواني واحقق معهم وانتي يامنى أمسكي اخوانك وحققي معهم وهيفاء تتولى أبوي سعود وأنتي يالعنود حاولي في عمي وبنشوف يمكن نطلع بفايده
منى : وإذا قالوا ليش تحققين
ريم : ياذا الكمخه صرفي الموضوع قولي لقافة بنات
العنود : تكفون اللي تعرف أي شي تقولي
منى بنص عين : أشوفك طحتي في الغرام
العنود : لو انك شايفته كان ما لمتيني
************************************************** *****************

أصايل خذت العلبه اللي حاطتها في الصاله ورجعت للمجلس
أصايل : تفضل هذي الهديه مني وإن شاء الله تعجبك مثل ما عجبتني هديتك
مشاري فتح العلبه وكان فيها ميداليه سوداء مربعه ومحفور فيها بالفضي حرفها وحرفه اللي متداخله مع بعض
مشاري رفع الميداليه وهو يضحك
أصايل : لاتكون ما عجبتك
مشاري : لا والله بس ودي اشوف ردة فعل بدر إذا شافني معلق مفاتيحي في هالميداليه
أصايل : ليش؟
مشاري : والله بدر يحب الكشخه ودايم يهاوشني علشان مفاتيحي جامعها في هالحديده وكم مره جاب لي ميداليات وانا اعانده وما أستخدمها وطلع مفاتيحه وكانت كثيره وماسكتها حلقه فضيه عاديه فك مفاتيحه وركبها في الميداليه
أصايل : شكل اخوك بيكرهني والسبه الميداليه
مشاري : ما لقيتي الا بدر يكرهك والله هالكلمه ما قد سمعتها على لسانه
أصايل : ما شاء الله عليه , الا على فكره هو ليش ما تزوج لين الحين؟
مشاري : والله هو معقد
أصايل وهي مصدومه : معقد!!
مشاري : لا موب قصدي أنه معقد اللي في بالك . الله يسلمك أخوي فيه سكر من يوم كان أبو أربع سنين وهو صغير تبهذل منه وتعب وكانت تجيه نوبات سكر وبعد ما كبر قال مانيب متزوج أخاف أجيب عيال وما أبي أحد يتعذب مثلي خصوصاً الصغار
أصايل ضاق صدرها : عاد ليش يحرم عمره من الزواج والعيال ترى موشرط المرض يجي لعياله
مشاري : وش نسوي عجزنا وحنا نقول له نفس الكلام بس ما يفهم
أصايل : الله يشفيه ويعافيه
مشاري : آمين
دخل أبو أصايل وهو يضحك : هاه يا مشاري ما ودك تجيب فراشك وتنام عندنا
مشاري : والله ما عندي مانع دامك موافق
أصايل ولع وجهها من الفشيله
أبو أصايل : والله انك ما تستحي وجه بن فهره
مشاري : أنت اللي أقترحت
أبو أصايل : وأنت ما صدقت عالعموم كانك تبي تشوف حرمتك مره ثانيه الحقني عند الرجال والا بتقعد ما شفتها لين يوم العرس وطلع وخلاهم
مشاري : يالله يا قلبي ابوك نذل يسويها
أصايل : هي تراك تتكلم عن أبوي
مشاري : الحين طلع اللسان وعرفنا نرد
أصايل : كل شي الا أبوي
سلم عليها مشاري وعطاها رقمه وطلع للرجال



************************************************** *


إجابه وحده يدورون عليها البنات وكل وحده وطريقتها و في أربع أماكن مختلفه


ريم ركبت في سيارة ناصر في طريق الرجعه للبيت لأن سلطان ما يتكلم كثير ودايم ساكت
ريم : هاه كيف كانت الملكه؟
ناصر : يعني وشلون كيف كانت عاديه مثل كل مره
ريم : جايين رجاجيل واجد من أهل مشاري؟ يقولون ربعهم كثيرين
ناصر : أي والله عمانه وعيالهم وش كثرهم
ريم يوه وشلون بنعرفه وهم كثيرين : ما تعرفت عليهم
ناصر : لا والله أنا قعدت مع طروق في زاويه وقعدنا نسولف
ريم مالت عليك حدك طويرق ويخب : الا كم عدد أخوانه
ناصر : اثنين
ريم : جايين كلهم
ناصر : وش هالتحقيق؟
ريم : وشو عادي لقافة بنات الا اخوانه جايين معه
ناصر : أكيد بيجون
ريم : كأنا سمعنا صوت الباب فيه احد ما تغدى معكم مرة عمي ضاق صدرها تقول شكل المطعم تأخر بالغدى
ناصر: أيه هذا عبدالرحمن أخو مشاري ما تغدى معنا عنده سفره لجده وراح بسرعه
ريوم وهي فرحانه : إيه اهم شي يحضر ملاك اخوه والا الغدى بيتغدى في أي مكان
ناصر : لا ما حضر الملاك الشيخ تأخر وهو مسكين ما قدر ينتظره وراح للمطار
ريم : يعني طلع قبل لا يملكون
ناصر : إيه أصلاً ما جلس الا عشر دقايق حتى ما كمل فنجاله وترى كسرتي رأسي بالبربره
ريم يالله وش هالحظ يالعنود إن شاء الله منى تعرف شي عنه

************************************************** ***

منى في السياره مع فيصل وطارق
منى : هاه عسى رجل أصايل وسيم هي حلوه ما شاء الله
فيصل : الرجال مخابر موب مظاهر
منى إنا لله تكلم الفيلسوف : لا بس الشكل بعد له دور يعني حرام تقابل واحد شيفه
طارق : إيه زين ووسيم ارتحتي
منى : وأهله وأخوانه حلوين
فيصل : ليش بعد؟ هي بتقابل أهله وأخوانه
منى : وش فيك معصب أنا أسئل بس
فيصل : ياذا الحريم فيهم بلاغة شف ولقافه
منى : هاه طروق أهله حلوين
طارق : إيه ما عليهم
منى والله لو أني أطر منهم الكلام : ومن أحسن واحد من أهله
فيصل : خير وش هالسؤال كان دخلتي لمجلس وشفتي بعد
منى ياليت والله : لا يعني أنا أقول عسى رجل أصايل يكون أحلى واحد في عايلتهم
فيصل : أحلى واحد والا أشين واحد أنتي وش حارق دمك هي اللي بتعرس والا أنتي
منى وهي مكشره : هي الله يوفقها

**********************************************

في بيت الجد سعود السامي

هيفاء : هاه يبه تغديت زين
أبوعبدالعزيز : إيه الحمدلله
هيفاء : بس ما طولتوا على الغداء خلصتوا بسرعه
أبوعبدالعزيز : الحمدلله تغدينا وعينا من الله خير وما قصرنا
هيفاء : شكل الغداء ما عجب الضيوف سمعنا أنهم ما كلوا الا شوي وطلعوا بسرعه حتى مرة عمي ضاق صدرها<< الله يصبر مرة عمهم
أبو عبدالعزيز : والله محد طلع بسرعه أنا أول من قام من على السفره
هيفاء لاحول ما استفدنا شي: يقولون بعض الشباب ما قلطوا على الغداء معكم
أبو عبدالعزيز : من اللي يقول؟
هيفاء حست أنها تورطت : الخدامات يبه
أبوعبدالعزيز : والخدامات وش دراهم ؟ كل اللي في المجلس قلطوا وتغدوا ومحد قعد برى
هيفاء : عليهم بالعافيه
أبو عبدالعزيز: أنا بأروح أنام وبقوم إذا أذن

***********************************************
العنود وهي جالسه مع امها وأبوها

أبو أصايل : وين أصايل
العنود تحاكي نفسها : خامره على التليفون تكلم حبيب القلب
العنود : شكلها نايمه , أقول يبه عسى عجبكم الاكل هالمطعم أول مره نجربه
أبو أصايل : أيه والله أكلهم زين
العنود : عساهم تغدوا كلهم
أبو أصايل :الحمدلله ما طلعوا الا وهم راضين
أم أصايل : أهل مشاري اللي اليوم جايين كثيرين؟
أبوأصايل : أيه والله مالين المجلس
العنود : عسى صالة الطعام كفتهم ودخلوا كلهم مره وحده
أبو أصايل : ايه كفتهم
أم أصايل : زين أخذنا حسابنا وجبنا كراسي زياده والله اني خايفه يقصر عليكم شي
أبو أصايل : دامك تشرفين على كل شي بنفسك أكيد بتبيضين الوجه الله لا يخلينا منك
أم أصايل : الله يخليك لنا
العنود في نفسها الأهل بدوا يتغزلون معناها ما راح نأخذ من الوالد لا حق ولا باطل خلني أروح لغرفتي وادق على البنات أشوف وش صارمعهم
العنود : عن أذنكم وراحت لغرفتها
أم أصايل : الله يرزقها بواحد مثل مشاري
أبو أصايل : آمين , مشاري رجال ماشاء الله عليه حتى أخوانه بعد بس احس اني اليوم احرجت بدر أخو مشاري
أم أصايل : وشلون؟
أبو أصايل : يوم قاموا الرجاجيل هو ما قام معهم على طول يوم لزمت عليه قال وهو منحرج بأدق أبرة السكر وبألحقكم المسيكين فيه سكر وهو في عز شبابه
أم أصايل : مسكين الله يشفيه ويعافيه
العنود كالعاده استعجلت وقامت وفاتها الجواب اللي بتتعب وهي تدوره

************************************************
في مكتب سلطان السامي يرن التليفون
سلطان: الو
متعب: الو ممكن اكلم سلطان السامي
سلطان : أحلى يا المؤدب ياحليله متعب يستأذن من متى تعلمت الادب؟
متعب : يا أخي شجعني لا تحطمني
سلطان : ما تبي نجوم بعد
متعب بقهر : أقولك شي وما تضحك
سلطان : يلا قل
متعب :يوم كنت صغير أكره شي اسمه نجوم
سلطان : سلامات!!
متعب : كنت انقهر من الاستاذ إذا حليت شي وطلع صح علي يرسم على دفتري نجمه بالقلم وإذا رحت البيت القى خواتي فرحانات كل وحده حاطت لها الابله لصقه على شكل نجمه وملونه بعد عاد أنا اقعد اصيح واقول ما ابي ادرس لين يحط لي الاستاذ مثل خواتي , فنيت عمري في هالابتدائي وما شفت الا النجوم بالقلم الاحمر لا وقلم ناشف أبو نص ريال
سلطان يتمسخر : صدق معاناة وأنا أقول وش فيه متعب ما يرفع رأسه فوق إذا طلعنا في الليل أثرك تخاف ترجع لك الحاله
متعب : كل تبن بس أنا قلت يوم أني صغير موب الحين
سلطان : بس أشك ان الاثار ما زالت موجوده والدليل ذيك الحرمه اللي بغيت تأخذها واسمها نجمه
متعب : تكفى لاتذكرني أنا ما صدقت على الله أنسى , يوم قالوا اسمها نجمه قلت أكيد اسم على مسمى ما دريت أنها الله بالخير ومرجوجه وعقلها لك عليه لا وأسماء أخوانها سحاب وبدر وقمر وشمس وسماء والمشكله العقول ماش
سلطان : هاهاها من جدك ؟
متعب : أي والله
سلطان : وش يحس به ابوهم وهو مسميهم هالاسماء , بالله وش وظيفته لا يكون فلكي
متعب: لا والله يقولون طيار
سلطان : هاهاها يقطع ابليسه هالمنتهي وظيفته مأثره عليه
متعب : لا تتطنز بكره تجيب تعرس ويجيك عيال وتطلع الابداعات
سلطان كشر يوم سمع طاري العرس والعيال : لا إن شاء الله بس والله خويك ابو نجمه يهون عند غيره ,أسامي عياله زينه مو مثل بعض الناس اللي يسمون عيالهم أسماء تفشل وما يخافون على عيالهم يتعقدون إذا كبرا , المهم أنت وينك وش الدنيا بك قاطع هاليومين
متعب: اعذرني يا اخوي تعرف هالصيف ومناسباته ما نفضى
سلطان: يا اخي ما قلت تعال رز خشتك كل يوم على الأقل دق تليفون
متعب: والله توني راجع من امريكا
سلطان : وش عندك هناك لاتكون رايح تقدم دكتوراه من ورانا ترى حنا متفقين ندرس مع بعض
متعب: لالا تخاف انا أدرس وانتم منتب معي ما أستغني عن نجومك, بس رحت اخلص اوراق مساعد اخوي تخرج هالسنه من الثانوي وبيكمل هناك
سلطان: ماشاء الله الله يوفقه, إلا كيف الجو هناك وكيف الشباب عساك شفتهم
متعب: الجو هناك روعه والشباب ما عليهم ويسلمون عليك
سلطان: الله يسلمك ويسلمهم
متعب: سلطان
سلطان:نعم
متعب: شفت فيونا
سلطان حس بسكين في قلبه ووجهه تغير وحمد ربه إن متعب ما يشوفه
متعب :سلطان اكلمك وين رحت
سلطان: معاك وش اخبارها؟ سلطان كان وده إن متعب يقوله انها تسلم عليك او انها انفصلت عن..
متعب اللي قطع عليه افكاره: تزوجت من حمدان
سلطان كسر القلم اللي في يده بدون ما يحس وانجرحت يده
متعب : سلطان وش فيك؟
سلطان : مافيني شي بس متى تزوجت
متعب: لها سنه يمكن
سلطان بعصبيه: الحيوانه ما صدقت اني ارجع وراحت تاخذه بسرعة
متعب: انت اللي جبتها لنفسك المفروض تحمد ربك انك ما تورطت معها بشي والا تزوجتها
سلطان : اقول متعب أنا عندي شغل الحين اكلمك بعدين
متعب: مع السلامه
سلطان: مع السلامه
سلطان حط راسه بين يديه وقام يسترجع ذكرياته
سلطان كان انطوائي نوعا ما ما يحب يختلط إلا مع الناس اللي يعرفهم وما كان يحب احد يتدخل في خصوصياته حتى لو كانوا اهله وماكان يحب يكلم احد عن حياته واموره, لين ماتعرف على فيونا, فيونا بنت امريكيه تدرس معهم في الجامعه وكانت تعرف تتكلم عربي لانها عاشت كم سنه بالخليج وكانت في نفس الكلاس اللي فيه سلطان ومتعب وعدد من شباب وبنات عرب سلطان كانت علاقته زينه مع الكل بس ما كان يحب يجلس كثير مع البنات خصوصآ البنات اللي مالهم اصدقاء شباب لانه ما كان يحب فكرة إن تكون له صديقه مميزه زي باقي الشباب فيونا بدت تتقرب منه وما كان يعطيها وجه, طبعا فيونا كانت تجلس مع القروبات اللي كلها عرب واللي كانوا يعرفون إن سلطان من عايله غنيه وجده مليونير ومشهور ,سلطان ما كان يحب يجرحها وحاول يصدها عنه بأكثر من طريقه لحد ماجته يوم في شقته

سلطان فتح الباب ولقاها في وجهه تصيح وقامت تتكلم عن معاناتها مع زوج أمها وكيف انه يتحرش فيها وانه اليوم بغى يعتدي عليها وهي ما تقدر تعيش معهم, سلطان احتار وما يدري وش يسوي خصوصآ البنت جته في الليل و خلاها تنام في شقته وطلع هو وراح لشقة متعب, وفي الصباح راح لشقته علشان يغير ملابسه ولقاها مرتبه الشقه ومصلحه له فطور و قامت تشكره وتتأسف منه لانها خلته يطلع من شقته طبعآ سلطان طلب منها تدور لها شقه او غرفه وهو بيدفع عنها الايجار لين ما تتعدل امورها ,وبعد اسبوع طلعت فيونا لبيت قريب من بيت سلطان وكانت كل يوم تزوره ومرات ترتب له غرفته وتصلح له العشاء وكل ما طلب منها انها ما تزوره تعذرت له انها تحاول ترد له الجميل , سلطان تعود عليها وصار يفقدها اذا تأخرت وصار هو وفيونا اصدقاء بس بدون ما يلاحظ عليهم احد, في الجامعه كانت علاقتهم رسميه ماعدا متعب اللي كان يدري وكل ماشاف سلطان حذره منها الى إن بدى سلطان يحبها وفي يوم من الايام قالها سلطان انه يحبها وهي اعترفت له انها كانت تحبه من اول يوم شافته واقترحت انها تجي تعيش معه في شقته بس هو عارض وقال انه بيقول لاهله انه بيتزوجها بس تذكر سالفة هناء وموضوع خطوبته لها اللي ما يدري عنه إلا اهله ومتعب,هناء هي من عايلة السامي بس مو من القريبين من اهل سلطان , بعد ما تخرج سلطان من البكالوريس حط له جده عزيمه وجمع كل عايلة السامي وفي يوم العزيمه وبعد ما طلع اكثر المعازيم و خفوا الناس جاء ابراهيم ابو هناء لسلطان
وقاله: والله ياسلطان ما ادري وشلون ابدى بالموضوع
سلطان خير :ياعم
ابراهيم: والله المثل يقول اخطب لبنتك ولا تخطب لولدك
سلطان حس إن السالفة فيها شي غلط بس سكت وما قال شي
ابراهيم: وانا بصراحه قبل فتره حسيت بتعب وصار عندي القلب والاطباء قالوا قلبك ضعيف
سلطان: سلامتك ماتشوف شر
ابراهيم: علشان كذا أنا قلت اعرض عليك الموضوع انت عارف إن عندي ثلاث بنات وماجوا إلا عقب التعب وعلاج 17 سنه وماعندي أولاد وهالبنات أنا خايف عليهم وأنا ودي أزوجك بنتي هناء وما أبي منك إلا انك بس تسعدها, والله لوعيال أخواني كبار كان زوجتها منهم بس كلهم اصغر منها وأنا ما أبيها تطلع وتأخذ واحد من برى العايله وأنت ما شاء الله عليك رجال وكفو وما ينخاف على البنت معك
سلطان مايدري وش يقول يحس الدنيا تدور فيه كأنه في حلم ويحاكي نفسه هالرجال يا انه مجنون او يستهبل
ابراهيم : هاه وش رايك؟
سلطان هذا يمزح والا جاد: ما أدري بصراحه أنت فاجأتني بالسالفه
ابراهيم: والله السالفة عاديه ليش متفاجأ البنات هم اللي يقولون هالحكي
سلطان وده يرد على الرجال بس هو مقدر مرضه وكبر سنه
سلطان وهو منحرج: بس اللي اعرفه إن بناتك توهم صغار ومو في سن زواج
ابراهيم: إيه الكبيره 16 سنه وحنا الحين نملك بكم وبعد سنتين تزوجوا
سلطان ياربي لا وبنته بزر بعد, اكبر من ريوم بسنه أنا ريوم لو بكيفي تبريت منها هالبزر
سلطان: بس ياعمي الله يرضى عليك أنا بعد كم شهر بأرجع اكمل ماجستير
ابراهيم: مافيها شي والبنت بتنتظرك الين تخلص
سلطان: لا ياعم انت تبينا نملك وأنا بسافر ومدري كم بجلس هناك والواحد مايضمن عمره اخاف يصير لي شي وتترمل بنتك وهي ما بعد تزوجت
ابراهيم: ياوليدي خلاص نخليها خطوبه وبس أهم شي أنكم تصيرون قدام الناس لبعض هاه نقول مبروك
سلطان وده يطق الرجال اللي واقف قدامه وما يفهم
جاء ابو سلطان :هاه وش عندكم واقفين هنا
ابراهيم: ابد قلت لسلطان ترى بأزوجك بنتي وهو موافق
سلطان يناظر ابوه وده يصرخ لدرجة بغى يصيح وهو اللي من يوم عمره سبع سنين مانزلت منه دمعه
ابوسلطان يناظر ولده وهو مستغرب: بس توهم العيال صغار
ابراهيم: لا الحين بس خطوبه وبعدين الزواج اذا اخذ سلطان الماجستير
ابوسلطان: الله يوفقهم وسكت
سلطان طلع من العزيمه وراح لبيت خويه متعب وقام يشكي له
متعب: وانت ثور ما تعرف تقول لا ما ابي اتزوج
سلطان: الرجال كبير في السن ومريض
متعب: اجل مبروك الزواج
سلطان: متعب تكفى لاتستهبل
متعب:وش اسوي فيك يعني اذا انت غبي, كان قلت يصير خير نتفاهم بعدين
سلطان: هو ما عطاني فرصه اتكلم, يالله اهون علي اموت ولا اتزوج الحين
متعب: كلم اهلك خلهم يشوفون لك حل
سلطان : ما ادري شكلي بأقول لابوي سعود
رن جواله ولقاه رقم جده وكلمه
ابوعبد العزيز: مبروك ياسلطان وش هالاخبار الزينه واخيرآ قررت تتزوج بس شغلك عندي تروح تخطب من ورانا
سلطان : لا يبه انت فاهم الموضوع خطأ
ابو عبد العزيز: عالعموم مبروك وانت تستاهل كل خير وبنات ابراهيم الكل يمدحهم
سلطان: لايبه انا
ابو عبدالعزيز: خلاص عن الحكي الزايد العايله كلها درت وهاك عمانك بيباركون لك
كلموه عمانه ورجال عماته وباركوا له بعدين كلمه اخوه فهد: هاه سليطين سويتها من ورانا اوريك يا ان الشباب متحلفين فيك علشانك ما قلت لهم
سلطان: اقول انطم بس انت وإياهم وسكر السماعه
متعب: والله لو انا منك وهذي عايلتي كان اتبرأ منهم ما يعطون احد فرصه يتكلم
سلطان : تلومني في ابراهيم
متعب: والسواة الحين
سلطان : مالي الا أمي بس على الله تفضي نفسها لي
متعب: أيه وأنت صادق أمك اللي بتحل السالفه
ثاني يوم راح سلطان لأمه ومالقاها, طلعت لمشغلها ومحلاتها
ومر على السالفه اسبوع كل ما جاء يكلم أمه ما قدر اما ان أبوه يكون موجود أو احد من اخوانه
ودخل عليها الصباح قبل ما تطلع
سلطان: صباح الخير يمه
ام سلطان: صباح النور
سلطان: يمه دريتي عن سالفة الخطوبه
ام سلطان: ايه مبروك وانا أمك بس كان قلت لي أدور لك على عروس يوم ودك تتزوج صحيح بنات ابراهيم ماعليهم بس عاد فيه من هو اجمل منهم
سلطان: يمه انا ما ابي اتزوج
ام سلطان وهي تلبس عبايتها : وش السالفه لعب بزران عقب ما حاكيت ابوها تقول ما أبي هذا انتم يالرجاجيل إذا خطبتوا وصار الموضوع جد تذكرتوا ايام العزوبيه وقلتوا هونا بس عادي ترى خوالك قالوا كذا قبلك بس محد طاوعهم لو بنطاوعهم كان ماتزوجوا عالعموم يمديك تغير رأيك كم مره في هالسنتين يلا انا بأروح للمشغل مع السلامه
سلطان يناظر امه وهي تتطلع ومعصب جت ريم من وراه وقرصته مع ظهره
سلطان بعصبيه : وجع يالحيوانه
ريم: وش فيك معصب بس تصدق ما ألومك تعصب دامك بتاخذ هناء, وع الخايسه ما لقيت الاهي
سلطان : تعرفينها
ريم: إيه هالمغروره ما اطيقها وشلون بأتحملها ما ادري, وش رأيك اذا تزوجتوا تسكن انت معنا وهي تسكن في بيت لحالها.
سلطان: اقول انا بأطلع ابرك من مقابل وجهك
ريم: لاحق على الطلعات اذا تزوجت هناء لان وجهها اشين من وجهي بمراحل
سلطان طلع و راح عند متعب
متعب: هاه وش قررت
سلطان: انا حجزت بعد بكره لامريكا بأرجع اكمل دراستي قبل ما يجيني شي في عقلي
متعب: تو الناس انت توك مقدم اوراقك يمكن مايقبلونك
سلطان:قعده في الرياض ما نيب قاعد اذا ما قبلوني بأسجل في أي جامعه هناك ولا رحت لدوله ثانيه
متعب: على راحتك عالعموم انا بأكون هناك اذا قبلوني
سلطان راح لامريكا بعد ما اهله تعبوا وهم يقنعونه يجلس بس هو قال انه بياخذ له دوره قبل ما تبدأ الدراسه
وبدت قصه سلطان مع فيونا, طبعآ هو كان ناوي يرجع يفك خطوبته و يفاتح اهله بموضوع زواجه من فيونا اللي صارت ما تفارقه حتى في الجامعه لدرجة انها اخذت اغراضها وراحت سكنت في شقة سلطان لمدة شهر وسلطان كان منحرج انه يقولها تطلع بس بعد ما قالت لكل الشله انها سكنت مع سلطان عصب عليها وطلب انها ترجع لشقتها لين ما يتزوجون
ومره كانوا جالسين سلطان وفيونا وجت مناير وهي بنت كويتيه تدرس معهم هي وولد عمها سليمان وكانوا مخطوبين لبعض ومعهم ميرفت السوريه وفاطمه البحرينيه وراشد الاماراتي وياسر السعودي وجلسوا معهم ميرفت كانت تحب سلطان بس ما احد يدري غير فاطمه ومناير
ميرفت: شو عندك فيونا بشوفك ما بتفارقي سلطان ولا لحظه
فيونا : عادي ليش انتي معصبه
سلطان: وش عندك يا ميرفت تحققين
فاطمه: هذا أهو ياء شوفيه يا مناير
سليمان: فطوم كفي بلاج عن خطيبتي ويوزي عنها
مناير: اشدعوه سليمان عاد البنيه ماقالت شي
سلطان يناظر الرجال اللي مر من عندهم وكان شكله عربي ومعه بنات وشباب
سلطان: من هذا
راشد: هذا اسمه حمدان اسماعيل ابوه من اشهر تجار الامارت بس لاتغتر بمظهره صحيح اهو تاجر حيل بس شايف نفسه عالعالم
سليمان: من حلاة ويهه عاد
ياسر: ايه انت شوف الجيش المرافق له بالله هالبنات وش لاقين فيه
راشد: اهم يمشون معه علشان بيزاته يقولون مغرق هالشله اللي معاه بالفلوس ورفيجته صارت غنيه بعد
سلطان: تصدق اول مره اشوفه
فاطمه: علشان اهو ما يي كل يوم وانت بعد دايم حاكر عمرك بالدراسه
ميرفت: اه نيالها رفيقته
مناير: مالت عليج انت واياها طاح حظج
ميرفت: وين بتحصلي واحد بيحبك ويغرقك بالمصاري متله
سلطان: اقول انا بأروح عندنا محاضره تبون تجون والا في قريح
الشله: شنو وميرفت شو قلت
ياسر :انت ابد ما عندك اسلوب يا اخي قول الفاظ تحببنا في الدراسه
سلطان: كانك كبر الحمار وتبيني احببك في الدراسه فما عاد في الدنيا خير
راشد: وهاي كله جي ما يعرف يتحجى عدل
ياسر: ماعليكم منه تصدق سلطان حزات ودي البخك وادبغك ثم امسط بك
سلطان يقلد متعب في كلامه الجنوبي:في تية القفا تاك ان هالشنب ماهو على رجال
سليمان: لاعاد انت واياه مصختوها تحجوا عربي نبي نفهم كله تقطون بدليات
ياسر: وش دعوه قاعدين نرطن
سلطان: هي سليمان لاتفشلنا هذا كلام عربي قال بدليات قال
راشد: معاه حق سليمان ما فهمنا شي من حجيكم
ياسر: ابويه راشد انت اخر واحد يتحجى على لهجتنا لان اكثر جلامك ماافهمه
راشد: هيه عيل ترجم لي شقاعدين تقولون من شويه
سلطان: قل في تية القفاتاك عشر مرات ونترجم لك
راشد: لا هاي جلمت متعب جلامه صعب وايد
سليمان: حتى يسور من يبدى يتحجى قصيمي ثم يقلب حجازي احسه يقول حجي غريب
سلطان: خلصونا المحاضره بتخلص وانتوا تبربرون
فيونا : انا تعبانه ماراح احضر بروح للبيت
الشباب قاموا كلهم ماعدا سلطان
سلطان: سلامات فيونا فيك شي اوديك المستشفى
فيونا: لا بس شويه وجع بالراس وبيروح
سلطان: خلاص راح اوصلك للبيت
فيونا: لاحبيبي انت روح احضر المحاضره علشان اخذها منك انا مافيني شي
سلطان : أكيد
فيونا: أكيد
سلطان : إذا بغيتي أي شي اتصلي علي
فيونا: طيب
ومن هاللحظه بدت فيونا تتحجج وتقلل طلعاتها مع سلطان وقلت روحاتها على الجامعه وكل ما سألها سلطان تحججت انها بتسكن مع جدتها المريضه ومشغوله بنقل اغراضها سلطان انشغل بالامتحانات وبعد الامتحان اتصلت فيونا على سلطان وسألته وين هو موجود فيه وكان في شقة متعب وقالها عن مكانه وطلبت منه ما يتحرك من مكانه لين ماتجي جت فيونا وفتح سلطان الباب:
اهلين فيونا تفضلي
فيونا: لاسلطان انا ابغى اعطيك شي واروح لاني مستعجله وطلعت من شنطتها ظرف وعطته اياه
سلطان : وش هذا
فيونا: هذا لك يلا مع السلامه
سلطان :لحظه فيونا
فيونا راحت وماردت
جاء متعب: وينها
سلطان باستغراب: راحت بس عطتني هذا الظرف
متعب: وش ذا
سلطان: مدري
متعب : افتحه وشف
سلطان فتح الظرف ولقى فيه ورقه وصوره صغيره لفيونا
حط الصوره في جيبه وفتح الرساله وكان مكتوب فيها
حبيبي سلطان:

لا اعرف ماذا اقول لك ولكني مضطره لاخبارك بكل شئ وانا آسفه لذلك
لقد احببتك منذ اول لحظه رايتك فيها وعملت جاهده لكي الفت نظرك واستميل قلبك نحوي بشتى الطرق وقد نجحت في ذلك قد اكون اخطأت في هذا الامر ولكن هذا لايهم الان, حاولت جاهده ان اجرك لاقامة علاقه معي ولكنك رفضت وطلبت انت ان يكون ذلك بالزواج وقد وعدتني بذلك
وفرحت انا لهذا ولكن بعد ان اقتربت منك كثيرا وعرفت اطباعك جيدا فكرت مره اخرى في هذا الموضوع لانني لم اشعر بانك تحبني او تهتم لامري اعلم انك قد قلت لي انك لاتجيد التعبير عن مشاعرك ولكنك أيضا لم تظهر لي اهتمامك بي كنت اتمنى ان نكون مثل باقي العشاق تغمرني بكلماتك الجميله وتغدق علي الهدايا فانا اعرف انك شخص غني جدآ حتى عائلتي كانت امالها معلقه عليك لانتشالنا من الفقر ولكنك شخص واعي جدآ صحيح انك ساعدتنا في كثير من الامور الماديه ولكنك كنت حذرا في ذلك, انا لم اندم لحظه على تلك الايام التي قضيناها سوية وتلك الليالي التي سهرناها معا, بل مازلت اتذكرها وانا سعيده بتلك الذكريات عندما اخبرتني بانك ستخبر اهلك بموضوع الزواج في هذا الصيف اردت ان اخبرك با انني لا استطيع الزواج منك لانني وقعت في حب شخص اخر وهو رجل غني جدآ ووعدني بمساعدة عائلتي وقد قام بذلك فعلا ولم يبخل علينا بشئ, لذلك اردت اخبارك بكل ما حدث معي والاعتذار منك عن الوعد الذي وعدتك به وهو عدم التخلي والابتعاد عنك, لقد حاولت ولكني لم استطع فقلبي الان يملكه رجل اخر وعقلي يملكه مال ذلك الرجل, وانا آسفه من اجلك




حبيبتك الدائمه : فيونا




سلطان انصدم من اللي قراه ورمى الورقه على الارض بدون ما يحس وصار يمشي وهو يصيح وهو مايدري وين يروح حس بكل انواع العذاب والحسره تمنى ان الايام ترجع ويسوي لفيونا كل اللي تبغاه
متعب اخذ الورقه وقام يقرى وعصب لانه من الاول عارف حقيقة فيونا انها ما تبغى غير الفلوس: الحيوانه قايل لك من الاول انتبه من هالبنت رفع متعب راسه وما لقى سلطان طلع من الشقه وطل مع الدرج لقى سلطان ينزل وهو حالته حاله
لحق سلطان ولقاه واصل عند الشارع العام وهو مثل الضايع ناداه بصوت عالي علشان ينتبه من السيارات بس سلطان كان عقله مشغول مومنتبه للي يصير حواليه
متعب راح يركض يبي يبعد سلطان عن السياره اللي جايه بسرعه من ناحيته ركض متعب وهو ينادي على سلطان ووصل قبل السياره ودف سلطان وطاح هو وإياه من الجهه الثانيه للشارع
متعب: أنت مجنون وش تبي تسوي تبي تذبح عمرك
سلطان مارد عليه بس دموعه تنزل
متعب وهو يمسكه: قم يارجال خلنا نروح البيت
قام سلطان بدون ما يتكلم مسكه متعب ودخله لشقته ويوم شافه تعبان وموب قادر يتكلم معه, دخله الغرفه وخلاه ينام على السرير
وطلع وسكر عليه الباب وجلس في الصاله مرت الساعات ومتعب كل شوي يتطمن على سلطان ويلاقيه نايم
في نصف الليل قام متعب اللي كان نايم في الصاله على صوت الباب وطلع بسرعه لقى سلطان نازل مع الدرج وحالته حاله وجهه اصفر وعيونه حمر
متعب: وين بتروح
سلطان: بروح اذبح الكلب اللي بياخذها مني
متعب: تعوذ من ابليس وامش معي
سلطان: لا خلني اروح ابرد قلبي ليش انا اللي احبها ويجي واحد ثاني ياخذها مني ليش والله ما اخليه
متعب: استغفر ربك يا رجال على بالك اذا ذبحته بتاخذها اصلا البنت ما تبيك من الاول, هي ما تبي الا فلوسك والحمدلله انها قالت لك بنفسها في الرساله
سلطان : بس انا احبها احبها وقام يصيح وقعد على الارض
متعب مسك سلطان وقومه علشان يمشي معه ادخل يا ابن الحلال ازعجنا الناس في هالليل
سلطان كانت حالته صعبه ونفسيته تعبانه دخل مع متعب لشقته وجلس في الصاله جاء متعب وجلس جنبه: سلطان تعوذ من ابليس واذكر ربك يااخي الحمدلله انك ما بعد اخذتها هالبنت تدور على الفلوس اصلا هي ما تحبك هي تحب فلوسك
متعب شاف فيونا مره مع حمدان بس ما قال لسلطان حب انه يعرف السالفه بنفسه
سلطان: ياليتني عطيتها اللي تبي ولا خليتها تروح من يدي انا الغبي اللي ضيعتها
متعب: انت ما ضيعتها ولا تعذب عمرك علشانها الحرمه بدالها حرمه
سلطان بعصبيه : انت ما تفهم اقولك احبها تعرف وش معنى هالكلمه
متعب: وهالحب انتهى وهي اللي اختارت تنهيه
سلطان: وانا ما راح اخليه ينتهي
متعب: اصلا هذا مصيركم انكم تتفارقون والا انت مصدق ان اهلك بيخلونك تاخذها
سلطان: انا باخذها غصب على اللي ما يرضى
متعب: وغصب عليها بعد
سلطان: انا ما راح اخليها بروح لها وبكلمها
متعب : يصير خير اذا جاء بكره رح وسو اللي تبي بس هاللحين خلنا ننام والصبح يصير خير
دخل سلطان الغرفه وهو معزم انه يروح لفيونا الصبح وكان عنده امل ان الامور بترجع بينهم مثل الاول
متعب بعد ما نام سلطان طلع وراح لفيونا طق الباب عليها وفتحت له وكانت حاطه اغراضها وشنطها عند الباب
فيونا: اهلين متعب تفضل
دخل متعب للصاله وفيونا وراه : تفضل
متعب بعصبيه: انا ما جيت علشان اجلس انا عندي كلمتين بقولها لك معك وقت الى الصباح علشان تبعدين عن هالمكان واذا جاء الصبح وانتي ما رحتي بتشوفين شي ما عمرك شفتيه
فيونا: انت تهددني
متعب: ايه اهددك علشان سلطان اسوي أي شي
فيونا باستهزاء: ليش وش بتسوي
متعب: شوفي فيونا لاتتحديني لاني اقدر اسوي أي شي واذا انتي خايفه على حياتك فالاحسن تبعدين عن هالمكان انتي تدرين اني مسكت سلطان قبل شوي على الدرج وهو كان ناوي يجي يخلص عليك انتي وحبيبك, بس انا منعته, حرام يصير مجرم علشان وحده زيك وعلى فكره انا ما قلت لسلطان من هو حبيبك وانتي عارفه سلطان اذا عرف وش ممكن يسوي فيك وفيه , عالعموم اذا تبين تعيشين انتي وحمدان بسلام ياليت تطلعين من هنا قبل الصبح وتغيرين رقمك وما تجين هالمنطقه مره ثانيه او تحاولين تتصلين في سلطان والا والله لا اذبحك انا هالمره موسلطان فاهمه
فيونا والخوف باين عليها: انا اصلا كنت مجهزه اغراضي لاني بطلع بكره
متعب: الحين تطلعين
فيونا: ما اقدر خلاص بكره
متعب : انا رايح وبرجع بعد ثلاث ساعات وان لقيتك هنا ما راح يصير لك خير
فيونا سكتت وما ردت
نزل متعب وشغل سيارته ووقفها بعيد عن عمارتها وقعد يراقبها
بعد ساعتين شاف فيونا تنزل اغراضها وركبت السياره وراحت
متعب رجع لشقته ودخل على سلطان ولقاه نايم
صحى سلطان الصباح ولقى متعب قاعد يشرب شاهي في الصاله
متعب : صباح الخير
سلطان : صباح النور
متعب: كيفك اليوم
سلطان: لا احسن الحمدلله , انا طالع
متعب: بدري وين بتروح على الصبح
سلطان: بروح لفيونا
متعب :اجل انا بجي معك
سلطان: لاانت خلك هنا ابغى اتكلم معها لحالنا
متعب: لا انا بقعد في السياره انتظرك ماراح اخليك تروح لحالك
سلطان:يلا اجل
راح سلطان ومتعب لشقة فيونا سلطان : موقلت بتنتظرني في السياره وش جابك
متعب: ياخي اذا جيتوا تتكلمون بطلع لاتخاف
سلطان طق الجرس اكثر من مره وماردت عليه وعصب: اكيد عرفت انه انا وما تبي تفتح وصار يطق الباب بقوه
انفتح الباب اللي مقابل لشقة فيونا وطلعت وحده كبيره في السن وقالت لهم ان فيونا تركت العماره
سألها سلطان وين راحت
قالت ان فيونا سلمت عليها امس وقالت لها انها بتسافر خارج امريكا
سلطان عصب :ليش تسوي فيني كذا ليش طلع جواله ودق عليها وصار جوالها مقطوع
متعب: هاه يرن
سلطان بعصبيه: مقطوع
متعب:يلا خلنا نمشي
سلطان مارد عليه قاعد يناظر في باب الشقه متعب سحبه مع يده علشان يروحون ركب سلطان السياره وحط راسه بين يديه
متعب: خلاص يا سلطان لاتضيق صدرك علشان هالحيوانه
سلطان: لاتقول عنها كذا
متعب هز راسه وسكت
سلطان: نزلني هنا
متعب :ليش
سلطان بتمشى شوي
متعب نتمشى مع بعض اجل
سلطان: انت ليش نشبه
متعب : قول كل اللي في خاطرك ماراح ازعل بس انا ماراح اخليك لحالك لو وش يصير
سلطان: اجل ودني لشقتي
متعب: لا انت بتجي معي بنروح ناخذ اغراضك وبتجي عندي
سلطان: متعب وبعدين معك
متعب : خلاص اجل انا اللي بجي معك بس نمر شقتي اول اخذ اغراضي
سلطان اول ما وصل لشقته دخل غرفته وقفل على نفسه الغرفه وقعد يصيح وهو يتحسر على فيونا ولحظاتهم مع بعض سوالفهم وضحكهم فيونا هي الوحيده اللي قدرت تدخل حياته هو انسان كتوم انطوائي نوعا ما ما يحب احد يعرف اسراره ولا احد يشاركه تفكيره شخصيته كانت غامضه حتى بالنسبه لاهله , فيونا اللي دخلت حياته وقلبت كيانه خلته يحس ان الدنيا لها طعم لانه كان عايش من قبل حياة ممله من هو صغير وامه كانت مشغوله عنه باشغالها وابوه نفس الشي وتربيته كانت على يد الخدامات وام حمدان وهي حرمه كبيره في السن اهلها يشتغلون عند جد سلطان ابو عبدالعزيز وهي بعد ماتزوجت صارت هي وزوجها يشتغلون في بيت ابو سلطان هي اللي كانت شايله البيت وربت سلطان مع ولدها حمدان ورضعته معه وصار ولدها بالرضاع واعتنت فيه لين ما كبر ودخل المدرسه بعدين امه حطت له مربيه متعلمه علشان تساعده في دراسته بس سلطان صار انطوائي, كبر وصار انسان غامض ما يحب احد يتدخل في خصوصياته سافر ودرس وشخصيته ماتغيرت الا لما دخلت فيونا في حياته وصارت تجلس معه وتسولف له عن حياتها وهو صار يتجاوب معها ويسولف لها عن نفسه عاش احلى ايام حياته مع فيونا كان يسولف لها عن كل شي, صارت تعرف قصة حياته وكل كبيره وصغيره كانت قريبه منه لاقصى حد وتفهمه مثل ماهو يفهم نفسه يطلعون مع بعض ويتمشون ويدرسون ويسولفون ويضحكون لدرجة انهم اتفقوا على الزواج بعد التخرج وعلى المكان اللي بيحتفلون فيه حتى عدد العيال اللي بيجيبونهم وكان ناوي يفاتح اهله في هالموضوع في هالاجازه وحجزه بعد يومين وفاجأه وبدون مقدمات انتهي كل شي .
سلطان ما طلع من غرفته اسبوع كامل كان متعب يدخل عليه ويغصبه على الاكل ويحاول انه يطلعه من الحاله اللي اهو فيها بس سلطان ما كان راضي كانت نفسيته تعبانه ودايم ساكت يناظر اللي حواليه بدون مايحس مثل الغبي وصورة فيونا ماسكها طول الوقت في يده ,متعب تعب من حالة سلطان واللي يسويه في نفسه اخذ مرايه كبيره ودخل على سلطان
جلس على السرير وسحب صورة فيونا ورماها على الارض
سلطان يناظره وهو معصب: وش سويت
متعب بعصبيه: الا انت وش سويت شف نفسك شف حالتك وين وصلت وحط المرايه قدامه طالع عمرك بالله هذا وجه هذا, معقوله سلطان السامي يصير فيه كل هذا وين سلطان العاقل الرزين الراكد اللي الكل يحترمه واللي الشباب يحسدونه على عقله وشخصيته القويه شف نفسك وجاوب بالله لو يشوفك احد بهالحاله وش تتوقع يقول عنك ,ابوك اللي واثق فيك ومخليك تروح تدرس وما منعك مع انه في اشد الحاجه لك علشان تمسك معه اشغاله لو شافك في هالحال وش بيقول عنك
وجدك اللي مفضلك على باقي احفاده ويعدك ولد مو حفيد وش بيقول عنك وامك واخوانك حتى ابراهيم اللي جاك بنفسه وعرض عليك بنته لانه واثق فيك
سلطان وهو يصيح: خلاص متعب اسكت تكفى اسكت
متعب: لا مانيب ساكت انت قاعد تدمر عمرك وعلشان ايش وحده حقيره تركتك تعذب عمرك وهي عايشه مبسوطه ولا فكرت فيك انا مانيب مخليك تذبح عمرك واسكت فاهم والا لا وطلع متعب وهومعصب
وبعد يومين قام سلطان من السرير ووقف يشوف نفسه في المرايه حالته حاله وجهه اصفر وعيونه حمر وشفايفه بيض ولحيته نابته وشعره معفوس دخل الحمام غسل وجهه وطلع وشاف صورة فيونا اللي رماها متعب على الارض رفعها وحطها في بوكه وراح عند التسريحه وشاف علبة دخان عليها وقعد يتذكر يوم اخذها من فيونا كانت جايه تاخذ منه فلوس ايجار شقتها قبل شهر دخل يجيب الفلوس من غرفته وطلع ولقاها تدخن
سلطان مستغرب: من متى تدخنين؟
فيونا: من كم يوم بس
سلطان: يلا طفي السيجاره
فيونا: ليش؟
سلطان: انا ما احب التدخين اولاً, ثاني شي ما عندنا حريم يدخنون عيب
فيونا: بس انا غير مو مثل باقي الحريم
سلطان: ادري يا حبيبتي انك غير علشان كذا اقولك لا تدخنين
فيونا بدلال: حبيبي خلني على راحتي ومدت له العلبه والولاعه : يلا سلطان جرب
سلطان اخذ العلبه والولاعه وحطها في جيبه: اذا كنتي تحبيني اتركي التدخين
فيونا: طيب بأحاول اتركه
فيونا ما تركت التدخين وسلطان عارف لان ريحتها دايم دخان وما قال شي علشان ما يتهاوشون
دخل متعب على سلطان وشاف العلبه معه وباستغراب: سلطان من متى تدخن
سلطان يناظر العلبه وتذكر فيونا وريحة سجايرها
سلطان: من اليوم وطلع وحده من السجاير وحطها في فمه وولعها
متعب يهز راسه وهو ما يدري وش يقول: يلا امش معي مصلح لك ذاك الفطور السنع
سلطان: ما اشتهيت متعب راسي يعورني ودي بكوب قهوه
متعب: قهوه ودخان على الصبح
سلطان: يا اخي خلني على راحتي
متعب: بس بشرط تطلع تقعد معي في الصاله طفشت وانا لحالي
سلطان: طيب انت اطلع وانا جاي
متعب وهو عند الباب وهو يضحك: بقولك شي ولا تعصب يا ليت تتسبح وتحلق لانك تقرف, وانت نظيف يا الله اتحملك وشلون وانت مبهذل
سلطان ضحك على متعب وهز راسه
متعب طلع من الغرفه وهو مبسوط لان سلطان اليوم نفسيته احسن من الاسبوع اللي راح
طلع سلطان من الغرفه وهو محلق ومتسبح ومغير ملابسه وجلس في الصاله
متعب : وش رايك بعد شوي نطلع نتمشى ونحجز عاد علشان نرجع والله اني مشتاق للرياض واهلها
سلطان: انا ماراح ارجع
متعب وهو مو مصدق: ليش ان شاء الله اخبرك بتموت علشان ترجع
سلطان بيأس وهو يتنهد: هذاك اول يوم عندي سبب بس الحين وسكت
متعب: واذا جلست علبالك الدنيا بتتغير والا الامور بتتصلح
سلطان: لا انا بجلس وبسجل في كورس هالصيف لأني ناوي انزل كل المواد اللي باقيه لي الفصل الجاي
متعب: انت ناوي تذبح عمرك بهالدراسه
سلطان: خلاص متعب لاتناقشني في هالموضوع انا قررت وخلصت
متعب :اسمعني ياسلطان
سلطان يقاطعه: خلاص متعب قفل الموضوع
متعب :على راحتك بس ترى انا معك في كل شي حتى في الدراسه بنزل المواد اللي بتنزلها
سلطان: يا اخي ما عليك مني ادرس على راحتك
متعب : لا انا ما اتخيل اني ادرس وانت مو معي يا اخي مستحيل اتخلى عن ملخصاتك وشرحك
سلطان: يعني مو علشاني علشان الملخصات
متعب :من زين وجهك علشان اقابلك


*******************************

رجع متعب للرياض واتصل على ابو سلطان وجده وطلب يقابلهم

راح متعب لبيت ابوعبد العزيز جد سلطان وهناك قابل ابوسلطان وابو عبدالعزيز وبعد السلام والسؤال تكلم متعب: والله ياجماعه ما ادري وش اقولكم بس الموضوع يخص سلطان
ابو عبدالعزيز: وش فيه سلطان
ابوسلطان: ولدي صاير له شي
متعب: لابس هو محتاجكم الحقوا عليه سلطان تعبان ومحتاج احد يوقف معه ويساعده
ابوسلطان: انا اليوم مكلمه وقال انه طيب وبيجلس علشان يخلص دراسته ويرجع بسرعه
متعب: علشان كذا اقول الحقوا عليه ولدكم بيذبح نفسه بالدراسه, وقالهم كل شي صار لسلطان
ابو سلطان: كل هذا يطلع من سلطان وانا ما ادري حنا مرسلينه يدرس والا يفسد ويدج
ابو عبدالعزيز: الحين تلومه وش عقبه, انا كم مره قلت لك انتبه لعيالك واجلس معهم ولدك صار رجال وانت ماهمك الا الشغل, ياما جاني يشكي من اهمالكم له وانا تعبت وانا انصحك بس انت ماتسمع العلم
ابوسلطان: الشرهه على امه
ابو عبدالعزيز: انت وامه كلكم غلطانين وكل واحد فيكم اردى من الثاني اهملتوا عيالكم وخليتوا الخدامات يربونهم وهذا سلطان شف وش صار فيه والباقين الله اللي يعلم بهم
ابوسلطان: وهو صغير,هو رجال وش كبره ارسلته يكمل دراسته بس هو مو كفو
متعب:لاياعمي سلطان كفو واهم شي عنده دراسته واخلاقه مافيها كلام بس هالبنت هي اللي بتضيعه
ابوعبدالعزيز: ماقصرت ياوليدي انت سويت اللي عليك ونعم الصديق وانا ابوك
متعب:سلطان يا عم اكثر من الاخو وانا حبيت اساعده وهذا انا قلت لكم بس ما ابيكم تقولون له لايزعل علي
ابوسلطان: خلاص يايبه خلنا نزوجه من بنت ابراهيم الزواج هو اللي بيخليه يعقل
متعب: لايا عم انت بتدمره زود خصوصآ ان زوجتوه بهالفتره وهو اصلا مابعد نسى اللي صار له من ذيك البنت
ابو عبدالعزيز:انت صادق ياوليدي الزواج موب حل
ابوسلطان: اجل وش الحل
ابوعبدالعزيز: خلنا نكلمه ونحاول نقنعه يرجع واذا مارجع نروح له كلنا انت وحرمتك وعيالك
بس اسمع لاتقول شي من اللي صار لام سلطان, ولاتجيب لها طاري اللي صار, واذا سألت قل الوالد اشتاق لسلطان وبيروح يشوفه ويبينا كلنا نروح معه

هل سفر الجد سعود وابو عبدالعزيز لسلطان بيغير شي في الموضوع أو لا؟؟



الجزء الثالث
الشغالة تطق على سارة الباب
سارة وهي نايمه: نعم
الشغالة: سارة قومي ماما كبير وماما أنتي يقول خلي سارة ينزل تحت
سارة : طيب خلاص بنزل
قامت سارة وغسلت وجهها ونزلت ودخلت لقت جدتها وأمها وسوسن قاعدين يتقهوون
سارة : أمي عندنا يا مرحبا يا مرحبا
أم عبد الله : عن الاستهبال عاد اجلسي أبيك في سالفة
سارة : خيريالغاليه وش عندك مسيره؟ هاه يمه في شي خطير جريمة وإلا شي يلا قولي
أم عبد الله : فالك ما قبلناه يالمجرمه جريمة عاد وش دعوه عايشين في شيكاغو
سارة: أحلى يا أم عبد الله وش هالثقافه من ورانا وحنا ما ندري
أم عبد الله: لا جاهلة وإلا جاهلة اللي يسمعك يقول حتى المدرسة ما شميت ريحتها مالت عليك من بنت وإلا هاللحين علشان شهادتك صارت زي شهادتي سويتي فيها أحسن مني انطمي واسمعي أمس كلمتني وحده تبي تخطبك لولدها عمره28 وهو يكمل دراسته برى
سارة عصبت بس ما بينت تبي تتكلم مع أمها بتفاهم: يا حليلك يمه خوفتيني جايه ومقومتني من النوم واحسب عندك شي مهم والله انك مسويه زحمه عالفاضي كان اختصرتي السالفة وقلتي لهم بنتي توها صغيره على الزواج
أم عبد الله : وليش بسم الله عليك أنتي صرتي حرمه واللي جاك كفو وماينرد
سارة: يمه أنا ما أبي أتزوج تكفين أبي ادرس واخلص دراستي تكفين يمه رديهم ولا تقولين هالسالفه لأبوي
أم عبد الله : ما اقدر اسكت وما اعلمه بيعصب ان درى
سارة تكلم جدتها: تكفين يمه قولي شي أنا توني صغيره حرام عليكم
أم محمد: خلاص يا أم عبد الله رديهم وان درى ولدي أنا اللي باتفاهم معه
أم عبدا لله: زين يا سارة بأردهم وبنشوف آخرتها معك والله ما ادري أنتي من تحترين ولده وليم وإلا هاري عيال ديانا
سارة: لا يمه وع كلهم شيف
سوسن : اصلآ يمه أنا وسارة متفقين نعرس على أجانب ما نبي عرب
أم عبد الله: من الهند وإلا الفلبين حدكم هالفطسان ويخبون عليكم بعد
سوسن: وش دعوه يمه حنا بنأخذ ايطاليين وإلا اسبانيين وياسلام لو نأخذ اتراك كان عز الطلب مسلمين حتى البرتغاليين واليونانيين راضين فيهم
سارة: وان يأسنا مره بنوافق على فرنسيين بس عاد مسلمين وإلا ما حنا موافقين آه بس يمه لو آخذ هاك الأشقر أبو عيون زرق ويناظرني ذيك النظره الهلاك والله لاأخق وأعاف الدنيا باللي فيها بس وينه متى الله يهديه ويجي
سوسن : أي واحد؟ وش اسمه
ساره : ماله أسم
أم عبدالله : ليش هو موب آدمي
ساره وهي تحلم : لا يمه موب آدمي
أم عبدالله وهي مرتاعه : هاو جني؟
ساره : لا يمه هذا ملاك شخص من بنات أفكاري موب في الواقع
أم عبدا لله: مالت عليك أنتي وعيال أفكارك
ساره : هاه يمه توك مثقفه وش زينك لاأحد يسمعك بس وانتي تقولين عيال أفكاري
سوسن : لا تلومينها توها طالعه من دورية الجيران وسوالفهم كلها في العيال وأبو العيال وهذي التأثيرات الجانبيه توها تطلع الحين
ساره : من هي عنده الدوريه اليوم؟
سوسن : أم حمد
ساره : كملت السالفه ذيك تأثيراتها تقلب ديره بحالها الحمدلله والشكر من تزوج عليها رجلها وهي منهبله قامت تخرب حريم الحاره وتشككهم في رجاجيلهم يمه لا تماشينها اخاف تخربك
أم عبدالله: اشك أني احكي مع أوادم والله هالرجال اللي جاك حسافه نرده
سارة : يمه لو سمحتي لا تجيبين لي طاري العرس مره ثانيه
سوسن : إلا يمه وش اسم الرجال
أمهم: سامي
سوسن: سوير خذيه لاتفوتين الفرصة أخاف بعدين ما يجيك احد اسمه زين ترى أنتي دايم تتطنزين على الاسامي
سارة: أنا ما تطنزت بس بالله نجوى خذت صلاح جابوا بنت اسمها سحر و ولد اسمه عماد وش تحسين اذا سمعتي الاسماء تحسين انك قاعدة في القاهرة وإلا هند خذت احمد تحسين بدرس مطالعه
سوسن: لا وأنتي الصادقة درس قواعد رابع ابتدائي
سارة وسوسن:هاهاها
أم عبد الله: وجع يشيلكم يا قليلات الحياء تحشون في خواتكم ورجاجيلهم ياللي ما تستحون
دخل عليهم عبدا لله: خير ان شاء الله اسمع أصواتكم وأنا برى وش السالفة
سارة: يقولون اللقافه مقطعه البنات موالعيال
عبد الله: سويره انطمي أحاكي أمي ما أحاكيك
أم عبدا لله تصب لولدها القهوة: تقهو وأنا أمك وما عليك من هالبثرات ناقصات العقل
عبد الله: ما جبتي جديد يا أم عبد الله صدقتي كل الحريم ناقصات عقل
أمه: عبيد وش تقصد
عبد الله: لا يمه أقول البنات موب الحريم
سارة تحاكي جدتها: وش فيك يمه ساكتة عسى ما أنتي تعبانه
أم محمد: لا بس قاعدة اسمع خبالكم الله يخلف عليكم
سارة: مقبولة منك يا أم محمد وباست رأس جدتها وقامت ونادت سوسن
سوسن: وش تبين؟
سارة تعالي بأوريك مجله فوق فيها صور حلوه

*******************************************
العنود وريم ومنى وهيفاء مجتمعين في بيت جدهم
منى : هاه عنوده ما عرفتي من هو الرجال
العنود : لا تقهريني تراني محترقه السالفه بتكمل الشهر وأنا ماعرفت
ريم : وأنا عجزت وأنا احقق في نويصر ورددوده مثل وجهه ما تأخذين منه لاحق ولا باطل
منى : أنتي على الاقل يرد عليك , أنا انبح حلقي وأنا أسئل ولا أحد عبرني فيهم حتى ما كلفوا انفسهم يقولون أنطمي
هيفاء : أجل راح تحقيقنا على الفاضي
العنود : أموت وأعرف من هو هالرجال
ريم : لو انا منك بأقول لأصايل , ألا على فكره وينها
العنود : عاد اصايل فاضية لي دايم طالعه مع رجلها يكملون أثاثهم , ومن ترجع للبيت وهي يا نايمه ياقاعده على التليفون تبربر معه
منى : متى زواجهم ؟
العنود : بعد شهر ونص
ريم : خلاص عنوده شيلي هالرجال من رأسك الظاهر ما فيه فايده من اللي نسويه
العنود وهي مكتئبه : ودي أشيله بس ما أقدر تدرين حلمت فيه ثلاث مرات عقب ذاك اليوم
هيفاء : أوف بنت عمي غرقانه على الآخر
العنود : خليها على ربك بس

***********************************************
قامت سارة وسوسن وقعدوا فوق يتفرجون على المجلات
سوسن: ساروه
سارة: خير
سوسن: ليش أهلنا ما يخلونا نتزوج أجانب وش فيها يعني اذا صاروا مسلمين
سارة : لا ياشيخه هم اصلا ما يخلونا نحكي في الموضوع وشلون تبينهم يزوجونا بعدين مصدقه ان هالاجانب بيفكرون مجرد تفكير فينا مع هالاشكال سارة كانت لابسه بيجامه ورافعه شعرها وسوسن لابسه قميص بيت وبعد لافه شعرها
سوسن: أنا مقتنعة بشكلي صحيح أني لابسه قميص وشعري ما مشطته من أمس ووجهي هالايام كله حب شباب من كثر ما أكل من الكاكاو
سارة: بس بس ولا يكثر وع حومتي كبدي كل هذا وتبين أجنبي ووسيم وغني وحنون قومي انقلعي بس خليني أكمل نومتي أحسن لي.

************************************************** **
بدر دخل لبيتهم وسلم على امه
ام بدر : يمه بدر وش فيك لك كم يوم وانت متغير حتى الأكل ما تأكل مثل الناس شف نفسك ضعفت
بدر آه يمه لو تدرين باللي في قلبي كان ما سألتي هالسؤال : لا يمه ما فيني شي بس السكر هاليومين يرتفع علي
أم بدر : يا وليدي لاتضيق صدرك ترى الزم ما على الانسان صحته
بدر يبي يغير السالفه : الا وين مشاري هالايام ما ينشاف
أم بدر : والله مشغول مع أصايل يخلصون أغراض عرسهم
بدر وده يسأل ومتردد وفي الاخير سأل السؤال اللي من شهر وهو يبي يسأله : وأصايل ما عندها خوات يروحون معها السوق
أم بدر : ما عندها الا أخت وحده أصغر منها
بدر : وهالاخت وش كبرها ؟
أم بدر : العنود توها أول سنه في الجامعه ماشاء الله عليهم بنات السامي ما فيهم كلام
بدر في نفسه تعلميني فيهم خصوصاً العنود وتذكر: صح وشلون ما انتبهت لأسمها هي كانت تقول ما اكون عنيده وتذكر كلامها وقام يضحك
أم بدر : هاو وش فيك تضحك؟
بدر ارتبك : هاه. لا بس أضحك على مشاري اللي من الحين حرمته تمشيه على كيفها
أم بدر : دامه مبسوط بكيفه
بدر : أنا بأروح لغرفتي يمه توصين على شي
امه : لا ياعين امك ما أقول الا الله يسعدك وين ما رحت




********************************

بعد يومين - بيت محمد السامي ابو فيصل- نزلت منى وهي لابسه بتطلع
أم فيصل : خير وين بتروحين
منى : نسيتي يمه ان نجد بنت الجيران عازمتني
أم فيصل : ايه تذكرت بس لا تروحين لحالك خذي اختك معك
منى : اخذها وش اسوي فيها
أم فيصل: أنتي ما تستحين على وجهك الناس وش بيقولون عنا يخلون بنتهم تطلع لحالها
منى: وانا وين بأروح بيت الجيران
أم فيصل : ولو وش يفكنا من حكي الناس
منى: يا الله وحنا وش علينا من الناس خلهم يحكون لين مايملون الى متى وحنا نخاف منهم
ام فيصل : لا تطولين السالفه تبين تروحين خذيها معك والا انطقي بالبيت
منى بعصبيه: خلاص بأقولها تنزل
دخلت منى لبيت جيرانهم وكان في استقبالها بنات الجيران وهم نجد كبر منى ودانه اصغر منهم بسنه و ربى اللي كبر اروى
نجد :يا حي الله من جانا تو ما نور البيت
منى : منور بأهله
نجد :وش فيك تأخرتي
منى :ابد ولاشي بس تعرفين لازم عاد اتزين شوي تبني اجي بكشرتي
نجد: مايحتاج تتزينين قمر ماشاء الله
منى: داريه ما احتاج شهادتك
نجد: مالت عليك يالشيفه صدقتي قاعده اجاملك
منى : عن البربره بس وين بسام؟
نجد : وش تبين به؟
منى : جايبه له حلاو
أروى : وأنا بعد جايبه له
ربى : ورى ما تأخذونه يعيش عندكم وتفكونا منه
نجد : يالكلبه كل هذا غيره منه ما تبينه
منى : عاد فيه احد ما يحب بسام , يالبى قلبه بس ,فديت سنونه المكسره
دانه : امس طاح واحد من أسنانه وأزعج العالم ما بقى احد ما علمه حتى بغى يجيك البيت علشان يقولك
منى : يا حبي له وينه؟
نجد :رايح مع أمي لبيت خالتي
منى : خساره عالعموم امسكي وطلعت كيس من شنطتها كله شوكلاته ,عطيه إياه إذا جاء
دانه : هذا إذا بقي منه شي
منى : لا عاد ياويلك أن كلتي منه شي تراه امانه
نجد : خلاص طيب
بسام الولد الثاني في عايلة أبو راكان وجاء بعد ثلاث بنات وهو آخر العنقود
دانه: ربى خذي اروى ويالله على غرفتك
ربى: وليش ان شاء الله, ما تبونا نجلس معكم؟
نجد: لا ما نبيكم عندنا سوالف ما تصلح لكم
ربى: بنقعد شوي بعدين بنروح فوق
دانه اللي اذا عصبت تكلمت بلهجتها القصيميه: ربيه انزلعي الحين والا دبغتس فيذا
ربى: طيب خلاص
منى: يالله ,والله اني احب لهجتكم ليش ما تتكلمون فيها دايم
نجد: عادي حنا نتكلم بلهجة نجد علشان امي بس لهجة القصمان واضحه مره في كلامنا
منى: لا ابيكم تتكلمون قصيمي بحت
دانه: اقول خوذي قصيمي وخليه يحتسي عليتس لين يسندر لتس دمجتس
منى :الله يسمع منك
**************************************

أصايل ومشاري في السوق
أصايل : خلاص مشاري تأخرنا خلنا نرجع للبيت
مشاري : لا تو الناس بعدين تبيني أرجعك للبيت وأنتي ماتعشيتي وش بيقولون عني أهلك خلنا نطلع نتعشى أول
أصايل : لا ياشيخ أقول لاتصرف ترى أبوي متوعدك
مشاري : لا يمه خوفتيني بأبوك
أصايل : إذا هاوشك لاتقعد تتشكى
مشاري : أعلى ما في خيله يركبه
أصايل : أقول مشاري ترى عطيتك وجه ناسي انك تتكلم عن أبوي
مشاري : والله أبوك نشبه ما يخلي الواحد يرتاح مع زوجته
أصايل : أقول لا يكثر ورجعني للبيت بس
مشاري : ما فيه رجعه للبيت لين ما نتعشى ورن جوال مشاري وناظره وهو مكشر
أصايل : من اللي يدق
مشاري وهو يفتح جواله : الهيئه أقصد أبوك
أبو أصايل سمعه وقعد يضحك
مشاري : سم ياخال
أبوأصايل : الحين أنا الهيئه ياللي ما تستحي
مشاري : أوف من وين سمعتني
أبو أصايل : أذكر ربك لا تنضلني
مشاري : ما شاء الله
أبو أصايل : وين بنتي
مشاري : ما صارت بنت الله يهديك يا خالياللي يسمعك يقول تسئل عن أمك وتبيها تجي ترضعك
أبو اصايل طبعه يحب المزح ومشاري مثله ويحبون يتناقرون
أصايل تناظر مشاري وهي تضحك
أبو أصايل : لا يالخسيس هذا وأنا خالك تقول عني كذا
مشاري : كله منك كل طلعه تدق خمسين مره لا وتزيد في العطل الرسميه وتوصل للمية مكالمه
أبو أصايل : دام هذا كلامك هونا عن العرس رجع بنتنا وطس ما نبيك
مشاري : آفا يا خالي هذا وأنا ناوي أخطب لك
أبو أصايل : لا دام هذا كلامك , فأنا مسامحك تبي تأخذ حرمتك للبيت خذها
مشاري : من جدك
أبو أصايل : الحمدلله والشكر أقول اخلصوا بس كل هذا في السوق ترى عطيتكم وجه
مشاري : خالي أصايل من العصر وهي تقول جوعانه بوديها أعشيها بعدين نرجع
أصايل : نصااااااااااااااااااااااا ب
أبو أصايل : لاتكذب أعرف بنتي زين قل نبي نتعشى ولا تتبلى على هالضعيفه
مشاري : وش أسوي ياخالي أنت عسر
أبو أصايل : خلاص روحوا تعشوا بعدين تعالوا ولاتطولون
مشاري : على أمرك يا خالي والله أني احبك
أبوأصايل : يانصبك مير, أقول جب لنا عشى وأنت جاي ترى ما بعد تعشينا
مشاري : وأنت ما تسوي شي لوجه الله
أبو أصايل : هاه ترى بأهون
مشاري : لا خلاص بأجيب لك اللي تبي

********************************
منى : هاه دانه وش سجلتي
دانه :قسم تغذيه بكلية الاقتصاد
منى : كان سجلتي عندنا
دانه: عاد انا اذاجيت لجامعتكم على بالك بشوفك بصير بفرع الملز وانتي بعليشه بعدين انا ابي اصير مع صديقاتي
منى : الله يوفقك
نجد:مالت عليك يا دانه اثرك تبين تدرسين مع صديقاتك موب حبآ بالتغذيه
دانه:مالك دخل
نجد: وان علمت راكان
منى :وهو وش دخله
دانه: مسوي يعرف مصلحتي كل شوي يسألني وش بتستفيدين من التغذيه ونجد يوم حولت للفنيه ما قال شي؟
نجد : وهو صادق الفنيه احسن على الأقل أرسم لوحات انجز شي
منى: حتى التغذيه مره حلو اصايل بنت عمي داخلته وصارت احسن طباخه في العايله بس انها عجازه ما تطبخ الا مره في السنه وفي المناسبات
دانه: اقوله لهم بس مايفهمون
نجد: والله ماحنا محتاجين احد يطبخ لنا الطباخه موجوده
دانه: ومن قال اني بطبخ لك انتي وجهك انا بتعلم علشان اذا اعرست اطبخ لرجلي
منى :حركات من الحين مستعده
نجد:مالت عليتس انتي واللي بتاخذينوه
دانه: هي احترمي نفستس لاتغلطين لا اقوم اغولن فيذا
منى: مالت عليكم انتو ماتتكلمون قصيمي الا اذا تهاوشتوا
دانه: وش رايتس اعلمتس بعض الكلمات
منى:ياليت
دانه: بشرط
منى :وشو؟
دانه تعلميني وشلون ارقص مصري
منى : من زين رقصي عاد
دانه : حرام عليك تنافسين فيفي عبدو حزات أشك بأصولك أقول يمكن بها عرق مصاريه
منى بتفكير : تهقين المستشفى غلطانين
نجد : تخيلي منو ويصير أبوك آسطه وامك رئاصه والا بياعة خضره
منى : لا عاد ليش آسطه ليش ما يصير عمده والا باشا مستحقرته بعد يمكن يصير بش مهندس والا مديرقامعه
دانه : أخلصي علينا يا بنت الباشا بتعلميني والا وشلون
منى: ok
دانه: اجل بروح اجيب الاستريو
منى : الحين
نجد: ايه وش ورانا خلنا ننبسط
جابت دانه الاستريو وشبكته وشغلت اغنيه مصريه وطولت عليه وعطت منى ربطه علشان تربط خصرها
منى :عاد ارقصوا معي
دانه: انتي اول بعدين حنا
منى ربطت خصرها وقامت ترقص هي كانت تعرف ترقص مصري كان عندهم سواق مصري وزوجته ساكنه معه وكانت تعلم منى اذا كانت فاضيه
راكان دخل للبيت وسمع صوت الاغاني: عمى وش ذا الازعاج وقام ينادي: نجد دانه ومحد رد عليه
راكان ماتوقع ان عندهم ضيوف متعود ان خواته كل ما طفشوا شغلوا الاستريو وقاموا يرقصون راح للمجلس وشاف المنظر
نجد ودانه جالسين يصفقون ووحده رابطه خصرها ومعطيته ظهرها وقاعده ترقص منى كانت لابسه تنوره بنيه ضيقه لنص الساق وقميص بني ضيق كمه طويل فاتحه الازرار اللي فوق وحاطه ايشارب مشجر بني وفيروزي داخل القميص وحاطه على القميص بروش فيروزي واكسسوارها فيروزي وشعرها لونه بني فاكته ناعم وطويل لنص ظهرها
راكان واقف ومستغرب التفتت منى وهي ترقص وكانت تضحك
راكان تفاجأ من وجه البنت كانت مملوحه ملامحها صغيره وغمازاتها واضحه وضحكتها حلوه وكانت نحيفه وطولها متوسط
منى ما انتبهت للي واقف يراقبها رفعت راسها وهي تضحك وتجمدت ضحكتها
كان طويل ونحيف ابيض وله سكسوكه عيونه واسعه وسود وخشمه طويل يشبه لدانه بس ملامحه اكثر خشونه ,منى راحت وتخبت في الجهه الثانيه ورى الباب, راكان رجع للصاله ووقف وهو مو مستوعب اللي صار
دانه ونجد وش فيك منى
منى : ما ادري تو واحد مر من هنا
دانه: غريبه ابوي وراكان طالعين
نجد: خلني اشوف يمكن احد منهم رجع
طلعت نجد ولقت راكان واقف في الصاله
نجد: انت اللي مريت من هنا
راكان: ايه ما دريت ناديتكم وما رديتوا
نجد: ما سمعناك
راكان: وين بتسمعوني معه وانتوا قاعدين تردحون
نجد: يا اخي عطله بنوسع صدورنا
راكان: وسعوا صدوركم بس لا تزعجونا
نجد :ان شاء الله بس وش عندك راجع مبكر
راكان: بأغير ملابسي وبأطلع
نجد: زاد مو من عادتك تجي بدري ,
راكان: لا يكثر بس ومشى بعدين وقف وسئل : الا من اللي عندكم؟
نجد: منى بنت جيرانا السامي
راكان: ايه تعذري لي منها طلعت بوجهها
نجد بصدمه: شفتها
راكان شفتها وبس : لالا بس وانا مار لمحت وحده واقفه بس مدري وش شكلها
نجد: اشوى
راح راكان لغرفته ونجد راحت للمجلس
نجد: هذا اخوي راكان مر وهو ما يدري انك هنا بس لاتخافين ما شافك
منى ايه هين صفقيني الا تلقينه قزني قز: ما عليه انا بأمشي الحين ياليت تنادين اروى يا دانه
دانه : بدري تو الناس
نجد: تونا ما بعد سولفنا
منى: لا الناس طلعوا من صلاة العشاء من زمان بعدين امي بتعصب وما راح تخليني اجيكم مره ثانيه
دانه: خلاص اجل بروح انادي اروى
طلعت منى واروى وبنات جيرانهم برى وقامت تلبس عبايتها عند الباب وما تدري عن اللي واقف يراقبها من شباك غرفته
وصلت منى لبيتهم اللي مقابل بيت ابو راكان وطلعت مفاتيحها من شنطتها وفتحت الباب ودخلت اروى بسرعه , منى حست بشي خلاها ترفع راسها قبل لاتسكر الباب وشافته واقف عند الدريشه ويناظرها وهو عرف انها شافته ارتبكت من اللي قاعد يصير معها وصكت الباب بقوه
راكان: الله يحفظك وسكر الدريشه

******************************
سافر سعود السامي وولده عبد العزيز ابو سلطان وعياله لولدهم سلطان وفي المطار كان سلطان في استقبالهم:
سلطان: الحمدلله على السلامه والله لو اني داري كان جيتكم انا ولا خليتكم تتعنون
ابو عبد العزيز: وش نسوي بك عجزنا وحنا نقولك ارجع بس انت معاند
سلطان: بس ما قلتوا انكم بتجون ان ما جيت
ابو سلطان: عاد حنا مانقدر نقعد سنتين بدون ما نشوفك يا الغالي
سلطان يناظر ابوه وهو مستغرب: الله يحيكم
فهد: هلا بالغالي ويالله فرصه علشان اقدم اوراقي انا ونواف ولد عمي
سلطان: ليش انتوا عزمتوا تدرسون هنا
ابو عبد العزيز : ايه نبي نقدم اوراقهم وان شاء الله ينقبلون نبيهم معك علشان تنتبه لهم هذولا توهم صغار
فهد : وش دعوه يبه شايفنا بزران هذا سلطان اول ماتخرج من الثانوي ارسلتوه يدرس لحاله
ابو سلطان: عاد انت ونواف مثل سلطان سلطان عاقل وماعنده خرابيط مثلكم
سلطان بلاكم ما تدرون وش اللي صار والا كان كلامكم تغير
ناصر : مسكين فهود لقط وجهك يالبزر حاطين لك وصي
فهد: انطم انت ووجهك بنشوف بعد سنتين اذا تخرجت وش بيحطون لك اهلي هذا اذا خلوك تسافر
ناصر: هاهاها اصلا انا بخلص ثانوي وبشتغل مع ابوي ما ابي ادرس جامعه
ريم : والله انك صادق وانا بعد مثلك تروح اعمارنا وحنا ندرس
ابو سلطان :انطم بس انت واختك ما بقى الاهي
ابو عبد العزيز: لا تغصبه على الدراسه دامه بيشتغل معك موب قاعد عاطل خله على راحته
ام سلطان: اقول هو خله يخلص دراسته ويصير خير ترى ملينا وحنا واقفين
سلطان: يلا خلنا نمشي
راح سلطان واهله اللي سكنوا معه في شقته سلطان كان مستغرب جية اهله وتعاملهم معه وخصوصآ ابوه وحس انه صار قريب منه اكثر من الاول اما علاقته في امه على حالها واخوانه يعاملونه على انه هو الكبير ويحترمونه
خلص الصيف وعايلة ابو سلطان رجعوا للرياض فهد ونواف انقبلوا في الجامعه وسكنوا مع سلطان اللي تضايق اول شي بعدين تعود على الوضع
سلطان خلص اوراق اخوه وولد عمه وحاول ينزل كل المواد اللي باقيه له في فصل واحد بس ما قدر لانها كثيره واضطر انه يخلص الباقي له في سنه بدال السنتين ومتعب كذلك
بدى الفصل وصارت الشله تجتمع في مكانها المعتاد بس سلطان ماكان يروح مو متقبل انه يجلس في نفس المكان وفيونا مو موجوده
ومره كان طالع من المكتبه وقابلته الشله هناك وماخلوه يروح بدون ما يتغدون مع بعض
راشد: اش بلاك سلطان ماعاد نشوفك مثل قبل
سلطان: والله انا نزلت كل المواد اللي باقيه لي هالسنه
ياسر: وليش عاد وش مستعجل عليه
سلطان: ابد بس مليت وودي ارجع للرياض
ميرفت: ايه بس ماكان حكيك هيك بالاول
سلطان:ايه بس الواحد يطفش ويشتاق لاهله
فاطمه: هاللحين احنا اتفقنا نمدد سنه وما نضغط اعمارنا بالدراسه نبي نيب تقادير ومعدلات زينه
متعب: وتبونا نقعد سنتين زود لا والله بنشيب وحنا ندرس
ميرفت : الا على فكره شفت فيونا بالصيف
سلطان تفاجأ وتغير وجهه: وين شفتيها
ميرفت :بالمطار كانت مسافره هي وحمدان الشب الاماراتي اللي كان يدرس هون
سلطان حس بقلبه يتقطع انا يا فيونا تخليني علشان هذا المغرور
ميرفت: ليش انت ما بتعرف
سلطان وهو يحاول يتماسك: الا قالت لي
ميرفت: بس كنا شايفين الامور بينكم منيحه كتير حتى فكرنا انكم راح تتجوزوا
سلطان اللي معصب على ميرفت لانها تحشر عمرها في كل شي : اجل يبي لك نظاره علشان تشوفين الامور زين
متعب اللي حس ان سلطان وفيونا بيتهاوشون
اصلآ سلطان خطيبته تنتظره في الرياض من اول ما خلص البكالوريوس وهو خاطب
الشباب: صحيح سلطان
سلطان: ايه
سليمان: وليش ما قلت لنا
سلطان : ماجت مناسبه
ياسر: ومن هي بنته
سلطان : وحده من بنات العم
فاطمه : شسمها
سلطان وهو يحس بغصه :هناء
مناير: واي اكيد حلوه على اسم امي
سليمان : الله يعينك عليها ياسلطان اذا كانت مثل عمتي
مناير بعصبيه: اشقصدك؟
سليمان: الله يعينه على جمالها
مناير: حسبالي بعد
بعد ماطلع سلطان ومتعب: مشكور يامتعب على اللي سويته
متعب: ماسويت شي بس انت خف شوي على ميرفت
سلطان: ياخي هالبنت ملقوفه ولسانها طويل
متعب:معذوره تحبك
سلطان: عاد انا فيني شي ينحب
متعب: ليش انت وش قاصرك
سلطان: كل شي ويلا بلا بربره مالها سنع تأخرت على فهد ونواف
******************************************
يزيد: هلا راكان وينك تأخرت؟
راكان : يلا أنا عند الباب
دخل راكان الاستراحة ويزيد ينتظره
راكان : محد جاء من الشباب ؟
يزيد : لا اليوم شكلهم موب جايين
راكان: وليش؟ وش عندهم؟
راكان: ابد كل واحد يقول مشغول اللي يقول معزوم واللي مسافر واللي عنده دورية العايله واللي يجهز لعرسه
راكان:الله يعينهم
يزيد:والله عقبالنا
راكان: وش مستعجل عليه
يزيد: ليش أنت ما ودك تتزوج
راكان: والله المشكلة موفي الزواج نفسه المشكلة في الحرمة
يزيد:والله الحريم وش كثرهم أكثر من الهم على القلب
راكان: وإذا ما في القلب إلا وحده
يزيد: هي هي وش السالفة راكان وش عندك تحب من وراي
راكان ارتبك: لا موقصدي أني أحب أقول لو فرضنا يعني
يزيد: حبيبي أنت تكلمت وخلصنا يلا قل السالفة على الأقل نتسلى شوي
راكان: خير ما عندك سالفة إلا أنا علشان تتسلى فيني
يزيد: يا أخي تكلم عاد
راكان:والله ماهنا ذيك السالفة اللي تنقال هذي وحده من بنات الجيران شفتها عند خواتي بالبيت
يزيد: وشلون شفتها
راكان: دخلت المجلس وأنا ما ادري أنها فيه وشفتها قاعدة ترقص مع خواتي
يزيد: وبعدين
راكان: ولا شي بس هذي كل السالفة
يزيد: وأنت حبيتها
راكان : إيه
يزيد : شفتها مره وحده وعلى طول حبيتها الله يخلف على امن جابتك
راكان: وش فيها والله ان عينها يوم طاحت بعيني مدري وش صار لي حسيت بشي غريب
يزيد: وبعدين وش بتسوي
راكان: مدري والله
يزيد: طيب قل لأهلك يخطبونها لك
راكان: توني على الزواج باقي لي سنتين علشان اخلص الماجستير حتى هي توها صغيره
يزيد: كم عمرها
راكان: 20
يزيد: 20 كبيره ميب صغيره
راكان: بس ما ودي استعجل أخاف يردوني
يزيد: ويمكن البنت تروح من بين يديك وأنت واقف تتفرج يا أخي دامك تبيها توكل على الله واخطبها
راكان: يصيرخير
******************************************

الجزء الرابع

سجلت سارة ومشاعل ومنال في الجامعة بس كل وحده قسم سارة إدارة عامه ومشاعل علم اجتماع ومنال علم نفس وبدت الدراسة والبنات لهم شهر يداومون سارة تعرفت على بنت اسمها نهى متزوجة وعندها بنت بس طيبه مره, نهى اكبر من سارة بأربع سنوات بس انقطعت عن الدراسة كم سنه علشان ظروف شغل زوجها اللي كان في انتداب لثلاث سنوات برى الرياض واليوم نهى ما داومت لان بنتها عندها موعد في المستشفى حضرت سارة المحاضرة لحالها بعدين طلعت وجلست على الكراسي جنب المبنى تنتظر مشاعل ومنال
جت بنت ووقفت عند سارة
البنت: ممكن اجلس على الكرسي
سارة طبعها تحب المزح : لا موب ممكن
البنت تغير وجهها واستحت : آسفه على الأزعاج
ساره والله أني خبله علبالي الناس كلهم خبلان مثلي : تعالي تعالي والله مو قصدي بس محاكيتك دمها ثقيل ومسويه تمزح
البنت : لا خلاص أجلس مكان ثاني
ساره قامت ومسكتها مع يدها ونست انها تكلم وحده غريبه : لا والله علي الطلاق ما تجلسين الا هنا
البنت طارت عيونها في ساره وتحاكي نفسها الحمد لله والشكر طبيعيه ذي
ساره صدق اني حماره بأكحلها أقوم أعميها وش بتقول البنت عني محششه. حسبي الله عليك ياشعيله أنتي اللي علمتيني هالكلمه : معليش آسفه بس هالكلمه عودتني عليها وحده من البنات وعاد حنا علقنا عليها بدال هالحلوف اللي نكفر عنها كل شوي الله يتوب علينا بس , تفضلي حياك
جلست البنت وسارة طلعت كتابها وقامت تحدد النقاط الاساسيه اللي قالتها الدكتورة
البنت :أنتي تدرسين هالماده عند أي دكتورة
سارة: عند الدكتورة عايده عبد الله
البنت: أنا بعد ادرسها عند نفس الدكتورة
سارة: أنتي وش تخصصك
البنت: إدارة عامه
سارة: المستوى الأول؟
البنت: إيه
سارة لاتقولين توك مخلصه هالماده قبل ربع ساعة
البنت : وش دراك
سارة: معناها ان أنا وأنتي في نفس الشعبة بس أول مره أشوفك
البنت: إيه أنا ما أداوم دايم أحس أني مابعد تعودت على الجامعة وكنت ناويه أوقف دراسة هالفصل بس اخوي معارض
سارة: توك يمديك تتعودين حرام تضيعين فصل على الفاضي
البنت: ما ادري أحس مليت إذا جيت الجامعة يضيق صدري أول أسبوع كنت اجلس مع بنت عمي بعدين الحين صرت استحي كل يوم أذب عمري عليها هي وصديقاتها
سارة: طيب وين صديقاتك؟
البنت : ما تعرفت على بنات
سارة : وصديقاتك أيام الثانوي وينهم
البنت بحياء: في الثانوي صديقتي بنت عمي اللي اصغر مني بسنه وما عندي غيرها لأني بطبعي مو اجتماعيه
سارة : ماشاء الله عليك من قال انك موب اجتماعيه بالعكس أنتي اللي بديتي معي بالسوالف
البنت: يمكن علشان شكلك طيبه انشرح قلبي لك
سارة: تسلمين ياعمري على العموم أنا اسمي سارة محمد الهيام ويشرفني تكونين صديقتي
البنت: وأنا اسمي ريم عبد العزيز السامي
سارة تفاجأت بالاسم لان عايلة السامي عايله معروفه وغنية مره وما توقعت ان بنت هالتجار بتكون متواضعة وطيبه وتدرس معها توقعت ان بنات العز دايم يدرسون برى وفي أحسن الجامعات بعد
سارة: الحين بيجون صديقاتي من أيام الابتدائي وحنا مع بعض وبأعرفك عليهم وان شاء الله تحبينهم
ريم : إن شاء الله هم معنا في نفس القسم
سارة : لا مشاعل اللي علمتني هالكلمه علم اجتماع ومنال علم نفس ونهى معنا بنفس القسم تعرفت عليها هنا في الجامعة بس اليوم ماجت
جت مشاعل وهي متضايقة: السلام عليكم
سارة وريم: وعليكم السلام
سارة: خير وش فيك ماده الكشره عسى ماشر
مشاعل: يا أختي هالدكتوره ذبحتنا بالبحوث تونا مستجدات وكارفتنا كرف
سارة: بس هذا اللي مزعلك وش بحثك عنه
قالت مشاعل لسارة موضوع البحث سارة مسكت الجوال واتصلت على منال وفتحت السبيكر لأنها مشغوله بالتخطيط وبدون مقدمات: هلا منال إلى الحين أنتي في المكتبة
منال: إيه شوي واجيكم
سارة: استني شوي دوري الله يعافيك كتب عن هالموضوع وعطتها اسم بحث مشاعل وإذا قدرتي تستعيرين الكتب استعيريها وإلا صوريها OK
منال: وأنا أشتغل عند أبوك
ساره : وليش ما تشتغلين عند أبوي أصلاً لك الشرف تصيرين خدامه له
منال : تهبين ما بقى الا هي . بس والله أبوك يهبل على انه كبير بس ماشاء الله شباب
ساره : لا يالكلبه حاطه عينك على ابوي صدق ما عاد في الدنيا خير
منال : ما عاد في الدنيا خير علشاني بأعرس على أبوك عادي خليك متفتحه شوي خلهم يكتبون عنك في جريدة الرياض تخيلي الخبر في الصفحه الاخيره فتاة تزوج أباها من صديقتها
ساره : لا أنا أحب جريدة الجزيره الصفحه الرياضيه عندهم أحسن
منال : لا يا الخبله الخبر يحطونه في المحليات موب في الصفحه الرياضيه
ساره : والله عاد كيفي خبري يحطونه في الصفحه اللي أبي لاو يرزون صورتي بعد جنب صورة رئيس الهلال
مشاعل : ورى ما يحطونك بين اللاعبين وهم واقفين مع بعض
ساره : أي والله فكره بين محمد الدعيع وسامي الجابر
منال : وعادي تطلع صورتك في الجريده
ساره : أيه عادي متغطيه
منال : أجل وش له يرزون الصوره
ساره : أبي اطلع في الجريده جيزي جيز اللي يطلعون فيها لاو على غير سنع على الاقل انا مسويه شي
ريم ماسكه نفسها علشان ما تضحك
مشاعل : يا والله المهسترات ’ خلاص فشلتونا
ساره : المهم جيبي الكتب اللي قلت
منال: OK
سارة : باي
منال: بايات
مشاعل: مستعجله على مغثتي يوم انك تطلبين الكتب من الحين
سارة: مالت عليك هذا جزاي ناويه أسوي البحث عنك
مشاعل : جد والله
ساره : أيه ولو انك ما تستاهلين المهم أنا هالاسبوع فاضيه ماعندي شي أنتي متى تبينه
مشاعل: بعد أسبوعين
سارة : حلو يمديني اخلص البحث وأطبعه عاد أنتي تعرفيني بطيئة في الطباعة
ريم اللي أعجبتها علاقة سارة بصديقاتها وحبت أنها تساعد:خلاص سارة أنتي خلصي البحث واكتبيه في مسوده وأنا أطبعه أنا سريعة في الطباعة
مشاعل: لا الله يعافيكم يا خزياه انتوا وراكم دراسة
سارة: أقول شعيله ترى الحياء ما يناسبك اصلآ أنا داريه انك بتتشققين من الوناسه لأننا بنخلص البحث عنك
مشاعل: اعوذ بالله دايم تفشليني
جت منال بعد ربع ساعه وهي تركض ومعها الكتب : أوف تعبت وأنا امشي المفروض يقربون المكتبة شوي وعطت سارة الكتب :هاك بس وش سالفة هالكتب
سارة قالت لمنال سالفة بحث مشاعل
ريم شهقت: يالله نسيت أسألك يا مشاعل عن بحثي جبتيه
مشاعل طلعت ملف فيه أوراق: هاك مالت عليك توك تسألين عن بحثك يالداجه قبل التسليم بساعة امحق طالبه صدق وجهك موب وجه دراسة حدك البيت والمطبخ
منال: ضفي وجهك بس, على الأقل انا البيت والمطبخ انتي حدك الحوش ودورات المياه ويخبون عليك أنتي وخشتك
مشاعل : لا عيوني أنا علي غسيل الملابس والكوي
منال : عاد حنا صاحين علشان نعطيك هدومنا ما فيه امسكي الحمامات ونظفيها
مشاعل : لاتكفين منول والله العظيم اعرف أغسل زين
سارة: الحمدلله والشكر اللي يسمعكم يصدق أنكم ساكنين في بيت واحد والا انكم تشتغلون في بيوتكم
مشاعل : الله يقطعها ذكرتني بأيامنا إذا طست الخدامه
منال : أصلاً حنا متفقين نعرس على رجل وأحد ومن هاللحين نقسم الشغل
ساره : لا يالخونه وانا وين رحت ليش كاشتين فيني ترى الشرع محلل أربع
مشاعل : لاخلاص مالك مكان قسمنا الشغل
ساره : لا عيوني انا الثالثه وبيأخذني فوق روسكم ودامكم قسمتوا الشغل فأنا شغلتي الأشراف عليكم
مشاعل ومنال يناظرونها بعصبيه
مشاعل : وش حضرتك عمتي حنا نكرف وأنتي لا على رأسك ريشه
ساره : لا أنا أم العيال
منال : وش قالوا لك وحنا ما نجيب عيال
ساره : يمكن
مشاعل : لا عيوني أنا بأجيب عشر أولاد وعشر بنات
منال : لا أنتي جيبي خمسه خمسه وأنا بجيب العشره الثانيه النص بالنص
مشاعل : ما أبي أنا ابغى أجيب عشرين
منال : احسن علشان يطفش منك ومن كرشتك ويفضى لي الجو
مشاعل بتفكير : تهقون؟
ساره : الحمدلله والشكرأقول مالت عليكم فشلتونا عند البنت أول مره تجلس معنا وانتوا قاعدين تتناقرون
مشاعل : والله انتي اللي فشلتينا حتى ما عرفتينا عليها
ريم كانت مبسوطة لأنها دايم تتمنى يكون لها صديقات تمون عليهم زي سارة وصديقاتها
ساره : ريم ما يحتاج أعرفك عليهم أكيد عرفتيهم, وتكلم مشاعل ومنال: وانتي وإياها هذي ريم صديقتي بالقسم و يلا يا ريم عندنا محاضره قومي توم وجيري موب نافعينا
مشاعل: ترفقي على عمرك يا ترم ترم
ساره : الله يفشلك لنا عشر سنين صديقات ولين الحين ما حفظتي اسمي
مشاعل : اسمك صعب
ساره بدلع : بينك بانثر , يازينه هالاسم فيه رومانسيه
منال : الله يخلف عليكم بس
راحت ريم وسارة للقاعة ولقوا الدكتورة منزله اعتذار عن المحاضرة
ريم: خلينا نروح لصديقاتك
سارة: الحين كلهم عندهم محاضرات
ريم: والله صديقاتك فله يوسعون الصدر الله يديم هالصداقه بينكم
سارة : قولي الله يديمها بينا أنتي الحين صرتي وحده مننا بس بتصيرين لازقه فيني مثل الصمغ لان قسمنا واحد
ريم: آفا شكلك مليتي مني من الحين
سارة: امزح معك يا البتيكس
ريم: أخاف صديقاتك مايرضون أني أصير منكم
سارة: لا لاتخافين بيحبونك ويمكن أكثر مني بعد دامك سريعة في الطباعة فما عليك خوف أنتي ثروة عظيمه لازم نستفيد منك تصدقين انك بتكونين أغلى من براميل البترول بالنسبة لهم
ريم: زين يا أم لسان نشوف
************************************************

يوم الاربعاء زواج أصايل ومشاري :

العنود كانت لابسه فستان أحمر حرير وفيه تركيبات كريستال وشعرها رافعه جزء منه ومخليه الباقي مفكوك وشكلها طالع خيال , منى لابسه فستان أخضر عشبي دانتيل مع تفتا ورافعه شعرها ومنزله خصل على وجهها, وريم لابسه فستان تركواز مع ذهبي وحاطه شعرها كيرلي, وهيفاء لابسه فستان سكري قصير دانتيل مع حرير ومخليه شعرها سايح وحاطه فوق أذنها ورده حمراء
أصايل شكلها ناعم لأنها طويله وجسمها حلو و فستانها ضيق من فوق ومن عند الركبه يبدى يتوسع و طرحتها خليجيه طويله وكلها شك دخلت عليها العنود : هاه أصايل خلصتي ؟
أصايل : لا شوي
جت ريم وهيفاء ريم : والله يا أصايل طالعه قمر ماشاء الله الله لا يضرك بس
أصايل : عقبالك
منى اللي توها داخله : وانا بعد
ريم : جت جت الخايسه درينا أنك سعوديه أنتي وهالعلم اللي لابسته
منى : من زينك أنتي وأسلاك التليفون اللي على رأسك
العنود أساساً نفسيتها تعبانه واليوم معصبه بزياده علشان أصايل بتروح وتخليها : بس عاد كأنكم بزران
ريم ومنى يستهبلون : ريم : أقول منو وش كنها مع هالفستان الاحمر
منى : تفاحه ريم : لا وأنتي الصادقه هالمعصقله كنها كت كات أبو عودين
منى : هههههههههههههه حلوه
هيفاء : بس خلاص استحوا على وجيهكم
العنود : يلا يالبزران خلونا ننزل تحت وطلعوا من الغرفه
ريم : عنود وش فيك ما أنتي طبيعيه
العنود وهي ماسكه نفسها : وحده بتتزوج اختها الوحيده وبتخليها وش ظنك بتكون مشاعرها
ريم : عنوده أدري ان فراق أصايل موب هين بس فيه شي ثاني صح
العنود وهي تناظر فوق علشان ما تنزل دموعها : من عقب ذيك السالفه وأنا نفسيتي دمار
ريم : وحنا متى بنخلص من هالسالفه شوفي عمرك وزنك بالله كم وصل؟
العنود : والله مو بكيفي غصب صوته لين الحين يرن في أذني
منى اللي توها تعرف وش معنى كلمة الحب جت وضمتها : خلاص عنوده ربك يحلها تعوذي من الشيطان وخلينا ننبسط اليوم زواج الغاليه
العنود مسحت دموعها وعدلت مكياجها
ريم تبي تغير الجو : أقول عنوده شكله جني بس يستخف دمه ويسوي لك مقلب
العنود عارفه أن ريم تبي تخوفها بس : كلي تبن بسم الله عليه
هيفاء : اقول خلونا ننزل
نزلوا البنات ورقصوا واستانسوا وعيون الحريم ما طاحت من عليهم خصوصاً العنود اللي كانت تلفت النظر
انزفت أصايل والحريم سلموا عليها ورجعت لغرفة العروس علشان يدخل عليها مشاري دخل مشاري وجلس مع أصايل وقبل لا يطلعون لجناحهم اللي حاجزينه في نفس الفندق سألها : حياتي أرسلتي اغراضك لجناحنا
أصايل : قلت للعنود توصلها بنفسها وترتبها في الجناح
مشاري : تأكدي من رقم الجناح قبل لانطلع فوق لأني من زود السناعه وصيت بدر و مشعل رجل اختي يحجزون لي وكل واحد حجز جناح بأسمه بس مشعل حجز لي جناح العرسان وبدر جناح عادي لأنه ما لقى حجز
أصايل : بسأل العنود واتصلت على اختها تسألها
العنود : لا الجناح اللي حطيت فيه اغراضك جناح عادي
أصايل علمتها بالسالفه
العنود : خلاص يا قلبي روحي لجناحكم وأنا بأجيب أغراضك وأوصلها لجناحك الجديد
سكرت العنود الجوال وراحت تدور عبايتها
ريم : وش السالفه
علمتها العنود بالسالفه وهي مستعجله
ريم : بأجي معك
العنود : الحقيني اجل بأسبقك وطلعت بسرعه ودخلت بهوالفندق وهي مستعجله وخذت مفتاح الجناح وراحت فوق دخلت وصكت الباب بدون ما تقفله وفسخت عبايتها ورمتها على السرير وهي ترتب أغراض أصايل في الشنطه
بدر ما كان يدري عن اللخبطه اللي صارت وسمع عبدالرحمن أخوه وهويقول ان مشعل حجز لمشاري وطلع بدر بسرعه علشان يقول لأخوه وراح للجناح وطق الباب
العنود كالعاده مستعجله فتحت الباب بدون ما تتأكد لأنها عارفه أن ريم وراها وكانت مشغوله بجوالها تبي تدق على أصايل وهي مطمنه رأسها وتدق بالجوال : ريوم أدخلي بسرعه أصايل تنتظر شنطتها رفعت راسها وشافته واقف قدامها طاح الجوال منها بدون ما تحس حست بصدمه هزتها من شعرها لأطرافها لها شهرين وهي تحلم فيه وما تذوق النوم بسبته وفجأه وبدون مقدمات يطلع في وجهها حست أن العالم توقف حولها ومافيه شي مسموع غير أنفاسها ودقات قلبها اللي بتفجر أذنيها من قوة نبضها
بدر جمد في مكانه وهو مومصدق اللي قدامه البنت اللي خذت عقله ومافارقته ولا لحظه لافي صحوه ولامنامه طول الشهرين اللي راحوا واقفه بكل زينتها وجمالها قدامه حس بكل شرايين جسمه تنبض وراسه بينفجر من قوة النبض ريقه نشف و حس أن الاكسجين نقص عنده والدم يمشي في عروقه بسرعه جنونيه
العنود بصدمه وصوت مبحوح : أنت
بدر وهو يبلع ريقه : إيه أنا
العنود من غير وعي : حرام عليك , ليش تسوي فيني كذا؟
بدر بخوف : وش سويت؟
العنود وهي مومصدقه انه واقف قدامها حست انها واقفه مع طيفه اللي ما فارقها من يوم ما شافته : وش سويت لك أنا علشان تعذبني , ليش أشوفك في الليل والنهار ليش؟
بدر وهو مومصدق الكلام اللي يسمعه معقوله تتعذب مثلي : حتى أنتي معذبتني صورتك ما فارقت عيني ولا لحظه ما أحد فينا مرتاح
العنود وهي ما تحس باللي يصير حولها دموعها نزلت بدون مقدمات ما تدري ليش؟ ووشلون؟ كل اللي تتمناه أن العالم يتوقف وهاللحظه تدوم للأبد
بدر بتهور وبدون تفكير : لاتصيحين يالعنود دموعك غاليه يالغاليه
العنود رجعت على ورى وهي خايفه و مومصدقه اللي قاعد يصير ودموعها زادت يوم سمعت اسمها وحست بحلاوته وهو طالع من حلقه
ريم وصلت للجناح وهي تلهث لها ساعه تدور الجناح ومرت قبل شوي وشافت الرجال واقف وراحت تدور ورجعت وهو واقف
ريم: ذا له ساعه وهو واقف خلني اسأله
ريم تكلمت وقطعت أسعد لحظه مرت في حياة بدر والعنود
ريم : لو سمحت اخوي هذا جناح مشاري
بدر اللي حس أن الدنيا انهارت حوله بانتهاء هاللحظه ارتبك وحاول يتكلم : أيه
ريم وقفت وما تدري وش تقول حست بخوف هالرجال اللي قدامها وجهه يقول أن فيه مصيبه صايره
بدر التفت على العنود وبصوت حزين : آسف ما كان قصدي أضايقك
وبعد من عندالباب ومشى لنهاية الممر لين ما اختفى وريم واقفه مستغربه يوم اختفى تقدمت للباب وشافت العنود شبه منهاره والدموع ماليه وجهها
ريم بخوف : عنوده وش فيك يا قلبي ومن ذا الرجال
العنود طاحت في حضن ريم وهي تصيح : ريوم هذا هو
ريم فهمت بسرعه : ما عرفتي من هو
العنود : لا ما عرفت
ريم : وش جابه وش قال
العنود قامت تصيح وما تكلمت
رن جوال العنود اللي كان طايح على الارض وراحت ريم ولقته أصايل وردت
أصايل : عنوده وين شنطتي سنه وانا أنتظرك
ريم : انا ريم العنود في الحمام دقايق وتكون شنطتك عندك
ريم خذت أغراض أصايل واتصلت على الروم سيرفس علشان يوصلونها لجناح أصايل
سكرت ريم ودقت على منى علشان تجي
منى خذت هيفاء معها وراحوا للعنود وريم
منى أول ما دخلت و شافت العنود خافت: وش السالفه؟
ريم قالت لها عن اللي شافته
رن جوال العنود وكانت امها وردت ريم وقالت انهم بيجون
منى : الرسبشن مليان عماني وعيالهم ورجال عماتي جالسين يتفنجلون من زود الرواقه ورجاجيل وش كثرهم تحت ما يسوى هالجناح صار قضيه
ريم : العنود يلا قومي غسلي وجهك وخلينا نروح للقاعه امك مسكينه لحالها ووعد مني اليوم بأروح معك لبيتكم واقعد عندك لين يوم السبت
منى : وأنا بعد
هيفاء : رجلي على رجولكم
قامت العنود وهي تجر عمرها جر علشان امها , دخلت للقاعه وهي حاسه بهموم الدنيا على راسها وبنار تشتعل في قلبها
أم أصايل أول ما شافت بنتها خافت وراحت لها : عنوده وش فيك وأنا امك
ريم تناظرالعنود وهي تقول في نفسها :احمدي ربك يالعنود على الاقل عندك أم تحس فيك
منى : لا يا خالتي ما فيها شي بس تعرفين فراق أصايل صعب
أم أصايل وهي تحاول تتماسك : أي والله من يقوى على فراق أصايل
جت وجود تتليقف : هي أنتوا وش فيكم تصيحون ترانا في عرس موب عزا أجل لوانها ميته وش بتسوون ,الحمد لله والشكر مريضات
ريم وهي معصبه : وجيد انقلعي لا أكسر هالكعب اللي في رجولي على رأسك
وجود : مريضه ما عليك شرهه
منى : وجيد أن ما ذلفتي عن وجيهنا لا تلومين ألا نفسك
وجود راحت وهي مكشره
************************************************** *
ساره جالسه مع ابوها واخوانها خالد وعبدالله في خيمة بيتهم يفصفصون حب ويتقهوون شاهي و يشوفون مباراة الديربي الهلال والنصر دخلت عليهم هند:هاه كم النتيجه
ساره: واحد صفر
هند: لمين؟
ساره: اسمع عبود تسأل لمين؟ اكيد للهلال يالذهينه
هند: ان شاء الله تنهزمون
ساره: نعم نعم ما سمعت
هند: اجل نظفي اذنيك مره ثانيه
ساره:لا اجل احب اعلمك اني سمعت بس من متى ياحظي تشجعين النصر؟ اخبر كان عندك ميول هلاليه
هند: لا والله بس ابي النصر يفوزون علشان احمد يشجعهم
ساره: اقول هنيد ضفي وجهك تسمع خلود تقول اشجع علشان احمد سمعت يبه قليلة الخاتمه وش تقول حنا اربعه ماشجعت علشانا وهالخايس حاطة له قدر وقيمه حتى قبل ما تاخذه
ابوعبدالله وهو يمزح: كبري عقلك يالغاليه ولاتحطين عقلك بعقلها انتي اكبر من خرابيطها.اصلآ لو ادري ان احمد نصراوي كان ما وافقت ازوجه اياه
عبدالله وخالد وساره يضحكون
عبدالله:يلا برى لايجيك اكثر
خالد:ماعليك منها هذي وجهها مغسول بمرق ما تستحي اجل توها ما بعد خذته تقول اشجع علشانه الله يستر من بعدين مدري وش بتسوي
هند:وجهها صاراحمر من الاحراج والعصبيه طلعت بسرعه وبغت تطيح عند الباب
عبدالله: انتبهي لا تتكرفعين علينا ترى الحب موب نافعك اذا انكسرت رجلك
خالد بصوت عالي: سارونه مره ثانيه لا اشوفك قاعده مع هند
ساره باستعباط: ليش فيها مرض معدي وانا مدري
خالد:لا اخاف تخربك وتفتح عيونك على سوالف الحب والزواج
ساره: انت تامر امر
ابو عبدالله: خلاص عاد انكتموا الشوط الثاني بيبدأ خلنا نشوف

*****************************
خلص الزواج والبنات رجعوا مع العنود
وأول ما دخلوا البيت راحوا لغرفة العنود وغيروا ملابسهم وجلسوا يسولفون والعنود ساكته طول الوقت
منى : العنود هاه ما ودك تتكلمين ترى أعصابنا احترقت نبي نعرف وش صار
العنود بدت تقولهم عن اللي صار وبين كل كلمه والثانيه شهقه ودمعه
منى وهي معصبه : عنوده وشلون قدرتي تقولين هالكلام حرام اللي سويتيه ما يجوز
العنود : تكفين منى ترى اللي فيني مكفيني أنا إلى الأن مانيب مستوعبه اللي صار , الله لايعاقبني والله غصب حسيت أني مخدره
ريم : ولو يالعنود اللي صار غلط في غلط على أي أساس توقفين وأنتي طاقه الزين وتكلمينه
العنود : والله ما كان قصدي أنا فاتحه الباب أحسبه أنتي حتى هو سمعني وأنا أقول ادخلي يا ريم
هيفاء : اللوم عليكم اثنيناتكم أنتي طقيتيها حنك وقعدتي تهذرين وهو ما صدق على الله
ريم : صدق ما يستحي
العنود ساكته وما علقت
منى : الا قولي وشلون درى عن أسمك
ريم : هذي سهله هو شافها يوم الملكه وعرف أنها من أهل البيت وأكيد سأل عن أهل أصايل وقالوا مالها الا أخت وحده ومشاري ما شاء الله كل شي يقوله ما يمسك لسانه على قول أصايل
منى : وش دراه انها في الجناح
العنود : شكله ما يدري لأنه تفاجأ يوم شافني
هيفاء : على كل اللي صار ما عرفنا من هو
ريم : لو اني داريه انه هو اللي معذبنا وحنا نسأل عنه كان حجرت له في زاويه وخليته يقول سيرته الذاتيه كامله وغصب ورى خشمه بعد
منى : تسوينها يا رويمه
العنود بتفكير : تهقون يصير مشعل رجل فاتن اخت مشاري
البنات يناظرون بعض وهم ساكتين
ريم : بكره بتجي أصايل تودعنا قبل لا تسافر وأنا اللي بسألها
العنود :والله أول ما شفته ما صدقت حسبت اني احلم وإلى الان أحس أني في حلم
ريم متردده :أقول لكم شي
البنات بحماس : قولي
ريم وهي تناظر العنود : هالرجال شكله يحبك يالعنود
العنود وهي شوي وتجلس في حضن ريم : وش دراك؟
ريم : ما أدري من عيونه وصوته وهو يعتذر لك حتى مشيته والله رحمته تصدقون أول ما شفته حسبت أن مشاري وأصايل صاير بينهم شي وجه فيه حزن غريب
العنود : يوم شفته عند المغاسل كان غير وجهه ينور وجسمه مليان بس الحين شكله ناحف
ريم بتفكير : اقص يدي أن ما كان يحبك
العنود ابتسمت بعدين كشرت : وش الفايده وحنا ما نعرف عنه شي
هيفاء : معقوله واحد يحب له وحده بهالصوره وهو ما شافها الا مره وحده ما تجي عشر دقايق
منى : حكمة الله سبحانه ينزل المحبه في قلب الواحد, حتى الكره فيه ناس من نظره وحده تكشين منهم وما تتقبلينهم
هيفاء : أيه صح في هذي صادقه
ريم : أقول العنود قومي صلي ركعتين وادعي أن الله يغفرلك ترى اللي سويتيه موب سهل
العنود رجعت تصيح
هيفاء : خلاص ريوم اللي فيها كافيها
ريم : رضى رب العالمين أهم من اللي فيها و يمكن هالحاله اللي هي فيها عقاب من رب العالمين

*****************************************

اليوم الثاني جت أصايل علشان تسلم على أهلها قبل لاتسافر
منى : هاه أصايل وش رأيك في العرس حلو
أصايل : ما لي الا كم ساعه وأنتي تسألين
منى وهي تغمز : لا يعني وش رأيك في هالساعات اللي مرت
أصايل وهي منحرجه ومعصبه في نفس الوقت : منوه عيب استحي على وجهك
منى : عادي وش فيها نبي نعرف يمكن العرس حلو خلينا نتلاحق على أعمارنا وندور لنا رجاجيل قبل لا يفوتنا القطار
العنود غمزت لريم علشان تسأل
ريم : أقول أصايل أمس وحنا رايحين نشيل أغراضك من الجناح شفنا واحد من جماعة مشاري في الفندق
أصايل : ما يسوى علينا هالجناح كل العالم دروا عنه
ريم : أيه بس هذا شكله من القريبين لرجلك ما تعرفين من هو أسمر وطويل ووسيم
أصايل : لا والله ما أدري أمس أخوان مشاري ورجال خواته واصدقاه كلهم كانوا في الفندق يمكن واحد منهم
ريم : أسألي مشاري عنه
أصايل بنص عين : ريموه وش السالفه أخبرك تحبين فصيل
ريم : ولين ألحين احبه بس هالأطخم ودي أعرف وش اسمه
أصايل : أقول انطمي بس تبيني أقول لمشاري بنت عمي تقول من هو الوسيم اللي في جماعتكم
منى : ما فيها شي
أصايل : الحمدلله والشكر شكل آثار النوم مأثره على عقولكم لين الحين خلوني أروح أشوف أبوي أبرك لي من مقابل خششكم
وطلعت أصايل من المجلس
العنود بإحباط : هذي اللي شادين بها الظهر
ريم : خلاص عنوده إذا ربك كاتب انك تعرفينه فأكيد بتعرفينه
منى : وريم صادقه خلاص لاتضيقين صدرك
العنود : الله كريم

هل العنود بتعرف من يكون هالرجال الغريب أو أن السالفه بتنتهي عند هالحد ؟ ومنى و راكان كيف بتكون العلاقه بينهم؟

الجزء الخامس
مرت اربعه شهور والفصل الاول من الدراسه على وشك انه ينتهي

ساره و ريم ونهى علاقتهم صارت قويه مع بعض لأنهم دايم مع بعض نفس المحاضرات والبريكات
وقبل إجازة نصف السنة طلعت سارة من الاختبار وجلست في مكانهم اللي يجتمعون فيه نهى : هاه بشري حليتي زين
سارة: الحمد لله أهم شي خلصنا من الامتحانات وانتوا حليتوا زين
نهى : الحمد لله سوينا اللي علينا والباقي على الله
ريم : على قولك أهم شي خلصنا
سارة : إيه قبل لاانسى تفضلوا وطلعت بطاقات دعوه
نهى: زواج هند
سارة: إيه وإذا ما جيتوا بأزعل عليكم
ريم: وليش بطاقتين؟
سارة: كل وحده وأمها
ريم وهي تتطنز: يا حبيلك تبين أمي تفضى لي
سارة: والله أمك بكيفها إذا ما جت جيبي اللي تبين إن شاء الله خدامتكم بس أهم شي أنتي تجين
ريم: إن شاء الله
سارة: وأنتي بعد يا نهى
نهى: إن شاء الله
ريم: منال ومشاعل بيجون
سارة : يقولون إن شاء الله
نهى : الله يوفقها وعقبالكم
سارة: تونا بدري
ريم: الله يسمع منك
ساره : الله يمليك بركة العرس
ريم : آمين

*******************************

زواج هند و أحمد

خالد: سويره يلا قومي أمي تقول إذا ما قمتي بنروح للقاعة ونخليها
سارة: طيب شوي
خالد: ترى بقول لامي تروح وانطقي دوري احد يجي يوديك
سارة: خلاص قمت
خالد: بالله متى نمتي أمس
سارة: الساعة 3
خالد: عمى وش قاعدة تسوين
سارة: قاعده اقرى رواية وما نمت لين ما عرفت المجرم
خالد: مالت عليك أنتي بتصيرين مجرمه والسبه أجاثا كريستي
سارة: إلا قل بصير تحري خاص مثل هيركل بوارو
خالد: أقول اخلصي أهلي ينتظرونك

******************************
في بيت عبد العزيز السامي أبو سلطان:
ريم: يمه لاتنسين اليوم العرس
أم سلطان: روحي لحالك أنا مشغولة
ريم: يمه البنت وأهلها عازمينك فشيله ما تروحين
أم سلطان: عاد هم يعرفوني, أنتي سلميني على أمهم إذا سألت وقولي الوالدة مشغولة
أبو سلطان: وش السالفة
ريم: اليوم زواج أخت صديقتي وعازمتني انا وأمي وملزمه إلا نحضر وإلا بتزعل وأمي ماتبي تروح
أم سلطان: وأنتي صرتي كبيره روحي لحالك
سلطان: ريم مافيه روحه لحالك
ريم: وليش إن شاء الله
سلطان: خلاص ريم عيب تروحين للناس لحالك وش بيقولون عنا مهيتين بنتهم
ريم وهي معصبه: يبه اسمع وش يقول
أبو سلطان: وهو صادق ما يصلح تروحين لحالك
ريم : خلاص بروح انا وهيفاء
سلطان: لا هيفاء اصغر منك خذي وحده كبيره
ريم شوي وتصيح : وأنا وين أجيب لي وحده كبيره منه إذا أمي ماتبي تروح معي يعني أدق على فوزيه مرة عمي عبدالله وألا منيرة مرة عمي فهد علشان يروحون معي
أم سلطان: أوف خلاص بروح معك اشغلتيني

******************************



في القاعة خلصت سارة المكياج ولبست فستانها ودخلت على أهلها: هاه وش رايكم شكلي حلو
كانت لابسه فستان ابيض حرير كت الصدر قصير وكله كريستال وتحته حزام عريض من نفس القماش فيه فيونكه على جنب بعدين من تحت واسع وفيه ذيل قصير شعرها حاطته بف ومستشوره اللي تحت ومكياجها احمر وطالع شكلها حلو وناعم خصوصاً ان ساره بشرتها بيضاء وشعرها أسود وناعم
أم عبد الله: بسم الله عليك يابنيتي الله يحفظك قمر عقبال ما نفرح بعرسك
سارة: أنا مانيب معرسة إلا على اليوت
أم عبد الله: نعم من هو ذا
نجوى: ما عليك منها يمه هذا بطل الفيلم اللي جاء قبل أمس في التلفزيون والمشكلة انه شين
سارة: انطمي عاد من زينك أنتي وجهك ولا تغلطين على زوج المستقبل يازينه بس هو وشقاره وعيونه الزرق
أم عبدالله: الله يرحم حالك بس مهبلة بك العيون الزرق
ساره وهي تحلم : آه وفيه أحد ما يحب العيون الزرق يازين ذيك العيون ليش ما جت عيوني زرق وشعري أشقر ما أدري؟ تصدقون غريبه!!
أم عبدالله : أي والله غريبه أبوك بريطاني وأمك فرنسيه وخوالك المان
ساره : هاهاها يا خف دمك يمه والله تعرفين تنكتين
هند اللي شوي وتصيح: الحين من أهم أنا وإلا سويره وخرابيطها
سارة: وأنتي ليش غايره مني بعدين وش فيك خايفه المفروض تنبسطين وخشتك تتشقق من الوناسه وحبت تلعب بأعصاب أختها : أقول هنيد اليوم بتروحين مع واحد غريب ما تعرفينه وتقعدين أنتي وإياه لحالكم وحنا بنكون هنا مستانسين وأنتي الله اللي يعلم بحالك ما يندرى وش بيصير معك والا وش بيسوي فيك انتبهي لنفسك
أم عبدالله: سويره ووجعه يالحماره تبين تطيرين عقل أختك يلا ضفي وجهك وانقلعي برى
سارة: وهي تضحك: طيب بأطلع بس لاتنسين اللي وصيتك عليه ياهند
أم عبدالله : وش موصيتها عليه
سحر بنت نجوى: سويره قالت لخالتي هند إذا جت تطلع من القاعة تذب باقة الورد على صديقتها ريم علشان تتزوج بسرعة صدق يمه هذا الكلام
أم عبدا لله: لا هذا خبال من خالتك الخبله
سارة: سحير يالحيوانه أنا كم مره قايلة لك قولي خالتي سارة يا أم لسان وإلا ترى بأقلبك وأخليك جنيه صغيره
نجوى : سويره فكينا من خرابيطك قبلك مصفقة قلب بنيتي
سارة: عاد من زين هالبنت اللي خايفه عليها اللي يسمعك يقول البنت الذهبيه وع
نجوى : الحمدلله والشكر فيه بنت ذهبيه وفضيه
ساره : هذي من عندي و لاتدققين خلي البعارين تمشي
سوسن : الا خلي الارانب تقامز
************************************************** *********

أصايل دخلت على العنود ولقتها منسدحه على السرير وتقرى ديوان خالد الفيصل
أصايل : أخس وش هالتطورات
العنود : وش قصدك
أصايل : والله مستغربه هالنقله النوعيه العنود مدمنة الروايات العاطفيه الخايسه تطورت وصارت تقرى دواوين لا وخالد الفيصل مره وحده
العنود بملل : اخلصي وش تبين
أصايل : تعالي معي تحت أبيك في موضوع
العنود : قولي وش تبين
أصايل : ما يصلح أقوله هنا لازم أقوله تحت
العنود : أجل خلي موضوعك لبكره
أصايل : لا عنوده تكفين تعالي أمي وأبوي تحت ينتظرونا
العنود : أصايل والله ما لي نفس أتحرك من السرير
أصايل : سؤال من اللي فينا حامل أنا والا أنتي
العنود : ما تلاحظين أنك غثيتينا والله العظيم درينا أنك حامل
أصايل : يلا أجل انزلي معي تكفين
العنود : الا أنتي في شهر؟
أصايل : آفا وش هالسؤال لاأحد يسمعك بس ما تدرين عن أختك
العنود : الدنيا مشاغل
أصايل : أنتي هالفتره ماأنتي طبيعيه وش فيك ؟
العنود اللي تعبت من هالكلام : وش فيني يعني وحده توها مخلصه أمتحانات أكيد نفسيتها بتتعب
أصايل : هالكلام ما يمشي علي
العنود : خلينا ننزل والا بأهون
أصايل وهي تطلع من الغرفه : تراني في الشهر الرابع لاتنسين
العنود : أنتي مالك الا اربع شهور ونص من تزوجتي ليش أستعجلتي ما أدري
أصايل : بكره إذا تزوجتي وخذتي واحد تحبينه بتنسين هالكلام
العنود : يالله حياة خير
نزلت العنود وأصايل تحت وقعدوا يسولفون مع أهلهم
أصايل اللي تذكرت شي : أيه نسيت أوريكم شي وراحت لشنطتها وطلعت شريط فيديو وراحت عند التلفزيون وحطت الشريط في الفيديو وقامت تعيده بعدين شغلته
أم أصايل :وش تسوين؟
أصايل : بأوريكم شريط عرسي
العنود : بالله كم مره شفناه
أصايل : لا هذا جديد لقيته عند مشاري
بدى الشريط وكان مسجل فيه زواج الرجاجيل
العنود وأصايل قعدوا على الارض وقعدوا يعلقون على الرجاجيل وهم يضحكون
العنود : شوفي سلطان ولد عمي دايم رافع خشمه
أم أصايل : يحق له مال ووسامه ومركز ماشاء الله ياليت يكون من نصيبك
العنود : وع الله لايقول
أصايل : شوفي الخبلان طروق ونصور قبلهم يضحكون ما شاء الله عليهم
أصايل : هذا خالي أبو مشاري
العنود : والله كشخه هالشايب
أصايل : والله أنه طيب وعلى نياته
ومثل كل مره وبدون مقدمات طلع في الصوره
العنود قلبها قام يرقع وحست بالحر والعرق قام يصب منها حاولت تتماسك علشان ما تنفضح
العنود بصوت يرتجف : من هذا؟
أصايل وأبوها في نفس الوقت : بدر
العنود في نفسها صدق من سماه بدر اسم على مسمى وبلعت ريقها وكملت أسئلتها : وش بدر؟
أصايل : هاه بدر أخو مشاري ماشاء الله تبارك الله الله لا يضره كل الناس يحبونه أخلاق وعقل وثقل
أبو أصايل : وانتي صادقه الكل يمدحونه ويثنون عليه يوم كنت أسئل عن مشاري أول ما خطب أصايل و كل من سألته قال لاتخاف على بنتك دامها مع أخو بدر , هذا اللي قلت لكم عنه
العنود وهي تفكر وين ومتى قلت وأنا ويني فيه
أم أصايل : هذا اللي تقولون انه مريض
العنود بصدمه وخوف : مريض!! وش فيه؟
أصايل : فيه سكر مسكين من يوم عمره اربع سنين وبعض الأحيان تجيه نوبات سكر ويطيح وهو واقف
أبو أصايل : ذاك اليوم أحرجته وأنا مدري وقالهم السالفه
أصايل : والله أنه مسكين هالموضوع مسبب له أزمه تدرون أنه حالف أنه ما يتزوج علشان ما يجيه عيال فيهم سكر وخالي وخالتي مساكين ما يدرون وشلون يقنعونه
العنود عصبت من هالمنطق الغريب : ومن متى والسكر مرض خطير نص العالم فيهم سكر وعايشين حياتهم الطبيعيه
أهلها يناظرونها وهم مستغربين
أصايل : وأنتي ليش معصبه
العنود : ما عصبت ولا شي بس أخو زوجك غبي الظاهر المرض مأثر على عقله
وقامت وهي تكلم نفسها بصوت واطي : قال سكر قال
أصايل : تعالي وين بتروحين؟
العنود : بأروح أنام رأسي يعورني , تصبحون على خير
اهلها : وأنتي من أهل الخير


************************************************** ******


وقفت سارة في الاستقبال مع أمها وخواتها وماحست إلا وريم ومعها وحده باين انها أمها واقفة قدامها وريم تصفر: وش ذا الزين من وين جبتيه
أم سلطان نغزت ريم بكوعها: بس ترى حنا في عرس مو في البيت
سارة: ماعليك منها ياخاله متعودة عليها اصلآ إن تصرفت ريم بذوق ميب صايره ريم اللي اعرفها
ريم: انطمي يالحلوه بس بالله وشلون زنتي بهالسرعه أخبرك شيفه في الجامعة وين النظاره
سارة وهي تصر على اسنانها : أقول انكتمي بس أحسن لك من زين وجهك عاد
ريم : يمه خوفتيني, المهم أعرفك على الوالدة يمه هذا صديقتي سويره
سارة :هلا والله خالتي حياك الله تفضلي تو ما نور المكان ووطت سارة على رجل ريم
ريم :آخ أنتي متى بتخلين هالعاده الشينه
سارة: إذا صرتي تقولين اسمي صح ,تفضلوا البنات قاعدين قدام ومشت سارة معهم ووصلتهم للمكان اللي قاعدين فيه البنات نهى ومنال ومشاعل
سارة بصوت واطي في اذن ريم : هذي أمك جت يالظالمه وأنتي تقولين أمي مطنشتنا
ريم: ادعي بسلامة اخوي سلطان هواللي خلاها تجي
سارة: سلطان قراقوش ماغيره هو اللي أقنعها, معقولة وش شاربين اهلك اليوم غريبه !!
ريم وهي تضحك: انطمي لاتسمعنا أمي
سارة استأذنت من ضيوفها وراحت مع أمها وخواتها
أم سلطان: من زمان ماشفت لك صديقه تمونين عليها
ريم:إلا ماعمرك شفتي وأنتي الصادقة كل اللي معي في المدرسة بنات تجار وشايفين أعمارهم كن محد عنده فلوس غيرهم
ريم: إلا وين أمك يا مشاعل أنتي ومنال
مشاعل: والله أمي وأم مشاعل جلسوا ورى ويتذكرون أيام المراهقة تصدقين كانوا صديقات أول وحنا ما ندري
نهى : البركة في سارة اللي جمعتهم
بعد زفة العروس جت سارة وجلست مع صديقاتها:
ام سلطان :امك وعرفناها ياساره وين خواتك
ساره: سوسن اللي لابسه وردي شوفيها هذي اصغر مني
ونجوى الكبيره هذيك الحامل اللي لابسه تركواز
نهى: في أي شهر شكلها واصله
ساره: اسكتي بس والله انها خايفه لاتولد علينا اليوم بكره بيخلص تاسعها , بس والله أتمنى تولد اليوم
مشاعل : يالنذله
ساره : والله خلي هاللي في بطنها ينبسط ويشوف الدنيا بس اخاف يصير اللي في بطنها ولد ويصير داج طالع على الدنيا في عرس حريم
منال<< متعقده ما تعرف ترقص : لا لو فيها بنت خليها تولد على الاقل تستفيد تتعلم الرقص
ام سلطان: الله يهون عليها
ساره تكلم مشاعل ومنال : وانتوا أمهاتكم لين الحين يسولفون
منال: والله أحس إن فيه بوادر زواج عن قريب
سارة:ليش من بيتزوج؟
مشاعل: أنتي, من دخلنا وأم منال ما نزلت عينها من عليك.
منال: إيه والله شكلك عجبتيها وهي خلقه تدور لأخوي نايف
سارة وهي خايفه: لاتكفين منول إذا أمك جادة خليها تشيلني من بالها
منال: حدك عاد كلش إلا اخوي المفروض تحمدين ربك إذا فكر يخطبك اصلآ هو يبي وحده هاديه وعاقله مو وحده لسانها وش طوله
سارة:أخوك والنعم فيه ماقلت عنه شي والله يوفقه ويسعده بس أنا لاتقربوني
أم سلطان: هاو وليش عاد كل البنات يتمنون يتزوجون
سارة: إلا أنا, بس أمي الله يهديها شابه فيني اللي يسمعها يقول عني اكبر عباد الله وابوي عاد يقول اذا جانا الكفو ماراح نرده
ريم: والله من الدلع مصيرك بتتزوجين الحين والا بعدين
سارة: أنا ما قلت لابس مو الحين, أولا مابعد جاني اللي على كيفي ثانيا الزواج مسؤولية مو لعب ياختي أنا إذا جاء ضغط الامتحانات قلت بفصل وشلون عاد إذا وراي رجل وبزارين وبيت وكرف
مشاعل: موشرط انك تجيبين عيال أول ما تتزوجين تقدرين تأجلين العيال لين ما تخلصين الدراسة
نهى :اللي ما جربت العرس وغثاه تنطم ولا تتفلسف علينا
سارة: صادقه الرجال لحاله مسؤولية والبيت بعد يبي مناظر وأنا إنسانه دراستي عندي أهم ,أبي أجيب معدل عالي وتقدير زين إذا تخرجت
ريم: والله انك تتعذرين بس وإلا الخدامات والطبخات وش كثرهم العوق مو من شغل البيت العوق منك أنتي اللي ماتبين تتزوجين
سارة: حبيبتي مو كل الرجاجيل يبون خدامات يقابلونهم في بداية زواجهم واصلآ أكثر الشباب في بداية حياتهم ما يقدرون يجيبون خدامات, مساكين يالله يقدرون يتزوجون علشان يجيبون خدامات وطباخات بعدين أنا مانيب أنانيه اقعد أتشرط على ولد الناس واحمله مصاريف ما يقدر عليها وش حادني على هذا كله اقعد في بيت أهلي ابرك لي
ريم: والله من المثالية الزايده ذكرتيني بالمسلسلات
ام سلطان: والله كل واحد له رأي وهذا رأيها وش عليكم منها
ريم وهي مستغربه: شكل رأيها معجبك يمه
ام سلطان: ايه البنيه صريحه من البدايه ومعها حق
صفقت ساره وهي تضحك : يا حبيلك والله وعلشان هالكلام اللي قلتيه بقوم ارقص انا واياك والظاهر بنصير صديقات ونزلب بريوم
رقصت ام سلطان مع ساره والبنات يصفقون لهم ورجعت ساره وام سلطان وهم يضحكون
ريم: حدك عاد سويره ترى صرت اغار
مشاعل : الله اكبر الحين تغارين علشان امك رقصت مع ساره ,هذا انتي صادقتي سويره وخذيتيها مننا وحنا صديقاتها من ايام الابتدائي وما غرنا منك
ريم: علشانكم ما تحبونها
منال: شف الفتانه لاتفتنين بس, تصرف هي وجهها
ساره : ماعليكم منها انا عارفه انكم تموتون فيني
نهى: اسمعوا بس صدقت عمرها مالت عليك
ساره: اقول بروح اسلم على هند قبل لاتروح وراحت ساره تسلم على أختها وتودعها
جت حرمه وجلست مكان ساره جنب ام سلطان: السلام عليكم
ام سلطان: وعليكم السلام
الحرمه: انتوا من طرف العروس والا المعرس
ام سلطان: العروس
الحرمه: واللي قامت قبل شوي لابسه فستان ابيض من هي
ام سلطان :اخت العروس
الحرمه: وهي متزوجه والا توها
ام سلطان: لا هي مخطوبه الحين
البنات كلهم ناظروا ام سلطان وهم مستغربين ,ام سلطان غمزت لهم علشان ما يتكلمون
الحرمه: انتي متأكده
ام سلطان: هاو أي متأكده هذي في حسبة بنتي
الحرمه: مشكوره الله يعافيك وراحت لمكانها
ريم: يمه وش سويتي؟
ام سلطان مسويه نفسهل بريئه:ما سمعتوا رأي البنيه من شوي في العرس
ريم: يمه حنا وش دخلنا هذي امور خاصه في ساره
ام سلطان: وانا ما سويت شي حبيت اساعدها
ريم: يمه ترى موب علي هالحركات انتي اذا تكلمتي كذا معناه ا ن وراك شي تخططين له
رجفت ام سلطان ريم مع رجلها من تحت الطاوله علشان تسكت وفهمت ريم وسكتت
رجعت ساره لصديقاتها وقالت لها ام سلطان عن اللي سوته: بس ترى مو قصدي اني اقطع رزقك والا اتدخل في امورك بس حبيت اساعدك
ساره: ياحبي لك والله قايلة لك اننا بنصير صديقات ونجحد ريم

************************************************** *******
العنود راحت لغرفتها وهي متضايقه وحاسه أنها بتنفجر وموب مستوعبه الصدمه اللي سمعتها تفاجأت أول شي وفرحت يوم عرفت من يكون بس فرحتها ضاعت من الكلام اللي قالته أصايل
مسكت جوالها واتصلت على هيفاء
هيفاء : هلا العنود
العنود : كيفك يا هيفاء؟ وكيف أبوي سعود؟
هيفاء : بخير الحمدلله , أنتوا كيفكم؟
العنود: بخير , هيوف عرفت من يصير
هيفاء فهمت بسرعه : كذاااااااااااااابه. من هو؟
العنود والعبره خانقتها : بدر أخو مشاري
هيفاء : وشلون عرفتي؟
العنود : اليوم أصايل جابت
هيفاء قاطعتها : يالله يالعنود أكلمك بعدين أبوي سعود يناديني الله يهديه ما أدري وش فيه ما نام اليوم
العنود صكت السماعه من هيفاء ودقت على منى ولقت جوالها مقفل وعصبت حست أنها بتنفجر
واتصلت على ريم وطولت ما ردت
ريم وعندها إزعاج : هلا العنود
العنود : هلا ريوم كيفك ؟ وينك وش هالأزعاج
ريم : العنود حبيبتي أنا في زواج ما أدري وش تقولين ما أسمعك إذا رجعت البيت بأكلمك وصكت السماعه
العنود : وهي تناظر الجوال بحقد أمحق بنات عم يجيبون المرض


************************************************** ****
في السياره وهم راجعين للبيت ريم وامها يسولفون
ريم: يلا يمه قولي وش اللي تخططين له
ام سلطان: والله اللي اشوفه انك انتي وساره مثل الخوات
ريم : قصدك الشله كلها
ام سلطان: انا الحين اتكلم عن ساره , وش رايك لو ساره تصير اقرب لك من الصديقه
ريم وهي تهز راسها باستهزاء: آها ومن تظنين من عيالك يناسب لها بالله, سلطان المغرور اللي نفسه في خشمه والافهود اللي وسكتت ريم ماتبي تفضح اخوها اللي يحب هيفاء بنت عمه
ام سلطان: وش فيه فهود؟
ريم: مافيه شي بس اهو وينه وين العرس خله يخلص دراسته اول بعدين يصير خير واظنك سمعتي ساره وهي تقول دراستي اهم من العرس يعني مستحيل تترك دراستها علشان تتغرب مع ولدك وما اظنك بتزوجينها نصور الا اذا
ام سلطان :وش تقصدين الا اذا استخفيت صح
ريم:لا مو قصدي بس انتي عارفه ولدك هالمرجوج والله ان يطلع لساره قرون
ام سلطان :لاتخافين انا ابيها لسلطان
ريم بصدمه: لايمه تكفين الا سلطان ساره صديقتي واحبها وما ابي اضرها
ام سلطان: وجع ان شاء الله يالكلبه واخوك وش فيه علشان تضرينها
ريم : يمه انتي تعرفين سلطان زين, مغرور وشايف نفسه حتى الضحكه ما تطلع منه الا بالحسره وصراحه ولدك جلف و يكفي ان هناء حبت ولد خالها وهي مخطوبه لسلطان لايمه لا ,اللي تفكرين فيه غلط
ام سلطان : هناء حبت ولد خالها علشان سلطان كان مطنشها وما يبيها
ريم : ما يبيها وشو له خطبها اجل
ام سلطان : رويمه لاتقعدين تستهبلين علي انتي عارفه ان ابراهيم الله يرحمه هو اللي عرض بنته على سلطان وسلطان استحى منه ووافق يقالك من زود الشهامه اللي فيه ماعرف يسنع عمره
ريم : حتى ولو ,علبالك سلطان ممكن يحب ساره , يمه طلبتك شيلي هالموضوع من راسك هو اخوي وهي مثل اختي وما ابي ننكد عليهم ونحسرهم
ام سلطان : اقول انقلعي انتي وطلبك علبالك اخبر مني, انتي توك صغيره على هالامور , بعدين انتي ماحسيتي ان ساره تناسب سلطان هي بسم الله عليها جريئه وشخصيتها قويه واهم شي انها صريحه , وهي ميب من ذا المايعات والدلعوات اللي لوتقعد تتدلع على سلطان عطاها كف على وجهها
ريم وهي معصبه: لا وتبين تزوجينها ولدك
ام سلطان: ايه لان لسانها طويل وهي اللي بتنفع مع سلطان يعني لو يقولها شي ما يعجبها بتطنشه وتسوي اللي في راسها وذيك الساعه بتخليه يمشي على الصراط المستقيم وتكسر هالغرور اللي فيه
ريم وهي تضحك :مستحيل اتخيل ساره وسليطين احس حروب بتقوم بينهم كل واحد فيهم راسه يابس ومايحبون احد يمشي كلامه عليهم
ام سلطان : انتي خليك في صفي بس وموب صاير الا كل خير
ريم : يمه لاتحسبين اني ما ابي ساره انا اتمنى انها تاخذ واحد من اخواني بس اخواني ما ينشد فيهم الظهر
ام سلطان : انتي سوي اللي بأقولك عليه وموب صاير الا كل خير
دخلت ريم وام سلطان البيت ولقوا سلطان قاعد في الصاله يشتغل في الملفات اللي قدامه
ام سلطان: السلام عليكم
سلطان : وعليكم السلام , بدري كان نمتوا عندهم
ريم : ياليت و الله
ام سلطان : وانت وش حارك بعد لا انت مفرحنا بعرسك ولا تبينا نفرح
سلطان : لا حول وحنا متى بنخلص من هالسالفه
ام سلطان : اذا شفتك واقف وحرمتك جنبك
سلطان : اجل ماحنا خالصين ابد بس تصدقين يمه الشرهه علي اللي لزمت عليك تروحين مع ريم لو كنت ادري كان خليت ريم تروح لحالها
ام سلطان : انت علبالك ما يضيق صدري اذا رحت لعرس وشفت ام المعرس فرحانه بولدها
سلطان: اجل لاعاد تروحين علشان ما يضيق صدرك ويلا تصبحون على خير وعلى فكره ترى ابوي سعود وهيفاء بيجون يتعشون عندنا بكره
ام سلطان وريم : الله يحيهم
بعد ما طلع سلطان ريم : هذا اللي تبين تزوجينه
ام سلطان : ما عليك منه عاد انا بأ شاوره
ريم : والله اني خايفه من اللي بيصير
ام سلطان : موب صاير الا كل خير بكره اذا سكنت ساره معنا في البيت بيتغير رايك
ريم : الله يسمع منك
أم سلطان : الا غريبه وش تبي العنود داقه ؟
ريم : عادي ما عندها شي
أم سلطان : غريبه أشوف الصداقه قايمه بينكم هالايام
ريم : لاغريبه ولاشي بنات عم ويكلمون بعض
ام سلطان : أيه بكيفكم , و يلا عاد تصبحين على خير
ريم : وانتي من اهله

ريم راحت لغرفتها ودقت على العنود
العنود ردت بسرعه : هلا ريوم كل ذا في العرس
ريم : وش عندك ؟
العنود قالت كل شي لريم
ريم : لا حول الله وش هالحظ يالعنود
العنود وهي تصيح : شفتي وشلون تفكيره مريض مثل وجهه
ريم تبي تغير الجو : أخبرك تقولين وجهه حلو
العنود : حلو وبس آه ياقلبي بس
ريم : طيب وش بتسوين الحين
العنود : وش بأسوي يعني
ريم : بتقعدين في رجاه أقول دام هذا تفكيره أنسيه يالعنود أحسن لك
العنود : أنسى نفسي وما أنساه
ريم : لين متى يعني بتجلسين على هالحال؟
العنود : لين ربي يأخذني
ريم بخوف : عنوده جاده والا تستهبلين
العنود : لا والله جاده ويلا أنا تعبانه الحين أكلمك بعدين
ريم : العنود اصحي أنتي قاعده تدمرين عمرك واحد ما شفتيه الا مرتين وكل مره ما تتعدى الخمس دقايق تضيعين عمرك علشانه
العنود : خلاص ريوم هالكلام ما يفيد أنا قررت وخلصت
ريم : مجنونه وش قررتي ؟
العنود : خلاص ريوم انا تعبانه الحين أكلمك بعدين


وش قررت العنود؟ وهل أم سلطان بتقدر على ولدها؟؟؟

وااااااااااااااو

روايه حلوه كثير,,

انا احب اقرى هالنوع من الروايات,,

الله يعطيك العافيه,,

بأنتظاركـ..
×
×

الجزء السادس

في بيت ابو عبدالله
ابو عبد الله وام عبد الله يتقهوون بعد العصر
ساره: صباح الخير
ابو عبد الله : الا قولي مساء الخير, بدري كان كملتي النومه
ساره: وش اسوي مانمت الاالساعه8 والله رجولي تعورني دهنتها ونمت الله يتوب علي تذكرت نفسي إذا خذت عمره
ام عبدالله: والله محد قالك ارقصي كل شوي
ساره: بعد اذا مارقصت في عرس اختي متى بأرقص , الا على طاري هند كلمتكم
ام عبدالله: ايه دقت بعد الظهر وهي في المطار
ساره: هاه وش اخبارها
ام عبدالله : ماعليها مبسوطه الحمدلله
ابوعبدالله:عقبال مانفرح بك ياساره
ساره وهي مكشره: بالتخرج ان شاء الله
ابو عبدالله :والعرس
ام عبدالله: الا تصدقين ما توقعت ان ام سلطان السامي بتجي امس
ابو عبدالله: دامكم عزمتوها اكيد بتجي
ام عبد الله: ماشاء الله عليها اخلاق ومتواضعه تصدق انها قاعده مع البنات وترقص معهم حتى رقصت مع سحر بنت نجوى
رن جوال ساره وكانت ريم : بسم الله كنها داريه اننا نتكلم فيهم هذي ريم عن اذنكم وراحت لغرفتها
ريم : هلا سارونه كيفك وكيف الاهل عقب التعب
ساره : هلا والله بخير الله يسلمك انتي وش اخبارك وش اخبار الوالده ان شاء الله بخير تصدقين تونا نحكي فيكم انا وامي
ريم : تحشون
ساره : لا والله قاعدين نمدح في امك ماشاء الله عليها محد فهمني غيرها والا انتوا مالت عليكم
ريم في نفسها والله لوتدرين باللي في راسها كان ماقلتي هالحكي عنها : اقول سويره على طاري امي امس سمعتك تقولين ما بعد جاء اللي على كيفي واللي في بالي , ماقد قلتي لي عن اللي في بالك
ساره: ابد بس حاطه في بالي صوره لزوج المستقبل
ريم: و وش هي ذا الصوره وشلون صايره
ساره: مالك دخل
ريم : وليش؟
ساره: اخاف تضحكين علي مثل امي وخواتي
ريم: لاقولي منيب ضاحكه, بس يلا ضحكيني اقصد وصفي لي هالصوره اخاف يصير فيه شبه من ميكي ماوس
ساره بعصبيه: تصدقين ما انتي بكفو احد يقولك شي يلا بس مع السلامه
ريم:لا سارونه امزح يلا قولي شوقتيني
ساره: بصراحه انا ابي واحد شخصيتة قويه مره بس في نفس الوقت حنون وقلبه ابيض ويحبني ابيه اذا قال كلمه تكون وحده ما يغيرها وما ابيه يسمع كلامي يعني ما ابي واحد انا اللي اسنعه وادبره ابيه هو اللي يسنعني يعني اذا قلت يمين قال يسار والعكس
ريم بكل استغراب : نعم نعم دام هذي مواصفاتك ليش ما اخذتي واحد من هاللي يقولون خذها وهي صغيره وربها وخليتيه يسيطر عليك وفكيتي العالم من شرك
ساره : يا الله ريوم افهميني انا ما ابي واحد يسيطر علي انا قلت ابي واحد تكون كلمته في البيت هي الاولى والاخيره يسمع رايي وياخذ منه اللي يعجبه انا ادري اني قويه وما احب احد يسيطر علي بس اذا جاء زوجي ابي شخصيته اقوى من شخصيتي علشان تكون الحياة معه حلوه وفيها اكشن ما ابغى واحد أمعه كل ما قلت له شي قال سمي ولبيه
ريم : بسم الله عليك الرحمن الرحيم, ساره سوسن اختك حولك ودي اكلمها
ساره: لا نايمه وش تبين فيها
ريم: بقولها تحط لك كمادات بارده مع خل علشان تروح الحراره اللي فيك لانك ما انتي طبيعيه وتعطين بخيط وخيط
ساره: رويمه احترمي نفسك لا اسكر السماعه في وجهك
ريم: ساره بالله انتي جاده والاتمزحين
ساره بعصبيه: اعرفك انا علشان امزح معك
ريم : لاتعصبين بس والله اللي بيسمعك بيقول ذي شاربه شي والا حرارتها مرتفعه اجل فيه حرمه في الدنيا تقول ما ابي اخذ واحد يقول لي سمي ولبيه بعدين وش هالشروط المتناقضه اللي قاعده تعدينها علي قوي,حنون.يحبني ومايسمع كلامي, هذي الشروط ما تجي ولا تركب على بعض صدق الروايات اللي تقرينها مأثره عليك
ساره: ريموه عن الطنازه يلا , بعدين لو انا ابي واحد يحبني وبس كان اخذت صالح ولد عمي
ريم : وش هالثقه لهالدرجه واثقه انه يحبك
ساره: موثقه بس حنا عايشين في بيت واحد يوم كنا صغار وابوي وده انه يخطبني ,ما يدري ان اخته اسماء حومت كبدي من كثر ما يرسلها لي علشان يعرف رايي واخرها اول ما خلصت الثانوي بس انا صرفتها لاني ما ابيه, وما يندرى يمكن بعدين اتندم اني رفضته بس والله احس انه اخوي و ودي لو ياخذ سوسن هو طيب وحبوب وهادي وهي بعد هاديه واحس من كلامها ان ودها به بس انا مستحيل اتقبله زوج لي
ريم : خير خير وانا اخر من يعلم بهالسالفه
ساره: هالسالفه ما قلتها الا لمشاعل بس ,وليش قلتها لك ما ادري مع انك ما تستاهلين
ريم : ادري ليش قلتي لي لانك من كثر ما تحبيني ما تقدرين تخبين علي شي ودامك فتحتي لي قلبك انا بعد ودي اقولك عن سالفه من زمان نفسي اقولها لاحد بس ما لقيت اللي يفهمني
ساره: رويمه وجع كل هالقعدات والمكالمات وما فهمتك لين الحين يلا بسرعه تكلمي لااطب عليك من السماعه
ريم وهي تفكر: اقول سارونه الموضوع خطير ومهم ما اقدر اقوله لك بالتليفون خليه لين ما اجيك في بيتكم او انتي تجين لبيتنا لازم وجها لوجه
ساره: ما طلبتي يالغاليه البيت بيتك حياك الله , يلا متى بتجين بكره الساعه كم
ريم وهي تضحك : والله من الطفاقه والرجه اللي فيك, ما امداني افتح فمي الا قلتي بكره لايا بنت الناس خليه نحدد يوم ونشوف فيه بعض
ساره بقهر: وليش مو بكره
ريم :اقول والله انك ما تنعطين وجه
ساره: خلاص كلها كم يوم ونرجع للجامعه
ريم: لاما يصلح هالموضوع في الجامعه, السالفه طويله وفي الجامعه ما ناخذ راحتنا
ساره: عالعموم متى ما بغيتي تحكين في الموضوع دقي وقولي يلا مع السلامه
ريم: لحظه سويره بس بسألك انتي جاده في الشروط اللي قلتيها عن زوج المستقبل والا تمزحين
ساره بدون ما ترد سكرت السماعه بقوه في وجه ريم لدرجة انها بغت تصم آذانها
****************************************

ريم: يمه يمه عندي لك
ام سلطان: وش عندك يارويتر
ريم: يمه متى تبين سلطان يشوف ساره قولي لي وانا اجيبها عندك
ام سلطان:حشى هي مارد بتطلعينها من الفانوس
ريم : اقول يمه تصدقين تفكيرك يذكرني بتفكير البزران مارد وفانوس شكلك ماعشتي طفولتك
ام سلطان: عمى ان شاء الله هالحين انا اللي ماعشت طفولتي والا انتي يالصبيه اول مره اشوف بنت في طفولتها ما تحب العرايس وتلعب بالكور والسيارات
ريم: والله الشرهه على امي اللي ماجابت الا الصبيان
ام سلطان: المهم وش فيها ساره وش كنتي تقولين
ريم:يمه انا قدرت اقنع ساره انها تجي بيتنا ,و اذا جت بنخلي سلطان يشوفها بدون ما تدري واذا جازت له خطبناها , هاه وش رايك فيني اعجبك صح
ام سلطان : لا الله لايضرك بس ,حليتيها بهالسهوله اللي يسمعك يقول ما عاقنا الاوشلون نجيب ساره خلينا اول نلين راس سليطين هالناشف ثم نجس نبض البنيه اخاف ماتبي ولدنا بعدين فكري وشلون بنجيبها
ريم: لاما عليك يمه من ساره ونبضها انا متأكده لو يخطبها سليطين ما راح تقول لا
ام سلطان: ليش انتي ما كنتي معنا امس وسمعتي كلامها عن الزواج
ريم: يمه حنا ربي منعم علينا واذا سلطان اخذ ساره اكيد بيجيب لها اللي يخدمها وهي بتتفرغ لدراستها
ام سلطان: اذا ساره وضمنتيها على قولك باقي هالعله سليطي وماكملت لأن سلطان دخل عليهم
سلطان: كأني سمعت اسمي
ريم: ما شاء الله صدق لاقالوا اللبيب بالاشاره, تصدق عاد ان محد فينا قال اسمك حنا بس قلنا عله وانت عرفت انه انت الله لايضرك يا اخوي
ام سلطان :محد عله غيرك كلش الا سلطان تاج راسك
سلطان يناظر امه باستغراب
ريم: هاه يمه اشوفك قلبتي علي
ام سلطان غمزت لريم علشان تسكت
ريم تكلم سلطان: لاتفرح ترى ذا القردنه مو لله
سلطان: آها وانا اقول وش فيها امي صاير لسانها حلو معي اليوم يلا يمه قولي وش عندك
ام سلطان وهي مسويه نفسها متأثره: وانا امك انا ضايق صدري وودي افرح بك انت واخوانك لين متى وانت بتقعد بدون عرس
سلطان:اقول يمه الحمدلله انك ما تمثلين والا كان خذتي جائزة اسوأ ممثله في العالم
ريم : تخيل امي تمثل يناسبها دور مديرة مدرسه
سلطان بصوت واطي: وانتي الصادقه راعية قهوه معلمه واسمها فتحيه
ريم: لا اسم ام سيد اكشخ وانت ابنها سيد
ام سلطان بعصبيه: وانتي خدامتهم ياقليلة الحياء هذا وانا موجوده قدامكم لاحياء ولا حشيمه
سلطان: آفا يمه زعلتي من دور المعلمه وش تبين ,نحطك سيدة اعمال, هماك تقولين ضايق صدرك هذا حنا نبي نوسع لك صدرك
ريم: ايه والله يمه من زمان ما سولفنا مع بعض وضحكنا
ابو سلطان دخل هو وناصر: ضحكونا معكم
ريم: اهلا بالعمده ابو سيد اتفضل ياحج
ابو سلطان: من هو ابو سيد
سلطان: لا ما عليك منها هذي امي زعلانه وحنا نبي نضحكها شوي
ابو سلطان: من اللي مزعل الغاليه كل شي عاد الا حبيبة قلبي ام سلطان يا جعلي افداها
ريم: طوط طوط طوط نحن هنا
ناصر: يبه عيب هالكلام عندنا بنات لاتخربهم
ابو سلطان:عاد هذي تسميها بنت اشك والله
ناصر وسلطان قاموا يضحكون
ناصر: لقطي وجهك ريوم شوفي برطمك طايح شيليه لا احطه في الزباله
ريم:هاهاها بايخه ماتعرف تنكت
ناصر: بس بس ضفي وجهك
ام سلطان: وانت بعد ضف وجهك
سلطان: يلا انت واياها انقلعوا الوالده ما تبيكم
ام سلطان: وانت اولهم لاني ما ابي اشوفك لين ما تسوي اللي قلت لك عليه
سلطان: الله يهديك يمه كأنك بزر لعبوني والا بخرب الله يعينك عليها يا ابو سلطان
ابو سلطان:آمين
ام سلطان :الشرهه ميب عليكم علي انا اللي قاعده بينكم وانتو تتمسخرون علي
ابو سلطان: ما عاش من يتمسخر عليك يالغاليه
******************************************
ام فيصل: يلا يامنى ابيك تبيضين الوجه مع ام سلطان ما ابي هالسنه تمر الا وانتي مخطوبه لسلطان
منى وع وتحاول تتفاهم مع امها :يمه تكفي ارحميني من مخططاتك سلطان لو كان يبيني هو والا امه كان خطبني قبل لايخطب هناء بنت ابراهيم
بعدين حتى لو خطبني انا ما ابيه وع اخذ واحد رفضته هناء, آسفه ما اخذ فضلات
ام فيصل: يحصلك سلطان انتي ووجهك بعدين هناء ما رفضته هم اثنيناتهم اتفقوا على الانفصال
منى: يمه انتي وام سلطان ما تحبون بعض ليش تبيني اخذ ولدها
ام فيصل:والله ولد عمك زينة الرجال شباب ومال وركزي على المال
منى: وحنا ما علينا قاصر شايفتنا طره الحمد لله ربي منعم علينا
ام فيصل: وانا ماقلت غير كذا الحمدلله بس زيادة الخير خيرين وعمك عنده من الحلال اكثر من اللي عندنا
فيصل: اجل وش رايك يمه تزوجيني بنتهم ريم
ام فيصل: لا ان شاء الله انا ازوج ولدي زين الشباب لذيك الشيفه ام كشره انا بزوجك شيخة البنات عواطف بنت اخوي
فيصل ومنى في نفس الوقت: وع
ام فيصل: محد وع غيرك انت واختك اجل في احد يقول عن عواطف وع ليش قاصرها يد والا رجل
فيصل:لا والله قاصرها عقل ويبيلها جلد وتكفيخ اجل ما لقيتي بهالدنيا الا عواصف المسترجله
منى:هاهاها حلوه عواصف بس لاتعيدها
فيصل: ان شاء الله اخت منى أي اوامر ثانيه
منى :تسلم اخ فيصل ما تقصر
ام فيصل :يا فرحتي فيكم اللي يسمعكم يقول قاعدين تتمسخرون على وحده من بنات الشوارع مو بنت خالكم
فيصل: وانتي صادقه يمه عواطف كنها بنت شوارع
منى: اصلآ ماعندنا بالسعوديه بنات ينقال عنهم بنات شوارع البيوت ضافتهم الحمدلله بس الكلمه مناسبتها مره
ام فيصل : يا قليلة الحياء تقولين عن بنت خالك بنت شوارع
منى : انا ما قلت انتي اللي قلتي انا بس صححت لك المعلومه ,صح والا انا غلطانه فصول
فيصل : لا صح انتي اساسا ما تعرفين الغلط وينه معه, المهم يمه اسمعيني عواطف شيليها من راسك ولو خلصوا البنات من الدنيا وما بقى الا هي انا ما ابيها ويكفيك عرض لهالضعيفه منى وش بيقولون عنا بيت عمي مالين من بنتهم
منى تمثل دور المسكينه : صادق يا اخوي وانتي يمه اذا ما تبيني انا مستعده اروح لبيت جيرانا ابو راكان واخليهم يتبنوني
فيصل حب يستهبل على اخته وبصوت واطي : تبينها من الله يالغبيه اذا تبنوك بتحرمين على على عيالهم واللي اعرفه انك تبين قصيمي فكري زين قبل لا تتهورين لان الوالده ممكن توافق المره الجايه
منى ارتبكت من كلام فيصل وحبت تصرف الموضوع: يا الغبي التبني محرم عندنا بعدين وش قالوا لك امي جايبتني من الشارع علشان تتخلى عني
فيصل: ما شاء الله الاخت اليوم تمشي وتصحح في هالمفاهيم اللي يسمعها يقول اجانب ما نعرف شي عن هالديره
ام فيصل: انتوا وش فيكم تتساسرون عسى ماشر نسيتوا اني امكم
فيصل : لايالغاليه بس قاعد اعلمها وشلون تحترم امها
منى: لاياشيخ تنكت
ام فيصل: علم نفسك قبل
منى: هاهاها طاح وجهه لقطه يلا
فيصل: مقبوله يمه منك بس بقول شي ابيك تحطينه في بالك عواطف ما راح اخذها لو اعنس
منى: هيه بالغبي الرجال ما يعن
فيصل يقاطعها : غثيتينا عاد ادري ان الرجال مايعنس وانتي واقفه لي عالكلمه انا اقولها على سبيل التشبيه ما ادري وش يسمونه
منى : الله يعين اللي بتاخذك بتمشي وهي تصحح وراك
ام فيصل: ليش بتاخذ اجنبي
فيصل: هذي الغيره وما تسوي اصلآ هي غايره علشان كل من شافني شك اني اوروبي
منى: ترفق على عمرك يا بيكهام حدك اقليم البنجاب ويخب عليك
طارق اللي دخل البيت وسمع اخر الكلام :هي منى اقليم البنجاب جنب الهند وذوليك فيهم شوي وسامه هذا قولي عنه تايلاند ولا فيتنام اقرب
فيصل: يا حليله اخوي حافظ دروسه زين وخصوصآ الجغرافيا الله ينجحك ولا يضرك انت وهالمثقفه اللي جنبك
طارق: الحمدلله والشكر طاقك شي على راسك انت والا ماشي في الشمس
فيصل:لا والله اخوي ليش
طارق:مدري بس اليوم انت مضيع وحبيت اعرف السبب والا في واحد في الجامعه قسم محاسبه يدرس جغرافيا
منى: ماعليك منه طروق هذي الهلوسات دايم تصيبه بين الفينة والاخرى
فيصل: اكيد بتصيبني دامني قاعد معك انتي والشيخه ويأشر على امه اكيد بتصيبني يلا انا بطلع مع السلامه.
ام فيصل:وانا بعد خلني اروح اسير على ابوي ابرك لي من مقابل وجيهكم
ما بقى الا منى وطارق وهات يا مناقر
******************************************

بيت ابو سلطان -على العشاء-
هيفاء ما تتغطى عن سلطان وناصر لان ام حمدان اللي مرضعه سلطان وناصر مرضعتها بعد
هيفاء:هاه ريوم كيف العرس امس حلو؟
ريم: ايه يهبل
سلطان: الحمدلله والشكر ما رجعوا الا قبل الفجر
هيفاء: ياليتني معزومه كان رحت معكم
ريم: لوانك قايلة لي كان قلت لساره ترسل لك بطاقه
ام سلطان : ايه والله امس العرس يهبل وساره بعد ما شاء الله عليها تطير العقل والله لو بس هالسلطان يوافق كان خطبتها له حسافه تضيع من بين يدينا
سلطان يناظر امه بعصبيه : انتي ما مليتي
ناصر: خلاص يمه اخطبيها لي
ام سلطان : وتبيني ابلش بنت الناس بك, انت اعقل اول ويصير خير
ابو سلطان: اجل اخطبيها لي
ام سلطان وعيونها بتطلع : مابقى الاهي
ابو سلطان ببرود: هماك تقولين حسافه تضيع
ام سلطان وهي مكشره : البنت ما تبي تاخذ واحد كبر ابوها
ابوعبد العزيز : من هي هالبنت
ام سلطان : هذي صديقة ساره بالجامعه واعظم من الصديقه بعد
سلطان : هلا هلا كملت السالفه تبين تزوجيني صديقة هالمقروده لا بالله كدينا خير انا ريم ما استحملها تبين تجيبين لي وحده ثانيه بعد, بعدين انا قايلك شيلي فكرة الزواج من راسك انا بعيش طول عمري عزابي ارتحتي
ام سلطان: مالت عليك والله لو ما عندي عيال كان قلت ليت عندي علشان اخطب لهم هالبنت ماشاء الله عليها متربيه واخلاق وفوق على كذا جمال وعقل واهلها ناس سنعين
ابو عبدالعزيز: وانت ياسلطان وش فيك على العرس
سلطان: ما فيني شي بس انا ماراح اتزوج ابد واتركوني على راحتي لو سمحتوا
ابوسلطان: آفا وانا ابوك وانا اعد وامحى لليوم اللي بشوف فيه عيالك وين راح كلامك من اول اذا جاني ولد سميته سعود على جدي
سلطان: البركه في فهد وناصر ان شاء الله تشوف عيالهم
ناصر وهو يتطنز:الظاهر سلطان عنده عقده من الحريم
سلطان تغير وجهه لانه تذكر فيونا وسوالفهم مع بعض عن العرس والعيال
ابو عبد العزيز انتبه لسلطان: اسمع يا سلطان اذا خلصنا من العشاء ابيك بسالفه
سلطان : ان شاء الله يبه
ناصر: وانا ما تبيني
لبو عبدالعزيز: لا ما ابيك
ريم : هاهاها تستاهل هذا اللي يحشر عمره في شي ما يخصه
ناصر : بس يلا وانثبري يا أم رأس
ريم : وانت مالك راس الحمدلله والشكر أكبر مافيك راسك وياليته كبير على سنع
ناصر : يحصلك هالرأس أنتي تتمنين ربعه
ريم : ليش ناقصه خبال
ناصر : الحمدلله والشكر اعترفت انها خبله
أم سلطان : بس عاد اللي يسمعكم يقول جارات مو أخوان


بعد العشاء دخل سلطان مع جده للمجلس
ابوعبدالعزيز: صك الباب ياسلطان
سلطان: ان شاء الله يبه
سكر سلطان الباب وجلس جنب جده: سم يبه وش عندك
ابو عبدالعزيز:اسمع ياسلطان انا ابي اعرف انت ليش ما تبي تتزوج وش اللي رادك قلي وانا ابوك افتح لي قلبك ولا تخاف سرك في بير
سلطان:يا الله يايبه وحنا متى بنخلص من هالسالفه انا كم مره قلت لكم زواج مانيب متزوج لو وش يصير
ابو عبدالعزيز:وليش عاد
سلطان: من غير ليش يايبه خلوني براحتي
ابوعبدالعزيز:في بالك احد, علمني وانا بنفسي بخطبها لك
سلطان: لا يبه مافي بالي احد لو فيه كان قلت لكم
ابو عبدالعزيز اللي عصب لان سلطان ماقاله الصدق: لا فيه بس انت ما تقدر تاخذها لانها ما تبيك صح والا انا غلطان
سلطان وهو مرتبك : وش قصدك يبه
ابوعبدالعزيز: قصدي واضح الامريكيه اللي نسفت بك عقب ما لعبت بعقلك وراحت لواحد اغنى منك
سلطان : انت من اللي قالك ومتى دريت
ابو عبدالعزيز: انا دريت عن السالفه اول ما تركتك البنت ومن اللي قالي هذا شي ما يخصك اهم شي عرفت ولا تحسب ان حنا ما ندري وش تسوون برى حتى فهد ونواف ندري عنهم علبالك حنا مهيتينكم
سلطان : طيب دامك عارف ليش تسأل
ابوعبدالعزيز : انا اسألك عن اللي قاعد تسويه في عمرك وعنادك عن العرس
سلطان وهومنزل راسه : يبه انا حبيت وحده بس ومستحيل يدخل قلبي غيرها مستحيل
ابوعبدالعزيز : وهي والله لاحبتك ولادرت عنك الله يرحم حالك
سلطان : مومهم اهم شي انا احبها
ابوعبدالعزيز : وبتقعد طول عمرك بدون عرس وعيال علشانها
سلطان : يبه ما اقدر انساها
ابوعبدالعزيز : وما انت ناسيها دامك على هالحال
سلطان بيأس : وش تبيني اسوي
ابوعبد العزيز : تزوج خذلك وحده تنسيك اياها هي واللي جابوها
سلطان : ما اقدر يبه ما اقدراخذ وحده ما احبها
ابوعبدالعزيز : كلنا تزوجنا وحنا اصلا ما شفنا حريمنا الحب وانا ابوك يجي مع العشره بعدين وشلون تبي تحب وحده وانت ما في بالك الاهالخايسه الله لايردها
سلطان : لاتدعي عليها يبه
ابوعبدالعزيز عصب : الا بدعي ان الله ياخذها بعد ,انت مانتب صاحي وحنا بعد ماحنا صاحين ان طاوعناك اسمع عاد زواج انا اللي بزوجك رضيت والا ما رضيت
سلطان : بتغصبني يعني ,تراني رجال قدامك منيب بزر
ابوعبدالعزيز : دام هذا تفكيرك بغصبك اجل تبيني اشوفك تحرق في عمرك وتضيع شبابك علشان وحده ما تستاهل
سلطان وهويحاول انه يتفاهم مع جده : يبه الله يحييك عطني فرصه طيب خلني افكر شوي اعوَد عمري على اني انسى و اشيل هالخايسه من راسي على قولك وبعدين زوجني على كيفك
ابوعبدالعزيز : بزر انا قدامك علشان تلعب علي, اسمع انا بأقول لامك تدور لك بنت الحلال اللي تصلح لك وانت قلها شروطك ورح وشف البنت بنفسك واذا ماجازت لك بتدور لك غيرها, انت بس تنق اللي بتجوز لك ,ووالله ياسلطان ان لعبت بذيلك ترى انا اللي بختار حرمتك بنفسي وبأزوجك اياها غصب عليك وبدون ما تشوفها بعد وبنات العايله وش كثرهم لاوعندك بعد بنات عمك العنود ومنى الكل يتمناهم
سلطان : يبه حرام عليك طيب لاتفكر فيني فكر في بنت الناس اللي باخذها وانا مغصوب
ابوسلطان :ماعليك من بنت الناس اهم شي انت تتزوج وصدقني بتنسى ذيك الامريكيه وايامها انت اذا جاك عيال بتعرف وش معنى الحب ياولدي
سلطان : بس يايبه عطني فرصه انا حتى ما اقدر اشوف أي حرمه ثانيه هاللحين خلني انسى على الاقل
ابوعبدالعزيز : لين متى يعني انت طقيت الثلاثين وانت ما تدري عن نفسك بعدين تقولي ابغى انسى اذا السالفه مر عليها اكثر من السنتين وما نسيت كم تبي عشر سنين علشان تنسى
سلطان يفكر هين انا الحين بخليكم تسوون اللي تبون واذا بنت الناس عافتني ذيك الساعه وطلقتها بتحرمون تجيبون لي طاري العرس
سلطان: اللي تشوفه يبه انت سنع الموضوع مع اهلي و اذاخلصتوا علموني
ابو عبدالعزيز: زين قل لامك مواصفاتك وشروطك
سلطان باستهتار :مايحتاج انا واثق في ذوق امي
ابوعبدالعزيز : يلا اجل خلنا نطلع ونبشر اهلك
سلطان: لحظه يبه في احد غيرك يدري عن موضوع فيونا, ابوي والا امي واخواني
ابوعبدالعزيز: لا تطمن انا وابوك بس
سلطان:ممكن اعرف من اللي علمك؟متعب صح
ابوعبدالعزيز: من متعب؟ آه تقصد خويك لا آصلآ أنا ماشفته من قبل لا تسافرون, وانا اذا بغيت اعرف شي اعرفه حتى فهد ونواف اعرف وش قاعدين يسوون هناك يعني لا تخاف صديقك ما قالي شي ولو اني زعلت الحين عليه
سلطان: ليش عاد
ابوعبدالعزيز:لان عنده خبر بالسالفه وما قالي عنها افرض اني ما دريت
سلطان في نفسه ياليتك ما دريت, اموت واعرف بس من اللي علمك
ابوعبدالعزيز: يلا نطلع
طلع سلطان مع جده للصاله
ناصر: واخيرآ خلص الاجتماع السري ما بغيتوا هاه عساكم حليتوا قضية فلسطين
ابوعبدالعزيز: تتطنز انت ووجهك بس الشرهه مب عليك على اهلك اللي ماقصوا لك لسانك يومك صغير
ناصر: آفا وانتم ما تبون احد يقول رايه وش هالاستبداد والدكتاتوريه ابد مافيه ديموقراطيه في هالبيت
ابوعبدالعزيز: اقل انطم بس وخل الكلام الكبير لاهله وخلني ابشر اهلك يلا يا ام سلطان خلاص دوري العروس لسلطان
ام سلطان وهي مو مصدقه: من جدك ياعمي
ابوعبدالعزيز: وهالامور فيها مزح
ابوسلطان: مبروك وانا ابوك الله يسعدك ويوفقك
سلطان وجهه متغير:انا بطلع الحين مع السلامه
ام سلطان لحظه شوي خلنا نتكلم مع بعض شوي
سلطان : بعدين يمه بعدين وطلع بسرعه
ام سلطان : وش فيه كأن ماوده بالعرس انت غاصبه ياعمي
ابو عبدالعزيز :لاماغصبته بس تعرفين الشباب اصعب شي عندهم انهم يتخلون عن عزوبيتهم وحريتهم, ويلا انا بروح للبيت وين هيفاء
ام سلطان:تو الناس يا عمي مابعد سولفنا مع بعض حتى ريم و هيفاء مابعد خلصوا من السوالف توهم رايحين فوق
ابوعبدالعزيز: خلاص ماعادالاخير انا مااحب السهر مافيه خير, وقولي لهيفاء اذا تبي تنام عندكم براحتها واذا ما تبي خلي ناصر يوصلها لاتجي مع السواق لحالها في الليل , في أمان الله
ابوسلطان وام سلطان :مع السلامه


هل أم فيصل بتزوج فيصل من عواطف بالغصب ؟؟ و وش بيسوي سلطان علشان يوقف مخطط أهله

لجزء السابع

منى واقفه عند الدريشه في غرفتها وتناظر في البيت اللي قدام بيتهم وخصوصآ الدريشه الثانيه على اليمين واللي كان النور فيه مطفى وتكلم نفسها : ياربي اموت واعرف هذي هي غرفته والالا, استغفر الله العظيم انا وين مخي ووش قاعده اسوي بس والله صورته الله يلعن ابليسه ماراحت من بالي هو وخشته, بعد ربع ساعه جاء ووقف سيارته عند الباب راحت منى بسرعه وطفت نور غرفتها وسكرت الستاير وخلت فتحه صغيره علشان ما يعرف ان فيه احد يطل مع الدريشه
نزل من السياره وكان لابس جينز اسود وقميص ابيض فيه كتابات بالاسود وشعره فيه جل وكان كثير ولونه اسود
منى: يقطع شيطانه بيطير لي عقلي هو ووسامته رفع راسه اول مانزل من السياره منى رجعت على ورى :بسم الله فيه جني ذا كأنه حاس ان فيه احد يراقبه
دخل للبيت وسكر الباب منى :آه ياقلبي بس, فتحت الدريشه الستاره وولعت النور, خلني ازين شعري قبل لا انزل لايقول ابوي وش هالشوشه اعرفه التجعيد عنده وسخ الله يهديه وقفت منى عند المرايه وقامت تزين شعرها
راكان راح لغرفته وفتح الدريشه قبل لايفتح النور وشاف الغرفه الوحيده اللي كانت منوره في الدور الثاني في بيت جيرانهم والستاير مفتوحه حاول يركز اكثر وشاف وحده واقفه وحركاتها غريبه :كأنها هي بس ماني متأكد معطتني ظهرها لا تكون امها وانا قاعد ابحلق فيها ,بس الشرهه علي لنا ست سنين وحنا جيران ماقد ركزت ولا عرفت ترتيب غرفهم
التفتت منى تدور جوالها علشان تاخذه قبل ماتنزل ومالقته راحت للطاوله اللي عند الدريشه وخذته وقبل لاتبعد ناظرت الدريشه اللي كانت واقفه تراقبها قبل شوي بس ما انتبهت للي واقف يراقبها خذت جوالها راحت عند باب الغرفه وفتحته وسكرت انوار غرفتها وطلعت
راكان:هذي هي ماشاء الله قمر بس انشاء الله تكون هذي غرفتها ,لازم اعرف,شكلي كل يوم بوقف هنا لين ما اتأكد

***********************************
سلطان اتصل على متعب طبعآ ابوعبدالعزيز اتصل على متعب قبل سلطان وقال له عن اللي صار
متعب:هلا سلطان كيف الحال
سلطان: وينك متعب
متعب: انا في الخرج
سلطان: وش وداك في هالليل
متعب: والله المدام واهلها طالعين لمزرعتهم ورحت معهم, وش فيك صوتك متغير
سلطان: لاسالفه طويله ما تصلح في التليفون
متعب: خلاص انت وينك فيه مسافة الطريق واكون عندك
سلطان: لا والله لاتجي تقطع 80 كيلو علشاني خلك هناك السالفه بقولها لك بكره ان شاء الله
متعب: سلطان تكفى قل لي وش فيك طيب
سلطان: اول شي عندي سؤال انت قايل لاهلي عن سالفة فيونا
متعب الحمدلله انك ماتشوفني : لا , وين هالسالفه قديمه ليش وش اللي صاير
سلطان : ابوي و ابوي سعود يدرون بالسالفه
متعب مسوي نفسه متفاجأ : لاياشيخ وش دراهم
سلطان : اذا مو انت اللي قايلهم فأنا ما ادري وهذا اللي مجنني زياده
متعب : ما سألتهم؟ وبعدين وش اللي مجننك غير هالسالفه
سلطان: على آخر عمري أنا سلطان السامي اهلي يغصبوني على الزواج مثل البنات
متعب: هاه وش تقول. قلي السالفه من اولها والابتلا قيني عندك بعد ساعتين
سلطان قال السالفه كلها لمتعب
متعب: غريبه وشلون عرفوا اهلك بالسالفه واذا على سالفة العرس لاتخاف ما تدري يمكن خيره لك (وعسى ان تكرهوا شيئاً وهو خيراً لكم )
سلطان: والله ماظنيت, انا ما ابي اتزوج بس اهلي ما يفهمون وابوي سعود على باله اذا تزوجت بأنسى اللي صار انا مستحيل انسى فيونا وحتى لو نسيتها مستحيل احب وحده ثانيه ما ابغى اعيد اللي صار لي ما ابي اتألم واتعذب علشان الحب
متعب: الحمدلله ومن قال لك ان كل الحريم مثل فيونا وإلا الحب كله عذاب وحسره يا أخي انت لاتشوف الجانب السيئ للموضوع لولا تعمم التجربه اللي صارت لك , اجل كل هالناس المتزوجين واللي يحبون بعض يتعذبون ويتحسرون
سلطان يقاطعه: متعب لا تقعد تنظر علي وتتفلسف انا الحريم ماعاد اواطنهم
متعب : الظاهر انت فيك عقده من الحريم
سلطان : تتطنز؟
متعب : لاوالله جاد اذا نص المجتمع ما تواطنه فهذا يدل ان عندك خلل
سلطان : تصدق الشرهه علي اللي قاعد اشكي لك وانت تتطنز, اقول مع السلامه وانتبه للخط وانت جاي لاتسرع
متعب : انشاء الله مع السلامه اذا ماراح تتقبل رأيي المره الثانيه لاعاد تتشكى علي

************************

ثاني يوم بيت ابو عبدالله
ساره جالسه عند التلفزيون في الصاله ومعها شيبس ليز حجم كبير وبيبسي وتناظر المباراة
نجوى وش تناظرين
ساره: مباراة الهلال طائره نهائي
نجوى : نهائي هالوقت؟
ساره: البطوله الخليجيه
ام عبدالله : طيب صكي التلفزيون وروحي شوفيه فوق ازعجتي اختك توها طالعه من المستشفى
ساره:لا والله محد قال لها تولد امس وتطلع اليوم
نجوى: انطمي واسمعيني بس, خالتي لها فتره وهي تلمح ودها تخطبك لولدها عبد الرحمن وش اقولها
ساره وع من زين ولدها : قولي الله يستر علينا وعليكم وقامت تصفق
ام عبدالله : سويره ووجع اختك تحاكيك خلي هالمباراة واسمعيها
ساره: اسكتوا خلصنا شوطين وباقي واحد عسانا نخلص ونرتاح ما نبي نمدد شوط رابع وانتوا لو سمحتوا أجلوا سواليفكم لين ما تخلص المباراة
نجوى : يمه انتي متأكده ان هذي بنت
ام عبدالله : هذا اللي قالوه المستشفى حتى انا شاكه فيها
ساره بصوت عالي : حرام ياحكم ماتشوف ما فيها لمس للشبك ما لمسها أصلآ
نجوى : حرام عليك انتي ياسويره قصري صوتك ما صدقت هالصغيره تنام تبين تقومينها
خلصت المباراه وفاز الهلال
ام عبدالله: خلصت
ساره : ايه
ام عبدالله : صكي التلفزيون واسمعي
ساره تقاطعها : شوي يالغاليه خلني اشوف التتويج
بعد ما خلص التتويج صكت ساره التلفزيون : نعم يمه وش تبين
نجوى : وش اقول لخالتي ترى الولد ما عليه ,ما ينرد
ساره: انا ما أبي اتزوج, لا وآخذ عمكم انا خوات زوجك ما احبهم هالدلوعات تبيني اخذ اخوهم وع الله لايقوله لا وأنتي تصيرين سلفتي وع وع وع
نجوى : من زينك لك الشرف انك تكونيين سلفتي
ساره : خلي شرفك عندك ما ابيه, استغفر الله نجوى سلفتي وذوليك الشيف حمواتي تف تف وقامت تنفض بلوزتها الشر برى وبعيد
ام عبدالله : وانتي بتاخذين الولد والا خواته
ساره: انا لا ابي لا الولد ولا خواته وكم مره قلت لك يمه زواج ماني متزوجه لين اخلص دراستي ترى توني في السنه الاولى يعني باقي ثلاث سنين وشوي
ام عبدالله : اكثر البنات تزوجوا وهم يدرسون
ساره : لا والله بناتك ما تزوجوا الا بعد ما خلصوا الجامعه والا تبين الفكه مني
ام عبدالله : انا اخاف عليك تردين الكفو بعدين ما يجيك احد يستاهل
ساره عصبت : يمه نصيبي اللي ربي كاتبه لي باخذه غصب عني وعنكم ولو سمحتوا لاتجيبون لي طاري العرس قبل التخرج , وراحت ساره لغرفتها
نجوى : خلاص يمه لاتغصبينها خليها على راحتها هي صادقه نصيبها اذا جاها بتاخذه

***********************************

بيت ابوسلطان على العشاء
ام سلطان: هاه سلطان امس جدك قال ندور لك على عروس والحمدلله البنت موجوده ساره صديقة ريم ما راح نلقى احسن منها انت شفها اول علشان اذا جازت لك نتحرك عاد
سلطان اوف امي ما صدقت امس قالهم ابوي سعود السالفه
ريم : صادقه يمه بعد حنا ما نضمن ان البنت توافق عليك
سلطان بغرور : بعد ويمكن ما توافق ليش تتكلمون وانتوا ما تدرون عنها اذا ضمنتوا موافقتها تعالوا اسألوني وش رأيي
ريم بعصبيه : لايا شيخ تستهبل وشلون تبينا ناخذ رأي البنيه وحضرتك ما بعد قلت رايك والا تبي البنيه توافق بعدين نقول لها آسفين اخونا ما وافق خيرها بغيرها
ابو سلطان : بس عاد انت وإياها امك معها حق شف البنت اول بعدين قل رأيك
سلطان : ايه مو اذا رحت بيتهم وشفتها وما عجبتني مانيب قادر اقول ما عجبتني وحتى اذا قلت وش بيصير على علاقتك معها يا ريم
ريم :ألعب غيرها يالذكي ولا تصرف الموضوع ,شايفنا أغبياء علشان نخليك تشوفها وهي تدري
سلطان: ليش بتصورينها وتجيبين صورتها, اخاف تصير في الصوره احلى
ريم : بعد أقولك لاتصرف لاني بجيبها بكبرها للبيت وأخليك تشوفها وإذا بغيت تسمع صوتها وتشوفها وهي تتكلم تأمر أمر
سلطان : حرام عليكم تستغفلونها ترضينها على نفسك
ريم : لا ياشيخ على بالك مسوي اخلاق قال تستغفلونها قال
ام سلطان : مافيها استغفال حنا قصدنا شريف, وعادي لو أحد بغى يشوف ريم بهالطريقه بقصد الزواج أنا اللي برتب له الموضوع
سلطان:عطوني وقت أفكر في الموضوع
ام سلطان : فكر بعد ما تشوفها :ويلا ياريم قومي دقي عليها وحددي موعد علشان تزورنا
سلطان: بهالسرعه ماصدقتوا
ريم : ترفق على عمرك عاد هي اللي على طول بترد علي
سلطان باستهزاء ليش حضرة البرنسيسه تستقبل وفود والا تودع وزراء
ريم باستهزاء : لا توقع شيكات
ام سلطان : انا بروح انام وراي بكره شغل من الصبح
ابو سلطان : وانا بعد تصبحون على خير
سلطان وريم : تصبحون على خير
ريم : وانت ماودك تنام
سلطان: لا ليش قاعد على رأسك
ريم:لا والله بس تكفى سلطان اسهر معي اليوم والله اطفش لحالي ,نصور ما يرجع الا قبل الفجر
سلطان :Ok بس عندي شرط
ريم: انت تامر مو تشرط بس
سلطان : نلعب مونوبولي من زمان ما لعبتها ودي العبها
ريم : كح كح وش ذا الغبار , يا قدمي صدق انك مغبر وش ذكرك فيها
سلطان : مدري بس ودي العبها من كم يوم
ريم : خلاص بس لحظه خلني اقول للسواق يروح يجيب لنا وحده من محل الالعاب
سلطان : وش رايك نروح نشتري حنا احس اني طفشان
ريم : غريبه الشمس من وين طالعه اليوم وش هالاخلاق اللي عندك اليوم وقامت عنده خلني أشوف حرارتك أخاف مسخن والا شي
سلطان وهومكشر : تصدقين الشرهه علي اللي عاملتك زين صدق البزر بزر,خلاص هونت بروح أنام
ريم : لاتكفى سلطان امزح آسفه ماكان قصدي وهذي حبه على راسك لا تروح وتخليني
سلطان : طيب خمس دقايق اذا ما لبستي عبايتك بروح واخليك انا بأنتظرك في السياره
ريم راحت بسرعه تجيب عبايتها وركبت السياره شغل سلطان السياره ومشى
رن جوال ريم شافت المتصل واستغلت الفرصه فتحت السبيكر: هلا سويره صدق لاقالوا اذا طري الكلب ولم العصى
سلطان التفت على ريم علشان تكلم من السماعه وهي مطنشه
ساره: أقول ما الكلبه غيرك الناس يقولون اذا طري الحصان ولم العنان والطيب عند ذكره مالت عليك ما عندك اسلوب تعلمي من امك شوي بعدين وش مطريتني فيه عسى موب حش
ريم: بسم الله وش دراك اني احش ,امزح ياقلبي بس طريتي على بالي وقلت بدق عليها
سلطان يأشر لريم وهي مسويه نفسها مو منتبهه
سلطان يكلم نفسه فرصه يلا خلني اطلع عيوب هالساره من الحين علشان اذا قلت ما عجبتني يكون عندي قائمه بعيوبها
ساره: دام هذي نيتك أجل مع السلامه دقي انتي لا تجي الفاتوره ضربه
ريم: هي يالبخيله وش عندك داقه
ساره: حبيت ابشرك اني صرت خاله للمره الثالثه
ريم: على البركه ولد والا بنت
ساره : بنوته تهبل مثل القمر طالعه علي
سلطان الحمدلله والشكر صدق لاقالوا مداح نفسه كذاب
ريم: ياعمري هالبنيه دامها طالعه عليك الله يصبرها بس على مقابل خشتها
ساره: الظاهر محد قد عطاك كف يبرم لك وجهك علشان تعرفين تتكلمين, سؤال انتي من طالعه عليه
جدك ماشاء الله محترم ورزين وأبوك عاقل واخلاق وامك ذوق وسلطان اخوك عقل وثقل وفهد خفيف دم حتى طارق المرجوج ارحم منك
ريم: حشى اللي يسمعك يقول عايشه معنا, امي وقلت معليش شفتيها وابوي وجدي اكيد محترمين دامهم بهالعمر بس الباقين وش دراك عنهم
ساره: والله من كلامك عنهم عرفت ان فهد خفيف دم وطارق مرجوج
سلطان يرفع حواجبه وانا وين رحت
ريم تناظر سلطان وتضحك: ايوه باقي دراكولا آسفه اقصد العقل والثقل سلطان باشا
سلطان خبط ريم على راسها
ريم: آخ وتناظر سلطان بحقد
ساره :وش فيك ريوم؟
ريم: مافيني شي خبطت الطاوله برجلي
ساره:تستاهلين بس شكلك مو في البيت
ريم: لالا بس قاعده في الحديقه المهم كملي وش دراك عن سلطان اخوي
ساره: ما تلاحظين انك ازعجتيني باخوانك انا مدري عن هالسلطان بس انتي من كلامك انه ثقيل وشايف نفسه عليكم ومايحب الحركات اللي مثل وجهك وبصراحه ما ألومه إذا ماعطاك وجه انتي لو اختي تبريت منك
سلطان هز راسه وضحك لان دايم تجيه هالفكره انه يتبرأ من ريم اذا قامت تستهبل عليه
ساره تكمل وهي ماتدري عن ريم واللي تسويه: علشان كذا حسيت انه عاقل على امك موب رجه مثلك
سلطان يناظر ريم بغرور
ريم ماسكه الجوال بيدها وتكلم سلطان بهمس: وش عليك هذي مابعد خذتها وتدافع عنك اجل بعدين وش بتسوي سلطان تذكر سالفة الزواج وكشر
ساره:رويمه وينك من تحاكين
ريم: المهم ساره اسمعيني ابيك تزورينا هالاسبوع
ساره :خير ان شاء الله
ريم: نسيتي الموضوع اللي قلت لك عنه
ساره: خبري انك انتي اللي بتجيني مو انا
ريم:لا الوضع تغير انتوا عندكم نفاس بالبيت وناس طالعين وناس داخلين وماراح نأخذ راحتنا انتي تعالي لي
ساره: والله ما ادري اهلي شديدين شوي في سالفة المسايير للصديقات بس بأحاول
ريم:اذا امك ما وافقت بخلي امي تكلمهاOK
ساره: OK يلا ياقلبي تبين شي بروح اشوف كل الرياضه بيجيبون تقرير عن الهلال بكره مباراتنا مع الاتحاد
ريم : جعلكم تنهزمون
ساره : جعلك المر يالحماره يلا بس مع السلامه
ريم جتها ضربه على راسها
ريم : آه راسي
ساره : تستاهلين بس وش السالفه
ريم : عن اللقافه توك بتسكرين السماعه هذي الخدامه جعلها العمى خبطتني على راسي بالمكنسه
ساره : يا حبي لخدامتكم خذت حقي منك سلمي لي عليها وبوسيها على راسها,ومع السلامه
ريم : مع السلامه
ريم: سليطين ووجع
سلطان ينزل راسه: وصلي بوسة صديقتك اول
ريم: تخسي ياقليل الادب ما صدقت خبر توك تتطنز عليها أشوف عجبتك السالفه
سلطان:لاحول انتوا ان مزحنا معكم قلتوا عيب وان ما مزحنا قلتوا معقدين بعدين سالفة العرس بكبرها مادخلت مزاجي بس هالبنت هي اللي بتأخذ حق العالم منك
ريم: خير شايفني ماكله حلال العالم انا

********************************

لجزء الثامن
بعد ثلاثه ايام

ساره: يمه تكفين ما أبي انزل وع ما أحب حمولة نجوى, خوات صلاح يجيبون المرض شايفين انفسهم وش بيسون اذا شافوني بهالحاله
ام عبدالله: سويره كلي تبن وانزلي ساعديني بعدين انتي ما فيك الا العافيه البسي النظاره وانزلي
ساره: يمه الخدامه موجوده والصبابه بعد فيه وانتي وسوسن فيكم البركه, انا وش ينزلني معكم لا وتبيني احط نظاره سودا وانزل خير شايفتني ام كلثوم على غفله
ام عبدالله: واذا سألوا عنك وش أقول لهم ؟ أقول هي ما تحبكم وما ودها تشوفكم, والا عيونها تعورها وماتبي تنزل بدون كحل, استحي على وجهك حتى اختك بتزعل إذا ما نزلتي
ساره: أنا ونجوى نتفاهم وهم ذيك الساعه اذا سألوا عني قولي في بيت امها ساره
دخلت سوسن وسمعت آخر شي : لا يمه قولي فيها جرب وبتنزل بعد شوي وبنت أمها اللي بتجلس دقيقه عندنا
ساره : هاهاها لا أنتي قولي فيها جرب ولا تقولين بتنزل وأنا عاد بأسويها مفاجأه وأنزل والله أن يهجون من البيت ولاعاد يقبلون
سوسن : أي والله ونرتاح من خششهم لين ما تتم نجوى من الاربعين
ساره : يا حليلهم تخيلي ذوليك المايعات وهم طالعين من البيت يهابدون وبدون عبايات
سوسن : ذيك الساعه بتعرفين وش معنى كلمة يتصنعون الدلع
ام عبدالله: الحمدلله والشكر بس عالعموم براحتك لاتنزلين بس بكره ما فيه روحه لبيت ريم
ساره: ياربيه يمه حرام عليك
ام عبدالله: انا قلت اللي عندي يلا انا بنزل تحت
ريم قامت من السرير: الله لايحيهم وش جابهم اليوم, البنت ما بعد كملت اسبوع من ولدت ,علبالي نحب مرة ولدنا وحفيدتنا
ساره جاها فيروس في عيونها ومنعها الدكتور من مكياج العيون ومن التعرض للضوء القوي وكتب لها نظاره سوداء تلبسها في الاماكن اللي إضائتها قويه واللي فيها شمس
لبست ساره تنوره ضيقه رماديه قصيره لنص الساق ولبست قميص ابيض ضيق ورفعت اكمامه لين أكواعها ولبست فوقه حزام اسود عريض وصندل اسود كعب واكسسوار اسود وشعرها خلته مستشور ولبست طوق فضي مع اسود والمكياج حطته احمر وخلت عيونها بدون مكياج ولبست نظاراتها الطبيه العاديه ونزلت وهي فيها الصيحه
جت ام صلاح وخواته وقريباتهم والبنات طلعوا يجلسون برى في الصاله
سوسن جلست جنب اختها وقبالهم جلست رحاب ومها خوات صلاح والجهه الثانيه بنت خالته سمر وجنبها ابرار بنت عمته
ساره بصوت واطي :الله يعيننا على ثقالة الدم
سوسن وهي تبتسم :قولي وشلون نجوى متحملتهم الله يعظم أجرها شوفي الحمدلله والشكر مسويه دلوعه و من زود النعومه ترمش ستين مره في الدقيقه
ساره : لا هذي ميب نعومه انتي ما تدرين ان هذي تتدرب تبي تدخل موسوعة غينس
سوسن : هاهاها الله لا يبلانا
رحاب ومها توأم و اكبر من ساره بسنه ومها اصغر من ساره بسنتين وسمر وابرار كبر بعض واكبر من سوسن بسنه
رحاب: انتي أي قسم ياساره
ساره:إداره عامه
مها: وع وش دخلك لها القسم الخايس كل اللي فيه مغارير
ساره والله انتي اللي وع : والله كل واحد ورغبته
رحاب :حولي بس لقسم ثاني لاتقعدين فيه موب زين يجيب المرض
ساره محد يجيب المرض غيرك : والله انا ما دخلته علشان احول بعدين اللي اعرفه انك ما درستي الا فصل واحد في الجامعه وتاريخ بعد يعني ماتدرين عن القسم
رحاب : ايه بس نسمع من البنات اللي فيه
ساره: وانا ماطلبت رأي احد
سوسن بصوت واطي : وش هاللقافه اللي لو نوزعها على سكان السعوديه كفتهم وزود
ساره: قولي سكان الخليج والا الوطن العربي و تكفين انطمي لايسمعونك مالنا خلق هواش
ابرار : سلامات عيونك متغيره عسى ماشر
رحاب : ايه صح من متى وانتي تلبسين نظاره محد علمنا انك تلبسين و نجوى ماقالت لنا
ساره: وش المناسبه علشان تقولكم
رحاب ومها يتكلمون بصوت واطي بس ساره سمعتهم :الحمدلله ان حنا عرفنا انها تلبس نظاره قبل لايتدبس فيها عبدالرحمن أخوي
سوسن : شف الوقاحه ما ألومك يوم رفضتي ولدهم
ساره : طنشي وعطيهم على قد عقولهم حرام نحرق اعصابنا عليهم
سوسن : ابي اعرف نجوى وشلون متحملتهم
ساره:عادي هي مدرسة احياء يعني مر عليها انواع من الكائنات الغريبه متعوده
سوسن: هاهاها حلوه
ساره : انطمي الله يعافيك قاموا يناظرونا
سوسن : طقاق ما هموني
ساره : اقصري الشر علشان نجوى وصلاح وامهم الضعيفه
سوسن : مدري وشلون وهم وصلاح اخوان ذاك هادي ومؤدب وهذولا اللقافه مقطعتهم
مها : اقول ساره انتي ما انخطبتي ما احد تقدم لك
ساره و سوسن يناظرون بعض وهم مستغربين
سوسن: امسكي اعصابك لاتتهورين
ساره: وليش هالسؤال وش المناسبه
مها: عادي بدون مناسبه سواليف يعني
ساره: معليش حبيبتي ما احب اسولف عن اموري الخاصه مع احد
رحاب: يلا عاد لاتستحين ما فيها شي قولي ما انخطبت ولا تقعدين تصرفين الموضوع
ساره وهي معصبه : وحتى لو اني ماقد انخطبت صدقيني راح اقول وماراح استحي خصوصآ من اللي مثلكم
سمر: وش قصدك باللي مثلنا
سوسن تبي تهدي السالفه علشان ما تكبر : يعني انكم من الاهل
مها : دامنا من الاهل وش خايفه منه ليش ما تتكلم والا اخاف في بالك احد
ساره وشوي وتنفجر : كلاً يرى الناس بعين طبعه الحمد لله انا بنت ناس ومتربيه وموب ساره بنت محمد اللي تفكر مثل هالتفكير
ساره ياحظ هند اول مره احسد وحده على الزواج قامت ساره وطلعت من الصاله وراحت فوق
لحقتها سوسن : ساروه تكفين استرينا مع الناس وانزلي قبل لاتدري امي وتعصب كلها ساعه بيتعشون ويطسون
ساره : وع ما ابي ان نزلت بتهاوش معهم ,تكفين سوسن انتي انزلي وإذا سألت امي عني قول راسها يعورها وعيونها بعد وما قدرت تتحمل وانا بطفي علي النور وبنام تكفين سوسن الله يخليك
سوسن:طيب بسوي اللي اقدر عليه
ساره: ياحبي لك وقامت وباست اختها يلا انزلي وتصبري معليش ان الله مع الصابرين
سوسن: شوفي يا اني بصبر يا اني بنهبل واحد من الاثنين
ساره: لا ان شاء الله بتصبرين وانا بأدعيلك بس يلا خلصيني واذا ذ لفوا علميني
سوسن:طيب يصير خير
نزلت سوسن وجلست مع الضيوف لين ما راحوا وعدت هالليله على خير

***********************

بيت ابو راكان
راكان واقف مثل العاده عند الدريشه ويناظر الغرفه اللي مقابله غرفته في بيت جيرانهم :هذي هي دخلت الغرفه الله يستر لاتنتبه لي
منى دخلت غرفتها وفتحت المسجل ووقفت عندالمرايه: ياربي كأني سمنت لازم انحف يبي لي اسجل في نادي دخلت عليها امها
ام فيصل: وجع وش هالصوت صكي هالمسجل وإلا قصري عليه كسر روسنا
منى: طيب يمه بس لحظه لاتروحين ابيك بسالفه
ام فيصل: وش تبين
منى: يمه بسجل في نادي
ام فيصل: أي واحد الهلال والا النصر
منى وهي معصبه :هي هي هي بايخه ما تضحك
ام فيصل : وجع إن شاء الله تطنزين الظاهر نسيتي اني امك
منى: انا ادري عنك الله يهديك ,يمه انا قاعده اكلمك جد وانتي تمزحين
ام فيصل: وش تبغين بالنادي
منى:ابغى انحف
ام فيصل: وش بقى فيك علشان تنحفين
منى: يمه سمنت
ام فيصل: صادقه صرتي برميل يالله تدخلين مع الباب من السمنه
منى: ليش تتطنزين, ليش ما تحترمون أراء عيالكم
ام فيصل: من زين أرائكم عاد, اقول انثبري بس نادي ما فيه بكره اذا جاء سلطان يخطبك بيقول ما ابي هالمعصقله
منى: من زينه عاد العملاق الاخضر وانا اصلا ما ابيه
ام فيصل: عاد اذا جاء من قال اني بأشاورك يلا بس طفي هالاغاني وانزلي تقهوي معنا
منى بعناد: ما ابي قهوه , بقعد ارقص لين ما أنحف النص
ام فيصل: بقريح بس لاتجيني في الليل تقولين عطيني كريم ادهن به ,رجولي وعظامي تعورني
منى: اذا جيتك لاتعطيني
طلعت ام فيصل منى طولت على المسجل وخذت ايشارب وربطت خصرها وقامت ترقص قدام المرايه
راكان يضحك : هالبنت مجنونه دايم ترقص بس والله حلوه حتى رقصها حلو
منى رقصت شوي وما طولت طفت المسجل وهي متضايقه من الكلام اللي قالته امها
راحت وقفت عند الدريشه تسندت على الاطار قامت تسحب شعرها خصله خصله من الربطه بعدين فكته وقامت تلعب بالربطه وهي سرحانه
راكان: شكلها متضايقه , ياليتني اقدر اشيل همك يا منى ياليت
من لمت شعرها وربطته مره ثانيه وتكلم نفسها وهالراكان وينه بعد من زمان ما شفته مالت عليه وقامت تناظر الدريشه في بيت جيرانهم وحست بحركه عند الشباك الثاني حاولت تركز اكثر وهي تكلم نفسها : كأن فيه احد واقف هناك
راكان كان حاط جواله على إطار الدريشه ورن جواله فجأه وبما أن راكان كان واقف في الظلام منى انتبهت لإضاءة الجوال يوم رفعه راكان بسرعه ورماه على السرير
منى بصدمه: يقطع شيطانه من متى وهو واقف وش شاف ومن متى وهو عارف ان هذي غرفتي ياخزياه وش بيقول وسكرت دريشتها بقوه وسحبت الستاره
راكان: يالله شافتني ,شكلها عصبت عسى ما تقول لأحد الله لايعيد هالجوال ولا ساعته
بيت السامي بعد العصر
ام سلطان: ريم اسمعي انا بأخلي سلطان يجلس في الصاله وانتوا اجلسوا برى عند المسبح وبكذا يقدر يشوفها براحته بس لاتخلينها تقرب مره جنب القزاز انتي عارفه ان قزاز الصاله عاكس واللي جوى يشوف اللي برى بوضوح بس ان قربت ساره منه مره بتشوف سلطان
ريم : اخس وش هالافكار يا ام سلطان حركات والله
ام سلطان: لا و ازيدك من الشعر بيت اتصلت على عماتك علشان يجون يشوفونها بس عمتك جواهر اعتذرات وحنان ما صدقت خبر بتجي بعد شوي
ريم: يمه بتستحي البنت
ام سلطان: لا وش تستحي منه هي بسم الله عليها جريئه ماعليها خوف ويلا انا بروح اغير ملابسي

*************************************

ساره في غرفتها تجهز عمرها لبست تنوره لونها بيج غامق قصيره ضيقه من فوق وواسعه من عند الركبه ومطرزه ومخرمه من تحت بنفس اللون بس بدرجه اغمق شوي ولبست بلوزه كمها اقصر من الربع نفس لون التنوره فتحتها سبعه وتحت الصدر شريطه غامقه مخرمه ومطرزه ولبست اكسسوار نفس لون الشريطه والتطريز ولبست صندل بيج كعب وشنطه بيج واستشورت شعرها ولفته علشان ما يخرب من الحر وحطت روج بني فاتح بس
دخلت عليها امها: هاه خلصتي
ساره: أي خلصت
ام عبدالله: بتروحين للناس كذا شهباء لا روج ولاشي
ساره: الا يمه حطيت روج بس
ام عبدالله :وع وش هاللون موب واضح وين البلاشر والمكياج
ساره: يمه تبيني احط روج احمر وانا لابسه بيج بعدين ما ابي احط مكياج في وجهي واخلي عيوني وش يجي شكلي كأن وجهي مقسم خليني كذا ارحم وريم متعوده على شكلي في الجامعه
ام عبدالله: كيفك روحي وأنتي حمصاء الحمدلله والشكر واذا خلصتي دقي على خالد يجي يوديك
ساره: وليش وين السواق؟
ام عبدالله: السواق موجود بس خلي خالد اللي يوديك اول مره تروحين لهم واخاف تضيعين انتي والسواق
ساره: خلاص طيب
ام عبدالله: ولاتنسين نظارتك السوداء البسيها لايعورك راسك وانتي عند الناس مثل امس
ساره: انشاء الله يمه توصين شي بعد
ام عبدالله: لابس سلمي لي على ام سلطان
ساره :يبلغ ان شاء الله

**************************************
ام سلطان نزلت سلطان بالغصب للصاله
سلطان: يمه قلت لك بأشوفها مع الشباك اذا دخلت
ام سلطان: سليطين اسمع كلامي ولا تناقشني وعلى فكره جدك اتصل اليوم وحرصني على هالسالفه
سلطان: يا ربي متى بخلص من هالسالفه
ام سلطان: اذا تزوجت بترتاح
سلطان: ايه هين
ريم :هذي هي دقت تقول عند الباب بقول للخدامه تفتح
سلطان: خلاص يمه وصلتيني للمكان المطلوب خليني لحالي ممكن والا ترى بروح لغرفتي
ام سلطان: لاخلاص انا بروح اجلس مع حنان وبنتها في المجلس
وصلت ساره واستقبلتها ريم عند الباب وخذت عبايتها وعطتها الخدامه تعلقها
ريم: تعالي نقعد شوي هنا بعدين ندخل لان عمتي وبنتها عندنا ولازم نسلم عليهم جالسين في الصاله
ساره :اجل خليني ازين شعري واحط روج قبل لاندخل , الله يأخذ ابليسك كان قلتي لي قبل لا اجي
وجلست على الكرسي وفتحت شنطتها وقعدت تدور فيها
ساره : يالله شكلي نسيت مرايتي بس ما عليه هالقزاز يكفي وقامت ووقفت عند القزاز وهي تتزين
سلطان كان واقف يدخن ومو منتبه للبنت ورفع راسه من دون اهتمام ويكلم نفسه الحمدلله جايه بنظاره شمسيه مضيعه على بالها رايحه للبحر
ريم: سويره وش هالنظاره سلامات وين قاعدين فيه عالبحر
ساره: انتي اللي سلامات الرياض فيها بحر!! وقالت ساره السالفه لريم وسلطان يسمع
ريم : وليش ما قلتي لي
ساره باستغراب: وخير ياطير هو خبر زين علشان اقولك عنه
ريم: لا بس علشان ما تزوريني وانتي شكلك شين
ساره وهي تطنز: ليش بتخطبيني
ريم : لا بس احب اشوفك حلوه دايم
ساره :أصلا انا دايم حلوه وفكت شعرها اللي يوصل تحت اكتافها وكان لونه اسود وقاصته شلال ورفعت النظاره على راسها علشان تمسح الدموع اللي تنزل من عيونها وتقدمت علشان تشوف شكلها زين ,ساره كان اكثر شي حلو فيها عيونها ,مره حلوه واسعه وسود ونظراتها ساحره بس الزين ما يكمل على قول امها لآن نظرها شوي ضعيف وتلبس نظاره للقراءه والتلفزيون
سلطان رجع على ورى شوي واستغرب من التغير اللي صار يوم رفعت ساره نظارتها وفكت شعرها ويكلم نفسه صادقه امي البنت حلوه بس فيونا احلى,آه يافيونا وينك بس
ريم :يلا ياسويره البيت مليان مرايات وترى ما عندنا احد بيخطبك يكفي تزين
ساره حبت تحارش ريم :لا تكفين حطمتيني عاد انتوا عندكم احد كفو والا يستاهل اني اخذه ,مالت عليك فرحانه في المهابيل الثلاثه اخوانك وهي تضحك ريوم عاد انتي شوفي كل واحد من اخوانك وركبيه على الصوره اللي تناسبه من صور المهابيل الثلاثه هذاك ابو شعر ناعم احسه فهد واللي شعره شوشه دايم مكشر ينفع له سلطان والسمين الغبي ينفع ناصر كملت عايلتكم وقامت تضحك
سلطان كان وده يطلع ويعطي البنت كف ويرجع لمكانه
ريم امنيتها تشوف وجه سلطان في هذيك اللحظه وودها تضحك بس مسكت عمرها: ترفقي بس يا قمر زمانك كل شي الا اخواني
ساره: وع من زينهم
ريم: ليش عيوني قاصرهم شي اصلآ لك الشرف انك تأخذين واحد منهم
ساره : ارحمك, اللي يسمعك يقول واحد توم كروز والثاني رونالدو ديكابري والثالث انطونيوبانديراس اسكتي بس الله يرحم حالك انتي وإياهم
سلطان : لاوالله يا مارلين مونرو على غفله ,هالمغروره صدقت يوم مدحناها
ريم: من زين اخوانك عاد
ساره: ادري واحد سعيد والثاني عيد اللي في بابا فرحان على قول سوسن
ريم : وانتي بقرتهم ام الخير
ساره: لاهذيك سوسن انا سموره
ريم: ما علي منك انتي واخوانك اهم شي اخواني, حبيبتي عيال عبدالعزيز كل بنات الدنيا يتمنونهم موب هالشهبان اللي قلتي عنهم
ساره:اكيد الكل يتمناهم دامهم عيال عبد العزيز الا وش رايك تخطبيني لعبدالعزيز
ريم: يالكلبه ما لقيتي الا ابوي تراه كبر ابوك
ساره:ايه احسن الكبير يدلعني وفرصه اعيش معك واصير خالتك
ريم: تخلخلت عظامك يالحماره ترى بعلم امي
ساره:لا امزح كل شي إلا خالتي وابوك خليه عندك واخوانك بعد انا أساساً منيب متزوجه الا بعد خمس سنين وذيك الساعه بأخذ واحد على مزاجي أخليه يمشي على الطين ما يلخبطه, هاه وش رأيك فيني اعجبك الحين احسن من ذيك الشروط
ريم:الظاهر اللي بتأخذينه بيمشيك على النار
ساره:ما بعد جابته امه اللي بيأخذني ويضايقني بكلمه, حبيبتي كلمه مو يمشيني على النار
سلطان هذي يبيلها تكفيخ شكلي بتهور و أوافق عليها بس علشان أأدبها واعلمها منهم المهابيل الثلاثه
ريم حست ان اخوها بيكسر القزاز ويطلع وسحبت ساره لداخل البيت علشان ما تخرب الدنيا اكثر مما خربتها

طلع سلطان للحديقه من الباب الثاني وهو يغلي والله من هي بنته هالمغروره, شايفه نفسها على ايش ما ادري صدق هي حلوه بس لسانها طويل ويبي له قص

دخلت ساره وريم للمجلس سلمت ريم على عمتها وبنتها وجود وسلمت ساره على ام سلطان
ام سلطان: ياحي الله من جانا تو مانور البيت
ساره: البيت منور بأهله يا خالتي
ام سلطان: وش اخبار الاهل؟
ساره: بخير الله يسلمك والوالده وخواتي يسلمون عليك
ام سلطان: الله يسلمهم وان شاء الله نزور نجوى ونتحمد لها بالسلامه
ساره: الله يحيكم في أي وقت ياعمري, انتوا تشرفونا والله
ام سلطان تأشر على حنان: هذي عمتنا حنان
ساره: هلا وغلا كيفك وكيف العيال ان شاء الله بخير
حنان: بخير الله يسلمك
ساره شافت بنت شكلها موكبيره جالسه جنب حنان : اكيد انتي وجود
وجود: وش دراك؟
ساره : وهل يخفى القمر ريم سولفت لي عنك يا عمري وتمدحك والتفتت على حنان ماشاء الله مو مبين عليك ان عندك بنت في المتوسط كأنكم خوات
حنان انبسطت من كلام ساره:الله يسلمك رفعتي معنوياتي وين رجلي يجي يسمعك
ساره: وانا صادقه يا قلبي ما كذبت يحصل له وحده مثلك!!
ام سلطان:ريم انا بأخذ عمتك ونطلع للصاله وانتوا خذوا راحتكم
ريم: لايمه بنروح غرفتي انتوا خلكم هنا
ساره بصوت واطي: ريم نادي وجود مسكينه
ريم: والله انتي المسكينه انا ابيك في سالفه محد يعرفها تبين هذي تفضحنا في دقيقتين
وجود لحقت ريم وساره: بأجي معكم
ساره: حياك وجود
ريم: معليش بعد شوي عندنا سالفه
وجود زعلت وراحت عند امها
حنان وام سلطان مايبونها معهم حنان: وجود حبيبتي روحي شوفي أخوانك يلعبون في الحديقه
وجود وهي معصبه: قولي اطلعي ولا تصرفين وطلعت وجود برى
ام سلطان: هاه حنان وش رايك في البنت
حنان: والله البنيه تهبل زينه وما عليها ولسانها بعد حلو ذوق ماشاء الله عليها
ام سلطان: ترى ما حطت مكياج مدري وش فيها جايه على طبيعتها والله يوم عرس اختها طالعه تهبل
حنان: اكثر من هالحلا وش بتجي اجل ماشاء الله
ام سلطان: طالعه قمر كلن يسأل عنها ذاك اليوم
حنان: اجل اخطبيها بس لولدك لاتضيعين البنيه من بين يديك
ام سلطان: انتي قولي على الله تعجبه
حنان: كان هذي ما جازت له اجل من اللي بيجوز له
ام سلطان: انا ادري بس ابيك تقنعينه معي
حنان: ولايهمك حرام هالبنيه تروح لغيره

************************************

وجود طلعت للحديقه وشافت سلطان جالس لحاله وراحت وجلست معه
سلطان: وش عندك ليش ما جلستي داخل
وجود: امي وامك صرفوني يقولون عندهم سوالف حريم
سلطان: كان جلستي مع ريم
وجود: عندها صديقتها
سلطان: طيب اجلسي معهم
وجود: رويمه ما تبيني مع ان صديقتها قالت لي تعالي اجلسي معنا بس ريم عيت
سلطان: احسن لك وش تبين فيهم اكيد سوالفهم بايخه مثل وجيههم
وجود: لاشكل صديقتها رهيبه مدري وشلون صاروا صديقات
سلطان: عادي كل ساقط له لاقط
وجود: لا وع وش جاب ريم لساره, ساره حلوه وناعمه وذوق
سلطان التفت لوجود وهو معصب: نعم وش قلتي
وجود وهي مستغربه: وش فيك سلطان
سلطان انتبه لنفسه: لامافيني شي انا بطلع مع السلامه
وجود: اجلس معي
سلطان يناظرها وهو مكشر: فاضي لك انا روحي لبيتكم احسن لك وطلع وخلاها
وجود: اوف كل ما جيت اتقرب منه زلبني بس اوريك ياسليطين ان ما نشبت لك ما اكون وجود
وراحت لامها : يمه
حنان:نعم
وجود: خلينا نروح للبيت مليت
حنان: تونا وش مطيرك
وجود:يمه طفشت
حنان: خلاص دقي على السواق وخليه يوديك للبيت انتي واخوانك وخلي الشغاله تروح معكم
وجود: اجل بنروح لبيت عمتي هند بجلس مع بنتها رنا
حنان:روحي بس لاتطولين عندهم

***************
رجعت ساره لبيتهم بعد ماقالت ريم لها انها تحب فيصل ولدعمها وزادت القصه من عندها علشان تألف سالفه لساره
بعد ما طلعت ساره راحت ريم لامها وعمتها: هاه وين سلطان شفتوه وش قال لكم وش رايه فيها
ام سلطان: شوي شوي بعدين هو طالع وتوني داقه عليه وقايلة له يرجع واذا جاء بيقول رأيه
اول مادخل سلطان تكلمت حنان: هلا وغلا بالمعرس زغردي ياريوم يستاهل ولد أخوي
سلطان وهو ماد الكشره: لحظه لحظه من قالكم اني موافق بعدين انتي وش دراك بالموضوع توها السالفه كلام ما بعد صار شي صدق لاقالوا حريم ما يأمنون على سر
حنان:مالت عليك يا ابودمجه هذا بدال ما تهلي وترحب فيني بعدين وش فيهم الحريم ما ملوا عينك
سلطان بتكبر: لاما ملوا عيني ودايم اتمنى أشوف العالم بدون حريم
ريم وهي معصبه: اكيد بيصير عالم كئيب مثل وجهك
ام سلطان: بس عادعن الهذره اللي مالها سنع المهم وش رأيك في البنت وعلى فكره هي جايه على طبيعتها وبدون مكياج
سلطان في نفسه :البنت تنفع لي لان لسانها طويل وما راح تصبر على اللي بتشوفه معي وهذا اللي ابيه
حنان:وش تبينه يقول صراحه البنت تنحب
سلطان: ليش انتي اللي بتأخذينها علشان تحبينها
ريم: اقول اخلص وعطنا الزبده
سلطان يطلع علبة الدخان من جيبه ويولع السيجاره وبكل برود:شكلها مقبول بس ناقصها شوية عقل على ركاده ويبيلها تأديب على هالغرور اللي فيها وقص لسان بعد وتصير ok
ريم وعيونها بتطلع من العصبيه:لا تصدق تكلفت فكر بعد يمكن ناقصها شي, تذكر زين, أقول صدق ما انت كفو اجل شكلها مقبول ويبيلها عقل وتأديب
حنان: اقول وانا عمتك وش رايك تصمم لنا الموديل اللي تبي علشان نفصلك وحده مثله والا تدري خلنا نجيب لك كتالوج وانت اختار
سلطان: بسم الله علي شبيتوا فيني انا وش قلت علشان تعصبون علي انا قلت رأيي بصراحه البنت مغروره ومرجوجه
ام سلطان:يعني تبيها وإلا لا
سلطان: خليني افكرواستخير اول
دخل ناصر: على ايش تستخير
سلطان: الناس يقولون السلام عليكم اول بعدين خل اللقافه عنك اخبرهاغريزه في البنات
ناصر يتكلم بدلع ومياعه:كل هالنعومه اللي فيني وما تبيني اخذ شي من مواصفات البنات
سلطان:ابي اعرف شي واحد انت من غاسل مخك وقايل لك انك ناعم او فيك ذره من النعومه يالجلف
ناصر:ما عليك شرهه الغيره مقطعه قلبك, علشاني اجمل منك قاعد تقول هالكلام
(( ناصر كان مملوح ووسيم في نفس الوقت ,أما سلطان كان أسمر و وجهه عريض وخشمه طويل وعيونه بنيه وكان فيه غمازه وحده في خده اليسارومملوح مثل ناصر, طويل وجسمه رياضي وله عضلات مع كل هذا فيه جاذبيه ورجوله وخشونه, فهد كان انحف واحد فيهم ابيض ووسيم وملامحه ناعمه اكثر من اخوانه ,ناصر جامع مواصفات الاثنين رجولة سلطان وجاذبيته ووسامة فهد))
سلطان: لا تتقطع علينا يالوسيم
حنان: ما عليك منه ياسلطان هذا أصلاً ما تدري هو بنت والا ولد جامع دلع البنات وشكل الرجال
سلطان: يلا عطنا مقفاك لايجيك اكثر
ام سلطان: بس عاد انت وإياه اللي يشوفكم يقول بزران , المهم سلطان لاتتأخر علينا نبي رأيك بسرعه
ناصر: ما تبون رأيي أنا
ريم:رايك في أيش لو تكرمت يا اخ ناصر ,اقول هي ليش انت ملقوف موضوع مايخصك وما تدري وشو أصلاً وتبي تبدي رايك فيه
ناصر:زين قولوا لي الموضوع يمكن أقدر افيدكم بأرائي النيره
حنان: لاتكفى ابعد انت وارائك عن سلطان وزواجه
ناصر:آفا يالعضيد بتتزوج ولاقلت لنا ماهقيتها منك
ام سلطان: يلا خل أرائك النيره تفيدنا واقنع هاللي قدامك انه يوافق على البنيه والا زوجتها لفهد
ناصر: وليش فهيدان ليش مو أنا
حنان: البنيه توها طالعه إلا انتي تبين تبليشينها بعيالك هالمغارير يا ام سلطان ,والله لوعندي ولد كبير كان زوجتها إياه وارتحنا
ريم:هي انتوا عاد لاتأخذون في أنفسكم مقلب وتصدقون ان البنت بتوافق على طول لأول واحد يخطبها أصلاَ هي ما تبي تتزوج
ناصر:لاتكون البنت اللي تتكلمون عنها هي اللي طالعه قبل ساعه
ريم :أيه هذي هي ليش وش دراك عنها
ناصر: كنت ناسي جوالي وجيت آخذه وشفتها وهي تركب سيارتهم ,لا يمه اجل انا ابيها شكلها سنعه طول وجسم رزه ماشاء الله
سلطان : ناصر احترم نفسك عيب تتكلم عن البنت كذا لاأقوم أكسر لك خشمك
ناصر: الحين حلت بعينك من ساعه اهلي قاعدين يقنعونك توك تبيها الحين يوم قلت أبيها,بعدين أنا ما قلت شي غلط قلت شكلها حلوه وامي بعد تقول حلوه
سلطان وهو معصب: الظاهر ما قد جتك زبيريه مقاس46 على ظهرك وسالفة ساره والزواج تخصني أنا لحالي وما أبيك تتكلم فيها فاهم وإلا لا وطلع سلطان وهو معصب وامه وريم وحنان مستغربين
ناصر وهو يضحك: قلت لكم بأفيدكم بس ما صدقتوا على البركه ياأم سلطان كلها كم يوم وبيوافق لاتخافين
أم سلطان : يعني أنت متعمد وقاصد اللي قلته
ناصر: محد يعرف لسلطان غيري
حنان : ياليتنا دارين من زمان كان اختصرنا الطريق وجبناك من الاول تقنعه
ناصر بغرور: حبيبتي انا ما اقدم خدماتي ببلاش بس هالمره مسامحكم علشانها اول مره

هل سلطان بيوافق مثل ما قال ناصر أو بيرفض ويتولى ابوعبدالعزيز هالموضوع

جزاك الله خبر

يعطيك العاافية

الجزء التاسع

ام فيصل ومنى في بيت ابوسلطان
ام سلطان مسويه مبسوطه: ياحي الله من جانا هلا وسهلا
ام فيصل:الله يحييك ويسلمك
ريم كانت مبسوطه لان اهل فيصل زايرينهم هي صحيح ما تحب حركات أمه الملسونه بس تتحملها علشانه واخته منى تحبها بس بعض الاحيان ترفع الضغط مثل امه
ريم : تو ما نوّر المكان زارتنا البركه
منى: بس المكان اللي نوّر قولي البيت والا الحي ,صدق ما تعرفين ترحبين بالضيوف
ريم : من قال اني ارحب فيك انا ارحب بخالتي
منى : تخلخ حنكك
ريم : لا تكفين ترى حنكي يعورني , قولي تخلخلت عظلمك
منى : يعني عادي ادعي عليك؟
ريم : عاد إذا قلت لا تدعين بتطيعيني!!
منى : لا
ريم : خلاص أجل أدعي بس خذي رأيي اول
ام سلطان : عن الاستهبال اللي ماله سنع ازعجتونا اسكتوا عاد نبي نسولف
ام فيصل : خليهم يستانسون ويفرحون عقبال ما نفرح فيهم
ريم انبسطت تظن الكلام لها
منى بصوت واطي: هي أنتي لاتصدقين روحك امي ما تقصدك
ريم : غايره ماعليك شرهه
منى : اقول قومي قبل لاتنزل امي كل العروض هالحين
ريم : أي عروض
منى : قومي أول بعدين اقولك
ريم : عن اذنكم بنطلع فوق لغرفتي
ام فيصل : خلكم قاعدين سولفوا معنا سوالفكم ماتنمل
ام سلطان : خليهم على راحتهم
ريم ومنى راحوا لغرفة ريم
منى : اوه فكه
ريم : استحي على وجهك احد يقول عن اهله فكه
منى : انثبري بس لو قعدتي شوي وسمعتي اللي بتقوله امي كان قلتي مثلي
ريم : ليش وش بتقول
منى : ابد بس بتعرضني عند امك كأني ثلاجه وبتبين مميزاتي علشان تخطبوني لسلطان
ريم : تخسين, انتي تأخذين سلطان الله لايقوله يصوم واخرتها يفطر على بصله
منى : اعصابك ياقلبي اصلا اخوك ما ابيه من زينه يجيب المرض واللي بتاخذه داعيه امها عليها ويكفي انك اخته علشان محد يبيه
ريم : ليش عيوني طايحه من عينك
منى : ايه
ريم : ارفعيني
منى بقرف: هاها دمك خفيف, والله من ثقالة الدم اللي فيك على ايش فصيل يحبك,ما ادري
ريم مملوحه, وفيها غمازات قصيره ونحيفه حنطيه وشعرها طويل يغطي ظهرها وناعم
ريم : احترمي نفسك اسمه فيصل ,وما الومك مقهوره لاتحبين ولا تنحبين
منى : على هونك حبيبتي من قالك اني ما احب ولا انحب إلا فيه من هو ميت علي
ريم : أخيراَ قدرت أجرك بالكلام يلا قولي وش اسمه ومن هو ولده وكم عمره ووين شفتيه
منى ارتبكت:هي انتي ليش تفكيرك قذر ,على طول سويتي لي سالفه وحطيتي لي واحد فيها
ريم رافعه حواجبها : منوه هالكلام ما يمشي علي تكلمي يلا ولاتخافين سرك في بير
منى : انتي ليش نشبه انطمي بس احسن
ريم وهي تناظر اظافرها : براحتك لاتتكلمين,بس على فكره امي تدور عروس لسلطان وودها تخطب له من العايله بس تخاف ينرد ومع تلميحات امك اليوم على كم كلمه من عندي بتلقينا بعد كم يوم نطق بابكم ونخطبك وما اظن عمي وإلا امك بيرفضون أخوي
منى بخوف : لاريوم تكفين كل شي إلا ان سلطان يخطبني والله ان يوافقون اهلي من دون ما يشاوروني
ريم : اجل يلا تكلمي احسن لك, وش اسمه
منى : راكان
ريم : وين عرفتيه و وش شكله وكم عمره
منى : ولد جيراننا وسكتت
ريم : منوه الظاهر تبيني احلف عليك علشان تتكلمين اخلصي قولي السالفه كامله
منى : ما فيه سالفه علشان تنقال بس رحت لبيتهم وكنت قاعده ارقص وهو دخل بالغلط وشفنا بعض وبس
ريم : ياعيني ياحركات شافك وانتي ترقصين مره وحده , وبعدين وش صار
منى : كل يوم في الليل يسنتر عند الدريشه ويراقب غرفتي
ريم : وش دراه عن غرفتك
منى : مره كنت فاتحه الدريشه والستاير وكنت واقفه بالغرفه يوم رحت عند الدريشه شفت زوله وعرفت انه يراقبني
ريم بصدمه : عاد انتوا درايشكم وش كبرها تقولين باب موب دريشه ,وانتي اكيد ما صدقتي خبر خيمتي عند دريشة غرفتك
منى بفخر: لا حبيبتي شايفتني غبيه صرت انزل للمقلط اللي تحت غرفتي بالضبط واطفي النور واراقبه من تحت
ريم : لاماشاء الله عليك فالحه اقول انتبهي بس لايجيك ديسك في رقبتك من كثر ما تطالعين فوق
منى : ايه والله صادقه صايره تعورني هالايام
ريم وش حادك تنزلين تحت طفي النور وشوفيه من غرفتك
منى : لا تبينه يعرف اني اراقبه
ريم : والله مسخره انتوا وهالدرايش ذكرتيني بأفلام الابيض والاسود
منى: هو اول من بدى فيها كان يراقبني في الظلام وانا ياغافلين لكم الله ,من اول كانت دريشة غرفتي والستاير مفتوحه اربعه وعشرين ساعه حتى من الدلاخه كنت بعض الاحيان اوقف ارقص عند المرايه والمصيبه ان المرايه قبال الدريشه يعني شاف كل شي, بس مره انتبهت له وشكله عرف اني شفته ومن بعدها صار يراقبني علني عاد انا صرت اذكى منه ونزلت تحت ,بس تصدقين صاير نذل هاليومين ماعاد خلاني اشوفه صار يطفي الانوار ويوقف عند الدريشه في الظلام ما اشوف الا زوله
ريم قامت تفكر شوي بعدين سألت : هو بالأول يراقبك بالظلام يوم دريتي عنه وطنشتيه صار يراقبك علني صح
منى : إيه صح
ريم : طيب يوم بدى يراقبك علني وش سويتي
منى: ما سويت شي أصلاً ماعاد فتحت الدريشه ولا الستاره
ريم : وبعد ما صرتي تنزلين تحت صرتي تفتحين دريشة غرفتك؟
منى: ايه صرت افتحه ليش
ريم : ومتى تفتحينه
منى : اذا خلص من مراقبته وبعد عن دريشته فتحت دريشتي
ريم : يالبقره معناها عرف انك قاعده تراقبينه من دريشه ثاني وحب يعاندك
منى : وشلون
ريم : انتي غبيه على مين ,اسمعيني يالمتنحه مو انتي تفتحين دريشتك اذا هو خلص مراقبته
منى : ايه
ريم : بس انتي ماتضمنين انه ما يرجع يطل مره ثانيه ويتأكد اذا حضرتك فتحتي دريشتك والا لا
منى بغباء: والمعنى من هالكلام
ريم بعصبيه : الله يعظم اجر اهلك على هالغباء اللي فيك,المعنى يا حلوه انه عرف انك تراقبينه والدليل انك ما تفتحين دريشتك الا اذا هو خلص مراقبه واكيد انتي ماراح تعرفين انه خلص الا اذا كنتي تراقبينه فهمتي الحين وإلا لا
منى:آه فهمت تفكيره خبيث بس من جد ذكي
ريم: إلا أنتي الغبيه
منى: والسواة الحين
ريم:السواة انك ما تجلسين في المقلط مره ثانيه افرضي عمي والا واحد من اخوانك دخل عليك وانتي قاعده في الظلام وش بتقولين لهم قاعده استنزل
منى: عمى في عينك بسم الله علي, ولاتقعدين تفاولين علي بعدين انا اقول وش السواة مع راكان مو مع اهلي والمقلط
ريم : والله ما أدري بس الاحسن انك تحقرينه كم يوم يعني لا تهتمين فيه وخليك طبيعيه يعني دريشتك افتحيها متى مابغيتي والستاره بعد, بس غطي الدريشه ببطانة الستاره علشان مايشوفك بوضوح وبعدين بنشوف وش بيسوي راكان باشا , ويلا قولي لي وش اخبار فصولي
منى : مالت عليك انتي وفصولي, بس قال لي قبل لااطلع سلمي لي على ريم
ريم : ياحبي له سلمي عليه
منى : يلا خلينا ننزل ترى امي بتسوي لي محاضره
ونزلوا البنات تحت.


*****************************************
بعد اربع ايام اتصلت ريم على ساره
ساره : هلا ريوم كيفك ياعمري
ريم : المهلي ما يولي انا الحمدلله طيبه انتي كيفك وكيف أهلك,تصدقي انو هالإجازه مرت بسرعه لدرجة اننا ما حسينا بيها والله مالها داعي خربت نظامنا على الفاضي
ساره: هذا حنا ياسعوديين ما يعجبنا شي, احمدوا ربكم غيرنا يتمنى هالاجازه ,وحنا نتدلع إجازه برمضان وعيد الفطر والحج وكل وحده ما تقل عن اسبوعين والا كان وش تسوون, وإجازة الصيف ثلاثه شهور وإجازة الربيع بعد واليوم الوطني ولونستضيف مؤتمر دولي حطوا إجازه, حتى بيستحدثون إجازة 10 ايام لمنتصف الفصل الثاني علشان مانمل ونزهق من الدراسه وفوق كذا الوضع موعاجبكم اصلا السنه عندنا تروح كلها إجازات , ولا فيه سنه قدموا فيها الامتحانات علشان المنتخب بيلعب في كأس العالم ورحمةً في الطلاب قدموها علشان يشوفون منتخبهم, بس انتوا ما تستاهلون الظاهر تبون السنه كلها عطله علشان ترتاحون
ريم: ايش بك انتي تتكلمي وكأنك صوماليه مش سعوديه متلنا
ساره: الا انتي اللي وش عندك قالبه علينا حجازي ترى ماينفع لك وع تحومين الكبد وانتي تتكلمين شوهتي اللهجه
ريم : انقهرت من منى بنت عمي كل ماجت في بيت ابوي سعود قامت تذب علينا كلمات والله ماندري هي مدح والا سب واذا قلنا لها ترجمي قالت استحوا على وجيهكم ما تعرفون لهجات ديرتكم
ساره: انتي وش تحسين بوه كود شي صانتس على دمجتس ومخليتس دجتن فيذا
ريم: يقطع شيطانك من وين تعلمتي القصيمي , بتنبسط عليك منى تموت في حكي القصمان
ساره: خذت كورس في معهد, فشلتينا اللي يسمعك يقول اتكلم أوردو مو عربي
ريم:الأوردو اسهل من القصيمي
ساره باستهزاء: البركه في اميتاب باتشان وسلمان خان
ريم: انا ترى ما افهم إلا نجدي والباقي خذي وخلي
ساره : اجل لو سمعتي مرة جيرانا وهي تتكلم جنوبي لا ومو أي جنوبي جنوبي بحت والله ما تفهمين نص كلامها
ريم : وشلون تسولفون معها وانتوا ما تفهمون عليها
ساره : اللي نعرفه شوي والباقي نمشيه
ريم : وش اللي تعرفينه من كلامها
ساره: خلي اللهجات عنك الحين , خلصيني وش عندك داقه تراني مشغوله
ريم: ايه بسألك بتروحين بكره للجامعه والا لا
ساره: إن شاء الله بروح ليش
ريم: والله مالي خلق أداوم تونا راجعين من إجازه وتبدى المحاضرات
ساره: انطمي بس صدق ماعندك ماعند جدتي ,توك تقولين مليت من الإجازه, احمدي ربك الاسبوع اللي راح ما داومنا الا ساعتين خذنا ارقام القاعات بس, والمواد والشعب نازله في النت
ريم : ما أدري المفروض يهيئون لنا الاجواء يحطون احتفالات والعاب ناريه بمناسبة العوده للمدارس
ساره : اقول عزالله تعطلت الدنيا اذا تبين بعد كل إجازه هالخرابيط اللي تقولين عنها,بعدين محد طقك على يدك وقال ادرسي اذا بتدرسين بتدرسين لمصلحتك
ريم : يوه عاد من يتكلم, سويره وجبنا لها طاري الدراسه هالدافوره وش يسكتها عاد
ساره : قولي ماشاء الله لاتصكيني بعين, بعدين اذا انا درست وكرفت12 سنه ليش ما اكمل هالاربع سنين الباقيه ,حرام يروح تعبي وتعب أهلي معي على الفاضي وهالاربع سنين هي اهم مرحله في الدراسه
ريم : زين فهمنا بس والله هالبرد اللي طب علينا فجأه خلانا نكسل بسم الله يومين والجو انقلب ,قبل كم يوم حر واليوم برد
ساره: انتي لين الحين ما عرفتي لجونا عجزوا وهم يحفطونا من رابع ابتدائي حار جاف صيفاً بارد عديم الامطار شتاء ,تدفي والبسي ثقيل ولاتتعذرين بالجو
ريم : يا اختي أنا براده
ساره : براده والا ثلاجه هاهاها
ريم : لاغساله وانتي الصادقه تتطنزين انتي و وجهك
ساره : أنا أدري عنك تقولين براده, المهم تعالي بكره ومالك إلا اللي يدفيك
ريم : ليش بتجيبين معك دفايه وإلامنقد
ساره : هي انتي وش فيك على الاجهزه الكهربائيه ماسكه خط 220 , المهم بجيب لك حليب وإلا زنجبيل
ريم : بس زنجبيل علبالي بتجيبين مراصيع وإلا محلا او حنيني
ساره : ما تبين مفطح بعد
ريم : أصلا شي انتي بتطبخينه بيصير وع هذا اذا تعرفين تطبخين
ساره خطرت فكرة الطبخ في راسها : زين اشوفك بكره يلا مع السلامه
ريم :مع السلامه

***********************

بيت ابو فيصل
منى و اروى وام فيصل جالسين في الصاله ودخل طارق:السلام عليكم
الكل: وعليكم السلام
ام فيصل: وين فيصل اخبركم طالعين تصلون مع بعض
طارق:شوي وبيجي واقف يسولف ولد الجيران
ام فيصل : أي ولد؟
طارق وهو يصب له قهوه :راكان ماغيره
منى حست ان قلبها وقف من الخوف وهي تكلم نفسها: مو من عادة فيصل انه يسولف مع احد من الجيران لو طارق ممكن بس فيصل غريبه الله يستربس
دخل فيصل : هاه اشوفكم تتقهون ما فيكم صبر لين أجي
منى: والله محد قالك طقها سوالف مع ولد الجيران,إلا غريبه وش عندك معه
فيصل: ما عندي شي بس هو بيكمل ما جستير هالفصل وسألني عن بعض الدكاتره اللي بيدرسونه ما يدري اني قانون
منى: ليش هو وش تخصصه
فيصل: ما ادري قالي قبل شوي , بس هو في كلية العلوم الإداريه
منى في نفسها: اشوى الحمدلله ماقال شي ثاني
ام فيصل: هذا السنع اللي بيكمل دراسته مو مثلك
اروى: وزياده على كذا حلو ما شاء الله
الكل قاموا يناظرون أروى وهم مستغربين
منى ودها تزنط أختها من القهر
فيصل وهو معصب: رويه وش هالكلام عيب توك صغيره انتي ما تستحين
أروى وفيها الصيحه: ما قلت شي, بس قلت حلو
طارق : خلاص لاعاد تقولين هالكلام مره ثانيه ما بقى إلا هي تراهقين وانتي في اولى متوسط ويلا انقلعي لغرفتك
ام فيصل: الزين مرحوم ما فيها لاصغير ولاكبير خلوها تقول اللي عندها
منى: بس عيب توها صغيره وش بتسوي إذا صار عمرها17
ام فيصل: الله اكبر على بالك يعني, انتي اذا شفتي واحد وسيم قلتي وش هالزين
منى : بس أنا كبيره بعدين من زين هالراكان يشبه دانه اخته
فيصل : وين شفتيه؟
منى مسكت لسانها قبل ما تغلط: في بيتهم حاطين له صوره وش كبرها في الصاله
طارق: يشبه لأخته اكيد اخته حلوه تكفين منى شبكي لي معها
منى وهي مستغربه : أي تشبيك وأي أسلاك وين عايشين فيه
فيصل:استح على وجهك توك تهاوش اروى تصير اردى منها
طارق بصوت واطي: وش معنى انت ورويمه حاطين منى مرسال الغرام
فيصل: انطم بس ريم بنت عمي اذا صارت بنت عمك سو اللي تبي
طارق: احلف السالفه تعجيز يعني
ام فيصل وش فيكم تتكلمون بصوت واطي , بعدين فيصل صادق عيب اللي قاعد تقوله
طارق: وانا امزح يمه انتي صدقتي أصلاً انا ما أحب هالحركات
فيصل: علينا هالكلام
طارق: اقول انطم بس اروح لغرفتي ابرك لي من مقابل وجهك

*****************************************
بيت ابوعبدالله:

عبدالله بصوت عالي : ساره سويره وينك جوالك يرن
ساره وهي تنزل مع الدرج: رد اخاف ابوي اللي يدق ويعصب علي
عبدالله راح عند جوال اخته ويهز راسه وهو يتطنز: ميشو يتصل بك الحمدلله والشكر صدق بنات مريضات
ساره وهي داخله للمجلس تركض: خير وش فيك
عبدالله : سؤال انتي من مصادقه
ساره ويدها على خصرها : وليش إن شاء الله
عبدالله: ما ادري عنك فيه بنت تحط اسم صديقتها ميشو
خالد اللي قاعد عند التلفزيون : عاد هي مصادقه أوادم
ساره وهي مكشره: ليش وش قالوا لك مصادقه جن
عبدالله: لا قطاوه
خالد: هاهاها حلوه بس لاتعيدها
ساره وهي تهز راسها وتأشر على اخوانها: الحمدلله والشكر الطول طول نخله والعقل عقل صخله وطلعت تركض من المجلس لانها عارفه اخوانها وش بيسون
ساره : آلو هلا مشاعل آسفه تأخرت ما رديت عليك بسرعه
مشاعل بعصبيه: تأخرتي وبس, سنه علشان تردين
ساره:هي انتي وش فيك معصبه قلت لك آسفه
مشاعل وصوتها متغير: سويره تكفين شوفي لي حل,احس اني متورطه
ساره: خير عسى ماشر
مشاعل : تعرفين طلال ولد منصور صديق ابوي
ساره :لا والله انا ابوك ما اعرفه تبيني اعرف صديقه و ولده, المهم وش فيه
مشاعل بغصه: خطبني
ساره: لامبروك مبروك يا قلبي , متى العرس؟
مشاعل بعصبيه : على تبن ,أي عرس اقول لك تورطت تقولين متى العرس
ساره : وليش متورطه وش مسويه, وش صاير
مشاعل : ما ادري انتي غبيه وإلا تستغبين نسيتي تركي ولد عمتي فاطمه
ساره بملل : لاحول الله وحنا ما خلصنا من هالسالفه شعوله تكفين ارحمي عمرك, حرام تضيعين نفسك علشان واحد ما يدري عنك ,حرقتي قلبك على الفاضي
مشاعل: سويره افهميني حرام عليك ,والله العظيم احبه مو بيدي غصب علي
ساره بعصبيه : ذبحتونا بالحب هذي تحب تركي والثانيه تحب ما ادري شسمه , وش سالفتكم انتوا الظاهر عديتوا بعض
مشاعل بفضول : من هي الثانيه لاتكون منول
ساره حست انها قالت سر ريم وتندمت : لا أي منول هذي وحده امي تسولف عنها قبل شوي , المهم خلينا في موضوعنا وهذا اللي خطبك وش يشتغل وكم عمره و وين شافوك اهله
مشاعل : هذا هو شافني يوم كنا في بيروت قبل ثلاث سنين كانوا مسافرين معنا وكان هو واخته سمر وانا ومشاري اخوي نطلع مع بعض
ساره : ايه تذكرت كان قلتي من الاول انه هو اللي استفرغتي عليه(الله يعز القراء) وعلى مشاري في الملاهي
مشاعل: وجع ان شاء الله, اله يقرفك وانتي ما تتذكرين الا الاشياء الشينه
ساره: اقول مشاعل خذيه دامك تدورين عن الحب ما احد بيحبك مثله لا تركي ولا غيره
مشاعل: وليش إن شاء الله عمتي ساره
ساره: لأنه ينفعلك , هذا استفرغتي عليه خطبك اجل لو ضحكتي بوجهه وش بيسوي
مشاعل: تتطنزين انتي ووجهك
ساره : لا بس مو تقولين انه وصلك لدورة المياه وقام يساعدك تنظفين ملابسك وخلاكم تطلعون علشان ترتاحين مومثل مشاري اخوك اللي تقرف منك وعصب عليك وما عاد طلعتوا مع بعض, صدقيني مشاعل هالرجال شكله حنون وطيب ورحوم والرجال اللي يرحم وعنده قلب المفروض تشترينه مو مثل تركي عديم الاحساس
مشاعل بعصبيه: تركي ما يدري اني احبه علشان تقولين عديم الاحساس
ساره : اسمعيني يا مشاعل انتي صديقتي واحبك مثل ما احب خواتي وبقولك كلام يمكن يزعلك مني بس ربي اللي يعلم اني ما ابي لك الا كل خير, تركي لو يحبك او يحس بس مجرد احساس كان تحرك من زمان يمكن هو يدري انك تحبينه بس ما سوى شي ولا تقولين وشلون يدري انتي تروحين مع بنات عمتك وتنامين في بيتهم اكثر من جلساتك وطلعاتك مع اهلك يعني قدامه 24 ساعه لا ومن زمان من ايام المتوسط يعني لو كان يبيك كان سوى شي او لمح او قال لخواته مو مثل طلال اللي شافك كم مره قبل ثلاث سنين وانتظر لين ما تكبرين شوي وما ضيع وقت خطبك على طول وهذا يدل على ان الرجال شاريك , وحرام تضيعين عمرك في رجاء ان هالتركي يسوي شي
مشاعل: كان علمتي نفسك يوم صالح ولد عمك خطبك
ساره : لا تقارنين يا مشاعل صالح متربيه انا وإياه من كنا صغار وقبل ما ندخل للمدرسه حرام اظلمه وآخذه وانا احس انه اخوي وما في امل احبه وبعدين هو اكبر مني بسنه وحده بس وتوه طالب وصغير ما كون نفسه ليش اعذبه واعذب عمري معه, أما انتي أول ما رجعتي من السفر كنتي معجبه بطلال وغثيتينا بسوالفه يعني في أمل تحبينه
مشاعل: طيب وش اسوي الحين انا ما ودي اتزوج هالسنه احس توني على الزواج
ساره: طيب انتي لاتضيعين الفرصه على نفسك قولي لاهلك يأجلون هالموضوع لين ما تخلص هالسنه وراح يكون معك حوالي الثلاثه او الاربعه شهور ومنها تشاورين نفسك وتفكرين زين وتبعدين عن بيت عمتك وإذا تركي يبيك صدقيني بيتحرك إذافقدك وإذا خلصت هالاربع شهور بتكونين خذتي قرارك اللي بإذن الله ما تتندمين عليه هذا إذافكرتي بعقلك مو بقلبك
مشاعل : ما ادري ساره محتاره انتي تدرين اني إذاخذته بروح اتغرب معه كم سنه ,هو الحين يكمل الماجستير برى وابوي يقول إذا وافقت بيكون الزواج بعد مايخلص ما بقى له إلا سنه و الدكتوراه بيخليها بعد ما اتخرج علشان نسافر انا اكمل ماجستير وهو دكتوراه
ساره : ما شاء الله هذا الزين مشاعل ياقلبي لاترفسين النعمه ,معليش تحملي الغربه كم سنه بس والله هذا الرجال السنع اللي يرفع الراس وبيرفعك معه مو مثل تركي اللي قاعد ماعنده إلا الثانويه وياليته سوى شي, عاطل باطل لاشغل ولا مشغله عاله على ابوه
مشاعل : ساره احترمي نفسك ولاتقولين عنه هالكلام
ساره بعصبيه : اقول مصختيها انتي دامك تحبينه ومتمسكه فيه ليش ما رفضتي طلال اول ما قالوا لك اهلك
مشاعل بحيره : ما أدري؟
ساره : لأنك متحسفه عليه ما تنلامين اللي مثله ما ينرد
مشاعل: طيب وش اسوي الحين
ساره : سوي مثل ما قلت لك اجلي الموضوع لين ما تخلص هالسنه وتفكرين زين
مشاعل : طيب ساره لاتقولين لاأحد من البنات عن هالموضوع
ساره : لا بأكتب الكلام اللي قلتيه في منشورات وبأوزعها على بنات الجامعه بنت بنت , تستهبلين سرك هو سري , المهم بتداومين بكره
مشاعل: إن شاء الله ليش؟
ساره : علشان تفطرين معنا بكره القهوه علي
مشاعل : خلاص أشوفك بكره
ساره : إن شاء الله مع السلامه

**************

الجزء العاشر

جامعة الملك سعود الساعه 7.15

ريم واقفه عند البوابه وتدق على ساره
ساره بصوت واطي : آلو , نعم
ريم : هلا ساره صباح الخير, وينك؟
ساره تتثاوب : صباح النور أنا في السرير نايمه , وش تبين ازعجتيني؟
ريم اللي تعدلت في واقفتها : وش قلتي في وين
ساره بملل : في السرير وش عندك؟
ريم بعصبيه وصوت عالي: عندي وجعه تشيلك قولي آمين, يوم شافت البنات يناظرونها وطت صوتها وكملت: جعلك الجني اللي يخمك, ليش ما جيتي يالجاحده
ساره:حسيت بالبرد وقلت خلني اسحب على الجامعه بكبرها اليوم ,واتدفى بالسرير احسن لي
ريم : جعلك البرد اللي يدخلك ولا عاد يطلع منك يالحماره كان قلتي لي امس , اسألك وتقولين بأداوم ,بس هين هذا وجهي ان لوى لساني على لسانك مره ثانيه وقطعت الخط بوجه ساره
ساره اللي كانت في الطريق ميته من الضحك على ريم ودقت عليها أكثر من مره بس ريم ما ترد
وصلت ساره للجامعه ودقت على ريم وريم زعلانه ما ردت
ارسلت لها ساره رساله كتبت فيها : رويمه لك خمس دقايق بالضبط إذا ما رديتي برجع للبيت أنا بعد شوي بدخل للجامعه
ريم قرت الرساله وطنشت دخلت ساره وقبل لاتشيل عبايتها دقت على ريم
ريم ردت بزعل: خير وش تبين
ساره: تعالي بسرعه انا عند بوابه رقم خمسه و قطعت الخط
ريم كانت فرحانه بس حبت تبين لساره انها زعلانه , راحت ريم عند البوابه ولقت ساره تلف عبايتها
ساره : صباح الخير
ريم و هي مكشره صباح النور:
ساره وهي تحط روج : اعصابك لاتتقطعين علينا كل هالزعل علشان مزحت معك
ريم : انثبري انتي ودمك هالثقيل تسمين اللي سويتيه مزح
ساره : احمدي ربك أني ما تأخرت ساعتين علشان تضبط المزحه
ريم : اوريك بردها لك يوم
ساره : اقول امسكي هالكيس معك
ريم : أي كيس الاحمر ؟
ساره : إيه
ريم : عمى وش كبره وش جايبه معك
ساره وهي تتعطر: افتحيه وشوفي
ريم فتحت الكيس ولقت حافظه أكل حجم وسط وترمس شاهي
ريم : الترمس وعرفنا ان فيه شاهي الحافظه وش فيها
ساره : لا الترمس فيه زنجبيل , خبله انا علشان أجرجر شاهي معي وهم يبعونه بالكوفي, والحافظه فيها محلا
ريم وهي مو مصدقه : كذاااااابه
ساره : افتحيها وشوفي
ريم : مجنونه جايبه معك محلا !!
ساره : ليش مو هذا طلبك وبخوف : رويمه لاتقولين ما احبه مثل أهلي
ريم وهي تضحك : إلا اموت عليه بس أنا كنت اتطنز عليك
ساره بغرور : محد يقدر يتطنز على قمر هالعالم ساره بنت محمد
ريم : فديت ساره بنت محمد المهم وش نسوي فيه الحين
ساره : ولا شي انتي حطي الحافظه في درجك وقفلي عليها وانا بحط الترمس في درجي واقفل عليه وإذا جاء وقت البريك خذناهم
ريم بحماس : طيب خليني أذوق سارونه
ساره : اقول مافيك صبر انطقي لوقت البريك بعدين كلي لما تشبعين
ريم : لاساره تكفين ملعقه وحده بس الله يخليك
ساره : والله من الشفاحه اللي فيك بسرعه لاتفضحينا يالمفجوعه
ريم خذت ملعقه وذاقت المحلا: يجنن ساره من اللي صلحه
ساره باستغراب: مرة الجيران صلحته , يعني من بيصلحه غيري
ريم بصدمه : كذابه تعرفين تطبخين
ساره : كذابه في عينك إيه اعرف اطبخ وش قالوا لك رفلى
ريم مستغربه : لابس بس شكلك مو مبين
ساره وهي تطنز: المره الجايه بلبس مريلة طبخ علشان يبين
ريم : لاموقصدي ,بس والله طعمه يجنن ,أقول ساروه تكفين بأخذه معي البيت بذوقه اهلي امي تموت على المحلا
ساره : لا اذا جاء بعدين صلحت لك حافظه كبيره وارسلتها لك بس هذا خليه للبنات
ريم : السوري حبيبتي بأخذ هذا والبنات موب لازم اليوم
ساره : تكفين ريوم اليوم القهوه علي وما جبت قهوه قلت بشتري لهم من الجامعه تبيني اقول ما جبت لهم شي يحلون به معها
ريم : إذا على البنات أنا مستعده اشتري لهم كرتون شوكلاته وفطورهم اليوم علي بس خليني آخذ هالمحلا معي
ساره : خلاص خذيه بس لاتقولين للبنات اني جايبه معي محلا , والله ان درت نهى ومنال وما ذوقتهم بيذبحوني هالعجز
ريم : ليش عجز علشان يحبون المحلا؟
ساره : إيه اول مره اشوف بنات يحبونه ,حنا محد ياكله في بيتنا أبداً
ريم : حتى أنتي؟
ساره : حتى أنا ما أحبه بس تعلمت اصلحه وصرت أعرف شكل المضبوط والخربان منه, امي ساره علمتني وصرت اصلحه لها واضبطه بعد
ريم : تصدقين سويره أول مره اعرف انك تطبخين اكلات مثل كذا حدك سلطات وحلويات وتخب
ساره : ليش إن شاء الله اللي يطبخون لهم اشكال معينه والا مكتوب على وجيههم
رن جوال ساره وردت : هلا نهى ,صباح النور
................ انتي كيفك وكيف الحمل معك؟
................هاهاها الله يهون عليك ياقلبي
................لا انا عند البوابه انا وريوم , انتي وينك؟
...............خلاص جاين لك ,يلا مع السلامه
ريم : وينها نهى؟
ساره : في القاعه تنتظرنا
ريم : يا اختي استغرب من هالانسانه متزوجه وعندها بنت وحامل لها خلق الدراسه وماشاء الله مجتهده والله إذا شفتها استحقرت نفسي
ساره : عسى دوم إن شاء الله
ريم : وش اللي عساه دوم
ساره وهي تضحك :تستحقرين نفسك
ريم : كلي تبن يالشيفه
ساره : اقول وين المحلا بس
ريم : لاحول هذي ذلتنا وحنا ما بعد خذناه وش بتسوي إذا اخذته
ساره : يلا عن الهذره ترى بنتأخر وأخاف تحسب لنا غياب

*****************************************
منى في مكان ثاني بالجامعه : أوف الحمدلله ان الدكتوره صباح ما تدرسنا وإلا كان حذفت الماده هالمستوى
بدور: تكفين لاتفرحين ما ندري عن هالدكتور الله يستر منه
منى : إنشاء الله انه زين
بدور : ياخوفي يكون مثل الدكتور مازن اللي درسنا المستوى اللي راح
منى : لا تكفين لاتفاولين من الحين عالعموم اليوم بتبدأ محاضراتنا عنده وبنشوف

******************************************

بدر جالس في مكتبه ,دق عليه مديره
بدر : هلا أبو وليد
أبو وليد : بدر تعال شوي أبغاك بموضوع
بدر : إنشاء الله دقايق وأنا عندك
دخل بدر على المدير : سم يا أبو وليد
أبو وليد : استرح يابدر
جلس بدور وتكلم أبو وليد : والله يا بدر أنا رشحتك من ضمن الثلاثه موظفين اللي بيبتعثون من قبل الوزاره لبريطانيا وأنا أدري أنك حريص عليها وتنتظرها من كم سنه علشان كذا حبيت أبلغك بنفسي
بدر انصدم من كلام أبو وليد هو كان ينتظرهالبعثه له كم سنه بس هالفكره شالها من رأسه من بعد
أبو وليد قطع تفكيره : وش فيك ساكت
بدر : والله ما أدري وش أقولك طال عمرك بس أنا هونت وياليت ترشح أحد بدالي
أبو وليد يناظر وهو مو مصدق : وش قاعد تقول انت
بدر وهو مستحي من مديره : اللي سمعته طال عمرك
أبو وليد : ممكن أعرف ليش؟
بدر يكلم نفسه وش أبي بديره العنود ميب فيها : والله انت عارف الوالد والوالده ما عندهم احد يهتم فيهم غيري
ويحاكي نفسه : سامحني يبه وأنتي يمه, حطيتكم عذر بس والله غصب علي
أبو وليد : وأخوانك وين راحوا
بدر : مشاري تزوج ولاهي بحياته وعبدالرحمن في العسكريه
أبو وليد : بس أهلك موب عذر يا بدر وموب ضايعين إذا رحت بعدين هالبعثه بتفيدك وبتساعد في ترقيتك بسرعه
بدر : معليش يا أبو وليد خل غيري يستفيد منها
أبو بدر : أنت أحق واحد بهالبعثه واسمع أنا بأعطيك ثلاثه شهور فكر وقرر على راحتك أساساً البعثه بعد سته شهور
بدر ما حب يفشل مديره : يصير خير طال عمرك وطلع لشغله وهو مقرر انه يرفض هالبعثه


*************************************

نهاية الدوام ساره وريم عند البوابه
ريم : اقول سويره كم لها اختك نجوى وهي والده
ساره : ما ادري يمكن عشرين يوم ليش
ريم : لا ولا شي بس يمكن انا وامي نجي نزورها ونتحمد لها بالسلامه
ساره : الله يحيكم بس لاتكلفون على اعماركم كلموها بالتليفون ويكفي
ريم : لا الواجب نزورها وإلا ماتبينا
ساره : ايه وانتي صادقه انتي ما ابيك مليت من مقابل خشتك , وامك الله يحييها
ريم : يحصلك هالخشه عاد انتي تتمنينها انتي و وجهك, وأصلاً إذا جيتكم لا توريني وجهك من زين وجهك ,لاني جايه لأختك وإلا تدرين اخلي امي تجي لحالها احسن
ساره : يكون احسن بعد
ريم بقهر : لا عناد فيك بجي وبنام في بيتكم بعد
ساره : ياليت ننام عند بعض وأهلنا يوافقون والله فله
ريم حست ان الفرصه جتها في الوقت المناسب : خلاص ولا يهمك خذي واحد من اخواني و وعد ننام عند بعض كل يوم
ساره : لا وليش انتي ما تاخذين من اخواني
ريم : لي الشرف والله بس انتي تعرفين اني احب فيصل
ساره : تسلمين الشرف لنا ياقلبي
ريم : يعني موافقه
ساره : على أيش؟
ريم : على زواجك من اخواني
ساره باستعباط : وانا بأخذهم ثلاثتهم ما يجوز
ريم : وانتي واقفه لي على الكلمه,قصدي واحد منهم
ساره وهي تتمسخر: أي واحد فيهم سلطان المغرور على قولك وإلا فهد المتغرب وإلا ناصر المرجوج
ريم : لافهد فيه من ينتظره ونصور لو وش يصير ما زوجتك إياه حرام يطيح في كبدك
بس سلطان يصلح لك
ساره : ايه يوم صار مغرور قلتي يصلح لي أهون علي آخذ ناصر ولاآخذه أكره مالي في هالدنيا الرجال اللي شايف نفسه
رن جوال ساره وكان السواق ينتظرها عند الباب
ساره : يلا عاد عن المزح البايخ ولا تفاولين علي باخوانك , انا بمشي مشاك بطنك
ريم : وجعه تخمك لاتدعين علي
ساره : ليش انتي يعني تدعين لي, هذا أنتي تدعين علي, مع السلامه
ريم : مع السلامه ومشكوره على المحلا
ساره : انتبهي لاتتسممين

***********************************************


بيت ابو سلطان

دخلت ريم للبيت وحطت حافظة المحلا في الصاله وقالت للشغاله تجيب صحون وملاعق وراحت لغرفتها تغير ملابسها
نزلت ريم ولقت امها تحت في الصاله وتوها جايه من شغلها وسلطان وناصر جايين من الشركه
ام سلطان : خير ياريم تقول الشغاله انك جايبه هالحافظه وش فيها؟
ريم : افتحيها وشوفي
ام سلطان فتحتها : من جابه اكيد أم علي جارتنا
ريم :لا مو أم علي وحده ثانيه ذوقي وعطيني رايك وغرفت لامها واخوانها
ام سلطان بعد ما كلت شوي : ماشاء الله شغلها مضبوط هاللي مصلحته, بس من هي؟
ريم وهي تناظر سلطان : ساره صديقتي
سلطان كان يأكل وبغى يغص لانه ماكان مصدق ان هذيك المغروره تدل المطبخ من الاساس علشان تعرف تطبخ لاومحلا وضابطته على قول امه ويكلم نفسه :استغفر الله مغروره ونصابه في نفس الوقت ما يندرى عن الخافي أكيد أعظم بس هين يا سويره ان ما ربيتك صح ما اكون سلطان اجل محلا يالنصابه انا اللي بعلمك وشلون تطبخين
ام سلطان وهي مستغربه : لاعاد معقوله ساره اللي مصلحته ما شاء الله
ريم : ايه تقول جدتها اللي معلمتها وشلون تصلحه
سلطان باستخفاف : وليش ما تلعمته من امها وبعدين سؤال انتوا رايحين تدرسون والا تاكلون
ريم : أولاً لاتخاف على دراستنا دام ساره هالدافوره معنا وحنا مو متعودين على هالاشياء بس انا تحديتها وهي قد التحدي, والجامعه تقول حديقه كل شي مسموح تسوي اللي تبي وتجيب اللي تبي محد عليه من احد, وثانياً ساره تعلمته من جدتها لان امها ما تعرف له ولا تصلحه محد في بيتهم يحبه حتى هي
سلطان بصوت واطي : هذي نصابه بس مفضوحه ما تحبه وتصلحه مضبوط ما تجي
ناصر : اقول سلطان لاتفرط فيها دام هذا طبخها خذها وأنا اخوك محلاها ما ينشبع منه ,بس سؤال ريوم هي تطبخ أكلات ثانيه وإلا بس تخصص أكلات شعبيه
سلطان : هي انت وش رايك نخليها تطبخ لك كل اللي تعرفه وإذا اعجبك طبخها أخذتها
ناصر ببرود : ياليت والله
سلطان : اقول ضف وجهك انا اللي بأخذها ماراح تكون طباخه لاحد فاهم
ريم وهي تضحك : يا حليلك ما بعد خذتها وتدافع عنها وش هالحب
سلطان عصب لأن اهله متأملين انه يتزوج ويحب ومايدرون باللي يدور في راسه: اقول انطمي بس وقولي لخويتك لاتصدق المثل اللي يقول الطريق إلى قلب الرجل معدته ويكفي نصب علشان اخطبها
ريم عصبت لان اخوها المغرور غلط على صديقتها الوحيده : اسمع عاد ترى البنت ما درت عنك ولاجابت خبرك والمحلا تحايلت عليها علشان اجيبه أذوقه امي وعلى فكره لمحت لها عن موضوع الزواج وقالت بلسانها اهون علي اخذ ناصر المرجوج ولا اخذ سلطان اللي شايف نفسه لاني اكره الرجال اللي من هالنوعيه وهالكلام قالته بعظم لسانها
ناصر وهويعدل شكله : وانا ما عندي مانع
سلطان بعصبيه :انت انطم وهالبنت محد مأخذها لا أنا ولا انت ولا فهد, فاهمه يمه وطلع لغرفته وهومعصب على الكل واولهم سويره على قوله :هين ياسويره انا سلطان ولد عبدالعزيز تردني وحده دلوعه ومغروره مثلك وتفضلين علي ناصر المرجوج, آه بس لو تطيحين بيدي والله لاعلمك الغرور على اصوله
ام سلطان بعد ما طلع ولدها : رويمه و وجع وش سويتي هديتي كل اللي بنيناه هذا اخوك هون حنا ما صدقنا يوافق ياخذها
ريم : عسى عمره ما اخذها من زينه مالت عليه اصلاً هي حسافه تاخذ واحد مثله ما سمعتي هالمتكبر وش قال , حرام نبلي البنيه فيه
ام سلطان : ايه موعلشان هالغرور اللي فيه بأزوجه إياها هي قويه وتقول الكلمه في وجه الواحد لاتكذب ولاتجامل يعني هي اللي بتعرف له وتسنعه ولعلها تكسر راسه هالناشف ما نبي نزوجه وحده وثاني يوم تقول ما اقدر اتحمل ولدكم ,يكفينا الكلام اللي جانا بعد مافك خطوبته من هناء
ريم بعناد : بس هي اللي قالت هالكلام بلسانها
ام سلطان : وانتي ما صدقت قلتي له على طول , الحين وش يقنعه مره ثانيه
ناصر اللي ساكت طول الوقت : يمه خلاص خلي الموضوع علي انا اللي بأقنعه
ام سلطان :انت
ناصر: ايه انا مستهينه فيني لاتخافين أزهليها بس ولدك ذيب ان ما خليته يأخذها ما أكون ناصر
ريم باستهزاء: وش بتسوي بتكفخه , اقول طر في ذاك ولايكثر
طارق : تراهنين ؟ من كم؟
ريم : اللي تبي
ام سلطان : ما يجوز تتراهنون
ريم : صدقتي يمه انه يقدر يسوي شي ما عنده ماعند جدتي
ناصر : بأسوي كل شي علشان يأخذها لان امنيتي في الحياة اشوف احد يجيب خشم سلطان للأرض ويا زين هالسالفه إذا كانت بنت هي اللي تكسر له راسه وتنزل خشمه اللي رافعه علينا
ام سلطان : عمى إن شاء الله تراه اخوك مو عدوك جعل راسك الكسر
ناصر : ايه ادري انه اخوي واحبه بعد بس فيه شوفة هالنفس لو ربي يفكه منها كان مافيه مثله بالدنيا بعدين توك من شوي تقولين هي اللي بتناسبه وتكسر له راسه
ام سلطان : مو قصدي التكسير اللي في بالك بعدين انا امه اقول اللي ابي
ناصر: لاوالله وانا جاي من الشارع انا بعد اخوه
ريم : يالله ازعجتونا كأن مافي الدنيا إلاسلطان روقونا عاد, انا بروح انام وإذا خلصتوا من هالسالفه علموني

هل ناصر بيقدر يقنع سلطان ويخليه يخطب ساره ؟ وهل ساره بتوافق عليه ؟
بدر والبعثه وش الاحداث اللي بتصير عليه وعلى العنود؟الجزء الحادي عشر

راكان واقف بنص غرفته : ياربي وش بها هالبنت ما عاد شفتها ابد, ولا عاد اهتمت حتى لو وقفت يوم كامل عند الدريشه , وش اسوي الحين وقعد يفكر
سمع صوت الباب : نعم وش تبين؟
دخلت نجد :هاه راكان كيفك؟
راكان : تمام الحمدلله وش تبين
نجد : تقول امي انزل علشان تتغدى
راكان : اسبقيني وانا نازل بعد شوي وقبل لاتطلع ناداها: نجد تعالي شوي
نجد : نعم وش تبي؟
راكان يبي يسأل اخته بس خاف تفضحه عند اهله : لا خلاص ما ابي شي قولي لامي ما ابي غداء الحين
*****************************************
منى وصلت للبيت وهي مبسوطة لأنها قدرت تعدل جدولها مثل ما تبي ودخلت البيت وما لقت احد إلا أروى جالسه عند التلفزيون
منى: السلام عليكم , وين أهلي
أروى:وعليكم السلام, أهلي تغدوا وراحوا يقيلون على قولهم
منى : الجو برى حلو سحاب ومافيه شمس وش رأيك نتغدى برى في الحديقة
أروى : والله ياليت وأنا بصلح لك سلطه المايونيز اللي تحبينها
منى : خلاص بروح أغير ملابسي وانزل
راحت منى لغرفتها وغيرت ملابسها ونزلت للمطبخ عند أروى
منى : هاه أساعدك؟
أروى : لا روحي اجلسي واقري الجرايد لين أجهز لك أحسن غداء
منى وهي تضحك: اللي يسمعك يقول أنتي اللي طابخه الله يعافي الطباخة
أروى: بعد هذا جزاي اللي قاعده أصلح لك السلطة بنفسي
منى : مشكورة بس لاتطولين تراني ميتة من الجوع
طلعت منى وجلست في الحديقة تقرى الجريدة راكان جالس في الغرفة يفكر وتعب من التفكير وقام ووقف عند الدرشيه ويناظر الغرفة اللي قبال غرفته وهي على حالها دريشتها مقفله من عشره أيام, هز راسه وناظر تحت بالصدفة وشافها قاعده بالحديقة وما صدق وقرب أكثر علشان يتأكد ويكلم نفسه :هي يا راكان تحرك وسو شي وقام يفكر بسرعة وخذ ورقه وكتب فيها كم كلمه بسرعة وطلع من غرفته وراح لغرفة أخوه بسام وخذه معه لغرفته

راكان: اسمعني زين يا بسام أنت كبرت وصرت رجال صح وإلا لا
بسام : إيه أنا رجال صرت بالروضة
راكان :وعلشانك رجال أبيك تسوي اللي بقولك عليه وبدون ما تقول لأحد مفهوم ما أبي أي احد غيرك يعرف وإلا بتصير بنيه مثل ربى ودانه ونجد
بسام : لا أنا رجال مثل راكان
راكان : خلاص اصبر شوي وجاب الورقة وعطاها بسام ومسكه ووصله للدريشه : شفت البنت اللي جالسه في بيت أبو فيصل ولابسه احمر
بسام : إيه هذي منى بنت الجيران
راكان : إيه خذ هذي الورقة ورح لبيتهم وطق على غرفة السواق وخله يفتح لك بابهم وإذا قال ليش قل كورتي طاحت عندكم بالحديقة وبأخذها وادخل وعط منى الورقة ولا تخلي احد يشوفك مفهوم
بسام : ليش أنت تحب منى زي اللي في التلفزيون
راكان يناظر أخوه وهو مستغرب :صدق ماعاد في الدنيا خير وش هالبزران يعرفون كل شي أصلاً ماعاد فيه صغار وحب يصرف أخوه : لا هذي الورقة طاحت منها بالشارع وأبيك ترجعها لها
بسام : طيب ليش ما أطق الباب؟
راكان : هذي والله النشبه وش يبي ذا وأسئلته وسحب الورقة من أخوه خلاص أنت صرت بنيه رح لغرفتك بس وفكني
بسام :لا أنا ولد موب بنت خلاص بسوي اللي تبي
راكان : طيب أنت اللي تبي بس لاتسأل كثير مثل البنات ويلا سو اللي قلت لك عليه وإذا رجعت ومحد شافك ولا قلت لأحد بعطيك خمسين ريال
بسام : طيب خلاص بروح ونزل يركض وراكان واقف عند الدريشه ويدعي : الله يستر عسى ما يحوسنا بسام ويخرب السالفة بس والله ما عندي حل ثاني
راح بسام وطبق الكلام اللي قاله له راكان ودخل للبيت وراح لمنى وهو يركض : منى منى
منى التفتت مستغربه من الصوت ماعندهم صغار في البيت شافت بسام وسلمت عليه وضمته لأنها تحبه وهو بعد ينحب مملوح و ابيض وشعره اسود وناعم وأسنانه اللي قدام مكسره وفيه غمازات وزياده على هذا اخو راكان : هلا بسام كيف الحال وشلونك طيب وشلون اهلك وخواتك
راكان : يا حظك يا اخوي ياليتني مكانك
بسام ونفسه مقطوع : كلهم طيبين وحط الورقة في يدها امسكي لا احد يشوفها
منى باستغراب : وش هذي؟
بسام : ورقتك
منى : أي ورقه
بسام : مدري هو يقول طاحت منك
منى : ومن هو اللي يقول؟
بسام رفع راسه وهويأشر على أخوه اللي يراقبه من فوق : راكان يقوله
رفعت منى راسها وشافت راكان واقف في غرفته ويطل مع الدريشه
راكان : الحمدلله شافتني
وجت أروى : الغداء جاهز, أوه بسام عندنا وراحت وضمته بسرعة
منى حطت الورقة في جيب بنطلونها قبل لاتشوفها أروى
أروى: هاه وش جايبك عندنا اليوم
بسام : أدور كورتي الظاهر طاحت عندكم
أروى : لقيتها؟
بسام : لا مالقيتها ,خلاص بروح للبيت
منى : لا لازم تتغدى معنا
بسام يناظر شباك أخوه وحست منى انه خايف منه
منى: طيب تعال معي بعطيك شوكولاته قبل لاتروح خذته معها للمطبخ وفتحت الثلاجة وعطته شوكلاته وبسرعة فتحت الورقة ولقت مكتوب فيها : هذا رقمي انتظر مكالمتك بعد العشاء وعصبت منى : عمى إن شاءالله وش شايفني داجه صدق أنه وقح بس دواك عندي
بسام قطع عليها أفكارها: يلا يامنى راكان ينتظرني
منى : دقيقه لاتروح خلك هنا بروح شوي وارجع
راحت منى تجيب قلم وكتبت على نفس الورقة احترم نفسك لو سمحت وإذا أنت ترضى هالشي يصير لوحده من خواتك أنا ما أرضاه لنفسي وإن سويتها مره الثانية لاتلوم إلا نفسك
منى : بسام هالورقه مو لي يمكن أخوك غلطان رح قل له يتأكد قبل من هي له ,وقل تقول منى مو كل البنات مثل بعض فاهم حبيبي
بسام : طيب يلا مع السلامة
منى : مع السلامة
طلعت منى وبسام للحديقة و وصلته عند الباب وكان ودها ترفع راسها وتناظر فوق بس مسكت نفسها ودخلت للبيت ولحقتها أروى :تعالي نتغدى
منى : تصدقين بردت برى خلي الخدامة تجيب الأكل داخل
أروى : يا السخيفة تعالي البسي جاكيت, شوي بس نتغدى وندخل تكفين
راكان واقف في غرفته ينتظر أخوه دخل بسام ونفسه مقطوع من الركض
راكان : هاه عطيتها الورقة
بسام عطى راكان الورقة: تقول أخوك غلطان هذي الورقة ميب لي
راكان خذ الورقة وقرى اللي فيها وانصدم و قعد يكلم نفسه : ياربي أنا وش سويت خربت السالفة أكيد خذت عني فكره غلط, جيت أكحلها أعميتها يارب وش أسوي الحين ,وضاق صدره وراح وقف في مكانه المعتاد عند الدريشه وقعد يناظر منى, ليش تفكيرك فيني كذا, الله اللي يعلم أني ما أحب هالحركات بس ما باليد حيله الظروف هي اللي أجبرتني بسام قطع عليه أفكاره : راكان متى تعطيني الخمسين
راكان التفت ولقى أخوه يأكل تويكس على سريره ووجهه ملطخ بالكاكاو
راكان :وش تسوي أنت عفست الدنيا الله يهديك وش جاب هالكاكاو هنا
بسام : منى عطتني إياه, أنا أحب منى مره
راكان في نفسه : وأنا بعد أحبها
بسام : متى تعطيني الخمسين
راكان فتح بوكه وطلع خمسين ريال وعطاها بسام : اسمع لاتقول لأحد اللي صار فاهم
بسام : طيب خلاص
طلعت منى مع أروى وهي متضايقة وجلست على الطاولة وهي في داخلها تغلي من اللي سواه راكان وتكلم نفسها : أنا السبب أنا اللي قعدت اطل مع هالدرايش وخليته يظن أني راعية حركات استاهل كل اللي صار بس هو بعد وقح ماصدق وأرسل هالورقه لاومع أخوه بعد
أروى : وش فيك ما كلتي وأنتي مزعجتني جوعانة وبموت من الجوع
منى : خلاص شبعت بروح لغرفتي لين ما يأذن وبنام ولا أحد يصحيني بشغل المنبه
أروى : طيب خلاص
منى راحت لغرفتها وقامت تصيح مقهورة ما توقعت أن الأمور بتنتهي بهالصوره وتنتظر متى يأذن علشان تدق على ريم بنت عمها

********************************************
ناصر راح لغرفة سلطان وطق الباب وسلطان ما رد عليه
سلطان كان متمدد على السرير وماله نفس يتكلم مع احد :أكيد هذي أمي خلني أسوي نفسي نايم الحين وش يفكني من سوالفها
ناصر طق الباب مره ثانيه وثالثه بعدين دخل : سلطان سلطان يلا قم عاد
سلطان بدون نفس : نصور اطلع وصك الباب خلني أنام
ناصر وهو يفكر ويتمشى في الغرفة: آه خلني أنام , خلني أنام , معناها انك ما بعد نمت لأنك لو كنت نايم كان قلت خلني أكمل نومتي صح وإلا أنا غلطان
سلطان وهو ماسك نفسه : ياصبر الأرض اللي شايلتك
ناصر : أي والله ياصبرها اللي شايله اثنين من نفس الطينة أنا وأنت
سلطان : ناصر اذلف أحسن لك لاتكون موتتك على يدي
ناصر بكل برود : قابيل وهابيل للمرة الثانية
سلطان بعصبيه : حمار أنت , ماتفهم انقلع عن وجهي
ناصر : أول شي هدي نفسك شوي ووعد اطلع بس أنت اهدأ
سلطان : وهو يصر على أسنانه : هديت , ممكن تطلع
ناصر وهو يهز راسه :لا لا لاتصر على أسنانك بعدين تتكسر مع تكرار هالحركه
سلطان : الله يتوب علي وش هالإبتلاء , يارب ارحمني
ناصر : إذا أنت تقول كذا علشاني قدامك أجل أبوي وش يقول إذا شافنا كلنا يالثلاثه قدامه لا ومعنا بنت هديه , والله ابوي مسكين إن شاء الله بيدخل الجنه على صبره علينا
سلطان يهز راسه وضايع بين الضحك والعصبيه
ناصر: إيه وأنا أخوك اضحك بس لاتكثر لايبلاك ربي بعيال مثلنا
سلطان : فال الله ولا فالك
ناصر : ودي اتكلم معك بس بهدوء وبدون عصبيه ممكن
سلطان اللي هدأ شوي : وش عندك ؟
ناصر : ممكن اعرف ليش عصبت يوم قالت ريم الكلام اللي قالته
سلطان ماسك نفسه علشان ما يبين عصبيته : لو كنت مكاني كان عصبت , أجل بنت لا أعرفها ولا تعرفني تتكلم وتقول عني هالكلام وتحكم علي وهي ما شافتني
ناصر بخبث : وانت قلتها يا اخوي بنت ,وموب عيال عبد العزيز اللي بنت مثل هذي تتكلم عليهم
سلطان : وش اسوي يعني
ناصر : خذها وأدبها وعلمها وشلون تحكي على الرجاجيل ,أجل تخلي بنت تحكي عليك
سلطان : لا حبيبي موسلطان اللي يأخذ وحده تحكي عليه كذا, بعدين هي حكت عني موعنك
ناصر : لايا شيخ هي قالت عنك مغرور وعصبت , بس أنا قالت عني مرجوج المفروض ما اعصب وبس إلا تطلع لي قرون
سلطان باستهزاء: يعني فرقت ,مغرور مرجوج كله واحد
ناصر : إيه فرقت مغرور يعني عندك عقل وراكد ورزين بس شايف نفسك,اما مرجوج معناها لاعقل ولاثقل
سلطان وهو يضحك :في هذي ما شاء الله عليها صدقت شخصت حالتك زين أنا لو بأخذها بأخذها علشان هالكلمه بس
ناصر : ايه والله عرفت تشخص الحاله زين خصوصاً حالتك
سلطان يجر اللحاف من تحت ناصر : قم قم اطلع يلا اقضب الباب وعطني مقفاك
ناصر: هاه وش قلنا , موبنت اللي تسوي فينا كذا وين عقلك يارجال خلنا نتفاهم ونشوف وشلون نأدبها
سلطان : تصدق عاد هونت أنا لاأبي آخذها ولا أدبها لأن عقلي أكبر من هالسوالف نسوي عرس ونزعج العالم بس علشان أربيها , وبعدين إذا علمتها وش بيصير يعني
ناصر : اسمع لا تقعد تتفلسف علي انا عارف انك مغصوب على هالعرس وانك ما تبي تتزوج من الأساس , بس دام ابوي سعود وام سلطان عايشين الله يطول في أعمارهم فهم ماراح يخلونك على هواك
وبعدين اللي أعرفه أنك شفت البنت وأعجبتك على ما أظن أو تقبلتها شكلياً علشان ماتزعل
سلطان يقاطعه وهو مكشر : لسانها طويل
ناصر : عادي نقصه لها وإذا ما قدرنا مافيه مشكله بالعكس حياتك بيكون فيها إثاره وأكشن, تتناقرون وتتهاوشون احسن من الملل وأنا اخوك
سلطان : الحمدلله والشكر وأعيش معها في مناقر وطقاق , لا حبيبي أنا ما أحب وجع الرأس
ناصر : خذها مني يا اخوي المره القويه احسن من الهاديه اللي مالها رأي وماعندها إلا سم ولبيه , حبيبي انت شخصيتك قويه يبيلك وحده تجاريك في قوتك صدقني الحياة بتكون معها احسن بتفهمك زين وعندك اكبر مثال أمي وأبوي , أمي قويه وأبوي بعد وهذا هم عايشين حياتهم ومبسوطين , وشف خالي سعد وحرمته الإمعه على قوله من كثر ما طفش منها تزوج عليها مرتين
سلطان : تصدق كأنك أنت وسوالفك عجوز تنصح ولدها , أقول قم بس خلني أنام أزعجتني
ناصر : بأخليك تنام بس وش رايك في الموضوع, يا اخي نبي نفرح ونلبس بشوت ونعزم أخويانا
سلطان : ألبس بشت من ماسكك
ناصر : يعني اقول لامي تحاكي أهلها هي بتروح لهم هالأسبوع او اللي بعده
سلطان : وش يوديها أنا توني قايل لها ما أبيها, بعدين البنت ما تبيني
ناصر : هي بتروح زياره عاديه مو خطبه بعدين لاعاشت ولا كانت اللي ما تبي سلطان مو انت استخرت بعد ما شفتها وارتحت لهالسالفه توكل على الله وخلني أقول لأمي
سلطان متردد: ما أدري أخاف تردني وأنا ما أبي وحده مثل هذي تردني
ناصر : اسمع رويمه ماراح تعرض صداقتها مع هالساره للمشاكل ولو انها مو واثقه من موافقتها كان ما قالت اخطبها وتحمست للموضوع
سلطان يفكر اخاف اوافق وابلش مع هالبنت واخاف ارفض ويقوم أبوي سعود ويخطب لي وحده على من العايله وذيك الساعه كل شي اسويه بتدري عنه العائله الكريمه
سلطان : أجل على قولك على بركة الله
ناصر :اجل خلني اروح ابشر أمي انك موافق ,وقبل ما يطلع وقف عند الباب :
اقول سليطين تصدق حسيت أني عجوز تقنع بنيتها علشان توافق تأخذ معرس ما ينرد , صدق انقلبت الآيه
سلطان خذ كتاب من على الطاوله ورماه على أخوه اللي واقف يضحك

*********************************************
راكان قاعد في غرفته ومحتار قام وخذ جواله ودق على يزيد
يزيد : هلا براكان أمداه الشوق ذبحك توني شايفك في الجامعه
راكان يقلده: الشوق ذبحك انطم بس انت وجهك
يزيد : أوف وش هالعصبيه وش فيك؟
راكان : يزيد اليوم سويت شي غبي اول مره اسويه
يزيد: بس اليوم أصلا هذا طبعك من عرفتك
راكان : تصدق ان مكالمتي لك اغبى من اللي سويته ,يلا بس مع السلامه
يزيد : لحظه راكان امزح بس لاتلومني توني قايم من النوم, قلي وش السالفه وش سويت؟
راكان قال ليزيد عن اللي سواه مع منى
يزيد : وش ذا الغباء؟
راكان : احلف , وانا وش قاعد ارطن من الصبح
يزيد : بالله وش خلاك تتهور وترقمها في بيتهم والله انك ما تستحي
راكان : لاتلومني والله من الحره اللي فيني
يزيد : ما ألومها على اللي سوته, واحمد ربك انها ما كبرت السالفه وإلا قالت لأبوها وإلا أخوانها
راكان : والسواة الحين دبرني وش أسوي ماعاد أقدر أفكر, وشلون احل هالمشكله
يزيد : والله هالسالفه ما تترقع بس وش رايك تخطبها ؟
راكان : يا ليت بس بهالوقت أكيد بتردني هذا إذا ما طردت أهلي من بيتهم
يزيد : طيب وش رايك تقول لوحده من خواتك تكلمها
راكان: لا تكفى علشان يفضحوني عند اهلي قبل لايكلمونها
يزيد : طيب اكتب لها رسالة اعتذار وارسلها بنفس الطريقه
راكان : هي متوعدتني اني ما ارسل لها شي مره ثانيه واخاف تكبر السالفه
يزيد : اسمع اكتب لها رسالة اعتذار بعدين حطها في ظرف وصكه زين واكتب على الظرف بخط عريض و واضح ممكن تقرين المكتوب قبل لا تكبرين السالفه , وانت عندك خوات وتعرف بلاغة الشف اللي في البنات يحبون يعرفون كل شي حتى لو انه ما يخصهم وكذا بتضمن انها قرت الرساله وعاد انت وحظك يا أنها بتبلع السالفه وتسكت أو أنها بتقوم الدنيا عليك وبتشغلنا وتخلينا نزورك كل يوم في المستشفى
راكان : تطنز انت وجهك, بس فكره ولو اني خايف منها عالعموم خلني اجرب وعلى قولك ما يندرى وش اللي بيصير
يزيد : معليش وأنا اخوك حتى لو تكفخت ترى كل شي مكتوب
راكان وهو متردد : خلني افكر بعد وإذا ما لقيت حل بسوي مثل ما قلت

***********************************************

ناصر نزل مع الدرج وهو يركض وبصوت عالي : يمه يمه عطيني البشاره
ام سلطان : أي بشاره , فاضي أنت
ناصر:لامليان هاهاها , مبروك يا أم العريس ابنك وافأ انو يتقوز كلللللللووووش العريس العروسه اهل العريس اهل العروسه ورأصني يا قدع أديني مزيكا
أم سلطان : عن الخبال عاد اركد وفهمني صدق سلطان وافق
ناصر : أيه وافق وإذا رحتوا لهم كلمي أهلها في الموضوع خلينا نفرح وقبل هذا كله قصي لسان رويمه
دخلت هيفاء وعلى طول راحت عند ناصر وام سلطان : السلام عليكم , عساها افراح دايمه وش عندكم؟
ناصر: يا الله البنات واللقافه توأم سيامي مدري من بيفصل بينهم
ام سلطان شافت هيفاء انحرجت وهي بطبعها حساسه : افصلهم يالفالح
ناصر: مستحيل احد يقدر يفصلهم حتى لو جبتي الدكتورعبدالله الربيعه بنفسه
هيفاء بإحراج :آسفه مو قصدي
ام سلطان : ما عليك منه هالمرجوج
ناصر: اشوف كلمة المرجوج لاصقه في ألسنتكم اليوم , بس هين ياسويره أن ما وريتك شغلك ماأكون ناصر
هيفاء: من هي ساره وموقصدي لقافه بس أي اعرف من هي اللي حطت الكلمه المناسبه لأسمك
أبو سلطان وهو داخل للبيت : السلام عليكم
أم سلطان : وعليكم السلام هلا بنور البيت لاتعبت يالغالي
أبو سلطان : لاندمتي , وش عندكم واقفين
ناصر: والله فرحانين خلاص امي بتخطب لسلطان
هيفاء وهي مستانسه : صدق , مبروك من بتخطبون له
ناصر: أنتي ما تعقلين من شوي مسويه مستحيه وآسفه وموقصدي لقافه والحين بدى التحقيق صدق ما تقدرون تصبرون
هيفاء : محد كلمك انا اكلم خالتي
ام سلطان : روحي لريم في غرفتها وهي بتقولك السالفه
هيفاء راحت بسرعه لريم وهي في الطريق شافت سلطان طالع من غرفته وراحت عنده :
مبروك يا أخوي تستاهل
سلطان رافع حواجبه باستغراب : على أيش تباركين لي؟
هيفاء : هاو على الخطوبه مو خالتي بتخطب لك؟
سلطان :حشى أمداهم ينشرون الخبر صدق حريم
ودخل غرفته وصك الباب بقوه وهو معصب لأنه ما يبي أحد يدري عن السالفه يخاف البنت ترده وهو مو ناقص كلام زايد مثل ما صار بعد ما انتهت خطوبته الأولى
هيفاء راحت لريم ولقتها نايمه وجلست على السرير:ريوم ريوم يلا قومي بسرعه
ريم وهي مغمضه : هييف ضفي وجهك وخليني أنام
هيفاء : ريوم قومي تكفين لا تخليني احترق زياده
ريم : الله يسمع منك قولي آمين
هيفاء باستغراب: آمين بس وشو اللي الله يسمع مني
ريم بملل : تحترقين وأرتاح منك
هيفاء بعصبيه : إلا جعلك انتي الحريقه اللي تشب فيك وما يقدر يطفيها الدفاع المدني يالحماره
ريم : وش تبين خلصيني ابي انام
هيفاء : أبي أعرف شي واحد بس منهم الناس اللي بتروحون تخطبون بنتهم لسلطان؟
ريم اللي قعدت بسرعه :وش قلتي نخطب لسلطان
هيفاء : بسم الله عليك انتوا اليوم وش فيكم مروعين الأول سلطان والحين انتي وش السالفه
ريم : يعني سلطان وافق , الله يبشرك بالخير وضمت هيفاء بقوه
هيفاء باستغراب : الحمدلله والشكر وش فيكم تكلمي؟
ريم قالت لهيفاء كل السالفه من اول ما شافت ام سلطان البنت لين ما دخلت عليها هيفاء
هيفاء بتفكير: وانا اقول وش فيه سلطان ما يبي أحد يدري بالسالفه شكله يخاف البنت ترده
ريم : الظاهر تعقد عقب سالفة هناء
هيفاء : وع لاتجيبين طاريها الله لايردها ما وراها إلا الهم
ريم : إي والله بس اموت واعرف هو ليش متأثر بعد ما فك خطبته مع انه ما يحبها
هيفاء : المفروض تقولين الحمدلله انه ما أخذها هالمغروره , وع هالخايسه تصير سلفتي
ريم : وش هالثقه ضامنه ان حنا نبيك لفهد
هيفاء بغرور : مو مهم انتي تبيني اهم شي هو يبيني
ريم : اقول خلصي الثانوي اول بعدين فكري في العرس
هيفاء : كلها هالسنه واخلص وارتاح
رن جوال ريم : هذي منى بنت عمي محمد غريبه وش عندها
ريم : آلو , اهلين منى
منى وصوتها متغير: هلا ريم كيف الحال؟
ريم : بخير وش فيه صوتك فيك شي
منى : لا ما فيني شي , بعدين قامت تصيح إيه فيني شي
ريم بخوف : منى تكلمي وش فيك
منى : السالفه تخص راكان و ما اقدر اتكلم بالتليفون ممكن تجيني للبيت
ريم : طيب انتي تعالي
منى : لا ريوم تكفين حالتي حاله وعيوني حمر من الصياح وما ودي اطلع من غرفتي تعالي انتي الله يخليك ولا تخافين محد في بيتنا بيهتم امي وابوي طلعوا من دواماتهم ونايمين وكالعاده إذا قاموابيطلعون يعني بتجين وبتروحين ومحد بيدري عنك
ريم تناظر هيفاء : طيب منى هيفاء عندي الحين عادي أجيبها معي
منى بتعب : كيفك اهم شي تجين
ريم : أجل لازم أقولها السالفه
منى : قولي لها وأمرنا لله , حتى هي عندها فهيدان غاثتنا فيه يعني بتتفهم الوضع
ريم : خلاص شوي ونكون عندك , يلا مع السلامه
منى : مع السلامه
ريم راحت لغرفة الملابس بسرعه وغيرت ملابسها وطلعت : يلا هيفاء بسرعه خلينا نمشي
هيفاء باستغراب : وش السالفه؟
ريم : امشي الحين وانا بقولك كل شي في السياره
نزلت ريم وهيفاء ولقوا ابو سلطان وام سلطان في الصاله ريم بصوت واطي :حبكت وش قعدهم في الصاله اليوم
ابو سلطان : على وين ؟
ريم : بنروح لمنى بنت عمي محمد
ام سلطان : ليش عاد ؟
ريم : عازمتنا اليوم
ام سلطان : وش هالحب والصداقه اللي نزلت عليكم فجأه
ريم : عادي وش فيها بنات عم ويسيرون على بعض , صح يبه
ابوسلطان : خلاص يا ام سلطان خليهم يرحون بسلامتهم
ريم : يلا مع السلامه
طلعت ريم وهيفاء وفي الطريق ريم قالت لهيفاء السالفه ووصلوا لبيت عمهم ودخلوا ولقوا اروى في الصاله قاعده تدرس
ريم : هلا أروى كيفك؟
أروى مستغربه : هلا والله وش جابكم
ريم : ياللي ما تستحين عيب الناس يقولون حيا الله من جانا ما يقولون وش جابكم
أروى : لا بس غريبه
ريم : لاغريبه ولا شي , منى في غرفتها
أروى : إيه ليش
ريم راحت مع هيفاء عند الدرج : اقعدي ادرسي ومالك شغل
أروى لحقتهم : لحظه هي نايمه وقالت لي لاتخلين أحد يقومني
ريم : انتي انطقي هنا ولا تلحقينا وانا وإياها نتفاهم
راحت ريم وهيفاء لغرفة منى ولقوها مقفله عليها الباب طقت ريم الباب : منى افتحي انا ريم
منى قامت وفتحت الباب وحالتها حاله
ريم : منى وش السالفه ؟
منى : تهاوشت مع راكان
ريم باستغراب : انتي متى كلمتيه علشان تتهاوشين معه
منى : أنا ما كلمته
ريم : لا يا شيخه تستهبلين انتي ووجهك وش السالفه
منى قالت لريم وهيفاء عن اللي صار
ريم : وبس ومزعجتنا وتعالي ابيك وصياح ودموع وأخرتها راكان رقمك
منى : أنتي غبيه أنا كنت متأمله بشي ثاني ما توقعت أنه يفكر فيني بهالصوره وحده يرقمها ويتسلى فيها
هيفاء : طيب ليش ما كلمتيه
منى وريم يناظرونها وكأنها كائن غريب
هيفاء : يعني كان شفتي وش يبي أول
ريم : الظاهر فيوزاتك ضاربه اليوم , مجنونه انتي وشلون تكلم واحد ماتعرفه
منى : طيب وش أسوي الحين وشلون بقدر أكلم خواته او اروح لبيتهم , هم طيبات وما لهم ذنب
ريم : عادي انسي كل اللي صار وخليك مثل أول وشيلي راكان من راسك وانسي انك شفتيه
منى : وشلون انسى وانا كل ما فتحت شباك غرفتي او طلعت من البيت شفته لا وزود على كذا خواته اللي يسولفون عنه وفيه شي هالايام طايح صداقه مع فيصل وما ادري وش ناوي عليه
ريم : آه ياقلبي يافيصل إلا وش أخباره من زمان ما سمعت شي عنه
منى : تكفين انطمي بس أنا جايبتك علشان نتكلم عن فيصل وإلا علشان ندور حل للي صار
ريم : أنا قلت لك الحل
منى : وانتي هيفاء وش رايك؟
هيفاء رومانسيه اكثر منهم : حرام ينتهي كل شي بهالطريقه
ريم : هي انتي اساساً ما صار بينهم شي علشان ينتهي, كل اللي صار انهم سنتروا عند الدرايش كم يوم وبس
منى : يا حسافة ذيك الأيام اللي تعبت فيها من الوقفه علشان أراقبه مالت عليه
هيفاء : هو وسيم
منى : يهبل يشبه بيكهام بس شعره اسود مو اشقر
ريم : الله يحوم كبدك أنتي وهالناعمين , ذكرتيني بسارونه تحب اللي أشباهم مثل بيكهام
هيفاء : على كذا ما راح تتزوج سلطان
منى : سلطان بيتزوج؟
ريم : الله يسمع منك ويتم الموضوع
منى : وش السالفه من بيأخذ وش شكلها ومن وين عرفتوها
ريم : توك تصيحين ومتأثره الحين راحت ضيقة الصدر
منى : يلا ريوم تكلمي سلطان الوحيد اللي الكل متحمس لليوم اللي بيتزوج فيه وللحرمه اللي بتجوز له
ريم : بتكلم بس ياويلك أن قلتي لأحد وخصوصاً امك
منى : لاتخافين ما راح اقول لأحد
ريم : طيب اسمعي السالفه .......

***************

راكان مسك ورقه وقلم وهومحتار ما يدري وش يكتب كل شوي يكتب كلمه او ثنتين بعدين يغير الورقه
يالله خلصت الاوراق وانا ما كتبت شي المشكله ما ادري وشلون ابدأ وش أكتب عزيزتي وإلا اختي والله حاله هذا كبري وما اعرف وش اكتب خلني اروح اسأل نجد وطلع ونادى أخته : نجد نجيد تعالي شوي
راحت نجد عنده : نعم وش بك تصارخ وش تبي
راكان : نجد إذا واحد بيكتب رسالة إعتذار لوحده وش يكتب
نجد وعيونها بتطلع من الصدمه : راكانوه تعرف وحده ياللي ما تستحي
راكان : أوف انتي تفكيرك مثل وجهك موب أنا اللي بكتب واحد من أخوياي
نجد : وأنت عادي تخاوي واحد يعرف بنات
راكان : لو خويي يعرف بنات كان ما جيت اسألك , هذي خطيبته
نجد : صدق انه جلف وعربجي وإلا بوه واحد يزعل خطيبته أجل إذا أخذها وش بيسوي بيكفخها
راكان : لاحول الله , وانتي وش دخلك هو سألني وش يكتب بحكم أن عندي خوات ويبي يعرف وش طريقة الإعتذار اللي تناسب البنات
نجد : والله على حسب يعتمد على شخصية البنت بعد, يعني إذا هي ما تحب البربره والمزح وجاده الأفضل أن يكون إعتذاره رسمي و يكتب بالعربيه الفصحى ويختصر,أما إذا كانت رومانسيه فخله يكتب كلام حلو ورومانسي ولو إني ما ظنيت أن خويك يعرف وش الرومانسيه, وإذ هي دمها خفيف و تحب المزح والحركات اللي فيها مواقف تضحك ياليت يكتب كل اللي بباله وبالعاميه بعد ويحط تعليقات على نفسه
راكان يحك رأسه و يكلم نفسه : الحين ابيها تسهل علي الموضوع قامت تعقده زياده وأنا وش دراني بالبنت وشخصيتها
راكان : طيب هم توهم مخطوبين يعني ما أمداه يعرفها زين
نجد : والله هذي مشكلته محد قال له يزعلها من الأساس, عالعموم لو سألتني رايي بقولك اهم شي ان الواحد يكون صادق في إعتذاره ويبين أسفه وترى هذا أهم من طريقة الإعتذار
راكان : زين شكراً ما قصرتي خلاص روحي عاد خلني أدق عليه
نجد : سؤال هم ليش متزاعلين من بعض؟
راكان : وأنا وش دراني, وش هاللقافه
نجد : لا بس مجرد فضول
راكان :صدق بنات
مسك راكان الورقه وبدى يكتب وهو يدعي أن منى تقراها قبل لاتعطيها احد او تشقها
راكان : الحين خلصت عاد من وين اجيب لها ظرف احطها به وقام يدور في مكتبه وما لقى
طلع وراح لنجد وفتح الباب : نجود عندك ظرف
نجد : ليش؟
راكان : خوي تحت ينتظرني بالسياره وعافس الدنيا هو ورسالته ويبي ظرف
نجد : الحمدلله والشكر المكتبات كثر التراب وهو جاي يطر ظرف
راكان : إنا لله الرجال حالته حاله وأنتي تبينه يروح للمكتبه, الشرهه علي أنا اللي شاد فيك الظهر اروح اقول لبشير السواق يعطيني من الظروف اللي عنده ابرك لي بس
نجد وهي تطنز : إيه علشان تحطه بالزباله قبل لاتقراه
راكان باستغراب : ليش عاد تحطه بالزباله
نجد : هي عامل علشان يحط لها رسالة إعتذار بظرف عادي لا و فيه الوان ازرق واحمر, امحق رومانسيه مالت عليك أنت وإياه وقامت تدور في درجها وطلعت له ثلاث ظروف واحد وردي وعليه ورد والثاني ليموني فيه ريحة عطر والثالث ابيض ساده
راكان أخذ الظرف الابيض وقبل لايطلع قال : آخر طلب عندك فلومستر أسود
نجد : أنت وطلباتك وهذا خويك وش فايدتهُ أجل إذا أنت اللي تفكر عنه وتجيب له اللي يبي أخاف كتبت الرساله عنه بعد
راكان : خلصيني عندك فلومستر وإلا لا
نجد : لحظه عندي أحمر ينفع
راكان : إيه ينفع وخذه ونزل تحت وكان يزيد ينتظره بالسياره
راكان ركب السياره وهو معصب : أوف شبت تسبدي هي وأسئلتها
يزيد : تكلم زين لوسمحت ما اعرف قصيمي
راكان وهو يحط الرساله بالظرف : هذي الرساله وخلصنا وبعدين وش أسوي
يزيد : اكتب على الظرف ممكن تقرين اللي داخل قبل لا تتسرعين و تسوين أي شي
راكان كتب اللي قاله يزيد :وبعدين وشلون أرسلها لها؟
يزيد : قل لبسام يوديها
راكان : يا الله وشلون أقنعه أنه يروح ,لا ووش بيقول لو شافه أحد من أهلها وسأله وش يبي فيها
يزيد وهو يفكر: موتقول أنها مع أختك بنفس القسم أرسلها داخل أي كتاب أو ملزمه
راكان : هذاك أول,هم كانوا داخلين تربيه خاصه بس نجد حولت فنيه
يزيد : خلاص جب مجله وحطه داخلها وحرص عليه لا يعطيها أحد غيرها ويقول أن أختك اللي مرسلتها لها
راكان : يلا حرك خلنا نروح نشتري أي مجله
يزيد : وبيتكم مافيه مجلات
راكان : إلا فيه بس عند خواتي وأنا ما عندي إلا مجلة الرجل وإلا مجلات الرياضه
يزيد : اجل ناد بسام خلنا نوديه للبقاله على الطريق ونسكته لا يفضحك
بعد ما رجع راكان ويزيد وبسام للبيت
راكان يحاكي بسام : هاه فهمت وش قلت لك
بسام : إيه فهمت
راكان : يلا رح خلنا نخلص من هالسالفه

************************************************
الجزء الثاني عشر
في بيت أبو بدر
دخل بدر ولقى أمه وأبوه ومشاري وأصايل قاعدين يتقهوون
بدر : السلام عليكم
الكل : وعليكم السلام
بدر : وشلونكم؟
أم بدر : بخير دامك بخير
بدر : وشلونك يبه
أبو بدر : بخير وانا أبوك
بدر يكلم مشاري : وأنت ياقيس زمانك كيف حالك أنت وليلى اللي جنبك
أصايل حمدت ربها أن الغطى واجب لأن وجهها ولع من الفشيله
مشاري : أحسن منك أنت وجهك مالت عليك حد ما تطنز
بدر : يحق لي أتطنز مشغلنا ليل نهار أنت وصوتك النشاز
مشاري : كيفي , واحد مبسوط ويغني لحرمته
بدر : غن في غرفتك موب في كل مكان والله الصبح بغيت أقوم الحطك بالعقال أحد يغني على الفطور وياليته على سنع أول ما سمعتك قلت وش فيه خزان المويه خرب وقعد يحن
مشاري : هاهاها بايخه بعدين ليش أنت حقود ما تبي تستانس ولا تبي غيرك يستانسون
بدر يكلم أصايل : بالله جايز لك صوته وهو يغني
أصايل : لاوالله من يبدى يطربني على قوله وأنا أحس أن راسي يدور بي لين يسكت
بدر : يا أخي خف على هالضعيفه حومت كبدها
مشاري يناظر أصايل بحقد : أصلاً ما أنتي بكفو من يغني لك
أصايل : بالله هالصوت اللي يطلع منك تسميه غناء الله يرحمك برحمته
مشاري : لو وش تقولون ما نيب ساكت وبأقعد أغني لولدي
بدر : يوه مشاري بكبره ما نتحمله وشلون إذا معه نمونه
أصايل : اسكت يا بدر الله يعافيك ترى هالكلمه محومه كبدي العنود من تشوفني وهي تقول وشلون بنتحمل أصايل الكبيره ومعها عينه مجاناً
بدر فديت العنود وكلامها : وهي صادقه حنا ما صدقنا نفتك منكم تروحون تجيبون لنا علل زياده
أصايل : أيه الكلام غير واللي في القلب غير
بدر : اللي في قلبي على لساني
أصايل : علشان حنا ساكنين معكم والا عنوده إذا شافتني قامت تحش فيني وإذا رحت طقتها الغلقه
أم بدر : ما تنلام من اول وأنتي معها وتسولفون وتجلسون مع بعض والحين مسكينه لحالها
أصايل : أيه والله من تزوجت وهي متغيره وصايره انطوائيه حتى أهلي ضايقه صدورهم عليها ودهم يودونها لأخصائي نفسي
بدر حس بيد ماسكه قلبه وتعصره بالقوه , يسمع أخبارها ويدري أنها تعبانه بس يدينه مربطه وما يقدر يسوي لها شي
مشاري : اهلك مكبرين السالفه
أصايل : لا والله البنت حالتها متغيره من أول لسانها وش طوله وتحب المزح والسوالف والحين ما عاد ينسمع لها حس قبلها قافله على عمرها وما تطلع من الغرفه حتى وزنها نقص
بدر : يمكن المسكينه متأثره بفقدتك أول أنتي معها والحين لحالها
أصايل : لا أهلي ما يخلونها أمي وأبوي عندها اربع وعشرين ساعه
أم بدر : أخاف فيها عين ذاك اليوم يوم عرسك طالعه تهبل ما بقي أحد ما سأل عنها خلي أهلك يقرون عليها
بدر يكلم نفسه : تهبل قليله في حقها قولي قمر والاملاك
مشاري : بس أنتي من أيام الملكه وانتي تقولين متغيره نسيتي يومك تقولين أنها عيت تروح معك للسوق ودايم صاكه عليها غرفتها
أصايل بتفكير : أيه هي من بعد الملكه وهي متغيره بس الحين بزياده حتى ماصارت تروح لإجتماعات العايله, من الجامعه للبيت وبس
أبوبدر : زوجوها بس وشوفوا وشلون بتطيب
بدر يناظر أبوه وهو مقهور : يبه وين حنا عايشين ؟ عليك تفكير الله يهديك بس!! من متى و العرس علاج؟
أبوبدر : البنت إذا تزوجت وحست بالمسؤليه بتركد وتعقل وبتنسى الدلع
بدر : وش اللي تركد وتعقل وش قالوا لك مجنونه
مشاري : وش فيكم أنتوا معصبين
بدر : أبوي الله يهديه ما عنده حل الا العرس خلص مني وبينشب في بنت الناس
أصايل : لا الظاهر كلام خالتي صح ذاك اليوم ما بقي أحد ما خطبها , بأقول لأمي تقرى عليها
بدر طلع وراح لغرفته وهو يفكر معقوله العنود تعاني مثلي وتذكر كلامها اللي قالته له في الفندق وكلام أصايل اللي من شوي ومسح وجهه بيديه وهو يقول لايالعنود لا تعذبين عمرك علشاني أنا ما أستاهلك, يارب خفف عنها ولاتعذبها واشرح صدرها يارب وفقها وارزقها بالصالح من خلقك يارب

************************************************** ****
راح بسام ودخل بيت ابوفيصل ولقى اروى عند التلفزيون
بسام : أروى وين منى
أروى وهي تبوسه :وش تبي فيها
بسام : أبيها شوي بقولها شي
أروى : وش بتقول لها؟
بسام : يا ربيه نجد تبيها خليني اشوفها
أروى : وش فيها الكيس اللي معك
بسام بدى يصيح لأن أروى ما خلته يروح وهو خايف يقولها ويهاوشه راكان
أروى : اوف وش فيه قام يصيح خلني أوديه لمنى لايسوي لي سالفه
أروى : يلا تعال أوديك لمنى وخذته و راحت معه لغرفة منى وطقت الباب
منى : نعم
أروى: افتحي الباب
منى وهي تكلم البنات :والله من اللقافه في هالبنت
ريم : طنشيها بس
منى : أروى وش تبين ماني فاضية لك
أروى : مو أنا اللي أبيك هذا بسام يبيك
منى قامت بسرعه وفتحت الباب ولقت بسام واقف ومعه كيس ودموعه على خده
منى ضمته بسرعه : بسام وش فيك تصيح ؟ من اللي مزعلك
بسام التفت على أروى وتكلم وهو يصيح : أروى
أروى ارتبكت : أنا بنزل تحت مشت ولحقتها منى ومسكتها مع أذنها :وش مسويه لبسام ليش مصيحته
أروى : آه أذني ماسويت شي
منى : لايا شيخه تستهبلين تكلمي
أروى : قلت وش معك قال شي لمنى و ماعلمني وش هو ويوم حققت معه قام يصيح
منى : أنا كم مره قلت لك خلي اللقافه عنك في حياتي ما شفت احد القف منك وأن عدتيها مره ثانيه لا تلومين إلا نفسك فاهمه
أروى :آي خلاص فكيني عاد
منى : بسام افكها وإلا لا
بسام وهو يضحك خلاص اتركيها
منى تركت أروى اللي نزلت تركض بسرعه منى دخلت مع بسام للغرفه وصكت الباب
ريم : من هذا؟
منى من فوق راس بسام وهي تحرك شفايفها أخو راكان
هيفاء : مين؟ تكلمي بصوت عالي
ريم بهمس : اخو راكان
هيفاء : آها بعذرك ضميتيه وقعدتي تهاوشين أروى علشانه
ريم : ما تنلام كان هذا نمونه للي أكبر منه , بعذرها إذا قامت تصيح عليه
منى : هي حدك ترى أغار عليه
ريم : الله يمليك بركته , عندي فصول يسوى الدنيا وما فيها
منى : انطمي بس , هاه بسام وش عندك
بسام : اقربي بقولك سر
منى قربت عنده وريم جت وراها
بسام بهمس وهو يعطيها الكيس : هذي من راكان بس أنا قلت لأروى أنها من نجد
منى تغير وجهها وبدت تعصب وبصوت واطي : هذا ما يتوب, وش أسوي علشان أخليه يفهم
ريم : اصبري خلينا نعرف السالفه أول
ريم : خلاص بسام رح لبيتكم لاتتأخر على أهلك بس لحظه اوباسته بقوه وهي تكلم منى: ودي أعضه
منى : ياويلك لاتعورينه
منى تحاكي بسام : يلا بأقول للخدامه توصلك للبيت
بسام : لا راكان يحتريني في الشارع
ريم وهيفاء يناظرون بعض وبسرعه راحوا للدريشه وقبل لا يفتحونها
منى وهي معصبه : ضربه تشيلكم تبون تفضحونا انثبري أنتي وإياها , وأنت يا بسام رح لبيتكم مع السلامه
بسام : مع السلامه ونزل تحت
ريم وهي تترجى منى : تكفين خلينا نشوفه قبل لايروح
هيفاء : أي والله ترانا متحمسين
منى : طيب تعالوا شوفوه من دريشة الحمام مانبيه يشوفنا
راحت ريم وهيفاء ومنى للحمام وطفوا الانوار وفتحوا الدريشه
منى : هذا هو يكلم بسام
ريم : قطيعه وراه مطمن راسه ما شفنا وجهه
راكان : هاه وش سويت
بسام : عطيتها الكيس بس ما فتحته عندها بنات في الغرفه
راكان وهو منحني يكلم بسام : وقلت أنها مني قدامهم
بسام : لا قلت لها بأذنها
راكان : اشوا الحمدلله وباس أخوه على راسه ,يلا عاد أدخل للبيت وياويلك أن قلت لأحد عن اللي سويته
بسام : لامانيب قايل شي ودخل للبيت
راكان وقف وقعد يكلم نفسه : أكيد ماراح تفتح الرساله إلا إذا راحوا ضيوفها , وراح تسند على السياره وطلع جواله خلني أدق على يزيد اطمنه اني إلى الحين بخير
راكان كان لابس بنطلون جينز فاتح وتيشرت أبيض وعليه بلوزه صوف مفتوحه بسحاب لونها أسود وحاط على رقبته شال أسود مع ابيض وشعره ناعم وطويل تحت أذنه
ريم : واو أهنيك على هالذوق يا بنت عمي عرفتي تنقين ما ودك تسلفيني إياه كم يوم
هيفاء : لاوالله أنا أول بعدين أنتي
ريم : لا عيوني أنا أكبر منك وإذا خلصت منه عطيتك إياه
منى اللي عصبت : تخسون ياللي ما تستحون حقوق الحب محفوظه لي
ريم : ترفقي أشوفه بيموت عليك أنتي وجهك تراه رقمك بس ما خطبك واللي يرقمون ما يخطبون ولا يفكرون في العرس
منى ضاق صدرها وتغير وجهها
ريم : ايه صح هو وش مرسل لك
منى اللي تذكرت الكيس : ما أدري تعالوا نشوف
وطلعوا البنات بسرعه وراحوا للغرفه منى خذت الكيس وفتحته ولقت فيه مجلتين
منى باستغراب : مجلات وش السالفه
ريم : اخاف حاط في وسطها شي
وسحبت وحده من المجلات وطاح الظرف
ريم : هاه صح علي قايلتلكم أني ذكيه بس ما صدقتوني
هيفاء : انطمي بس اللي يسمعك يقول مكتشفه الذره
ريم : منو وش أغلى عندك الذره والاه الظرف
منى وهي تناظر الظرف : والله هالظرف أغلى من كنوز الدنيا
ريم تناظر هيفاء وهي ترفع حواجبها علشان تقهرها : شفتي وشلون, تخسى الذره ومكتشفها عند ريوم
منى : أي والله صادقه
هيفاء تهز رأسها : قاتل الله الجهله
منى سحبت الظرف وقرت المكتوب عليه : ليش كاتب هالكلام
ريم : هاهاها مخفه صدق انك بتعلمين أهلك
منى : لا تقولين عنه مخفه لا أدوس ببطنك
ريم : لا تتفاءلين اخاف إذا قريتها تروحين تدوسين ببطنه هو
هيفاء : وش تتوقعون كاتب
ريم تبي تقهر منى : والله ما يندرى أول مره رقمها والحين يمكن يبيها تطلع معه
منى طلعت عيونها : يضف وجهه شايفني ماتربيت والا داجه الحيوان اللي ما يستحي على وجهه والله لاأقلب الدنيا على رأسه أنا منى بنت عبدالله أطلع مع واحد لايالخسيس ما بقى الا هي
ريم : الحمدلله والشكر أنتي طبيعيه الله يخلف عليك بس سبيتي الرجال وانتي ماتدرين وش السالفه , يلا أفتحيه خلنا نشوف وش كاتب هالمره
منى فتحت الظرف وطلعت الورقه وهي ترتجف وفتحتها وقرت اللي كاتبه راكان


بسم الله الرحمن الرحيم

إلى منى :
في البدايه لا اعرف ماذا أقول لك فقد احترت كثيراً وأنا أفكر في الطريقه المناسبه لأتقدم إليك بالإعتذار لما بدر مني من خطأ,اعترف لك بانني قد أخطأت حين أرسلت لك تلك الورقه ولكني قد أرسلتها لسبب معين ومغاير تماماً لما طرأ عليك من أفكار , وأنا ملزم بالدفاع عن نفسي أمامك
لقد كان هدفي الأساسي هو محادثتك من أجل معرفة رأيك في موضوع واحد فقط ولم يكن هدفي هو التسليه أو العبث معك فأنا لا أرضى لك بذلك ولا أرضاه لنفسي أما الأمر الذي أردت محادثتك عنه هو التقدم لطلب يدك من والدك فأنا لا أريد أن أتقدم رسمياً ويكون الرفض هو مصيري
قد تتسألين عن الأسباب التي دعتني إلى طلب سماع رأيك في هذا الموضوع شخصياً وعدم الاعتماد على على أحد شقيقاتي لمعرفة رأيك ولكن بحكم علاقتك المميزه بهم لم أرد أن أعرض تلك العلاقه لأي من المشاكل في حال تم رفضك لي
ولكن مع رفضك التام بالتحدث إلي فليس أمامي سوى أمر واحد فقط هو التقدم رسمياً لخطبتك وأنا أعلم أن هذا الأمر سيكون مؤلم بالنسبة إلي في حال رفضك لطلبي أمام الجميع ولكن يجب علي المحاوله أو المغامره في في وقت قريب
كل ما ذكرته سابقاً ليس مهماً الأن بل كل ما يهمني في هذا الوقت هو قبولك لإعتذاري , لا أريد أن أتحدث عن ما شعرت به من ندم وأسف عندما آتاني ردك , لذلك أردت أن أعتذرمنك وكلي أمل بأن تغفري لي ذلك الخطأ , سواء كان رأيك في موضوع الزواج إيجابيا أو سلبياً , فأنا لن يهدأ لي بال ما دمتي عاتبة علي

(في حال قبولك لإعتذاري أتمنى أنك ترجعين لعادتك اللي حرمتك منها وتفتحين شباكك وتتمتعين بالوقفه عنده مع أن المناظر مو ذاك الزود بس طلتك مع الشباك تنور الحاره وأنا أوعدك أني ماراح أضايقك أو أراقبك بنتظرك بالشارع لين ما يحن قلبك علي وتقبلين إعتذاري وتفتحين شباكك
وأعتذر عن الأسلوب بالكتابه بس مع الحاله اللي كنت بها هذا اللي طلع معي)

راكان

منى : آه يا قلبي راكان يبي يخطبني , ما أصدق أحس اني احلم
ريم خذت أكبر كتاب من كتب منى وخبطتها به على راسها
منى بصوت عالي : آي راسي يالحماره
ريم : وش أسوي أبغى أقومك من أحلامك يالفالحه
منى : والله أني فرحانه ريوم بيخطبني بيخطبني
هيفاء : خلاص درينا انه بيخطبك من شوي كان خسيس وداج
منى : لاتلوميني مو بكيفي المهم وش أسوي الحين اقوم أفتح الدريشه وقامت من مكانها
ريم : اقول انثبري في مكانك يالبقره واركدي احقريه شوي وش وراه خليه ينطق في الشارع لين الساعه 12 في الليل
منى : ياللي ما تخافين من ربك حرام أخليه واقف في الشارع في هالبرد وأنا قاعده في هالدفا بعدين افرضي عنده شغل وإلا شي مسكين
ريم : والله محد قاله يقعد في الشارع صح وإلا لا ياهيفاء
هيفاء : صح وأنتي صادقه يا بنت عمي
منى : لو أنه فصيل وإلا فيهدان ما قلتوا هالحكي
ريم : يخسى الا هو وش جاب لجاب , خلاص خليه ينطق اربع ساعات رحمتكم
هيفاء : وش رايك ريوم نخليها ساعتين بس, خلينا نأخذ فيهم أجر
ريم : لالا اربع ساعات
منى قامت للدريشه :الشرهه على اللي يطاوعكم
ريم وهيفاء منعوها بالقوه
ريم : ذا المرجوجه غثتنا, اصبري شوي خليك ثقل قدامه على الأقل, ترى بيهون والسبه هالطفاقه اللي فيك ويلا رحمتك بأخليها ساعتين
منى تناظر الساعه : طيب بعد الصلاة بأفتح الدريشه
ريم وهيفاء : بعد ساعتين
منى : الله يجيبك يا طولة البال
- بعد ساعتين -
منى بفرح : خلصت الساعتين بأقوم أفتحه
ريم : باقي ثلاث دقايق
منى بعصبيه : ضفي وجهك بس
هيفاء : خلاص ريوم خلينا نشوف هالراكان وش بيسوي إذا فتحت السندريلا دريشتها
منى باستغراب : ومن قال بخليكم تطلون معي
ريم : لا حبيبتي مو على كيفك يا نطل مع بعض يا ما فيه
منى جلست : وأنا هونت ما راح أفتحه إلى إذا ذلفتوا
ريم : أقول هيفاء وش رايك بكره نغيب وما نداوم
هيفاء : ياليت والله ما عندي ما نع
ريم : خلاص بدق على أهلي وبقول بكره محاضراتي متأخره ومنى حلفت أني أنام عندها وبكره بروح معها للجامعه
منى : تستهبلين أنتي وإياها تبون تنامون عندي بالغصب
ريم : والله كيفك تبينا نروح خلينا نطل معك
منى : يا الله عيب وش بيقول الرجال إذا شافنا وش كثرنا
ريم : حنا ما راح نفتح بطانة الستاره
منى تقاطعها : أدري ما جبتي شي جديد بس ما يشوف ظلالنا
هيفاء راحت وقعدت على السرير: خلاص أجل بنمرح عندك, ريوم ترى السرير مريح
منى وهي طفشانه من بنات عمها : وش رايكم تروحون لشباك الحمام وتقزون معه
ريم تناظر هيفاء وهي تحرك شفايفها بتفكير : وش رايك هيوف
هيفاء: يلا وراحوا يركضون للحمام
منى بصوت عالي : ريوم طفي النور لايشوفكم
راحت منى للشباك وهي ترتجف فتحت الستاره راكان اللي متسند على السياره ورافع راسه عدل وقفته لما شاف الستاره تتحرك , فتحت منى الشباك وقربت بسرعه وهي خايفه طلت بسرعه ورجعت على ورى وهي ترتجف من الخوف , راكان ابتسم يوم لمح منى وهي تطل بسرعه
راكان :الحمدلله رب العالمين , هين يا منى تتغلين أوريك ودخل بيتهم وصك الباب
ريم وهيفاء طلعوا وهم يضحكون
ريم : يا حركات علبالي مستحيه
هيفاء : من قدها
منى وهي حاطه يدها على قلبها : وش سوى ترى ما شفت شي خفت
ريم بجديه : وش سوى , الا قولي وش ما سوى ارسل لك بوسه في الهوى وصارت في طلعت عمي من البيت وعمي ما قصر دبغه و قام يكفخ فيه بس عاد ما ندري هو حي وإلا ميت خفنا عمي يشوفنا
منى بخوف وصدمه : كذااااااااابه
ريم : هههههههه والله أنك مخفه يعني لو عمي يطقه كان شفتينا طالعين نضحك
منى : الله يقطع شيطانك طيحتي قلبي ,انتي ما استبعد عليك شي قلبك قاسي عادي تضحكين إذا شفتي احد يتكفخ قدامك
ريم : قولي آمين جعلي أشوفك تتكفخين
منى : بس انطمي , هيوف حبيبتي وش سوى راكان
هيفاء : ما سوى شي بس تشقق من الوناسه وابتسامته وصلت أذنيه
ريم : يلا بس يا هيفاء البسي عبايتك خلينا نروح
منى : يالسخيفات تو الناس تعشوا عندي
هيفاء : لا تأخرت على أبوي سعود ما ودي أخليه يتعشى لحاله
منى : لازم تعيدونها مره ثانيه
ريم بتفكير : المره الثانيه بتكون عند العنود
منى : أيه صح وش صار عليها كل ما كلمتها صرفتني
هيفاء : حتى أنا بعد
ريم : أنتوا عرفتوا أن الرجال صار أخو مشاري
منى : أيه قالت لي بس ما عطتني تفاصيل شكلها شالت الموضوع من رأسها
هيفاء : من عقب ما علمتني ما عاد فتحت ذيك السالفه وكل ما سألتها قالت غيري الموضوع
ريم : بس شكلها هالمجنونه ناويه على شي موب زين
منى : لا ما ظنيت أكيد نست اللي صار
ريم وهي تهز راسها : مستحيل تنسى
منى : عالعموم بنشوف لنا يوم ونروح لها وذيك الساعه بتقول اللي عندها غصب ورى خشمها
ريم : خلاص بأتصل عليها وأحدد معها موعد , والحين يلا مع السلامه
منى : مع السلامه
ونزلوا تحت وهم في الدرج كان فيصل قاعد في الصاله ومعطيهم ظهره وكان عارف أن ريم عندهم لانه شاف سيارة سواقهم في الشارع
فيصل حب يستهبل على ريم : أقول منى هالفلبيني اللي تحت غثنا يبي حرمته روحي خليها تطس
منى : أي حرمه
فيصل : الفلبينه اللي عندك اللي تصلح أظافرك مدري وش تسمونها اللي من العصر وهي عندك بالله ما تستحي قاعده عند الناس لين هالحزه ما عندها بيت
ريم تناظر هيفاء ومنى بقهر وهيفاء حطت يدها على فم ريم علشان ما تتكلم
ريم بعدت يد هيفاء بالقوه ونزلت عند فيصل
فيصل شافها قدامه وقعد يبتسم ببرود : سستر أنتي زوج فيه انتظار برى في الشارع
ريم طيب ياللوح بتعرف وش معنى سستر الحين : بابا أنا يبغى حساب ماما منى
فيصل وهومستغرب : نعم !!
ريم هين يافصيل أجل انا فلبينيه : أنا سوي بدكير ومانكير وفتله وشمع وحلاوه واستشوار ومساج وحمام مغربي وصنفره , كلو حساب ثلاثه ألف ريال
فيصل فتح فمه هو يسمع ريم اللي هدت عليه مثل الراديو : وش تخربطين أنتي؟
ريم : انا يبغى حساب, ماما منى في كلام فلوس عند بابا
فيصل : يلا عاد بلا استهبال
ريم : انا ما يعرف انت علشان انا يستهبل وبصوت عالي: يلا جيب فلوس انا زوج فيه انتظار برى
فيصل يناظر منى يبيها تقول شي
منى :ههههههههه فكك عمرك احد قالك تخفف دمك
ريم صرخت عليه : يلا سرعه
فيصل فز من الخوف
وريم ماسكه نفسها علشان ما تضحك من شكله
فيصل : أقول انثبري بس اكد عليك أنا
ريم فصخت شبشبها وكان كعب ورفعته : أنت يبي يجيب فلوس والا لا
هيفاء ومنى ميتين من الضحك
منى : خلص عمرك تراها جاده
فيصل وهو معصب طلع بوكه وكان فيه اربع الاف صارفها علشان يغير جنوط سيارته وعطاها خمس ميه
ريم مسويه معصبه : لا ثلاثه ألف
فيصل وعيونه بتطلع : يلا عاد احمدي ربك
ريم : ماده يدها باقي اثنين الف وخمس ميه
فيصل عطاها خمس ميه ثانيه : هذا اللي عندي تبين والا ضفي وجهك
ريم رفعت عمرها وهي واقفه علشان تطل في البوك وبما انها لابسه فرده وحده والثانيه في يدها اختل توازنها وطاحت الفلوس من يدها وطاحت هي بكل ثقلها على فيصل اللي واقف قدامها وعلشان ما تزلق مسكت في ثوبه وتقطعت ازارير ثوبه
فيصل مسكها بسرعه مع خصرها بدون ما يفكر ورفعها علشان توقف زين وهو يسمي عليها
وقفت ريم وبعدت عنه وهي ميته من الفشيله وتسب وتلعن في نفسها فصخت الفرده الثانيه ومسكتها مع الفرده الاولى وومشت للباب
فيصل حب يستهبل : تعالي خذي فلوسك
ريم بطبعها عنيده : هذا خدمات مجاناً علشان ماما منى وطلعت بسرعه
فيصل وهو ميت ضحك : ما تخلي حركاتها يا حبها للعناد وقعد يمسح دموعه
منى انفجرت من الضحك وهيفاء قعدت على الدرج وهي ماسكه بطنها من الضحك
ريم وطلعت برى وجلست تنتظر هيفاء ودقت على جوالها
هيفاء شافت رقمها وجت ترد وفتحت السبيكر بالغلط
ريم بعصبيه : هييف يامال المر وينك انا برى
هيفاء بصوت متقطع من الضحك : ط..ي..ب
ريم : ضحكتي من سرك بلا , بتطلعين والا ترى والله لاأجي ادوس ببطنك
فيصل بصوت عالي : وهالخدمه كم حسابها ؟ والا مجاناً بعد , وعلى فكره ترى أزارير ثوبي قيمتها الف ريال
ريم حست بمويه حاره انكبت عليها وسكرت الجوال بسرعه
هيفاء : يلا مع السلامه لا تجيي تتوطى ببطني تسويها
وطلعت ولقت ريم تنتظرها وهي تغلي من العصبيه
ريم : كان قعدتي شوي بعد
هيفاء : لا ما يحتاج خلص العرض
ريم مشت وقبل لاتطلع مع باب الشارع نادتها هيفاء : لحظه بتطلعين كذا
ريم : وش فيني؟
هيفاء : حافيه!! البسي شبشبك
ريم نزلت شبشبها وطلعت وركبوا السياره وهي معصبه
هيفاء كانت ماسكه عمرها بس ما قدرت وضحكت
ريم : خبله أنتي علشان تضحكين بدون سبب
هيفاء : والله شكلك توحفه وأنتي طايحه على فيصل
ريم : بس انطمي بدال ما تسمين علي
هيفاء : ما يحتاج فصيل قام بالواجب
ريم ابتسمت : والله بغيت أدوخ من الفشيله
هيفاء : تستاهلين هذا الطمع وما يسوي
ريم : عاد أنا خذت شي مالت علي
هيفاء : والله يوم قلتي فتله وشمع وحلاوه بغيت انفجر من الضحك وشلون تجتمع مع بعض, حتى منى طارت عيونها تقول وش شايفه وجهي اللي يسمعها يقول ماقد نظفته من جابتني أمي
ريم : من الحره اللي فيني اجل يقول عني فلبينيه
هيفاء : عاد ما قصرتي فيه روعتيه بسالفة الفلوس
ريم : آه بس لو اني ما طحت كان خليته يعرف وش معنى فلبينيه
هيفاء : يلا عاد اضحكي والله السالفه كلها ما تسوى
ريم : أي ما تسوى وأنا متعلقه في الرجال
هيفاء بخبث : عادي بروفه للمستقبل
ريم عطتها كوع في جنبها خلتها تسكت

وش الأحداث اللي بتصير مع راكان ومنى ؟ وش المشاكل اللي تتوقعون تصير بينهم؟

سلطان وساره تتوقعون يتم موضوع زواجهم أو ترفض ساره؟

فيصل وريم وش نهاية المحارش اللي بينهم؟الجزء الثالث عشر

بعد أسبوعين يوم الأربعاء

ق308 مبنى 4 جامعة الملك سعود

منى : يالله كل شي يعورني
بدور: سلامات خير وش فيك؟
منى : وش فيني بعد غير هالدكتور الخايس من تجي محاضراته تجيني كل الأمراض
بدور: حرام عليك تونا دارسين ما لنا اسبوعين بعدين خبري فيك فرحانه لاننا ما أخذناها عند الدكتوره صباح
منى : تصدقين لو أخذتها عند صباح كان أبرك منه
بدور: أيه علشان تحملين الماده مرتين قبل لاتنجحين , ما أدري هالماده ليه ما يدرسها في الجامعه إلا دكتوره وحده لا ونذله ونجاسة الدنيا كلها فيها سلطه الله لايسلط علينا
منى : مسوين تخصص نادر وهي من جنبها اللي يسمعهم يقول ندرس كيمياء ,إقتصاد ويخب
بدور: لا و ماده عامه يا ليتها مادة تخصص , يلا اسكتي جاء الدكتورخلينا نسمع
منى : اسمعي لحالك أنا لو بكيفي كان ما حضرت بس وش أسوي ثلاث ساعات تخسف المعدل وموزعه على ثلاث أيام يعني لازم كل اسبوع تشوفين خشته
بدور: ماتبين تحضرين اطلعي, احد رادك
منى : إيه المشرفه عند الباب عادي بتخليني أطلع, بس بتحسب لي غياب وش الفايده خليني أحط راسي أبرك من مقابل وجهه لا عاد وهالطلاب اللي قاطين في السالفه
أول ما تكلم الدكتور قال : اسمعو يا أولاد
منى : هاه خذي حتى ما يعبرنا, أهم شي عنده الطلاب
الدكتور : وأنتوا يابنات
منى : زين ذكرنا
الدكتور : أنا حددت وأت(وقت) الإمتحان بتاع الشهر الأول وحيكون يوم الأربع 11/2 واللي عنده امتحان تاني في اليوم ده يوئلي(يقولي)
منى كانت تسمع وساكتة لأن اليوم مناسبها وما عندها امتحان ثاني
واحد من الطلاب اسمه راكان تكلم :معليش دكتور تغير اليوم لأن كلنا عندنا تعارض في نفس اليوم
الدكتور : كل طلاب الشعبة
الطلاب بصوت واحد : إيه
الدكتور : إذن يكون الإمتحان يوم الأتنين اللي بعدو تاريخ 16/2
منى وهي تناظر جدولها : لا السبت عندنا امتحان و الأحد عندنا امتحان الساعة 1 بعد ,متى يمدينا نطلع ونذاكر ,خير على كيفهم أنا من سمعت هالراكان يتكلم وأنا داريه أن ما وراه خير يا حسافة الأسم عليه عطيني السماعة خليني أكلم الدكتور
رن التليفون عند الدكتور واللي كان من طبعه يفتح السبيكر والطلاب يسمعون البنات وهم يتكلمون معه
منى :السلام عليكم دكتور
الدكتور: وعليكم السلام , من معايا
منى : أنا منى رقمي الجامعي*******4
الدكتور : أتفضلي
منى : الموعد اللي اقترحته للإمتحان ما يناسبنا عندنا إمتحان ثاني
الدكتور: إمتى إمتحانكو
منى : الأحد
الدكتور : أنا ألت (قلت) الاتنين
منى : أيوه يا دكتور بس حنا عندنا إمتحان يوم السبت وإمتحان يوم الأحد متأخر من الساعه1-3
وما فيه وقت نذاكر مادتك زين و المنهج طويل ممكن تخليه الأربعاء اللي بعده
راكان : لا عندنا إمتحان الأربعاء الثاني خله السبت اللي بعده
منى اللي عصبت : لاوالله
الطلاب قاموا يضحكون , منى : حنا بعد عندنا امتحان يوم السبت
الدكتور: قرى(جرى) أيه أنت وهي أنتوا بتتكلموا وكأني مش موقود(موجود)
منى : آسفة دكتور بس هالطالب يستفز كل ما حددنا يوم ما عجبه
راكان : معليش يا أخت منى احنا اقترحنا يوم وما عجبكم وانتوا أقترحتوا يوم وما عجبنا ما أظن المسئله فيها استفزاز
منى تسوي نفسها ما سمعت : هاه دكتور أي يوم الأربعاء الأول وإلا الثاني
الطلاب عصبوا منها
راكان بصوت عالي: الشرهة على الظروف اللي أجبرتنا ندرس مع ناس يعانون من خلل بعقولهم
منى شوي وتطلع من السماعة: حسن ألفاظك أخوي أنت قاعد في مكان محترم
الدكتور عصب : بس بأه أنت وهي هو موعد واحد ومفيش غيره يوم الخميس 19/2 ومش عاوز اسمع كلام تاني في الموضوع ده
منى صكت السماعة بقوه والبنات مبسوطات علشانها ردت على اللي قال فيهم خلل في عقولهم
بدور: بعدي والله منى خليتيه ينطم
منى : يا أني ما أواطنه هالانسان من أول محاضره وهو ناشب في حلوقنا وكل شوي ينط بسؤال للدكتور علبالي مثقف , وآخر شي نجي يوم إجازتنا علشان نمتحن مالت عليه
بدور: مسوي دافور
منى : الخايس حسافه عليه اسم راكان كرهني فيه هالخايس
بدور : وش السالفة من متى تحبين اسم راكان
منى : من زمان أم جيراننا اسمها أم راكان يا حبي لها هي وعيالها بنتها نجد اللي سلمنا عليها ذاك اليوم
بدور:أخاف راكان ذا يصير ولدهم
منى : يخسى ألا هو ولدهم خلص بكالوريوس ويكمل ماجستير فديته ذاك الزين تفاولين عليه بواحد مثل هذا
بدور: وش دراك عن ذا يمكنه زين ما شفنا وجهه الكاميرا في آخر القاعة ما نشوف إلا ظهورهم, بعدين وش عندك مع ولد الجيران أشوفك تمدحينه وش سالفته
منى : لا سالفة ولاشي تذكرين يوم أقولك أني رحت لبيتهم ودخل علينا بالغلط
بدور:عاد تهقين شافك
منى قالت لبدور عن سالفتها مع راكان
بدور : وأنا آخر من يعلم يا جعلتس الساحق الماحق والسكن المتلاحق يا منوه بنت فويز
منى : يوه بدت هالعجوز هي ودعاويها وش يسكتها عاد
بدور : اللي يعيش مع مويضي مرة عمي بيعرف أنواع الدعاوي لا وبلغات مختلفه
منى : الله يريحيك منها قولي آمين
بدور : آميييييييين
الدكتور : فين منى؟
أمجاد : منى الدكتور يناديك ما تسمعين
منى : وش يبي؟
أمجاد : يقول بأختار أسماء من الكشف وبسأل علشان يأخذ المشاركة
منى تورطت لأنها ما سمعت السؤال ولا الكلام اللي قاله الدكتور
أمجاد فتحت الكتاب وأشرت على فقره :هذي الإجابة
منى رفعت السماعة : آسفة دكتور كان إزعاج وما سمعتك أول مره
واحد من الطلاب : والله من التركيز
منى قرت الإجابة وكان واضح عليها أنها تقرى من الكتاب
الدكتور:واضح انك مش مركزه معايا
راكان باستخفاف : معذورة تذاكر امتحان الأحد من1-3
الطلاب قاموا يضحكون
منى صكت السماعة بقوه
بدور:شوي شوي عالتليفون تراه مو من حلالك
منى : الخايس يتطنز, أوريه على باله أني مو راعية دراسة ما يدري أني دافوره ومن الأوائل على الشعبة
بدور:تكفين فكينا من سيرته موب نافعنا

قاعة الطلاب بعد ماطلع الدكتور
يزيد :صدق هالبنات علل غثونا هالبزران
راكان : توهم مستوى ثالث ومسوين كبار وألا زعيمتهم هالمنى مسويه قويه قدام البنات وعلى بالي دافوره وهي ما تدري وش المادة
يزيد : تلقاهم قاعدين يكتبون وصفات طبخ طول المحاضرة
راكان : لا وأنت الصادق خلطات شعر و وجه وتبيض ومن هالخرابيط. الطبخ راح مع بنات أول هذولا حدهم بشراتهم
يزيد : وأنت وش دراك عن البنات
راكان : نسيت أني ولد على ثلاث بنات يعني أعرف سوالفهم
يزيد : إن شاء الله بسام يكبر ويصير رجال مثلك
راكان : وش بسام أبو 6سنين ما جاء إلا وأنا عمري عشرين ليته كبير كان رحت أكمل ماجستير برى وما قعدت أتهاوش مع هالبني على آخر عمري
يزيد : معليش تحمل علشان أهلك أمك وأبوك مالهم إلا الله ثم أنت رضاهم أهم وأنا أخوك , والشرهة علينا اللي كملنا ماجستير في تخصص غير تخصصنا وقعدنا ندرس من الأول مع هالبنات
راكان : ما ندري أن السالفة فيها مناقر مع أم لسان حسافة الأسم اللي شايلته
يزيد : أشوفك قمت تحن لبنت الجيران , أخاف تكون هي وأنت ما تدري
راكان :تخسى إلا هي, بنت جيراننا داخله تربيه خاصة مثل أختي بس أختي الله يهديها حولت فنيه أكيد منى الحين مستوى رابع الله يوفقها ويسهل عليها
يزيد : متى ناوي تخطبها؟
راكان : إذا خلصنا هالفصل إن شاء الله

************************************

ساره وريم في الجامعه مبنى 12

ريم : يا عمري نهى مسكينه الله يعافي بنيتها
ساره : تقول اليوم أحسن نزلت حرارتها
ريم : يالله الله يعظم أجرها دراسه وبيت ومسؤليه
ساره : علينا هالكلام بكره إذا خطبك فيصل بتتركين الدراسه بكبرها
ريم : خليه يتحرك ويخطب وذيك الساعه فيها حلال, تعالي ما قلت لك وش صار
ساره : وش صار؟
ريم قالتلها عن سالفتها مع فيصل والفلوس
ساره : ههههههههههههه تستاهلين يالخبله
ريم : قاعده انكت انتي ووجهك
ساره : محد قالك ردي عليه كان سفهتيه
ريم : ما قدرت أصلاً من أشوفه وأنا ما أدري وش يجيني
ساره : يمه منك يارويمه والله ما أنتي هينه لا وأول مره جلستي معي تقولين أنا مانيب اجتماعيه
ريم : وأنا صادقه ترى بلاويي وفضايحي ما تطلع الا للناس اللي أمون عليهم تصدقين خلصت الأبتدائي والمتوسط والثانوي وأنا ما صادقت أحد
ساره بإستغراب : معقوله!!
ريم : لا يعني كل اللي أعرفهم علاقتي فيهم سطحيه مره
ساره : وليش عاد
ريم : والله أنا من دخلت المدرسه وكل اللي معي بنات عز
ساره تقاطعها : وأنتي بعد بنت عز
ريم : أدري بس هم كل وحده شايفه نفسها وكأن محد عنده فلوس غير أهلها والناس بيموتون علشان يصادقونها
ساره : بس موب كل البنات اللي عندهم فلوس مثل ما تقولين
ريم : ادري ان فيه بنات عندهم خير واخلاقهم مافيها كلام بس انا أكثر اللي عرفتهم شايفين أنفسهم وأنا هالحركات ما أحبها يعني علشان عندي فلوس أشوف عمري على العالم اللي عطاني هالخير ممكن يأخذه مني بأي لحظه, الفلوس ما تدوم الصديق الصالح و الاخلاق الطيبه هي اللي تدوم
ساره وهي مبتسمه : الحين عرفت ليش علاقتنا قويه مع أن هذي أول سنه لنا مع بعض بس الله اللي يعلم معزتك في قلبي وأني أحبك مثل ما أحب خواتي
ريم : حتى أنا والله أحبك وما أعدك الا أخت لي
ساره مسويه مستحيه : خلاص عاد تراني أستحي
ريم : يا حليلي أعرف استحي , إلا على فكره هند عندكم
ساره : إيه وصلت قبل أمس وهالأسبوع بتجلس عندنا
ريم : أجل خلاص اليوم بنزوركم
ساره : الله يحيكم
ريم هي لوتدرين وش ناويه أمي عليه كان قلتي الله لا يحيكم لاويمكن تحذفيني انا وأمي بالشارع وتحذفين نعالنا ورانا ومسكت نفسها
ساره : وش فيك تتبسمين فيك شي
ريم : لا ولا شي بس تذكرت فصولي

*********************************************

الساعه 2 الظهر بيت أبوعبدالله

أم عبدالله وأبوعبدالله وساره جالسين في الصاله
أم عبدالله : يا حليلها أم سلطان بتجي تشوف نجوى وتتحمد لها بالسلامه , والله أنها أجوديه
أبوعبدالله : هذولا الناس الفاهمين اللي يقدرون مو مثل بعض أقاربنا اللي سماعة التليفون ما رفعوها
ساره : أنا بروح أنام وإذا جت الساعه خمس بقوم ألبس

*************************************

الساعه خمس العصر

قامت ساره بسرعه ولبست بنطلون بني وعليه بلوزه صوف بنيه طويله وتحتها قميص لونه أصفر كريمي وحطت سلاسل ذهبيه طويله على رقبتها وحلق ذهبي ووبوت بني كعب ولبست عدسات عسليه وحطت مكياجها بني رفعت جزء من شعرها وخلت الباقي مفكوك وطلع شكلها حلو وناعم
نزلت تحت لقت أمها وهند وسوسن مجهزين كل شي
بعد ربع ساعه وصلت أم سلطان وريم واستقبلتها ام عبدالله وبناتها
أم عبدالله : يا حي الله من جانا هذي الساعه المباركه زارتنا البركه
أم سلطان : الله يحيك ويبقيك
ساره وهند خذوا العبايات من أم سلطان وريم علشان يعلقونها في الصاله
هند بصوت واطي : شوفي اسم المحل هذا محل مشهور عباياتهم بالآلاف الله يخلف علينا
ساره : انطمي لايسمعونك فشلتينا
هند : صدق ناس كاش
ساره : وجع وفري كلامك لين ما يروحون ,وخلي الصبابه تودي القهوه للمجلس
ساره عايلتها من الطبقه المتوسطه عندهم خير بس مو مثل عايلة السامي
دخلت ساره وهند وجلسوا مع الضيوف
أم سلطان : ما شاء الله يا أم عبدالله وش هالبنات اللي عندك الله يخليهم لك ويستر عليهم , وأنتي ياهند كيفك مع الزواج عساك مبسوطه
هند : الحمدلله
ساره : أكيد مبسوطه كل هالسمنه وهالزين ما شفناه الا بعد ما تزوجت
هند : بس عاد بلا كذب فشلتينا
أم سلطان وهي تضحك : لا عادي ساره وريم نفس الطقه أسلوبهم واحد, ما فيها فشيله ولا شي
ريم : لاعاد يمه أنا تحطيني مثل هالشيفه
ساره : يحصل لك عاد أنتي ووجهك تصيرين مثلي ,لك الشرف لو تصيرين ربعي مو كلي
أم سلطان : صادقه ليتك تجين ربعها
ساره : ياحبي لك يا خالتي الله لايحرمنا منك
ريم : آفا يمه هذا وأنا بنتك تفضلين هالشيفه علي
ساره : دامني شيفه ليش مصادقتني كان دورتي وحده حلوه تصادقينها
أم عبدالله: مسكينه أكيد الظروف هي اللي حدتها تصادقك مو بكيفها غصب عنها
هند وريم ونجوى صفقوا بوقت واحد
ريم : بعدي خالتي قلتي اللي بقوله
نجوى : بردتي قلوبنا يمه
ساره تناظر نجوى بحقد : إذا أزعجتك بنتك في الليل لاتناديني لا أنا أختك ولا أعرفك دقي على رويمه تجي تصاليها
ريم : بأخدمك بعيوني أنتي وبنتك يا نجوى
أم سلطان : راحت فيها البنيه أجل إذا أنتي اللي بتخدمينها
سوسن : ولا يهمك يا نجوى أنا تحت أمرك أنتي بس ناديني وأنا بأكون عندك , دام هالصغيره اسمها ساره صدق بأكفر فيها بطلع حرتي اللي ما قدرت أطلعها في اللي جنبي وتأشر على أختها ساره
ريم : ليش الصغيره سميتوها ساره ,حرام عليكم يمكن تطلع صدق على خالتها
ساره : لها الشرف إذا طلعت علي بس دام نجوى أمها وصلاح أبوها ما ظنيت
نجوى : أقول لا تصدقين نفسك ترى حنا مسمينها على خالتي أم صلاح مو عليك
أم سلطان غمزت لريم علشان تطلع مع ساره برى المجلس لأنها ماتبي تفاتح أم عبدالله في موضوع الخطوبه وساره قاعده ,تخاف تحرجها
ريم : أقول سويره قومي خلينا نطلع برى أبيك في سالفه
ساره : وش تبين؟
ريم بصوت واطي : أبيك بسالفه تخص فيصل
ساره : يلا عن أذنكم بأخذ ريم شوي أبيها بسالفه
هند : قصدك عندكم وحده مسكينه تبون تقطعونها من الحش
ساره : مالك دخل
طلعت ريم وساره من المجلس وتكلمت أم سلطان
أم سلطان : والله يا أم عبدالله عندي موضوع وودي أفاتحك فيه
أم عبدالله : تفضلي يا أم سلطان
أم سلطان : والله ودنا نخطب بنتكم ساره لولدي سلطان وحنا لو دورنا له ماحنا بلاقين ناس أطيب منكم ولا عروس أحسن له من ساره
نجوى وهند وسوسن أنصدموا وقاموا يناظرون بعض
أم عبدالله تفاجأت وفرحت في نفس الوقت بس ما حبت تبين لأم سلطان : والله يا أم سلطان ولدك ما ينرد بس والله فاجأتيني وساره ما لمحت ولا قالت شي عن هالموضوع
أم سلطان : والله ساره ما تدري عن شي ولا قلنا لها شي , أنا قلت نحاكي أهلها ونخطبها منهم وهم اللي يفاتحونها بالموضوع وهذي هي الأصول
أم عبدالله : بس اللي نعرفه ونسمعه من الناس أن سلطان خاطب
أم سلطان : هو كان خاطب وحده من جماعتنا وما حصل بينهم نصيب وفكوا الخطبه
أم عبدالله بإحراج : إذا ما في السالفه إحراج ممكن أعرف ليش فسخوا الخطبه
أم سلطان : لاما فيها إحراج ومن حقكم ومن حق ساره تعرفون السالفه , أبو البنت الله يرحمه هو اللي بدى بالسالفه وعرض بنته على سلطان و ولدي انحرج يرده ومن الأساس هو ما يبيها وهي بعد ما كانت مهتويه العرس واستمرت الخطبه سنتين وبعد ما مات أبوها اتصلت البنت على سلطان وتكلموا مع بعض واتفقوا على فك الخطبه
أم عبدالله : والله مثل ما قلت لك ماراح نلقى لبنتنا أطيب من ولدكم بس لازم نأخذ رأي البنت ورأي أبوها وأخوانها وإن شاء الله ما يصير إلا الخير
أم سلطان : ريم قالت لي أن ساره دايم تقول ماراح أتزوج الا إذا كملت دراستي لأن الزواج مسؤوليه , وسلطان ما عنده مانع أنها تكمل دراستها وإذا على المسؤوليه لاتخاف بتكون في بيت فيه خدامات وطباخات يعني ما راح تشتغل وموضوع العيال تتفق معه على تأجيل الموضوع لين ما تخلص دراستها
أم عبدالله : أنا بأخذ رأيها وإذا وافقت بنأجل الموضوع شوي أنتي عارفه الصيف ماباقي عليه إلا كم شهر وحنا مشغولين بزواج عبدالله
أم سلطان : الله يوفقه ويتمم له وعقبال ولدي , ومثل ما قلتي نأخذ موافقتها أول والباقي نأجله

***************************************

ساره : هاه وش عندك انتي وفيصل ما تلاحظين أنك غثيتينا فيه
ريم : الشرهه علي اللي عادتك أخت وقاعده أسولف لك وأفضفض عليك
ساره : يلا فضفضي قولي وش عندك
ريم : ما أدري شكله متغير علي
ساره باستغراب : وجع إن شاء الله وأنتي تكلمينه
ريم : لاما أكلمه بس أول منى تدق علي وهو عندها وأسمعه يسولف ويوصل حكي لي مع أخته حتى كان يرسل رسايل على جوالي بس الحين خفت رسايله
ساره : ومن عطاه رقمك
ريم : أخته يعني من بيعطيه إياه
ساره : وأنتي سكتي ما قلتي شي
ريم : ولد عمي ويرسل لي رسايل لا كلمته ولا كلمني
ساره بصدمه : وانتي ترسلين له!!
ريم بخوف : مو دايم
ساره : يا قليلة الأدب تراسلين واحد غريب
ريم : من قال أنه غريب هذا ولد عمي
ساره : وإذا صار حتى ولد عمك غريب لاهو أخوك ولا عمك ولا هو محرم لك ,يعني حرام اللي قاعده تسوينه لا أنتي تحلين له ولا هو يحل لك, ما تخافين من ربك أنتي
ريم في نفسها أنا وش خلاني أقولها حتى هيفاء ما قلت لها فضحت نفسي
ريم : طيب وش أسوي الحين
ساره : ارسلي له رساله وقولي لو سمحت لاعاد ترسلي رسايل مره ثانيه أنا آسفة بس توني أدري أنه حرام نتراسل
ريم : أخاف يزعل
ساره : ما فيه أحد يزعل من الحرام وإذا زعل بالطقاق رضى الله اهم من رضاه
ريم : تصدقين سارونه كل يوم اعرف عنك شي جديد
ساره : وش عرفتي!!
ريم : تصدقين ما قد تخيلت أنك تعرفين تطبخين وخصوصاً المحلا وعرفت الاسبوع اللي راح واليوم عرفت انك تخافين من الله
ساره باستهزاء : خير وش قالوا لك يهوديه والا ملحده
ريم : لا مو قصدي بس اللي يسمع سواليفك ويشوف حركاتك ولبسك ما يقول ذي شديده وملتزمه
ساره : ومن قالك ان الالتزام في اللبس والكلام وبس , حبيبتي الالتزام في القلب بعد وهذ هو اهم شي وش الفايده اتستر في لبسي واتكلم عن الدين وانصح وقلبي اسود ونيتي موصافيه ومقطعه العالم بالحش واشيل حكي وانافق, الواحد يبدأ بالقلب والخوف من الله في كل شي مو في اللبس لحاله ,صحيح اني لبس بنطلونات وقصير وانا اقول الله يهديني ويتوب علي بس الحمدلله ما ألبسها إلا عند حريم وبس هذا انا اسولف وأضحك وأشوف مباريات عادي الدين يسر موعسر ولا هو تعقيد أوغلو ورهبانيه
ريم : بس أنتي ما تسمعين أغاني وتشوفين مباريات وشلون
ساره : الله يزيدني فيها جهل أنا ما اسمع الا الاغاني الوطنيه واغاني الهلال
ريم : يا ذا الهلال اللي مجننك ترى التشجيع حرام
ساره : لاتفتين من راسك ما يجوز, وقومي بس خلينا نروح للمجلس

**********************************************

الجزء الرابع عشر

سلطان كالعاده بعد المغرب يروح لبيت جده سعود
ابو عبدالعزيز : يا حيا الله سلطان وشلونك وأنا ابوك
سلطان : بخير الله يحييك , وشلونك أنت عساك بخير
ابوعبدالعزيز : بخير الله يسلمك يا ابو سعود
سلطان يكلم نفسه أي أبو سعود الله يهديك بس يبه ويستر من الجاي
ابوعبدالعزيز شاف سلطان سرحان : هاه وش سوت امك على موضوع العرس
سلطان بدون نفس : أمي ما صدقت خبر واليوم راحت تخطب لي هي وريم
أبو عبدالعزيز : زين على البركه الله يتمم لك على خير, وأنا أقول وش فيه يهوجس أثرك تهوجس في العرس
سلطان يهز راسه: يبه انت عارف رأيي في هالموضوع لاتقعد تستعبط علي و تتخيل أشياء من راسك
أبوعبدالعزيز:صدق أنك ما تستحي تقول هالكلام لي الظاهر نسيت أني جدك
سلطان وهو يحب رأس جده :آسف يبه بس كلامك الله يهديك يرفع الضغط
أبوعبدالعزيز: وأنا وش قلت علشان يرتفع ضغطك علشاني قلت مبروك, ما أدري وش فيك على العرس عمرك طق الثلاثين
سلطان يكلم نفسه : أدري أنك تستهبل علي يبه ,ولا تبيني اتكلم هين بنشوف وش نهاية هالعرس
سلطان : أنت قلتها يبه عمري بيطق الثلاثين وبيزوجوني وحده عمرها 19 بيننا فرق تسع او عشر سنين
أبوعبدالعزيز: العمر موب عذر أنا اخذت جدتك عمرها 11 وأنا عمري18 , إذا كانت المره عاقل وتخاف ربها ما يضرها عمرها , ياما حريم أعمارهم في الأربعين وعقولهم عقول بزران , امك تعرف البنت وأخلاقها أنت بس توكل على الله ولاتخاف من العمروحتى لوهي صغيره على قولك اصبر عليها سنه سنتين وبتكبر وتعقل , أنا صبرت على جدتك والحمدلله جابت لي رجال
سلطان : كنت تحبها صح؟
أبوعبدالعزيز: أكيد أحبها ميب هي حرمتي
سلطان في نفسه : إيه يحق لك تصبر عليها بلاك ما جربت وشلون الواحد يتزوج بالغصب لا ومن وحده لسانها طويل وشايفه نفسها والمصيبه أن القلب ما فيه إلا وحده ومستحيل أحد يحل محلها
وقعد سلطان يفكر وأبو عبدالعزيز يعطيه محاضرات عن الزواج والحريم

************************************************** *
منى : آلو
العنود : هلا والله وغلا بمنى كيفك؟
منى : بخير الحمدلله, أنتوا كيفكم
العنود : عايشين الحمدلله
منى : وينك يالقاطعه لا تدقين وتسألين ولا عاد شفناك نسينا ملامحك ليش ماجيتي في جمعتنا عند أبوي سعود
العنود : والله مشاغل تعرفين دراسه وامتحانات
منى : لا يا شيخه محد يدرس في الدنيا غيرك كلنا ندرس ونختبر
العنود إنا لله يامنى اعرفك نشبه : لا والله بس تعرفيني أشيل هم وما اقدر اطلع من البيت وانا وراي شي
منى : ماعلينا المهم وش أخبارك
العنود : بخير , كيف الدراسه معك
منى: أقول لاتغيرين السالفه , وش صار عليك؟
العنود : وش صار؟ ما صار شي عادي
منى : عنيده أنا أتكلم عن سالفة بدر
العنود : ما صار شي خلاص السالفه اتنهت
منى : أقول صفقيني بس
العنود يالله وش يفكنا منها الحين : منى يا قلبي الرجال حالف ما يتزوج وأنا خلاص شلته من رأسي
منى إذا جيتكم للبيت بتقولين كل شي غصب بس اصبري علي شوي: أقول عنوده بكره بنزوركم أنا وريم وهيفاء
العنود : لا بكره معزومين عند خوالي خليها يوم ثاني
منى : خلاص أجل نخليها الجمعه
العنود يا ربي وش ذا النشبه : لا الجمعه عندي بحث بأسويه ولازم أقدمه يوم السبت , خلاص إذا فضيت أنا بقولكم
منى : خلاص اجل أخليك الحين لأن بكره عندي إمتحان بروح أذاكر
العنود : عندك غمتحان وداقه تسولفين صدق اللقافه مقطعتك
منى : يلا بس مع السلامه
العنود : مع السلامه
***********************************************ا
عمر وبدر جالسين في مقهى
عمر : اليوم أبو وليد قالي عن سالفة البعثه وقال حاول تقنع بدر , بالله أنت جاد يومك ترفضها
بدر يتنهد : ايه جاد هالسالفه ما فيها مزح
عمر: ليش عاد أخبرك بتموت علشان يرشحونك لها
بدر : فكرت ولقيت أن قعدتي في الرياض عند أهلي احسن ما ودي اخليهم
عمر: لا ياشيخ تنكت أنت ووجهك بزر أنت علشان تقعد عند اهلك
بدر: وانت وش فيك معصب؟
عمر : انت اللي وش فيك كل الموظفين يتمنون تجيهم مثل هالبعثات وانت قاعد تتعنفق , يا أخي هالبعثه بتختصر عليك شغل كم سنه
وبتساعد في ترقيتك بسرعه
بدر: يا أخي أنا ما شكيت لك
عمر: خلاص على كيفك خلك منطق عند أهلك وخل غيرك يروحون ويترقون وأنت تكرف
بدر سكت وما رد


**************************************

دخلت ريم وساره للمجلس واسكتوا كل اللي في المجلس وقاموا يناظرون ساره
ساره باستغراب : وش فيكم سكتوا أكيد قاعدين تحشون فينا
هند: الا أنتوا اللي وينكم ساقطين فيه وش تسوون
أم سلطان : يلا حنا نستأذن والحمدلله على السلامه يا نجوى والله يخليلكم هالصغيره
نجوى : الله يسلمك ومشكوره على الزياره ما قصرتي
ساره : تو الناس يا خاله ليش مستعجلين
أم سلطان : لاطولنا عندكم الدور عليكم زورونا عاد
أم عبدالله : انتوا اللي نبيكم تزورونا غير هالزياره هذي زيارة نفاس ما تحتسب
أم سلطان وهي تغمز لأم عبدالله : إن شاء الله قريب
أم عبدالله وهي تضحك : الله يحيكم
ساره حاسه أن فيه شي غريب وما تدري وش هو
ساره : ريموه وش السالفه
ريم اللي تلبس عبايتها غطت وجهها بسرعه : ما أدري , يلا مع السلامه أشوفك السبت
ساره : ليش بنقعد ما كلمنا بعض إلى يوم السبت
ريم طلعت وما ردت , أم عبدالله ودعت أم سلطان هي والبنات ورجعوا للمجلس وهم يناظرون بعض ويضحكون
ساره : وش فيكم تضحكون؟
هند : ما فينا شي
نجوى :صدق لا قالوا ياما تحت السواهي
ساره : وش سالفتكم
نجوى : قلنا لك ما فينا شي
ساره حست نفسها غبيه بينهم وعصبت : انطقوا بس مالت عليكم , اقوم أصلي العشاء أبرك لي من مقابل وجيهكم
راحت ساره تصلي في غرفتها وغيرت ملابسها واتصلت مثل كل يوم على جدتها ساره تطمن عليها ونزلت تحت للصاله ولقت اهلها كلهم مجتمعين ويسولفون يوم وصلت سكتوا
ساره : أكيد تحشون فيني , بس مانيب محللتكم خلني آخذ حسناتكم
خالد : اتمخطري ياحلوه يا زينه يا ورده من جوى جنينه
هند : الف الصلاة والسلام عليك يا حبيب الله محمد كلووووووووووووش
عبدالله : مباركين عرس الأثنين
ساره قاطعته : الحمدلله والشكر معذور, لين الحين وانت مو مصدق أنك لقيت وحده تقبل تأخذك
خالد يناظرها بنص عين : يمه منكم يالبنات على بالي ما ادري عن السالفه وهي طابختها طبخ ما تناسبك حركات الإستغباء
ساره وهي مروعه : أي سالفه؟
ابو عبدالله كان مبسوط ويضحك وجنبه أم عبدالله اللي تكلمت : اليوم فيه ناس خطبوك
ساره : حست ضغطها ارتفع بسرعه وناظرت أبوها وشافته يبتسم وحست بالخوف من ابتسامته
وحاولت تمسك أعصابها وتعطي نفسها أمل حاولي يا ساره ما راح تخسرين شي إن شاءالله ما يغصبك وتكلمت بصوت عالي : ومنهم هالناس, بعدين أنا قايله لكم زواج ماراح أتزوج قبل لا أخلص دراستي وناظرت أبوها تبي تشوف ردة فعله وشافته يهز راسه وكأنه يقول مو على كيفك
هند : شوفوا البنت تستعبط ,علينا هالحركات ياسويره على بالك ما تدرين وأنتي طاقه الزين كله ولابسه هالبني والاصفر
نجوى كملت : لا وحركات التميلح عند أم سلطان طول العصر وياخالتي ويا بعد عمري والحين تقول منهم
ساره وجهها قام يتقلب احمر واخضر واصفر كل ألوان الطيف مرت على وجهها وحست ان الخطوط اللي في راسها تشربكت مع بعض وعقلها وقف عن التفكير والاستيعاب
وبعصبيه وعيونها بتطلع : يمه وش السالفه تكلمي؟
أبوعبدالله : هدي يا بنيتي لا سالفه ولا شي أم سلطان خطبتك لولدها سلطان وبس
ساره بصوت عالي : وبس كل هذا وتقولون وبس
وتناظر أمها بعصبيه : وأنا حماره في هالبيت علشان أكون آخر من يعلم
أم عبدالله : أنا ما قلت لأحد هي تكلمت قدام خواتك يوم طلعتي مع ريم
ساره تأشر على عبدالله وخالد : وهالثيران من قالهم ام الجيران
أبوعبدالله بصوت عالي : احترمي اخوانك يا ساره وحسني ألفاظك
خالد : إيه ماعليه لنا الله من قده خطبها مليونير
عبدالله : لا وتسوي عمرها ما تدري عن السالفه
ساره شوي وتنفجر : اسمعوا زواج ما راح أتزوج لو تذبحوني وأم سلطان الحيه وبنتها الحيوانه شغلهم عندي(شانت الاخلاق) وطلعت لغرفتها ودموعها على خدها من القهر والحياء والعصبيه
أبوعبدالله : قومي ياهند شوفي أختك لا تسوي لنا سالفه مع الناس وتفضحنا
نجوى ببرود :ما عليك يبه هذي حاله تنتاب كل البنات أول ما ينخطبون
أبوعبدالله بعصبيه : ما أشوف هالحاله انتابتك انتي واختك يوم انخطبتوا
أم عبدالله :كله منكم قعدتوا تتمسخرون عليها وأنتوا يالسوستين تأشر على نجوى وهند تدرون أن ماعندها علم بالسالفه وما قصرتوا بالمسخره عليها
هند : فيني قهر عليها أيام خطبتي كل شوي تحرجني قدام أبوي وأنا ساكته لها ,انتظر اليوم اللي تنخطب فيه علشان أرد لها حركاتها
أبوعبدالله : عاد ضرك شي أصلاً أنتي من متى تستحين
سوسن اللي ساكته طول الوقت وما علقت خايفه يصير لها مثل ساره
سوسن : بروح أشوفها
أبوعبدالله : لاأنا بروح أخاف المسكينه قاعده تصيح
نجوى : لنا الله يوم جت سويره قام لها أبوي بكبره ويوم أنا ما درى عني
هند : حتى انا ما درى عني بس قلتيها سويره دلوعته
أبوعبدالله : أنتوا كلكم ما تسوون ظفر من أظافرها
ساره كانت الغاليه عند أبوها ومسميها على امه وهي أقرب عياله له وأكثر من يجلس معه ويفهم عليه
أبوعبدالله راح فوق وعياله معصبين بسبب الكلام اللي قاله
ساره مقفله على نفسها الغرفه وتتصل على ريم وريم جوالها مقفل اتصلت على رقم غرفتها وماردت حاولت تتصل على تليفون البيت وكل شوي ترد عليها الخدامه وتقول ريم طالعه
أبوعبدالله راح لغرفة ساره وطق عليها الباب وساره ما ردت
أبوعبدالله :ساره وأنا أبوك افتحي الباب بحاكيك شوي , لاتخليني واقف تشمتين أخوانك فيني
ساره تصيح وتضحك في نفس الوقت على كلام أبوها لأنها عارفه أخوانها يعصبون إذا دلعها أبوها أكثر منهم
ساره : معك أحد يبه
أبوعبدالله : لا أنا لحالي
فتحت ساره الباب لأبوها وسكرته بعد ما دخل
أبوعبدالله جلس على السرير جنب ساره : آفا يا بنيتي تصيحين وأنا موجود ماعاش من ينزل دمعه من دموعك يالغاليه
ساره طاحت في حضن أبوها وهي تصيح : والله يبه أنا ما أدري عن السالفه والله العظيم وريم ماقالت لي شي وأنا ما كان قصدي أتميلح عند أمه
أبوعبدالله : أنا مصدقك يابنتي أنا أعرفك زين وأمهم قالت لأمك أنك ماتدرين بس أنتي عارفه أخوانك وحركاتهم
ساره وهي تترجى أبوها : يبه تكفى الله يخليك لي لاتزوجني , ما أبي أتزوج الحين أبي أدرس أتمتع بشبابي توني صغيره على الزواج وهالسلطان بالذات ما أبيه
أبوعبدالله : أجلي هالكلام لبعدين أنتي ألحين معصبه ومتضايقه , ويلا قومي امسحي دموعك وغسلي وجهك وانزلي تحت واقهري اخوانك
ساره : لايبه عندي طلب بس لاتردني
أبوعبدالله : آمري على هالخشم وأنا أبوك
ساره : ما يأمر عليك عدو, أبي اخلي السواق يوديني لبيت أمي ساره
أبوعبدالله : الحين!!
ساره : أيه يبه تكفى ما لي خلق أشوف أحد من أخواني ودي ارتاح منهم اسبوع
أبوعبدالله : اسبوع مره وحده ودراستك والجامعه
ساره : لاتخاف بقول للسواق يأخذني من هناك
أبوعبدالله : وأهون عليك أنا وأمك ترى البيت من غيرك ما يسوى
ساره : لا يبه ما تهونون بس والله انا ما أقدر اتحمل مسخرة اخواني , وأنت كل يوم بأشوفك في بيت امي ساره , هاه وش قلت أقول للسواق يقرب السياره
أبوعبدالله : لاخلاص أنا اللي بأوديك ماني مخليك تروحين معه هالحزه لحالك ,يلا انا احتريك تحت
ساره : خلاص بروح أجهز أغراضي
ساره جهزت ملابسها وكتبها واللاب توب على أساس بتجلس اسبوع في بيت جدتها ونزلت تحت وهي لابسه عبايتها ولقت أخوانها جالسين مثل ما تركتهم وقالت للشغاله تجيب أغراضها من فوق
خالد :على وين إن شاء الله
عبدالله : على بيت المعرس ما صدقت خبر
هند : من قده سليطين
نجوى : انتبهي لرجولك ولاتغلطين على نسيبنا ترى بتجي تحوس مريرك ( أخوان ثقيلين دم)
أبوعبدالله :بس عاد أنت وإياه مالكم دخل فيها
هند : أيه كبر رأسها من قدها خطبها ولد السامي صرنا موقد المقام
ساره طلعت بسرعه ولحقتها أمها
أم عبدالله : ساره وين بتروحين
ساره : بروح لبيت أمي ساره لين تأدبين عيالك ما صار مزح اللي يسوونه إلا سخافه
أم عبدالله وهي تضحك : الله يا سويره توني أدري أنك تستحين وين كلامك أول وطنازتك على خواتك
ساره : يمه معليش يمزحون شوي ما قلت لابس خفة الدم الزايده مالها داعي , واسمعي يمه إذا ريم دقت على البيت لاتعطينها رقم أمي ساره ترى أن عطيتيها إياه بزعل
أم عبدالله يصير خير
ساره باست راس امها وطلعت



****************************************

راكان وهو طالع من البيت شاف فيصل وطارق نازلين من السياره و راح يسلم عليهم
راكان : السلام عليكم
فيصل وطارق : وعليكم السلام
فيصل : هلا راكان كيف الحال وش أخبارك
راكان : بخير الله يسلمك انتوا وش اخباركم
طارق : الحمدلله بخير تفضل حياك
راكان : لا والله مواعد صديقي يزيد بيمرني رن جواله , هذا هو دق
راكان : آلو هلا يزيد , وينك أنا انتظرك بالشارع
...................خلاص مو مشكله أشوفك بكره
...................يلا مع السلامه
فيصل : خلاص أجل تفضل عندنا , بعد شوي بيجون عيال عمي أقلط
دخل راكان مع فيصل وطارق وجلسوا في المجلس
سلطان كان في السياره اتصل عليه متعب
سلطان : هلا متعب
متعب : هلا والله وينك فيه
سلطان : أبد بروح لبيت عمي , أنت وينك
متعب : والله توني منزل الاهل معزومين في زواج
سلطان : خلاص وش رايك تجينا في بيت عمي ,بيت ابو فيصل تدله صح
متعب : أيه أدله خلاص اسبقني وأنا لاحقك
دخل سلطان لبيت وعمه والشباب كانوا يجتمعون كل أسبوع مره في بيت الجد سعود ومره بيت أبو سلطان ومره في بيت أبو فيصل
سلطان : السلام عليكم
فيصل وطارق وراكان : وعليكم السلام
فيصل هلا بولد العم كيف الحال
سلطان : بخير الحمدلله , انتوا وش أخباركم
طارق : وين ناصر؟
سلطان وهويناظر جيبه وكأنه يدور شي : شفه في مخباي ,وأنا وش دراني عنه
طارق : وانت وش فيك معصب
سلطان : أنا أدري عنك تسألني عنه وأنا اللي داخل ما سألت عني, صدق أنك ما تستحي
طارق : أشوفك قمت تغار منه علشاني اهتميت فيه اكثر منك , يكفيك أنك مأخذ كل اهتمام أبوي سعود
فيصل : أبوي سعود وبس, كل صبايا العايله مهتمين فيه
راكان يناظر سلطان لاتكون منى تحبه بس ,هذا اللي ما حسبت حسابه
سلطان : خل اهتمام صبايا العايله لك ما أبيه من زينهم عاد مالت عليهم
دخل ناصر :السلام عليكم كيفكم شباب
الشباب : وعليكم السلام
طارق : تعال شف أخوك هالمغرور
ناصر:وش فيه اخوي
طارق: نصور اسمع اخوك وش يقول و يقلد سلطان : خل اهتمام صبايا العايله لك من زينهم مالت عليهم
ناصر :هين بنشوف حضرة الباشا من بيأخذ ويناظر اخوه وهو يضحك
طارق :سلطان ابي اعرف انت ليش شايف عمرك علينا علشانك طويل وعريض تبي تسوي قوي
فيصل : لا وانت الصادق مسوي وسيم
ناصر: اصلا ما فيكم أحد وسيم غيري
طارق : واضح الوسامه تنقط منك تكفى وقف خلني أجيب قدر أجمع فيه وسامتك اللي تقطر واتسبح بها لعلي أصير مثلك
ناصر : كم بتدفع؟
طارق : وش أدفع, شي يقطر وبأجمعه يعني سبيل المفروض أنت اللي تدفع لي بأشيل وصاختك
ناصر بكل دلع ومياعه : الحين الوسامه صارت وصخ ما عندك ذوق
سلطان اللي يتقرف من دلع الشباب : هي أنت عدل حنكك وتكلم زين لا أعدله لك
ناصر يبي يقهره : معذور الغيره مكتعتك كتع كتع ياكلبي
سلطان وهو يسوي نفسه يعدل شماغه نزل عقاله ولحط أخوه على ظهره
ناصر بكل خشونه: آه وكمل يتدلع يا كاسي
طارق : قبل شوي كلبي والحين كاسي وش اللي بعدها ابريقي
ناصر انتبه للكلام اللي قاله وعرف ليش سلطان عصب : يا الله صدق انكم همج هذي الكلمات باللهجه البناتيه لا تفسرونها على كيفكم
فيصل وكبده حايمه : سلطان بالله عندكم مرايه في البيت
سلطان : لاماعندنا وحب يقهر فيصل لانه شاك انه يحب ريم ,تصدق حتى ريم وهي بنت ما عندها مرايه
فيصل في نفسه : بلاها قمر ما تحتاج مرايه
ناصر: حرام عليك ياسلطان عاد ريم تنعد من البنات
طارق : أيه صادق تظلم البنات إذا قلت ريم منهم
فيصل مسوي عاقل : عيب تتكلمون عن أختكم كذا
سلطان : وأنت الصادق عيب نتكلم على اخونا كذا
ناصر:هاهاها لو تسمعنا الحين والله بتتوطى في بطونا
فيصل : تستاهلون
طارق : وش عنده نصير المرأه , لو هالكلام على منى كان قلت اكثر
فيصل : وع تكفى لاتجيب طاريها ترى بتنط لنا هنا هالمسكونه عسى محد يحش فيها إلا وهي داريه
ناصر: الحين اختك صارت مسكونه ’وريم حرام نحش فيها, يا عمري يا بنت عمي
راكان لايكون هذا يحبها هذا اللي ناقص
فيصل : ورى ما تاخذها دامك تدافع عنها
ناصر : وأنت تبي تبلشني في أختك من زينها عاد خلها عندك بس
راكان ارتاح يوم سمع كلام ناصر
طارق : أنا بأزوجك على ذوقي
ناصر: وع من زين ذوقك , الله يخلي لي الوالده
سلطان : من زين ذوق الوالده عاد
فيصل : لا أنا اللي بزوجك وش رايك في أروى
ناصر:وش أروى لاتكون أختك
فيصل : ليش تعرف أروى غيرها
ناصر : لا إن شاء الله أهون علي آخذ وحده تشبه طارق ولا آخذ اختك الملقوفه
طارق طارت عيونه : خير وأنا وش دخلني
ناصر : لا بس أبين له عِظم المأساة يعني انا بأتحمل أقابل وحده خشتها تشبه خشتك أهون من أني أقابل أروى
طارق : قم قم برى ولا عاد أشوف خشتك ياللي ما تستحي في بيتنا وتسب فيني وفي أختي
ناصر ببرود : معليش يا ولد العم المفروض تتقبل الحقيقه وتفوض أمرك لله لاأنت أول ولاآخر واحد قبيح على وجه الأرض
طارق وسيم طويل ونحيف وأبيض وعيونه بنيه وشعره بني على أشقر وهذي عقدته في الحياة لأن اللي يشوفه يسأله إذا هو سعودي او لا
طارق : بس يالله أنت تتمنى تأخذ ملمح من ملامحي
ناصر : هههههه كثر منها تبي الناس إذا شافوني بالشارع يقولون الأخ سعودي , تصدقون ذاك اليوم كنا في السوبر ماركت وبنت وقفت بالغلط وصكت علينا الممر يوم تكلم طارق علشان تبعد قالت ياحليله الاخ متسعود
فيصل وسلطان وراكان ماتوا من الضحك
طارق وهو معصب : مسكينه ما تعودت على بالها السعوديين كلهم شييف مثلكم
فيصل : فيه سعوديين بيضان وش زينهم واكبر مثال راكان وفهد ولد عمي وانت يا ناصر بس طارق مسكين بياضه غريب لا وفوق على كذا أشقر
طارق بقهر : بس عاد من زينك أنت وسمارك
سلطان : حدك عاد كل شي الا هالسمار اللي تتمناه موب هالبياض اللي فيك وع الحمد لله والشكر باصق تجيب الهم
فيصل : لا تعقده زياده عجز وهو يمشي في هالشموس علشان يسمر بس مافاد فيه
طارق : هين والله لاأقول لأبوي سعود
ناصر : لا تكفى الا أبوي سعود تراه يحبك علشانك تذكره بحبيبته حصه على قوله شقرا وبيضاء تطيح الطير من السماء
طارق : عيب لاتوصف جدتك عندالرجاجيل
ناصر : الله يرحمها , بس أموت وأعرف ليش طارق هو الوحيد اللي خذ منها
فيصل : من قرادة الحظ والله والا البنات اللي المفروض يجون عليها ما خذوا ذره منها وهذولا هم طاحوا بكبودنا
سلطان وهو يناظر راكان : أقول فشلتونا انتوا وبنات العايله عند الرجال وش بيقول عنا , ولا عرفتونا عليه
فيصل : هذا راكان ولد جيرانا
سلطان : هلا والله راكان ولا تأخذ على كلام هالدلوخ تجيهم خمات ويعطون بخيط وخيط
راكان : لا ما فيها شي وأنا أخوك وإذا على البنات ما ألومهم أنا أكثر واحد حايمه كبده بسببهم
طارق : عاد انت الله يعينك عليهم عندك في البيت ثلاث من طقة منى
راكان : يهونون خواتي عند اللي يدرسون معنا في الجامعه لو تسمع كلامهم والله أن تسجدلله شكر ان خواتك مو مثلهم
ناصر:ليش أنت تدرس لين الحين ,ووين تدرس
راكان : اكمل ماجستير بجامعه الملك سعود
ناصر : وشلون تدرس مع بنات
راكان : بالشبكه الله لا يوريك
سلطان : يعني قاطين في السالفه
ناصر : خساره لو اني داري كان كملت دراستي
فيصل : شف اللعين , الحين تبي تكمل دراستك
سلطان : ما عليك منه هالنصاب لو قصده البنات كان راح يكمل دراسته برى بس يستهبل
ناصر: لا حبيبي بنات السعوديه غير ما فيه مثلهم
فيصل : ومن ساعه قاعد تحش في خواتي واختك , ليش وش قالوا فلبينيات
ناصر: لا وانت الصادق خواتك واختي ما ينعدون من البنات بعض الحزات أشك أن ريم ولد
دخل متعب وسمع كلام ناصر: إيه الحين تطنز على اختك بس إذا جربت المدام بتقول يازين اختي وأيامها وبتحس بقدر اختك
ناصر:لاحبيبي إذا تزوجت اكيد بحب المدام وإذا حبيتها بنتفاهم وبيكون كلامها عسل على قلبي
متعب باستهزاء : أبأ أقلبني (أبقى قابلني)
فيصل : كيفك متعب وش اخبارك من زمان عنك وراك قاطع
متعب : تعرف مشاغل الدنيا وخبرك محاكيك متزوج وعنده بيت وحرمه
ناصر : تكفون صكوا على سالفة العرس ما نبي نسمع أي كلام فيه ولا نبي نكرهه
طارق : وش تبينا نقول, ما فيه أحلى من الحياة الزوجيه والقفص الذهبي
ناصر: أيه هذا الكلام اللي يشجع مو شي يحطم ويلا قم جب البلايستشن خلنا نلعب ونشوف من اللي يقدر يفوزعلي
قاموا الشباب وقربوا عند التلفزيون يلعبون وسلطان جالس مكانه في آخر المجلس يتفرج وساكت وشكله طفشان جاء متعب عنده
متعب : وش فيك سلطان اليوم شكلك مو طبيعي فيك شي؟
سلطان بصوت واطي : ما أدري احس اني مخنوق ودي اسافر أروح لمكان بعيد أبغى ارتاح
متعب باستغراب : هاه سلطان تكلم وش اللي مضايقك
سلطان : من غيرهم أهلي نفذوا اللي في روسهم واليوم امي راحت تخطب لي
متعب : وانت ليش متضايق لين متى بتقعد على هالحال
سلطان : وش فيها حالتي اهم شي اني مرتاح
متعب : لا تلعب على نفسك وتقول مرتاح انت ما تشوف نفسك يا اخي صرت واحد ثاني كئيب وانطوائي وعصبي ليش ما أدري
سلطان : أنت عارف ليش؟
متعب : استح على وجهك لين الحين تفكر في ذيك الحيوانه
سلطان : خلاص قفل على السالفه لوسمحت
متعب : أنا بقفل عليها الحين علشان الشباب بس إذا طلعنا لي كلام ثاني معك
طارق : سلطان تعال شف هالزلابه أخوك راكان شرشحه في اللعب مسوي قوي
ناصر: عادي كبوة جواد
فيصل : قال كبوة جواد ضف وجهك بس الرجال ما قصر فيك شف كم النتيجه
متعب : خلاص سلطان قم خلنا نجلس معهم ترى بينتبهون عليك
قام سلطان ومتعب وراحوا مع الشباب عند التلفزيون
سلطان : مبروك يا راكان الظاهر الكليجا مفعولها قوي
راكان : وش دراك اني قصيمي
سلطان : لهجتك مبين عليها بس مو لذيك الدرجه , بس واحد من أخوياي قصيمي كان يدرس معي في الجامعه ولهجته تشابه لهجتك
متعب : من قصدك ؟
سلطان : ياسر
متعب :حرام عليك ياسر من يبدى يتكلم قصيمي وأنت تحس بغباء قدامه ما تفهم وش يقول
سلطان : شف من يتكلم عاد اسكت بس انت من تتكلم جنوبي كلنا نسكت لين ما تعيد كلامك بالبطئ علشان نستوعب
متعب : أنا ما أتكلم جنوبي إلا إذا عصبت
سلطان: ايه انت وياسر ما تتكلمون بلهجاتكم إلا إذا عصبتوا علشان إذا قلتوا مسبه ما أفهم عليكم
راكان قام يضحك : صاز والله يا سلطان تسنك داري, ليمني عصبت احتسي مثلهم
طارق : لا حبيبي انت وإياه اللي بيجلس معنا لازم يقول شي نفهمه كلنا
سلطان : إذا على متعب انسى الموضوع تعبت وانا اقوله نفس الكلام
متعب : قدني قلت شي مافهمته ياطارق ؟ قسم بالله ان الكلام اللي اقوله مفهوم إلا إذا زحلطت مني كلمه كوذي والا كوذي
فيصل : اقول قوموا تعشوا لايسمعنا احد ويقول عنا وش هالتنك اللي ما يفهمون على بعض


العنود متى بتستقبل بنات عمها؟
ساره وش بتسوي مع ريم وامها ؟
منى وراكان وآخر التطورات!!!---------------------------------------------------------

يعطيك العافية ماقصرت

دمت بألف خير


*******

بارك الله فيك

لك مني أجمل تحية

تقبل مرورى

كاسب العز

شـكــ وبارك الله فيك ـــرا لك ... لك مني أجمل تحية