][احلى ماخلق ربي (قصة سعودية) تستحق القراءه][

عيوووووووووني لكم جميعا وخاصة الغاليه اسرار
اليوم بنزل لكم كم جزء وان شاء الله تعجبكم

بسم الله الرحمن الرحيــــــم

الجزء السابع

الفصل الأول..

: : :

نواف يوم جت الساعة 6 ونص نزل تحت وجلس بالصالة عند التلفزيون وماكن مافية شي ..سكر التلفزيون واكن طفشان... راح وركب سيارته وجلس يتمشى ضايق صدرة بقوة وكان يسمع أغنية راشد الماجد (نسيناكـــم) ما حس بالوقت كان يفكر بمصيرة وكان يدور في بالة... وش بيصير لي اذا تزوجت ريما ابي احاول اضغط على نفسي علشان أنسى الهنوف..ويا ترى أنا قادر أسعد ريما؟انا قادر اتزوج وحدة كنت اعتبرها مثل اختي؟
ولما صارت الساعة 7 وربع...رن جوالة وطلع محمد اخوة
محمد:نواف وينك؟مو بالبيت؟؟خوفتنا عليك؟
نواف:انا بالسيارة طلعت اغير جو طفشت لحالي..اقول امي صحت
محمد:اييية ومعصبة منك..مستعجلة على شوفة الغالي جلس يضحك
نواف:ههههههههههههههه طيب قلها شوي واجيكم اووكي؟
محمد:اووكي!!باي
نواف:فمان الله

نواف سكر الخط وراح لبيتهم وامه كانت تستنـــاة بالحديقة اول ما دخل سيارتة بالحديقة كانت أمة ومحمد يستنونة
ام نواف:وينك نواف.؟احد يطلع الصبح يغير جو
نواف:الله يايمة روعة الجو الصبح الهواء نظيف مافية احد ..الشوراع فاضية
ام نواف:خلاص خلاص يا شاعر...بس ودني لابوك ترانا تأخرنا علية
محمد:ربك بلاك بولد شاعر ورومانسي هههههههههههه..وش معجلك اها يمة اشتقتي هالسرعة؟
ام نواف:اقول اسكت فكنا من خرابيطك على الصبح..
نواف:طيب يالله اركبوا السيارة انتي ومحمد..وأنت يامحمد ابي اوريك الشغل بعدين!!

راحـــــــوا للمستشفى وجلسوا برى شوي لان الدكتور كان يكشف على ابو نواف داخل وممنوع احد يدخل..وهم جالسين جاء ابو ريما وابو عبد الرحمن:الســــــلام عليكم
الجميع:وعليكم السلام
ام نواف:عن اذنكم ابي اروح استراحة النســـاء نواف اذا طلع الدكتور اتصل علي علشان اجي واشوف ابوكم!!
نواف:ابشــــــري..محمد روح مع امي وصلها وارجع
محمد:طيب يالله يمة ..
ابو عبد الرحمن:هاه يانواف وش قال الدكتور؟
نواف:والله ياعمي مابعد طلع الدكتور من جينا وهو داخل عندة..
ابو ريما:طيب متى يبرخصونة ويطلع.؟
نواف:والله ياعمي على كلام الدكتور يقول اليوم بيحدد اذا بتسمح حالتة يطلع ولا لا!!
ابو ريما:لا ان شاء الله بيطلع اليوم

طلع الدكتور وراح نواف عندة
نواف:هاه يادكتور وش صار على ابوي؟
الدكتور:لا ماشاء الله عال العال..خلاص اليوم يقدر يطلع
نواف:الله يبشرك يادكتور بالخير
ابو عبد الرحمن:مشكور يادكتور..
ابو ريما:طيب يادكتور نقدر ندخل علية؟
الدكتور:ايه بس ياليت ماحد يضايقة ولاتتكلمون معاه كلام يضايقة..
محمد:ابشر يادكتور..تكفون بدخل على ابوي مشتاق لة حيل
ابو عبد الرحمن: يالله كلنا بندخل

دخلــــوا علية وسلموا علية ومحمد ونواف جلسوا على السرير عند راسه وجلسوا يسولفون معاه هم وعمامهم وبعدين ابو ريما قال بصوت قصير:يابو عبد الرحمن خيلنا نطلع اكيد ام نواف ودها تدخل عنده
ابو عبد الرحمن:والله انك صادق..يالله
ابو ريما:يالله فمان الكريم يابو نواف والليلة بنجيكم انا وابو عبد الرحمن
نواف:وين عمي تونا؟
ابو عبد الرحمن:لا بس مانبي ابوك يمل من وجيهنا!
ابو نواف:ههههههههههه لابس اجلسوا تو الناس مابعد شبعنا منك
ابو ريما:الليلة واحنا عندك وبنجلس ليمن تقول اطلعــــوا فكوني منكم
ابو نواف و نواف ومحمد:هههههههههههههه
ابو نواف:اقول يابو ريما بكـــــــــــرى انا ونواف وابو عبد الرحمن بنجيكم نبيك في موضوع
نواف تغيرت ملامح وجهه وتضايق ودنق على راس ابوة:يبة الناس وين وانت وين اللحين انت تعبان واذا قمت بالسلامة يصير خيـــــر..
ابو نواف :اقول خير البر عاجلة
ابو ريما:خلاص اجل اليلة عندك وبكرى حياكم الله..
ابو عبد الرحمن :وش السالفة؟
ابو نواف: الليلة بقولك كل شي ان شاء الله
محمد:وانا يبة ليش ماني من العائلة؟
ابو نواف:ههههههههه لا انت الخير والبركة ومحمد ترى يابو ريما بيجي معانا..لاتزعل بس
محمد:اية هــذا الكلام الزين
الكل:هههههههههههههههههههه� �هه
ابو ريما وابو عبد الرحمن:فمان الله

محمد راح واتصل على امة وجت امة وسلمت على ابو نواف وجلسوا يدردشون ويسولفون
ابو نواف:اقول يام نواف بكرى بنروح نخطب
محمد وهو يشهق: تخطبون مين؟ ولمين تخطبون؟
ابو نواف:..بنخطب بنت عمك ريما لاخوك نواف
نواف تضايق وعقد حواجبة وخاف من ردة فعل اخوة لانة كان يحبها!!
وفجــــــأة
محمد:ياعينــــــي يانواف بتتزوج يانصاب وراح وباسه الف مبروك ياخطير..والله مو مصدق نواف بيتزوج والله وصرت رجال يانواف وبتعرس وتتركني ..ههههههههههه
ام نواف:هههههههههههههههه ليش نواف مو مالي عينك..ولدي رجال وشيخ الرجاجيل..والله يوفقة ان شاء الله ويتزوج
محمد:يمة انا اقولكم اني ماني ولدكم بس كل هالدلع والدلال لنواف انا اخبر آخر العنقود سكر معقود ..
ابو نواف:لا انت الشيـــــخ محمـــــــد بن سعود..رجل ولا كل الرجال..واكيد انت الغالي والمدلع بس تعرف نواف لانة بيتزوج لازم امك تدلعة..وبعدين بياخذ ريما بنت عمك وانت تعرف ريما وش تعني لامــــك

محمد:ايه في هذا معاك حقك..ريما عند امي شي كبير
ام نواف:تستاهل ريومة حبيبتي ..والله انا ماخرت الغالية الا للغالي..
نواف ساكت ولاقال ولاكلمة كان متضايق ليش مستعجلين على الخطبة تونى..
ابو نواف:نواف وش فيك؟؟
نواف:هاه لا ولا شي
محمد:اية وش علية بكرى بيخطب اكيد يفكر بالخطبة والخطيبة ههههههههههههه
ام نواف:ذابحتك الفصحى يامحمد
نواف: سبحان الله يانك ترفع الضغط انت وكلامك اللي ماله طعم
محمد:حط علية كتشب علشان يصير لة طعم ههههههههههه
الكل جلس يضحك علية
نواف:اقول انا بروح اسوي الاجرائات علشان نطلع ابوي يمة جهزي ملابس ابوي
راح نواف وخلص والاجرائات وطلع ابوة وركبة بالسيارة هو ومحمد وامة..

وصلــــوا البيت وجلسوا بالصالة وسوالف وضحك
نواف:يالله يبة اصعد فوق لغرفتك علشان ترتاح
ابو نواف:يايبة انا مليت من السرير مشتاق لجلستكم وجمعتكم
محمد:يوة يانواف مابعد شبعت من ابوي ابيه يجلس معاي
ام نواف:ابي اروح اجهز الغــــداء اكيد ابوكم مشتاق لطبخي
ام نواف:اكيد والله اني فقدتة هاليومين
محمد:احم احم نحن هنا
الكل يضحك علييييية

العمة نورة اتصلت على البيت وكلمت ابو نواف وقالت انها بتجيهم اليوم علشان تتطمن عليه
ام نواف:اجل ابي اقول لحريم اخوانك كلهم يجون
محمد وهو يطالع لنواف:ولو سمحتي لزمي على الخالة ام ريما وبنتها المصون حرم اخي الغالي
نواف جلس يضحك على كلام اخوه:ههههههههههههههههههه حلوة حرم ذي .....

يوم جت الساعة 8 باليل وجت العمة نورة وهنوف ومرت العم طلال وبنتها نوف وام ريما ..ريما الي كانت تدعي التعب وانها مابتجي وجلست عند خوالها ..وام نواف تضايقت ان ريما ماجات وهنوف ونوف بس يتصلون على ريما ويزعجونها علشانها ماجات.... وسهـــــروا عندهم الى الساعة 11 ورجعوا وام ريما مرت بيت اهلها وجابت ريما معاها..ريما راحــــت لغرفتها ونامت الساعة 3 الفجر الى الساعة 2 الظهر نزلت تغدت مع اهلها وابو ريما على الغداء:الليلة بيجون اخواني وعيالهم
ام ريما:حياهم الله..
ابو ريما وهو يناظر ريما ويبتسم:بس هم ماراح يجون كذا هم جايين علشان موضوع مهم..
ام ريما:وش موضوعة؟
ابو ريما:خير ان شاء الله لاتستعجلين بقولك بس مو باللحين...
ريما كانت ميتة خوف ومرتبكة وساكتة ماقالت ولاكلمة
خلصوا من الغداء وجلسوا بالصالة
ريما:وش رايكم بالشاي بعد الغداء؟
ابو ريما:والله ماهوبشيــــــن وخصوصاً اذا كان من يدينك يالغالية..
ام ريما:اية يمة اذا ماعليك امر..
ريما:من عيوني..دخلت المطبخ وجلست تسوي لهم شاي
ابو ريما فاتح ام ريما بالموضوع.....وام ريما مبسوطة بالمرة لان نواف ولد عمها ومهندس وماراح تلاقي ريما مثلة
جت ريما وعلى طول سكـــروا الموضوع..ريمااعطت ابوها شاي واعطت امها وجلست عند التلفزيون بعيد عنهم شوي وهي تقلب بالقنوات..ابو ريما يوم آذن العصر راح يصلي بالمسجد وبعدين طلع لشركتة....

في الصالــــــــــــة..ريما عند التلفزيون وكانت تشوف امسية لعبد الرحمن بن مساعد ومنسجمــــــــــة معاهــ

ام ريما:ريوم حبيبـــــتي انتي اليوم ضبطي حالك عمامك بيجون عندنا
ريما:وخير ياطير كل يوم يجون هم ,,,وش معنى اليوم بالتضبط؟(ريما ماكانت تحسبهم جاين يخطبونها بذي السرعة)
ام ريما:علشان تسلمين عليهم
ريما:بس مو ابوي من شوي يقول ان العيال بيجون معاهم
ام ريما:وش دخلك بالعيال اللحين عمك يبي يشوفك توهـ طالع من المستشفى!!وبعدين ترى بزعل عليك اذا ماراح تتكشخين الليلة
ريما:بس يمة وش معنى اليلة..
ام ريما:بــــــــدون بس..الليلة بتنزلين لهم وانتي متكشخة والا والله ماراح احاكيك اليوم ابد
ريما من غير نفس:طيب اللي تامرين فية انتي
صعدت ام ريما تنام بغرفتها ...

طبعاً جت الساعة 6 العصر..ريما مشتهيه آيسكريم راح شافت بالثلاجة لقت فية آيسكريم بالتووت هذا اللي فية عصىجلست تاكله وتابع التلفزيون
ام ريما نزلت وهي على الدرج:ريييييييييييييييييي� �ــــــــا؟
ريما خافت من صوت امها وطاح الايسكريم عليهــــــــــا:هاه يمة وش تبين؟
ام ريما:بعدك ما اخذتي شاور ولا لبستي؟
ريما:وين يمة تو الناس هم ماراح يجون الا بعد المغرب
ام ريما:يابرد اعصابك اقول قومي بسرعة
ريما(كانت مستغربة من حماس امها الزايد):طيب يمة

ريما وهي بتصعد الدرج كانت تفكر وش عندهم حالتهم حالة الليلة عمامي راح يجون عندنا ..غريبة دايم يجون عندنا بس ماقد شفتهم متحمسن مثل اليلـــــة...
: : :
في بيت ابو نواف
كان نواف مو مصدق ان الليلة بيروح يخطب مرتبك وخايف وطفشان بنفس الوقت..كان دايخ الظهر ونام الى اسلاعة 6 المغرب ماكان يحس بنفسة ودخلت امة علية بعد ماماتت وهي تطق على باب غرفتة ولا حياة لمن تنادي

دخلت ولقت الغرفة سوداء الستاير مسكرة والغرفة باردة وظـــــلام ونوف غرقان في النوم
ام نواف وهي تصارخ:نواف قوم يالله اليلة بتخطب قوم جهز نفسك وضبطها..
نواف:يمة تكفين خليني انام دايخ مانمت امس كلة
ام نواف:روح قص شعرك شف كيف طويل ..وضط نفسك يالله ودي ثوبك للمغسلة خلهم يجهزونة
نواف:طيب طيب هذاني قمت .قام سريرة وراح غسل وجهه وصلى وراح ياخذ له شاور وبعد الحاح من امة ودى ثوبة للمغسلة وراح قص شعرة وضبط نفسة عدل السكسوكة والدقن وصاير شكلة تحفة ولا ممثل عيونة كبار وحلوة وشعرة ناعم اسود وافمة صغير يعني الكل كان معجب فية..جاء نواف وكان ستايل مررة راح عند امة في الصالة وكام محمد جالس عندهم
ام نواف:يابختك ياريما ماشاء الله عليك
نواف:وش دعوى يمة..
محمد:اقول يمة المثل يقول القدر بعين امة غزال
نواف:هههههههه القرد حضرتك وكلن يتكلم عن نفسة
محمد:آهـ يالقهر هذا بيتزوج وانا جالس يمة ماني زوجوني
نواف:الصغار مايفكرون يتزوجون اللحين خلي همك في الثانوية العامة وتفكيرك في النسبة مو بالزواج
ام نواف:صادق اخوك وراك ثانوية عامة يمة.
محمد:خلاص خلاص كليتوني وانا زهقت كل ماقول كلمة قلتوا ثانوية عامة
نواف:يمة بروح اجيب ثوبي من المغسلة تأمريني في شي
محمد:والله يانواف شكلك خطيييير تكفى ابي اخذ معاك صورة هههههههههههه
نواف:الحمد لله والشكر على نعمة العقل ..

ريمــــــــــا اليلة بتشوف نواف النظرة الشرعيـــــة علشان كذا امها متحمسة ..ابو نواف قال لأبو ريما وهو بدورهـ قال لامها..وريما ماتدري وش السالفـــــــــــة..نواف ماقد شاف ريما الا لمحات بسيطة ومو متذكر شكلها ابداً..
.................................................. ..........................

الجــزء السابع

الفصل الثــاني

: : :

ريما اخذت شاور ويوم طلعت من الحمام (وانتوا بكرامة) وراحت ورتبت شعرها ولبــست تنـورة ذهبيـة حرير وحزام عريــــــض ع الخصر فيه فصوص كرستالات حمر صغيرات وبلوزة حمراء كان الصدر فيه تكسيرات صغيرة وبعدين يجي من تحت الصدر شريطة عريضة مخمل لونها احمر ومع تحــــت وسيع وفية ترتر خفيف ولبست ساعة ذهبية روعة جتها هدية من خالتها هند وصندل ذهبي فية وردة حمراء..دخلت عليها امها واعجبها شكل ريما وفكت شعرها كان طويل وناعم..وحطت ميك آب نعوم كحـــــل داخل العين اسود وروج احمر خفيف وجلوس
ام ريما:ياعيني اية كذا ابيك طالعة قمر 14 الله يحفظك
ريما:يمة ياحياتي انتي بس وشوله كل ذا الحماس؟
ام ريما بارتباك واضح:لا بس ابي الناس يقولون وش ذا البنت عنكم قمر
ريما:يمة وش فيك ارتبكتي..
ورن جرس البيـــــــــــت
ام ريما:شوفي انا بنزل قلت للسواق يجيب عصير فريش من محلات العصير وشكلة جاء يالله و ابي اجهز القهوة
ريما:اوكي انا بجلس شوي بغرفتي
طلعت ام ريما وكانت خايفة من ردة فعل بنتها لانها مابعد قالت لها ان نواف يبي يخطبها ولا وبعد يبي يشوفها وكانت تقول(ياربي وش اسوي اللحين بنتي واعرفها عنيـــــدة واذا قلت لها اللحين ماراح تطلع لهم ..وابوها اعطى عمها كلمة لهم اوووة ياربي انك تهديها وتطلع لهم)

ريما شغلت اغنية احلام(ناويلك على نية) (ناويلك على نية بس انت اصبر شوية..اذا ماعلقك فيني وهواك يصير في يديا)وكانت تقول:طيب يانواف ناويتلك على نية ..صح لسان ياحلام وراحت ترقص على الاغنية وتفكر بكلمات الاغنية ..

: : :

في بيت ابو نواف..

الكل جالس بالصالة يستنون نواف كان فوق كشخ بالثوب والشماغ وجلس يتسكـب ورش العطر ولبس ساعة جلـد بني (وانتوا بكرامة) جزمة بنيــيه وطلع وهو نازل من الدرج ام نواف:لولولولولوليش يارب تحفظك
محمد:احم احم نحن هنا
ام نواف: اذا جيت تعرس ابي اقولك هالكلام
محمد: زوجوني تكفون علشان امي تقولي هاللكلام
ابو نواف:محمد وجع وش ذا الكـــــلام استح على وجهك
محمد:آسف يبة
نواف:هههههههههههه القافة ماتصلح دايماً
ام نواف:راحت جابت المبخرة وجلست تبخر ولدها<طالع خطير روعة
ابو نواف اتصل على ابو عبد الرحمن العصر وقالة وانبسط ابو عبد الرحمن وبارك لهم ..وبعد اتصل على فيصل وقال انه راح يجي لبيت ابو ريما..ركبوا السيارة نواف ومحمد وابوهم وعمهم طلال

وصلوا الرجال لبيت ابو ريما على آذان العشاء وابو ريما بالاستقبال هو وفيصل
ابو ريما:حيالله من جانا
ابو نواف:الله يحيك
ابو ريما:تفضلــــــوا
ودخلوا على قسم الرجال وفي المجلس كان واضح الارتباك على نواف وفيصل جلس هو ومحمد يضحكون علية وجابو القهوة وتقهووا الرجال

ابو نواف:يابو ريما احنا جاين نخطب بنتنا ريما لولدنا نواف..واحنا ماراح نلاقي مثل ريما بنت اخلاق وجمال ودين ويكفي انها بنت اخوي فهد

ابو ريما:الله يسلمك..وهاذي الساعة المباركة ..ونواف ولد مايعيبة شي كامل والكامل الله..بس مثل ماتعرفون البنت لازم اشاورها وبتفكر وبنرد لكم ان شاء الله

ابو عبد الرجمن:اكيد يحق لها ..وريما بنت وربي اعتبرها بنتي..ونواف ولدي وانا سعيد ان ولدنا لبنتـــــنا والله يتمم على خير

نواف كان وجهه احمر ويعرق كثير ومرتبك ومحمد وفيصل يبتسمون بينهم وهم يطالعون نواف

بعدين سكتوا شوي

نواف:عمي فهد..اذا ماعليك امر ابي اشوف ريما..واعتقد انه مو عيب والشرع يقول كذا..
ابو ريما:اكيد حقك وانا ابوك دقايق ابي اعطيهم خبر
فيصل كان مصدوم من كلام نواف لعمة وش عندة ؟لانة اكثر واحد يعرف انه مايبي ريما

راح ابو ريما وقال لأمها ورجع للرجال صعدت ام ريما عندها وطقت باب غرفتها ودخلت
ام ريما:ريما ممكن ادخل
ريما:ايه تفضلي
ام ريما:ريما تعالي اجلسي جنبي ابي اقولك كلمتين
ريما جت وجلست جنبها
ام ريما:ريما حبيبتي انتي اللحين بنت حلوة وكبرتي والكل حاط عينة عليك..ومن كنتي صغيرة وعمك كان يبيك لولدة نواف ..ونواف ولد ماشاء الله علية متعلم ومثقف وخيَر ويعرف ربة زين وتربية عمك ..اليوم جايين يطلبون يدك له...
ريما قامت من مكانها
ام ريما:اجلسي مابعد خلصت كلامي
ريما طاحت على رجول امها وجلست تبكي مثل الاطفال
ام ريما كسرت خاطرها :ريوم حبيبتي نواف ولد عمك وعمك يتمناك تتزوجينة وبعدين كلنا عارفين ان نواف ولد ماعلية اخلاق وطيب هاه يمة احنا مانبيك تستعجلين بالرد خذي راحتـك لان هذا زواج مو لعبة يعني بتقضين العمر كلة وياه
ريوم يالله قومي مسحي دموعك وحطي ميك آب ثاني
ريما:ليش يمة؟
ام ريما:هاه (ارتبكت)يمة ريومة نواف طالب يشوفك اللحين وابوك اعطاهم كلمة انك بتنزلين لهم بعد شوي
ريما:طيب ليش ماخذتوا رآي..ماراح انزل لهم ابي اجلس بغرفتي
ام ريما:لايابنيتي تكفين لاتفشلين ابوك قومي يالله انزلي الولد يستناك
ريما تذكرت كلام خالتها ندى انها لازم تتمسك بنواف ولازم تخلية يحبها وهي تفكر وتقول(هذي فرصة اشوف نواف واعرف اذا هو صدق يبـــيـني او لا)
ريما:يمة خلاص دقايق وراح انزل
ام ريما:عشتي والله ايوة كذا ابي بنتي قوية
ريما راحت وعدلت نفسها ونزلت ابو ريما كان يستناها عند الدرج يوم شافت ابوها خافت وصارت ترتجف وحست ان الموضوع خلاص واقع وصار جد..
طبعاً فيصل ومحمد وابو نواف وابو عبد الرحمن كلهم طلعوا بالحديقة علشان نواف وريما..
ريما تهمس في اذن ابوها قبل تدخل المجلس:يبة تكفى لاتخليني ترى اذا طلعت بطلع وياك
ابو ريما:خلاص ياريومة انتي ادخلي واوعدك اني ماراح اطلع الا وانتي في يدي
ريما ابتسمت ابتسامة صفرا وكانت ميتة من الخوف
ونواف جلس يعدل شماغة ويتضبط ويفكر كيف راح يكون اللقاء الاول بينة وبين ريما!!
ابو ريما وريما دخلوا المجلس..ابو ريما جلس عند باب المجلس وريما جلست قبال نواف بالكنبة اللي قبالة
ريما:الســـلام عليكم
نواف اعجبتة نعومة ريما وهدوئها:وعليكم السلام...شخبارك ريما؟
ريما بصوت مو مسموع:تمام..
نواف جلس يطالع ريما من فوق لتحت اعجبتة مرة كان شكلها كيوووت
ابو ريما:جلس يطالع فيهم وحس انهم متربكين ثنيناتهم

بعد دقــــــــــــايـــــــــ ـــــــق..
ريما قامت:عن اذنك
ابو ريما:وين يبة اجلسي شوية مابعد شافك ولد عمك
ريما كانت بتصيح ودموعها في عيونها..نواف رحمها شكلها واضح اللي خايفة
نواف:خلها عمي على راحتها..الله معاك ريما
ريما طلعت وصعدت غرفتها وجلست تبكــــــي..وامها صعدت عندها ودخت عليها لقتها تبكي
ام ريما:وش فيك؟وراك تبكين؟ وش صار؟
ريما:لا مافيني شي ..بس يمة احس تونى على الزواج
ام ريما:لا وش تونى الولد مايتفوت وانا اتمنى افرح فيك واشوفك عروس
ريما راحت حضن امها وجلست تبكي
ام ريما:يالله ياريما كبرتي وصرتي عروس..يوم كنتي صغيرة كنت اتمنى اشوفك وانتي تمشين ويوم مشيتي كنت اتمنى اشوفك تدرسين و درستي وبعدها كنت اتمنى اشوفك عروس واللحين عروس نزلت من عيونها دموع لاشعورياً وهي تقوول: راح تتركيني ياريما انا وابوك وتروحين بيت زوجك ان شاء الله
ريما جلست تبكي هي وامها ..

: : :
عند الرجال رجعوا للمجلس وكان نواف مبسوط مرة انة شاف ريما واعجبتة ملامحها الناعمة ومحمد وفيصل جلسوا عند نواف بعيد عن الرجال..و نشبوا في حلقة وش صار ؟وش قالت ؟وش قلت؟ كم جلست ؟
نواف:ههههههههه كل هذا بجاوبة عليكم
فيصل:ياحركات انت ..عساة اعجبتك
نواف بيقهرة:مش بطالة حليلة
فيصل: افا ريما ماعبجتك اللحين الكل معجبتة وانت ماتعجبك الا انت وش يعجبك بالله مايعجبك العجب ولاالصيام برجب
نواف:هههههههههههههههههههه� �هه

ابو عبد الرحمن:الله يوفقكم ويتمم لكم على خير
ابو نواف:ان شاء الله
تعشوا الرجال وطلعـــوا نواف وفيصل راحوا مع بعض وابو نواف وابو عبد الرحمن ومحمد راحوا سوى ..نواف اعجبتة ريما بس كان يكابر عليهم....

: : :
هنوف ونوف من سمعوا الخبر جلسوا يبكون من الفرحة واخيراً ريما بتتزوج نواف وبعدين جلسوا يبكون انها خلاص بتتركهم يعني بتصير عروس وراح يكون عندها مشاغل واهتمامات غيرهم..هنوف ونوف اتفقوا بكرى يجونها للبيت ويسهرون عندها..هم وندى خالتها وندى كانت بس تبكي من الفرحة ..

بعــــد اسبوع ردت عليهم ريما وكانت موافقة..والكل يبارك لنواف..ونواف كان مبسوط مايدري وش ذا الشعور الي جاهـ من وافقت ريما..

ام نواف اتصلت على ام ريما على طول بعد الموافقة..

ام نواف:الف الف مبروك يام ريما واخيراً بنصير انساب..وبنفرح بريومة ونواف
ام ريما:الله يبارك فيك..شفتي كيف زوجناهم الله يوفقهم أن شاء الله
ام نواف: والله يام ريما انا اتصلت عليك ابي اطلب منك طلب
ام ريما:آمري يام نواف ..خير وش عندك؟
ام نواف:ياليت لو نعجل في الملكة ابي ريما ونواف ياخذون على بعضهم
ام ريما:بس يام نواف ماشاورت ريما..
ام نواف:تكفين يام ريما نبي نعجل فيها شوي يعني ياليت لو تكون الاسبوع الجاي
ام ريما:لا يام نواف بدري مرة والبنت ماتجهزت للملكة وانا اعرف ريما بتزعل
شوفي نخليـــــــها بعد اسبوعين هاه وش قلتي؟
ام نواف:خلاص اللي تشوفينة بعد اسبوعين بعد اسبوعين..مشكورة يام ريما والله اني مبسوطة من الخبر والله يوفقهم
ام ريما:آمين
ام نواف:خلاص اجل يالله نشوفك على خير ..مع السلامة
ام ريما:مع السلامة

ام ريما راحت عند ريما وقالت لها وريما عصبت وقالت وش فيكم مستعجلين وام ريما قالت لها انة خلص حددوا الموعد ..ريما ارتبكت وجلست تجهز نفسها ..راحت لمراكز تجميل وسوت لها تقشير وتنظيف بشرة ومساج وحمام بخار وبدكير ومنيكر ..

الكل كان مشغول بسالفة الملكة وندى كل يوم تجيهم ترتب معاهم ..ونوف وهنوف دايماً عند ريما يساعدونها ويهونون عليها ..

: : :

وش راح يصيـــــــــر في يوم الملكة بين نواف وريما؟

هل ممكن نواف يجرح ريما في كلمة يوم ملكتهم؟

نواف راح يحب ريما؟
.................................................. .......................

الجزء الثامن

الفصل الاول

: : :

ريما راحت فصلت فستان للملكة هي خالتها ندى وكان بيطلع قبل الملكة بيومين وحجزت كوفيرة للشعر والميك آب ..

طبعاً قبل الملكة باسبوع جت الخالة هند وبنتها هيفاء ولدها خالد علشان ملكة ريما والكل مبسوط...هند وعيالها ساكنين عند بيت الجدة هيا..وقبل مايوصلون للمطار كانت ام ريما وريما عند خوالها
ريما:تكفى تركي بنروح نستقبلهم معاك
ندى:ايييية ياعمري انت ياحياتي ياقلبي وروحي اخوي
تركي:يالله ياندى على المصالح كل ذا الكلام الزين علشان روحة مطار
ريما:هاه خالي وش قلت والله مشتاقة لهم بروح استقبلهم
تركي:بس هم راح يجون بعد اقل من نص ساعة عندك وراح تشبعين منهم
ندى:لا بس روحة المطار لها طعم ثاني تكفى تركي تكفى تهز رجاجيل
تركي:هههههههههههه امري الى الله يالله روحوا لبسوا عباياتكم بسرعة لاتتأخرون علي ولا ترى بمشي واتركم
ندى:اذا تركتنا بنحلقكم مع السواق بالمطار
ريما:ههههههههه صادقة خالتي

ام ريما والجدة هيا يرتبون الغرف ويبخرونها ويصلحون العشاء والكل مبسط علشانهم...

راحوا واستقبلوهم بالمطار وهيفاء يوم شافتهم راحت ضمتهم بقوة وتركي سلم عليهم وهند مبسوطة ان البنات جوا للمطار وطبعاً هيفاء وريما وندى ماسكتوا بالسيارة بس يسولفون

خالد: شخبارك ندى انتي وريما؟
ندى :وجع ماني بخالتك قولي خالتي ندى
خالد:ههههههههه نعتذر خالتي ندو كيفك؟
ندى:ايه كذا!! تمام
ريما:انت شخبارك خالد؟ وشلون اهل الشرقية؟
خالد:تمام ويسلمون عليك..
هند: اقول ريما شلونها امك ؟
ريما:طيبة والكل يستناكم امي وامي هيا في البيت الكبير
هند:زين والله ياني مشتاقة لكم حيل
هيفاء:ريوم تكفين نامي الليلة معانا انا وخالتي ندى عندي سوالف ماراح تخلص الى بكرى
ريما:هههههههههه يصير خير ان شاء الله..بقول لأمي..

وصلوا للبيت وام ريما اول ماشاقت اختها راح وباستها على راسها لانها الكبيرة وهند فرحانة بجمعتهم ووراحت عند الجدة هياء وجلسوا يسولفون خالد وتركي وهيفاء وريما وندى وهند وام ريما والجدة هياء

تركي:عن ذانكم بروح انا وخالد نتمشى شوي
هيفاء:طيب ليش ماتخلونها بكرى؟كلنا بنطلع
خالد:وانتي بس تبين تروحين عيب انطقي بالبيت اجلسي مع البنات
ريما:لايهمك حكيهم بكرى انا اونتي وخالتي ندو بنطلع نتشمى وننبسط ونروح للمملكة والفيصلية ونتعشى ونرجع
خالد:افااااااا كل هذا بكرى بتسوونه
ندى:اذكر الله خويلد
خالد:ماشاء الله وجلس يضحك هو وتركي ههههههههههههههههههههههههه

تعشوا عندهم..وام ريما يوم جت الساعة 1 بالليل راحت للبيت وريما نامت عندهم وجلسوا يسولفون بالخطبة ونواف وريما وكل شيء وناموا الى الساعة 7 الصبح ..

ومن بكرى طلعوا للمملكة والفيصلية ريما وهيفا وندى وتركي وخالد وتمشوا فيها وتعشوا وانبسطوا وكل يوم يطلعون مع بعض مرة عند ريما ومرة تجمعوا بالشاليهات ومرة في البيت الكبير عند الجدة هيا...

جـــــــاء موعد الملكة كانت الساعة 4 العصر طبعاً ندى وهيفاء ناموا عندهم قبل الملكة بيومين مع ريما ..ام ريما حجزت ورد طبيعي كان لونه احمر وسوت كوشة بالصالة كان ستايلها غريب (طأووس يعني يرمز للغرور والدلع وريما هي اللي اختارتة) يعني كرسي واحد طويل وفية قماش حرير ينزل من عندة لونة فيروزي وتركواز واخضر فاتح وفية ريش طأووس طايح على الارض بطريقة مرتبة ومبعثرة وشموع لونها تركواز واخضر وفيروزي...والكوشة كانت بالصالة فية جزء مرتفع فيها والكوشة كنت هناك..البيت كلة ورد بكل زاوية فيه ورد طبعاً بالحديقة كان على النخل لمبات وفية بالونات على المسبح بنفس الالوان وكانت وبكل مكان..البيت شكلة جنان.....

كان حتى الشاكليت لونة فيروزي وتركواز ومكتوب علية اسم ريما ونواف في صيانــــي على شكل طأووس

جت الكوفيرة عند ريما كانت لبنانية اسمها نادين ندى حجزتها لان ندى دايماً هي زبونة عندها..وهي احسن كوافرية في الرياض عند احسن مشغل.. صعدت الكوفرية بغرفة ريما

الكوفيرة:انتي العروس؟
ريما بخجل:ايوة
الكوفيرة:ماشاء الله ماتحتاجين ميكياج انتي جمالك رباني
ندى:اقول يانادين..ضبطيها الليلة ترى اول مرة بيشوفها خطيبها
الكوفيرة:ولايهمك ياندى هي ماشاء الله متل الأمر (قمر) وراح اخلي خطيبها يتجنن عليا
ندى:تسلمين يانادين
الكوفيرة:ولو ياندى احنا بنخدمك بعيونا انتي والست ريما
هيفاء:نــــبي ريومة تصير احلى وحدة..

وجهزتها وسوت لها ميك آب ناعم لونه وردي وعلى الجفن وفية لمعة وفحمت عيونها بالكحل والماسكرا والروج الزهري والجلوس..وشعرهــــا رفعته وسوت موديل السبعينات اللي يكون مع وراء فيه نفخة ونازل الشعر مع وراء ومع تحت الشعر كان مطوي وشكلها روعة قمر نازل ع الارض لابسة طقم ذهب ابيض ناعم وبسيط(علشان اليوم نواف بيلبسها الشبكة) فستانها تحفة وردي وكــان موديلة عجيب وناعم من الصدر كان شيفون وردي فاتح ويربط مع وراء وضيق على جسمها وفيه شرايط الستراس اللي تلمع تكون تحت الصدر كان القماش روعة ومع تحت كان كلـوش وفيه مع وراء ذيـــــل طويل لونة وردي وبطيخي ..تجهزت ريما وكانت ندى لابسة فستان اخضر حرير على جسمها وفيه حزام شك ذهبي على الخصر ...هيفاء كانت لابسة تنورة حرير لونها ليلكــــــي قصيرة مع قدام وطويل مع وارء والبلوز صايرة على شكل سدرية شك تلمع لونها موف...وشعرها قصير فاكتة كانت نعومة...

عندها يمزحون فوق راسها ويبون يزيلون التوتر والخوف عندها وكانت ندى مع ريما مفارقتها وريما ترتجف من الخوف وحالتها حالة والدموع في عيونها..وندى تهديها وهيفاء تضحك عليها..

جت الساعة 6 المغرب وهنوف ونوف جوا لريما على طول راحوا لغرفتها..وجلسوا

هنوف لابسة بنطلون شك يلمع لونة بيج ودقلة يعني بلوزة طويلة الى الركبة ومفتحة من الجنب لونها اصفر وكانت تلمع وشعرها جعدتة وحطت فراشة جنب اذنها لونها اصفر..

نوف لابسة فستان تركواز دانتيل الى نص الساق وفية نقشة من على الصدر لونها كحلي ومسوية شعرها كيرلي ..

ام ريما حالتها حالة تجهز البيت وتبخــــرة وترتب المجالس ...وهند جت العصر تساعدها هي والجدة هيــــاء...

: : :

نواف كان مرتبك لدرجة اللي يشوفة يعرف انه مرتبك راح للصالون وجهز نفسة وصنفرة للوجة وضبط السكسوكة شكلة رهيب ...وحالتة حالة وفيصل معاه ماتركة ابد ويضحك علية ويتريق ويحاول يسحب التوتر منة وبعد آذان المغرب راحوا صلوا بالمسجد ورجعــــوا

لبس نواف الثوب الابيض والغتــــــرة والبشت الاســـــود وساعة فخمة سوداء جلـد تلمع والجزمة سودء(وانتم بكرامة) ونزل بالصالة وأمه وخالته أم سعد جالسات بالصالة اول مانزل امة جت عندة وبخرتة وعطرتة وكان ابوة معاه واقف ومحمد وفيصل برى بالحديقة جالسين يستنون ..

ام نواف:الف الصلاو والسلام عليك ياحبيب الله محمد لولولولوليييييش
ام سعد:بالمبارك ياولدي يانواف الله يسعدك ويهنيك
نواف:الله يبارك فيك خالتي..
ابو نواف:يالله بعد شوي يذن الأخير بنصلي ونمشي
ام نواف:احنا اللحين بنروح يالله يمة الله يوفقك ..مع السلامة
ام سعد:مع السلامة

طلعــــــوا وكانوا كاشخات وركبوا السيارة مع السواق واول ماوصلـــوا لبيت ريما كانت ام ريما بالاستقبال هي وخواتها هند وندى ومعاهم المبخرة والدخون ويسلمون عليهم
ام ريما:حياكم الله تفضلوا ادخلوا..
هند:حيا الله من جانا
ام نواف:الله يحيك ياهند..
دخلـــوا الصالة وكانت العمة نورة ومرت العم طلال والجدة هيا وهيفاء وبعض صديقات ام ريما في المعلمات الي بالروضة يشتغلون معاها..وصديقات ريما و الجيــــــران جالسين بالصالة ودخلوا الحريم الصالة وسلموا على بعض وجلسوا ام نواف واختها ام سعد..

في غرفة ريما
نوف:ريما ريما جت خالتي ام نواف
ريما:احلفي صدق جت.يمة ياربي قلبي
هنوف:هي واختها ام سعد يعني خالت نواف
ريما: بنات والله خايفة مابي انزل
نوف:صاحية انتي اقول اقعدي وعيني من الله خير
هنوف: حبيبتي اقري لك آيات قرآن اللحين انا ونوف بننزل نسلم على الحريم ونرجع لك دقايق يالغالية
ريما:لاتتركوني لحالي
هنوف:طيب بروح انادي ندى وهيفاء يجون عندك اووكي؟
ريما:اووكي!!
نزلوا البنــــــــات يسلمون ع الحريم وصعــــدوا ندى وهيفاء عند ريما وبعدين صعدوا هنوف ونوف لريما وجلسوا عندها..
: : :
بقسم الرجال كان فية ابو ريما والعم طلال وولدة عبد الرحمن وتركي خال ريما وخالد ولد خالتها هند ..بعد صلاة العشاء جو الرجال وكانوا بسيارتين محمد وفيصل بسيارة ونواف وابوة بسيارة ويوم دخلوا كان تركي وخالد وعبد الرحمن معاهم المبخرة يستقبلونهم
ابو ريما:حيا الله المعرس
نواف:الله يحيك وسلمـــــــوا الرجال على بعض وبعد نص ساعة جاء الشيخ وملك نواف على ريما
الشيخ:على البركة ياولدي..منك المال ومنها العيال
نواف: الله يبارك فيك
ابو نواف راح وضم نواف:الف مبروك ياولدي الف مبروك
نواف:الله يبارك فيك
ابو ريما:الف مبروك ياولدي يانواف..والله الله بريما حطها بعيونك
نواف:لاتوصي ياعمي..
ابو عبد الرحمن وتركي وخالد كلهم يباركون له
محمد:الف مبروك يانواف يعني بتتزوج وتتركني؟
نواف:الله يبارك فيك ماعاش من يتركك ياخوي
فيصل:الشيخ نواف..الف مبروك منك المل ومنها العيال ..ودخلت القفص الذهبي ولا بعدك للحين؟
نواف:ههههههههه الله يبارك فيك يافيصل وعقبالك..تونى ع القفص الذهبي ههههههههه
.................................................. ..........................

عند الحريـــــــــــــم..
ريما كانت بتنزل لهم وجلست تقراء آيات من القرآن علشان تزيل التوتر والبنات وراها..وبعدين عند الحريم طفــــوا اللمبات والأضاءة كلها وصار فيه كبس على ريما وهي تنزل من الدرج ومعاها بوكية ورد جوري احمر ونازل منة سلاسل شكلها خيال وكانت ريما تنزل على اغنيـــــة عبد المجيد عبد الله (اليــــــوم طالع قمــــــر) والمصورة قدامها بس تصورها..

ونزلت والبنات يمشون وراها نوف وهنوف وندى وهيفاء وجلست على الكوشة
ام نواف وام سعد قاموا لها
ام نواف:الف مبروك يالغالية ..ماشاء الله وش الزين يابختك ياولدي يانواف
ريما مدنقة راسها:الله يبارك فيـــــــك خالتي
ام سعد:مبروك ريما ماشاء الله قمر وربي..
ريما:الله يبارك فيك..
وجت خالتها هند:مبروك ريما قلبي ماشاء الله صايرة ملاك وش علية نواف قدامة قمر.
الجدة هيا:مبروك يابنيتي ياريومة والله يسعدك ويهنيك
ريما:الله يبارك فيك

بعد دقايق ام ريما:تغطوا يابنات نواف بيدخل!!
دخل نواف ومعاه ابوة وابو ريما والعم طلال ويوم دخل نواف بوسط الحريم راح للكوشة وكانت ريما ترتجف واضح عليها التوتر..اعجبتة ريما بشكل كانت قمر..وهي مو مصدقة ان نواف جالس جنبها ومبسوطة وذايبة مع ابتسامة العريضة

البنات ماعوا يوم شافوة
هيفاء:ياربي وش ذا رجال ولا ملاك..
ندى:والله ريوم محظوظة الله لايضرها
هنوف:ماشاء الله كل واحد احلى من الثاني
نوف:وش بيطلعون عيالهم ..ماشاء الله

ابوريما صور معاهم هو وعمامها وبعدين طلعوا الرجال..

وام ريما:تفضلوا على العشاء<علشاان ياخذون راحتهم ..
كان العشــــاء بوفية على المسبح روعة شكلة صاير طاولات والكراسي على طرف المسبح والبالونات والليزر والاضاءة

ام ريما وام نواف وام سعد والعمة نورة قعدوا عندهم وبعدين قاموا يتعشون وريما مسكت امها علشان ماتتركها نواف شافها وكان فية الضحكة من حركة ريما بس مسك اعصابة..حس ان ريما خايفة منه ام ريما دنقت على راس ريما وباستة وطلعت..ريما ترتجف والبوكية معاها واضح انها خايفة

نواف:شخبارك ريما؟
ريما بصوت متقطع:تمـ . . .مام
نواف:ماشاء الله ريما طالعة قمر
ريما:عيونك الحلوات
رن جوال نواف..طلع فيصل متعمد يبي يزعجة
نواف طلع جوالة وشاف رقم فيصل:اوووة وش يبي ذا اللزقة فيصل
ريما:ههههه
نواف:ياه ياحلو ضحكتك
ريما استحت ودنقت راسها
نواف ماشاف ريما كانت طول الوقت مدنقة وعيونها بالارض
مد يدة يبي يرفع راسها الا ودخلوا البنات وام نواف وام ريما(دخلوا في موقف محرج)
نواف بصوت قصير:لاحول وش يبون ذولي امداهم خلصوا عشاء
ريما ميتة من الضحك
نواف وهو يبتسم

ام نواف :يالله نواف لبس مرتك الشبكة
واعطتة صندوق مخمل كحلي..وكان طقم الماس
رفعت ريما شعرها ولبسها العقد وريما ترتجف من الخوف الانظار كلها عليها
ولبسها الخاتم والاسوارة وباس يدها

ريما تمنت الارض تنشق وتبلعها.استحت موت ونواف يعجبة حياها..جلسوا شوية
وبعدين نواف قال:يالله ريما انا استئذن..فمان الله
ريما رفعت راسها واول مرة تحط عينها بعينة ..وجلس يطالعها كان ذايب في عيونها كبار وسود ياسلام ريما على طول دنقت راسها من الحيا
نواف:يالله ريما توصين شي
ريما:لا سلامتك..
نواف:فمان الله
ريما:الله يحفظك

طلع نواف وكان فيصل يستقبلة بسيارتة برى البيت..ركب باليسيارة
فيصل:ماشاء الله كان نايم عندها؟
نواف:ياليت والله..
فيصل:الحمد لله شكل الوضع تحسن!!
نواتف:الحمد لله..
فيصل:وش فيك صاير رسمي؟
نواف:مدري احس اني دايخ ونفسي انام امس مانمت
فيصل:الله يهنيك يانواف
نواف:آمين...تسلم يالغالي وعقبالك
فيصل:لا فكنا اللحين خلني انبسط وانا عزابي.تونى على الزواج

: : :
ريما جالسة بالكوشة والبنات عندها
هيفاء:ريما ماشاء الله على نواف فعلاً شيخ ..روعة
ريما:ساكتة وتبتسم لها..تسلمين ياهيوفة
ندى:ههههههههه يعني وش الرسميات..يعني صرتي مرة وكبر كلامك بعد ههههههه
ريما:ههههههههه
هنوف:سبحان اللي يغير ولا يتغير من دقايق كانت تبكي وترتجف من الخوف واللحين تضحك!..
البنات ههههههههههههههه
نوف:خذا رقمك؟
ريما تضايقت:لا
نوف:ايه ماشاء الله عاقل مايحب المكالمات
ريما بينها وبين نفسها(ياليت اكلمة ويكلمني مثل باقي المتزوجين بس آهـ)
ريما:طيب يابنات فكوني منكم روحوا ارقصوا تكفون ..نفسي ارقص بس مستحية وش يقولون عني الحريم انهبلت يوم ملكتها؟
ندى:من عيوني ماطلبتي شي اللحين ارقص واسميها لك ههههههههه
نوف:ريوم بنشغل الستيريو الكبير نبي طقاقات
ريما:اوكي شوفوا سلة اشرطة بغرفتي
هنوف:بروح اجيبها!!
جلسوا البنت يرقصـــون وحالتهم حالة..وجلسوا الى الساعة 2 باليل..نوف وهنوف وندى وهيفاء ناموا اليلة عند ريمـا..اول ماراحوا الحريم..جلسوا البنات بالصالة
ابوريما بنادي ريما..ريما جت عندهـ بالمجلس
راح وباس راسها..
ابوريما:الف مبروك يابنيــتي الله يسعدك ويهنيك..نواف رجال وانا ماعطيته اياك الا اني اعرفة زين ويكفي انة ولد عمك وبيخاف عليك..ريما استحت ودنقت راسها
ريمــــــا:الله يبارك فيك
طلع علبـة واعطاها ريما
ريما:وش ذي يبة؟
ابو ريما:افتحيها..
فتحت ريما وكـــــانت خاتم احجار كريمة كل فصوص
ريما:يا111ي روعة تسلم يبة ..وراحت وباست راسه..الله لايخليني منك ..
ابو ريما:يالله يبة روحي للبنات جالسات يستنونك
ريما:طيب عن اذنك..
ابو ريما طلع فوق يبي يرتاح بعد تعب اليوم

ريما طلعت عند البنات وجلسوا يرتيقون عليها اليوم هي ونواف ويضحكون ويسولفون ماناموا الا الساعة 8 الصبح..بعدمافطــروا على حساب ريما..

: : :
نواف بعد مانزله فيصل دخل البيت الساعة 3 الكل نايم..ودخل غرفتة وكان يفكربجمال ونعومة ريما (والله اني محظوظ ان ريما بتكون من نصيبي ..بس آهـ قلبي ماقدر اذا شفت هنوف يارب انك تصرفني عنها..والله يساعدني اني انسى هنوف واسعد ريما..)

نواف جلس يفكر وبعدين صلى الفجر وراح ينام

: : :

البنات صحوا الساعة 4العصر ونزلوا وتغدوا وجلسوا شوي بعدين فيصل جاء واخذ هنوف ونوف راحت مع هنوف علشان يوصلونها للبيت

وندى وهيفاء جلسوا وبعدين جاءخالد واخذهم ...

ريما جلست لحالها عند التلفزيون وكانت تسمع اغنية اليسا (حبك وجع ) وتذكرت نواف واتذكرت امس ملكتها وانبسطت..

بكرى بتسافر خالة ريما هند وســــوت الجدة هيا عشاءيعني وداعية..

وجلسوا مع بعض سوالف برى بالحديقــــــة
هند:ماشاء الله ياريما زوجك حلو
ريما استحت وماتدري وش تقول
الجدة هيا:بس الاحلى منه بنتي ريما امس تجنن
ريما:تسلمين يايمة
ام ريما:اييه نواف من كان صغير وهو يهبل
ندى:ياهوة البنت استحت وماعت وحالتها حالة!!
هيفاء:شوفوا وجها احمر واخضر واصفر الوان إشارة
ريما قامت من مكانهاودخلت جوا البيت..
هند:احرجتوا البنية حرام عليكم
هيفاء وندى:هههههههههههههههههههه� � ..احسن ليش تتزوج قبلنا
الجدة هيا:اجل لو بتستناكم عز الله بنيتي عنست
ام ريما:ههههههههههههه لا ندو وهيوفة الكل يتمناهم
هيفاء:صح لسانك خالتي هههههههههه
رجعت ريما ومعاها جاتوهات
ندى:اهلاً بالحامل والمحمول
ريما:لابس قولي بالمحمول هههههههههه
ندى:دايماَ ظالمتني

جلسوا يسولفون ويضحكون..وبعدين دخلوا تركي وخالد:السلام عليكم
الحريم:وعليكم السلام
خالد:يالله يمة ترى اللحين موعد الرحلة
ريما:لا ياربي كره لحظات الوداع
هند:يالله يمة هيفاء قومي جيبي العبايات..وانت خالد ركبت الشناط بالسيارة؟
خالد:ايه..
هند قامت من مكانها وراحت باست راس امها:يالله يمة اشوفك على خير
وسلمت عليهم هي وهيفاء وريما تبكي وهيفاء تبكي معاها..راحوا المطار وتركي هو اللي موصلهم..

: : :
.................................................. ........................

االفارس6630
مشاهدة الملف الشخصي
إرسال رسالة خاصة إلى االفارس6630
ابحث عن المزيد من مشاركات االفارس6630
إضافة االفارس6630 لقائمة الأصدقاء

06-09-2006, 08:39 Am رقم المشاركة : 9
االفارس6630
محتــــرف فـــواصل

][احلى ماخلق ربي (قصة سعودية) تستحق القراءه][

--------------------------------------------------------------------------------

: : :

بعد مرور شهر على ملكة نواف وريما..ابد ماشافها ولا شافتة ولاحتى كلمها..وكانت البنات مجتمعات عند هنوف..
وفي غرفة هنوف البنات جالسات يسولفن

هنوف:ريما شخبار نواف؟
ريما:آآآآهـ ياهنوفة تصدقين مابعد الملكة ماشفتة ولاكلمتة..احس انه مايبـــني مغصوب علي
نوف:اقول استكي وش مغصوب الولد يوم الملكة كان ميت من الوناسة مبسوط
هنوف:فيه شخص تكون ريما قابل وجهه ويطفش؟
ريما: تسلمون حبيباتي..بس ماحس اني مخطوبة حالي حال البنات..
هنوف:تبين اقول لفيصل شي يوصلة لنواف؟
ريما بعصبية حادة:لا لا لا هنوف آمانة ماتقولين له ولاكلمة ..
نوف:ايه البنت عندها كبرياء لازم هو يجيها وش بيقول عنها؟
هنوف:مافية كبرياء بين الرجال ومرتة فاهمة ياماما؟
نوف:الا وبعدين كرامتها ماتسمح لها
ريما:خلاص بنات اسكتوا..هنوف وين عبودي مشتاقة له حيل
هنوف:عبودي مع فيصل طلعوا
ريما:آها1111111
نوف:والله اني حبيت هيفاء بنت خالتك ياريومو عسوولة مررة
هنوف:ايه ماشاء الله عليها خفيفة دم ومرحة..ولاتنسين ندوش قلبي اموت عليها
ريما:هههههههههه ايه كلهم روعة..
نوف:نفسي العب بلوت تلعبون معاي؟
هنوف:يالله اروح اجيب ورقة من غرفة فيصل
ريما:ياربي منكم اللحين احنا بنات ولا عيال علشان نلعب بلوت؟
نوف:طيب ولعب الكورة للبنات ولا للعيال
ريما:هاه لا للبنات والعيال سوى مافية فرق الكورة شي مشترك لهم
نوف:طيب حتى البلوت
ريما:بس انا ماعرف العبة..؟
نوف:انا اعرف له وراح اعلمك كيف تلعبين وتصيرين فنانة..

جابت هنوف الورقة وجلست نوف تعلم ريما البلوت وريما كانت مركزة معاها وهي تشرح وبعدين لعبوا اول مرة طلعت ريما برى والمرة الثانية تعلمت وطلعت هنوف برى اللعبة..وبعدين فازت ريما على نوف......

نوف:هههههههههههه علمناهم ع الطرارة سبقونا على الأبواب
ريما:ههههههههه ياحظي والله اني خطيرة وحركات وتحفة وجنان وكل شي
هنوف:اعصابك ريما..ههههههههههههههه
ريما:يالله بنات قوموا نلعب مرة ثانية
هنوف: ياربي منك مرة ثانية خلاص طفشتوني
ريما:مابي بلعب يعني بلعب ..
لعبوا البنات وفازت ريما..وكانت ريما مبسوطة ع الآخر..
العمة نورة: يابنات يالله قوموا العشاء جاهز..
قاموا البنات يتعشون وهم على السفرة بس يضحكون
العمة نورة:اذا حضر الطعام بطل الكلام اسكتوا..!!
نوف:والله ياعمتي ماتحلا السوالف الا اذا شفنا الأكل
ريما:ههههههههه صدق ماننبسط بالسوالف الا عند الاكل

فيصل جاء بيدخل عليهم بالصالة وهم يتعشون ماكان يدري انه عندهم احد
هنوف:وقف وقف وقف ياهوة فية عندنا ناس
فيصل:آسف.... هنوف تعالي ابيك..
هنوف راحت عندة..:خير وش تبي؟
فيصل:من عندنا؟
هنوف:ريما ونوف
فيصل:ريما حرم الاخ نواف بن سعود عندنا يامرحبا يامرحبا
هنوف:هههههههههههههههههههه� �هههههههههههههههههه
فيصل:اقول اقلبي وجهك ..وقولي لأمي بتأخر عندنا مباراة الليلة
هنوف:انت ومين؟<<تبي تعرف نواف معاهم علشان تقول لريما
فيصل:وش دخلك سلام!! وطلع
هنوف تركض وراهـ:تكفى انت ومين
فيصل عصب:انتي وش دخلك.؟
هنوف:هاه بس كذا
فيصل رن جواله وطلع نواف:الو هلا بالشيخ نواف
هنوف انبسطت علشان تسمع المكالمة وتنقلها لريما( كيدهن عظيم)
نواف:هلا بك فصيل اقول متى بتروح للشباب؟
فيصل:اقول نواف توقع من عندنا؟
نواف:مين؟
فيصل:ريــــــــما
نواف:احلف عندكم؟
فيصل:ههههههههههههه وش فيك والله عندنا
نواف:ايه وينك اللحين جالس عندهم؟
فيصل بيقهرة:ايه
نواف:اقول اطلع برى وش جلسك مع البنات ياللي ماتستحي..قوم يالله والا والله الا اجي وادوس في بطنك لاتجلس مع حرمتي
فيصل:هههههههههههههههههههه� �هههههههههههههههههه...مجن ون وربي من زينك انت وحرمتك اجلس معاها..
نواف:حدك يانه راح يجيك كف على وجهك ..تحرم بعدها تتكلم عنها!!
فيصل:هههههههه اقول يالحبيب متى بتطلع للشباب؟
نواف:بعد شوي!
فيصل:حتى انا يالله اشوفك هناك فمان الله..
نواف:فمان الكريم

هنوف:فيصل وش يبي نواف؟
فيصل:بسم الله الرحمن الرحيم انتي بعدك هنا مارحتي؟
هنوف:لا
فيصل:بس بيتطمن انا جالس معاكم ولا لا ؟؟يغار الاخو في الله على حرمتة
هنوف:هههههههههههههههههههه� � يالله بروح للبنات با111ي

البنات جالســـين بالغرفة عند التلفزيون والعمة نورة راحت للمطبخ ..
هنوف وهي طايرة وتركض جت وجلست عند البنات
ريما:بسم الله عليك وش فيك مطيورة؟
نوف:اكيد شافت لها شبح هههههههههه
هنوف: ها ها ها<تعبانة من الركض..لحظة بس ابي القط انفاسي..ريما عندي خبر لك من نواف حلو
ريما:احلفي وشو؟ومش عرفك انتي بالخبر؟
نوف:يمة ريوم اعقلي ..كل هذا علشان حبيب القلب؟
ريما:يالله هنوفة قولي تكلمي..
هنوف قالت لها السالفة ريما وجهها احمر
نوف:ههههههههههههه طالعي وجهها كيف صار كنها طماطه
هنوف:هههههههههههههههههههه� �ههههههههه
ريما:اقول اكرموني بسكوتكم انتي وياها..

حطوا البنات على روتانا خليجية وكانت اغنية ماجد المهندس واحشنـي موت
ريما بصوت عالي:اتركوها تكفون ابي اسمعها
هنوف:شوي شوي ريوم اعصابك
نوف:طيب بس اثقلي انتي

(والله واحشني موت خاف بعدك اموت... قلبي لو من حديد ذاب وانت بعيــد

لو خسرتك حبيبي شلون احب من جديد؟.. وين القا وفاك..او احس بدفك)

ريما منسجمة مع الاغنية..ويوووم خلصت
نوف:هنوف ماعندكم شموع البنت دخلت جو رومانسي ههههههههه
هنوف:راح اجيب شمـــــوع بس مايكمل الجو الرومانسي الا بالغالي
ريما:يوووووووة ياسخفكم انتم وكلامكم
نوف:ههههههههههههههههههههه� �ههههههههه

جاء العم طلال واخذ نوف الساعة 11 ونص ويوم جت الساعة 12 جاء السواق واخذ ريما..

جت ريما للبيت بدلت ملابسها ونزلت لأهلها وجلست بالصالة عند امها وابوها وجلست سوالف هي وامها ..ويوم جت الساعة 1 طلع ابوها ينام هو وامها

رن جوال ريما وطلعت صديقتها رشا
رشا:هالو ريوم
ريما:هلا وغلا برشا
رشا:وينك يالقاطعة يعني يوم انخطبتي تكبرتي علينا؟
ريما:هههههههه لاحرام عليك بس مشاغل والله

وجلسوا ساعتين وهم يسولفون وبعدها سكرت الخط وراحت تنام..

: : :

الساعة 3 العصر قام نواف من النوم وجلس مع أمه اللي كانت لحالها بالصالة
نواف:صباح الخير يمة
ام نواف: طالع الساعة زين..أي صباح الا قول مساء
نواف:ههههههه ولاتزعل الغالية مساء الخير
ام نواف: اقول نواف من متى ماشفت ريما او كلمتها؟
نواف بكل برود:اممممممممم آخر شي يوم الملكة..
ام نواف تشهق: اهــــــــــــئ يوم الملكة..قوم قوم روح تضبط وبسرعة روح لبيت عمك وقابلها..وش بيقولون عمامك علينا؟والبينة ريما المفروض تشوفها كل اسبوعين على الاقل عيب عليك..والله فشلتنا قدامهم..
نواف:يمة وش اروح الله يهداك ..طيب تعالي معاي!!
ام نواف: ياسلام وش دخلني انا اللي خاطب ولا انت؟
نواف :خلاص يمة اللي تامرين فيه بتصل على عمي فهد واستئذن منه اني اقابل ريما هاه وش تبين بعد؟
ام نواف: ايه خوش كلام..يالله روح كلم عمك..

كلم عمه ابو ريما وفاتحة بالموضوع والعم رحب فية وقال ان هذا حقة وافق عمة وقاله انه راح يزورهم بعد المغرب..

ابو ريما كان في شركتة العصر واتصل على ام ريما وقالها علشان تخبر ريما..ريما طبعاً للحين نايمة..

وقامت على صراخ امها..
ام ريما: قومي ريما بسرعة
ريما في عيونها النوم: يمة تكفين مانمت زين اتركيني بس شوي
ام ريما:عندي لك مفاجأة..
ريما وهي دايخة:خير وش ذي المفاجأة؟
ام ريما: نواف راح يزورنا اليوم يبي يشوفك
ريما قمزت من السرير وراحت عند امها: صدق يمة متى؟الساعة كم؟
ام ريما:ههههههههههههه ياليت نواف كل يوم يجي اذا بتصحين بالسرعة ذي
ريما تفشلت واستحت ولا تدري وش تقول
ام ريما: بيجي بعد المغرب يالله جهزي حالك..

ريما ارتبكت ولاتدري وش تسوي..راحت اخذت شاور وزينـــــت شعرها.. وجهزت لبسها...لبست تنورة سوداء مرسوم عليها ورد ابيض كبير وبلوزة بيضاء على الجسم فيها بروش اســود على شكل وردة كله كرستالات.. وصندل وانتوا بكرامة مخمل اسود وفية بالوسط كريستالات بيضاويات الشكل كلها فصوص تلمع وفلت شعرها كان ناعم وحلو ..وحطت كحل داخل العين وجلوس وبلاشر بلون الخوخ ..ولبست حلق كرستالة سوداء تلمع كبيرة شكلها خطير ورشت عطر (ستيــــلا) وتبخرت ونزلت تحت

نواف كان لابس ثوب وغترة وركب سيارتة بعد صلاة المغرب على طول ومر محلات الورد احتار مايدري وش يختار لها نوع وتذكر انها بيوم الملكة ماسكة ورد جوري ..يعني اكيد تحب الجوري..(ماشاء الله متذكر كل شيء بيوم الملكة <نصاب) واخذ بوكية ورد جوري احمر شكلة حلو ومرتب وبعدين راح لبيت ريما واول ماوصل الباب طق الباب فتحت الشغالة وريما كانت واقفة برى بالحوش تستناه ويوم شافها ابستم لها ابتسامة تذوب الضخر ماعت البنت0000

نواف:مساء الخير..
ريما بصوت واطي:مساء النور..تفضل

ودخلوا بالمجلس كان المجلس كبير ولونة بني واصفر روعة000 الكنبات وحدة بينة وفيها نقشات هندية بالأصفر وكنبة الثانية صفراء وفيها نقشات بينة..وبالوسط طاولة قزاز وفيها تحف

نواف اعطى ريما البوكية الورد
نواف:والله احترت مدري وش أخذ لك نوع بس حسيت انك تحبين الجوري..
ريما:صحيح انا احب نوع عندي الجوري..حتى في مزرعتنا زرعت ورد جوري بجميع الالوان
نواف:صدق..ماشاء الله ذويقة يعني..
ريما استحت..
نواف:اعذريني ياريما والله مشغول هذي الايام ولاقدرت اجيكم..
ريما:لا معليش معذور..
نواف:امس كنتي عند عمتي نورة؟
ريما مندهشة كيف عرف نست ان فيصل قاله:هاه وش عرفك؟
نواف:ههههههههه لابس قلبي يقولي..
ريما دنقت راسها وتذكرت ان فيصل هو الي قالة
ريما:نواف
نواف:عيونة<طلعت منه من غير مايدري
ريما استحت:وش صار على مباراتكم امس فزتوا؟
نواف مطير عيونه وهو مندهش:وش عرفك
نواف:ايه فزنا الحمد لله 2/0
ريما:مبروك
نواف وهو يبتسم:الله يبارك فيك
ريما تخبلت على ابتسامته
جت ام ريما دخلت عليهم وسلمت على نواف وجابت القهوة وريما قامت تقهويهم وماطولت ام ريما على طول طلعت..ريما وهي تعطي نواف سلة الحلويات..تفضل
نواف:لا بس مشكورة
ريما:علشاني خذ لو وحدة
نواف:علشانك بس ان بغيتي اخذ السلة كلها
ريما استحت وابستمت له
نواف انجن على ابستامتها وعلى نظراتها له..عيونها خطيرة
ريما جت وجلست بعيد عنه
نواف:يالله انا استئذن
ريما:وين تو الناس؟
نواف:هههههه يعني تبيني اجلس بعد؟
ريما استحت وهزت راسها يعني ايه
مسك راسها وقال والله ياريما عندي مشاغل
ريما عصبت منه( وانا ماني من مشاغلك ولأ آخر شي تفكر فيه ريما)
ريما راحت وصلته عند الباب
نواف:مع السلامة
ريما:مع السلامة سكرت الباب وهو يبتسم لها

راحت ريما وبدلت ملابسها..وجلست على النت كانت فيه ندى على الماسنجر وجلست تقولها وش صار معاها هي ونواف..وانها طايرة من الفرحة وندى تضحـــــك عليها11111111111

: : :
.................................................. .............

بسم الله الرحمن الرحيم

الجزء الثامن

الفصل الثاني

: : :

جت الدراســـــة ..وريما كانت بثالث ثانوي وفي يوم من الايام دخلت الفصل كانت جنبها صديقتهارشا وكانوا صديقتها خلود واسماء ومشاعل ..

يتريقون على ريما صديقاتها على خطبتها وملكتها وانها بتتزوج..وريما تضحك عليهم وتعصب منهم بنفس الوقت..ريما محبوبة عند صديقاتها

رشا:انا اتمنى اشوف نواف هذا الي جننتينا فيهـ؟
اسماء:تكفين ريوم جيبي صورتة
خلود:ايه ايه تكفين
مشاعل:لا ريومة لاتجيبين صورتة بكرى يخطفونه منك ههههههههه
ريما: لاوالله ماني غبية علشان اجيب صورته لكن..اذا حجت البقر على قرونها اجيب لكم الصورة ههههههههههههه
خلود:اساساً ولد وخاطب وش نبي فية؟ وخاطب ريما يعني ام لسان طويل
مشاعل:هههههههههههههههه
رشا:ياويلك منها..اللحين هي تغار اذا بس قلنا اسمه كيف لما نشوفة
ريما:هههههههههههههههههههه� �

صديقاتها ميتات على مايشوفون نواف..
: :

ريما رجعت من المدرسة تغدت ونامت ...وماقامت الا الساعة 3 العصر..نزلت بالحديقة العصر الا وامها جالسة بالكراسي وتشرب شاي..جت ريما وجلست عندها

ريما :السلام عليكم
ام ريما:وعليكم السلام
ام ريما: بكرى الاربعاء وش رايك نقول لحريم عمامك وعمتك نورة يجوننا
ريما:ايه صح من زمان عنهم..ياليت والله..
ام ريما:خلاص اجل باروح اتصل عليهم واقولهم..علشان مايرتبطون..
ريما:زين

ريما صعدت غرفتها وجلست تذاكر ..ورن المنبة اللي في جوالها...وكان موعد امسية لحامد زيد على احد القنوات ونزلت ريما تركض على الدرج ونطت على الكنبة اللي قبال التلفزيون وكانت منسجمة معاهـ..من قصيدة السفينة الى قصيدة اخذيني مابيني وكل قصايدة..

واليوم الي بعدهـ ..راحت ريما تلبس علشان بعد شوي بيجون الحريم ولازم تكشخ عند خالتها ام نواف لبست بنطولون جينز ازرق وبلوزة فوشي موديلها صيني وفيها الازرار الصينية لونها ذهبي ولفت شعرها بالاعواد الصينية اللي تنحط بالشعر شكلها مررة كيوت وحطت كحلة لونها ازرق فيها لمعة وروج زهري..وتعطرت ونزلت

كانت تستنى الحريم وجوا الحريم واول ماشافت ام نواف ريما ..راحت وحضنتها بقوة وسلمت عليها بحرارة..ودخلوا المجلس وجلسوا ....عبودي ومها جلسوا عند الحريم
عبودي:ماما نفثي الوح للملاهي فانتذي لاند بالثمامة(نفسي اروح للملاهي فانتزي لاند بالثمامة)
مها:ماما وانا بعد بلوح ياحياتي ..من ذمان ماتلعنا ملاهي بليييذ(وانا بعد بروح ياحياتي من زمان ماطلعنا ملاهي بلييييز)
ريما كسروا خاطرها :بنات وش رايكم نروح فانتزي لاند؟نلعب البزارين ونتمشى ونغير جو؟
نوف:والله فكرة ياليت..
هنوف:هههههههههههاي مين بيسمح لكم اقول احلموا حبايبي..
ريما وقفت عند الحريم تحاكيهم: اقول ممكن نروح نودي مها وعبودي مرة لفانتزي لاند انا والبنات؟ياحياتي شكلهم طفشانين حيل!!
العمة نورة:بس ماتروحون لحالكم مع السواق احنا ليل والثمامة بعيدة شوي
نوف:لا عادي عمتي دايم نروح تكفين.....
هنوف:والله من زمان مارحنا لها تكفون زهقنا طفشنا
ام ريما:صح كلام عمتك نورة مافية روحة مع السواق
عبودي:تيب بنكلم فيثل يودينا(طيب بنكلم فيصل يودينا)
هنوف: مافية امل فيصل مايودي ولايجيب ...
مها:نواف هو مله يحبني انا وعبودي ومايلفذ أي ثي ابيه ابي اكلمة اعتيني دوالك ماما(نواف هو مله يحبني انا وعبودي ومايرفض اي شي ابيه ابي اكلمة اعطيني جوالك ماما)
ريما :بنات اذا نواف بيودينا ماراح اروح مستحية منه
نوف:اقول فكينا انتي ونوافك ذا اللحين خلية يوافق
كلمت مها من جوال ام نواف على نواف..كان مبسوط نواف على مها وعبودي ويحبهم بالمرة ومدلعهم آخر دلع ولايهاوشهم ويلعب معاهم..طبعــــــاً نواف وافق انه بيوديهم فانتزي لاند..اخذت السماعة ام نواف منها وكلمتة
ام نواف:هلا نواف صدق راح توديهم؟
نواف:عبودي ومهاوي يامرون آمر
ام نواف:بس مو هم لحالهم اللي بيروحون فيه ناس بيروحون وياهم
ريما كانت تأشر لخالتها يعني انها خلاص ماراح تروح غيرت رايها ام نواف ابتسمت لها

نواف:الوو مين بيروح؟
ام نواف:ريما ونوف وهنوف
نواف (يالله هنوف؟):ايه خلاص دقايق واكون عندكم خليهم يتجهزون..
ام نواف:ابشر من عيوني..مع السلامة
نواف:مع السلامة

ريما:خلاص انا ماراح اروح.
ام نواف:ليش انا قلت لنواف خلاص
ريما:اول بروح علشان مها وعبودي مامعهم احد بس اللحين نواف معاهم مالي داعي
ام نواف:كيف مالك داعي ونواف ؟
ريما استحت وسكتت..
عبودي:ليما لازم تلوح معانا ولا خلاث انا اذعل (ليما لازم تروح معانا ولاخلاص انا ازعل)
العمة نورة:وانتي هنوف ونوف بتروحون؟
هنوف ونوف:ان شاء الله
ريما:اساساً اذا مارحوا انا ماراح اروح..

جــــــاء نواف وطلعوا مها وعبودي وركبوا قدام وريما ونوف وهنوف وراء..
البنات:السلام عليكم..
نواف: وعليكم السلام..
مها: عبودي خلينا نلدع ورا ليما لاذم تلكب قدام عند نواف علثانه ذوداها(عبودي خيلنا نرجع وراء ريما لازم تركب قدام عند نواف علشانه زوجها)
ريما تخبصت وارتبكت وجهها تلون احمر واصفر واخضر
نواف:هههههههههه ماشاء الله عليك يامهوية تعرفين ان ريما زوجتي
ريما تفشلت وتمنت انها ماراحت
عبودي:ليما معليث نلكب قدام ؟؟(ريما معليش نركب قدام ؟؟)
ريما خلاص ماتت من الفشيلة شوي ولا بتصيح..
هنوف هاوشتهم:خلاص مها عبودي اسكتوا
نواف:هههههههههههه ماقالوا الا الصدق وش فيك سكتيهم
ريما مسكت يد هنوف وجلست تضغط عليها بقوة وهي مفتشلة..

وصلـــــوا عند بوابة فانتزي لاند ومها وعبودي يصارخون وحالتهم حالة فرحانين وينقزون ونواف يضحك عليهم

..راح نواف يبي يقص تذاكر
الامن منعوة وقالوا له ممنوع دخول الشباب لحالهم..نواف يقول ماني لحالي معاي عائله
الامن يقول لازم ينزل معاك ولو حرمة وحدة..نواف راح وفتح الباب ونادى ريما
نواف:ريما تعالي
ريما ميتة من الخوف:خير وش تبي؟
نواف:يقولون ممنوع دخول الشباب لازم عوايل ..تعالي بالله معاي علشان يصدقون بنقص تذاكر
ريما استحت يوم قالها:طيب يالله
وصلوا وقصوا تذاكر

وراحت ريما تتصل على الهنوف ونوف تقولهم ينزلون..نواف جالس يطالع ريما تعحبة عيونها الكبار مها جت تركض ومسكت يد نواف وعبودي مسك يده بعد... نواف جلس يلعبهم بالعاب الاطفال.....
هنوف:ريما ابي اروح العب يالله
نوف:اسمعوا بنات نبي نلعب السفينة هذي شكلها خطير!!
ريما:ههههه انا ماراح العب..اخاف من الالعاب ابي اجلس واضحك عليكم..
هنوف:اييه ياسخيفة قولي ابي اجلس عند الغالي
ريما:اسكتي لايسمعك تكفين
نوف:ههههههههه يالله خلينا نلعب..

راحوا هنوف ونوف يلعبون ..ريما راحت تــلعَب مها الصغيرونة بالالعاب ونواف يلَعب عبودي..

نواف:ريما وين البنات؟
ريما:يلعبون..
نواف:طيب ليش ماتلعبين معاهم؟
ريما استحت لاتقول انها تخاف من الألعاب:هاه لابس ابي الَعب مها.
نواف:لا اذا كان نفسك تلعبين انا امسك مها وعبودي..وانتي روحي معاهم!!
ريما ماتدري وش تقول ارتبكت:لا انا ماحب العب ..

جوا نوف وهنوف يضحكون وهم يسولفون
هنوف:فاتك ريما وناسة اللعبة تكفين خلينا نلعبها كلنا مرة ثانية
نوف:ههههههه والله ماتخوف
هنوف: ايه جبانة هذي تخاف من أي شي ..
نوف:والله هذي عبودي ومها يلعبونها مافيها خوف

نواف اللي كان يسمعهم وعرف ان ريما تخاف من الالعاب
ريما:وطي صوتك فشلتيني..جلست تطالع بنواف وطاحت عينها بعينة وكان يبتسم لها..ريما دنقت راسها تفشلت

نواف: بنات اتركوها براحتها ريما ماتحب تلعب
هنوف ونوف ضربوها: ياولد ياحركات يدافع عنك!!والله مانتي بهينة ياريوم
نوف:اقول هنوف يالله خلينا نروح نلَعب مها وعبودي شكلهم جننوا نواف
هنوف:ايه وانتي الصادقة
ريما:لاتتركوني لحالي معاهـ تكفون...
نوف:ليش ماراح ياكلك ههههههههههههههه
هنوف:ههههههههههههههه

اخذوا هنوف ونوف اخوانهم الصغار.. والبنات الموجودات بالفانتزي لاند بس يطالعون نواف كان وسيم ولابس البنطلون الأسود والفانيلة البيضاء ..والبنات بس يمشون وراهـ ويعطونه نظرات هو مدنق راسه ولا يحب هذي الحركات ..(عا11111111قل)
ريما عصبت من نظرات البنات له وتضايقت نواف حس فيها..
نواف مسك يد ريما (الي استحت وابعدت يدها على طول)
رجع نواف ومسك يدها
نواف:ريما تعالي للمحل هذا
كان محل كبيريبيع ورد بجميع الوانة وانواعة وفيها بطاقات شعر وقصايد
ريما يوم دخلوا للمحل جلست تشوف للورد الجوري وتدور بالقصايد
نواف: وش رايك بالجوري؟
ريما: ياسلام احب نوع عندي..نواف طالع ذي الوردة لونها روعة(مسكت وردة كبيرة لونها حمر مرررة )
نواف:الوردة حلو بس انتي احلا منها
ريما دنقت راسها واستحت ولاقالت شيء
نواف راح للعامل الي بالمحل وطلب يرتب له باقة ورد جوري احمر..
ريما رن جوالها طلعت نوف..
نوف:وينكم ياعصافير الحب؟
ريما:ههههههه انتي اللي وينك؟
نوف:والله خلصنا لعبنا البزارين واللحين ندوركم!!
ريما:يالله اللحين بنطلع لكم خلوكم عند البوابة اووكي؟
نوف:اووكي بس لاتطولون..

ريما وقفت برى المحل تستنى نواف ..طلع نواف ومعاه بوكية ورد كبير لونه احمر
نواف مد البوكية لريما:الجــــوري للجــــــــوري
ريما بكل خجل:تسلم لي يانواف..
نواف:يالله ريما وين البنات؟
ريما:ايه صحيح يستنونا برى عند البوابة..
نواف:ههههههه وش رايك نروح نتمشى شوي بالفانتزي لاند ونتركهم
ريما:ههههههههههههه لا بس حرام معاهم عبودي ومهوية وحرام يطولون بالوقفة
نواف:صح والله مايستاهلون

طلعــــوا نواف وريما ولقوا البنات
هنوف ونوف طيروا عيونهم بالوكية
نوف: ياسلام الرومانسية متوفرة عندهم
هنوف:شوفي كيف يطالع ريما تقولنا بعد مايحبها
نوف:الله يوفقهم...ريما تستاهل كل خير!!
هنوف:آمين وانتي الصادقة نواف يستاهل ريما وريما تستاهل نواف

ريما جتهم.... وهمست نوف في اذنها:وش ذي الحركات
ريما قرصت يد نوف:اسكتي بعدين اقولك

ريما:نواف لحظة ابي اشتري شعر البنات وفشار لمها وعبودي يحبونه
مها:ايه تح ليما دايماً تثتلي لنا ثعل البنات(ايه صح ريما دايماً تشتري لنا شعر البنات)
نواف:هههه طيب يالله ..راحت شرت لريما وعبودي

ركبوا السيارة البنات وراء والبزارين قدام..
نواف كا مشغل اغنية لراشد الماجد(حبيـبتي ماني معلم بسمها حلفتيني ماعلم بسمها..واسمحت لي بس اوصف حسنها..اخاف يدري خالها او عمها..)
نوف ضربت ريما:ترى يقصدك
ريما:اسكتي بالله ودنقت راسها

وبعدين طول صوت المسجل لما جاء المقطع الي يقول( اذكر في مرة اعطيتها ورد وزهور ..جت تشمـــه ذاب فيها وشمـــــاها)ويطالع لريما ويبتسم لها..

ريما خلاص ذابت وجهها صاير احمر ولاتكلمت ابد..

طول الطريـــــــــــق عبودي ومها بس يتكلمون مع نواف..ونوف وهنوف دايماً يهاوشونــــــهم علشان يسكتون ...ونواف يضحك عليهم... وريما ساكتة ماقد قالت ولاكلمة..

وصلهم للبيت..
عبودي ومها:مع الثلامة نواف..وثكراً علثانك وديتنا (مع السلامة نواف..وشكراً علشانك وديتنا)
نواف:انتم آمروني ..اذا تبون أي شي قولوا لي..
عبودي ومها:احنا نحبك هالقــــــــــــد ومدوا يدينهم
نواف:ههههههههههههه..اعطوني بوسة قبل لاتروحون
وباسهم ودخلوا
ريما:مع السلامة نواف
نواف:مع السلامة ..وتصبحين على خير..
ريما:وانت من اهله
جلس يبتسم لها ريما ذابت عند ابتسامتة..

رجعوا البنات وجلسوا مع الحريم هنوف ونوف نشبوا في حلق ريما علشان تقولهم وش صار معاها بالتفصيل الممل....وبعدين وتعشوا وام نواف بس تسأل ريما عن نواف وريما وجهها احمر والحريم يضحكون عليها.. بعدين راحـــــــوا الساعة 12 ونص للبيوتهم..

: : :

توقعاتكم يالغاليـــــــــات

1/ياترى نواف بيتغيــــــر علىريما؟ او خلاص سكنـــــت قلبه؟

2/ريمـــــا بتكلم نواف؟او نواف راح يبداء يكلمها؟
.................................................. ......................