اسهل شي الطلاق ...

<div>

السلام عليكم حبيباتي



بدون مقدمات انا ماني متزوجه لكن حبيت اناقش بموضوع يخص المتزوجين

لاحظت اكثر المواضيع الي قريتها ان بعض العضوات الله يستر عليهم لما يكتبون مشاكلهم لازم يذكرون الطلاق في الموضوع ويطلبون النصيحه من البنات في سالفة الطلاق على سبيل المثال وحده تقول انا بطلب الطلاق شرايكم؟ او تكتب انا خلاص ماعاد اتحمل وبطلب الطلاق بشنو تنصحوني...

لهالدرجه الطلاق صار اسهل من شرب الماي؟ وان البنت في مجتمعنا ما عادت تخوفها كلمة مطلقه ..

اهي الكلمه مو عيب ولا حرام بالعكس ابغض (الحـــــلال) عند الله هو الطلاق ..

وموضوعي كلش ما في اهانه للمرأه المطلقه بالعكس المطلقات على عيني وراسي والله يوفقهم ويرزقهم باللي يقدرهم ويحبهم

ولـــــكــــــن

اتكلم عن البنات الي يتسرعون وبكل مشكله تييب سيرة الطلاق وتحط كل تفكيرها ان الطلاق اهو الصح لها وهي ماتدري انها تعالج الغلط بالغلط كلنا تصير عندنا مشاكل وصح ضغوطات الحياه ونحس ان مافي ولا حل عندنا غير اصعبها ونضطر ان احنا نسوي هالشي غصب عنا

بــــــــــس لازم نفكر مانهدم حياتنا بإيدنا

يعني ما اتيي وحده تزوجت وعقب شهر ولا اثنين اكتشفت ان ريلها يكلم بنات او يواعد وتقلب الدنيا

حبيبتي اذا كنتي زواج عن طريق الاهل يعني لا تستغربين هذا حال اي شاب معظم الشباب يكلمون بنات اذا مو كلهم واكيد هالشي يضايقج وانا لو مكانج بتضايق بس مو معناها من اول مره على طول تنسحبين

للعلم المرأه بيدها مفتاح تحبب فيها ريلها وتقربه منها وبيدها تقدر تكرهه فيها المسأله بس محتاجه شوية تفكير وصبر حببيه فيج تقربي منه درسي افكاره اطباعه شوفي شنو يحب شنو ما يحب عرفي شلون تقنعينه الاخوان المصريين يقولون (ابنك على ما تربيه , و قوزك على ماتعوديه)

يعني خليه يتعود عليج الرجل طفل ربيه انتي وعوديه عليج خليه يحبج خليه يحترمج خليه مايشوف غير انتي وبس وما ينطق بس اسمج يا قلبي..

ونجي لموقف ثاني والاغلبيه يعانون منها الا وهي الحموات ووجود الجنه معاهم بالبيت وتكون الزوجه مشكلتها الوحيده هي (اهل ريلي) وتقول الطلاق الطلاق مافي حل ثاني طيب حبيبتي انتي لازم تعرفين شي .. حسبالج اذا قلتي الطلاق ريلج بيهد اهله عشانج؟ هذيله اهله مستحيل يهدهم لو كانت بينكم عشرة سنين .. انتي بنفسج تخلين مكانج وتروحين وتبين الطلاق وحزة الحزه تبجين وتقولين انا هدمت بيتي وتطلقت ولا ريلي تزوج علي ..

طيب انتي فكرتي تكسبين اهله بدال لا تطلقين ؟ فكرتي تكسبين ريلج وتخليج معاه يا دهينه لا تنكتين عشان يقولون مايقدر يهدها .. حتى لو ما تحبينهم مثــــلي انج تحبينهم مو عشانج منافقه لا عشان بيتج وريلج وحياتج يقولون لجل عين تكرم مدينه عشان ريلج وبيتج حبيهم اخذيهم على قد عقلهم لو هم صج ما ينطاقون لو لهم مبادئ معينه حاولي تجربين تسوين مثلهم تاخذين برايهم حببيبهم فيج على قولتهم خلج داهيه وخلي كل الامور من صالحج انتي بدال هدام بيتج وتشتيت عيالج..

ابسط مثال يمكن تستخفون فيه بس على الاقل مثال من الواقع الي يشوف مسلسل حريم السلطان .. شفتوا هويام شلون كسبت قلب السلطان برغم انه من قوانينهم انه لازم تصير خلوه للسلطان وهالشي مباح عندهم ومع ذلك ما استلسمت وكسبته وخلته يرفض اي بنت غيرها وتحملت هذا واهي ريلها كان اعتذر عاللفظ يلمس غيرها مو الي عندنا يكلمون واتس اب ولا فونات .......

المرأه معروفه بالصبر والتحمل تحملي كل شي ولا انج تهدمين بيتج او تشتتين عيالج وتبعدين عن ريلج ....

انا ادري طولت بكلامي بس شي محزن لما اشوف ان بنات الخليج خصوصآ بنات ديرتي على اول مشكله في زواجهم ذكروا الطلاق ..


وسامحوني ان قلت او اسئت لآي احد بدون قصد