زوجي يخوني لكن شوفوا مع منو

السلام عليكم


ماصار لي سنة من تزوجت

من وانا عروس الرجال يتطنز علي و يعاير و مايعجبه شي من ليلتي
و انا يذمني مع اني و لله الحمد موناقصني شي.و جميله بنظر الكل
لكن الحمدلله ع كل حال هذا النصيب

حاولت اتعايش معاه قلت يمكن اسلوبه دفش
لكن يعذرب فيني كل شي لا كشخت يقول ويععع شوفي وجهج
ولا شوفي شكلج

يكره اني اكشخ له و بس يهزئ بدون سبب و لاتقولون يحب المبهذله
صرت طبيعيه لامكياج ولا كشخه هم يتطنز يعني ماكو حل

قعدت فترة اتحمل تجريحه و ليت يكون الي يقوله شي صج موجود فيني
لدرجة مرات اقوم ع اني اروح المطبخ اجيب له شي و ابجي و اطلعله كأن ماجرحني

جتني فترة شكيت انه ع علاقه لانه وضعه موطبيعي من تزوجنا مايطيقني
ولا حسسني اني عروس لا بحجي حلو ولا تصرفات ولا مطاعم ولا طلعات ولا سفر عايشين جنه اخوان

مرات اشوفه يبطل الوتس اب و يذوووب بعالم ثاني و كذا مرة لمحت رموز بوسات و قلوب و تعوذت من ابليس مابي اظلمه
و قلت حتى لو بعدها نزوة و بيتوب مرده لمرته

بس الوضع تأزم العشر دقايق الي كان يقعد فيهم بالشقه ياكل صارت دقيقتين و بدون اكل ولا شرب فقط ركضه تبديل و طلعه
بدون سلام ولا نظرة حتى

الشيطان لعب براسي و كم مرة ابي افتش جهازه اخاف و مابي انصدم بشي جايد و طبعا دايم مقفول فمستبعده ابطله
بس في يوم و هو نايم كنت ببوق جهازه و اقعد بالصاله افتشه بس هم ترددت جان استخير بالموضوع و تعوذت من ابليس و نمت
و الصبح و انا اسوي ريوقه مادري شنو الي خلاني فجأه احذف الي بيدي و اركض ابطل جهازه و والله ماكنت اعرف القفل شنهو فجأة خمنته و من ثاني مرة فتح!!
قولوا مسكونة مخاويه اشلون بطلته مادري
المهم ليتني ماشفت

كان متواعدين يسافرون ابنفس اليوم الي شفت فيه المحادثه و تقترح عليه فنادق للدعاره استغفرالله تبي يسكنونها
و طبعا انا ممنوع علي السفر و يسافر من وراي كذا مرة لما اكون عند اهلي و طلع كل سفراته معاها

غير سالفة السفر في حجي وااااجد يشيب الراس

المهم

واجهته و انكر و حلف بعد ان ماعنده هالسوالف و ان انا شكاكه و اتوهم

و واجهته برسايله خذاني بالصراخ و بكلمتهم المعتاده رجال شايل عيبي ليش تفتشين

و من ضمن رسايلها تطلبه بنص الليل يطلعها و هي من اسمها الي طلعته من رقمها انها بنت حموله
شككت بالوضع انها ممكن تكون زوجته بالسر من قبلي او مسيار المهم جتني الف فكرة و فكرة

بحثت عنها و عرفت انها متزوجة و على ذمة زوجها للحين و ام عيال و محااااميه للاسف الشديد
و الصدمة الاكبر تتعامل بالسحر و هو موقادر يتركها يحاول بس حده كم ساعه
و من زود وقاحتها عندها رقمي و تجاكرني بالتوبكاتو كل ما احط شي ردت علي بتوبك و كل ماصار مرضوع بيني و بينه تقتبس من احداث حياتنا لتوبكها
انسانة مريضة تعتقد انا اخذته منها مو هي خذهه مني
و حاولت معاه افتح صفحة جديده ع كثر ماجرحني بس ماكو فايده

انا حاليا ناطرة الطلاق و للحين نقاشات مع اهالينا

لكن من رايكم لو ارجع بيتغير شي !!
علما اني كل شي حاولته لدرجة عقب مواجهتي بخيانته تناسيت و صرت عسل معاه بس رد لطبعه
ولاتقولون اكيد مقصرة و راح لها انا من تزوجته و هو معاها و علاقتهم قديمة من سنين لدرجة صباحية عرسي طلع الصبح قال عندي دوام و هو ماعنده بس عشان يحسسني اني ولا شي و يثبتلها الزواج ماغيره



شوروا علي انا ضايعه ابي الطلاق بس انا حامل و ع كثر عيوبه احس قلبه طيب و يمكن الي يصير مو بيده من سحرها
الي مضيعني ان طول ماهي موجوده ماقدر اضمن حياتي اعيش عذاب بسبتها


ادعوا لي الصدمة الي عشتها موطبيعية تحملتها شهور عشان امسك اثبات اواجهه فيه
الله يفرج لي و يفرج لكم
ابي مقترحاتكم لحل معاها علما انها اخلاقها متدنية و محاميه ممكن تدبسني بقضية من مخها لا تعرضت له