وفاه شهاده الحقوق في الكويت ,, عندي حقوق و ابي ادرس هندسه بالاستراليه ( نصايحكم )؟

خريجه علمي ثانويه عامه عام 2005 ونسبتي كانت 87,7% علـــمي

دخلتني كليه احلامي الحمدلله ( الحقوق ) لدراستها والحمدلله وفقت فيها وتخرجت منها بمعدل 80,8 %
جيد جدا ( لان الحقوق نظام سنوات - فالمعدل مئوي )بعد دراسه اربع سنوات ( ما تاخرت الحمدلله )

لكن انصدمت بعدها بالواقع المرير لشهاده الحقوق اللي اعتبرتها شهاده متوفاه ووافتها الاجل من زمان

( النيابه العامه - التحقيقات : لازم انتي واسطتج )

( البترول - ديوان المحاسبه - الهيئه العامه للصناعه ,, الخ : يبون واحد ولا اثنين فقطط )

اكتشفت ان ديرتنا تبي ثلاث تخصصات فقط ( يا تكونين عسكريه او مدرسه او مهندسه او تشتغلين عند المكان اللي تحبه قلوبنا النفط : مكان ناس وناس ونحط فيه اهلنا وربعنا بس)

فقررت و كلي اسف اني اتخلى عن شهادتي اللي احبها عشان شهاده اعيش فيها بهالديره

ضحكت صج عالمعلومه ( روح التخصص اللي تحبه ) طلعت جذبه
لان بديرتنا لازم تصير ( روح للتخصص اللي يخليك تعيش هني ) وهذي الحقيقه

بتقولون ليش تهدين شهادتج الحقوق عشان الهندسه بالذات , وبذكرلكم شويه من اسبابي :

1- راتب المهندسه بالمبتدئه ( بدون خبره ) حاليا مع البدلات 1375 ,, وراتبي ك باحثه قانونيه ( ترى مو مبتدئ : خبره سنتين وتغير مسماي من باحثه قانونيه مبتدئ الى باحث قانونيه ) 955
الفرق 400 دينار
2- المهندسه افضل من راتب المدرسه + انها ما تداوم , بينما المدرسه ملزومه تداوم ( اذا بتقولون لي صيري مدرسه يعني )
3-اللي راح اقطه بالاستراليه شهريا 400 دينار لمده اربع سنين , وهال400 راح تردلي بالاربع سنين اللي بعدها لما اكون مهندسه مبتدئ وراتبي من 955 يصير 1375 ( قفزه ما حلم فيها ب شهاده الحقوق )
4- الاستراليه اسهل من جامعه الكويت ,, لان الهندسه التكنولوجيه اسهل من الهندسه الاكاديميه
بس بالاول والاخير قاعدين نتكلم عن ديرتنا ,, ف الكويت ما تفرق بين هندسه تكنولوجيه ولا هندسه اكاديميه ,, كلهم مهندسين وكلهم ياخذون كادر المهندسيين ,, نفس عندنا مافرقوا بين تخصص الحقوق و اصول فقه بالشريعه حطتنا كلنا باحثيين قانونيين و كلنا ناخذ الكادر القانوني

ف نصايحكم ؟