قصة صديقتي مع النصابة خبيرة الكيراتين
حبيت اعرض عليكم قصة صديقتي مع النصابة خبيرة الكيراتين من فترة بسيطة قرات صديقتي في اكتر من منتدى من ضمنهم اسواق ستي اعلان عن فرد كيراتين حاطته وحدة تدعي انها خبيرة ومندوبة للشركة وكاتبه كلام كبير مرة عن الضمير والكسب الحلال وبعض النصابين اللي يستعملوا مواد ضارة يعني بصراحة الكلام مترتب يعطيك انطباع انها انسانة عندها ضمير تخاف الله وكلام في الدين فهنا صاحبتي ارتاحتلها وطلبت منها تجي البيت وتعملها الفرد وفعلا جاتها البيت وجلست تتكلم عن المادة ومميزاتها وانها ماراح تحتاج حتى سشوار من كتر مالشعرة حتصير ناعمة وحلوة ولماعة وعكس ماهي كاتبه في اعلانها انه الشعر يتغسل في نفس اليوم قالتلها افضل تخلي اسبوع وهنا صراحة بدات صديقتي تشك في الموضوع وحاسبتها 1300 ريال كاملة وجلست تلاته ايام وبعدين غسلت شعرها بالشامبو الخاص بعد الكيراتين لكن لقت شعرها على حالته وماصار اي جديد عليه واتصلت عليها طبعا ماترد راسلتها في الواتس قعدت فترة بعدين ردت عليها بحجج واهية منها انه المادة كانت علاج مو فرد وانها ماتستخدم الفرد ابدا فصديقتي كان كلامها معاها واضح من البداية انها تبغ الفرد لانها كانت عارفة انه الكيراتين انواع في معالج وفي فرد المهم قالتلها حسبي الله ونعم الوكيل المهم انا كتبت الموضوع نصيحة لكل وحدة لا تتعامل مع اي وحدة في النت تدعي انها خبيرة والافضل تروح صالون معروف عشان عالاقل تعرف تاخد حقها انا نصحت صديقتي انها تشتكي عليها عشان ما يوقعوا ناس تانية مع دي النصابة اللي تاكل اموال الناس بالباطل لكن صديقتي اكتفت بانها توكل امرها لله هو القادر ينتقم منها في الدنيا والاخرة .
