معقوله ضاع مستقبلي؟؟ضاعت ايام دراستي الجامعية 5 سنين اللي كرفت عمري عشانها

السلام عليكم و رحمة الله و بركاته


اول شي انا خريجة جامعة الكويت تخصصي اجتماعيات متوسط و ثنوي

من اول يوم دخلت الجامعه حاطه فبالي متوسطه
و عشان اتخصص متوسط كانو يبون معدل عالي
رحت خذيت مواد و قطعت نفسي بالدراسه اهلي ما اشوفهم عشان اوصل للي ابيه
المهم خذيت مواد شكثر جغرافيه و تاريخ و فلسفه و علم نفس و علم اجتماع يعني المواد اللي تخص المتوسط و الثنوي

المهم وصلت خامس سنه الكورس الثاني كان ميداني
حطوني الميداني بمتوسطه و درست صف سابعه
المهم رئيسة القسم استانست على شخصيتي القويه بالصف
و الموجه يقول انتي لو ما ادري انج ميداني جان قلت هذي معلمه خبرة 10 سنين
و عطوني بالميداني 100% يعني a كامله


المهم توظفت و قالو تروحين دورة و بأخر يوم دوره يعلنون باي مدرسه حطوج
داومنا بالدوره اسبوع و نص و صار اخر يوم نادو اسمي و استلمت ورقتي
و الصدمه !!!!!!
حاطيني ابتدائي صبيان
انهرت ..قلبتها بجي..ليش..رحت طياره عالمنطقه ..و بايدي شهادتي الجامعيه
كلمت مراقب المتوسط قلت ليش قطيتني ابتدائي
قال فيها نقص..قلت مو تخصصي و مااعرفلها
و هذي شهادتي انا متوسطه مو ابتدائي..قال قطي شهادتج ما منها فايده

انا انصدمت ما منها فايده؟ و ارد البيت بجي

المهم داومت بالابتدائي و نفسيتي بخشمي ما قمت اقعد مع المعلمات
و كل يوم بجي و رئيسة القسم قالت عادي الكورس الثاني يبطلون النقل
و مره دشيت الصف ابي اشرح ما قدرت..اتكلم اصرخ و اوقفهم ينطون فوق الطاولات
قعدت عالكرسي و بجي و من عقبها دقيت على ريلي قلت مرني بطلع
و من يومها غياب و حللت و طلعت حامل جان على طول اقدم مجلس طبي و احس افتكيت

الحين يا بنات انا بقدم بعد شهر نقل خارجي من ابتدائي الى متوسطه
تشوفونها صعبه ولا سهلة؟؟ ريلي كلم واسطه و قاله ان شاءالله

تهقون في امل انتقل ولا لا ؟؟


انا الصراحه الحين متحسفه على دراستي و شطارتي
ريحوني الله يريحكم

لان اذا ما نقلوني بحول اداريه او اخصائيه


ناطره ردودكم