السلام عليكم ورحمه الله وبركاته
صبحكم الله بالخير خواتي ،، حبيت اخذ رايكم فمشكلتي وابي اتجوفون منو الغلطان
انا معرسه تقريبا من ١٠ شهور والحمدلله كل شي تمام وطبعا مافي بيت يخلو من المشاكل
امس كنت متفقه مع ريلي ابسير المول لانس بسافر مع اهلي وابي اغراض وجي وسرنا
طبعا فالسياره قتله انا بدور فالمول بروحي مابيك كله معاي ترا المرات لي قبل كله يكون معاي بس مايجوف شو خذيت يعني يتم برع او يدور لو المحل فيه قسم رياييل ووقت الحساب اناديه ايحاسبلي و ع هالحاله يعني نص الوقت يضيع وانا اناديه و بعدين هو بارد يعني انا ابخلص وهو ع راحته
ف امس قتله مابيك معاي وجي فعطاني بيزات وقالي خلاص وقت الحساب انتي حاسبي وانا بكون برع او جريب يعني بترياج و نزلنا المول هو كان يبا البنك و الانصاري شوي وانا رحت بروحي يعني بس بينا اتصال قلي انا طلعت من البنك والحين بسير الانصاري وجي ، وانا لو بسير الطابق الي فوق فالمول لازم اقله لان مره سويتها وماقتله وسوالي فلمممم
المهم تميت اتشرى بعدين دشيت محل هادي شوي وسمعت صوت انه ياني مسج
فتحت الفون لقيت ٢٣ مكالمه لم يرد عليها طبعا هو حاارق الفون
رديت دقيت عليه واكلنييي ليش لهالدرجه مندمجه و طبيعي بدق وبخاف عليج تحسبت صارلج شي وفلمممم خلاص شوي بصيح و قالي وينيج بي عندج ويا ، اول مايا طبعا قالي نفس الشي وينج ومدري شو والواحد طبيعي يجيك ع فونه مو خليتج يعني خلاص ،
تقريبا ٤٠ دقيقه بس ماجفت الفون يعني الواحد يلتهي فالمحلات قياس واختيار غير المول زحممه وحشرره يعني حتى لو اعلى شي مابسمع رنه الفون وهو فالشنطه !!
بعدين قتله برد البيت خلاص مابي اتشرى اونه خلاص خلصت قالي خل عنج الحركات الطفوليه وكملي اغراضج قتله مابي قالي مو كيفج ومشينا شوي بعدين جد مو متحمله قتله خلاص ابي ارد البيت انسدت نفسي وعفت المول مع انه صارلنا اقل من ٣ ساعات داشين
المهم ردينا الباركنات طبعا هو يمشي جدامي ومسويلي طاف مع انه مستحيييل يسويها لازم ايدي اتكون شابكه ف ايده ،
المهم دخلنا السياره وانا مبوزه وهو مبوز وبعدين بدا يقول يعني قدري الواحد ضارب مشوار ومتعني ترا المول يبعد عن مدينتنا ساعه وربع و غير جي يقول في فرق بيت العتاب و الصراخ انا عاتبتج ماصارخت عليج !
يعني فالنهايه كله واحد انا اجوفه نكد علي بعدين قال ها كله لانج اكبر وحده فبيتكم محد يكلمج و لا يفر عليج رمسه ولا تتكفخين او يعصبون عليج وصج كلامه انا موول مب متعوده جي وع طول اصيح لو استوالي جي بعدين قال وانا يعني قصده ع عمره انه اصغر واحد ف اخوانه وخواته ال١١ اكيد بيتكفخ وبينازعونه ع اقل شي لين مايقولون بس ،
بعدين ردينا البيت ورد عاد الي يقوله وانا قتله انا ماجوف فيها شي الحرمه تمشي بروحها فالمول تخلص اغراضها ع راحتها و جي بعدين قالي انتي تبين الحريه و مدري شو انا مااعندي هالشي اتاقلمي علي ، مع اني فبيت اهلي عادي انزل بروحي المول اخلص كم غرض و حتى من فتره زعل يوم طلعت مع اهلي وابوي نزلنا انا وخواتي بروحنا ومانزل معانا وتمينا بروحنا بنات !!!
شوو نحن ٢٠١٣ وبعدين متعودين فبيت ابوي انا البنات بروحهم طلعاتهم والاولاد بروحهم وكل حد مرتاح عنبو انا عمري ٢١ وعاقله واختي فالجامعه ووحده صغيره فالاعداديه بعدين الحمدلله محترمات مب مال ضحك بصوت عالي ولا بناطيل بعبي مفتوحه ولامكيب ولا شي !
حق شو ممنوع اطلع مع خواتي بروحنا يعني الحين ممنوع اطلع معاهم لان محد من اخواني معانا وطبعا مستحيل اخواني ايون معانا. وان اقترحت عليه بدال مايتم يدوور وراي فالمول ياخذله كتاب من البيت لانه يحب يقرأ ويستغل وقته ييلس فزاويه او كافيه ويقرا لين اخلص وابوي جي من هالنوع والحمدلله من الصبح للمغرب فالمول ولايدق علينا لين نخلص وكل واحد مرتاح
غير جي من ايام الملجه يقلي يوم اخبره مابيج تطلعين مع اربيعاتج او بنات عمج او خالاتج وسمعت كلامه ولا يوم من عرست قتله بطلع معاهم مع ان اربيعاتي متعودات ان بين فتره وفتره نطلع نتريق او نتغدا بعد الجامعه بس نفذت اوامره وولا مره من عرست ناقشته
وموقف المول مال امس تكررمن كم شهر لهيت عن الفون ٢٠ دقيقه و دشيت محل وماسمعت الفون وعقب اجوفه وراي معصب انه دار المول كله يدورني ويني و طبعا نفس الشي يوم عصب علي قتله يلا خلصت بنرد البيت وردينا البيت ، سالفه ان اخلي نغمه الفون اعلى شي مابي لان مرات ادش محل هااادي مافيه موسيقى وكم شخص فيه وفجأه يرن الفون والكل يتطالعني احرااج صراحه ،
انا تعبت من انه يكون وراي فكل مكان يعني مرات ابا ادش محل رجالي واخذله شي مايطيع الا يبي يكون معاي واكيد بيجوف المحل من برع وبيعرف انا شو باخذ ويخرب علي ،،
احس كرهت السوق منه وحتى مرات يوم يحن علي ويكون معاي اكره عمري واذا جفت شي هو يحبه علي ما اخذه لاني اكون متضايجه منه ،،
عطوني ارائكم وحلولكم وكيف اقدر اقنعه و شكرا
