ظهور مطبل واخر مندس بالمنتدى وبالاسماء اكشفوهم واحذرو منهم

مندس : المدرب فاشل وما عنده سالفه همه الفلوس والسمسره على النادي.
مطبل : المدرب مو سمسار. بالعكس جالس ينظف النادي من المتخاذلين.
مندس :اية متخاذلين الاهلي نافس عالبطولة قبل موسمين بنفس اللاعبين وما تغير غير كماتشو اللي كان نص الفريق وانهى كثير من مباريات الاهلي بفاولاته اللي كأنها ضربات جزاء. وغير فيكتور اللي كان شعلة نشاط وحماس وماكينة اهداف .وغير الحوسني اللي يستغل انصاف الفرص. وغيربالمينيو اللي لوحده ساتر دفاعي ماعمر مر عالاهلي محور زيه. وغير الجيزاوي اللي ماعليه حسافه .بس كانت مشكلتنا الظهير الأيمن.يووووه حسيت اني كمندس ادنت نفسي بكلامي.
مطبل : ههههههه أكيد ادنت نفسك يامندس بس نبهتني انا المطبل لحاجه مهمه وهي ان اللاعبين ذولي راحو كلهم والاداره كانت متمسكه فيهم لاخر لحظه بدايه من كماتشو الى بالمينيو الى الحوسني لكن كلهم راحو غصب عالاداره وبدون رغبتها ولاسباب مختلفه فكماتشو اغروه الشبابيين وقلبو مخه وبالمينيو يبغى يمشي علشان ينظم لمنتخب بلاده والحوسني اصابه اهملها لغاية ما خلص مشاركات منتخب بلاده وراح يسويها في عز احتياج الاهلي له. وفيكتور تغير كثير عن بدايته مع الاهلي تمرد وتخاذل واعذار واصابات وهبوط مستوى يعني مسكينه ادارتنا مالها حظ.
مندس : بس ارجع لمدربك الفاشل اللي قصقص اجنحة الفريق وخلاه بدون مهاجمين بالله ذا مدرب يسرح المهاجمين السعوديين في عز حاجته لهم بغياب فيكتور والحوسني.
مطبل : امممممممممم هذي معاك حق فيها غلطه كبيره سواها المدرب وتشاركه الاداره في هذا الخطأ الفادح المفروض عالاقل ترك واحد منهم بس اظنه كان متأمل في المجرشي وصالح الشهري انهم بيكونون مهاجمين سوبر ستار بس للأسف خذلوه .
مندس : لا وزاد طبلها مدربك الفاشل بتسريح فيكتور وبرونو ويونس ياخي نفسي افقع وجه مدربك ذا بوكس يطير عيونه.
مطبل : اما هذي ماني معاك فيها كل الناس تشهد بتعالي برونو وما أفاد الأهلي من يوم جانا النادي وفيكتور نزل مستواه وتعلم المرقعه من برونو ويونس اصلا جيته كانت ورطه اضطرت عليه الاداره بسبب اللي صار مع بدران وكان هو الوحيد المتاح في اخر ساعات تسجيل الفتره الاولى.
مندس : كلامك صح بس التوقيت يامطبل خطأ كان صبر عليهم لغاية الفتره الشتويه وسرحهم او عالاقل ترك فيكتور وبرونو كان ممكن يفيدون الفريق لو بنسبه بسيطه.
مطبل : يا مندس راح تبقى على طول مندس هو سوى كذا علشان يفرض شخصيته والباقين ياخذون منهم عبره.
مندس : طيب يابوشخصيه انت ومدربك تعال قول لي ليه مدربك السمسار العصبي يغير في مراكز اللاعبين ويلخبط أم الفريق مافي لاعب يلعب بمكانه لا عقيل ولا تيسير ولا بصاص ولا سعيد المولد. لا والادهى من كذا يلعب سعيد المولد وسط وهو اصلا مدافع ويترك محسن العيسى عنده في الدكه وهو لاعب وسط بالأساس هذا مدرب بالله ياحضرة المطبل.
مطبل : شوف علشاني احب الأهلي زيك ما راح ادافع عالمدرب في كل شي علشان اكون معاك صادق ونقطة تغيير المراكز ذي انت صادق فيها حتى انا يالمطبل ماني لاقي لها تفسير حيرني المدرب ذا.
مندس : ازيدك من الشعر بيت بالله موسورو ذا لاعب محترف .المفروض المحترف يشيل لك فريق يغرق معاك بكل شي مو مستواه زي اي لاعب سعودي ايش فايدته لا تقول لي لاعب تكتيكي الله يرحم والديك.
مطبل : هههههههههههه. كنت باقول لك كذا تصدق. بس تذكرت سلطان السوادي اللي يقولو عليه لاعب تكتيكي وربي ان حظ بعض اللاعبين يفلق الصخر من جد الدنيا حظوظ.
مندس : ايش اقول وايش اعيد عن مدربك الفاشل وتقهرني كل مباراة تطبل لمدربك وتقول عني مندس علشاني احترق للأهلي واللي قاعد يصير له من مدربك الفاشل اااااااخ يالقهر.
مطبل : حتى انت كمان تتهمني اني مطبل للمدرب تقول انو معطيني شي من عقده الكبير اللهم لا حسد انا كمان مقهور على وضع الاهلي بس كمان شايف المدرب يشتغل صح من جهه ومن جهه يلخبط الله يهديه.
مندس : ويييييين الشغل الصح الا كله تخريب بتخريب.
مطبل : خلينا نكون منصفين يمندس باشا المدرب غير طريقة لعب الاهلي وصارت الفرق كلها تلعب دفاع قدامنا بما فيها الهلال والشباب والنصر والاتحاد ولولا ارادة الله ثم الحظ السئ كان فزنا عليهم كلهم وشفت كمية الفرص اللي ضيعناها في كل المباريات غير عن عدم وجود مهاجمين اصلا. الشي الثاني تنظيف الفريق وفرض الانضباط والشخصيه القويه للمدرب وياخي شوف تراه سوى نفس الشي مع بورتو اول سنه وطرد لاعبين مهمين قيمتهم ملايين والموسم الثاني واللي بعده جاب لهم الدوري. وهذا اللي اح يصير مع لاهلي ان شاء الله تعالى.
مندس : هو صح انه مدرب كبير وفكره عالي بس له اخطاء فادحه قلتها لك اول. بس تصدق وربي احس ذا المدرب بالرغم من انتقادي ليه وهجومي عليه انو راح يجون له شأن كبيييير مع أهلينا قلبي يقول لي كذا وخصوصا مع الانتقالات الشتويه عندي امل وضع لفريق يتعدل ويصير فريقنا مع ذا لمدرب قوة ضاربه.
مطبل : الله ينور عليك خلينا نعطي المدرب فرصه الى نهاية الموسم ذا وراح يبان شغله بالانتقالات الشتويه ويبان اذا كان سمسار زي ما بتقول يا مندس والا هو فعلا مدرب انضباطي وعالمي واصلا قدنا منتظرين 30سنه نزيدها سنه دامنا عندنا احساس بان لمدرب يبغى يشتغل صح.


اخيرا المطبل والمندس كلهم جماهير أهلاويه عاشقه وكل واحد يدافع عن حب لاهلي بطريقته فياليت نحترم اراء بعض مهما اختلفنا فيه.