شعر بصب لك كل المشاعر [وأقهويك]..

مدري اشيلك [شعر] ولا أغنيك
من فرحتي تاه الكلام بلساني

نسيت لا ارحب واحيي واهليك
مدري وش اللي من نظرتك غشاني

اخلجتني في جيتك من حسـانيـك
وحضورك اكبر من بساطة مكاني

فتحت بيبان الحشى والشبابيك
يادهشتي حبي مواطي زماني

خذ راحتك كل المحاني متاكيك
تفداك يانبض الخفوق المحاني

الله ياحر الوله في اياديك
ذوب تباريح الشعر في كياني

بصب لك كل المشاعر واقهويك
اروع قصيدة أمطرتني تهاني

ادري تراجف للقصايد أمــانيــك
وادري تحب تشوف شاعر يعاني

تبي القصايد او تبيني انا اجيك
بأبيات ارهف من سحابة حناني

على العموم بكل الاحوال يمديك
يجيك كل اللي تبي في ثواني

ياسيدي تامر وأنا اقول لبيك
اليوم يومي والمحبه تفاني

منقول