قصه ولادتي ببنوتي الحلوه 6-12

قصه ولادتي
اخر موعد ولاده: 4-12
موعد الولاده: 6-12 يوم الخميس

طبعا انا صارلي اسبوع تقريبا في بيت اهلي ناطره الطلق..زهقت طاف موعدي وماكو بوادر بس الرحم مفتوح واحد ونص سانتي.. ودكتوري كاتبلي تخطيط يوم وترك من اطوف شهري.. دقيت على ريلي قلتله برجع البيت اليوم شكلي مطوله ماراح اولد ..وامي تحن علي تقول سوي تخطيطج اول تالي طلعي على راحتج.. انا يومها كنت متضايقه مادري ليش وحركة البيبي قليله..
رحت مستشفى الجهرا ولا نبص الطفل مو مستقر على طول سوولي دخول قالو اذا بتطلعين على مسئوليتج خفت ودشيت جناح الولاده.. علي طول تخطيط وفحوصات وسحب دم ومغذيات.. والنبض للحين تعبان ومافيني طلوق ..مع المغذي تعدل النبض شوي وعطوني تحميله طلق صناعي قعدت ساعتين تحت الملاحظه ماكو بوادر..ودوني الجناح قالولي اارتاحي وراج تحميله ثانبه بعد 6ساعات .. وسولي توسعه من 2الي 3سانتي..رحت الجناح سولي تخطيط وغفيت شوي تالي قعدت من المحاتاه قمت امشي بالجناح واقرا اذكار الولاده صليت الفجر ولبسوني لبس الولاده ودشيت جناح الولاده عطوني تحميله ثانيه نفس الشي ماكو بوادر قالو روحي الجناح اي عوار بلغيهم .. طلعت الساعه 8 .. الساعه 9بلش عوار قوي كل4دقايق.. وانا اون بالفراش واتألم صج الطلق الطبيعي رحمه.. ناديت السسترات قالو يفحصج الدكتور اول ولا الرحم للحين من2الى 3. قالي تقدرين تتحملين تقعدين بالجناح وتمشين وتمارين قلتله لا دخلوني ولاده.. دشيت الولاده والطلق قوي من 10الى الساعه 3العصر يالله الرحم وصل 5..طبعا بدون كمام ولا ابرة ظهر لان على هالعوار القوي كان طلقي جدا بارد بالتخطيط . وانا شوي ابجي شوي ادعي شوي اصرخ وبلش معاي ترجيع .. عطوني كمام نمت شوي وقعدوني قالو تغدي وبعدها حقنه شرجيه وتمشين شوي بالجناح.. بطو ماي البيبي الساعه 4 واحس البيبي نزل بالحوض لانه ضغط قوي صار تحت.. ويشجعوني مع كل طلقه اسوي بوش.. للاسف اول شي قعدت اصرخ جان تقولي الدكتوره ماكو فايده يروح الطلق مع الصراخ..واقعد اسنغفر واسوي تمارين التنفس وادعي لي ولكل الحوامل..وبعد جم بوش حسيت شي بيطلع واسوي بوش قوي ويطلع راسها حبيبتي ويزلق جسمها.. ويتراكضون ياخذونها السسترات سمعت صرختها وخذوها.. تالي ساعدتهم بطلعة المشيمه.. والخياط حسيت فيه ماكنت مبنجه عدل.. والي اذاني كان معاي التهاب بول خفيف كل مايخيطون تنتفخ الغرز.. حطولي ثلج وقعدوني 3ساعات بعد الولاده تحت الملاحظه وتطمنو على خياطي .. وحزتها جابولي حبيبتي رضعتها وبجيت يوم شفتها .. والحمدلله على كل حال
هذي قصة ولادتي اختصرتها قد ماقدر
وانا بجريه واول بيبي ربي يحفظها لي

ملاحظه: في وقت ما اثناء الطلق مت من العوار وطلبت قيصريه بس الحمدلله ماعطوني على جوي قالو مافيج شي بلا دلع وصبرو علي وولدت طبيعي
* الي موحلو كنت ابي زوجي يمي وكنت مو شايفته لي جم يوم بس الحمدلله على كل حال
** طول التاسع كنت اشرب زعتر واسوي قرفصاء وامشي واتربع مثل اليوقا
*** ماجازفت كلش و ماشربت خروع ولا دارسين خفت على نفسي

وربي يسهل على كل حامل ويرزق كل محرومه بالضنى السليم االمعافى
اي سؤال حياكم بنات