مباراة ثلاث نقاط لا أكثر

بسم الله الرحمن الرحيم

السلام عليكم ورحمة الله وبركاته

صباح/مساء الخير حبايبي الزعماء

أول شيء هاردلك الهزيمة المستحقة البارحة من النصر ، والشيء الثاني ودي أتكلم بكم نقطة عن الأداء الهلالي بالمباراة امس..

نبدأ بأهم خط أو بالأحرى أكثر الخطوط فاعلية وخطورة ف الهلال إللي هو خط الوسط المكون من ( سالم ، نيفيز ، نواف ، وخلفهم هرماش ، كاستيلو ) خلوني أبدأ بهرماش إللي أتوقع حالته ما تخرج من أمرين إما أنه ما يدري وين يروح أو أنه بإيعاز من الكوتش سامي له أدوار هجومية وف الحالة هاذي فأنا أرى إنه ما يأدي أدواره بالشكل الأمثل ، نجي للمحور الدفاعي كاستيلو مشكلة كاستيلو هي كثرت التنقلات بين تمثيله للمنتخب وتمثيله للهلال وهذا شيء واضح على أداءه في بعض المباريات منها مباراة البارحة ظاهر عليه الارهاق والبطء الشديد بالتغطية وعنده مشكلة ثانية إنه متقدم كثييييييييييييييير والمفترض إنه يكون بالأغلب قريب من خط الدفاع ، نجي للثلاثي الناري ( نيفيز ، سالم ، العابد ) أولاً أنا ودي أكون منصف وأشيد بالتكتيك المحكم إللي انتهجه كارينيو مدرب النصر باقفال الأطراف وتضييق المساحات ف العمق لأنه ( سالم ، العابد ) يلعبون ع الاطراف ف الأغلب و ( نيفيز ) يلعب ف العمق ويحتاج للمساحة ، وثانياً الاجهاد اللي كان باين على سالم بعد معسكر المنتخب والعودة من الصين أما العابد فعلامة استفهام كبيرة على مستواه من بداية الموسم وبالنسبة لنيفيز ف اليد الوحدة ما تصفق وهو كان محتاج المساحة إللي ما كانت موجودة في ظل تضييق المساحات من قبل الدفاع النصراوي وكان من المفترض منه استخدام سلاح التسديد إللي ما استخدمه كثير البارحة .

نعرج على الخط الثاني إللي هو الهجوم إللي كان متواجد فيه من البداية ناصر لوحده وكان بين 4 مدافعين ومحورين ف من المستحيل بيقدر يسوي شيء هذا غير إن الامدادات شبه معدومة له من صناع اللعب ، وبعد نزول الشلهوب وياسر لاحظنا تحرره قليلاً مما تسبب بتسجيله الهدف.

والآن مع الخط الأضعف للأسف خط الدفاع بما فيهم الحارس أول شيء ممكن نلاحظه عدم الانسجام ما بين القلبين وعدم الانسجام ما بين الحارس والقلبين والارتباك الكبيرررررررررررر للحارس السديري والمدافع المسلم والخروج الخاطئ والمتكرر من الحارس السديري..


ف النهاية هي مباراة وعدت بخيرها وبشرها وأتمنى يستفيد الكوتش سامي من الأخطاء ويعدلها بأسرع وقت لأن البطولة الآسيوية ما ترحم ..


وعذراً ع الإطالة


أخوكم/ أبو مالك2005