عشان نبقى فاهمين .. مشكلة الديون

بسم الله الرحمن الرحيم
الحمدلله والصلاة والسلام على رسول الله....


هذا أول موضوع لي بينكم, وأنا سعيد بتواجدي في هذا المنبر الإتحادي الكبير
وأتمنى منكم جميعا كأخ لكم إننا نبتعد عن الإساءات والألفاظ الغير مقبولة تجاه الجميع سواء إتحاديين أو غيره.
صح إن الواحد يحب الإتحاد والإتحاد يستاهل, وصح إننا نتعصب ولكن لا الأندية ولا الكورة بتوقف معانا يوم نتحاسب لأننا سبينا فلان أو علان :::06:::


أجيكم الآن في الموضوع وهو من خبرة بسيطة وسؤال لأكثر من إعلامي إتحادي.

قضية الديون قضية كبيرة جدا وصعبة كثييييييييير وهذا الشي تعرفونه جميعا وأكيد انكم ملاحظينه.
واللي يستسهلها أو يعتبرها عادية فهو ماهو عارف خفايا الموضوع.

الديون عقبة دائمة أمام دعم أعضاء الشرف, وعضو الشرف ممكن تطلبه فلوس عشان تشتري لاعب معين ويدعمك ولايرفض هذا الشي
ولكن لما تصير القضية تسديد ديون فالغالب إن الكل يسحب يده زي ماهو صاير حاليا

والفرق بين الدعم في شراء لاعب والدعم في تسديد ديون هو في أمرين:
1- شراء اللاعبين فيه "شو" وشهرة وتخلي الناس تتكلم عنك. وهذا من حق عضو الشرف فأنا أدفع وأبغى مقابل.
2- الديون يعتبرها الكثير مشكلة الإدارة ولذلك الكثيرين يقولون: لاتتوقع إنك بتجلس تتسلف وإحنا نسدد وراك:::00:::

ويمكن كلكم ملاحظين إن الإدارة بدعم أعضاء الشرف مثلا اشترت الفريدي بمبلغ قياسي ولكنها عجزت عن تسديد الديون مع إنها أهم من شراء الفريدي أو غيره.



طيب لو سألنا عن الحل فالحل مايكون إلا في حل القضايا وديا وجدولتها مستقبليا على فترات متفرقة, والتعلم من أخطاء الماضي بعدم وضع أحمال مالية جديدة على النادي.

يا أخي ترا ماهي قضية القضايا إنك تلعب بدون أجانب حتى ولو كانت ميزانيتهم مليونين يورو مثلا. المليونين يورو كان ممكن تحل لك مشاكل كبيرة لو عرفت تصرفها وتوزعها بين المشتكين كدفعات على أن تسلمهم الدفعات مستقبلا. وبدال الأجانب تبدأ تصعد لاعبين من أبناء النادي وتستثمر فيهم بذكاء لتسديد المصاريف خلال سنتين أو ثلاث وهذا مايعيب الإتحاد ولاغيره.

أما انتظار فزعة أعضاء الشرف فهو مثل انتظار المطر في الصيف
والعيش على وهم عقد الرعاية وإنه بيحل كل المشاكل فهو وهم جديد لأن الشركات ماترمي فلوسها إلا بعد ماتقرا السوق وطالما إنها ماتشوف منافسين لها فمنطقيا راح تقلل عرضها وتستغل ظروفك ولكن إنت أحسن تصريف هذا المبلغ يوم تستلمه حتى وإن كان قليل.


هذا مالدي وصلى الله على نبينا محمد وعلى آله وصحابته أجمعين ومن تبعهم بإحسان.