التعامل معاه صعب .. بديت أنهار

لما تكونين طالعه من بيئة كل شي متوفر لج قبل ما تطلبين الشي تشوفينه جدامج .. خدم وحشم وسيارتج تحتج تطلعين وتروحين على كيفج

فجأة تنصدمين لما تتزوجين بيئة عكس اللي أنتي فيها تمامًا .. بيت مافيه الا خدامة وحده وممنوع احد يطلب منها شي الخدامة بس للخالة مره كبيرة تساعدها .. الحريم مايتوظفون ولا يسوقون والطامة الكبرى ممنوع الطلعة من البيت بتاتًا لأي سبب كان .. المره تطبخ وتغسل وتنظف وتقعد تنطر زوجها ممكن يمر عليج اسبوع او اسبوعين وانتي ماشفتي الشارع ! اي شي تبينه بلغي زوجج يجيبه وبس اما انج تطلعين لو حتى للجمعية فهذا من سابع المستحيلات

يطري على بالكم انه حنا بالكويت والقرن الواحد والعشرين وفيه ناس جذي عايشه .. الوضع متعب مابي وحده تقولي عادي بلاها ماجربت اسجني نفسج بالبيت يومين بس تطقين وتموتين .. ممنوع الرفيجات ممنوع تزورين احد حتى اذا فرجت عليج ورحتي بيت اهلج كلها ساعتين وياويلج ان فكرتي بس انج تطلعين من البيت تزورين احد او تخلصين لج مشوار

النقاش معاه عقيم ولما اقوله انا هذي بيئتي وانت داري فيها يقولي انشي وضعج قبل خلاص الحين انتي ملكي .. حشى جارية مو مره

بديت انهار بنات الوضع تعيس .. بس قاعده بالبيت انقطعت عن العالم الخارجي ماشوف احد ولا احد يشوفني حتى اهلي مقصره معاهم

انا بشر من حقي اعيش حياتي المشكلة الاكبر يقارني بحريم خوانه وهم مو موظفات ولا هم بعمري حريم كبار ومن اهلهم هذي بيئتهم انا غير ماقاعد اطلب المستحيل بس ابي اعيش مثل الناس

قولوا لي شسوي طالما اني بأول زواجي بغير هالطبع فيه على الاقل يرفع الحظر عني ويوديني معاه الجمعية !! ياربي عفوك صار هذا طموحي

بنات يطري على بالكم انه في حريم عمرها مادخلت مجمعات نهائيًا ! انا ليما الحين مومستوعبه الوضع