صور نفنوف عرسي ومكياجي

السلام عليكم

انا تكلمت من قبل عن ملجتي من الالف لي الياء والحين دور عرسي ومابي منكم غير دعوة حلوة

اولا حجزت تنظيف بشرة بصالون عبير الياسين ب 35 دينار و وايد عجيب وحاطه موضوع بروحه عنه

ثانيا كنت اسوي جلسات صبار، جرجير، ثوم ،فلفل، موز بالصالون
واذا مالي خلق احط من دهن جدايل مال القرشي اخلط نوعين واحط

ثالثا الجوتي عزكم الله من الحوش اللي بالسالمية لان استخسرت اشتري غالي حق لبسة وحدة

رابعا الطرحة انا سويتها شريت دانتيل من محل الجذور بالبلوكات وتور و وديتها خياط شاطططططرة حدها اسمها كحيلة يم سنتر بوينت الاوقاف سوتلي الطرحة ب 25 دينار بس التور والدانتيل كلفني مع ان موديل طرحتي قصيرة

خامسا المسكة مثل ماتشوفون بالصورة من محل اسمه spring بالسالمية شارع المغيرة بن شعبة عند امير الايراني معروف ويقولج شنو الحلو والموحلو وعيبي ماسمعت كلامه قالي سوي مسكه وسط قتله لالالا ابي كبيرة والله وكيلكم اخر العرس قلت حق ريلي اخذ المسكة مني ايدي طاحت

سادسا المكياج طبعا بدون تفكير ليلى هارموني مكياج عبير وشعر لولو ويريت عندي صور اوضح للمكياج جان عجبكم وايد قتلها ماحب خفيف ابي اطلع عروس بس ابي ترسمين عيني رسم مابي اي كلام
وقتلها ابي سموكي وابي كحل ازرق وابي رموش طبقتين وابي الحمرة درجات الوردي لي اول البنفسجي
والشعر لولو بدعتلي فيه ولعبت بالطرحة
وماحطيت كريم جسم لان ماحب كلش والحمدلله جسمي كله لون واحد
وشريت لون حمرتي منهم لان شفايفي ماتثبت عليها حمرة
وحطيت عدسات ندى فاضل مع العلم عيني ماتتحمل عدسة بس جدا مريحين وحطيت القطرة اللي قبل العدسة

سابعا الحمامات المغربية سويتها بصالون السحر الدمشقي بالسالمية سبق وتكلمت عنه اهوا صالون مخصص حق الحمامات المغربية وانا لحقت على عروض بس الحين ردوا سعرهم الطبيعي اللي غالي نوعا ما

ثامنا شبكتي الماس لان ماحب الذهب كلش ملش عكس امي تموت بالذهب ، شريتها من الاربش اللي بالديرة

تاسعا شريت تولة بخور من الاربش ومن الجزيرة بس غاليين

عاشرا العطور .. طبعا عطور الجزيرة الوردي والازرق والاسود واليديد التيفاني ، وخذيت خمرية دم الغزال مالت الشعر
ومسك العروس من القرشي والعطور الفرنسية طبعا العطر المفضل واللي ما استغنى عنه ديبون اهوا قديم ومقطوع تقريبا بس احلى عطر عندي وخذيت من شانيل بدي لوشن وبدي سبراي وعطر شعر و من وايد ماركات نسيت اساميهم

بالنسبة حق قمصان النوم شريت والله بس ماكودت لان ماعرف ذوق ريلي فمابي اشتري ويطيحوم بجبدي وبنات لاتقطون فلوسكم على هالاشيا السوق موجود ماراح يطير

وقميص نوم اول يوم شريته من انور طبعا غالي مع كعب عزكم الله وست فوط

11- المصور تعاملت مع معرفي وللاسف تجربة جدا فاشلة افضل ان ماتكلم عنها لان مابي اقطع رزق احد بس للعلم رديت حمضت صوري عند مصور ثاني لان الصور X X XX C وانا دافعة فوق الالف للفيديو والصور :)

اخيرا وليس اخرا نفنوفي شريته من مجمع مريم محل اسمه العثمان تحت ماركة نفنوفي اوسكار دا لارينتا
شوفوا بالصورة اليمين نفنوفي
كان في الازرق بس ماخذته عروس متزوجة سعودي الله يهنيها وعاد النفنوف كل من تكلم عنه لان غريب وماشالله حلو بس سعره يعور القلب 😭😭💔💔💔💔💔

الصور المرفقة http://www.q8yat.com/images/attach/jpg.gif 270042189.jpg‏ (73.2 كيلوبايت) http://www.q8yat.com/images/attach/jpg.gif 328315081.jpg‏ (57.1 كيلوبايت)