للعاطلين او الموظفين شغلة بسيطة مربحة وممتعه دخل 3000 واكثر وراس مال 700 ريال
السلام وعليكم ورحمة الله وبركاته
عندي لكم شغلة بسيطه تقدر تطلع منها مصاريفك اليومية وشغلة مريحة وحره وبعد فيها وناسة اكثر من الشغل لأنك بتخالط الناس
واذا اهتميت في الشغلة اكثر واتفرغت لها ممكن تفتح منها بيت الحالك وتصرف عليه بالراحة
الشغلة اهم شي يبي لها واحد مايستحي وواحد اخلاقه زينه مع الناس
طبعا الدخل راح يكون على حسب نشاطك وجهدك وفراغك وراح يتراوح الدخل اتوقع من 2500 الى 6000
انا بالنسبة لي كنت ادخل في الشهر اقل شي 6000 وكان معي اثنين عمال يشتغلون معي احطهم في اماكن ثانية غير مكاني والمكسب بالنصين وكان كل واحد تقريبا يدخل 4000 يعني له 2000 ولي 2000
يعني اخر الشهر يكون معي 10000 ريال بس طبعا انا كنت متفرغ واشتغل كل يوم طول اليوم
وفي بعض الشهور يكون الشغل افضل وبعضها اقل طبعا
الشغلة تنفع للي متعطل يشتغلها لين يحصل وظيفة ويمكن ربي يفتح عليه فيها ولا عاد يفكر في الوظيفة وتنفع للي متوظف بعد مايخلص وظيفته يشتغل الشغلة هذي ثلاث اربع ساعات او وقت الاجازه جمعه وسبت
واحلى مافي الشغلة ماحد يقولك ليه غبت اليوم ليش تأخرت عليك خصم انت حر
الشغلة هي بسطة تبسيط وبيع
طبعا في اشياء كثير ممكن تبسطها وتبيعها وتترزق الله منها
بس انا بسطتي عبارة عن معمول تمر حق مصنع ام صالح اللي ينباع بالكيلو عند المساجد وفي الاسواق
المهم هذا الشغلة رهيبة جدا وفيها رزق حلو ولا هي متعبة وتقدر تطور من نفسك غير البسطه وتسوي لك كروت وتوصل للزباين بعد البسطه او تعلن في الانترنت ومع الايام ماتدري يمكن ربك يفتح عليك وتفتح محل تمور او حلويات او مكسرات او شعبيات ولا ننسا ان اكثر التجار بدأوا بساطين والبسطه والله فيها وناسه لانك بتقابل وبتتعرف على انواع الناس من زباين وبساطين وغيرهم
طبعا الشغلة بسيطه جدا وما يبغا لها راس مال كبير يعني ممكن تبدأ ب 700 ريال طبعا الكرتون حق المعمول سعره 65 ريال بالجمله وفيه 5 كيلو يعني يطلع عليك الكيلو ب 13 ريال وانت تبيعه ب 20 ريال يعني بتبيع الكرتون ب 100 ريال يعني المكسب في الكرتون 35 ريال
وبيروح عليك منها 5 ريال عشان الزباين يذوقون بيصفا لك في الكرتون 30 ريال وفي بعض الزباين يقولك ياخي زود كثر ويخم بيده لاتزود الا حبه او حبتين عشان مايروح المكسب
طبعا انت وشطارتك ممكن تبيع في اليوم 3 كراتين 4 كراتين 5 كراتين 6 كراتين على حسب فراغك وتعبك وفي بعض الزباين ياخذ منك كرتون كامل وبعضهم يتصل عليك يقول لك وصل لي كرتونين 3 كراتين وطبعا يجي منه 4 انواع بالتمر وبالتوفي وبر بالتمر وبر بالقرفة بالتمر واكثر الزباين يقولك شكل لي عطني من كل نوع نص كيلو وللا كيلو مشكل وميزة المعمول هذا عن باقي المعاميل اللي في السوق انه يجي طازج كل اسبوع من القصيم وتجي كل حبه في كيس مغلفة ولين ولذيذ مع القهوة او غيرها والميزه الثانية انه ينباع بالكيلو ويجي الزبون يذوق ويشتري على طول عكس المعاميل اللي تجي مصكره ماتدري كيف طعمها عشان كذأ اشتهر معمول ام صالح في الرياض وعلى طول يمشي ويجيك الزبون وهو عارفه ويشتري على طول
وتقدر تحط جنب المعمول كليجا يجي كرتون كليجا صغير فيه 17 حبه عليك ب 11 ريال وتبيعه ب 15 ريال فيه مكسب 4 ريال ممكن تبيع كل يوم 5 او 10 كراتين وفي بعد كليجا بالكيلو تجي صغار كل حبه في كيس الكرتون ب 65 فيه 200 حبه يعني تقريبا 4 كيلو هذي تنباع الكيلو ب 25
وفي بعد معول فاخر مغطى بالشوكلاته اسمه معمول امول طعمه روعه مره جنان الكرتون سعره جمله 135 فيه 12 علبه تبيع العلبة ب 15 ريال يعني تبيع الكرتون ب 180 مكسب 45 ريال يعني بيجي اخر اليوم وانت كاسب مبلغ زين
وهذي الشغلة يزيد الشغل فيها اذا برد الجو بشكل كبير وماعاد تلحق على الزباين من كثرة الطلبات ويقل الشغل فيها فترة الصيف ورمضان طبعا فترة الصيف تقدر تغير اي شغلة الى ان يرجع يتعدل الجو
نجي الحين للأماكن اللي بتبسط فيها
تقدر تبسط قدام المساجد بعد الصلاة وهي افضل الاماكن اللي اشتغلت فيها لان المصلين يخرجون بسرعه وفي خلال ربع ساعه تلاقي نفسك بعت ب 200 وللا 300
طبعا المساجد تختلف فيها الكبير والصغير واللي على الشارع يكون افضل وفي بعضها تكون اجانب اكثر وبعضها سعوديين اكثر والمعمول زباينه سعوديين اكثر شي
وتقدر تبسط قدام محل ابو ريالين اذا تبغى معك وقت من بعد العصر الى الساعه 12 في الليل وانت شف الوقت المناسب لك وابسط فيه وافضل شي من بعد العشاء الى الليل
وتقدر تبسط قدام المطاعم اللي عليها زحمة زي مطعم الرومانسية وماما نورة وغيرها
وتقدر تبسط في الاسواق الكبيرة اللي فيها بساطين زي سوق حجاب واسواق المجد وغيرها
وتقدر تبسط الصباح اذا انت فاضي عند الاماكن اللي فيها مراجعين والدوائر الحكومية مثلا قدام الجوازات او مكتب العمل او الاحوال او كتابة العدل وغيرها
وتقدر تبسط في الثمامة نهاية الاسبوع او معارض السيارات او اي مكان زحمة
ولما تحصل لك مكان شغال وتجلس فيه كل يوم خلاص يتعود عليك الزبون ويجيك دايما
نجي لكيف تبدأ البسطه اول شي تشتري لك طاولتين صغار تحصلها في محلات البلاستيك الوحده على 70 ريال تقريبا وتشتري لك ميزان سعره 40 ريال تقريبا وتحصله عند اللي يبيع المعمول وربطه اكياس ب 10 ريال عشان تحط المعمول للزبون فيها وتقدر تفصل لك لوحة صغيرة مكتوب عليها معمول ام صالح او معمول امول عشان تلفت نظر الزباين وهذي ممكن يوفرها لك محمل المعمول وتشتري في البداية 5 او 6 كراتين معمول ام صالح و 5 او 6 كراتين كليجا ابو 15 وكرتونين معمول امول يعني كله يمكن يكلفك 700 او 800 ريال ولا تخاف الشغلة مافيها خسارة كبيرة اذا ماعرفت كيف تبيع ممكن اي بساط يشتري منك الاغراض بخسارة بسيطه
وتشيل اغراضك وتتوكل على الله وتروح ترتبها في المكان اللي بتبسط فيه وتبدأ تبيع طبعا اهم شي لازم اذا مر من قدامك زبون تتكلم وتقول قرب ياولد لا تستحي قل معمول تمر لين وجديد اتفضل ذق مجانا وزي ذا الكلمات اللي تجذب الزبون
موب تقعد ساكت زي السبيكة والبساطين الثانيين يصوتون ويبيعون لا الشغلة هذي مايبي لها حيا
طبعا بتصادفك مواقف كثيرة وانت باسط بعض الزباين ملاقيف ممكن تختلف انت وياه ويقول كلام بايخ زي بجيب لك البلدية وللا انتو مخالفين انصحك هذي الاشكال لاترد علها ابدا وقل له الله يسامحك حتى لو انت في موضع قوة لانك قاعد في مكان تترزق الله فيه وتكد على عيالك وماتبغى تخرب على نفسك واي مشكلة مع الزباين هم ماهم خسرانين لان ماعندهم لا بسطه ولا شي طبعا اللي زي كذا قليل وللا والله اغلب الزباين يجلس يدعي لك الله يرزقكم الله يوفقكم حنا نشجع الشباب السعودي ومن ذا الكلام
بالنسبة للبلدية او الشرطة اذا جاتك اذا كنت سعودي لا تخاف ابدا بس اسمع نصيحتي اسمع نصيحة بساط اكثر من عشرين سنه خبرة في البسطات اذا قالك راعي البلدية او الشرطه لو سمحت عزل البيع هنا ممنوع قل له بكل ادب ياخي انا عاطل واكد على اسرة ومن ذا الكلام واذا ما رضى قل له ابشر حاضر تحت امرك وعزل وامش واذا راح ارجع بعد شوي وابسط ثاني مره واذا طلب اثباتك وره اثباتك عشان يدري انك سعودي طبعا اغلب حقين البلديه اذا عرف انك سعودي يخليك تترزق الله بس يجيك في السنه واحد وللا اثنين نادرا
واذا عاندته وقلت والله ما اعزل انا سعودي سو اللي في راسك ومن ذا الكلام خلاص بيستقعد لك وبيتصل بالاداره حقته وبيجون كم سيارة وبيخربون عليك المكان واذا ماسوا شي في نفس اليوم بيستقعد لك الايام الجايه كل يومين ثلاث بيجي لكن لو عزلت قدامه وقلت له ابشر بيروح على طول وحتى لو رجع ثاني مره وشافك بيتغاضى عنك
وبتشوف بعض البساطين غير سعوديين يبيعون نفس بضاعتك او بضاعه ثانيه نصيحه لا تضايقهم وتستعمل قوتك عشان ربي يوفقك ولا يسلط عليك اللي اقوى منك
ونجي الحين للمكان اللي بتشتري منه المعمول
تقدر تتصل علي مباشرة اذا تبغى اي استفسار ابو ريان
على الرقم
0504157275
او تتصل على الشخص اللي في المستودع ابو صالح
0580109099
او تتصل على المناديب اللي يوصلون المعمول
صالح 0599840958
علي 0550047729
وصف المستودع اللي يبيع المعمول الرياض الدايري الجنوبي مخرج 19 د
جنوب كنك رايح الخرج بتجيك اول اشارة حق مصنع الاسمنت تتعداها بيجيك على يمينك محلات رخام اخر محل اسمه نوادر الرخام بعد الاشارة ب 200 متر تلف بعد محل نوادر الرخام يمين وتمشي 500 متر تقريبا يجي المحل على اليمين بعد المدرسة مباشرة عليه لوحه صغيرة اسمها وردة الأغذية وصورة معمول
الوصف واضح وبسيط وطبعا المرات الثانية اذا ماتقدر تجي بيوصل لك راعي المعمول البضاعه الى عند بيتك واذا كنت مستعجل تعال المستودع وخذ اغراضك
وقت الدوام عادة من بعد العصر الى 10 ونص ليلا ونفتح الصبح من 10 الى 2 بعد الظهر بس لو تجي من بعد العصر افضل وتقدر تتصل قبل ماتجي
واذا لقيت اي واحد يبيع المعمول تقدر تسأله كم رقم الموزع او تاخذ الرقم اللي على الكرتون
في كم واحد يبيع عند مسجد الراجحي الكبير اللي في مخرج 15
بالنسبة اللي حاب يشتغل الشغلة هذي وهو خارج الرياض نوصل له المعمول عبر الزاجل او الصاعدي على حسابه بعد مايحول الفلوس طبعا يكلف الشحن كل كرتون 5 ريال الى 10 ريال على حسب المدينه واللي خارج الرياض يقدرون يبيعون الكيلو ب 25 عشان حق النقل
مع تمنياتي لكم بالتوفيق والرزق الحلال
