يا جماعة اقرو حكايتي واللي عندو حل لا يبخل عليا بيه
بسم الله الرحمن الرحيم
السلام عليكم ورحمة الله وبركاته
ياجماعة انا ساكنة في مخطط وقريب من بيتنا فيه حارة والحارة فيها اجناس مشكلين
ومن فترة لفترة يجي واحد من عيالي او من عيالي او من عيال الجيران يشتكي من حرامية
يقابلوهم في الزقاق ويلوي يدهم وياخدو كل اللي يلقوه مع البزر
قبل امس ولدي الصغير قابل واحد فيهم ونفس الشي اخد منو كل الفلوس اللي معاه وشرد
واليوم ولدي شافو جا وقالي دقيت على الشرطة قلتلهم الآدمي جالس في المكان الفلاني
قالو لازم يكون فيه احد قريب منو قلت طيب عيالي خرجو من المسجد ولقوه لساتو جالس في الحديقة زي ما هوه رجعت دقيت على الدورية قالي طيب دحين نرسل
وقام الحرامي بيمشي وعيالي وراه المهم كلمو واحد من العيال قال لا ياشيخ انا اسرق وقام يسب
العيال ومشي مشيو وراه وبعدين تاهو عنو كلمت عيالي الكبار وقلت تعالو يمكن تجي الشرطة وماتلقا احد جو عيالي للبيت ولقو الحرامي جايب شباب من حارتو وواقف معاهم عند بيتنا
يقلهم هيا اللي في امو خير يكلمني انا جبتلكم اللي يربيكم
انا قلت لولدي الكبير هدي اعصابك اتنبن منهم معاهم عصي وممكن يكون معاهم مطوى او شي
ورجعت دقيت على الشرطة وفضلنا على هادا الحال من قبل المغرب الين ادان العشا
احيان لما ادق يحولوني على اللي ماسك البلاغ قسم بالله مايرد وارجع اتصل مرة تانية
ويقول طيب شوية وتجيكم الدورية
اكثر شي قهرني في الموضوع كنت باكلم العسكري وفيه واحد جمبو شكلو عسكري زييو
والله سمعتو بادني يقولو خلهم زول حضران واللي مبلغ عنهم تكارنة
قام اللي يكلمني قالي مكتوب عندي انو الدورية جات للموقع ومالقت احد
بس ممكن اسويلك بلاغ تاني انتي اسمك فلانة بس تعرفي اسماء المبلغ عنهم:confused:
قمت قلتلو لسة حتفتح بلاغ تاني اقلك خلاص ارتاحو الين ما يخلصو على بعض
يعني انا كانسانة بغض النظر عن اصلي اذا ما لجئت للشرطة الجئ لمين ؟؟؟؟
المفروض حتى لو كنت مقيمة واستنجدت بيكم تجو توقفو على الوضع يعني ايش اكتر من اني اقولكم الآدمي واقف عند بيتي ومعاه الاوباش اللي زييو بيطولو لسانهم ولدي يقول يقولي كلم الشرطة وخليك واقف بكرة امركم
قسم بالله شكلهم عارفين انو الشرطة ماراح تجي من اصلو
يا جماعة هدول تربية حواري ينخاف منهم اشتكيهم لمين ؟
يعني كوني حضرية خلاص سرت كخة ودمي صار رخيص
ولا يعني لازم اعوج لساني واقول لحقونا طبو علينا حرامية فيذا تعالو الحين ولاترى بعلم عليكم طويل العمر
حسبي الله عليهم كلهم
والله لو يمديني اشتكي على الشرطة نفسهم وربي لا اقدم فيهم بلاغ
ياجماعة اعطوني حل لو اتكرر الشي دا ايش العمل وقتها ؟؟؟
