كل مطلقة لازم تدش هالموضوع، بقولج شي

السلام عليكم ورحمة الله وبركاته . .

لكل مطلقة حزينة زعلانة منجرحة مظلومة موقفة حياتها على هالتجربة وتفكيرها فالماضي وكيف انظلمت مع انها كانت زينة وكيف الزوج عذبها وقصر ف حقها . . الخ يعني يالسة في دايرة سودة


بنات ليش تفكرون في اللي انتهى؟ أدري مب شي سهل بس انتي لازم كل ماتفكرين فالموضوع تقولين لنفسج بجدية وحزم : "بس يا توتة (يعني اسمج) خلاص أنا صحت وزعلت وتعبت ويئست وهذا كفاية !! الحين كل شي انتهى وخلص واستوى من الماضي، هالتفكير بعد لازم ينتهي ويتغير ! " عقب انتبهي لعمرج شوفي نفسج، طالعي حولينج انتي مب عند ريلج الظالم، مب في بيته، قولي أنا فمكان غير ووضع غير يعني تفكيري بيكون غير ويديد.

بنات هالكلام قوليه لنفسج دووووم وكل مرة ترد الأفكار والحزن، هالكلام من دكتور سوا اختبار .. ترسمين بيت وسيارة ف 10 ثواني عقب شوفي رسمتج . . طبعا الكلللل رسم سيارة وبيت جداااام اللي مال أول مثل جذي

[IMG]http://im38.********************************************/jGJnW.jpg[/IMG]

عقب سأل هل الحين السيايير جذي؟ هل بيوتنا شكلها جذي؟ عيل لييييش رسمتوها جذي؟؟! هذا هو الدليل مع انه الظروف تتغير أفكارنا القديمة اتم . . والحين بعدما عرفتي هالشي دوم طبقي اللي قلته، خليج قوية حاربي هالتفكير السلبي، طبعا مب من أول مرة بتشوفين النتيجة اللي تبينها بس مع كل مرة بتقولين الكلام لنفسج أضمن لج تفكيرج بيتغير وبتكون عندج أشيا أهم وأولويات ثانية تفكرين فيها بإذن الله . . اذا بديتي تسوين اللي قلته وحسيتي انج تحرزين تقدم وحبة حبة قمتي ترومين تغيرين التفكير فالماضي، توقعي فجأة تيج حالة ضعف وانكسار، وقتها ماباج تين وتقولين والله حاولت بس مارمت، لاااا هذا الوقت بالذات تثبتين انج غيرتي من تفكيرج، خليج قوية ولا تستسلمين وتطيحين فالدوامة السودة، قولي للشيطان ما بتغلبني مصختها الصراحة!!! 24 ساعة تذكرني ف هالانسان التعيس؟؟ ماكو شغلة ثانية!؟ المهم اباج تحسين انه طفح الكيل من هالوضع وخلاص دام استوى اللي استوى (الطلاق) ماترومين تردين الزمن ف خلج كوول هذي تجربة وانتهت والحين شوفي اللي جدام . .





ترا انتي المسؤولية عن وضعج الحالي، ما أقصد الطلاق أقصد حالة الحزن اللي انتي فيها، أعرف إنها طبيعية وخاصة من وحده انغشت ولا ريلها طلقها وهي مب مقصرة ف حقوقة، بس كل شي له حد، اللي توها متطلقة وتحس بكآبة عادي أنا أقولج حسي وازعلي وصيحي لين ما تشبعين بس اللي صار لها شهور ولا سنين وهي بعدها ع حالتها، لا انتي مصختيها لا تيلسين تشوفين الناس اللي أحسن عنج ترا هم بعد عندهم مشاكل وبلاوي محد يدري عنها، شوفي اللي حالتهم أسوء عنج وبتحسين إنه اللي صار لج مايستاهل هاللي تسوينه، وبتحمدين ربج إنه بلائج أخف عنهم . . عيل انا اعرف وحده لما كانت فالمدرسة وقبل لا تخلص الثانوية ملجت وما خلوها تكمل وتزوجت ما قالت شي المهم بعد فترة سوت عملية عادية لانه طلع فيها الزائدة الدودية، وقتها قالوا لها انتي فيج الايدز @@ (بسم الله عليكم) ريلها على طول طلقها مع انهم يعرفون بعض مب ناس غرب وطلعو عنها كلام مب زين اونه البنت مب زينة عشان جي طلع فيها الايدز!!!! مع انه البنت صدق طيبة واخلاق يعني شوفو التحطييييم طلعت من المدرسة لا شهادة لا تروم تشتغل لا ريل وقف وياها ف ظرف صعب وطلقها ع طول وكله انتشر عنها انها مب زينة!!! لا وعقب تزوج وحده من المعارف بعد! كان رد زوجته اليديدة والله انا مايخصني هو تقدم لي وهذا نصيب، تعرفون كيف بتكون حالة البنت المظلومة؟ :) ابدا ما ينوصف شعورها كيف تحس بالقهر والضعف والظلم، محد يعرف حالتها لانه ولا وحده منا عاشت هالشي الخايس، تعرفون البنت المظلومة كم تمت على هالحال؟ لين ما كان عمرها 40 سنة :) مب سهل الشي ابدا الله يجزيها الجنة بدون حساب على هالبلاء ! الحين شوفي نفسج وشوفي البنت المظلومة . . ماشي مجال للمقارنة لانه اكيد حالتج احسن عن البنت بمليون مرة واللي قلته عن البنت هاللي سمعته وماخفي اعظم . . لكن تعرفين شو استوى عنها . . الله يمهل ولا يهمل :) سافرت للعلاج قالوا لها اصلا انتي مافيج شي!! اي ايدز؟ قالت طول حياتي اسير مستشفيات يقولون لي انه فيه الايدز قالولها لا مافيج ايدز ابدا ابدا ! سبحان الله كانت معجزة لا وتقدم لها واحد وتزوجت ويابت ولد ما شا الله ربي يسعدها طول العمر امين يحليلها تستااااهل كل الخير، واما عن الاخ اللي بهدلها وطلقها وتزوج وحده ثانية لين هاليوم ماعنده عيال :)


المهم لا تترين حد يطبطب عليج وايود إيدج يقولج امبيه لا كسرتي خاطري تعالي بونسج ولا بساعدج، لا انتي المسؤولة عن حالتج وانتي لازم تطلعين نفسج بنفسج من هالحالة، لا تترين شفقة من حد ولا تصيرين كتاب مفتوح عقب الناس يتشمتون فيج ويمصخرونج، محد يهتم فاللي استوى فيج والدنيا ما بتوقف ع طلاقج حتى لو انتي مظلومة، كل حد مستانس ويعيش حياته ويطور من نفسه وانتي بعدج واقفة ع هالمرحلة؟!! لين متى؟؟

يلا الحين ابدي التغيير، طلعي الدفتر وافتحي صفحة يديدة (يعني أنكت اضحكوا هاه لا تقفطوني ) شوفي فيدوات ف يوتيوب عن الدعاء المستجاب وادعي أدعية حلوة لنفسج، اكتبيهم فورقة زيني الورقة، ادخلي القسم الإسلامي أنا دخلته وشفت فيه مواضيع حلوة وتشجيعية مثل اللي تبا تحقق شي أو تبا توصل لأمنية، اقروها والله بتحسون براحة، وعن طاري الراحة اقري سورة البقرة كل يوم صدق صدق أنا بنفسي قريتها لما كنت مهمومة وكنت ارتاح نفسيا مع إنه مشكلتي ما انتهت !! وشو أحلى من الراحة النفسية؟ تخليج تفكرين صح . .



وهذي تجربة تعلمي منها، إذا ماتعلمتي منها الدنيا بعد بتعيد لج التجربة لين ما تتعلمين ( بسم الله عليكم ) أدري كل بنت تبا تتزوج مرة وحده ويكون زواجها الوحيد وتعيش ويا ريلها وعيالها بسلام وحب، بس دام ماحصل هالشي خلاص لا تتعاملين مع الوضع خلاااص نهاية العالم نهايتي الأليمة أنا التعيسة للأبد . . حق كل شي خليلج خطط ثانية واحتياطات وتصرفات عشان إذا ماحصل اللي تبينه تسوين الشي الثاني وماتكونين مصدومة وايد، يعني مستعدة للجميل والسيء . .

لا تيلسين بروحج، الفضاوة تيب الأفكار وغالبا الأفكار التعيسة، اشغلي نفسج مارسي هواياتج خذي الليسن سولفي ويا ربيعاتج اطلعي ويا الأهل تمشي فحوي بيتكم ادخلي دورات غير عن اهتماماتج اقري كتاب خيال علمي المهم سوي شي لا تيلسين زعلانة . . ومابا تيني وحده تيني أنا كلمت رفيجتي بس هي ماعبرتني لأني مطلقة إهئ إهئ ( يعني تصيحين ) خلاص يكرهوني أنا منبوذة . . لااا حبيبتي تعالي أعلمج شنو تسوين . . كلمتي ربيعتج سوتلج طاف أو ما رمستج نفس قبل، يختي طااااف لو بينكم صداقة من الروضة لا تعقين عمرج ع حد، مابتموتين بدونها ولو تحبج صدق جان كلمتج عدل سواء كنتي عازبة متزوجة عانس مطلقة متروسة تجاعيد، خلاص بالطقاق فيها وسولفي ويا وحده ثانية . . طلعي الناس السلبيين من حياتج عشان ترتاحين وترومين تعيشين حياتج صح، ما اقولج اكرهي هذيج ولا تكونين عداوة انا اباج تريحين راسج، النكد لا تعطينهم اهتمام وابتعدي عنهم، خليج ويا الكوميديين الايجابيين المرحين المتفوقين المتميزين عشان تتاثرين وصدقيني دام الناس اللي حوليج يكونون من هالفئة حياتج بتتغير وبتحلو . .

خليج فراشة حلوة، دلعي نفسج عدل مدل، مثلا كنتي تمشين وشفتي عمرج فمنظرة قولي يا حبييييبتي انتي وقوليها من قلبج بتحسين غير ما اسولف اكلكم جد عقي كل ملابسج اللي كنتي تلبسينها عند الأخ وسوي شوبنق ملابس ( آحلى شي ) وسوي كل شي يسعدج ( كل شي حلال ) استانسي استمتعي بالحياة، سوي لستة باشيا تبين تسوينها مثلا سمعتي عن مطعم يديد يمدحونه او ديكوره حلو سيري له ف يوم ويا حد وتصوري حطي فانستقرام اي شي المهم سوي شي تستانسين عليه . .


كتبت هالموضوع لاني ما احب اشوف ناس حزينين ترا الدنيا ماتوقف ع حد وانا استانس لما اشوف اشخاص مستانسين . . اتمنى موضوعي يغير من حياة حد ايجابيا . .

:eh_s(7):