[poem=font="Simplified Arabic,4,black,bold,normal" bkcolor="transparent" bkimage="" border="none,4,darkblue" type=2 line=1 align=center use=sp num="0,black"]
أزريت أجرّ الصوت والصوت مبحوح=وإليا طرب حاشه من الوقت بحه
مالي ورى طرد المقفّين مصلوح= كلٍ يحسّب راس ماله و ربحه
مسموح ياسيد المزايين مسموح=ما يجبر المكسور صلحه و فلحه
زاد إلتماس الصد والسلك مجروح=وأتلف صميم الشوق من ثقل مزحه
جاته لواهيب الجفا كاحته كوح=والغدر مكَّن فيه سيفه و رمحه
مْن اولى همسه وضحكات ومزوح=نقرا عناوين الهوى قبل شرحه
و نعيد ما قلنا إلى طرّت الضوح=ناخذ زمام الليل لأطراف صبحه
بين الغوى يا هيه مع صادق البوح=تسري ترانيمه كما نظم سبحه
واليوم صرنا بين مادح و ممدوح=و مرّ الكلافه حط في الكبد قرحه
حاولت اداري لكن العلم مفضوح=جاته من ديار الوشايات نفحه
خذيت لك من منبع الكبر قرطوح=ما دام ذقته جعل فيه ألف صحه
إحفظ وصاته دامك اليوم منصوح=خل الذي ناصحك ينفعك نصحه
انا ادري إن العذر جاهز و مطروح=لكن ما انصت لك ولو عدت طرحه
العذر في وقته يجي ذوق مملوح =وإليا تعدَّى حزته قلّ ملحه
العذر مقبولٍ ليا لامس الروح=ماهو بصفّ الهرج في عرض صفحه
روّح على درب القطاعه وانا اروح=ما يوقد اشواقي ثمانين قدحه
منت بنبي الله ( طه ) ولا ( نوح )=ولا جاك من رب المخاليق مسحه
والرزق بابه في سما العرش مفتوح=لو كان في يمناك ما ارخصت فتحه
ماني دني نفسٍ ولاني بمشفوح=والحر يفهمها وتكفيه لمحه
سيري بنا ياعيس والحظ مكشوح=والكلب ينبح ما درينا بنبحه[/poem]
[align=center]كلمة عتاب[/align]
