لا تحسبني يوم اقفي نسيتك
واللي خلقني ياهوا البال منساك
اقول ابسلي واثرني ماسليتك
احاول أنسى وأذكرك قبل لاسلاك
حبك بلاني واشهد اني بليتك
عسى الولي باللي بلا القلب يبلاك
في كل بيتٍ من قصيدي لقيتك
بعتاب والا وصف نادر حلاياك
بالحب والشعر المجزل جزيتك
دايم قصيدي باعذب القيل يجزاك
كن القصايد تمتنع لاهجيتك
لاجيت اباسبك عصى القاف ثم جاك
امحي بيوتي بالجفا ما محيتك
واقرا التجافي من فعولك ولا محاك
قلبي وروحي والمشاعر عطيتك
احساس شاعر صدق حبك وهاواك
بعت العذارا كلهن واشتريتك
عندي جميع البيض فدوه لماطاك
ليتك تحس بحرقة الشوق ليتك
كان اكتويت بنار بعدك وفرقاك
ذقت الشقا والهم ساعة هويتك
ما كنت اعرف الحب والشوق لولاك
جننتي يا هوووه يكفي رجيتك
لا تحرق اللي باقي من بقاياك
ما فاد بك ودٍ قراحٍ سقيتك
ولا فاد بك صبرٍ تذله خطاياك
اعليت شانك بالهوى واعتليتك
ولا شفت منك الا خفايا نواياك
لو كان لاهل العشق حاكم شكيتك
واثبت فعلك في باصغر كواياك
لكن هذا شرع الهوى لو جفيتك
تزعل وتتغلي واجيك اطلب رضاك
لك حق بامر الحب ما قد عصيتك
لكن ترى ماني من أطرف رعاياك
ذليت نفسي لجل قربك وجيتك
وش تنتظر يا فتني جعلي فداك
اليوم من عقب المفارق نصيتك
عقب ان صوتك شدني يم ذكراك
ان كان تبغاني فنا اللي بغيتك
اللعب عندك والهدف وسط مرماك
