الطريق الوحيد لعودة الهلال الى سابق عهده كما عهدناه هلال اسيا

السلام عليكم ورحمة الله وبركاته

كل عام وانتم بخير وعيدكم مبارك

انا عضويتي مثل ما كلكم شايفين سنة 2010 واول مشاركة في موضوع لي اليوم وغيابي كان لسبيين 1/ ظروف شخصية 2/ الهلال كان السبب صراحة

شمعنى الهلال ؟

انا بدخل في الموضوع على طول

الهلال في السنوات الماضية كان فريق قوي لا يشق له غبار حاليا الهلال في السنوات الاخيرة يلعب على الاسم القديم والهيبة القديمة اللي صنعوها نجومه السابقين وكل اكثر من كونه اداء حقيقي داخل الملعب ، وحتىلفرق الخليجية والسعودية بنفس الطريقة .

الادارة الهلالية ممتازة وجيدة مثل الادارة السابقة ، الجمهور الهلالي هو نفس الجمهور الهلالي بالسابق اللي هو الرقم الصعب والوقود الحقيقي والشعلة الي تضيء طريق الهلال .

اذن السر في اللاعبين لاعبين اليوم للاسف غير لاعبين الامس اللي يمتلكون المهارة + الاخلاص للشعار والتضحية ( يحترق في الملعب عشان يفوز ) والدليل شمعنى البطولات ماتحققت الا في السابق ايام النعيمة وهذال الدوسري ويوسف جازع ويوسف الاحمد وعبدالله الدعيع وغيرهم
وحتى اخر جيل من المبدعين سنة 2000 ان ما خاب ظني فترة رئاسة الامير بندر بن محمد ، كان وقتها نجوم الهلال محمد الدعيع والدوخي والتمياط والتيماوي وسامي والثنيان وسيرجيو وغيرهم

الان مافي لاعب حقيقي بمعنى لاعب يمكن باستثناء سالم الدوسري وناصر الشمراني اللي يحرصون على انفسهم واداءهم ومستواهم نوعا ما ثابت

ممكن يجي شخص ويقولي في السابق الكرة في شرق اسيا ما تطورت وكان مستواها اقل ؟
ارد عليه واقل كلامه صحيح الكرة في شرق اسيا بدات بالتطور مع بدايات التسعينيات الميلادية لكن وقتها نجوم الهلال مع المنتخب السعودي وناديهم كانوا يبدعون قدام منتخبات مثل البرازيل والارجنتين وغيرهم ، هذا لايعني انك تقلل من نجوم الهلال لان خصومهم اضعف مستوى وان البطولات اخذوها بسهولة وباردة مبردة ، والدليل مشاركة المنتخب السعودي في اول كاس اسيا للمنتخب سنة 1984 وبمدرب وطني استطاع المنتخب انه يحقق الكاس بجدية ومهارة واخلاص نجومه هزموا منتخبات لها باع طويل في هذه البطولة واقدم منه
( باختصار الكرة في شرق اسيا تطورت وفي الهلال والخليج بشل عام بدات الكرة بالرجوع ، هم لاعبينهم احترفوا في اوربا تقريبا كل لاعبين اليابان وكوريا الجنوبية والصين واستراليا ، وعندنا نجومنا اعتزلوا ولاعبين اليوم ولا يفكر بالاحتراف في اوربا الا للبهرجة الاعلامية والتشخيص هذا لو فكر ، لانه هنا مدلل والخانة اساسي مضمونة مع انه ما يقدم مستوى )

باختصار ومع احترامي لبعض اللاعبين وبدون ما اسميهم بالاسم خصوصا في الدفاع وجودهم بالهلال عبث ولعب في الهلال ومقدراته وجهد رجاله السابقين وتاريخه ، والنعم فيهم هاللاعبين ومشكورين وما قصروا لكن لو بنفكر بمصلحة الكيان فوق كل شي نقولهم ما قصرتوا والله يوفقكم في اندية ثانية ( اذا فعلا الهلال بينجح وينافس صح داخليا وخارجيا )
شمعنى في وقت الامير بندر بن محمد والامير سعود بن تركي ومن قبلهم من الرؤساء كان الهلال في قمة عطاءه ويرعب كل الفرق وهو المرشح الاول وياخذ البطولات ، رجال الهلال هم رجال الهلال الى اليوم والى باكر واقفين معاه وجمهور الهلال هو جمهور الهلال ، لكن اللي تغيروا اللاعبين

والحل في رأيي الشخصي المتواضع هو اي لاعب ياخذ فرصته كاملة ولا يقدم المرجو نقوله الله يوفقك في نادي ثاني الخانة ما تشتريها بصك ونجعل اللاعبين جميعا في منافسة بهالطريقة يكون اللاعب يشد حيل طول السنة لانه يعرف ان اي تقصير في غيره ينتظرون الفرصة في الاحتياط ، وهالشي بيخدم الهلال ( ولكم في كاسياس اكبر دليل ، لو كان في الهلال من بعد ما هبط مستواه مع فريقه ريال مدريد كان كاسياس اساسي وفي حراسة المرمى الا ان يبلغ عامه الاربعين )

اعتذر للاطالة حبيت اكتب على طبيعتي دون ترتيب او تنسيق مسبوق سامحوني للخطا او التقصير

سبحانك اللهم وبحمدك اشهد ان لا اله الا انت سبحانك واستغفرك واتوب اني كنت من الظالمين ..