بوتكس فرط التعرق للأندر آرم

هاي صبايا
ادري ان بتحسسون و بتشكون بمصداقيتي لأن ماعندي مشاركات
بس انا خذيت على نفسي عهد أي شي يفيدني راح افيد فيه غيري
(مثل ما انتوا شايفين نك نيمي تجاربي)
و مابي منكم الا دعوه حلوه و ان الله يرزقني على قد نيتي

نبدي بالموضوع
انا وحده اعاني من مشكله فرط التعرق.. مو ريحه لا بس ماي أشر شر
بكل الحالات برد حر صيف اشتا.. حتى لو التكييف برد صقعه اعرق
و هالشي مسببلي ازمه و مقيدني بلبسي حتى ماقدر ألبس اي شي ملون
المهم..

بحثت بموضوع البوتكس لمنطقه الأندر أرم.. و شفت إنه أمن 100%
مو 100% مليون بالأميه و هذا كلام دكاتره جلديه مو كلام تجاري
لأن حتى لو منعتي التعرق بهالمنطقه العرق راح يطلع بأماكن ثانيه

سويت قوقل على الموضوع أبي اشوف احسن الدكاتره بالكويت بهالموضوع
بس للأسف ماشفت تجارب تذكر
قمت ادقدق على دكتور دكتور جلديه و اكتشفت ان يسوونها بسعر مبالغ فيه نوعا ما (حروه ال250)

قلت أنا ابي دكتور شاطر و بنفس الوقت سعره معقول لأن اذا انشالله فادني راح اسويه كل 6 أشهر

المهم و بعد عناء طويل ما لقيت شي يبرد جبدي.. و قررت اسويها عند مكان أثق فيه و له سمعته و اسمه و توكلت على الله و سويتها

المهم اللي صار كالآتي:
حطولي مخدر لمده 40 دقيقه
و بعدها مسحوه و قام الدكتور يطقطق
ما حسيت بعوار كثر ما حسيت بقرصه و شي مزعج أبيه يخلص و افتك
و النتيجه بينت معاي بعد 3 أيام تقريبا
و الله العظيم يا بنات راحه نفسيه
قمت ألبس ألوان و ما احاتي تطلع بقعه هالكبر على ملابسي
المنطقه ناشفه.. مو 100% لا تقريبا 90% و الباجي عرق بس طبيعي كميه معقوله ما يبقع بالملابس
و الله انصح كل وحده تعاني بهالمشكله تتوكل على الله و تسويها
لأنها باذن الله آمنه
و يابنات قسما بالله مو دعايه.. بس ادري ان في غيري محتاج يسوي هالشي مثل ما انا كنت محتاجه اسويه.. لو انا كنت بمكانهم أبي احد ينصحني بمكان زين.. اتمنى محد يزعلني و يقول تسوين لهم دعايه..

العياده: عياده الجلديه مستشفى المواساه
الدكتور: هشام الخطيب
السعر: 184 دينار (وايد زين بالنسبه حق الباجي)

و انشالله اكون فدتكم يارب
و مابي منكم غير دعوه حلوه
:hjy5jewf: