تعبت نفسيا أرجو الرد بسرعة - الفروقات حقنا وهدفنا

بسم الله الرحمن الرحيم
السلام عليكم ورحمة الله وبركاته ...

عندي مشكلة وأبغاكم تشورون علي ايش اسوي لان بصراحة ضاعت بي السبل وصرت تعبان ومتأزم نفسيا بسبب هذي السالفة .

العام الماضي تم نقلي الى منطقتي الحمد لله ولكن كنت معلم زايد في المدرسة المدرسة فيها كفاية من اللغة العربية
علشان كذا تم تكليفي تكليف كامل الى مدرسة ابتدائية والحمد لله كانت من أفضل سنوات حياتي في التدريس
انتهت السنة ورجعت مدرستي الاساسية

لكن للاسف هذي السنة بعد فيه زيادة في اللغة العربية اتصل بي مدير المدرسة اللي كنت مكلف بها العام الماضي وقال اذا انت زايد في المدرسة انا بروح الاشراف وبطلبك بالاسم
قلت له جزاك الله خير هذا اللي انا ابيه

وراح ماقصر بس في الاشراف قالوا له راح نسجل اسمه عشان يجي لك المدرسة لكن انتظر المسح علشان لايصير أخطاء .

انتظرت انا والمدير شهر كامل بعدين جاء المسح وتم تكليفي الى مدرسة غير ..!!

انا بصراحة في البداية قلت يالله وش بيدي اسوي
رحت المدرسة اللي كلفوني بها هذي السنة واول ما قابلني المدير قال
احنا طلبنا رياضيات ليش يجيبون لنا عربي..!!!؟
ونفس الكلام قاله لي الوكيل والمرشد وجميع المعلمين
لان هم ماهم محتاجين عربي هم محتاجين رياضة ورياضيات
الى درجة ان عندهم معلم لغة عربية اساسي ماسك عشرين حصة اجتماعيات !!

الى الان المشكلة اللي متعبتني نفسيا وابغى حل لها
عاطيني جدول الرياضيات عشرين حصة
وانا ما احب الرياضيات ولا اطيقه
وفيني عقدة من شي اسمه رياضيات ولا ابغى ادرس رياضيات

يعني أنا ماسك في مدرستي الاساسية فصل اعلم لغة عربية اول متوسط يشيلوني علشان اعلم رياضيات !!!

مدير المدرسة اللي يبغاني الى الان ماعنده مدرس عربي وماسكيني في مدرسة ثانية علشان ادرس رياضيات !!!

طبعا الى الان مادرست رياضيات لكن معتبرها انتظار لان المدير يقول اصبر بكرة بيجي مدرس رياضيات ..

مديري اللي يبيني معاه من الاساس قبل المسح دايم يروح الاشراف ويجيب طاري اسمي
وانا رحت الاشراف ووعدوني خير لكن الى الان ماصار شي ..

شلون اتصرف ياناس ياعالم
وين حقي ..
اللي عنده خبرة الله يجزاه خير يقول اي شي
ترى والله ما جيتكم الا من الضيم اللي انا عايش فيه .

والمعذرة على الاطالة .