طريقة مجربة ..و تخلي عيالج يقرون ويكتبون خلال شهرين فقط!!!
بنات نصيحة من قلب .......... حبايبي اللي يدورون مدرس او مدرسة خصوصي تأسيس عريي انا بقولكم طريقة عضوة والله نسيت اسمها كانت كاتبة تجربتها من زمان بهالقسم في موضوع مفصل عن طريقتها بتأسيس عيالها في العربي .
بدال لا تقطون قط بهالفلوووووس وماتدرون هالمدرس زين والا فاشل والا مادي يستغلكم ومايدرس ولا يفهم عدل .. صح؟
المهم طريقتها :- شفتوا كتبيات الحروف مالوت محلات بو 100 فلس .. اشتروا هالكتبيات نوع نوعين ثلاث انواع مو مشكلة.. وابتدوا مع عيالكم كل يوم حرف وسووا حقهم إملاء في هذا الحرف
لمن تتأكدون ان حفظوا الحرف .. بلشوا في الحرف الثاني .. واملاء ونسخ .. والحرف الثالث واملاء ونسخ .. وهكذا وهكذا لمن تخلصون الحروف كلها من الألف إلى الياء .
ملاحظة : النسخ والإملاء يكون مرتين بالاسبوع وطبعا يكون في دفتر ثاني .. دفتر ابيض بو 80 صفحة او 100 صفحة .
بعدين خلوهم يقرون قصص قصيرة يوميا ربع ساعة بس ربع ساعة كافي للطفل بشرط ماتنقطع القراءة يوميا لمدة شهرين ثلاث شهور .. وصححوا لهم الكلمة إذا قرأوها غلط ..
وقولوا لهم اثناء القراءة مثلا : وين حرف القاف؟ وين حرف الياء ؟ طلع لي مد بالألف طلع لي مد بالواو ؟
الطريقة هذي تسوونها مع عيالكم بهدوء بدون صراخ وزف .. وتحسسونهم انكم مهتمين فيهم .. وتقولون كلمات تشجيعية علشان يكملون وما يملون
مثل : عفية عالشاطر - بطل - بارك الله فيك حبيبي - ماشاءالله انت ذكي
يبي لها صبر وطولة بال لكن صدقوني راح تلمسون النتيجة الحلوة المشجعة .
وادعوا لي الله يوفق عيالي وعيالكم يارب ..
اللي تستفيد من الطريقة خل تدعي لي ولعيالي يزاكم الله خير .
