غدا الدوام
مساء الخير ياجميلات
فكره هالموضوع يتني عشان نتشارك الافكار والوصفات حق غدوات سريعه ومفيده ولذيذه ناخذها معانا الدوام. انا عن نفسي اشتغل في مؤسسة وعندنا كفتيرا بس اكلهم ممل ومافيه طعم والغدا متروس بهارات عيوش وصوالين يعني شي مايناكل بوسط الدوام يخدر هالاكل وبنفس الوقت لاحظت اذا ماتغديت وعشت عالشاي والقهوه والجوكلت اتعب لان دوامي طويل وارد البيت جوعانه واتغدا متأخر وطبعا ما اتعشى فاصير اكل وجبه وحده دسمه باليوم وهالشي كلش مو صحي. فصارلي فتره اخذ اكلي معاي الدوام وارتحت من هالشي بس المشكله الوحيده اني ساعات مايكون عندي افكار لاكلات سريعه اقدر اسويها بالليل واخذها معاي الدوام. ساعات اخذ الي يتم من العشا مثل فطاير او محاشي او الي موجود بس ساعات احتاج افكر وادش النت. فهالموضوع ممكن يكون مثل ملف للافكار والوصفات وانا بعد اذا يتني فكره بدش احط وطبعا وااااااايد يهمني ان الاكلات تكون صحيه عشان لما اخربط بالويكند احس بتوازن واستمتع بالاكل بدال مانقعد نخربط بالاكل طول الاسبوع وطبعا ياكثر الاكل المو صحي هالاياااام (بس طبعا لما اقول صحي مو شرط يكون رجيم بس يكون اكل مفيد للجسم وهاي سبب يخليني اجيب اكل معاي عشان ما اجوع واتهور واطلب فاست فود!)
ببدا انا احط بعض النصايح الغذائيه الي تعلمتها وقمت اطبقها وارتحت منها
1. طبعا اول شي الريوق مهم ولازم ماتهملونه لازم وجبه صباحيه حتى لو توسته او تفاحه او روب بفواكه اي تاخذينه معاج عالسريع تاكلينه بالسياره والا اذا وصلتي الدوام مو قهوه وشاي بس
2. انا مو وايد احب الفواكه ومستحيل امسك لي تفاحه والا خياره اقرمهم واعتبرهم وجبه او سناك. بس في انواع فواكه احبها وقمت اشتري منهم واخذهم معاي الدوام مثلا العنب الاحمر اخذه معاي واقعد امزمز فيه منها استفيد واتسلى فيه بدال مافجاه احس بيوع واهجم على سنكرز والا مارس. الجزر الي يجون باجياس صغيره بالجمعيات بعد يسلي وايد ومفيييييييييد والتوت البري بعد اكله مع روب اينن وفي وايد اختيارات انتي شوفي الي تحبينه واخذيه معاج احسنلج من ماتتسلين بجيس بطاط.
3. اذا تحبين البطاط وخاطرج بجيس بطاط مو مشكله بس اهم شي التوازن يعني لو سناكج اليوم بطاط خلي غداج سلطه واذا بتسربين مشروب غازي عالغدا شربي شاي اخضر بدال النسكفيه والحليب الظهر. المهم التوازن!
4. التخطيط والنظام مهمين عشان الواحد مايفقد السيطره اذا مارتبتي وجهزتي وجبتج يوم بقبلها مردج بتيوعين وبتاكلين شي خربوطه ماكو شي الذ وافيد من اكل البيت اذا عرفنا شلون نتفنن ونستمتع فيه وهذا الهدف من هالموضوع.
يالله ابي تشجيع عشان ارجع احط وصفات وابي مشاركتكم وانشالله الفايده للجميع :eh_s(7):
تحياتي
قطريه
