اللي تبي تضعف واللي تبي رشاقه .. نزلت لكم الجدول اللي تبونه .. غذاء ورياضه مالكم عذر

تقبل الله طاعتكم حبايبي
اليوم حبيت انزلكم الجدول اللي طلبوه مني وايد بنات
الجدول غذائي ورياضي وفيه نصائح مهمه كلنا نحتاجها
ومن خلال تجربتي ومشاركاتي وحظوري الدورات تعلمت وايد امور من
دكاتره ومختصين في الغذاء والرياضه
وعشانكم كلكم راح اكتبلكم الجدول وهو منقول من خبيرالتغذيه والرياضه وبطل الكويت كابتن سالم العنزي اللي احرص على متابعته وتطبيق تمارينه
وبحاول اختصر لأنه طويل وحاولت اصوره بس طلع موواضح
في البدايه .. السؤال الأهم جم وزنج .. اذا فوق الـ 80 كيلو مارسي رياضة المشي نص ساعه وتمارين السويدي نص ساعه الاجمالي ساعه ..اللي مشتركه في نادي ممتاز .. واللي ماتقدر تروح النادي في حل . . تقدرين تلعبين داخل بيتج وانتي مرتاحه .. تكتبين في غوغل تمارين سويدي وتختارين اللي تقدرين اطبقينه وتحركين ايدينج واكتافك وكل جزء من جسمج والتمارين تقدرون تحصلون عليها من خلال موقع كابتن سالم العنزي او من خلال البحث في غوغل
وهالتمارين مدتها تكون مثل ما قلنا نص ساعه مشي والنص ساعه الباقيه سويدي .. ومتى تلعبين .. مثال اذا الفطور الساعه 7 تخلين تمارينج الساعه خمس وبعدها تاخذين راحه ولما يأذن تتفطرين وتطلبين من الله خير .. وبعد الفطور بساعتين تلعبين تمارين لمدة ساعه وتختارين اللي تقدرين عليه لا تكلفين نفسج اكثر من طاقتج .. على شان لا يحوشج ملل او دوخه او هبوط ..
واذا وزنج تحت الـ 80 شنو تسوين
تلعبين قبل الفطور 30 دقيقه تمارين سويدي وبعد الفطور مشي نص ساعه واذا ماتقدرين تمشين والجو مايساعد طبقي تمارين السويدي عالاقل 40 دقيقه
والحين ندخل في الفطور
فطوركم مجبوس لحم .. مجبوس دجاج .. برياني .. باستا .. بشاميل .. تشريب ..
اذا مجبوس لحم او دجاج أكلي 7 ملاعق من الرز مع اللحم او الدجاج + سلطه والقليل من الشوربه ..
فطوركم برياني 5 ملاعق تكفي + سلطه + شوربه
باستا تاخذين مقدار حجم كاسة الروب لا تزيدين + سلطه + القليل من الشوربه
بشاميل قطعه صغيره ملعقتين عن الخاطر + سلطه + شوربه
تشريب كميه بسيطه جدآ + سلطه + شوربه
نظام الأكل يختلف من مختص لأخر على حسب الخبره والمعرفه
نظام الكابتن سالم مافيه حرمان او رجيم قاسي
والسبب لأن الحرمان يسبب بعد شهر او شهرين حاله ممله
وتخلي الواحد يفتح بالأكل وبشراهه ويخرب كل اللي بناه وخسره
ومنو فينا تتحمل تاكل كل يوم بيضه ولا سلطه ولا تفاحه خضره والى متى على هالحال
ولا عيش مشخول او سلطه او حبة تفاح او لحم ناشف
واذا طالعه زواره او معزومه شنو تاكلين تفاحه خضره هذه حاله بالله
واغلبكم تبع هالخطوات وبعد فتره فتحت بالأكل وخربت الاول والتالي ؟
اللي فهمته ومكتوب في جدول كابتن سالم ان الأنسان لابد ينوع بالطعام على شان لا يصير فيه هبوط او يتعرض للأمراض من جفاف في البشره او مرض الكلى او تساقط الشعر او قلة النظر او رجفه في اليدين
وأعتقد لازم التنوع في الطعام ومايصير نتبع نظام الحرمان
فربنا سبحانه وتعالى قال كلوا من طيبات ما رزقناكم
صدق الله العظيم
وفي بنات مسوين رجيم قاسي وكل يوم تفاحه وقطعة بسكويت وتنحف بسرعه وينزل وزنها خلال فتره بسيطه وتستانس ..
وبعد شهر او شهرين نشوفها انتفخت من جديد وصارت اكبر من اول
ولما نسألها شصار فيج وليش انتفختي .. تقول ماقدرت اتحمل النظام الغذائي ممل وفتحت بالأكل وكل هذا بسبب الحرمان من الطعام والرجيم القاسي للأسف
والحين نتكلم عن الحلو في رمضان والكثير منا صعب يقدر يقاوم الحلو
ولكن اللي عندها اراده وقوه تقدر
في نقطه مهمه متى ناكل الحلو والكميه شكثر؟
الحلو يفضل بعد الفطور من ساعه الى ساعتين على شأن نعطي فرصه للجهاز الهضمي تهضم الطعام بصوره صحيه وللاستفاده من الوجبه الرئيسيه
مشتهيه لقيمات .. مشتهيه قطايف بخاطرج بسبوسه
تختارين صنف واحد فقط
ومثال اذا لقيمات تاكلين حبه فقط .. واذا تبين بسبوسه تاخذين قطعه صغيره جدآ
تعادل حجم ال 100 فلس
واذا تبين قطايف تاكلين نص حبه لا تخلين شي في خاطرك .. اكلي بس بعتدال وبسنع .. غيرج محروم من الحلا ..
نبينا عليه الصلاة والسلام لم ينهانا عن الأكل بل أمرنا ان نأكل ولا نشبع ولا نسرف في الطعام
لا للحرمان نصيحه لكم
خلصنا فطور وأكلنا حلو واللي ماتبي تاكل حلو تعجبني قوتها وعزيمتها
الحين نلبس ملابس الرياضه ونتوكل على الله ونلعب تمارين خفيفه وبسيطه مثل رياضة المشي او الهروله او تمارين السويدي لمدة ساعه عالأقل على حسب المقدره والنشاط والوقت
على شأن نجدد الدوره الدمويه ونحرق المخزون من الدهون وبعض السكر والحركه في حد ذاتها مفيده وأفضل من القعده وتساعد في اذابة الدهون وشدالترهلات
نرجع للسحور وهذه نقطه اهم من كل اللي ذكرناه واتمنى تحرصون عليها
اليوم شلون كان اكلج .. اكلتي زياده خربطتي في الأكل
خففي من السحور ولا تكثرين من السكريات والنشويات وركزي على البروتين
وهالحجي اذا كنتي مخربطه تاكلين صدر دجاج او قطعة لحم مشويه مع بروكلي وشوربه وتصلين صلاة ربج وتنامين .. والماء ظروري جدآ جدآ لا تنسونه فهو مفيد في هضم الطعام ومفيد للجسم بصوره عامه
واللي ماخربطت في اكلها وملتزمه تاكل كميه بسيطه من العيش المشخول على شان يعطيج طاقه حق النهار انج تقدرين تروحين دوامج وتمارسين نشاطج المعتاد من غير ماتحوشج اي عوارض جانبيه مثل الصداع او دوخه او هبوط او رجفه
وتاكلين لحم او دجاج مشوي او بالفرن او كميه بسيطه من الباستا
او تمر مع لبن او فواكه حسب الأختيار والرغبه + سلطه وشوربه
وسلامتكم
الملاحظات .. اذا حسيتي في دوخه اثناء ممارسة الرياضه وانتي صايمه وقفي مباشره عن التمرين عشان لا يصير في هدم في البروتين المخزون في الجسم
المخلل ممنوع .. المشروبات الغازيه ممنوعه .. المكسرات في الليل ممنوعه .. الشيبس والكاكاو ممنوع ..
التمر مسموح ولكن بشرط ان لا نتجاوز الـ 7 حبات .. القهوه مسموح فيها ولكن كميه معقوله ثلاث فناجيل في اليوم .. روب قليل الدسم مسموح اذا لزم الامر .. الفيمتو وعصير التانك والعصائر الغنيه بالسكر والألوان والأصباغ مضره وتخرب النظام الغذائي وممنوعه .. مشروبات الطاقه تدمر الطاقه ممنوعه وفيها غازات تنفخ المعده وتبرز البطن .. ولكن في بدائل مثل عصير الرقي او عصير الرمان الطبيعي او عصير الجزر او عصير الخوخ او عصير التفاح
تعبت وانا اكتب ولكن انتوا تستاهلون وهذا القليل من الجدول .. واللي حابه تستفسر عن الجدول
تقدر تكتب في غوغل خبيرالتغذيه كابتن سالم
او تدخل في انستغرام عن طريق خانة البحث وتكتب بالعربي كابتن سالم
وتقدر تشوف التمارين وبعض الأرشادات
لا تنسونا بطبق حلو حبايبي وتقبل الله منا ومنكم:eh_s(7):