http://imageshack.us/a/img208/5589/8uy4.jpg
السلام عليكم وَ رحمه الله وَ بركاته
موضوعنا اليوم احس مره مهم ، لان اخذ ضجه كبيره كبيره ، اغلب البلوقرز وحتى البيوتي قوروز باليوتيوب اجانب او عرب تكلمو عنها .. عشان كذا حبيت اكتب هالموضوع اقطع الشك باليقين ههههه :p، تجربتي للمجوعه اكثر من سنه وماغيرتها ابدا يعني بتكون تجربه حقيقه ان شاء الله ..
بالبدايه اخذت عينات منها ، يبيعونها بنزيه مجموعه السفر وتكون متكامله بس باحجام صغيره ومعاها مشط بعد ، سعرها 120 ريال هذا الكلام قبل سنه وشي اكيد غيرو سعرها بعد الاقبال ، شعري وقتها كنت مو صابغته وعلى طبيعته فيه حيويه ولمعه بس يتساقط بشكل خفيف ، كان خالي من القشره تماما بس فروه راسي دهنيه واطرافها عاديه ، اول ماجربت المجموعه حبيتهااا .. حبيت الريحه اول شي وتطري الشعره ، الصابون اول شي ماحسيته ينظف بس طبيعي لانه خالي من البربان والسولفات الي بالمنتجات التجاريه ، بس شعري فتره وتعود عليه .. خلصت المجموعه ورجعت شريت الاشياء الي حبيتها وهي الماسك والشامبو ، وبعدين رجعت اخذت الليف ان كريم *الكريم الي تحطينه ع شعرك بدون غسل* واخذت بخاخ الزيت ورجعت شريت الماسك هههههه وباقي زيت الشعر موجود من اول مجموعه اخذتها ..
عجبتني المنتجات بالبدايه بس بعدين صبغت شعري وَ معروف الصبغه قد ايش تأثر ع الشعر وخاصه الي مو متعود عليها مثلي :| ونزلت صبغتي ورجعت صبغت فوقها وصار شعري مهرجان هههههه :D ، تساقط وجفاف ومافي لون او لمعه او حيااه ، استمريت ع المجموعه ع اساس بتفيدني وتطري شعري بس خاااب ظني فيها p: عطيتها فرصه اكثر من سنه وللان ماستفدت حتى تركت الصبغات عشان ارجع اهتم بشعري ! فخلونا نفصفص كل منتج بروح يلا ؟
زيت الشعر من مكديميا
http://imageshack.us/a/img402/6699/7jmu.jpg
زيت المكديميا للشعر .. يستخدم ع شعر جاف او مبلل تحطين منه شوي وتوزعينه ع شعرك ، وتقدرين تضيفينه لماسك الشعر لترطيب اكثر بس ماجربت! خفيف ع الشعر ومايدهن يعني هو من النوع الي تحطينه وتخلينه ع شعرك مايحتاج غسل مثل الزيوت الثانيه ، اجمل مافيه ريحته.
تجربتي : الفتره الاخيره صرت بعد الشور احطه ع اطراف شعري الي تقصفت من الصبغات والاستشوار ، يرطب بشكل حلو وريحته جميله وبس :| ماحس منه فايده ولا هو المنتج السحري الي ماتقدرين تعيشين من دونه :$ للامانه هذا اول زيت من هذا النوع استخدمه ، اقصد بالليف ان اويل يعني الي تحطينه وماتغسلينه ، فماقدر اقول هو الواو مقارنه بغيره ولا لا ، بس من الي شفته عادي وترطيبه مؤقت.
السعر : كان جاي مع عينات المكديميا الي ب120 ريال.
سبراي زيت الشعر من مكديميا
http://imageshack.us/a/img96/8560/srjh.jpg
سبراي الشعر من مكديميا ، هو زيت خفيف جدا او يسمونه mist تبخينه ع شعرك وخاصه الاطراف مو الفروه وهو جاف وتحاولين توزعينه بيدك ريحته خيااالييه ، احلى شي بالمجموعه ريحتها ♥ ، مكتوب عليه يرطب الشعر ويخليه صحي وناعم ويحميه ويعطيه لمعه وويتحكم بالشعرات المتطايره ، ياسلام البخاخ السحري اتعبت الشركات من بعدك كلهم سكرو خلاص ههههههههههه!
تجربتي : ماشفت ولانقطه من الي ذكروه ههههه ، بس هذا اخر منتج اشتريته منهم يعني ماصارله شهر ، يمكن يبيلي اعطيه تجربه زياده عشان اقدر احكم ! بس بشكل مبدئي ماحسيت شي واو.
سعره : 85 ريال
بلسم ملطف للشعر من مكديميا
http://imageshack.us/a/img94/7850/iuii.jpg
بلسم ملطف للشعر من مكديميا ، هو مو بلسم عادي لا ، هو ينحط بعد ماتخلصين من الشور والشعر مجففته ونظيف ومايغسل يستخدم للتصفيف وكل يوم.
تجربتي : هذا بعد من المنتجات الجديده الي اخذتها من المكديميا ، حسيته جيد مقارنه بالي قبله ، خفيف ويمتصه الشعر ، هل يستاهل تشترينه ؟ يس احس حلو وخاصه انو الشعر يحتاج كريم تصفيف بعد الشور ، بس مثل ماقلت صارله شهر حبيته بشكل مبدئي بس بشوف مع الاستخدام لو يستحق ولا!
سعره : 105 ريال
شامبو الشعر من مكديميا
http://imageshack.us/a/img21/7812/xzne.jpg
شامبو الشعر من مكديميا ،
تجربتي : بالبدايه اخذت عينه ماحسيته ينظف بس فتره تعود عليه شعري وحبيته ، حسيته خفيف ع الشعر وماشي تمام ، بعد ماصبغت شعري ، الفروه والشعر صارو جافين ، مع الشامبو الفروه قلبت دهني ! بس اطراف الشعر للان جافه :| فصرت استخدم للفروه شامبو غير واطراف الشعر شامبو المكديميا بس ماحس رطب شعري ولا اعطاه حياه مثل مايقولون وللان جاف ومافيه لمعه :"( بالبدايه حبيته جدا ورطب شعري وخلاه في صحه بس بعدين بعد الصبغات الشنيعه لا لا ..
سعره : 240 ريال لان ماكان عندهم الا اكبر حجم ،
ماسك الشعر من مكديميا
http://imageshack.us/a/img43/8642/65j3.jpg
ماسك الشعر من مكديميا ، لو تبون منتج واحد من المجموعه كامله ارشح الماسك وبس ، ماسك اصلاح عميق تحطينه ع شعرك بعد الشامبو وتخلينه 7 دقايق وتشطفينه تستخدمينه بس مرتين بالاسبوع ، هذي ثاني علبه اخذها وتجلس معك فتره.
تجربتي : يمكن هذا الشي الوحيد الي حبيته بالمجموعه ، الي رجعت شريته مرتين ، ترطيبه عميق في بنات قالو انو يدهن الشعر ، اي يدهن لانه ثقيل ماينحط ع الجذور بس الاطراف واذا باقي بيدك شوي كملي ع الجذور بشكل خفيف ، انا شعري دهني من الاساس احس شوي زاد دهنيته ؟ مدري :| ومثل باقي المجموعه بالبدايه عشقته تماما وبعدين خف حبي له وبعدين رجعت حبيته ، العلاقه بينا متذبذبه ههههههه ، قلت لنفسي لانه ممكن يكون اول ماسك غير تجاري استخدمه ؟ عشان كذا حبيته .. وممكن هو اصلا مفيد للشعر ، صرت ماقدر افرق هل المجموعه خيبت املي واخذت ضجه اكثر من اللازم او لا !
سعره : 180 ريال
الخلاصه ، كل بنت لها تجربه مختلفه عن غيرها وهذي تجربتي انا :
شعري كان صحي ولامع بعد الصبغات قلب اشهب جاف ، كنت استخدم المجموعه من قبل وبالاساس شعري كان صحي فحبيت المنتجات وبعد الصبغات المفترض انو المنتجات ترطب الشعر وتكون افيد لي بس ماحسيت باي اي اي فائده بعد سنه من الاستخدام بالبدايه كنت اقول الا حلوه والمفروض كل بنت تستخدمها ، بس بنت خالتي العبيطه مرسله لي صوري لما كان شعري اسود وكان يلمع مره وناعم فعرفت الحين وضع شعري ابدا مو كويس والمنتجات مالها فايده كبيره هههههه ، وفي نقطه مهمه جدا ، المويه ! مويه بيتي جدا مو حلوه فقلت يمكن تأثر ع الشعر عشان كذا المنتجات مافادتني بس انا بعد كل شور اخر شطفه دااايمااا مويه صحه ، فهل هذا يفرق ولا الله اعلم p: وبالنسبه للتساقط شعري صار يتساقط اكثر بس المجموعه هدفها ترطب الشعر مالها علاقه بالتساقط ، سمعت بنات يقولون فيه سيلكون ؟ مادري صراحه بس شعري تساقط بشكل اكثر وصرت اشك بالمنتجات وسوست ههههههه ، وكل شعر يختلف عن الثاني وكل بنت تجربتها غير .. بس هذي تجربتي بشكل كامل ، السؤال المهم :
هل أشيل فلوسي لمنتجات افضل ؟
افضل نصيحه ممكن اقدمها لك ، اشتري عينات او اطلبيهم وجربي بنفسك التجربه خير برهان ، بس عن نفسي لا ماراح ارجع اشتريها وبدور اشياء طبيه بعيدا عن الدعايات وغيره .. وان شاء الله اكون افدتكم ،، اعذروني ع التنسيق مو صحبه معاه ، نزيه له افرع بالكويت بعد :rerrerek:
لاتنسون تتابعوني ع الانستقرام والتويتر ومدونتي الروابط موجوده بالتوقيع :eh_s(7):
اشوفكم بمواضيع جديده باذن الله :eh_s(15):
