عروس ماكملت شهر ضايقه فيني الدنيا وابي الطلاق

السلام عليكم ..

بنات انا ترددت اكتب مشكلتي بس منجد تعبت وحاسة الدنيا ضايقة فيني بقووة

انا مالي شهر وكم يوم متزوجة خليني اتكلم شي بسيط عن حياتي اول شي لما سالو اهلي عن زوجي لانه من غير قبيلتنا مدحوه انه طيب وجامعي ويشتغل ومكافح لما وافقت

وسويت الملكه حسيت انه عصبي وبخيل كثير قلت ماعليه يمكن حريص سويت حادث وحمدت ربي اني ماامت ونفسيتي كانت زي الزفت وهو لا سؤال لا اتصال ولا هدية
الناس جات تتحمد بالسلامه وهو اخر واحد خالتي (( امه )) اعطتني سلسله ذهب وعصيرات وكذا
من عرف تجنن بغى ينجلط

وماله داعي وليش ومن هالكلام زعلت وانقهرت من الاسلوب ماتوقعته كذا بهالفترة ماعطاني غير مهري يادوب كفاني ودبلتي بسسسسس !!! ولا هدية ولا اي شي حالي حال اي بنت مخطوبة

بعد الزواج نفس الشي ماعطاني حتى ريالين بيدي ادري بتقوولون ابالغ بس ربي شاهد على كلامي
وماجاااب لي ولاشي ابد ابد وماحسيت كأني عروس تخيلو خالتي (( امه )) من ثاني يوم طالعه داخله وتتعشى معنا واللي ناقصها تجي تاخذها ولاكأني موجودة بالبيت !!! وعلى هالحال لين خرجت من لبيت

قلت ماعليه يمكن متعودة وهو تضايق بس من وجودها ونا اللي كنت اصبره واقووله ماعليه وكذا
لا الوضع زاد عروس ماكلمت اسبوع تدخل علي حريم كبار بالسن ونا صنم وش اقول وش اتكلم مو ولا عليها فيني عصبت زعلت بالطقاق اهم شي يشوفون بيت ولدها وانها تمون وعادي تفكيرهم مادري كيف معقوولة اكتشفت اني مخدووعه لا يشتغل ولا يدرس وبخل فوق كل هذا واسلوووب والله العظيم زي الزفت

تعبت وصرت احلم بكوابيس واختناق واحساس الموت مايفارقني رحت بيت اخوي
اخوي وزوجته الله يعطيهم العافيه قامو فيني ودوني مستشفى يقولون مافيها شي ونا احس بالموت وقلبي بيووقف والم
شالني عند شيخ من قرا علي تنميل واتصروووع واصرخ واضرب نفسي
استمريت اسبوعين على هالحال بعدها اخوي وداني عند شيخ معروف ويقولون متمكن يقولون
رحت قرا عليا اصرخ وابكي وارتجف قال فيها حسد وسحر بس اتصرووع وانتفض واستفرغ (( كرمتوا ))

مسكينه زوجة اخوي كأنها اختي واكثر وقفت معاي لدرجة اني مقدر ادخل الحمام لحالي تدخلني وتوقف تستناني وتعطيني الادوية ولا جا الشيخ واو رحنا معاي بكل ووقت والله ماعرف كيف اشكرها
بس ادعيلها وين ماراحت وين ماجات على اللي سوته معي هي الوحيده اللي احسها تفهمني وتحس فيني الله يجزاها كل خير يااارب
للحين على هالحال كل يوم ادعي ربي على من وصلني لهالحال

بكل هالوقت زوجي ماعطاني ولا هلله كل المصاريف على اهلي الله يخليهم لي من ملكت وهو ماعطاني ولا ريااااااااال واحد وكل ماكلمته يقولي ماتفهمين بصراخ انتي مريضه خليك بيت اهلك وامك مو محترمة ولو مو عاجبكم الوضع الباب يووسع جمل انا هنا من الصددمة حسيت قلبي بيوقف والله خلاااص فوووق مرضي وصحتي المتدهورة يقول كذا ؟ قلت ياالخايس ماغيرك اللي مو محترم تغلط على امي يا يا يا بعدها رجعت لي الحاله ورحت للشيخ على طوول جلست 3 ايام ماغير اتشهد واحس اني بموت حسيت اني كبرت اكثر من عمري بكثييييييييييييييير والدنيا صغيرة حيل حيل بعيني وندمانه كان قصرت بحق ربي اقول لله يغفرلي ويشفيني وماغير بلساني حسبي الله على من وصلني لهالحال حسبي الله على من ظلمني ماغير اتحسب وادعي من وسط قلبي

قلت ابروح الحرم وادعي من وسط قلبي على من وصلني لهالحال

مهما قلت ومهما تكلمت ماحد بيحس كثير بلي احس فيه الا اللي انسحرت وانحسدت
شالني زوجي كذب علي قلي بوديك اسوي فحص على جسمك كله الصدمة !! موديني عند دكتورة نفسية وجنسية !! ولا تأثرت دخلت عندها وتكلمت معاها كل لها كل الصفات اللي فيه واني للحين بنت وانه مو رجال بكل شي مو بس بهالشي عطتني كلمتين واعطتني ادووية قالتلي يابنتي انتي مافيك شي

مو مقتنع ان احد من اهله سحروني ابد الشيخ كل مايقول مرشوش مشررووب حالتي تنقلب فووق تحت وتنميل واصابعي تتلوا مرة نطق اللي فيا وقال اهله

قاله في احد يدخل شقتها قال اي اهلي تخيلوا ماكأني متزوجة يدخلون حتى غرفة نوومي عادي عنده!! حريم يدخلون بغيابي عادي !! قاله الشيخ رش موية وفتش الشقة كلها بتمعن مو شرط السحر شي باين يمكن لبان .. او معجوون وهذا من اشد السحر يمكن متخيط لها بالتماثيل بالهدايا اللي جاتها

برضه مو مقتنع ابددد استغفرالله اقول الله لايوري مسلم اللي شفته مو حاس فيني وحاط اهله ملاك
انا الحين اكرهه مو طايقته بعد اللي سواه فيني وابي الطلاق ومصممه وارتاح لا بعدت عنه صرت اكرهه كررره مو طبيعي وهو مو ناووي ابد اذا جبت هالسيرة يسب فيني وبأهلي ويعصب ولا يبيني اعتذر بعد

اشياااااااااء كثير خلتني اكرهه اقوول ياليتني بنت ولا تزووجت بس قدري ونصيبي
تكفوون ادعولي انا تعبانه تعب مايعلم فيه الا الله