بنات انا ميته حره ( تكفون ابيكم تساعدوني وتدلوني على الصح )

السلام عليكم ورحمه الله وبركاته




شخباركم بنات شلونكم ؟
انا عضوه قديمه جدا اهني ومشرفه بعد بس ماحبيت احط الموضوع بنكي الاصلي لامر خاص ..



بنات انا بعرض عليكم حياتي وانتو قولولي رايكم بشرط !
رجاء بنات .. ( بدون سب _ بدون هواش _ بدون تعدي لا علي ولا ع الشخص الي بتكلم عنه )


بنات انا توني يقولون اني عروس ملجت قبل شهر ونص او شهرين تقريبا ..
الشخص الي خذيته الكل يشهد له بالخير والخ من هالخرابيط ..
بس بنات انا حيل حيل حيل محتره .. انا ادري ان كل واحد فينه ياي من بيئه مختلفه ويبيلنه عمر عشان نتعود على بعض بس في اشيا تحر تطلع الواحد من طوره !
ابسط شي ان مافكر بيوم يطلعني ابدا ولا انا الي ابي اطلع بس شكو مايقول تعالي نطلع نروح نرد اي شي ابي مبادره منه مارح اوافق يمكن بس خل يقول خل يتحجى !
العرس اهوا واهله سااكتييين معنى متحدد وقت العرس وكل شي .. زين مو معقوله جك بوم كل شي يصير وبين يوم وليله هذا يبيله شغل حجوزات وغيره وغيره ..
ولما كلمني فجاه قال ودي لو ناجل العرس .. خواتي يقولون شلون نفرح وامنه مريضه !
ويابنات امهم تكح وصدرها يعني مو انسانه بتموت .. بس هم ع عيني و ع راسي انسانه تربيت واعرف الاصول سكت .. فقالي انا اشوف ناجل العرس شرايج تخيلوا بعدني ماقلت رايي الا يقولي انتي لو من اهلج لاسمح الله جان اكيد بتلغين العرس او تاجلينه !!
احترققققققققت من القهر شكو يقولي هالحجي .. عصبت حزتها وقلتله ترى خالتي حسبه امي واهيا امي الثانيه وعلى عيني و ع راسي ولها كل احترام وتقدير وحب ولو تقولي اجلي العرس باجل اكيد ماله داعي الي قلته كلش !
الا يبي يطلع نفسه صح وقام يقولي شفيج عصبتي قلتله طالع نفسك شتقول ! قالي اي الواحد قام مايعرف حتى يتحجى .. ليش شنو فيه ومايعرف يتكلم الواحد ...

شي ثاني بنات سالفه السفره اول كنت ساكته وقلت اكيييد اهوا فيه الخير وبيشوف الموضوع كامل شكو اتعب نفسي ..
فجاه قلتله حبيبي متى ناوي تحجز وتسوي ترى الموضوع موحلو يصير جذي بدون ترتيب .. دق علي جان يقول اي ترتيب كلها الامارات بنروح !!! تخيلوا شهر عسل بالامارات عسى ماشر ان شاء الله !
ابتسمت انا ولا قلت شي قلتله والله مادري وماحبيت اكسر كلمته وقال بشوف و الخ من الكلام التسكيتي !
المهم ياني بعدها زارني وقام يتكلم ان شلون الامارات حلوه وعجيبه و و و ... زين محد قال شي بس ترى مو شهر عسل لا الخليج ولا ماليزيا ولا تايلند بروحي مادانيهم !
جان يقول اي اي ترى ماعندي انا حق اوربا ولاعندي حق هالدول ... واخته قايله بيسرفني يوم قعدنه ..
قلتله اختك قالت بتسفرني والسعوديه او البحرين او الكويت او قطر او الامارات الخليج بشكل عام مايعتبر شهر عسل ولاشي الناس تروح ويكند هالدول وترد الواحد يبي يشم الهوا ويغير جو ويبي طبيعه !
جان يرد علي عيل جان كتبتوا بعقد الزواج هالكلام ويضحك .. شكو يتكلم بصيغه الجمع ودخل اهلي مت قهر !
قلتله الحمدلله مو هذا طبعنه ولا ع جذي تربينه ولا هذا سلونه
انا بسافر ابي اشوف طبيعه استانس قلت له المفروض انت تخطط حق هالسفره وتتحمس مو انا الي قاعده احاتي !
قال شفيج مصعبه الامور انتي الحين اي مكتب سفريات ويسوي لي قلتله اوكي شلون تروح حق السفريات واهما اغلى وانت ماعندك فلوس احجز من النت كل شي
قالي ع فكره ترى مو شرط نسافر اصلا وفي وايد حريم اهما الي مايبون يسافرون اصلا قلتله وانا مالي شغل بالي مايبون يسافرون كل واحد اهوا وعايلته يقرر قرراته بنفسه كل واحد حر بتصرفه اهيا ماتبي وريلها مايبي كيفهم انا موو لازم اصير نفسهم كل واحد عنده شخصيه بنفسه !

حدي محتره يابنات والله منقهره اتمنى لو ماملجت اصلا .. انسان فوضوي ججدا يفتقر حق شي اسمه تنظيم بالحياه وانا احب حياتي تمشي منظمه مرتبه الحجوزات وكل شي بموعده ..


يمكن تشوفون كلامي عادي او تحسون مافي مشكله .. بس انا احسها مشكله والله ان اهوا مفضل نفسه علي ..
وكله انا وانا .. ( يقولي انا الي عمري مارحت اوربا ) ومنو تكون انت !
كيفك لاتروح انا ابي اروح واشوف حياتي مو ملزومه ادفن عمري بالحيا وبعدين قال اصلا انا المفروض اسافر اروح علاج من الاساس يعني مستخسر علي السفره !
شدعوه عليه كلها تذاكر وحجز فنادق لا انا ام سوق ولا ام تشري واغراض ...
انا قايله حق امي عن السوالف .. وامي اتصلت تسللم عليه وبس سالته شنو الدوله الي اتفقتوا تسافرون لها تخيلوا يقولها السعوديه امي انصدمت قالت له السعوديه يعني هذي اي وقت الواحد يقدر يروح لها ... تخيلوا انا مادري امي مكلمته اتصل علي يقولي شنو متفقين عليه انتو !!
شنو شايفنه عصابه ولا شنو .. شكو متفقين !
هذا غير لما يدق علي كل مره يعيد نفس الكلام هذا وانتي خريجه جامعه تسحبين علي اذا اتصلت اذا خذيتي الماستر بعد يومين يمكن ماسمع صوتج بعد .. بيه ! وين قاعدين يبا حده معقد الحياه ومعقد حياتي ومنكدني من اول ماملجنه ما قال سالفه فيها خير كل سوالفه نكد بنكد ..


اتمنى من الي عندهم خبره يردون علي ينصحوني يرشدوني يساعدوني والله ادعيلكم بظهر الغيب ..