استغلي فلوسج صح .. وجهزي أحلا جهاااز ..

بسم الله الرحمن الرحيم

أنا عروسة و احس بفضل الله فلوسي كفت ولله الحمد وجهزت احلاااا جهاز

مع ان توة ملجتي وباقي على عرسي شهرين وشوي بس بفضل الله اعتبر خلصت تجهيز

شلون ؟


اول شي انتي يا عروسة قبل لا تتزوجين كان عندج ( ملابس كشخة و جناط و ساعات )

شنو خطتي الي فادتني بجهازي ولله الحمد



انا البس عباية اصلا فبطبيعة الحال ملابسي اغلبها مو حق متحجبات او ضيجة وموديلات ترصرص لان كل لبسي بين حريم

فشنوا سويت ؟

ملابسي إلي حق يمعات البنات و حق الزوارات ( منهم تنانير و شيفونات وحراير و موديلات مختلفة و بنطرونات ) هذيلا حق الريال لا ياني البيت بلبسهم حقه طول فترة الملجة باذن الله


فتجهيزي شتو محتاجة ؟ محتاجة بدل حلوة وساترة حق حملوتي لا زرت عندهم

فانا ما جهزت الا بدل حجاب


ثانيا ً : من الاساس عندي جناط ماركة + وساعات ماركة و لله الحمد انا من الاساس كان تقكيري اذا سافروا اهلي اوصيهم يشترولي جناط المازكة الستاندر الي ما تروح موضتها الي على طول موجودين مو موضة وتروح ومحافظة عليهم

ونفس الشي ساعات ماركة من قبل .. عندي بني وذهبي و اسود وسلفر



اغلب البنات عندهم وتطير مهرها واهيا عندها انزين ليييش ؟! الحمولة و الريال شدراهم ما شافوهم اصلا ؟!


تخيلوا انا ما شريت ولا جنطة ولا ساعة دام عندج يا حلوة قطي فلوسج على اشياء مو عندج



تدرون في جم بنت اسمع من صوب حمولتهم ان ما شفنا عليها جهاز تدرون ليش ؟ لان جم بنت اعرفهم من اهلي شتسوي الحلوة .. ؟

جهازها اليديد كلللله تلبسه بالملجة فالريال شبع منه لا وصلت الشقة ماكو شي يديد الا قمصان النوم كل الهدوم الي جهزتهم حتن الملابس الداخلية لابستهم بالملجة على ابو انها عروس


نصيحة نصيحة كل شي يديد خليه حق بعد زواجج لا تستخدمين كل شي بالملجة ..

اهوا مو شابف اغراضج القديمة والحمد لله كل بنات الكويت كشخة ولبيسات ومو ناطين المهر

انا المهر قطيته على بدلة ملجتي و على شبكتي خذيت شبكة تبرد القلب


انزين كل وحدة تدرس ظروفها ..

في عروس راح تسكن مع حمولتها فلازم يكون بجهازها دراريع ولا ملابس حلوة تروح فيهم كل يوم حق الحمولة

في وحدة لا والله مو ساكنة عندهم

كل وحدة تشوف حالتها وتجهز على اساسها

يعني انا بسافر فترة طويلة ان شاء الله مع زوجي بعد العرس

فبالطبيعي راح احتاج اكود ملابس طلعة حق الحمولة ؟ ولا دراريع ؟ ولا جناط ماركة ؟


جهازي اغلبه حسب ظروفي تحتاج ملابس بيت متنوعة من قمصان نوم وبجامات لان ظروفي جذي + انا البس عباية غير جهاز البنت الي تلبس بدل



فنصيحة حبيبتي لا يغرج عروس عروس عروس !


وخليج ذكية حبيبتي الحين موسم تنزيلات وللاسف مو الكل يستغل التنزيلات عدل

التنزيلات حلوة وفرصة حق العروس الي منظمة افكارها

تدرون ان الاغلب تطير فلوسه على هالتنزيلات ؟

ليش ؟ لانها تشتري من التنزيلات اشياء مو محتاجتها

تناتيش تناتيش على ابو تنزيلات الا طاروا ألف وانتي مو حاسة

لاا الحلو انج تشترين الي محتاجته اصلا من التنزيلات

خليج انتي المستفيدة .. انتي مشتهية هالعطر فشريتيه واستفدتي ان بتنزيلات .. بس ما تشترين عطر لان اهوا سعره زين و بالتنزيلات


و حتن بالتنزيلات اقعد بالمحل 3 ساعات انقي و اقيس كلللل قطعة لان في اشياء باللبس مو حلوة

ولله الحمد افرح ان اغراض انا صج محتاجتهم مجموعهم ب 400 و 500 وانا بالتنزيلات خذيتهم ب200



الله يوفقكم يا عرايس وسامحوني على كثرة القرقة بس احتر من العرايس الي يروح مهرهم على خرابيط
واشياء ما تحتاجهم ..