إنما أشُكو بَثّي وحُزني إلى الله..

http://i.imgur.com/ld6c0fn.jpg

الحمد لله كما ينبغي لجلال وجهه وعظيم سُلطانه ..

ربي ها أنت ترى مكاني و تسمع كلامي و أنت أعلم من عبادك بحالي ربي شكواي لك لا لأحد من خلقك..

السلام عليكم ورحمة الله وبركاته..

شلونكم خواتي ان شاء الله تكونون في احسن حال..

اسمحولي ع القطاعه ..

الحمد لله

توني طالعه من المستشفى كنت مرقده
بسبب هجمة كانت على العصب البصري
العين اليسرى ..
وتنمل وثقل على الرجل اليسرى ..
وصداع مزمن ماسك الجزء الايسر من الراس والرقبه ..
والحمد لله رب العالمين ..

ما اخفيكم حالتي النفسيه شلون كانت
الحمد لله .. حزنت وتألمت وبكيت وايد
ضعفت ويأست وتعبت وبكيت وبكيت وبكيت وايد وايد ..
حسيت كنت شاله بقلبي وايد
بكيت كنت ماقدر اشوف الاشيا راكبه على بعض ماقدر اميز الالوان ..
ماقدر امشي عدل مافي توازن
كلامي غلط مخربط اتأتأ ..
كنت امشي رايحه الحمام طحت وفحزتها انهرت بكي صحت من كل قلبي ..
حسيت اني ضعييييفه حزنت على نفسي
ان حتى الحمام ماقدر اوصل له ..
مهما كان انا بشر اتألم وازعل يحز فخاطري ..
السستر كانت هنديه تمت تصارخ علي تقول لي ليه ماناديتيني ..
انتي لازم كرسي انتي ماتقدرين تمشين انتي بروبليم .. انهرت
في هالوقت دخل ريلي
وهاوشها شلني وانا انهرت اكثر انه شافني بهالحاله ..
بنات ماكنت ابي يشوفني بهالحاله ..
كنت متهاوشه معاه قبل ماتعب يعني سوء تفاهم بس انا كنت حاسه ببداية هجمه وسايره حساسه زياده ..( اتسبب عليه)
طبعاً شلني وتم يقرا علي ويمسح دموعي وعطوني مسكن ونمت مادريت بشي
قمت لقيته عندي .. زعلت زياده ان كان بينا خلاف وهو قاعد عندي ماتحرك ..
حسيت بتأنيب ضمير ..

المهم تميت 3 ايام ورديت احاتي شنو اقول ل امي ..
طلعت عذر بايخ طبعاً ماصدقت وتمت تقول اطلعي مافيج شي ليلعبون فيج ..
قلت لها بس اخلص المضاد ( اقصد الكرتزون) واطلع
قالت اطلعي انا بسوي لج شوربه وغذاء صحي ومافيج الا العافيه ..
قلت لدكتور ابي اطلع قال ماتقطعين العلاج
المره الي فاتت قطعتي العلاج
انتي العصب عندج رايح
قلت بطلع وبرجع باجر اخذ جرعتي من الكرتزون
قال لا ما اظمنج
تميت اصيح وفهمته الموضوع كامل ووافق بالعسر
فعلاً طلعت وتميت 4 ايام اروح اخذ جرعتي كرتزون 3 ساعات بالوريد
واطلع البيت

الحمد لله
مابي اتكلم عن الالم الي خلفها الكرتزون
متعبه ومؤلمه جداً جداً جداً
بس كنت احتسب الاجر واردد( اللهم آجرني في مصيبتي واخلف علي خيراً منها)

للحين اعاني من الم الكرتزون

بنات شعر حاجبي طاح !!
احس اسناني اتخلخل !!
قلت لدكتور قال طبيعي من الكرتزون قال الجرعه كبيره عشان نحاول نسيطر ع الهمجه..
الحمد لله على كل حال
انا كنت اخذ كرتزون في ال iv room
وحذاي وحده تاخذ كيماوي
كنت اصيح من الألم ويوم دردشة معاي وسالتني شنو تاخذين وسالتها شنو تاخذ
قالت لي كيماوي
( اللهم اشفيها شفاء لايغادر سقم)
حسيت نفسي تافهه جداً
الحمد لله انا ملكه عندها ربي لك الحمد
شنو (ام اس )مقابل (سرطان)

!!
الحمد لله ربي لك الحمد
تميت احمد ربي واشكره
ورجعت عزيمتي وقويت ايماني ان كله خير لي
الحمد لله ..
كل شي ربي كاتبه لي قبل ما ينبض قلبي في رحم امي .. كل شي مكتوب لي بعيشه بالثانيه بالدقيقه بكل رضا بأذن الله
ما اطلب الا ان ربي يعيني على نفسي واقدر اروضها وأدبها ب الاستسلام بقدري ان كله خير لي ولو ان اشوفه تعب والم ومرض بس متأكده وواثقه ان كله بيرجع لي اضعاف من السعاده والاجر بأذن الله ..
الحمد لله ..


انا حاليا كملت 10 ايام من طلعتي من المستشفى ..

كنت مخططه ع الحمل
بس الحمد لله على كل حال
ربي لك الحمد.. لم يأذن لي الله
وفيه خير هالتأخير ..
الاسبوع الجاي عندي تصوير mri
لدماغ والحبل الشوكي ..
عشان يعرف الدكتور مدى تأثر الدماغ والحبل الشوكي بأخر هجمه واذا فيه نقط اكتيڤ
ارجع آخذ كرتزون ..
السم الجميل ..

الحمد لله ربي لك الحمد ..
انا اسفه على القطاعه خواتي كلكم اسمحولي
واختي عياره .. سامحيني ..


خواتي ادعوا لي بالثبات والصبر الجميل على قدري ومرضي
الى ان يإذن لي ربي بالشفاء

إنما أشكو بثي وحزني الى الله

ربي شكواي لك لا لأحدٍ من خلقك ..

الحمد لله ..

اللهم صل وسلم على حبيبنا محمد بن عبدالله

اللهم اشف مرضانا وجميع مرضى المسلمين
اللهم ارحم موتانا وجميع موتنى المسلمين
اللهم امين