( مواقف رمضانيه طريفه ) الحلقه 1 والضيفه أهداب
السلام عليكم ورحمة الله وبركاته
حبايبي اعضاء منتديات غرابيل ,,,, كل عام وانتم بخير
هذا موضوع المفترض أن يكون مع بداية هذا الشهر الكريم ولكن الفكره لم تأت الا بوقت متأخر وفكرة الموضوع هي في كل حلقه سيكون معنا ضيف او ضيفه من أعضاء غرابيل ليحكي موقف من مواقفه الطريفه ولكل منا مواقفه الطريفه ,,, وسنتناوب انا واختي الغاليه فش فاشه على تقديم ضيوفنا الأعزاء تباعا ً وسيقتصر دورنا على هذا اما التفاعل فسيكون بينكم وبين ضيوفنا الكرام فتابعونا ,,,,,
ضيفتنا للحلقه الأولى مميزه جداً ( والكل مميّز هنا ) ولكن تعاملها الراقي فرض احترامها على الجميع وبشهادة الجميع وهي الأخت الخلوقه :
أهداب
نترككم مع الموقف ترويه لكم أهداب بقلمها واسلوبها الممتع :
.......................................
فيه قريبة لنا عجوز وكبيرة سن ومن عرفت الدنيا وهي كبيرة ونقول لها جدة
ونهتم فيها ونراعيها .وهي وحيدة تسكن معها خادمتها .
فيه يوم طلب الوالد انه نأخذها إلى المستوصف للكشف عليها وخاصة انها اخذت مدة وهي طريحة الفراش.
دخلت بيتها ثم غرفتها وجلست عندها اسألها عن حالها وهي تشتكي وتشكوى (كبدي وعظامي ومفاصلي ..
الخ) قلت طيب هيا معي ابي آخذك للطبيبة .
قالت أنتي من ؟؟؟
قلت فلانة بنت فلان
قالت يالله حيها وحي من جابها .
عاد أنا فرحت وخاصة أنها تفقد التركيز على التذكر
طلعت من الغرفة ورحت أجيب عبايتها ودخلت عليها وقلت يالله ياجدة..
قالت : أنتي من ؟؟؟
قلت :فلانه بنت فلان
قالت :تعالي أحب خشمك يالله حيها وشلون أمك ؟؟
قلت :يالله أنك ترحمها
وتابعت قولي هيا معي ..
وطلعت أحضر لها شبشبها (حذاءها)
ودخلت عليها :قلت لها يالله ياجدة ولمتي نفسك تبين تروحين مكان قبل نطلع؟؟
قالت :أبك أنتي من ؟؟؟
قلت :انافلانه بنت فلان
قالت: يالله أنك تسلمها وشلونك عساك بخير
قلت :انا بخير زان لونك وأهلي كلهم بخير
وذكرت (أدويتها ) قلت أبي آخذها علشان يشوفها الطبيب ويشوف وش تأخذ من علاجات..
ثم تذكرت وقلت مالي الاّ آخذها معي وأنا خارجه وهي في يدي ..
ثم ركبنا السيارة ..
يوم وصلنا إلى المستوصف ..
قلت لها هيا ياجدة وصلنا ..
قالت : نعنبو ابليسكم ..تضحكون علي وتأخذ وتصك رأسي بعصاتها
قلت وراك ياجدة ..؟؟
قالت والله أنك تكذبين ..حنا ماتحركنا من محلنا ؟؟
عاد ما مسكت نفسي من الضحك ..
وقلت الله يسلمك هذي سيارة (؟؟؟)ماهي ناقة ولا جمل ولا ونيت
حولي الله يعافيك ..
وأنا أدخل فيها إلى صالة المستوصف .وأدور استراحات النساء
وأخوي يفتح لها ملف كشف.
ودخلنا وما أن قلت السلام عليكم للحريم اللي قبلي جالسات ألا والعجوز تقوم تقف تبي يسلمن عليها ..قلت
استريحي ياجدة هنا وأنا اساندها .
قالت قطع ثم قطع ..
هذلي أكيد بنات ذوي فلان (ناس تكرهم وبيينهم مشاكل)
قلت لا ياجدة حنا في مستوصف وهذلي حريم يراجعن ويكشفن ..
قالت : وش فيهن أشوفهن فسقانات كل وحدة تأكل من أنعام ربي لين تصر أذنها
ثم تنخر على مخدتها (وندوسية)(قصدها أندنوسية) تخدمها
عاد أنا تفألت خير قلت أشوى إلى الحين ما ضيعتني ..ولا نست أنا من ؟؟
جلسنا حول العشر الدقائق ..الا وصيحتها ..
أنتي ..وتدق فيني ..
قلت هلا ..
قالت: الخصار (قصدها البرد) قطع قلبي
هاتي لحاف ..
قلت أبشري ..وأستأذنت المراجعات أن أقفل جهاز التكييف وأن أقدم دورها
عاد ماقصرن قالوا تفضلي ومايصير خاطرك الا طيب..
دخلت فيها على الطبيب..
وجلسناهها على السرير..
وجاء الطبيب .
يبي يكشف عليها .
قامت تصايح والله ما أكشف ستري عليه ..
وجلسنا نحاول فيها هذا الطبيب ممتاز وماهنا خلاف وأنتي بحسبت أمه .والله رفع الحرج عنك ..
دينها وألف سيف ماش ما يكشف عليها يعني مايكشف
بحثنا عن طبيبة باطنية مافي .؟؟
والنتيجة ..
رجعنا البيت وما أن دخلنا الا وتقول لي ..
ماتعلميني الولد اللي معنا منهو
قلت :ذا أخوي فلان ..
قالت :أهو طيب ؟؟
قلت :فسقان ماغير يأكل من أنعام ربي لين تصر أذنه.
قالت : وليه ما تزوجونه <<<---أحترت في كلمتها وشلون عرفت أنه ماهو متزوج وهي ماتعرف أسمه
ومن مواقفي معها ..
يوم تبي تسير على أحد (ناس تذكرهم ماتوا من سنين )اقوم أخذها وادور فيها الحوش مرة وثنتين وارجعها واقول مالقيتهم .ولا أطق بابها نفسه وادعي انه بيت اللي تبيهم واقول مهنا أحد..
وسلامتكم
==================================
ألف شكر لضيفتنا العزيزه حضورها ومشاركتها
ويعطيكم العافيه
