واخيرا عرفت البرنامج

واخيرا عرفت البرنامج

حبايبي انا قبل فتره كتبت موضوع انه بجوال زوجي برنامج مجنني مثل الشات طول الوقت وهو فاتحه حتى مرات اصحى نص الليل الاقيه ماسك الجوال !! سألته كذا مره عنه كان يتهرب او يقول العب بس واذا دخلت عليه فجأه يطفي البرنامج ويحط لعبه مسوي نفسه بريء المهم زوجي عطاني جواله اشوف صوره وستغليت الفرصه وقلبت بجواله وعرفت البرنامج طلع قل هاي نزلته على جوالي وطلع برنامج وصخ كله صور وكلام قذر وحذفته من عندي المهم انا محتاااره شنو اسوي ؟!!
اتصلت على استشاريه اسريه ونفسيه وقالت لي لاتواجهينه ابدا خليه على راحته فتره وتمر وقالت لي الحين اذا جتك الدوره مو قبلها بكم يوم تكون نفسيتك مو زينه ؟الرجال مثل المره تجيه الدوره كل سته شهور وتكون نفسيته مو زينه واذا عنده بعد ضغط بالشغل بتزيد النفسيه فينفس عن نفسه بالبرامج هذي فلازم تتحملينه اعتبريه طفلك الثاني ومثل ماتهتمين ببنتك اهتمي فيه ولاتفكرين تواجهينه ابدا لأنك اذا واجهتيه خلاص ماراح تفرق معاه وبيقول خلاص عرفت ويتمادى اكثر خليك غامضه مايدري انتي عرفتي اولا ؟ وهل صدقتيه لما قال العب اولا ؟!! وراح يفكر فيك ويحسبلك حساب .
المهم انا بعد كلام الاستشاريه الغيت فكره المواجهه وعجبتني نقطه الغموض فلما صحيت من النوم ولقيته ماسك جواله سألته قال اصحابي قلتله معقوله اصحابك بيراسلونك لساعه * وبكره عندهم دوام؟!! وتعابير وجهي تقول كذبه مكشوفه وقلتله الله العالم شنو فاتح ودرت ظهري ونمت وصحيت الصبح وماكلمته اي كلمه اخذت بنتي وغيرت لها ورحت المطبخ اسوي لي فطور تجاهلته تماما المهم على غير عاده اتصل علي الظهر يسأل عن الغدا ورديت عليه طبيعي هلا عمري كيفك بطول ترجع بالسلامه
ورجع بدري وسأل اش فيك الصبح كأنك معصبه قلتله لا ولاشي
وطوووول اليوم يتكلم عن اللعبه وكيف انها حلوه ويراسل ناس معاه باللعبه !! على باله اني غبيه واخذته على قد عقله وقلتله ينزلي اللعبه
وصار حذر جدا اذا رجع البيت مايمسك الجوال الا اذا كنا عند عمتي واذا نزلنا شقتنا مايفتح البرنامج
بصراحه عجبتني فكره الغموض بس الله اعلم إلى متى بصبر خايفه اني ما اتحمل وانفجر بوجهه واقوله اني داريه شنو يشوف وماني هبله بس اتعوذ من ابليس واحاول اتصرف عادي
والاهم من هذا طبعا اني احاول اقوم بالليل اصلي وادعيلي وادعيله وربي يهدينا ويصلحنا ويصبرني وما انفجر فيه