خاني وضربي وأنا ألحين في بيت أهلي ساعدوني

السلام عليكم
حبيبتي أنا أول مره أكتب موضوع وبصراحة يأست ماعندي حل مع زوجي،
من أول ما ملجنا واهو مشاكل على أتفه الأسباب مثل العرس وتجهيز البيت كان يهدد بالطلاق عشان يضغط على أهلي عشان يدفعون، بصراحه أنا من عائله غنيه وشكلهم كانوا داخليين على طمع وكلا سبونا ندفع، المهم أي أهل مايبون بناتهم تطلق ماعندهم حل غير أنه يدفعون عشان تمشي الأمور، وتزوجنا لدرجة أنه دخل العرس حتى ما يكلمني بسبب مشكله أفتعلتها أمه الله بتسامحها.
خلال ثمان سنوات أكتشفت أكثر من مره أنه يخوني ودائما أكتشف خيانته عن طريق مسجات من بنات حقه وكل مره أزعل منه ويراضيني ويتأسف ويوعدني ما يكررها، خلال هذي السنوات ضربني 5 مرات كانت الأخيرة عندما واجهته بوجود مسجات من وحده في تلفونه وطلبت منه الصراحه وما هي أسباب خيانته وماهو العيب فيني؟
طبعا أنكر وقالي تتوهمين ولمن عرف أنه عندي رقم البنت إلي يكلمها، خذا تلفوني وقلت له ليش خايف من شنو؟ قام ضربني ورماني على الأرض على ظهري، وعطاني بوكس على وجهي ونتف شعري وضرب رأسي بالبورسلان، طبعا ما كان راضي يوقف ضرب مع أني ترجيته يوقف، ماكان في أحد بالبيت وأهلي كانوا مسافرين وهو دائماً يستغل سفر أهلي ويضربني.
وبعدين بعد يهددني باليهال وأني بسباب راح أشردهم وأبعدهم عن أبوهم، طبعا أنا كان وجهي متورم وجسمي كله رضوض.
ثاني يوم فهد يقول تعالي نطلع 360 ونسولف ويجيب لي ورد وبابلي سامسونج نوت، وهذي عادته عندما يضربني ييبلي هدايا عشان أرضى، صبرت يومين وأنا نايمه في دار ولدي إلا أن رجعوا أهلي من السفر.
لمن راح الدوام خذيت أغراضي وأغراض اليهال وييت بيت أبوي ، لمن أكتشف أني طلعت صار يتصل ويدز مسجات عن شعوره بالوحده ودقت أخته وأخوه يبوني أرجع بس ما رضيت، أمي وأبوي مصرين ما أرجع لمن يجي عندهم ويكلمونه ، واهو معاند ومصر يأخذني من الباب وماعنده الجرأه يكلم أهلي.
صار لي شهر على هالحال وتعبانه نفسيا كنت سائله بيته وعياله وحتى المصرف شايلته وآخر شي هذي حالتي، ما أدري شنو أسوي ساعدوني؟؟؟؟