هل انا ملحدة ؟ الله يخليكم دشو وفيدوني

السلام عليكم ورحمة الله وبركاته

انا داشة بنك صاحبتي روحي وحبيبتي وهالموضوع يخصني مايخص صاحبة النك

اولا بعطيكم نبذه عني عشان تعرفون توجهوني وتنصحوني لان فيني وايد امور معقدة
انا بنت عمري 26 سنة منفصله وماعندي عيال لان مادخل علي طليقي الاولي وانفصالي صارله سبع سنوات وكل ما ياني احد يتقدملي يصيرلي شي ومايتم الموضوع ونفسيتي حيييل تنهار مرات افكر اقول يمكن محسودة لان كل اهلي وصديقاتي يطالعوني على جمالي وذكائي ولبقاتي بالكلام وكلا يقولون لي انتي قلبج ملبد وماشية صح حتى وحدة من بنات خالتي قالتلي احس ان انتي اول وحدة بتتزوجين فينا انتي مبلتعه وباهسة هههههه وطبعا اهيا الحين ما شاءالله ربي يهنيها عندها اربع اولاد وكل بنات خالتي تزوجو وانا قاعدة :eh_s(9): ويستخسرون ينعتوني حق معارفهم يدرون ان امي مالها معارف لان امي مسكينة بحالها وهادية المهم مالنا شغل فيهم خل اكملكم تخيلوا رضيت بالي فيه سرطان وبالنهاية مارضى فيني على سبب مو فيني ولا يخصني عشان سبب كان موجود بجدي السادس عشر وحملني ذنب جدي الي كلاه الدود ونسى اني رضيت فيه واهوا حامل هالمرض ربي يشفيه والحمدلله على الصحة والعافيه لاتحطون ابالكم قاعدة اتشمت لا والله انا خاف ربي بس مرات اقول هالناس شيبون ارخصت نفسي حييييل واخر شي مايبون وانا الي مو ناقصني شي من كل النواحي ورضيت بالمعاق واخر شي رفضته لان اهله غشوني قالولي بس مايمشي وطلع فيه اكثر من اعاقة رضيت بوااايد اقل من طموحاتي لا شهادة ولا اسلوب ولا جمال واخر شي فرررركش فص ملح وذاب تعبت من شي اسمه يايين نخطب تقريبا الحين انخطبت ولا 18 مرة ولا وحدةمن هالخطوبات اضبطت

الشي الثاني الي بقولكم عنه
انا ملتزمة حيييل الحمدلله والبس العباية وادرس بدار القرآن وبيتنا كله ملتزم وحاجة بيت الله واعرف بالدين واااايد الحمدلله على تفقيهه لي وهاليومين سالفة النقاب تحوس براسي ودي اتنقب وامس رحت شريتلي نقاب بس في مشكله ملوعه جبدي استغفرالله استغفرالله كلا بيني وبين نفسي اقول ان لو كان فعلا هالكون ماله رب يمكن اكون اناحاكرة نفسي عالفاضي ؟ استغفرالله ومرات اقول يمكن اموت واكتشف ان ماكو شي اسمه الله ولا في شي اسمه قرآن واكون صكيت على عمري عالفاضي بهالدنيا استغفرالله استغفرالله ومرات لمن اقرا قصص عجائب الاستغفار والصدقة اقول اييي صدفة يمكن استغفرالله مادري ليش هالافكار قاعد تييني ترا انا ترددت اكتبها لكم اخاف اكون دشيت بدائرة الالحاد وانا مادري الله يخليكم نصحوني وين الاقي دروس بالعقيدة لاني احس نفسي محتاجتها حيييل ودار القرآن صج يعطونا عقيدة بس مو قاعد يقنعوني استغفرالله لاتعصبون بس والله مادري شفيني

كل ماقلت بشتغل على نفسي من الصدقات والاستغفار عشان اتزوج واحد زين ولمن اشتغل على نفسي اسمع صوت بأذوني يقولي شهالخرابيط شدراج ان هالامور راح تقرب زواجج صارلج سبع سنين تدعين وماكو شي استغفرالله مادري شفيني مابي امووت عالالحاد وهل الي انا فيه الحاد وانا مادري وهل طلبي للزواج من ربي فيه غلط لان دايما بالدروس اسمع ان لاتعبدوه ليعطيكم اعبدوه ليرضى وانا الله يعلم ابي اتزوج ابي اعف نفسي لاني مستعففه وشابة وماعندي سوالف نفس هالبنات عشان جذي مابي فتن هالدنيا تاخذني

انا عطيتكم نبذه عني واتمنى تفيدوني شسوي واتمنى بعد ان تخلون موضوعي بالقسم الاسلامي لان انا ابي احد يرد علي فاهم بدينه لاني خايفة على ديني وجزاكم الله خير حبايبي