وآخيراً قررت آكتب لكم معجزة الله لنا وكيف انزل فرجه علينا واستجاب لنا المستحييييييل !

السلام عليكم ورحمة الله



كيفكم حبيباتي



لكل اخت صاحبة حاجة هم كرب وتدعو الله وتأخر استجابة دعائها واليأس بدى يتسلل لقلبها والكون كله يقولها مستحييييل ،،



اهديكم هالقصه لا هي منقوله ولا سالفه عابره هاذي قصه انا من عاشها بكل تفاصيلها بكتبها لكم بكل حرف منها بنزف شعوري ،،



وهي امتداد لهالموضوع ،،

http://www.q8yat.com/t1120473.html



ويمكن اللي يتابع هبيستغرب ليه للحين مانزلتها رغم اني اطلب قصص الناس !!



والله العظيم دوم احاول بس يصعب علي استرجع ذيك الايام لانها كانت مؤلمه جدا بس نهايتها ماتوقعها مخلوق !!



ابحاول اختصر فيها قد مااقدر وابكتبها باسلوب بسيط بعيد عن الفصحى ،،



قبل اربع سنوات كانت اختي الصغيرة تدرس بثالث ثانوي يعني اخر سنه بالثانوية عندنا باخر الفصل الدراسي الاول



كانت تشكي بالم بسيط بيدها اليسار وكانت امي تدهنها لها بزيت زيتون وترقيها والالم امتد الى الكتف



طبعا ودنياها مستشفى المانع بالخبر حولوها على دكتور اعصاب بعد فحوصات وتحاليل قال مافيها شيئ مجرد دلع!!!!



توقعنا ان نفسي بسبب انها تحاتي النسبه والجامعه وشايله همهم لا اكثر



بدت اختبارات الفصل الدراسي الاول ليلة الاختبار اشتد الالم جداااااا بيدها وراحت المدرسة وكانت اول الصدمات انها مو قادره تكتب بيدها !! المدرسة ماقصروا سووا لها لجنة خاصة وتختبر لوحدها ومعلمه تكتب عنها واستمر هالحال طول ايام الاختبارات ماتكتب والالم شديد ونفسيه دمااار الحمدلله والمستشفيات الخاصة مصرين مافيها شيئ !!



اخر يوم بالاختبارات بعد ماخلصت بحمد الله



جت البيت طبعا كانت تداوم معها وحده من خواتي لان الوالده مع الوالد مريض كان بعد



جت اختي اخر يوم ونامت لما صحت كانت ثاني صدمه ماتقدر تمشي !!!



شلناها علطول وبلا مستشفيات خاصه بلا خرابيط رحنا طواري مجمع الدمام الطبي المركزي سابقا طبعا بواسطه ولا ماكان عطونا وجه !

الدكاتره انهبلوا قالوا ليه تاركينها لهالوقت قلت ماتركناها كنا نوديها خاص وقالوا مافي شيئ قالوا لابد تدخل الان تنويم طبعا مافي سرير وعلى مانكلم الواسطات يبلنا وقت رجعنا البيت الساعه تسع بالليل اتصل دكتور على طبيبة صديقة اختي وقال هالبنت ضروري ترجع المستشفى حالتها ماتحتمل تاخير اكثر !!!



بامر الله لقينا سرير ورجعناها ودخلت تنويم وابتدت فصل جديد من حياتها بدخولها المستشفى ذيك الليله



كان يفترض انها تتحسن لكن اللي حصل انها من اليوم التالي فقدت الاحساس بجنبها اليسار كله اللي بعدها يدها اليمين ثم رجلها اليمين



ايام فقط وصارت ماتحس بجسمها كامل ولاتقدر تحرك شيئ وحتى الاخراج والاكل ماتقدر وكل شوي ينزلونها اشعه ورنين مغناطيسي وترجع ماتسويه بسبب جابوا واسطه ودخلوه بدلها وعلى هالحال ليمنالله سخر لنا واسطه لجل اختي تدخل الاشعه وسوتها وسوت الرنين مر اسبوع اختي حالتها تدهور بشكل سريع جدا ولا ندري شسالفه يوم الجمعه اتصل الطبيب واستدعى اخواني وبلغوهم بحالتها وكانت اكبر صدمه وطبعا اخفوا عنا وقتها



مرضها كان ورم بالدماغ وكبر بشكل سريع وغطى على كل الاجزاء الحساسه اللي تتحكم بالجسم ولابد استئصاله باسرع وقت بس هالعمليه ماتصير بالسعودية فقط في دولتين كندا ودوله اخرى نسيتها وفي وقت السؤال والتجهيز خلال اسبوع يوم الخميس من الاسبوع اللي بعده استدعى الدكتور اخواني وقال خلاص توقفت كل الاجهزه بجسمها وبقى القلب والرئه ضعيفه ولو توقفت بيصير وضعها صعب لان ضعفت كل عضلاتها مافي مجال لنقلها بالطائره حتى للرياض مافي مجال خلاص وقالهم مافي الا حل واحد اما تدخل هنا ونسويلها الحين العمليه وحنا ماقد سويناها من قبل وعلى خيارين تفشل وهو بنسبة 95% وتفقد حياتها او تنجح بنسبة 5% لكن تعيش مشلوله والبصر بيتاثر وحواس كثيره



بعد اقناع الدكتور لهم ماكان في حل غير الاستسلام للعملية وتوكيل امرنا لملك الملوك



بعد الموافقة طلبوا شهود لان العملية خطره لجل مانطالبهم بشيئ لو مانجحت وطلبوا من اختي وصيتها ودخلوها العملية وهي ماتدري عن مرضها ولا مصيرها شيئ وهذا بطلب الدكتور لجل نفسيتها ماتتعب وتشد عضلاتها اكثر



استمرت العملية منثمان الصباح الى تسع الليل



شعورنا امي انا خواتي انهيار تام نحاول نستوعب اللي صار بهالسرعه مو قادرين كان فقط نصلي وندعي



انتهت العملية كل لحظه تمر بسنه ومع دكتور اول مره يسويها رغم خبرته الطويله بس انه كان مستغرب هالمرض مايصيب طفله عمرها 18 فقط كبار السن وببطئ مو بهالسرعه ونادر جدااا



انتهت العملية ورغم توقعات الاطباء لكن من يحيى العظام وهي رميم ويخرج الميت من الحي انزل امره كن وكانت البشاره بنجاح استئصال الورم بس هل هو خبيث ام حميد وهل بتعيش مشلوله ام عمياء ظلت بغيبوبه بالعناية المركزه اشهر وحجمها تضاءل الى ان اصبح هيكل عظمي مو مبالغه

فعلا كانت هيكل عظمي



ثمان شهور وحنا ننتظر كرم ربي ورحمته وفرجه وحالتها كل مالها تسوئ اكثر والاطباء وجرئتهم على الله معروفه كلن يقول حياتها مستحيله وشفاءها اشد استحاله



كنا قبل العملية استخدمنا معها خلطة الرومي المعروفة (سدر + شب+ وملح) وباليوم السابع سوت العملية وخذينا اثر مدرستها جابتلنا المديرة والمدرسات الاثر وانا رحت ومسحت البوابات وغسلناها فيه لان معلماتها كانوا يقولون هي غير عن زميلاتها بكل شيئ وكلن يمدحها ومرضها المفاجئ هو احتمال كبير ان اصابتها كانت عين قويه لاحول ولاقوة الا بالله



الفحوصات ظهرت نتيجتها اخيرا بعد ماارسلوها لاكثر من جهه ان الورم حميد ولله الحمد والمنه



بس مازالت بغيبوبه ولايقدرون الاطباء يقررون شيئ لان الله العالم ليمن تصحى



وكنا مستمرين بالدعاء ونداويها بالصدقه كل يوم المغرب نجمع صدقه حتى من الاطفال ونخرجها وكنا نذبح ذبايح بما ان افضل الصدقات الدم ونوزع لحومها على الفقراء ونطلب مهم يدعون لها



وبذلنا كل سبب نقدرعليه ووكلنا امرنا لملك الملوك ارحم الراحمين اللي حياتها وموتها بيده وحده بس



الايام كانت تمرعلينا ثقيله والانتظار كان مؤلم جدااا



بس ربي انزل بقلبي يقين شديد ان اختي بترجع لغرفتنا



رغم كلام الاطباء المحبط



مااخفيكم كنت اشرح للطالبات ودمعتي بعيني واجاهد نفسي اخفيها



كنت اطلع من الحصص واروح لمكان بعيد بالساحة الخارجية مايشوفني فيه احد وابكي بحرقه وادعي ربي



اما الليل فكان مؤلم الى درجه مااقدر اوصفه مدى المي فيه اختي كانت تنام معي بغرفتي وفجاه صرت لوحدي اشوف ملابسها اغراضها اتخيل بتفتح الباب باي وقت وتزعجني مثل قبل



ياليتها ترجع والله ماعاد اهاوشها خلها تزعجني مثل ماتبي



كنت اسمع امي تبكي بصوت مسموع وهي تصلي رغم هدؤها المعروف وانا نفس الحال بغرفتي اصلي وادعي وكان بالشهور الاخيره صعب اكتم وصلت لحد الانفجار استقلت من عملي وكنت ارقيها يوميا بالبقره بالنيه طبعا لان هي بالعناية المركزه وممنوع الزياره لان مناعتها ضعيفه جدا



من الاشياء اللي سويتها واتاثر بفرح كل مااتذكر



سمعت ان الصدقه تكون اعظم لكانت من انفس واغلى ماتحب



فجمعت الذهب اللي عندي كله من والدي الله يرحمه وكنت حيل احب احتفظ فيه والهدايا الذهب وكل شيئ كنت حيل احبه واحافظ عليه



تصدقت فيه بدون مااحد يدري ودعيت الله بعد هالصدقه



مرت شهور ولا في أي اثر للتحسن



جاء بيوم كلمت اخوي وطلبت زيارتها لي شهرين ماشفتها وبداخلي يقيييييين ان اختي بترجع احس دعيت من قلب وصدمن يقال حالتها صعب تشوفونها مابتتحملين واصريت ورفض



قبل العصر قلت لامي بروح ووافقت ورحت مع السواق من شدة مابي كنت اسحب رجولي سحب ونعالي وانتوا بكرامه تنفسخ من رجلي مو قادره اثبتها كنت خايفه انصدم كان بداخلي صراع مابين كلام الاطباء وان ربي بيستجيب لنا دعائنا وبيشفيها وربي سبحااااااااانه قادر وحياتها بيده وحده



دخلت المستشفى وسئلتعنها قالولي الدور والغرفة استغربت !!! اخوي يقول بالعناية المركزه وبغيبوبه !!



دخلت الغرفة وكانتاعظم مفاجاه بحياااااااااااااااااااااا اتي



اختي صاحيه وسليمه مافيها شيئ ولا جهاز مركب فيها وتناظرني مبتسمه ووجها محلو مره ماشاء الله تبارك الله لاقوة الا بالله (اسئلكم بالله اذكروا الله ) واخوي واختي الكبيره اللي هي كانت بس تشوفها لانها ممرضه لقيتهم عندها وهم انصدموا بدخلتي



شعوري مااقدر اوصفه اسجد اسلم عليها احاول استوعب هذا حلم ولا حقيقه !!



تقولي وينكم ليه ماتجوني !!!



تقولي ليه تغيرتي كنت نحفانه مره من الهم



وانا اقولها احلوتي لان كانوا يغذونها بمحلول كله فيتمينات فخلى بشرتها واووو هههه



سبحااااااااااانك ياااااااااااااااااااااااا اااااااارب



يارب لك الحمد كما ينبغي لجلال وجهك وعظيم سلطانك



معقول اللي انا فيه حلم ولا حقيقه وقلبي يقرقع ودي اذبح اخوي كيف يقولي تو بالصباح باقي بغيبوبه وصعب تشوفنها بهالحاله كلها اجهزه ووو



وحنا طالعين الا عرفت السالفة وشوفوا رحمة الله فيني كيف ؟!

يقولي اخوي

قبل تجين بنص ساعة

جيت انا كالعاده اشوفها بالعناية من ورى الحاجز وتفاجئت مالقيتها !!! واسترجعت وصار كل مافيني يرجف ورحت اسئل عنها



وجت اختي الكبيره عقبه ونفس الشيئ مالقت اختي وانهارت بمكانها وتجمعوا الناس وشالوها



الشاهد ان اختي صحت وتحسنت حالتها ونقلوها القسم قبل اجي انا والصدمه كلوها اخوي واختي هههه



وكان مركب بانفها اخر جهاز قبل لا ادخل انا بشوي شالوه هههه



سبحااااااااااااانك ياااااااااااارب



ربي يعلم برقة قلبي واني مااقدر اتحمل فكنت اول وحده تطمن عليها وبدون اجهزه وهي باحسن حال بالنسبه لوضعها



ومن الاشياء الغريبة ا للي نجاها ربي منها باعجوبه انتشر بقسم العزل اللي هي فيه جرثومه غريبه ويمكن سمعتوا فيها بالمركزي قبل اربع سنوات حتى الممرضات سووا اضراب وماداوموا لان كانت قاتله بس ربي نجى اختي منها تبارك الله



لكن هل هي مشلوله هل حواسها سليمه مثل ماقالوا الاطباء ؟!!



مر اسبوعين والحمد لله يارب لك الحمد اختي تمشي بس بصعوبه وحواسها سليمه لكن صوتها رااايح مبحوح تماماً قالوا شهرين وبيرجع وطلعت اختي من المستشفى ولله الحمد والمنه وكان اسعد يوم بحياتنا



لكن ابتدت فصل جديد من الالم كانت كحه شديده وصوت مافيه وماتقدر تاكل الا المهروس السائل وهي مشتهيه اكلنا وتمشيئ بشويش وتحتاج علاج طبيعي والسنه خلصت باقي بس الاختبارات النهائية وهي ماغير تبكي ومومتخيله ان السنه فاتت وصديقاتها بيدخلون الجامعه وهي لا وطبعا بما ان عمليتها بالدماغ الدكتور رفض تكمل دراستها لان بتجهد عقلها وهذا خطر وطبعا شعرها محلوق لان العمليه بالراس



كنت احمد الله على رجوعها وادعي بشدة هالمرحلة تنتهي من حياتنا وترجع اختي مثل قبل



رجوعها للمدرسة كان مرفوض بشدة من اهلي الا انا لان كنت حاسه باحساسها وكنت ابي اخفف عنها وكنت توني مستقيله يعني متفرغه لها



قلت لاهلي بنداوم بمدرستها لجل تشوف صديقاتها وتتغير نفسيتها وانا معها ووافقوا بعد اقناع ومحاولات



وداومنا كانت مره نحيفه وشعرها وكل شيئ متغير وللاسف في ناس ينعدم عندهم الذوق صديقاتها رغم انهمكانوا مزعجينا يبون يشوفونها الا انهم جرحوها بتعليقاتهم لان ماكانوا يدرون ايش مرضها بالضبط وهي بنفسها ماكانت تدري ماقلنا لها عشان نفسيتها ولا الوالده حتى



تكلمت مع المرشدةا لطلابية وتفاجئت ان غيابها حق التيرم كامل مارفعوه للوزاره لان كنا دوم نكلمهم وعلى تواصل معهم اتفقنا ان ترجع وطبعا بما انهم اهليه ومتعاونين جدا الله يكتب اجرهم قالوا بما انها متفوقه خلوها تذاكر وتدخل الاختبارات



وطبعا الاختبارات كانت بعد طلعتها من المستشفى باسبوعين فقط



دخولها الاختبارات كان اكبر تحدي بس ماشاء الله تبارك الله



ربي سبحانه وفقها ودخلت والنتيجه















نجحت هههههه ماشااااااااااااااااء الله تبارك الله لاقوة الا بالله



وانهت اصعب سنه بحياتها



وبدت تتحسن بالتدريج الى ان بقى صوتها بس ورجع فجاه برمضان ودخلت الجامعه







والان







اختي تستعد لتخرجها من الجامعه ماشاء الله تبارك الله



وسليمه الله يبارك ولا كان فيها شيئ لاقوة الا بالله

وهذا هي جنبي ناشبتلي كل شوي تقاطعني تسئلني عن ميك اب هههههه



وقبل سنه علمتها بمرضها وانصدمت مره وحيل تاثرت بس كنت ابيها تستشعر لطف الله فيها وتظل دوم قريبه من الله



سبحانك يااااااااااارب عادت اختي للحياه رغم كلام الاطباء واستحالة رجوعها بعقولهم البشرية ولكن ارحم الراحمين ارجعها لنا ولم يردنا عن بابه محرمون مخذولون



ربي سبحانه قر عيونا فيها بدموع فرح بعد ماقرحتها دموع الحزن



ربي سبحانه احياها ليثبت لنا انه القادر وحده وحياتها وعافيتها وكل امورنا بيده وحده



لو الكون كله يقولك مستحييييييييييييل واكبر الاطباء واكثرهم علما



لاتلقي لهم بال لان الامر برب ملك هالكون وحده



وهو اللي امرك



(قَالَ رَبُّكُمُ ادْعُونِي أَسْتَجِبْ لَكُمْ )

هذا قصة اختي باختصار شديد كتبتها لكم وفيها من الاحداث المؤلمه مالله به عليم وشوفوا كيف ربي احياها ورجعها وكأن شيئ لم يكن كنت ابكي واقول معقول حياتنا بترجع مثل قبل وبترجع اختي بس سبحانك يارب اكرم الاكرمين قر عيونا باعظم مما تمنينا



انتي حياتك فيها اصعب من اللي مرت فيه اختي ؟!!



تعانين من شيئ وحزينه على شيئا اصعب من ان روح توصل للموت ويتوقف كل شيئ وترجع بامر الله؟!!



صدقيني مافي شيئا صعب ولا في شيئ مستحيل على قدرة الله سبحانه



ادعي ربك بيقين مهما اشتدت حنا كنا ندعي ونبذل اسباب ونتفاجئ بتطور سلبي وتسوء حالتها اكثر بس ماكنا نيئس او نلقي للاطباء بال الى ان اكرمنا ربي بالفرج



مهما طال او تاخر مصيره بيجي الفرح من حيث لاتحتسبين مثل مالحزن جالك من حيث لا تحتسبين



اصبري وادعي ربك بيقين مهما تاخر الفرج والله العظيم بيجي اللي تمنيتيه بالضبط مهما قالوا لك مستحيل ربك رب المعجزات وبيده كل شيئ ومايشاء من امر يكن وانه على مايشاء قدير



ترى بذيك الفتره كنت انسانه عاديه جداااا مو كثيرة طاعه بس ربي استجابلي واستجاب لامي



دامك تدعين وتطرقين باب ارحم الراحمين ثقي تماما بيجي يوم وينفتح لك فمن اكثر الطرق اوشك ان يفتح له



بيجي يوم وتسجدين من الفرحه وتقولين معقول انا بحلم ولا علم !!



والله العظيم هاليوم بيجي وان طال ربي وعدك تعرفين ايش يعني ملك الملوك وعدك انه بيتسجيبلك بس ادعي ولاتيئسين مهما طال ربي بيستجيب لنا بالوقت المناسب ويمحص بهالبلاء صدق ايمانك فيه واعتصامك واستعانتك فيه اثبتي اثبتي وادعي من قلب ولاتعلقين قلبك الابالله وحده وبيجي يوم الفرح وبتعيشين اعظم مفاجاه بحياتك بإذن ربي ورحمته !!











اخيراً/ ربي آنك تعلم باني لم اكتب هذه الحروف الا قربة لك ولتكون سبب في بث الأمل بنفوس حزينه فاجعلها يارب سبب في فتحك علي وعلى كل من مرت هنآ وقرئتها وفي نفسها حاجه !



وآسال الله يفتحها على من ستقوم بنشرهآ لوجهه الكريـــم فهي للجميع !