-
الصخل ما يرضع مع رعشة !!
اغنام - ابل - دواجن - طيور
السلام عليكم
عندي عنز ولدت عناق في ذا المطر والبرد اللي هجم علينا والظاهر أن العامل كان بعيد عنها ، المهم أن الصخل ماغير يرتعد ويرتعش وواقف جنب أمه لكنه مايرضعها ، إذا قربناه من أمه يتشمم ويتحسس للديد لكن ببرود وبطء ماهوب زي باقي الصخال والمشكلة أنه مع ذلك مايرضع !! حتى مسكناه بالقوة وفلقنا فمه بالغصب وحلبنا على خشمه وفمه الحليب ومع ذلك كله لايرضع ، الكلام هذا العصر وهي والد الساعة تسعة الضحى ، رحت ورجعت العشاء اتطمن الا والصخل يرتعش رعشة البردان وكذلك لايرضع ، كلمت الدكتور قال خذ البرواز حق الإبر واحقنه بالحليب وقطر في حلقه وتعالي بكرة خذ بنسلين وفيتامين ، وآخذه معي للبيت واحطه جنب الدفاية واسخن له حليب أمه وهاك يالتقطير في فمه لين كملت ستة براويز ، وعقبها دفي الصخل ووقفت الرعشة وارتاح ونام ، ومن بكرة الفجر نفس الطريقة ويوم جا الظهر وديناه لامه ورضع منها شيء بسيط لايكاد يذكر ووقف !! رحت العصر للبيطري لكنه غير رفيقي الاول لانه مسكر ، وقال هذا صايبه جفاف لانه ابطى مارضع وقال رح للصيدلية وعطه محلول جفاف للاطفال وكذلك موية غريب للاطفال وهي ضد المغص ووجع البطن والانتفاخات ، رجعت للمراح واعطي الصخل الحليب والعلاجات بالبرواز ، رحت وجيت الليل إلا والرعشة راجعة له وكذلك يتشمم ويتحسس ورضع شوي ووقف !!
رجعته معي للبيت وعشيناه وفطرناه اليوم بها البرواز حليب وهالعلاجات ، والله يكرم تبول طبيعي لكنه في الأخير على قطرات متقطعة وطول فيها وخرج منه براز المواليد الأصفر طبيعي
السؤال يالربع وش سالفته ذا الصخل بهذل بي والى متى وانا على هالبرواز وهالغصيبة في الرضاعة
فيدوني الله يبارك بحلالكم ولاتبخلون علي والله يجزاكم خير
hgwog lh dvqu lu vuam !!
