صديقاتي النطيحه والمترديه

السلام عليكم ورحمة الله وبركاته

بنات مادري اذا بس انا الي حظي حلو وما حولي الا ناس غريبه ولا كلكم عندكم نفس الحاله؟

ادري العنوان غريب بس لما اقولكم عن سالفتي راح تفهمون علي انا شقصد

اولا رفيجاتي مو بنات متعرفه عليهم امس لا بالعكس اغلبهم عشرة عمر و سنييييين اقل شي من ايام المتوسطه. طبعي احب اضحك واتغشمر واحاول قدر الامكان ان ارسم البسمه على شفاه الغير واذا شفت ولا صارلي موقف من وحده من رفيجاتي وغلطت بحقي ولا ظلمتني او ظايقتني اسامح او اطنش واتناسى الموضوع ولا بعمري خليت وحده منهم تعتذرلي لما تغلط اطنش ولا جنه صار شي

بس صراحه خلاص طقت جبدي منهم مادري شيبون من الحياه ماعرف شنو تعني لهم صداقه اصلا مادري ليش محتفظين في صداقتي اذا مو مرتاحين لي ولا تمنون لي الخير ويتضايقون اذا شافوني مرتاحه!

خل اعطيكم جم مثال
هذي على اساس اعز رفيجاتي و بحسبة اخت واكثر من اخت. في فتره كانت عندنا مشاكل في البيت و نزل مستواي الدراسي حيل هذا وانا الي كنت ادرسها و سقطت بجم ماده. تدرون شسوت؟ سوت حفله! و عزمت رفيجاتنا و عزمتني بس قالتلي اجي بوقت متأخر وانا يا غافلين لكم الله رحت عندها و مسويه حلو والله العظيم ما كنت ادري انها مسويه حفله بس صدفه سويت الحلو وظبط معاي و خذته لهم على اساس بوصل قبل البنات واساعدها بالتحضيرات. واشوف البنات كلهم قاعدين والوضع شوي في ان. واليوم الثاني جت عندي البيت عشان اعلمها طريقة الحلو و علمتها. وبعدها بجم يوم دقت علي وحده من البنات و قالت لي على الساعه الي وصلوا فيها وان رفيجتي وزعت عليهم هدايا النجاح بعد و وصتهم يخشونها عني! انا شسويت؟ ولا شي! سكت و بلعتها كالعاده

ثاني موقف مع نفس البنت لا يوصف وحتى لو ذكرته بتقولون فلم هندي لان انا نفسي للحين مو مصدقه شلون ألفت كل هالخرابيط فوق راسي. المهم الزبده تشويه سمعة اختي و سمعتي من عقب ما كنا نسولف التلفون بالساعات. يعني سوالف و ضحك ابو ساعتين و فجأه جك بوك عطتني فلم قوي و قالت اني مو كفو ثقه ومن هالحجي الخايس. طبعا اهي ندمت لانها عارفه نفسها جذابه و قالت هالكلام حق رفيجاتنا انها ندمانه وجذي بس ما تأسفتلي ولا شي. تصادفنا بمناسبه وما حبيت اشمت العذال فينا وهي جت عندي جنه ما صار شي وانا ما احرجتها بالعكس بلعتها كالعاده ولا بينت لها انها أذتني او شي!

اما رفيجتني الثانيه هذي غير. اي شي تشوفه عندي لازم تجيب مثله و احسن منه. والله لو انه كلينكس بتروح تجيبلها كلينكس معطر وعليه نقشه بعد! على طول تطلب مني خدمات اسوي لها جذي واعلمها شلون تسوي الشي الفلاني و اظبطها بواسطه واكلم لها فلان و علان يساعدونها وووو. خل انا اطلب منها شي تسوي روحها تساعدني و تعطيني معلومات غلط و توهقني. لو تقول لي ماعرف وايد احسن بس مادري ليش الجذب.
في جامعه كنت ابي اقدم عليها وهي تدرس فيها. قلت لها تعلمني طريقة التقديم و قالت لي الطريقه وانا انطر سنه لان قالت اذا ما انقبلتي اول كورس لااااازم تنقبلين الثاني فور شوووور. وانا انطررر. بعد السنه هذي رحت دبرت عمري وقدمت على جامعه ثانيه برا وطلعتلي الموافقه وكل شي تيسر لي حتى ماما واهلي وافقوا اني ادرس برا الحمدلله. بعدها اكتشفت انها كانت امنية حياتها تدرس برا وبهالديره الي انا فيها وانها ما طلعلها قبول وانها مو فرحانة لي بالسفره! وبعدها بفتره كنت قاعده وياها و معانا رفيجتها بزلة لسان قالت الطريقه الي قدمت فيها اوراقها للجامعه و اول ما طلع منها الحجي توترت و طالعت صوبي وانا سويت روحي مو منتبهه و طنشت بس حزت في قلبي وايد مادري ليش تسوي جذي وشنو مستفيده

والحين جا دور الثالثه رفيجتي و حبيبتي ومانخبي على بعض شي و و و. اهي تشتغل وانا ادرس برا فقلت مكالماتنا وجذي بس على طول ويا بعض بالفيس وعندنا اخبار بعض. الحمدلله انا دايما انخطب وسبحان الله للحين ما تزوجت ما جا نصيبي وكل ما انخطب كنت اقول لها وكنت من صجي اخذ رايها بعد بحم انها اكبر مني. وبيوم فجأه جت و قالت لي ان عرسها بعد 4 ايام! انزين مادري شنو المطلوب يعني كلفت على عمرها وايد يوم انها قالت لي زين ما نست مره وحده. عالعموم بس قلت لها كلمة مبروك ناشفه وبس. لو قايلة لي من قبل كنت حابه احضر عرسها و اجيب لها هديه و افرح لها من قلب لان صج اعزها وايد بس حركتها تافهه وايد استحقرتها بصراحه
اهي من لما تزوجت ما كلمتني وعرفت بالصدفه من فتره انها حامل. الحين قامت تدور علي و دقت علي تسولف! شتبي مااادري جايه بس تسأل تزوجتي مخطوبه وجذي وتسولفلي عن حياتها الي انا بصراحه ماهمتني ابد. احس انها ما دقت علي الا لانها الحين في غربه وبعيده عن اهلها وربعها وحامل وتعبانه وزهقانه وتدور الي يسليها بالسوالف. اذا هذيلاك النطيحه والمترديه مادري هذي شتطلع؟ ذس از فري ويع!

انا ادري ان في شي غلط في اسلوبي مع الناس وهو اني ما اوقفهم عند حدهم بس هذا لاني ماعرف شلون اوقفهم عند حدهم. لان انا كل مره اقول مافي انسان كامل واسامحهم على غلطاتهم وهاللي قلته ترا نقطه من بحر. مرات افكر اقطع علاقتي في كل وحده فيهم بدون سابق انذار و مرات اقول لا اقضب مجنونك لا يجيك الي اجن منه
مادري انتو شنو طريقتكم وشلون تتعاملون مع هالبشر يا ريت تنصحوني خل اتعلم منكم.