زوجي وعلاقاته اللي ما تخلص

السلام عليكم

مشكلتي تحرر زوجي الزايد :(

صارلي سنه وجم شهر متزوجه واللحين حامل وداخله شهري فالنفسيه كلش موصله حدها :(

ابي حل حق هالزوج والله ماني عارفه أتعامل معاه :eh_s(2):

أهوا خوش ريال و وايد قايم فيني ومو مقصر من ناحية المصرف أو غيره بس مشكلته تفكيره مسببلي قلق مو طبيعي كله شاكه فيه وأحس وراه شي ..

أهوا أنولد بأمريكا وعاش هناك فتره طويله فصار طبعه نفسهم احس أني ماخذه أمريكي مو كويتي .. وحتى صداقاته كله أجانب أو فرييييي حدهم

أهوا حييييل صريح معاي يقولي كل شي يصير معاه .. اللي متعبني ان عنده صداقات مع بنات واااايد وأغلبهم أجنبيات يعرفهم من 10 سنين واكثر وعادي مرات يوريني مسجاتهم ويقولي اليوم فلأنه دقت وعلانه سالت عنج وتسلم عليج الوضع عنده عادي طبيعي حالها حال ربعه الشباب بس انا وااايد انغث منهم كل يومين طالعتلي وحده ويسولفون معاه جنه رفيجتهم :eh_s(14): حتى بشهر العسل كانوا يدزون وتسبات وانا أطوف أقول ما عليه تونا متزوجين واهوا متعود عالحريه بس عاد مصخت وانا طقت جبدي منهم .. ما اقدر أتحمل اشوف سوالفهم وأسكت وآنتوا بعد عارفين شلون لبس وشكل الأجنبيات كله تفصخ وقلة أدب لا فوق هذا ما افهم كلامهم أهما يتكلمون اسباني

المشكله اللحين ان انا ما بقى شي وأولد يعني بكون بالنفاس والأخ مصر يروح امريكا يقولي صارلي سنتين ما رحت وإنتي نفاس شكو اقعد بالديره ،، وانا مطنقره ما أبيه يروح ..

اول بالخطبه كنت اقوله أوكي لك أسبوعين تسافر بروحك ما عندي مشكله دامك مو مقصر معاي قاعد تسفرني .. بس اللحين انا خايفه وماني مرتاحه حق هالسفره عشان شيين الأول علاقته بهالبنات وثاني شي أهوا كان يقولي عن طريقة حياته هناك كله بحر وبالليل كلبات وحفلات ويقول ان كان يشرب بس عقب الزواج قطع بس بالسفر يشرب يعني بهالسفره مليون بالاميه بيشرب وبيطلع مع هالبنات .. انا واثقه فيه واهوا صاحي مستحيييييل يخوني لان ادري شلون يفكر وشنو طبيعة علاقته فيهم بس واهوا شارب ما اضمنه

مره تناجرت معاه على وحده من هالبنات هبتلي يومين أدق عليه وتقوله انها تهاوشت مع رفيجها مالت عليها وعلى رفيجها
اقوله وآنت شكو شنو خلصوا الاوادم اللي عندها عشان أدق عليك وتشكيلك .. يقولي لا انا كنت داز وتساب اطفرها جان أدق
المهم مع النجره جان يقولي انتي شفيج كله تشكين فيني قتلج هذول ربعي من 10 سنين ما اقدر أهدهم لان تزوجت وانا ما سويت شي غلط عشان تشكين كله مجابلج بالبيت واقولج عنهم يعني مو خاش شي .. عاد مع العصبية قام وراح يابلي صوره معاها أبيت أهلها صوره لامته وصوره شوي وتقعد بحضنه انا اهني خلاص قفلت قمت آصارخ وابجي اقوله انت بتذبحني انا مسج وبموت منها توريني هالصور بعد .. أهوا على نيته يقولي وريتج عشان تشوفين شلون اهيا ماي فريند !!
تناقشت معاه يعني اللحين اذا رحت لهم عادي وحده فيهم تلمك جذي والا وانت بالكلب ترقص مع وحده فيهم ولازق فيها ؟؟ يقولي لا نظامي اللحين غير قبل كنت عزوبي اللحين متزوج وكلهم يدرون حتى طلعاتي مو مثل قبل .. يقولي اذا ولدتي راح نروح انا معاج وتتعرفين عليهم ونطلع مع بعض وبتعرفين شلون ما بينا شي .


اللحين انا خايفه يروح ويسويلي بلوه هناك ويرد يحن حق ماضيه وتزيد مشاكلي معاه .. أهوا مصمم هالسفره يقولي اذا مو بالنفاس راح أروح عقب وادري فيه أهوا اذا عاند يسوي شي يحرني ومرده بيسوي اللي يبيه ! ما ادري اللحين اخليه يروح والا اعاند ؟
على فكره أهوا بكل سفرات الشغل يدق علي مليون مره يعلنييييييي من المسجات يقولي وين راح وشنو سوه بالتفصيل ،، فيقولي انتي ليش خايفه انا راح اكلمج كل يوم وطلعاتي كلها جماعيه مع الشباب والبنات واذا بطلع مع وحده بروحي راح أدق واقولج اذا سمحتيلي أروح واذا لا ما أروح عادي أدور عذر .. وصج أهوا اذا شي انا مو راضيه عليه ما يسويه بس يطنقر ويكرهني عيشتي ..
الزبدة ماضيه مسببلي قلق ما ادري شلون أتعامل وياه !!!!!