ماذا قلت للاعبين بين الشوطين

بسم الله الرحمن الرحيم
السلام عليكم ورحمة الله وبركاته اخوكم المشجع الهلالي ابومحمد ترى المعرف لولدي واخذته منه لاني مااعرف اسجل ايميل اصلا لاني شايب بالعربي
وسعوا صدوركم ياشباب والخساره وارده لاي فريق بالعالم حتى برشلونه ينهزم ومعهم ميسي اما انتم مار ماتبون الهزيمه ابد
ودائما انتم وهالنصراويه شيل وحط وانا والله لااكره الا صحافتهم والا لاعبينهم يمكن تشوفونهم بالفضائيات والله محترمين
ابغى اوسع صدوركم شوي كنا في نهاية السبعينات في مدينه صغيره مافيها تلفزيون يعني نشجع الهلال على السمع وعلى بعد 140كم كانت هناك بلده فيها تلفزيون ولاصارت مباريات الهلال والنصر اجتمعنا هلاليين ونصراويه وكلنا قراوه واتجهنا لتلك البلده عند احد الاقارب ولا يدرون اهلناوتفرجنا على المباراه لكن والله مانطلع عن النقاش في المباراه اما سب ولعان ابد ماهو عندنا ولكن الفائز اكيد بيطقطق على المهزوم ...هذا ايام ريفو ونجيب الامام وماجد ويوسف خميس وليرا
وفي احدى المباريات وحنا راجعين (المباريات كانت العصر) وفايزين على النصر معنا اثنان نصراويه وجنناهم بالتعليق وكنا فائزين 3/1 ومسجلهن اظن نجيب وبرازيلي غير ريفو ...وفي منتصف الطريق بدأ يبكي واحد من تعليقنا وقال نزلوني ماني راجع معكم حاولنا فيه عجزنا توقفنا ونزل قال اقلبوا وجيهكم ومعصب علينا حتى جاء اخر الليل وحنا نحاول نركبه عجزنا صدفه توقفت سياره واذا فيها رجل كبير بالسن والحمد لله استحى منه وركب معنا وعدنا متأخرين
نعود لمباراة الاستقلال
ياشباب انتم تحملون المرشدي فوق مايحتمل اللاعب لابد ان يحدث منه خطأ ويتحمله الاثنان في قلب الدفاع لان المفروض واحد لازق بالمهاجم والثاني خلفه قليلا ...اما يصير بينهم وكلهم وقوفهم سوا خطأ كبيرجدا
ثانيا/ يتحمل لاعبي الوسط التمريره قبل الدفاع كيف يمررون وهم يتفرجون
ثالثا/ الفريق الايراني كان مقفل ويلعب بهدوء وتركيز حتى يفرض اسلوبه على الهلال والهلال يعتمد على اللعب السريع ....المفروض العمل اذا يكون كالتالي
1/ اللعب على الطرف من الجانب الايمن (سالم الدوسري) يقوم بمحاولة سحب الظهير ولايلعب الكره بسرعه حتى يفك الاختناق في ال18 عن ياسر والعابد خلفه ثم يمرر كره ارضيه او مرتفعه قليلا لانهم عمالقه لايجدي معهم الاوفرات
2/ الزوري الله يهديه لو انه هالمباراه صار يرفع لياسر لكن ماينفعن الاوفرات مع هالبغال ...كنت اتمنى منه عندما يقترب من ال18 يسدد بكل قوه حتى ترتد الكره من الحارس ويكملها اي لاعب ممكن الايرني يسجل هدف بفريقه
3/ سالم الدوسري ياليت عندما تسحب وكثيرا ماتعملها ان تركز جسمك لازم ينحني للارض ورجلك تحنيها قليلا لان الكره غير ثابته والشوته والكره متحركه بتصيرسماوي
\4/ الشهراني لاعب عنده امكانات عاليه اتمنى الا يلعب في الخلف واذا لابد فظهير ايسر اهون شوي
هذا ماتمنيت اقوله للاعبين بين الشوطين