انا اسفه بنات بس خلاص مليت وطقت جبدي من نفسي ومن اللي مثلي

السلام عليكم ..طبعا الكل مستغرب من العنوان ..بس هذا الصج مليت من حياتي الزوجيه اللي بس مبنيه على زوجي واللي يبيه ورضاه علي ..خلنا نتكلم بصراحه كم وحده فيكم تتعب اكثر من زوجها بين دوام ويهال وفوق هذا تخلص كل شي يتعلق في البيت لان سي سيد قاعد ومرتاح وعليه اصدار الاوامر فقط عليج وعلى حياتج وشغلج وتصرفاتج رفيجاتج اهلج كل شي ..احنا صرنا في زمن صار الزواج فيه استعباد لان المجتمع يقولج ظل راجل ولا ظل حيطه ..جحيم الريل ولا جنه الاهل ..يا ناااااس ليش كل هالتبجيل لشخص انتي صرتي تقومين بدوره ..واللي خلقه خلق غيره ..وفوق ما هو مقصر يهدد ويتوعد وانتي مثل المكسوره ما تعرفين وين تطقين براسج ..للاسف لما تجين تبين تقولين رايج في شي يمكن اصلا حتى ما يخصه قالج انا زوجج ولازم تطيعيني حتى الدين خلوه لصالحهم وهل الدين يرضى اني ما اكون مرتاحه في حياتي لا يا قلبي الدين حلل الطلاق لان في اشكال ما تنعطى ويه بتقولون شنو اللي خلاج تكتبين هالكلام بقولكم شفت الضيم طرد واهانات من اهله ضرب زواج مشاكل في لبسي طلعتي شغلي عشت اضطهاد نفسي انكسرت لين قلت بس وفوق هذا صرفت ما وراي ودوني عليه كنت احبه مثل الخبله وما ابي الناس تشمت فيني ولا ابي اتطلق ومجتمعي كان بكل شكل من الاشكال يأيده ويقول له الريال ما يعيبه الا جيبه..كم مره كنت بتطلق على شيله ولا على جوتي كل اللي سويته له ما نقع في عينه صبري وقفاتي معاه.. كل همه هو شيبي انا كانسانه مالي قيمه واول من خلا مالي قيمه انا وبعدين اهلي وبعدين مجتمعي ,,والله يكفي يا بنات اللي صاير فينا اكشخي وسوي وشبي اصابعج العشر شموع له واذا تزوج ولا خان امسكي عيالج ومرده بيرد لج ويعرف قيمتج واصبري لييييييش ليش يا بنات ليش هذي اللي تزوج عليها ما كسرها ما تركها ليش هي تتحمل عياله وهو الاخ ما يدري عن بيته اصلا عشان يعدل بين بيتين وهذي اللي خانها لو مره خانته مصيرها الموت والفضيحه وهي ينقال لها استري على ابو عيالج وهذي نزوه وهو مرده لج..ترى الرحمه زينه..وهذي في الاخر بشر ليش المره دايم لازم تكون العاقله والصابره وهي عمود البيت عيل ليش عطوهم القوامه دامه مب كفو وما يعرف نتيجه تصرفاته ؟؟ ..
انتي عشان تقنعين نفسج به تقولين في اللي اسوا منه ..وهو من يحصل فيج عيب ما عجبه باعج من اولها..بسنا انكار وبسنا كسر في انفسنا ..الوحده منا تعيش حياتها مره مب مرتين اخرتها بتندفنين في قبرج بروحج ..لا هو ولا اهلج ولا مجتمعج بيعيشون حياتج وبيتحاسبون عليها ..خلاصه الموضوع يكفي تنازل اللي مو مقصره ترمم نفسها وتشيلها وتداويها واللي ما يبيج مره لا تبينه الف عليج من شغلج ونفسج وعيالج وخلج من الامثال دوري راحتج يا يما ..انا صار لي فتره ما افكر الا في نفسي وعيالي النتيجه توه حاس انه مقصر وبهدلني والحين يحاول يخليني احبه نفس قبل مب لان حبي يهمه لا لان حبي يعتبر الضمان لتكمله دور سي سيد في البيت..الريال من يشوفج تموتين فيه يقول في نفسه بترضى باي شي ..حبيه بس لا تحبينه اكثر من نفسج لان محد يستاهل..اخرتها بتوعين على انسانه انتي حطمتيها عشانه وهو ولا بمفتكر فيج..وتبون تتاكدون شوفو حولكم كم وحده مكسوره وكم وحده مجروحه لانها تحب زوجها وضحت وسوت واستحملت ..اعرف ان في بنات بيعارضون على كلامي ..بس هالموضوع موجه للي مثلي بس.. اما اللي مرتاحه فالله يوفقها ويسعدها ..
واسمحولي طولت عليكم ..