السوسه الزرقاء .. وفيصل بن تركي .. ياتنجح .. ياتحول منازل ..!!

......................... ....
.........................
.....................
...............
..........
......
...
..
.
.
.
.


أسعد الله أوقاتكم بالخير والمسرات ..

من كثر ماتردد على مسمعي عشرات الملايين المهدرة ببعض الاتحادات واللجان الفاشلة دون حسيب أو رقيب أو حتى وكيل رقيب فني مستجد متقاعد .. !!
اصابني الاحباط من نفسي العفيفة و( النزيهه ) وبدأت التفكير جدياً وبجد في تأمين مستقبل الأبناء بكم ( مليون ) ..وبما انه لدي الكثير من العادات الحسنة اسوي لها استبدال سيئه واستلم الفرق كاش..!!!

وبدأت التفكير بمهنة (النصب) .. قلت للعيال قررت تامين مستقبلكم وجمعت لكم ..كم مليون ..وقلت لولدي خذ الفلوس وروح البنك افتح فيها .. ( حساب للورثه ) .. ورد بكل غباء قائلا أبوي أي ورثة وأنت عايش لا تكون ميت ولا علمتنا ..!!!
عندها استخدمت قوة الشخصية قلت خذ الفلوس وانت ساكت ونفذ الأمر بدون نقاش ..
وحاولت اقناعه ان يستعمل طرق النصب و يقنع البنك بفتح حساب بالدولار .. وحنا بعدين نصرفها من الصراف بالريال السعودي .. !!
او يشتري فيها اسهم وبالذات الخسرانه .. واذا ناقشه البنك يقول للموظف لا تفلسف انت ووجهك تراها خسرانه يعني اللي يسمعك يقول مشتري شي ربحان يكفيني خسارتي..!!
ولكنه كالعادة طلع غبي قال ابوي انت معطيني فلوس مونوبولي بذمتك أنت صاحي ..قسم شكلك ميت من جد..!!!

عندها كان بودي احولها دراما اصفعه على قفاه .. وأقول (اخرق برا بيتي ياعبيط انا ححرمك من الميراس ومش حتاخذ ولا مليم مونوبولي طول مانا عايش) ..!!
لكني شعرت انها طريقه قديمه عفا عليها الزمن علاوة على انه اسلوب غير تربوي .. !!!
وقررت معاقبته بالطريقة التربوية اعطيته ركبه على بطنة ..الولد مكرش من صغره..!!

وصفعته على خده الأيسر .. ثم صفعته على خده الأيمن .. ثم صفعته مرة اخرى على خده العلوي .. ثم صفعته بقوه على خده السفلي .. ثم صفعته بسرعه في الوسط ..
بصراحه وجهه مدلقم على بعضه ومضيع خده مدري وينه فيه !!
حدث هذا بينما اخوته يتابعون الموقف بذهول مصحوباً ببعض التغريدات الشريره ..!!
واخوه الصغير بالذات معجب في و يشجعني ويقول بصوت عالي انا من أول قايل لكم ان ابوي ثاني اقوى واحد بالبيت بعد امي ..!!!
قلت ويحك ايها السوسة ( اخص عليك ) .. وتباً لك هل من مبارز .. !!!

وعندها تنبهت اني من يوم متابعتي للسوسة في روتانا وانا غير طبيعي وذهبت للعيادة ..
وكتب لي الطبيب مضاد حيوي ومضاد حموضة ومضاد للإستفراغ ..ومضاد للهلوسة ومضاد للتسمم النفسي ..!!
مع تركيب سنين وضرس للولد .. سن ذهب وناب فضة وضرس برونز ..!!!

مع الراحة والبعد عن مشاهدة القنوات الفضائية ومخاطبة صحة البيئة وحماية المستهلك باغلاق أي مقابلة مع السوسة منعا لنقل العدوى .. والهلوسة بين المواطنين الشرفاء..!!
ووضع لوحة على البرنامج ( مغلق بسبب التسمم الفكري )..!!!
مع الزام أي مذيع يجري مقابلة مع السوسة بالكشف الطبي وإحضار شهادة صحية من وزارة الصحه انه خالي من عدوى السوسة الزرقاء .. وشهادة صحية من وزارة الزراعه انه خالي من السوسه الحمراء ..!!!

السوسة .. والذي لازال يمارس الفشل .. وتسويس الرياضة .. من خلال رئاسته للإتحاد السعودي للمسوسين .. المشارك بالدورة الاولومبية لذوي الضعف والهزال الفكري .. !!

الذي حقق الكثير من الإنجازات والميداليات وعلى سبيل المثال لا الحصر .. عساه بالحصر ..
عشر ميداليات ذهبية في النخر .. وخمس ميداليات فضية في الحفر ..ومن حفر حفره لأخية ضحك عليه ونط من فوقها الشعب تطور لو زمان كان طاح فيها ..!!!
وعشر ميداليات برونزية في سباق مية متر نخر..وميدالية مستعمله في لعبة سقوط ثلاث اسنان تحت الزانه..

وعدد آخر لا باس به من الميداليات المصدية في لعبة رمي الرمح مع السن .. وياعين الشمس خذي سن السوسه وأعطيني سن غزال .. !!
وميدالية تنك وحيده بلعبة القفز من فوق الثرمه.. !!

هذا السوسة الذي يسيطر من سنوات طويلة على اتحاد القوى ويمارس من خلاله مد نفوذه على بقية اللجان لمصلحة .. !!!
مع صمت الرئيس والذي كنت اعتقد انهم (يستغفلونه ويلعبون من وراه) على طريقة أنا أمي مسفره وحمل حفله بس ياريت متجيش على غفله ..!!!
ولكن الواضح ان السوسه وبمساعدة من يشاطره الميول مالت عليه وعلى من يميل مع ميوله المايله ..
يحيطون بالرئيس ( المرؤوس) بينهم ويلاعبونه بطريقة غمضي ياورده وفتحي ياورده ..المشكلة ان الوردة مغمضه على طول طيب فتحي ياورده ولو مره وفتح لهم ..!!

وإلا يكفي ان الفتح مفتح لهم وودي اقول ( فتحهم الفتح) لكن خايف لا يجيبون لي غرامه من لجنة ( الحكام ) .. والا يوقفني وزير الاعلام ..!!
وللتحايل على العقوبة لن اقول فتحهم الفتح بل سأقول خلاص ( مافتحهم الفتح ) هم اللي فتحو له ..!!!

هذا الإتحاد الفاشل الذي صرفت عليه الدولة ميزانية بعشرات الملايين ولسنين طويله ..!!!

يكفي انها تحول مقديشيو إلى دبي ..
وتحول مجاعة الصومال إلى تخمه ولأصبح اضعف صومالي واكثرهم هزالاً بوزن غشمشم ..ويتحداه والميزان الحكم ..والصومالي الوسط يفصل غشمشم وكنتاكي سوا ..!!
وتبدأ الحملة الوطنية لمساعدة الشعب الصومالي بالشاهي الأخضر وحبوب التخسيس ..!!!
ولم يتم حتى الآن التحقيق معه أو استجوابه أين صرف هذه الميزانية إلا اذا كانت الميزانية المرصودة يستلمها السوسه الزرقاء
بعملة المونوبولي.. !!!










بــــــــــــــــــــــــ ــــــــــــــــــوازيك ..



# البلوي بثلاثمائة مليون صنع فريق لا يقهر كوش محلياَ وسيطر آسيوياً وابدع عالمياً مرتين وخلته عالمي ومونديالي .. وجمع فيها بطولات وكؤوس شيبة كنتاكي .. وجاب بيبيتو ويوم فشل حطه بكبينه وصك عليه والفرجه بخمسه والتصوير بعشره لين طلع حقه ..!!
وتصور بنفس الميزانية مع لويس فيجو .. ثلاث مرات صورة صغيره بالحجم العادي طلع فيها فيجو وجنبه إبهام .. وصوره بالحجم الكبير طلع فيها البلوي وجنبه نقطه بيضاء عليها شعر .. وصوره وسط طلع فيها فيجو وجنبة ساعة وكف البلوي .. اللي رج كنتاكي رج وخلاه يشرب الحليب من فمه ويطلعه من خشمه لبن رايب ..!!!
وتم عزله واعتزل الرياضه قبل يجي كحيلان للنصر .. ولازال بعض النجوم الذين جلبهم البلوي مع الاتحاد ..!!!
البلوي بعد عودته للوسط الرياضي تفاجئ بأن كحيلان بثلاثمائة مليون صنع فريق حقق الوصيف ببطولات النفس القصير مرتين ولازال ينافس بقوه على المركز الرابع بالاحتجاج !!
اكبر صفقه حققها التعاقد مع السهلاوي بملغ ثلاثة وثلاثون مليون .. يعتبر اكثر من نصها دعم للقادسية من الرئيس الفخري .. والتجديد مع محمد عيد .. كحيلان قسم بالله اني احبك يارجل واتمنى نجاحك و استمرارك .. التعاقد مع كارينيو جت معك رمية من غير رامي .. حافظ عليه واذا هو ماحقق لك بطوله ماراح تجيبها .. وهذي اخر سنه لك ياتنجح وتستمر يايتم تحويلك منازل .. ..!!

# النصر ثلاث سنوات بثلاث نواب للرئيس .. اذا وافق المطوع وقبل بالمنصب .. من الان احذركم انا حاجز دور النائب المره الرابعه .. ولو سمحتم صفو بالدور لاتزاحمون كل واحد بدوره وبدون صوت .. وللتنبيه اللي يتكلم والا يدف نطلعه برا اللعبه ..!!!



# كحيلان الموسم القادم اخر سنه لك اذا بتحقق بطولة مع كارينيو لازم تعاقد مع مهاجم بمواصفات عالية جدا وبمهارات خاصة جدا يجيد الكرات الهوائية وضربات الراس بحيث يسدد أي شي بالهواء كرة قدم كرة طائره حارس مرمى كيس نايلون حمامه ..اي شي طايرعلى طول نشوفه بالمرمى .. !!
وكذلك يجيد التسديد بالقدمين ومن لمسه وحده .. وبدون فلسفه أي شي يمر من امامه يشوته بالباب بدون تفكير كرة قدم كرة يد كرة طاولة نفيخه قارورة مويه مدافع غثيث .. أي شي امامه على طول بالمرمى .. ويكون مقاس رجله ستين ماترحم اللي جايبهم لمعلوميتك مقاسهم ولادي ..!!!


# ولاعب وسط يجيد التمرير .. وصناعة اللعب وصناعة علب الهدايا وكوش الأفراح .. يمرر كور صحيحه للمهاجمين ويخليه انت وضميرك ويكون معاه مهاجم هداف يسجل حتى الكور المنسمه ..!!
ومنك لله يامسهرني ومطير من عيني النوم ومطير الكور ورا المرمى .. يامنيل انته بتهدف والا بتحذف ..ياكحيلان رجيتني الله يرجك المطلوب هداف وليس حذاف .. تراكم فضحتونا بين الأندية بالحذافين اللي تجيبونهم .. اذا على التحذيف اجيب لكم اخوي ( بعقد اعاره) احسن واحد يحذف بالحاره ..منها اعتبره دعم شخصي مني ومنها نفتك منه بالحاره ..فضحنا مع خلق الله ..!!


# احس احيانا باليأس .. من النصر والنصراويين تحس ان بيننا حرب داحس والغبراء او حرب البسوس .. ولمن لايعرف البسوس هي امرأة تسببت بفتنه وحرب استمرت قرابة اربعين عاماً .. هذا للمعلومية حتى لا يجي احد يحسبها مجموعة قطاوه .. وتوقفت هذه الحرب لعدة قرون قبل أن يستأنفها النصراويين اربعين عاماً أخرى .. !!!



# دخلت منتدى نصراوي بعد مباراة نجران .. ياساتر .. المواضيع نار مستعره ضد اللاعبين والاعضاء .. والردود اكثرها .. ياغبي .. يادرج .. ياسطل .. ياصحن .. ياملعقه ..وللأعضاء اقول هذي الردود تسئ لكم وللنصر .. وللمشرفين في ذلك المنتدى ارجوكم حذف مثل هذه الالفاظ .. يعني بذمتكم الواحد داخل منتدى والا محل ادوات منزليه .. باقي يكتبون التسعيره مع الًرد يادرج بعشره .. الثاني يرد عليه ياسطل بعشرين .. فشلتونا بين المنتديات ..!!!


# عفواً نسيت اضيف للثلاثمائة مليون دعم عضو الشرف رئيس المأساة بمبلغ مائتان وسبعة عشر ريالاً وربع .. وللحق المبلغ كان خمسمائة ريال .. لكنه اثناء حضوره للنادي لتقديم الدعم حس بالجوع ووقف عند استراحه واشترى ثلاثة شاورما وببسي وموية بنص .. الاسعار حسب الفواتير اللي قدمها مع الدعم ..!!!


# شراحيلي مع السلامه .. روح والقلب داعي لك .. الرياضة احتراف والدنيا مصالح والعاطفه ما تأكل عيش..!!!


# بعد الافلام الهندية بقنوات التخشيبه جا دورقنوات التكشينه.. التويجري مترزز على طول بقناة التكشين وهاتك ياطبخ وبطبطه هو والهراج .. هو بالكتابة يصنف من الكتاب بوزن الريشة الكتكوتيه .. وبالمصارعه بوزن الذبابة المجنحه .. لأن الذبابة الغير مجنحة اقل وزناً ولا تستطيع الطيران تأخذها نطنطه ..!!
وحنا حقانيين وما ودنا نظلمه رغم ان عليه نطات ماهي صاحيه .. تحس انك تشوف حركات مكشوفه وقنوات الأكشن تحتاج اثارة وكلها هراجا سعودي أو مهراجا هندي وواحد نطاط .. وخذ فيلم هندي وتنطيط للصبح .. آخر نطه بتعليقه على الاحتجاج على نجران ان النصر بيكسب لأنه كسر قوانين الفيفا ويقدر يكسر القوانين المحلية .. هذي طلعت بطه ماهي نطه .. الفيفا لا احد يستطيع كسر قوانينه اما تكسير القوانين المحليه فهذا تخصصكم ..!!!
يعني بالعربي ماتنبلع .. وباليوناني ما تنزرط .. الحلقه القادمه يمكن يغني هو والهراج ابو خراج اغنية ماما زمانها جيه وجيبه معاها شنطه فيها وزه وبطه بتقول واق واق واق ..!!!
وغرم العمري بعد ما تورط بينهم يبتسم و يضرب كفا بكف ويحوقل ويردد المقولة الشهيرة جنة الاطفال منازلهم ..!!


# اشغلونا غشمشم والسوسه وغثونا الله يغثهم .. ناقصهم مقابلة كنتاكي ويكمل الثلاثي الكوميدي ..!!


# بعد دور غشمشم وصفعته ولم يصفعني وارسلته ولم يرسلي .. جاء دور السوسة مقابلتة.. كلها ترهيب للجان . على طريقة ترشيح بن معمر جاء بسرعه .. والفرق بينه وبين أحمد عيد صوت واحد بس .. اسمعو الاتحاد الجاي عيد ماهو موجود.. خلكم معنا.. واللي ماهو معنا تراه ضدنا.. واسلوب طفولي اللي ضدنا نخليه يحفي ورانا ولانركبه معنا ..وعلى طريقة انا القطار السريع توت توت امشي ولا استريح توت توت ..!!!


# باقي دور كنتاكي تشوفونه بالمقابلة الجاية يقول خلاص فاتكم القطار فاتكم القطار فاتكم القطار ..!!!


طيب الله أوقاتكم ..