|| الحمدالله ولدت ،، وهذي قصتي :) ||

السلام عليكم بنات ..*


الحمدالله ولدت من شهرين تقريبا بتاريخ 22 -1 ،، ادري متاخره واايد بس شسوي ما الحق امسك الايباد مول *هالنونو فديييته *24 ساعه بايدي ..*

المهم بقولكم قصة ولادتي وشو الاخطاء اللي طحت فيها وان شاءالله ماتتكرر فالولادات اليايه ..*

الله يسلمكم الدكتورة خبرتني انه الماي ناقص عن البيبي ولازم ولاده مبكره وانا موعدي المفروض 30 - 1 ..
وانا اماطل وياها قد مااقدر مابي اولد قبل موعدي ومابي طلق صناعي .. بس انجبرت ورحت لها بتاريخ 21 -1 ..*

عطوني تحميله الساعه 4 ونص العصر وانا مفتوحه 2 سانتي .. وقالت لي اذا ماشتغلت معاج بعطيج الثانيه عقب 6 ساعات .. المهم بدا عوار خفييييييييييف *وعقب 6 ساعات بدا الطلق يزيد وعطوني ابره بالفخذ رقدتني بس اقوم عالطلقه وارد انام ولين وصلت 3 سانتي الطلقات ورى بعض وماقدرت اتحمل العوار اووف مثل عوار الدوره بس اقووى يوصل للعظام الله لا يوريكم شي فظيع*
وحزتها طلبت ابره الظهر .. ياني دكتور التخدير وضربني ابرتين مخدر ف ظهري عقب دخل ابره الظهر وماحسيت فيها مووول .. فالبدايه ريلي اليسار تخدرت وبدا جسمي يحكني*
عقب خف التخدير ولا جنه فيني طلق وعوار وكل شي عااادي وكنت اقدر امشي بعد*

المهم طول الوقت كنت راقده بس ايوون يجيكون كم سانتي مفتوحه ويروحون .. وصلت الساعه 6 او 7 الصبح مب متذكره عدل وكنت يمكن 7 سانتي او 6 ويات دكتورتي بطت الماي وكان شووي لانه ناقص ووصلت 9 سانتي .. وريلي ياحليله كل شوي يطل علي وفيه نووم ومارقد من البارحه بس كان يروح الغرفه يغفي شوي ويتصل عالقسم يسال عني ..*

وانا كنت موصيه دكتورتي اني مابغي خيااطه ابغي كل شي طبيعي .. بس تصير اشيا الواحد مايتوقعها ..
المهم وصلت 10 سانتي والدكتورة تقولي من تحسين بالطلق ادفعي وانا ماحس بالم الطلق بس احس بشد وتقلص وادفع وادفع ليين طلعت روحي وهالولد مب راضي يطلع ذبحت عمري بس ماشي فايده واقرا ادعيه وايه الكرسي واللي اذكره من سورة مريم بس تعسرت ولادتي*

عقب الدكتورة اضطرت انها تشفطه واول مره مانطلع وثاني مره طلع الحمدالله وقعدت اصيييح شي غريب لما يطلع راس الياهل ينحشر بين عظامج وتحسين فيها تتفجج وتتحرك من مكانها*

عاد الدكتورة قالت لريلي عقب لو ماسويتله شفط كنت بحولها قيصريه مع انه وضع البيبي ممتاز ووزنه 3 كيلو بس حزة الولاده رفع راسه فوق وصار صعب يطلع .. وقالتلي زين انج خذتي ابره الظهر والا ماراح تتحملين الالم لانها كانت اتدخل ايدها تحاول تعدل راسه*

وعقب نظفتني وخيطتني ولبسوني وخلوني ارتاح ساعتين بغرفه الولاده*

الياهل اول ماطلعوه ماعطوني اياه لانه كان تعبان شوي على طول ودوه يغسلونه ويابوه حقي شوي اجوفه وخذوه العنايه عشان تنفسه*

وريلي دخل عندي وانصدم يوم جاف الدم وجافني تعبانه خااف وايد ياحليله عقب يات نيرس هنديه كبيرة بالعمر شلتني هي وريلي وحطوني عالكرسي وقالتلي الحين قوي عمرج واكلي وغيري ملابسج وخلج ذكيه وتكشخي عشان الضيوف لاتخلينهم يجوفونج تعبانه وايد وامبهدله جدامهم يتني ضحكه من كلامها حسيت جنها يدتي ههههه



والحمدالله ولدي حبيبي كمل شهرين صح تعبت وياه فالبدايه مايرضى ياخذ صدري وتعبت من الجراحه لانها قصتني واايد عشان الشفط وغير اكتئاب الولاده الكرييييييه*



الاخطاء اللي طحت فيها وان شالله البنات يتعلمون منها :
كنت اروح المراجعات انا وريلي بس ومااخذ حد وياي وهذا غلط لازم امج او اختج او حتى ام ريلج المهم حد عنده خبره .
حزة الولاده رحت بروحي تخيلوا انا وريلي بس ومحد درى الا عقب ماولدت والسبب اني مابغيت حد يجوفني وانا تعبانه بالذات اهل ريلي وابغي اخذ ابره الظهر واهلي واهل ريلي معارضين*

وقلت لاهلي واهل ريلي انه الطلق ياني ورحت المستشفى .. وللحين محد يدري اني ماخذه طلق صناعي وابره ظهر هههه

والبيبي ياعمري عليه لانه طول فالولاده صارله انحراف واضح بخشمه بس الحين احسن بوايد عن قبل وراسه فيه ورمه من الشفط بس راحت الحمدالله*

وبس السموحه طولت عليكم .. اي وحده حابه تستفسر عن الولاده او البيبي لاني صرت خبره هههه انا فالخدمه*


والله يسهل عالبقيه ويرزق كل محرومه*