قصتي طويلة وارجوكم النصح جزاكم الله خير
تزوجنا قبل اكثر من 20 سنة ولنا عيال وواحد فيهم بالجامعة والثاني على وشك دخول الجامعة
مشكلتي مع زوجي بدات تكبر من بداية زواجنا ,, دايما يلح علي بان اكشخ وانا بصراحة انسانه
امل وايد صحيح انفذ طلباته و اذا مضى وقت انسى ويرد مرة ثانية وطلباته طلبات عادية مثل
انه يجب يشوفني دوم كاشخة وللامانة اهو سخي علي وعلى عياله ومقصر وايد على نفسك
طبعا في بداية زواجنا كان دوم يحبطني بان وزني زايد ..وانا بصراحة احاول اني اخفف وزني بس من دون فايدة ,, ما اقدر اصبر ممكن اصبر شهر بالكثير , وبالنهاية ارجع مرة ثانية
دوم يزعل مني ويانبي على اني ما اسوي اللى يبيه ,,مو بيدي احاول بس ما اقدر ,, وكذا مرة
يشتري لي حبوب تخسيس وكريمات بس ماكو فايدة فيني ما ادري اشلون الى ان استسلمت للامر الواقع ,,
قبل مدة 5 سنين فتحت مو بايله ولقيت صور له وحصلت خرابيطه ,, وواجهته ولا نكر ,,وحلف لي
انه راح يتغير وللامانه من ذاك اليوم الى لحظة كتابة الموضوع واهو ما شاء الله عليه بس انا الى الان ما قدرت انسى ولا ممكن انسى ,,صج اطوف له حتى امسك اسرتي بس من داخلي نار بركان
وتساعدنا مع بعض بالتجارة منه جزء ومنه جزء اكبر وحتى يلهي بالتجارة ولا يفكر بشي ثاني
قبل سنة تقريبا واهو يلح علي بالتخسيس وكل ما الح علي انا افتح عليه موضيع الصور وخرابيطه
ونوصل الى اني اطلب الطلاق منه ,, ودوم بمساعدتي له واهو طلباته ما ادري اشلون ,, يبي منه اتكشخ 24 ساعة وانا ما اقدر على هالشي وتفاجاة مرة بانه طلب اصحى على الاقل الصبح لانه يداوم بنظام الورديات مرة صبح ومرة ليل وقال لي يام عيالي على الاقل سوي لي ريوق وانا كسر خاطري بهالشي وقمت اقوم الصبح واسوي له الريوق ,,انا مقصرة بصراحة معاه بعد يطلب مني البس جينز وانا عمري ما لبسته ولا لبست بنطلون اصلا بحياتي لان بكل امانة وصدق من اهمالي بطني صار طايح مثل " الدلاغ " ولازم لي عملية من الخاصرة الى الخاصرة وازالة البطن يعني قص !!!
بالسالفة الاخيرة دخل اخوي الكبير وطلب طلباته واللى هي اي زوج يطلبها وصرخت بويهه لما قال اذا زوجتي ما تنفذ هالامور الزوجية والمفترض اي زوجة تسويها من حقي اتزوج ,, اهنيه انفجرت وقلت له اذا مفكر تتزوج طلقني وزعل علي ولا طلق وتركني .. وسوى لي فلم كانه صج طلقني وبيوم قال تعالي استلمي ورقة طلاقك وانصدمت ,, ولما اخذت الورقة لقيت مكتوب فيها الله يهديك يا ام عيالي , بصراحة كنت ندمانة واكابر ,,بس الحمدلله رجع ووعدته بالتغيير
وبعد 3 شهور انصدمت منه قال انه عطاني فترة اختبار كوني وعدته باني اتغير بس انا ما قدرت
وقلت لازم اضغط عليه واني اطلبه كل فلوسي وان تجارته معاي لولا مساعدتي له ما سوى شي
ولا صار له مستقبل وقلت له اذا مفكر تزعل ازعل على راحتك بس لا تخلي احد يشوفك ,,انفجر فيني الريال ما ادري اشلون وقام يسب ويغلط علي ,, وقال خلاص انا ما اقدر اتحمل ,,قلت له اصبر للصبح لانه بالدوام وكان الوقت ليل ,, قال بعد هالكلام ما اتحمل وانا باتزوج زوجة تنفذ وتعرف اشلون تتعامل مع الريال ,, وقلت احسن .. احسن لي واحسن لك كل واحد يروح بنصيبه وقلت له انا بعد بشوف نفسي واتعدل وضبط نفسي لنفسي ,, ومن القهر اللى فيني قلت له تذكر ايامك السودا والصور الفاضحة وغيره ,, سكت ولا تكلم وقلت له احمد ربك اني عايشه معاك ,, وما قدر يصبر
وتفاجاة انه طلع من الدوام وياني بالغرفة وقال لي انتي طالق ,, الحين انا صج مقهورة ومتحسفة
شنو اسوي معاه بعد كل اللى صار بينا .
رحت المحكمة معاه وتطلقنا وقلت له أريح لي واريح لك والطلقة هذي الاولى الرجعية
ارجووووووووووووكم ساعدوني
هل انا غلطانة ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟؟؟؟؟؟؟؟؟؟؟؟؟
