خلال مسومين هذا ماسيحدث !!

بسم الله الرحمن الرحيم ..

اول شي بـتستغرب عدد مشاركتي وتاريخ تسجيلي القديم شوي .. طبعاً كل مره انسى الباس واترك المنتدى فترة ثم ارجع فترة وعلى كذا .. حباً بالزعيم


المهم /

وضع الهلال مايطمن صراحة حتى لو جبنا البطولة هذي (54) بس ترا بالبلنتيات ..
ووضع الجمهور هو اللي مخوفني ومخوف كل مشجع .. من رابطة الى الحضور الى كل شي ..

اولاً /
حضور الجمهور للتدريبات بعد البطولة المفروض كان الجمهور حاضر بالتدريبات بكثرة .. هذا ماصار للجمهور المنافس ( النصر ) حضروا قرابة 5000 متفرج ورددوا دعمهم للإدارة بعكس جماهيرنا اللي تبغا الرئيس يروح وغيره من المطالبات
بنفس الوقت مايحضر تدريبات ولا مباريات ويطالب بالمقابل مايقدم .. المفروض ان الحضور كان كثير ياجمهور منطقة الرياض يعني حرام فريقنا جايب بطولة ولا يحضر احد انا ما ادري اذا كانت مغلقة مع اني ما أتوقع .. وبالمقابل 5000 حاضرين لتدريبات النصر .. وهو ضيع البطولة أمام الهلال .. انا أخاف من تدهور مستوى الهلال ابتداء من قلة الحضور وراح اذكرها بالنطقة الثانية ..


ثانياً /
كلنا نعرف حال النصر قبل مثلاً نقول 4 مواسم .. كان متدهور بقووووة ولكن متى عاد النصر للتطور ؟؟ عاد عندما عاد الجمهور .. جمهور النصر وقف وقفة جميلة لناديه وسانده بأصعب الظروف ولا يخفى علينا وهو خطر الهبوط .. فبدأ بالنهوض عندما نهض به جمهوره .. هذا ما نبغاه لكي نعيد الهلال كما كان .. اهم شي بالفريق هو الجمهور متى ماكان عندك جمهور قوي زي الهلال ( بس متى سيظهر ) تقدر من الهبوط انك تجيب بطولة اقرب مثال ( الأهلي ) ..


ثالثاً /
الرابطة او الألتراس .. انا قريت بالمنتدى من رد واحد من الأعضاء يقول انه ممنوع من الداخلية .. صراحة ما اتوقع بس بذكر كل شي عندي ولو انه ممنوع وش الحل ؟ ..
- اول شي وأهم شي [ رئيس الرابطة ] / عندنا كثار والصراحة انا ابغى تصويت يكون بموضوع مثبت فقط لرئيس الرابطة ويكون هناك فقط 4 او 3 ويكونوا افضل 3
وأفضل الصراحة الرابطة البحرينية أيام آسيا قبل موسم .. كان المدرج ناار وكان أكثر حضور للمجهور وقت الرابطة هذي ..
- الألتراس / الصراحة يشكرووون والله على مجهودهم بس هذا مايكفي للهلال وهم اكثر ناس اشتغلوا للهلال بالمدرجات ويعرفون الشي هذا الصراحه توزيع اليافطات ماشفناه بالنهائي من علم الهلال وغيره كان مختفي بالمررره .. ايضاً تنظيم الألوان الأزرق والأبيض يعطي أجمل شكل بدل من الأزرق فقط .. أيضاً الأقمشة اللي كانت بعام 2009 -2010 بحيث ابيض - ازرق ... لكامل المدرج كان شكلها مهيب للخصم وتطرب الجمهور ..
- جمهورنا يبغا لجنة خاصة فيه بالنادي يعقد معها اجتماعات بشأن المدرج الهلالي وبحضور الرئيس ورئيس الرابطة أهم شي ..
- الحركات اللي كنا نسويها من 2004 - 2009 واختفت بعد ذلك من حركة الموج والتصفيق وحركات اليدين وصار مدرجنا [ ناااايم ] وكأنهم مغصوبين .. واللي يجون من الشمال من حايل والقصيم ومن الشرقية ومعهم الرابطة البحرينية ومن الجنوب من أبها وتحت ومن الغربية من مكة وجدة والمدينة ينصدمون والله بالخمول اللي أصاب المدرج ولا يصير لهم دافع للحضور ..
- جمهورنا جمهورنا جمهورنا ... مهم مهم مهم .. الحضور الحضور الحضور
للتدريبات والمباريات ...


رابعاً /
مساندة الرئيس .. الأمير فيصل بن تركي رئيس النصر .. دعموه جمهور النادي وانتظروا ماذا سيفعل بهذه العزيمة اللي اعطوه اياه ..
لذلك نحن أولى بمساندة رئيسنا الأمير عبدالرحمن بن سعود .. لأنه حقق لنا البطولة الخاصة بنا .. وهو يواجهة ضغوطات اكبر من رئيس النصر .. اتمنى الأتفاق بأحد التدريبات القادمة والذهاب للتدريب وإعلان المساندة للاعبين وللرئيس والله شي إيجابي وراح تشوفون هلال آخر ومتطور أفضل من الوضع الحالي ..

خامساً /
الصراحة النصر شغال هالموسمين بقوووة وراح تشوفون النصر بقوووة قادم بسبب دعمهم لرئسيهم و حضورهم الملفت بكل محفل لناديهم مباريات, تدريبات , ....
بالمقابل راح يتدهور وضع الهلال اذا صرنا نجي بدون ما نظهر دعمنا للنادي وكيان النادي راح يكون حضورنا مثل عدمه لا تأثير بنفوس الإدارة ولا اللاعبين ..


سادساً /
أشكر كل من له يد في هذا الكيان وكل مشجع غيور على النادي طبعاً كل ماذكرته ليس هو انه بالمقابل لم يحدث او لم يُعمل به ولكن نريد ان يظهر بالمستوى المطلوب والمرموق لهذا النادي العريق .. اتمنى ثم اتمنى ثم اتمنى ان يصل صوتي للإدارة وقبل ذلك للجمهور الوفي الجمهور الملكي فأنتم دعامة الهلال الصلبة بطول هذه السنوات والسنوات ..


اخيراً /
هذة البطولة ليس معناها أن الهلال كان في أفضل مستوياته بل كان في مستوى متدني جدا .. لذلك لا تغرنا هذه البطولة بل أن تكون دافع للعمل الصحيح بدأ من مباراة القادمة ..

بقلم
[ كل مشجع هلالي غيور ]
:smilie47::smilie47: