عمليتي مع الدكتور امير لطفعلي زاده

الـــسلام عليكم بنات ,, حبيت افيدكم بتجربتي مع الدكتور لطفعلي زاده و اتمنى انكم تستفيدون و اي أسأله ان شاء الله انا حاظره اجاوب عليها ...


اول شي انا وايد كنت خايفه و اجازف اسوي العمليه و ليش قررت اسويها عند لطفعلي زاده لانه شفت اغلبيه البنات الي حطوا تجربتهم معاه يمدحونه الله يجازيهم بالخير ريحوني لانه ظليت اكثر من سنتين ادور دكتور شاطر حق مشكله خشمي ...

تبون الصراحه خشمي كان شكله حلوو طوييل بس نازل لي تحت و يوم كنت صغيره خدامتنا طقتني و كسرته و الكسر كان داخلي و ماطلع العظم ليه بره فماكان مخرب على شكلي ...

بس كان عندي الجيوب الانفيه و فتحه مسدوده بسبه الكسر ما اتنفس منها .. عشان جذي قررت اسويها

بكتب لكم بالتفصيل عن عمليتي و عن رحلتي حق مشهد - ايران .. كانت مغامره و تجربه حلوه مع الدكتور

اول شي انا وصلت مشهد بتاريخ 23-1-2013 و دقيت ع الدكتور قالي تعالي عيادتي ع الساعه 8 م عشان اشوف اذا تحتاجين العمليه او لا و فحص اولي ... و رحت له ولا العياده فل ماكو مكان اقعد من البنات و قمت اخز خشومهم .. و بصراحه بعضهم كان حلو بعضهم انصدمت واايد مرفووع بس كان لايق عليهم ! تحمست بصراحه بس ضاق خلقي ع الزحمه .. كان اكو عيوز قاعده الي اهي السستر مالت الدكتور انا سميتها ام صالح ههههه من كيفي ... المهم قالت انه الدكتور للحين مايه لانه عنده عمليه تقريبا ربع ساعه نطرته و لما يه دخلني ع طول و الي بره ماتوا من الحره هههه ظلوا يحشوون انه ليش دخلني قبلهم و اهما ناطرين من زمان !!

المهم فحص خشمي و كنت حيل متحمسه و دشيت بلاعيمه قلت له كل الي ابيه و ضحكني لما قالي فلانه بعلي ريجج شوي ههههه و سالني تبين خشمج باربي و لا طبيعي ولا باربي مع طبيعي .. :eh_s(22): مني قلت له باربي مع طبيعي .. و كتب لي ورقه شطولها مكتوب فيها وين اسوي التحليل و شنو نوع التحليل و وين اسوي الاشعه و نوع الاشعه و اني ادش المستشفى و احجز غرفه و بس و اسوي العمليه :D

انصدمت ماتوقعت اني بسوي العمليه ع طول اليوم الي بعدها ,, المهم لاني ماكنت ادل المنطقه عدل بنفس اليوم الي طلعت منه من العياده رحت احوس ادور المستشفى و لما لقيته دشيت و حجزت و قلت لهم انه عمليتي باجر و ضبطت اموري مع المستشفى ..

رديت الفندق و كليت عشا ة اهوا قالي بعد ال10 لا تاكلين كليت ليه 9 و بعدين من الخرعه انسدت نفسي
شربت ماي واايد و زهبت اغراضي حق العمليه و حاولت انام بس اطلع جذابه اذا قلت لكم نمت بس غفيت لانه التفكير اشتغل انه امبيه جنه مابي جنه هونت

قمت الصبح مبجر صليت و بدلت و رحت المستشفى حق التحاليل و بعدين رحت مستشفى ثاني حق الاشعه و بعدين رحت المستشفى الي بسوي فيه العمليه ,, و مناك عطوني جنطه داخلها لبس العمليات و بجامه حدي حبيتها حق بعد العمليه و تكرمون نعال ,,

بعدها دشيت على دكتوره خذت وزني و طولي و سالتني اساله مثل متى اخر مره اخذتي دواا و مسويه عمليه من قبل ولا لا ... والخ

المهم بعدها رحت فوق حق غرفتي و بصراحه مني حسيت انه لااا صج صج خايفه !! لانه على الساعه 1 الظهر بتكون عمليتي ... قعدت شوي احوس بالتلفون لين صارت 12 و صليت الظهر بعدين بدلت و لبست لبس العمليات و كان بس خالي معاي ... و امي بالفندق دقيت عليها و سلمت عليها و قلت لها حلليني و قلت لها تعالي بعد 3 ساعات بكون طالعه من العمليه ...

المهم الدكنور خلاني انطر ليه 3 العصر و اهو مايه للحين مواعيد مو خوووووش كلش هذي وحده من سلبياااته !!
و بعدها 3 و عشر يت سستر قالت لي يلا قومي عمليات
انحسرت حزتها ههههه فقلت لها دقيقه و تكرمون دشيت الحمام بعدين رحت غرفه العمليات بريووولي اييه نعم بريولي ماكو دلع فراش او كرسي و يدزونج هههه

المهم لما دشيت غرفه العملياات جدي تصرقعت شفت ناس مسدحه بغرفه الافاقه و يطلعووون اصوااات :eh_s(2): و دكتوري قاعد ياكل عييش و مرق @@ تخيلوا

ناداني دكتور ثاني و قالي شنو اسمه و انه اهوا المسؤول عن التخدير و كان حيل فرندلي و بشووش يسولف ضبط فراش العمليات و قالي انسدحلي و اول مانسدحت التموا علي يمكن 4 سسترات يضحكون و يطالعوني و يقولون لي لا تخافين احنا كلنا مسوين خشومنا و سهالات ..

عطوني المخدر بدرب و ضليت يمكن نص ساعه ماتخدرت و الدكتور حتى استغرب و سالني شنو ماكله او شاربه قبل لا تين قلت له ولا شي جان انام فجاءه يعني ماحسيت كلش شلون غفيت و لما قعدت ماكنت بكامل الوعي بس سمعت السستر تقول يلا خلاص قومي .. ودوني تحت اول ما طلعوني من الاصنصير امي كانت بالممر و سمعت صوتها جان اقول لها >> ماما شلون خشمي ؟؟ جان الكل يضحك و ناديتها مره ثانيه و قلت لها ابي ايدج مسكيني يعور و بس ورديت غفيت شوي ..

اصعب مرحله اهيا بعد العمليه بسببه البنج شفت نجوم الظهر تكرمون استفرغت لمده يومين دم اسود و هذا بسبه بنيتي الضعيفه و مناعتي قليله و يختلف هالشي من جسم ليه جسم طبعا امي تععبت وايد وياي و لما صحصحت شوي استوعبت انه عمليتي ماكانت 3 ساعات كانت 5 ساعات و الدكتور قال حق امي انه وايد تعب من خشمي بالعمليه و طبعا عطوني تقربيا 4 ابر مضاد حيوي عشان يوقف الترجيع

بعدها بيومين طلعت و رديت الفندق و بدا مشوار قله النوم و التنفس من الفم لانه خشمي كله دم و فتايل داخله .. شالي الفتايل من ثاني يوم و كلش مايعور واايد ناس خرعوني انه يعور اصلا ماحسيت فيهم

وبعد 7 ايام شلت الجبس بروحي طبعا ما على شلته طلعت روحي و ضغطي نزل لانه يعور !! و لما رحت له نظف لي اياه و شال الغرز اييييه الغرز الشي الي يذبح تمنيت اني ماسويت العمليه بسبتهم حسيت طلعت روحي لما شالهم و طحت غشيانه عليه و حييل يعور
حطلي لزقات و قالي بعد 6 ايام تشيلينهم و قبل لا تسافرين انتي شيليهم و تسبحي و تعالي احط لج غيرهم و بعدها ب4 ايام شلتهم و رحت له يوم سفرتي شاف اخر جك اب و قالي كل شي تمام و لزق خشمي و قالي عليج بالعافيه و بس رديت الكويت مع خشم يديد

طبعا الحين بقولكم تعليقاتي على هالتجربه مع الدكتور .. اهوا شغله 100% مضمون و حلو و نظيف مو انا اقول الي شافوني و شاف خشمي يقولي .. بس اكو سلبيات فيه انه دفش حيييل بتنظيف الغرز و الخشم يعني ما يدلعج يفقص بخشمج و كنت اصارخ عنده .. مواعيده مو ذااك الزووود كلش !! ,, و سعره غالي ع مستوى ايران كليهاا الدكاتره كلهم ياخذون 2000$ دولار واذا زاد 3000$ إلا اهوا ياخذ 4500$

و شكرا ادري طولت عليكم بس اتمنى انكم تستفيدون :eh_s(7):