غربــــــــــــــــــــــ تي

غربتـــــــــــي
للكاتبة:


"البداية"
*الجزء الاول*
لك غلا يزداد فاق الإعتياد غالين في زوته يزداد زود
في بلادي انت لي وحدك بلاد وفي غربتي ما غربت وعد وعهود
"الصراحه ملان لايعه جبدي من الدراسه اشوف ربعي مشغولين في السوالف والضحك الا انا؟؟"
اوووه نسيت اعرفكم ع نفسي
اسمي نهيان عمري 21 سنة طالب ادرس في الجامعة الرابع من ترتيب اخواني ولي اختين بعدي
انا شخص منبوذ في عايلتي"ليش؟؟"ما ادري اخواني ما يحبوني لأسباب مجهوله بس اللي اعرفه انهم يغارون مني لأن ابويه الله يرحمه يحبني اكثر منهم ليش؟؟"ما ادري"يمكن لأني احلى واحد فيهم"ورغم هذا كله انا احبهم لأنهم اخواني ومالي غيرهم علاقتي مع خاواتي سطحيه ما اعرف عنهن شي ولا يعرفون عني شي يا دوبك اسمي
نحن من عايله معروفة في ابوظبي وابوي من اكبر التجار فيها لكن بعد ما توفى"الله يرحمه"استولى اخوي العود محمد ع الحلال وسيطر عليه"اهو مب عصبي او اناني او شرير" لا هو انسان طيب وحنون بس انه مب اجتماعي تلاقونه انطوائي وما يحب اللمه وجمعت الأهل متزوج وعنده 3 اولاد وبنت صغيرونه بس انا ما شفتها الا في الصورة.
وبعدة اخوي سلطان انسان متكبر وحليو وشايف نفسه على شو؟"ما ادري" ما يحبني خير شر بس يادوبك سلام ويروح ولا مرة سألني شحالك"آه"معرس وعنده "توأم ولد وبنت"بعد شايفنهم في الصورة"
بعدة اخوي منصور انسان طيب وخفيف دم وان شاء الله ما تنتقل له العدوى"هو الوحيد من اخواني اللي يسأل عني طول فترت غيابي هو الوحيد اللي يفكر فيه ويسألني اذا ابا شي ولا "ما قصر معايه" توة معرس
بعدة:انا طبعا"
بعدي"اختي عليا انسانه مغرورة وايد وشايفة نفسها ع اختي مها ما خذة من طبع سلطان وهي في الجامعة
بعدها مها 17 سنه في الثاني ثانوي طيوووووبه وايد وهي اللي من بعد منصور اللي متواصلة معايه عبر المسن كل يوم ادخل واكلمها تحبني وقلبها ع قلبي ما ترقد الا وهي مطمنه عليه رغم صغر سنها بس آه فديتها احسن من عليا ومها الوحيدة اللي ماخذة الشبه من اميه"الله يرحمها"بس فيها صفات غريبة الكل في هالعايلة طويل بس هي متوسطة ومتينة شوي واللي حلاها ويهها الدائري وخدودها الوردية البارزة وماجذب عليكم هي احلى عن عليا"بالنسبة اليه"لكن عليا حلوة طويلة ضعيفة"
نحن عايله كل واحد ف بيته لكن في حوش واحد وفي النص صالة عودة نجتمع فيها ومعظم الوقت تقعد فيها يدتيه"أما عليا مسيطرة ع البيت متحكمه في تصرفات مها بس من بعد ما ييت ووقفتها عند حدها ما تدخلت ف حيات مها.
امي وابويه توفوا"الله يرحمهم"ابويه توفى وانا عمري 16 سنه تقريبا وحزنت عليه وايد ما تصورت حياتي من دونه منو اللي بيحن عليه ؟؟منو اللي بيعتني فيه؟؟
بعدها ب 3 او 5 سنين تقريبا"بس مش متأكد"توفت اميه وهاذا اللي زادني حزن وقهر لكن صبرت وطال صبري
"ف بداية حياتي كنت وحيد وما لي غير ابويه واميه من بعد ما توفوا ما حد بقى غير ربعي اللي هم:
مصبح"هذا ربيعي الروح بالروح وين ما اروح معايه كأنه"توأم روحي"احبه محبه اخويه ولا قد ردلي طلب بس يقولي آمر"
ناصر"الله الله عليه خفيف الدم وسوالف وضحكة بس آه ما كمل معانا دخل كلية الشرطة في ابوظبي
أحمد ولد والنعم فيه ريال وعند كلمته بس من عرس وكلمته عند حرمته"ههههه"متحكمه فيه بس ايينا ف السنة مرة "لا حليله ما قصر معانا بس الله يعينه"وهو اشتغل في شركتة ابوة يعني ما كمل دراسته
سهيل"آخر واحد ف الشله وهو حساااااس بمعنى الكلمة"كلمة وحدة تجرح او تمزح معاه خلاص ينجرح وياخذ ع خاطره"ونسميه
"لا تجرح احساسي انا انسان حساسي"
"اووووه تأخرت ع الكلاس الله يسامحكم قعدت اعرفكم ع عمري بس ما عليه بخبر عليكم "البروفسور"عشان يهزبكم
وبعد ما طلعت من الغرفة لقيت الصالة خاليه"أخ منهم ما قالولي يالله خاينين"رحت البس جواتيه وخذت كتبي ورحت قبل لا اتأخر اكثر
الجو روعة اليوم احسن عن البارحه رعود وامطار غزيرة"والواحد ما يروم يطلع في هالجو وانا حليلي تميت في الكوفي شوب لين ما خف المطر شوي ورجعت للشقة"
وصلت لحرم الجامعة وكنت مسرع حتى اني ما اشوف اللي جدامي بس
نهيان:أووووه
البنيه:لا لا عادي
ونزلت الم كتبها
البنيه:لا عادي الظاهر انك مستعيل رح قبل لا يحطك ابسنت
نهيان:ههه هاذا الواجب اختي
وبعدها رحت للكلاس اللي تفاجأت ان البوفسور غايب لأنه مريض والشباب يضحكون عليه
سعود"من السعودية:كيفك يا خويه مستعجل اشوفك
نهيان:ليش طلعتوا من الشقة وما قلتولي؟؟
زياد"من الكويت:شفناك غارق ف بحر افكارك
نهيان:يا سلام؟؟
مصبح:انزين ما صار شي طلع البروفسور غايب
سهيل:يالله شباب خلونا نروح
نهيان: ع وين؟؟
سهيل:ع الكوفي
نهيان:والله لا عت جبدي من الكوفي
سهيل:في مكان ثاني نروح له؟؟
سعود:شو رايكم نتمشى في الهايد بارك؟؟
نهيان:بعيدة
زياد:مب وايد
نهيان:خلاص يالله
وبعد ما طلعنا لقيت البنت اللي دعمتها من دون قصد وما اعتذرت منها
نهيان:اقول شباب
الكل:نعم
نهيان:عندي شغله بسرعة وراجع لكم
زياد:أوكي ننتظرك برى
نهيان:اوكي
بعد ما راحوا لفيت صوبها هي بنت حلوه بس مب لذاك الزود وزين انها محافظة على عاداتها وتقاليدها"من رمستها عرفت انها من اهل الإمارات ومتحجبة ولا بسة بالطوا طويل وما كانت تحط ميك اب مثل باقي البنات"
رحت صوبها كانت منهمكة في كتابت واجباتها والظاهر اني بخرب عليها
نهيان:السلام عليكم
واول ما رفعت عيونها:هلا وعليكم السلام
نهيان:أأأ الصراحه انا ياي اعتذر
البنيه:تعتذر؟؟
نهيان:يوم دعمتج ما اعتذرت لج
البنيه:هههه لا عادي انت مش قاصد
نهيان:ادري بس لا زم اعتذر آسف
البنيه:مقبول اعتذارك
نهيان:عيل اخليج
البنيه:الله يحفضك
ورحت عنها باين عليها مهذبه مب مثل البنات الثانيه الله لا تبلانا كل ما اكلم وحدة بسب الدراسة ولا اسأل قعدت تتمايع ف رمستها وتتدلع "ياحيها"حسيت انها طيبه بس الظاهر انها تدرس هنيه بس غريبة بنت تدرس برى وبروحها؟؟
المهم طلعت للشباب اللي كانوا مفولين عليه ليش اني تأخرت ورحنى الهايد بارك مشي
الهايد بارك معروف عنه بوجود اهل الأمارات والاقي حد من الأهل ولا الربع وفي الإجازات اكثر شي لأنهم يسافرون للندن"صح نسيت اقول لكم"
انا ادرس في لندن اولا ما كنت مقتنع لكن يوم دريت ان مصبح وسهيل بيسافرون معاي وبيكملون دراستهم اتشجعت وسافرت ف البدايه كنت وحيد وحزين "واحس بالغربه"لكن بوجود سهيل ومصبح حسيت بالأمان وشوي من الإستقرار"وبعدها تعرفنا على سعود وزياد وصرنا ربع"على قولت زياد" واشتركنا ف شقة وحدة وهاي الشقة فيها ذكرياتنا الحين كملت 3 سنين تقريبا وانا ف لندن ارد البلاد بس في الإجازات"
"اعرفكم اكثر عن نفسي"
ما عندي عموم ابوي هو الوحيد وعنده اختين اللي هن عماتي وحدة في العين ووحدة عندنا في ابوظبي وعمتي عندها 3 اولاد وبنتين اصغر مني بوايد اكبر واحد في الثانويه عامه وهو طيب وحبوب .."بعرفكم عليهم بعدين"
اميه وحيدة ابوها وامها لأن يدي الله يرحمه مات ويدتي ما خذت حد من بعدة وبجذيه ابويه خذ اميه لأنهم كانوا ييران لول ويقولون ابويه شاف اميه بالصدفة وذاب فيها"ما ادري يقولون لي"
"شيخة"يدتيه احلى ما فيها سوالفها وحنانها وطيبتها
وهي ام اميه ما لها حد غيرنا وعايشة معانا ف البيت ومها تحبها وهي اللي تعتني فيها اكثر شي
نحن الحين ع نهاية الكورس الأول وبتي إجازة نص السنه وهاي أحلى إجازة عندي
تعرفون ليش؟؟ لأن اخويه منصور قرر يسافر هو وحرمته هنيه للندن وطبعا قلت لهم اييبون مها ويدتيه
"هاذا اذا طاعت بس اكيد عشان خاطري بتي معاهم"
وما بقى غير شهر وبس"الله ولهت عليهم الصراحة حتى سعود يوم درى انهم بيون قال لي خلهم اييبون معاهم رز البسمتي"هههه"حليله لا عت جبدة من البيتزا ولا الهمبورجر ولا السلطة وهو يموت ف المجبوس دياي"
اما مصبح يقولي دخيلك خلهم اييبون لنا قهوة ولا ينسون الفناييل والقناد"بعد طلبه غير"
اول ما وصلنا لقينا القليل من العرب تمشينا واشتريت آيس كريم آه أموت في الشيكولاته
نهيان:شباب تبون الصدق
الشباب:شو؟؟
نهيان:ولهت ع إماراتي الحبيبه
مصبح:أيييه صدقك اللي عايش ف الإمارات لويفارجها يوم واحد توله عليها وين لو 3 سنين؟؟
سعود:أنا الصراحة زرت دبي مرة وحدة
مصبح:دبي؟؟يا اخي نحن في ابوظبي وبعدين وين رحت ف دبي؟؟غير السيتي ولا المهرجانات؟
سعود:لا المهرجانات
نهيان:أقول سعود انت وزياد معزومين عندي في ابوظبي
سهيل:يالله شو رايك تروح الحين؟؟
الكل:هههه
نهيان:لا قصدي يوم بنتخرج ولا في الإجازات يروحون معايه
زياد:لا انا ما اقدر
سعود:خلوه الرجال بيتجوز
نهيان:لا؟؟متى؟؟
زياد: في شهر 8 إن شاء الله
"ترى زياد هالسنه وبيتخرج اما انا والربع باقي لنا سنه"
سهيل:مبروك
مصبح:الله الله زياد ودع العزوبيه ولا تنسانا
نهيان:هههه واتحذر تتحكم عليك مَرتك
زياد:ههه مُرتك مو مَرتك مثل اللبنانيين
نهيان:المهم حرمتك
سعود:أقول شباب
الكل:هلا
سعود:شفت لكم شوفه..الله الله
نهيان: عدك تبصبص ف اللأجنبيات؟؟
سعود: ايش فيها عادي
سهيل:تصدق انك فاضي
سعود:يا اخي شوف شوف ذيك الطويله ام شعر احمر
الكل:هههه
نهيان:رح رقمها
سعود:انت فاكر نفسك في اإمارات اروح ارقمها؟؟حتجبلي الشرطة
الكل:هههه
نهيان:اتخيل الشرطة ما سكينك ويقولون ارهابي
الكل:هههه
مصبح:اقول شباب يالله تأخر الوقت
هنيه تذكرت وفي هالساعة لا زم ادخل المسن عشان اكلم مها"ترى عندي لاب توب حررررة"
وبعد ما يينا مشي كل واحد منشغل اللي يدرس واللي رقد واللي يغسل ثيابه
دخلت لغرفتي ودخلت المسن بس غريبه تأخرت مها
"في الإمارات"
مها:عليا ممكن تسكرين
عليا وهي تتكلم في التلفون:ههههه لا صدق؟؟
مها:عليوة
عليا:صبر....شبلاج انتي؟؟
مها:حرام عليج سكري
عليا:ما اريد
مها:من الصبح وانتي مشغلتنه
عليا:والله مب ع راسج
مها:انزين بكلم نهيان ع المسن وبطمن عليه وردي تكلمي
عليا:ما اريد
مها:عن الغلاسه
عليا:فارجي يالله
مها:اذا ما سكرتي بمق الفيشة
عليا:والله ان مقيتها لتشوفين شي ما قد شفتيه ف حياتج
مها:ما عليه منج
وراحت تمق الفيشة وهنيه عصبت عليا وصفعت مها كف ع ويهها من الغيض وبعدها راحت لحجرتها وهنيه اتصلت مها ع نهيان
نهيان وبسرعة"هلا والله ليش تأخرتي؟؟
مها"هلا بك بس تعرف كالعادة عليوة ترمس ف التلفون
نهيان"الله يعينج واخبارج انتي؟؟
مها"طيبه وانته؟؟
نهيان"توني ياي من الهايد بارك
مها"كم الساعة عندك؟؟
نهيان"متى نسيتي؟؟
مها"لا بس اخربط
نهيان"الساعة 12 ونص تقريبا
مها"اهاا الصبح؟؟
نهيان"انتي شو رايج؟؟
مها"ههه
نهيان"حد داخل؟؟
مها"ليش؟؟
نهيان"اسأل
مها"ربيعتي
نهيان"خليني اسولف معاها
مها"قصورك بعد تكلمها
نهيان"ليش لا عادي
مها"بس انا ما اريد.. اقول
نهيان"شو؟؟
مها"ترا يدتيه بتي معانا
نهيان"قولي والله؟؟
مها"والله
نهيان"يا ربي فديت يدتيه انا
مها"هيه بس يدتك
نهيان"وختيه انا
مها"ههه
نهيان"اقول ما نزل شي يديد من الأغاني؟؟
مها"انته شو تبى؟؟
نهيان"امممم نهيان الكثيري
مها:منو هاذا بعد؟؟
نهيان:حد ما يعرفه؟؟
مها"انا
نهيان"ادخلي موقع من مواقع الأغاني واهديلي
مها"احيد لا زم انا اللي اهديلك مب انته اللي تقولي اهديلي
نهيان"انزين يالله ترى ما عندي وقت
مها"دقايق بس شو تبى؟؟
نهيان"على ذوقج
مها"امممم صبر
نهيان"هاذوه انا صابر
مها"ههه لا تكلمني خلني ادوره
بعد ما تأخرت نص ساعة
مها"اقول
نهيان"ليش تأخرتي؟؟
مها"تذكرت ربيعتي تحبه وعطتني السي دي ماله ورحت ادوره
نهيان"نص ساعة؟؟
مها"شو تباني اسوي؟؟بس صبر
نهيان"شو بعد؟؟
مها"احيدني سمعت اغنيه حلوه واهداء من عندي
نهيان"عساها يديدة مب جديمة؟؟
مها"ههه لا ربيعتي عندها كله يداد
نهيان"فديت ربيعتج انا
مها"ش هالرمسه؟؟
نهيان"ههه امزح ويا ويهج يالله وينها
مها"ارسلتها
نهيان"ما يت
مها"اصبر شوي
نهيان"هيه يت ثانكسسسس
مها"ويلكم
وبعد ما خزنتها عندي
نهيان"اقول مهايه
مها"هلا
نهيان"اخليج سلمي ع يدتيه وخواني وحريم خواني وعليوة الشريرة
مها"سلام يوصل يالله الله يحفضك والله الله ع عمرك
نهيان:لا توصين حريص
مها"وما وصيك ع الصلاة
نهيان:ولو لازم انا صح اني سافرت بس ما بنسى عاداتي وتقاليدي وديني
مها"هيه ريال يالله مع السلامة
نهيان"الله يحفضج
وبعد ما بندت المسن شغلت الأغنيه وقعد اسمعها الصراحه كلماتها عيبتني
"بت ارقب وارتجي وصله
لين شد وعافني ليلي
على الوعد وعيونيه عجله
وألخلي ضمن المذاهيلي
يشتكي روز الهواء ثقله
في الحشى وكفوفه تميلي
من عيوني يرتوي دجله
والفرات وجارف النيلي
في خشوع الفرض والقبله
وفي روايا الليل تطريلي
عنك ما تخذني الغفله
ودونكم لا زاد يهنيلي
اطلبك يا سيدي مهله
روف بي يا ظافي الشيلي
من لواحظ عينك الشهله
في حماك وجرتك دخيلي
وهنيه دخل علي سعود المزعج يباني احل له الواجب وانا طبعا اتأفففففف
بعد ما صلينا صلاة الظهر رحنا نتغدى وعقب رجعت عشان احل واجب سعود اما الشلة زياد يروح المكتبه يسوي بحوث اما مصبح يرقد وسهيل يحب يروح النادي فترت الظهر ويسوي رياضة وبعدها يرجع ويدرس اما سعود يقعد تحت التلفزيون ويطفح"شو غير الفوشار والبيبسي؟؟"
بعد ما خلصت لقيت سعود راقد ع الكرسي والتلفزيون شغال وشكله يضحك وياليت كانت عندي كيمرة
مللت وبعدها قررت اروح المكتبه عند زياد
وانا طالع تفاجأت بوجود البنت اللي دعمتها
ابتسمت ليه ودخلت الشقة المقابله لشقتنا استغربت"اكيد هاي اول سنه لها لأني اول مرة الاقيها
بس ليش ما لقيتها من قبل دام شقتها مقابل شقتي؟؟ وبعدين منو عايش معاها؟؟ لا يكون بروحها؟؟
المهم كملت طريقي للمكتبة اللي كانت ملل ف ملل وقررت اطلع اروح أي مكان
تمشيت وكنت مار ع نهر وكان الظهر وجوهم عجيب الهوا بارد ولطيف لميت لي الحصى وتميت افر ف النهر لكن تفاجأت بصوت ناعم ورقيق
البنيه:لو سمحت
لفيت:نعم
البنيه:انته...
............................
منو ظنكم هالبنت؟؟ وشو تبى من نهيان وهل وجودها في القصة مهم ولا؟؟
نهيان بيتعلق فيها ولا؟؟

*الجزء الثانـــــي*
........................
تمشيت وكنت مار ع نهر وكان الظهر وجوهم عجيب الهوا بارد ولطيف لميت لي الحصى وتميت افر ف النهر لكن تفاجأت بصوت ناعم ورقيق
البنيه:لو سمحت
لفيت:نعم
البنيه:انته...
نهيان:انا؟؟
البنيه:انته نهيان؟؟
نهيان:هيه بس كيف عرفتيني؟؟
البنيه:سألت عنك
نهيان:شي تبين؟؟
البنيه:لا بس حبيت اتعرف عليك لأنك شخص مهذب وطيب ويكفي انك من الإمارات
نهيان"شتبا هاي بعد متفيجة اونها بتتعرف":وليش واثقة فيه لاهالدرجة؟
البنيه:ما ادري بس ممكن تكون علاقتنا اخويه؟؟
نهيان:طبعا بس ليش اخترتيني انا بالذات؟؟
البنيه:لأني ما لقيت لي بنيه مواطنة قصدي من الإمارات
نهيان:بس في بنات من الكويت ومن دول ثانية
البنيه:ما ادري ما اقدر اتعرف عليهن
نهيان:ليش ما حد معاج في الشقة؟؟
البنيه:هيه اميه
نهيان:امج؟؟
البنيه:ههه مستغرب؟؟
نهيان:اكيد
البنيه: عندنا شقة عدال الهايد بارك في اول السنة بس بعيد شوي عن الجامعة وانا تعبت كثر ما اروح وارد فقررت اميه ننتقل لهنيه
نهيان:اهااا وما لج ابو او اخو؟؟
البنيه:للأسف ابويه طلق اميه من كم سنه وما عندي اخوان
نهيان:آسف
البنيه:لا عادي
نهيان:وانتن بروحكن؟؟
البنيه:هيه عادي تعودنا ع الوحدة وغياب ابويه عن حياتنا
نهيان:ومنو اللي يصرف عليكن؟؟
البنيه:اميه
نهيان:وشو تشتغل؟؟
البنيه:ما اعرف بس هي تشتغل في شركة في الأمارات وتتواصل معاها عبر الفاكس والنت وشغلتها معقدة وما احب اسأل وايد عنها وتمت تسافر وايد فقررت تستقر ف لندن عشان اكمل دراستي ف الجامعة بس الصراحة حلوة الجامعة هنيه بس خسارة ما حد معايه
"هنيه حنيت عليها لأني اول ماييت حسييت بالغربة وما حد كان معاي غير ربعي بس ما عليه بخليها مثل اختيه"
نهيان:أها بس ما عرفتيني ع اسمج
البنيه:هههه اسمي خوله
نيهان:هلا بج من وين؟؟
خوله:من دبي
نهيان:يا هلا والله
خوله:يا هلا بك وانته؟؟
نهيان:من ابوظبي
خوله:هلا والله بأهل العاصمة
نهيان:هلا بج بس اخليج الظاهر اني تأخرت وتقدرين تعتبريني مثل اخوج لا اكثر وإذا نقصج شي ولا احتجتي لشي انا حاضر
خوله:مشكور وما قصرت وانته تقدر تعتبري مثل اخت لك
نيهان:ان شاء الله يالله شي تامريني؟؟
خوله:لا سلامتك
نهيان:وين بتروحين؟؟
خوله:برد للشقة
نهيان:عيل ياالله بوصلج
خوله:لا ما اريد اعطلك
نهيان:لا انا برجع لأني تأخرت عليهم
خوله:تدري الصراحة عايبتني شلتكم
"وكملنا طريقنا"
نهيان:وشو اللي عجبج فيها؟؟
خوله:الصراحة لأيام كنت اراقبكم هاذا الريال اللي معاكم متين شوي
نهيان:ههه سعود؟؟
خوله:ما ادري بس شكله كل ما يضحكم باين انه خفيف الدم
نهيان:ههه الا خفيف؟؟
خوله:و الثاني اظني البحريني؟؟
نهيان:لا كويتي
خوله:ههه احس انه ما له دور في الشلة مستمع
نهيان:لا هو يسولف بس يعني مب وايد
خوله:وواحد كل ما تقولوله شي يزعل ليش؟؟
نهيان:ههه هي هذا سهيل
خوله:الا هاذا اللي مسوي عمرة ابوكم مع انه شباب وفي مقتبل عمرة من تصرفاته باين انه شيبه
نهيان:ههه الظاهر انج صايرة مراقبة
خوله:لا حرام عليك بس تعرف ان مالي حد وامي كله ملتهيه مع شغلها وارد اقولك شلتك عيبتني وودي الصراحة انضم لكم بس ها من سابع المستحيلات شييبني انا البنت بيت 5 شباب؟؟
نهيان:عالعموم مثل ما قلت لج اعتبرينا مثل اخوانج وان بغيتي مساعدة ولا احتجتي لشي نحن حاضريين
خوله:مشكور وما قصرت
وبعدها وصلنا للمبنى وكل واحد راح لشقة الصراحه استانست لأن سوالفها مثل سوالف مهايه اختيه انا ما اريد استغلها لشي بس حزنتني زين انها تعرفت عليه ولا اذا تعرفت على حد غيري جان راحت فيها بس بحاول اني ما اتمادى معاها لأني ياي للدراسه وارد للبلاد والشهادة في يديه
باين عليها غنية لطريقت لبسها "الباسها ماركه"يعني ها اللي اشوفه لكن غريبة انها ماتحط مكياج اللي اعرفه ان كل بنت تحط يمكن نادرا من البنات اللي تلاقيهن ما يحطن بس ليش ما تحط؟؟"المهم زين الله هادي عليها"
ومحافظة ع عمرها عن عيون الشباب والصراحة محزنتيني لأنها وحيدة ولا امها مهملتنها؟؟ بس بحاول اخلي مها تتعرف عليها عشان يكونن ربايع والصراحه قضيت معاها وقت حلو وسولفنا مع بعض كأني متعود عليها بس شي واحد غامضني ليش امها متنقله من بلد لبلد وبعدين ما عندها اهل؟؟ ابوها وين عنها؟؟ غريبة"
"ارد واقول لكم بعرفكم ع نفسي"عسى ما مليتوا منيه؟؟"
انا شاب طويل مب عريض بشرتي بيضا ويهي ضعيفوني عيوني سود وشعري اسود وشو بعد؟؟ وانا المزيون اللي بين الشله"ما اريد اكون اناني بس مصبح يشاركني الحلاة وكلهم حلوين بس انا الأحلى
هواياتي ركوب الخيل والسباحة واكرة شي اسمه مكتبه ما احب اقرى كتب بس احب حد يقرى لي
احب سندويج جبن وعصير افوكادوا"معظمكم ما يحبه صح؟؟ اكلتي المفضلة برياني تونه
ههه اكيد الكل يحبه صح؟؟ ما احب اللحم والدياي بس نادرا ما آكل دياي احب النس كافييه اما الجاهي ما اطيقة
واحب البيبسي دايت وشو بعد"أحب الشيكولاته آه اموت في شي اسمه جالكسي يم يم"
اول ما وصلت ما لقيت حد وين راحوا؟؟
كانت الساعة حوالي 3 ونص رحت اوعيي مصبح عشان يقوم لصلاة العصر اما سعود يالله منه ما يقوم بسهوله اضطر اني اصب عليه ماي ولا اجرب أي طريقة ثانيه توعيه هاذا لو قنبله انفجرت عداله ما قام
وبعد ما توضيت قام مصبح يتوضأ ودخل علينا سهيل وهو هلكان من الركيض
نهيان:هاه كم كيلوا مشيت اليوم؟؟
سهيل: حوالي 5 كيلوا
نهيان:متواصل؟؟
سهيل:هيه
نهيان:ول وايد
سهيل:شو اسوي اقول حد ف الحمام؟؟
نهيان:هيه رح حمام غرفت زياد
سهيل:اففف تعب يالله بروح قبل لا يأذن
نهيان:يالله باقي شوي عن الصلاة
سهيل:اوكي
وبعدها سويت لي نس كافييه ع بال ما نجتمع"ترانا نصلي جماعه بس ف الشقه"
دخل زياد
نهيان:هاه كم كتاب كلت اليوم
زياد:قل ما شا الله لا تحسدني
نهيان:ما شاء الله
زياد:بس ايعان
نهيان:كل هالكتب وايعان؟؟
زياد:يالله منك ما بتسكت؟؟
نهيان:شو قريت؟؟
زياد:عن تاريخ امريكا وحيات الأمريكيين القدامى ومنو اللي اكتشفها
نهيان:الله كل هذا؟؟
زياد:اقول الكلام معاك ضايع اروح اتوضأ للصلاة احسن
نهيان:سهيل يتسبح ف حمامك
زياك:وحماكم؟؟
نهيان:مصبح فيه
زياد:يالله شنو هذا؟؟
نهيان:يمكن خلص
زياد:لازم كل يوم بنفس الحاله؟؟
ويطلع مصبح:بلاكم
زياد:اروح احسن
وراح للحمام
مصبح:بلاه؟؟
نهيان:ازمت حمامات
مصبح:هههه اقول ترى سعود ما طاع يقوم يالله يا دورك هات جيك الماي
نهيان:يالله من ها الريال شو اللي يقومه غير الماي؟؟
مصبح وهو يسمع صوت الساعة اللي تنبههم لصلاة العصر:اقول يالله رح
"وبعدها رحت عشان اقومه وتعب منه لين ما قام وتوضأ وصلينا جماعة"
ع الساعة 4 العصر كالعادة لا يعه جبدي وعندي باجر امتحان وطبعا لازم ادرس قعدت في الحجرة"انا ومصبح وسهيل مكتوب لنا انا نقعد ف حجرة وحدة اما زياد وسعود في حجرة"
شقتنا عبارة عن غرفتين وحمامين وصالة تجمعهم مع المطبخ الصغير بس والله شقتنا حلوة"احساسي يقول جيه"احب اعيش فيها ما ادري لو رديت للبلاد ما اتأقلم ع الجو هناك وارد احن ع جمعتنا وسوالفنا وطبعا لازم استغل هالأيام لأن ما بقى غير سنه ونص خلاص برد بعدها وانا الصراحة ما احب البعد والفراق بتوله ع سوالف سعود وبعدين منو اللي بوعيه واجب عليه جيك الماي اما زيادوة اللي يقرى لي الكتب ويقولي عن امريكا وتاريخها القديم ومن اللي اكتشفها"اظني اميركو فوسبيتشي"ما ادري اذا هو نسيت بعدين بتأكد من زياد اما سهيل ومصبح بيكونون معايه واقدر الاقيهم "
قعدت ادرس والصراحة مالي بارض للدراسه فقررت ادرس من الساعة 6 لين 9 وبجذيه بخلص وفي هالوقت بروح لهوايتي المفضلة وهي السباحة انا مشترك ف نادي للسباحة واروح وقت ما اريد وبجذيه بغير جو وبرجع بنفسيه احسن عشان ادرس عدل طلعت ماي باق"اتفلسف عليكم"وحطيت لي شورت والفودة وشو بعد؟؟ما شي"طلعت وكالعادة سهيل يشرح لسعود كم مسأله اما مصبح وزياد يروحون للجامعة لأن عندهم محاضرة ف هالوقت "ما ادري ليش متعبين عمارهم وياخذون محاضرة ف هالوقت"
نهيان:انا بروح
سهيل:ع وين؟؟
سعود:أكيد على النادي
نهيان:هيه
سهيل:ترى باجر علينا امتحان
سعود:دخيلك تفهمني الصراحة ما افهم
نهيان:سهيل شو شغلته خله يفهمك مب مكفنك اني اوعيك من الرقاد
سعود:خلاص على راحتك
سهيل:متى بتدرس؟؟
نهيان:خلاص انا رتبت وقتي
سعود:خذني معاك
سهيل:لا انته صك محلك
سعود:شو؟؟شو هالكلمة؟؟
نهيان:صك يعني اجلس
سعود:وليش ما تريح نفسك وتقولها اجلس
نهيان:انته ما عليك منه يختصر الرمسه
سهيل:هههه انزين يالله لا تتاخر
نهيان:بااااااااي
سعود:باااااي
سهيل:فالح انته ما تعرف غير بااي
سعود:هههه حلوة
وبعد ما طلعت من عندهم رحت للمكان المفضل اليه وهو النادي واكثر اللي مشتركين فيه اجانب من لندن وكم من السعودية وعندي ربيع اسمه "جيمس" طيب لدرجة انه يسوي اللي اريده وما قصر معايه
"بقولكم باللغة العربية وانتوا اعتبروني اتكلم بالأنجلش لأنيه ما اعرف اتكلم هههه"
نهيان:مرحبا
جيمس:مرحبا
نهيان:كيف حالك؟؟
جيمس:بخير وانت؟؟
نهيان:بخير..كيف كانت الحفله؟؟
جيمس:هههه جيدة
نهيان:وهل واعدت حبيبتك؟؟
جيمس يتنهد:لا
نهيان:ولم لا؟؟
جيمس:لقد.."ويقعد يتلفت"...
نهيان:لقد ماذا؟؟اخبرني مابك؟؟
جيمس:لا شي
نهيان:هيا جيمس تكلم ما بالك الست صديقك؟؟
جيمس:نعم ولكن
نهيان:لكن ماذا؟؟
جيمس:اريد ان انسى الذي حدث
نهيان:وما الذي حدث؟؟
جيمس:رأيتها مع واحد غيري
نهيان:ماذا؟اتقصد انها تخونك؟؟
جيمس وعلامات الحزن:نعم
نهيان:ما عليك منها تخسي"اوووه شقاعد اقول؟؟
جيمس:عفوا؟؟ما ذا تقول؟؟فأنا لا افهم العربية؟؟
نهيان:ههه لا ولكن انساها وستلقى غيرها
جيمس:لكن محبتنا دامت اكثر من 6 سنين
نهيان:لا عليك يا صديقي انساها"حاولت اغير السالفة" هيا بنا لنتسابق سوف اسبقك
جيمس:ههه لا لن تستطيع
نهيان:الخاسر يدعوا الآخر على العشاء
جيمس:حسنا
وبعد ما خليته يضحك وواسيته"حليله حزني"لا تنسون انه صديقي والصراحه هو الوحيد اللي صادقته من اهل لندن وما بنساه وبشوف إذا عنده ايميل عشان اتواصل معاه
تسابقنا وتوقعوا منو الفايز؟؟

"في الشقة"
خوله كانت تدرس ودخلت عليها امها"مب كبيرة وايد بس عمرها حوالي 30 سنة"
شمسه:صباح الخير
خوله:مساء النور
شمسه:بلاج تقولينها من طرف خشمج؟
خوله:ما شي بس لايعه جبدي
شمسه:اكوه الباب مفتوح روحي وين ما تبين
خوله:اميه السالفه مب سالفت الطلعات انا متى ما اريد اطلع بطلع لكن انتي"تسكت"
شمسه:بلاني؟؟
خوله:ما شي اسكت احسن
شمسه:انا بلاني؟؟
خوله:انتي دومج مشغوله عنيه وكل ما تيين يا ترقدين ولا تطلعين
شمسه:اقول خوالي من متى وانتي ترمسيني أنا حره واطلع واروح واايي متى ما اريد وما حد له خص فيه انتي اهتمي بدراستج وخلصي تسمعيين؟؟
خوله:اسمع
شمسه:وترى في الإجازة بنسافر
خوله وهي تتأفأف:على وين؟؟
شمسه:ع فرنسا شو أسواق فيها؟؟لا راحت ولا يت
خوله:انا مابروح
شمسه:شو؟؟اقول انا معطيتنج ويه اسكتي وجابلي كتبج
خوله:اميه انا تعبت والله تعبت حرام عليج شو هالحياة؟؟ابا ارد للبلاد تولهت على اهليه واصلا ما اعرف حد فيهم حرام عليج معقوله في حد ما يعرف اهله؟ تولهت على ابويه حرام عليج اللي قاعدة تسوينه فيه
شمسه وهي تشهق:انا؟؟انا اسوي ها كله بج؟؟ الا حرام عليج انتي اخاف عليج وعلى مستقبلج وبعدين ابوج هو اللي طلقني مش انا اللي طلبت الطلاق ولو هو مفكر فيج ويحبج جان من زمان انتي عايشه عنده وفكني منج
خوله:اميه يعني انا مغثثتنج؟؟
شمسه:انت اصلا هم على قلبي تعرفين شو يعني هم؟؟ اروح ارقد ابرك لي من مجابل ويهج
في هاللحظة انهارت خوله وما صدقت اللي تسمعه"معقوله اللي قاعدة اسمعة؟؟ لا اكيد انا فحلم.. ليش؟؟ ليش؟؟ ليش حياتي جيه؟؟ ليش انا بالذات آه آه "وطلعت من الشقة والدموع ينزلن من عيونها وتمت تتمشى لين ما قعدت لها ع واحد من الكراسي وهو مجابله البحر

"في النادي"
بعد ما تسابقنا فاز عليه جيمس وعزمته ع العشا في الشقة وتواعدنا ع الساعة سبع وانا استسمحت منه ورجعت للشقة لكن وانا رايح شفت خوله قاعدة حسيت ان شي بلاها شكلها كان يحزن"
نهيان:السلام عليكم
خوله وعيونها معلقه ع البحر: وعليكم السلام
نهيان:ممكن اقعد؟؟
خوله:تفضل
نهيان:الله الصراحه الجو عجيب
خوله:هه وشو العجيب اللي فيه؟؟
نهيان:خوله..شبلاج؟؟
خوله:ولا شي ما بلاني شي ليش تشوف شي بلاني؟؟
"الصراحه استغربت من كلامها شبلاها ترد عليه جيه؟؟"
نهيان:آسف الظاهر انج متضايقه مني انا بروح
وهي تمسك يديه:لا مش متضايقه منك اقعد
وبعد ما قعدت:زين بتقوليلي شبلاج؟؟
خوله:آه شتبى بهمي؟؟
نهيان:المهم تفتحين قلبج وما تشلين هم عود
خوله:شو اقولك؟؟انا وحدة عايشه حياتها وحيدة بالرغم من وجود امي بس وينها؟؟لاهيه بشغلها وما تهتم فيه واذا قلت لها لا يعه جبدي قصدي اباها تسولف معايه تقولي يالله نطلع نتمشى او نتسوق المهم نطلع مع بعض احس ان عندي ام بس اللي قاهرني"وتصيح"انيه هم على قلبها؟؟معقوله؟؟ معقوله في ام ما تحب بنتها؟؟لكن ليش انا؟؟
نهيان:يمكن انها تعبانه من الشغل مش فاضيه "الصراحه اول مرة اتعرض لهالموقف وما اعرف شو اقول لها"
خوله:تعبانه كل يوم؟؟مشغوله كل يوم؟؟كل ساعة؟؟كل دقيقة؟؟كل ثانيه؟؟
نهيان:خوله لا تكبرين السالفه ما في ام في الكون تكرة بنتها
خوله:لا في اميه ..اميه اللي ما بتصدق متى بتفتك منيه شو تباني اسوي؟؟ اشرد عنها؟؟اتم عايشه في الغربه بروحي؟؟اقولها نرد لدبي عشان الاقي ابويه اروح اعرف عمومي وعماتي اعرف اهليه تصدق اني ما اعرف حد غير ابويه؟؟ حتى ربيعات ما اعندي ..بنات خاله بنات عمه ما اعرف حد فيهن ؟؟ حتى اميه ما اعرف اذا امها عايشه ولا ؟اذا عندها اخت ولا اخوان ما اعرف تصدق؟؟
نهيان: ول مب لهدرجة عاد
خوله: اقولك وانا صغيرة عايشه في الغربه حتى ديني ما اعرفه لكن وانا هنيه تعرفت ع مسلمات اجنبيات وعرفت ديني والحمدلله انيه متحجبه"ترى امها لابسه شيله لكن وجودها مثل عدمها"وحافضت ع عمري وعلمني الصح من الغلط..اللي لازم اميه هي اللي تعلمني اياه بس آه خسارة
نهيان:الحمد الله ع كل حال
خوله:الحمد الله
نهيان:يالله نرد ترى الليل يا
خوله:ليل ولا صبح ما بتفتكر فيه
نهيان:بس انا اخاف عليج
رفعت نظرها لي:صدق؟؟
نهيان:هيه انتي ماقلتي اعتبرج مثل اختيه؟؟يالله الأخو يخاف ع اخته
خوله:هههه والله احبك
نهيان:زين دامج تحبيني يالله نرد والله بدرت الجو ثلج
خوله:ههه يالله
وبعد ما مشينا تم كل واحد ساكت ما عرفت شو اقولها بس عليه اني واسيتها وبعدين شعرفني انا؟؟يادوبك اعرف اقول الله يعينج بس صدق والله ما حزنتكم؟؟عايشه بروحها من متى؟؟من وهي صغيره ما تعرف شي آه الحمد الله ع كل حال"
بعد ما وصلتها دخلت لشقتها ودخلت للشقة اللي لقيتها فوق تحت
نهيان:ياالله شو هالخياس؟؟
سعود:ههه اقولك
سهيل:ههههه شو بعد؟؟دخيلك تعبت
نهيان:يا سلام ها اللي قاعد يدرس؟؟
سهيل:والله ما لي ذنب هو اللي تم يسولف عليه
سعود:مالك يا راجل؟؟اقعد اسمع هالنكته
نهيان:هب قاعد يالله نشو ونظفوا هالخياس
سعود:الفوشار والبيبسي اخييس
"دخيلكم سدوا ذنيكم يوم بيرمس شرات رمستنا يحيس لسانه"
سهيل:خياس مب اخيييس
سعود:شو يعني؟؟
نهيان:تشوف الزباله؟؟لم كشرتك وعقها
سعود:أها الكشرة..
نهيان:طع هاذا اقول سهيل قم عنه خلني بجتله
سعود:والله؟؟اذا انته ما تبغيني ترى اهلي يبغونني
نهيان:الله يعين اهلك اقول يالله ترى اليوم العشى عليه بيينا جيمس
سعود:قرف يقرفه انا ما احب هالرجال
نهيان:والله ما غصبتك لو ما تبى اطلع يوم بيي
سهيل:دام فيها عشا وع حسابك ما اظني
سعود:ههه ابو الشباب تعرفني
سهيل:اعجبك انا خبرة 3 سنين
سعود:اييه لا تذكرني يارجال..الا اقول
نهيان:لا تقول شي ضف وجهك ولم كشرتك
سعود:هههه تعرف تتكلم بعد؟؟
سهيل:يالله شل الكتب للغرفة وانا برتب
سعود:الحمدالله مالي مزاج انظف
نهيان:انت اصلا متى صار لك مزاج تنظف؟؟
وبعد ما راح تم سهيل ينظف اما انا رحت للغرفة اتسبح وبدلت ثيابي وقعدت ادرس الساعة كانت حوالي 6 ما تأخرت وايد لكن بعد ما فتحت كتابي سمعت الحشرة برى"كملت الشله"يا مصبح وزياد من المحاضرة وغصب عني درست لأن بعد ساعة بيي جيمس وبكمل دراستي ع الساعة 8 لين عشر"الله يعينه"
مرت الساعة ببطء شديد وانا الا ادرس وبعد ما خلصت الجزء اللي قررت ادرسه فهالساعة طلعت عشان اشوفهم وين مصبح يدرس فالصالة اما سهيل ينظف حجرت زياد"نسيت اقولكم ترانا حاطين جدول كل يومين ع واحد يرتب الشقة والثاني ينظف والثالث يغسل الثياب والرابع يطبخ لنا اكله ف الشقة والخامس اللي هو سعود مايسوي شي"
قعد ع الكنبة عدال مصبح
نهيان:اخبار؟
مصبح:طيبة
نهيان:شو تدرس؟؟
مصبح:لا راقد
نهيان:ههههه اقول ترى اليوم العشى عليه
مصبح:هيه قالي سهيل
نهيان:اممممم
مصبح:شي ف خاطرك؟؟
نهيان:ها لا..
مصبح:متأكد؟؟
نهيان:الصراحة في وحدة تعرفت عليها
مصبح:دام السالفة فيها وحدة اسكر كتبي احسن
نهيان:هههه لا يروح فكرك لبعيد اعتبرها مثل اختي
مصبح:كيف تعرفت عليها ووين وشو صار و..
نهيان:حووووه شوي شوي عليه
المهم قلت له كل السالفة من اولها لآخرها
مصبح:حليلها والله تحزن
نهيان:انا عني قلت لها تعتبرني مثل اخوها وما حتاجت للمساعة فالها طيب
مصبح:ريال ما شاء الله عليك
نهيان:احم احم ادري
مصبح:يالغرور
وفي هاللحظة يدق الجرس واول ما فتحته ان جيمس ياي واستقبلنا وقعد يسولف مع مصبح ع بال ما اروح محل البيتزا"تراه الا عدالنا مب بعيد وايد" وبعد ما خلص سهيل من الترتيب قعد معاهم
بعد ما طلعت ولقيت الجو بارد رجعت للشقة ولبست الجاكيت وانا طالع ان خوله طالعة من شقتها
خوله:مساء الخير
نهيان:هلا مساء النور
خوله:ع وين؟؟
نهيان:ع محل البيتزا
خوله:أهااا
نهيان:تعشيتي؟؟
خوله:لا ليش؟؟
نهيان:شو رايج تروحين معايه؟؟
خوله:بروحك ولا؟؟
نهيان:لا انا عازم ربيعي وبنتعشى هنيه فالشقة
خوله بستغراب:وتباني اتعشى معاكم؟؟
نهيان:هههه لا بشتريلج وتعشي ف شقتج
خوله:هههه الحين فهمتك
نهيان:يالله نروح
خوله:يالله
وبعد ما نزلنا ونحن نمشي للمحل لقينا سعود وزياد رادين للشقة وسعود اول ما شافني تم يغامز لي"يتحراني معجب واونها ماي جيرل فرند"يغربله من تفكير
زياد:وين رايح؟؟
نهيان:انتوا اسبقوني ع الشقة وباييب العشى
سعود:ومين الحلوة اللي معاك
اضحكت خوله
نهيان:يغربلك..المهم روحوا وبايي
سعود:اها تبغي الفكة مننا؟؟
نهيان:اقول زيادوة شل سعود ولا الحين ارتكب فيه جريمة
سعود:هههه راح نخليك وحدك مع الحلوين
زياد:اقول امش جدامي مب ناقصين جرايم
خوله:هههههه
وبعد ما كملنا طريقنا تمت تسولف عليه وانا الصراحة تعلقت فيها افكارها طفوليه كلامها كله دلع ضحكتها تجنن"اوووه شو قاعد أقول؟؟ لا لا أنا اعتبرها كأخت لي لازم ما أفكر فيها ها لكثر "
وبعد ما طلبنا اللي نباه خذنا ورجعنا كل واحد لشقتة وعند باب شقتي
خوله:مشكور
نهيان:لا شكر ع واجب
خوله:تصبح ع خير
نهيان:وأنتي من أهل الخير
دخلت ولقيت الكل يضحك وشاركتهم القعدة

"ف شقة خوله"
دخلت وهي فرحانه"اول مرة احس بالفرح آه فديته الصراحة ما اريد اتعلق فيه هالكثر مع انه قال لي انه كم سنة وبيرجع ليش احبه واعلق قلبي وهم ف وهم؟؟بس احبه طيب حنون حساس ليش ما اخليه يحبني؟؟ بس هو قالها بلسانة"انا اعتبرج كاخت اليه"ما اظني بيحبني.."وهنيه حزنت" هه ومنو بيحب وحدة مثلي؟؟وحدة عايشة برى وماتعرف شي عن بلادها امها ضايعة ف ملذات الدنيا تدور مصلحتها؟؟منو اللي بيفكر فيه وبياخذني؟؟ آه انا انسانه محطمة خلاص مالي مستقبل غير الدراسة وعقبها اشتغل بس بشو بيفيدني هالشي؟؟ الوحدة مهما درست واشتغلت مردها لبيت ريلها بس انا ممكن اعرس؟؟مستحيل هالشي يستوي ..ليش؟؟ليش انا بالذات؟؟امي شو من البشر؟؟
لو هي تحبني وحاسة فيه جان ردت لأبويه ولا ع الاقل نعيش ف الامارات حد عندة بلاد مثل الامارات ويعيش ف بلاد غيرها؟؟ صح اني ربيت هناك بس ما اعرف شي عنها آه يا دنيا" سمعت صوت ف الحجرة
خوله:اميه..
.......
خوله:حد هنيه؟؟اميه انتي ف الحجرة؟؟
......"وسمعت صوت همس"...
خوله:اميه"وراحت للحجرة واول ما فجت الباب وشافت هالمنظر انصدمت ومن صدمتها طاحت البيتزا من ايديها وتمت تشوف اللي جدامها وهي مب مصدقة منصدمة"معقوله اللي قاعد يصير جدامي؟؟"
..................................
شو اللي قاعد يصير جدام خوله ؟؟وهل هالشي بيأثر فيها ولا؟؟
خوله وعلاقتها مع نهيان بتدوم من الصداقة للحب ولا بتم صداقتهم اخويه ؟؟

*الجزء الثالـــــث*
........................
......"وسمعت صوت همس"...
خوله:اميه"وراحت للحجرة واول ما فجت الباب وشافت هالمظر انصدمت ومن صدمتها طاحت البيتزا من ايديها وتمت تشوف اللي جدامها وهي مب مصدقة منصدمة"معقوله اللي قاعد يصير جدامي؟؟"
شمسة:خ خ خوله..؟؟انتي شو تسوي هنيه؟؟م م م مارقدتي؟؟
خوله:وصلت فيج الحقارة تسوين هالشي؟؟
عبدالله:انتي ما قلتيلها؟؟
خوله:شو تقولي يوم كل شي واضح كوضوح الشمس؟؟
شمسة:اقول خوله اطلعي وبلحقج
خوله:واذا قلت لج ما بطلع وهو اللي بيطلع؟؟
شمسة:خوله
عبدالله:سمسة انا بطلع وانتي لازم تقوليلها ولي رجعة
خوله:شو صاير
شمسة:عبدالله ريلي
وهنيه طاحن دموع خوله ما قدرت تمسك عمرها خلاص مب مصدقة"
خوله:شو؟؟
عبدالله:خوله اهدي ما صار شي
خوله:اهدا؟؟اهدا واميه معرسة وما اعرف شي عن الموضوع؟؟
شمسة:عبدالله اقعد انته وانا اللي بتفاهم مع بنتي
خوله:بنتج؟؟هه توج تذكرتي ان عندج بنت؟؟اقول خلاص دام انج عرستي وسويتي اللي فبالج ليش يكون عندج بنت؟؟خلاص انسي انسي ان عندج بنت..سامعة"وطلعت من الشقة"
عبدالله:خوله خوله صبر

وفي شقة الشباب
بعد ما تعشينا وخلصنا طلعت عشان اوصل جيمس اللي استانس ع قعدتنا وتميت اسولف معاه بس اللي استقربت منه ان خوله مرت عدالي وهي تركض وتصيح استسمحت من جيمس وركضت وراها لكنها قطعت الشارع والشارع متروس سيايير ومسرعة وتميت اناديها والحقها بس كانت اسرع منيه وقفت شوي لأن سيارة بتمر وماريد افقد عمرية وتدعمني هالسيارة بس المصيبة الكبيرة ان سيارة مسرعة واصدمتها
سيارة اصدمتها؟؟
خوله..لا لا لا..خولـــــــه
وركضت عشان اوديها للمستشفى وجيمس وقف تكسي وساعدني عشان اشلها
طول الطريق وانا خايف "شبلاها؟؟ليش كانت تصيح غريبة هالكثر امها تجرحها؟؟"
جيمس:هل انت تعرفها؟؟
نهيان:انها صديقتي
جيمس وهو يكلم التكسي: لوسمت اسرع انها تنزف
نهيان:هل تملك كلينكس؟؟
التاكسي:تفضل
نهيان:شكرا..اسرع قليلا الا يوجد مشفى قريب؟؟
التاكسي:امهلني ربع ساعة فقط
نهيان:وين بييني صبر آه يا خوله شو صار لج؟؟
جيمس:ماذا؟؟
نهيان:لا لا شي
وبعد ما وصلنا وانا ع اعصابي وخايف ليصير بها شي ودخلوا لغرفة الطوارئ اما انا من الخوف ما رحت اغسل يديني من دم خوله اللي كان ينهمر بغزارة
وبعد طول انتظار طلع الدكتور
نهيان:هاه دكتور هل هي بخير؟؟
الدكتور:ومن تكون انت؟؟
نهيان:أأ
جيمس:انه خطيبها
نهيان:شو؟؟
الدكتور: تفضل الى مكتبي
نهيان: حسنا
وانا اوجه كلامي لجيمس: انتظرني هنا
جيمس:حسنا
رحت للدكتور اللي شرحلي حالت خوله والحمدالله ماصار بها شي والصدمة ما كانت قوية وايد بس طلع عندها كسر ف يدها اليسار وكم شبخ ع ويهها وبعد ما تطمنت عليها رحت لجيمس وطمنته ووصيته عشان يروح لربعي ويقولهم اللي صار واني بتم عند البنت انا طبعا ما اقدر اخليها بروحها اخاف تقوم وما تعرف اهي وين "وتكفلت بدفع الفلوس للدكتور "
بعد ما نقلوها لغرفة كانت غارقة ف نوم عميق الساعة كانت حوالي 9 ونص ما ياني رقاد تميت اطالع من الدريشة ع الناس الجو هدوء لكن حسيت بحركة خفيفه وكأنها قالت شي آه و ياليتني ما سمعتها كانت تنطق بأسم محرومه منه من وهي صغيرة "ابويه"الله يعينها هالبنت والله حرام ع امها شو اللي قاعده تسويه فبنتها؟؟ وقامت
خوله:آه ابويه
نهيان:الحمدالله ع السلامة
خوله:انا وين؟؟
نهيان:ف المستشفى
خوله:شو صار؟؟
نهيان:مسرع نسيتي؟؟
خوله:اميه وين؟؟هاه وانا شو لا لازم اكون هناك
نهيان وهو يهديها:خوله بلاج؟؟
خوله:اميه طلعت معرسة ومن زمان
نهيان:شو؟؟
خوله:نهيان اكرها اكرها ما احبها ارجوك ابعدني عنها
نهيان:خوله انتي شو تقولين؟؟
خوله:هي تحب ريلها شو تبابي؟؟
نهيان:خوله استهدي بالله لازم اطمن امج عليج
خوله:لا لا تقولها ارجوك اترجاك خلها تعيش حياتها وخلني اعيش حياتي
نهيان:وين بتروحين ؟؟انتي ما تقولين انج وحيدة؟؟وين بتعيشين؟؟
خولة:أي مكان أي مكان لكن مب معاها اخ
نهيان:شبلاج؟؟
خوله:يديه تعورني
نهيان:خوله استهدي بالله ومن اصبح افلح
خوله:نهيان امانة لا تقول لأميه
نهيان وهو يتنهد:خلاص
ردت وحطت راسها ع المخدة وانا للحين واقف عند الدرشة وكان الجو هادئ وفجأة اسمعها تقولي شي
نهيان:شو؟؟
قعدت تقول لي جمل من كلمات حزينة
خوله: هدوء..سكون...صمت شاحب
لا رفيق لا صديق..لا صوت صاحب
مدري لوين راحوا الناس
يم الجفــــــــــــا او يم الاحساس
حتى الدموع في العيون ذبلت
حتى الظنون في الجروح كبرت
يا غربت الروح قولي وين اروح
في عيني سراب و فهمي وضوح
يا صمتي الساكن في جرحي العتيق
ضاع السفر لكن باقي الطريق
ما بقالي غير الخوف يونسني
صوت الماضي بوجودي يذكرني
ما بقالي انا الا انا
وروح كلها حزن وعنا
هــــــــــــــــــــــــ ـدوووووء صمت
واسكتت لكن انا شو؟؟الصراحه اول مرة انحط فهالموقف ما اعرف شو اقول لها كيف اتصرف
نهيان:خوله انا زعلان
خوله بصوت حزين:ليش؟؟
نهيان:انا وين رحت؟؟
خوله:يوم انته خلاص رايح رايح
نهيان:ما فهمت
خوله:باقي لك كم سنة وبترد البلاد
نهيان:لكن ما بنساج والحين استغلي وجودي وانا ما بقصر معاج
خوله:بس انا ما اريد اتعلق فيك واحبك
نهيان:يعني كل هذا حب؟؟خوله في شي خطا الكل يطيح فيه وهم تفسيرها الخاطئ بعض الناس لي تعاملت معاهم بطيب وحبيتهم يفسرون هالتعامل كحب ويطيحون ف دوامة مالها نهاية
خوله:ما فهمت
نهيان:انا اعتبرج مثل ختيه واحبج مثل محبتي الها ولا تظنين كل اللي اسويه لج دافع بالحب واني اموت فيج وما اقدر افارج يعني تعرفين قصدي العلاقة اللي بيننا ما تتعدى الصداقة وبس
خوله:نهيان انا آسفه
نهيان:ههه ع شو؟؟
خوله:ع كل اللي مضى
نهيان:زين ما يتقوليلي شو ف خاطرج؟؟
خوله:في خاطري شي وايد وما في وقت
نهيان:افضي وقتي لج
خوله:نهيان شو بيكون موقفك اذا دريت ان امك معرسة من وراك والمشكلة متى صار ها كله انا ما عندي مانع لكن ما فكرت تشاورني او ع الاقل تقولي والله كرهت حياتي ليش كل ها يصير بيه ليش انا بالذات والله حرام حرام
نهيان:خوله هدي والله تلاقين امج خايفة عليج الحين
خوله:خلها تتهنا فعريس الغفلة
نهيان:اقول الصراحة انتي مب راضية تفهمين الحياة اللي انتي عايشتنها
خوله:افهم شو؟؟يوم كل شي واضح واولا امي اللي ما تحبني واني هم ع قلبها وثانيا اني وحدة عايشة بلاهدف عايشة ف الغربة ولا تعرف الحياة اللي هي عايشتنها امها ضايعة وهي بكبرها ضايعة منو اللي يرضا بيه لو رجعت الامارات عند ابويه يمكن يستقبلني ولا بيقول لا اكيد طالعة ع امها ومستحيل يخليني اعيش عنده وبيتبرى مني
نهيان:شفتي هالمشكله اللي فيج ليش تسبقين الاحداث..عيشي حياتج ابذلي جهدج انج تكلمين ابوج باي طريقة وانج تحاولين تردين الامارات حاولي تثبتين وجودج وخلي الناس تدري ان ابوج له بنت وحاولي تكسبين ثقته فيج وبعدين لو شافج متحجبة ومحافظة على دينج وعاداتج وتقاليد مستحيل يقولج ماريد او لا تعيشين معايه
خوله:امممممم
نهيان:في شو تفكرين؟؟
خوله:افكر في ابويه كيف شكله؟؟وعندي اسأله وايدة ظنك ابويه معرس؟؟ عنده عيال؟؟شو حياتهم ؟؟كيف عايشين؟؟
نهيان:انتي مافكرتي تسألين امج عن ابوج؟؟
خوله بضحكت استهزاء:هه كل ماسألها تقولي ماعرف ومادري شو وتتهرب مني كأنها ماتعرفه
نهيان:زين امج ماعنها اخوان؟؟ولا خاوات؟؟
خوله:ماعرف بس اظني عندها اختين بس ماعندها اخوان
نهيان:اممم
خوله:تعبتك معايه صح؟
نهيان:لاتعبج راحه
خوله:الله يعلم كيف بتصير حياتي من عقبك
نهيان:ان شاء الله تنحل امورج قبل لارد للبلاد
خوله:ماظني
نهيان:تعرفين شو اللي مايعجبني فيج؟؟
خوله:شو؟؟
نهيان:يأسج في الحياة ماتحاولين تحطين امل جدامج او هدف وتسعين للوصول له احسج تبين تتحسنين بس خايفه مب متفائله
خوله:انته قالتها بعظمة لسانك
نهيان:زين اخليج وباجر باييج
خوله:لا خلاص بطلع
نهيان:لا الدكتور وصاني ع الاقل تباتين يوم واحد بس
خوله:وتكاليف العلاج؟؟
نهيان:لاتهتمين كل شي تم
خوله:مشكور ليش كلفت عمرك؟؟
نهيان:لاتكلفه ولاشي انتي ختيه
وبهالكلمات رديت ابتسامتها العذبة اللي يالله يالله تطلع
نهيان:تصبحين على خير
خوله:وانته من اهل الخير وهاه لاتنسى لا تقول لأميه
نهيان:اوكي
وطلعت من المستشفى للشقة وكان الطريق طويل شوي والصراحة تعبان وهلكان وما كملت دراستي للامتحان باجر يعني برد ادرس لين نص الليل
بعد ماوصلت لقيت الكل قاعد وقلت لهم السالفة وتطمنوا ع البنيه ورحت ادرس ماريد اضيع الوقت اخاف ارقد وانا ماسك الكتاب

"في الامارات"
كان الوقت ع الساعة 10 الصبح في ابوظبي ومها واعية كان الاربعاء وعليهم رحله للعين وهي مالها نفس تروح فراحت للصالة اللي تجمع الكل بس هي فاضيه مافيها غير اليدة شيخة
مها وهي تهوي ع يدتها وتحبها ع راسها:السلام عليج يدووة
اليدة:وعليج السلام مرحبا
مها:شحالج يدوة؟؟
اليدة:بخير هاه تريقتي؟؟
مها:لا
اليدة:الريوق ع الطاولة وجانج تبين ماكرونا في الطاسه
مها:ان شاء الله
اليدة:عيل الساحرة وينها عنج؟؟
مها:منو؟؟
اليدة:عليوووة
مها:اظني ف الجامعة
اليدة:وشو بتشتري في اليامعة؟؟
مها:هههه يدتيه عليا راحت المدرسة المدرسة
اليدة:قولي المدرسة
مها وهي تروح للصينيه عشان تتريق:يدووة
اليدة:هاه
مها:يسلم عليج نهيان
اليدة:متى رمستيه؟؟
مها:البارحة ف الليل
اليدة:وشله ماخليتيني ارمسة؟؟
مها:يدتيه ارمسة في المسن
اليدة:حتى انا برمسة في المييسن
مها:ههههه المسن بس يدتيه ماترمسين لا تكتبين وهو يكتب
اليدة:بعد جيف هذا
مها"شو بقولها ولاكيف بشرح لها؟؟":امممم من الكمبيوتر
اليدة:امحق هب من التلفون؟؟
مها:لا
اليدة:انزين هاه طالعي الرادوية وينه؟؟
وتييب مها الرادو لها:دوج
اليدة:شو هذا؟؟
مها:رادوج
اليدة:امممم يابنتيه هاك اللي يرمسون فيه بدق لأم هادف
مها:هههههه قولي التلفون
اليدة:تلفون تلفزيون رادوا كله واحد
مها:لا مش كله واحد
وتروح عشان تييب التلفون وتتصل ليدتها

"في لندن"
ع الساعة 6 الصبح رنت ساعتي وقمت بتعب مارمت استحمل البارحة رديت متأخر وكملت دراستي مارقت الا الساعة وحدة والله تعب
قمت وخذت لي شاور ع السريع وكملت دراستي اللي باقي لي قسم صغير واخلص وامتحاني ع الساعة 9بس انا عدني بروح لخوله اللي من البارحة وهي في المستشفى

"في شقة شمسة"
كانت على اعصابها من البارحة وهي خايفة على خوله وماتعرف وين راحت وترقب ريلها يتصل يطمنها عليها بس ما من خبر
وفجأة تسمع صوت المفتاح وهو يدخل في الباب فطلعت للصاله
عبدالله وهو داخل:السلام عليكم
شمسة:هاه بشر؟؟
عبدالله وهو حيران مايعرف شو يقول لها
شمسة:شو صار؟؟
عبدالله:سألت عنها و...
شمسة:شو؟؟
عبدالله:انا مش متأكد اذا هيه ولا لا؟؟
شمسة:تراك بتذبحني ارمس
عبدالله:واحد قالي ان البارحة فيه وحدة داعمتنها سيارة
شمسة:لا لا مب هيه
عبدالله:بس قال لي انها متحجبة
شمسة:.......لا لا مستحيل انزين وينها؟؟
عبدالله:قال لي ان واحد مثلنا يعني انه من الامارات شلها مع التاكسي ومعاها واحد من هنيه
شمسة:هييه عرفته احيدني شفتها مع واحد واعرفة هو معانا في نفس البناية
عبدالله:ماتعرفين وين شقته؟؟
شمسة:صبر
واركضت تبدل ثيابها وبعد ماخلصت راحت مع عبدالله لشقة نهيان
"رن رن رن رن رن رن"
نهيان"غرييبة منو اللي بيزورنا في هالوقت؟؟لا يكون خوله طلعت من المستشفى؟؟لا لا اصلا لازم اوقع على خروجها ماتروم تطلع من دون توقيعي"
فركضت للباب لأن الكل راقد وصوت الجرس يزعج الواحد بس فشله اول ما فتحت الباب كنت لابس بجامتي واستحي اطلع لحد بس شو اسوي نسيت عمري
شمسه:السلام عليكم
نهيان:وعليكم السلام هلا
شمسة:وين بنتيه؟؟
نهيان:منو انتي؟؟وأي بنت؟؟"لأنه ماقد شاف ام خوله"
شمسة:آسفة ماعرفتك عليه؟؟انا شمسة ام خوله
نهيان:هلا بس ماعرف وينها
عبدالله:لاتجذب انته البارحة مودنها المستشفى
نهيان:هاه
شمسة:الله يخليك ارجوك قلي وينها؟؟
نهيان:والله هي قالتلي وحلفتني ماقول
شمسة:ليش؟؟
نهيان:مادري
شمسه:زين بس بتطمن عليها
نهيان:هيه بخير والحمدالله
شمسة:هي هنيه في الشقة؟؟
نهيان: شو؟؟ انا تبيني اخلي وحدة غريبة معايه في الشقة؟؟ شو تبين العرب يقولون علينا؟؟
شمسة:عيل وين؟؟
نهيان:انا الحين مشغول ع الساعة 7ونص بروح للمستشفى وبوديج لبنتج
شمسة:لا الحين تقول لي
نهيان:بس مايسمحون للزيارت الا الساعة 8
عبدالله:شمسة استهدي بالله وهو مثل ما قالج بيوديج عقب
شمسة:خلاص انا ارقبك
نهيان:انزين
عبدالله:وسامحنا على الازعاج الظاهر كنت راقد؟؟
نهيان:لا ازعاج ولا شي لكني كنت واعي ادرس للأمتحان
عبدالله:بالتوفيق ان شاء الله بس ماقلتلي اسمك؟؟
نهيان"بكل فخر":معاك نهيان من ابوظبي
عبدالله:يا مرحبابك انا عبدالله من دبي
نهيان:يا هلا
عبدالله:عيل اخليك تكمل دراستك ونحن نرقبك
نهيان:الله يحفضكم
وبعد ماراحوا تميت واقف عند الباب اشوفهم وهم داخلين يعني هذا ريل ام خوله؟؟باين عليه انه ريال ما شاء الله بس غريبة ليش خذ ام خوله؟؟يووه الحين ش لي انا بهالكلام؟؟خلني ادرس ابرك
وبعد مارجعت للحجرة وخذت كتبي قعدت في الصالة ادرس اما الشباب راقدين وللحين محد قام

"في المستشفى"
كانت خوله منسدحة ع شبريتها وكانت الدريشة عدالها تمت تطالع خلق الله اللي رايح واللي راد وهي تفكر في حالها شو بتسوي؟؟
"انا لازم ارد للإمارات لازم اعرف وين ابوية ووين عايش خلاص مليت زهقت من هالعيشة ماريد اعيش في الغربة اريد ارد اريد ارد صبر..احيد اميه كانت تكلم ابوية.."خنقتها العبرة"
هيه الرقم الرقم اللي كتبته على على كرتون الكلينكس في الصالة بس صبر انا احيدني عقيته في زباله المطبخ لا لا يارب انه للحين مكانه والله بموووت"

"في الامارات"
كانت مها قاعدة تشوف التلفزيون وتدخل عليها يدتها
اليدة:مهاااية
مها:لبية
اليدة:ماشفتي حرمة اخوج منصور وين؟؟
مها:هيه قبل شوي رايحة لبيت هلها
اليدة:هيه وانتي شو تسوين؟؟
مها:اشوف التلفزيون
اليدة:مجابله هالعلة؟؟تعالي جابليني بداله
مها:هههه ان شاء الله
وبعد ما اقعدن في الصالة تمت اليدة تسولف على مها اما مها كانت تفكر في اخوها الحين قربت الاجازة باقي لها كم اسبوع يعني بروح له "آه يا نهيان والله تولهت عليك"صح قالي بيطرش لي رساله ياربي اذا رحت الحين بتعصب يدتيه شو اسوي؟؟
وهنيه رن تلفون البيت وتطلع حرمة تبى اليدة وكلمتها ففرحت مها وانتهزت الفرصة وراحت تشغل المسن
لقت رساله من اخوها ومثل ماوعدها لأنه قال لها بيطرش رساله مهمة
"السلام عليكم ورحمة الله وبركاته
اختي الغالية مهاااايه
شحالج؟؟واخبار اماراتي الحبيبة؟؟
والله تولهت عليكم كلكم وارقب الايام تمر عشان اشوفكم هنيه عندي وتفرح عيوني بشوفتكم
"مها"
مثل ماوعدتج اني بطرش لج رساله مهمه وارجو انج تقرينها عدل
وتفهميني وماتسيئين الظن بيه
اولا انا تعرفت على بنت طيبة وحبوبه وهي من الامارات انا ماتعرفت عليها للهو واللعب بالعكس انا تعرفت عليها لمساعدتها حزنتني بقصتها وعديتها كأخت اليه يعني غلاتها بغلاتج وهي والحمدالله متحجبة وتخاف ربها ففكرت انج تتعرفين عليها وتكونن خاوات شو رايج؟؟
وبعدين بقولج قصتها الحين انا مشغول بروح ادرس باجر عليه امتحان ومادرست عدل واليوم عازم ربعي ع البيتزا الله يعيني عليهم..سلمي ع الكل..
اخووج..نهيان.."
هالرساله مطرشنها من البارحة قعدت تقراها مرة ومرتين وثلاث فكرت في البنيه اللي تعرف عليها اخوها وهي صدقته في كل كلمة يقولها ومستحيل انها تجذبة"لكن اللي خرب عليها ان يدتها محتشره تحت لأن محد عندها ونزلت لها

"في لندن"
خلصت من الدراسة الساعة صارت 7 ونص ييه بروح اتلبس وبمر على ام خوله
دخلت للحجرة ولقيت مصبح توه قايم من الرقاد
مصبح:كم الساعة؟؟
نهيان:سبع ونص
مصبح:وين بتروح؟؟
نهيان:بروح للمستشفى بطلع خوله وعقب بروح للجامعة
مصبح:شحالها؟؟
نهيان وهو يبدل ثيابة:بخير بس تراني مابلاقيكم الا في الجامعة ترى عندي امتحان
مصبح:انزين قذيتنا من البارحة امتحان وامتحان جن محد عنده امتحان غيرك؟؟
نهيان:زين جب جب لا تضيع وقتي
وعقب ما تلبست وتعدلت وتكشخت"لبست بنطلون جنز ازرق وقميص احمر زاهي ولبست الكاب وخذت كتبي في يديه وطلعت عشان ما أتأخر ودقيت على أم خوله اللي كانت متجهزة هي وريلها عبدالله
وبعد ماطلعنا كنت بطلب تاكسي بس كانت عنده سيارة ورحنا للمستشفى
دخلت وكان المستشفى مليان بالمرضى وبعد مارحنا لحجرة خوله وعند الباب
نهيان:صبر انا بدخل عليها وعقب بدخلكم
شمسة:لا انا اللي بدخل
نهيان:بس انا وعدتها اني ما اخبركم والحين لازم اقولها وماريدها تعصب عليه لأنها واثقة فيه
عبدالله:شمسه خليه يدخل
شمسة:خلاص بس لا تتأخر
نهيان:ان شاء الله
وبعد ما دقيت الباب دخلت وانا مبتسم عشان ماتعصب عليه لأني خبرت امها لكن..........
الشبرية معفسة وين خولة؟؟ يمكن في الحمام بس...
باب الحمام مفتوووح.....
وينها....
......
وينها؟؟ظنكم شردت؟؟لا لا ماتسويها...شو بيصير بها؟؟